ВӦРСА ГӦСЬТ

Мамыслӧн эз на удит пачыс ваймыны, а батьыс вӧрысь нин тшак тыра пестерӧн воис.

— Батьӧ локтіс! Батьӧ локтіс! — Радысла чеччалыштіс да кекӧначасьыштіс Катя нылыс. А сэсся и ыждалыштіс на. Мыйла пӧ вӧрас менӧ тшӧтш эн босьтлы, кӧсйысьлін да.

— Чӧскыда зэв узян да, эг убӧлит чеччӧднысӧ, — дорйысьыштіс батьыс да мыччис нывкаыслы чумансӧ. — Ноко, на босьт, да пражитны чожа дасьтыштӧй. Со Васильным отсыштас и. Ме сэк кості мыссьышта.

Василь вокыс Катя дорысь ар кыкӧн ичӧт. Кызіник. Путкыль кодь тапикасьӧ. Мамыскӧд дзик пыр дасьтіс дозмук да тшӧтш пуксис Катя дорӧ тшак весавны.

— Меным эсійӧс! Меным эсійӧс! — Василь ичӧт кекӧньнас судзӧдчис кӧлӧб кодь гӧрд юра тшаклань.

Мамыс сетіс. Катя пыр и чушкӧдіс парсӧ:

— Ме сійӧс жӧ, гӧрд гобсӧ, кӧсйи босьтны.

— Но-о, Катенька миян — молодеч! Гӧрд гобтӧ тӧдӧ нин! — дӧзмӧм пыдди ошкыштіс нывкасӧ мамыс да пыр и вӧзйис. — Видзӧдлы, уртшакъясыс гӧрд юраӧсь жӧ. Найӧс тэ кутан весавны. Вылісьыс гӧрд кеньсӧ колӧ кульны. Ми Васюккӧд пуртӧн кутам вундавны. Куимӧннад ӧдйӧ и слӧймӧдчам. И эсійӧ рыжикъяссӧ тшӧтш крӧшитам. Рыжикыслӧн вылысыс сӧмын пемыдруд, а улысыс гӧрд жӧ. Видзӧд, мед мукӧд тшакыскӧд эн сорлав.

Катя шеныштіс кинас. Ме пӧ ог кӧсйы уртшакъястӧ да рыжикъястӧ. Ме пӧ эсійӧс кӧсъя, ыджыд тшаксӧ. Кутшӧм сійӧ ыджыд да еджыд! Дзик тасьті кодь!

— Сійӧ ельдӧг. Солалан тшак. Сійӧс ми лун куим кежлӧ ваӧ кӧтӧдны пуктылам. Эсійӧ еджыд путникъяссӧ и. Ягсеръяссӧ солалам жӧ, — кайтліс мамыс да торйӧдаліс солалансӧ пражитан тшак дорысь. — А пражитнытӧ со масленикъяс эмӧсь на дай. Вылысыс налӧн нильӧг, а пытшкӧсыс ой еджыд да сӧстӧм. И чӧскыд!..

Батьыс мыссьӧма, вежӧма паськӧмсӧ. Тшӧтш локтіс тшак весалысьяс дорӧ.

— Дзик пыдӧсас нӧшта на эм пражитан тшакыс, — шыасис сійӧ. — Кык дона гоб аддзи. Зэв кыз подъяӧсь. Миян Васюк кодь зумыд багатыръяс.

— Вай меным найӧс, ме кодь ёнъяссӧ, — пыр и ышмыштіс пиыс.

— И меным тшӧтш! — эз кольччы Катя.

— Сета! Дзик пыр судзӧдам!

Батьыс лукйысьыштіс пестерас да сэсся горӧдіс:

— Ёкмарьёк! Со тай коді менам чуманад пырӧма!

— Гаг сійӧ, гаг! Вины колӧ! — чилӧстіс Катя да дась нин вӧлі кватитны гагтӧ, пычиктыны гыжъяс костас. Но батьыс чирыштіс:

— Оз позь вины вӧрса гӧсьттӧ. Кодзувкот тайӧ. Кыдзи и веськалӧма? Ай-мамыс да чой-вокыс, пӧди, корсьӧны, бӧрдӧны, а сійӧ — ми ордӧ воӧма! Гӧститны Катя да Василь ордӧ! Ноко, Василёк, лӧсьӧд кекӧньтӧ, мед визъялыштас тэнад сой кузя.

— И меным тшӧтш! И меным тшӧтш! — кайтіс Катя.

— Нӧрӧвитлы, нӧрӧвитлы. Удитан, — шуис батьыс. А ичӧт Василь видзӧдіс, кыдзи визъялӧ ки вывтіыс кодзувкотыс, да гигзис-сераліс.

Нюмъяліс и мамыс. А Катя аслас мӧвпӧн нин юксис:

— Ме сійӧс истӧг кӧрӧбӧ-чомйӧ йӧрта да кампет сета. Мед ме ордын гӧститас.

— Позьӧ и кампет, — шуис батьыс. — Кодзувкотъясыд юмовтӧ ёна радейтӧны. Позьӧ и истӧг кӧрӧбӧ меститлыны. А сэсся, ме чайта, бӧр вӧрас колӧ нуны. Мед мамыс да батьыс оз бӧрдны, мед чойыс да вокыс оз корсьысьны.

— Нуам, нуам! Ми тэкӧд аски тшактӧ вотны мунам дай нуам, — радлыштіс Катя. Но батьыс стӧчмӧдыштіс:

— Он мекӧд, а мамыдкӧд ветланныд. Сикт туй боксьыс матысь пув аддзылі. Верманныд талун жӧ, либӧ аски пувйысла ветлыны. Ӧти сайысь и дона гӧсьттӧ бӧр нуанныд. А Васюк — горт олас.

Катя бара на пондіс кекӧначасьны.

— Со ӧд, со ӧд, водз асывсяньыс мыйта радлуныс талун миян, — нюмъяліс мамыс.