КЫЛАЛӦ ЙИ

ВОРСЫСЬЯС:

ӦГАШ БАБ — 82 арӧса

ЛЮБА — сылӧн ныв, ар ветымын квайта

ЛАРИСА — Любалӧн ныв, ар кызь вита

УСЬТИК — Любалӧн мӧд нылыс, помалӧ школа

НИКИТА — Усьтиклӧн ёртыс

СТЕПӦ — сиктса зон

ГРИША — Ӧгаш баблӧн зятьыс

ВАДИМ ПЕТРОВИЧ — сиктса учитель

АНАСТАСИЯ — карса ныв

ПАЛАДЬ — сиктса пӧч

ВАЛЯ — сылӧн нылыс

Занавес воссьытӧдз юргӧ сьылӧм

Лыньгӧ шонді, пӧльтӧ вильыш лун тӧв.

Эжва юӧй, садьмы, пальӧд унтӧ.

Ойдӧм видзьяс вылӧ ваыс туӧ,

Бара локтӧ тулыс Коми муӧ.

ВОДДЗА ПЕТКӦДЧӦМ

Сиктса керка пытшкӧс. Ен ув пельӧсын пызан, югыд, ыджыд ӧшинь. Ӧшинь дорас туалет пызантор, пуклӧсъяс. Ставыс мича, сӧстӧм.

ӦГАШ БАБ (вайӧ пызан вылас пӧжас, бертовтӧ ӧти кӧлӧб, чӧвтӧ пернапас ен ув пельӧслань копрасьӧмӧн). Пӧмини, Господи, Максимушкоӧс менсьым. Дона мам-батьӧс и дед-бабӧс, муса вокъясӧс и. Вошйӧй да сибӧдчӧй пӧсь нянь дорас. Кӧлӧбъясыс то менам вичко юр кодьӧсь, пушыдӧсь артмисны.

ЛАРИСА (петӧ пытшкӧс жырсьыс). О, бабуклӧн пачсьыс пӧсь нянь нин петӧма, а ме век на узя!

ӦГАШ БАБ. Войбыд тай мыйкӧ би ӧзйис. Бара нига лыддин?

ЛАРИСА. А сэтшӧм лӧсьыд книгаыс. Дугдыны эг вермы, кытчӧдз эз помась.

ӦГАШ БАБ. Лыддьысянныд тай, синнытӧ тшыкӧданныд. Дедыдлӧн талун кулан луныс, мыссьышт да казьтыштам.

ЛАРИСА. Энлы, ме первой зарядка вӧчышта, унзільӧс пальӧдышта. (Заводитӧ вежнясьны.) Раз и два! А-а-а!

ӦГАШ БАБ (нерыштӧ внучкасӧ, вежнясьӧ жӧ). Ӧні тай ставныс зарядкаасьӧны. Ме олӧмбыд видз-му вылын уджалі, да сійӧ и вӧлі зарядкаыс-а.

ЛАРИСА. Сытӧгыс ӧд тшӧган, этатшӧм кӧлӧбсӧ сёйигӧн. (Песласьӧ ки-кокнас.)

ӦГАШ БАБ. Эг и тшӧглы некор. Дай кӧлӧбыс эз пыр вӧв. Ӧні тай эськӧ, он кӧ дышӧдчы, эм да. Асьным ог гӧрӧй ни кӧдзӧй... (Ышлолалӧ.)

ЛАРИСА (сывйыштлӧ бабсӧ, бергӧдлӧ). Тэ миян став вӧснаыс майшасян. Ладмас коркӧ сиктса олӧмыс бӧр!

ӦГАШ БАБ. Дай-тӧ Бог, эськӧ. Да ӧд видз-муыс эндӧ. Ичӧтдырйи, помнита, тыла октам, колхозлы видз-му вӧчам. Ӧні эновтісны ставсӧ. Ёгор дядь воксикыд тай фермеравнытӧ боссисны да мыйкӧ мында гӧрлӧны-кӧдзлӧны на-а. Сэсся... Да мый сёрнитнысӧ!.. (Шеновтчӧ кинас, вешйӧ пызанланьыс, кисьтӧ самӧварсьыс чай да водзӧ сёрнитӧ.) Ёгор гозъятӧ гарышті... Талун асывнас водз Ёгорикаыс воліс, мамтӧ чукӧстіс. Красуля пӧ пиасьныс оз вермы. Мунісны. Усьтик, чикыш бӧжыс, тшӧтш мамыс бӧрся вӧтчис.

ЛАРИСА. Сійӧ, биа-борда, оз вӧтчы! (Петӧ мыссьыны мӧд жырйӧ.)

Ӧшинь сайын кылӧ Никиталӧн гӧлӧсыс: Юсьтик!

ӦГАШ БАБ. Со бара нин чуксасьӧ сылӧн асъя петукыс! (Видзӧдӧ ӧшиняс, ӧшинь вывсӧ ветьӧкӧн чышкаланмоз.)

ЛАРИСА (тэрыба пырӧ жырйӧ, заводитӧ пасьтасьны). Никит школаӧ нин мӧдӧма. Усьтиктӧг ӧти асыв школаад оз мун. Меным ӧд мунны жӧ колӧ. Куим урӧк талун. Бӧрас на кольччыны ковмас и. Репетиция вылӧ. Сьпектак дасьтам Победа лун кежлӧ. Медглавнӧй гӧстясӧ медводзас пуксьӧдам! Бабук, тэ миян медбӧръя участник кӧ нин колин-а?

ӦГАШ БАБ. Мыйла сідзи шуан, нучка? А Паладь пӧчыд, Марпа... Найӧ ӧд война вылад эз кӧть ветлыны, танісӧ ёна жӧ мырсисны. Дасьтӧй, дасьтӧй! Ставнымӧс чукӧстанныд! Пассибӧ на бурӧс шуам.

Тӧв ныр моз пырӧ Усьтик, шыбитӧ вывсьыс паськӧмсӧ.

УСЬТИК. Бабӧ, бабӧ! Красуляыс кык кук вайӧма! Оль-Оль, сэтшӧм ичӧтикӧсь, зільӧны кок йылас сувтны! Оль-Оль-Оль! (Петкӧдлӧ.)

ӦГАШ БАБ (нюмдӧ внучка вылас). Но, гар чӧрсӧ, вай вежсьы да сёйышт. Никитыд важӧн чуксасис.

УСЬТИК. Ой, Никит... Сёрма и эм! Вай ӧдйӧнджык сёйышта! (Кватитӧ пызан вылысь кӧлӧбсӧ, тэрмасьӧ, пасьтасьӧ и сёйӧ.)

ЛАРИСА (пасьтасьӧма нин, петӧ мӧд жырсянь, веськӧдчӧ петан ӧдзӧслань). Ме муні. Усьтик, вӧтӧд!

УСЬТИК. Нӧрӧвитлы. Ӧтлаын мунам.

Ӧдзӧсас мыччысьлӧ Никиталӧн юрыс: «Усьтик!»

ЛАРИСА. Аддзан... (Петӧ.)

УСЬТИК. Никита! Час, час! (Кватитӧ кык кӧлӧб, сюйӧ сумкаас.) Аслым и Никитлы. (Уськӧдчӧ ӧдзӧсас.) Бабӧ, ме муні!

ӦГАШ БАБ (лапйӧдлӧ кинас). Пуксьӧмӧн эськӧ лючки колӧ сёйны, да век тэрмасьӧны. Люба кӧнкӧ ветлӧ, дыр жӧ оз лок. Ӧтнам пукся да кута чайӧвайтны. (Бара на чӧвтӧ пернапас, пуксьӧ пызан саяс.)

Ӧдзӧссӧ ван восьтӧмӧн пырӧ Стёпӧ.

СТЕПӦ. Позьӧ тіянӧ? Здоровоти!

ӦГАШ БАБ (повзьыштӧ, чеччӧ местасьыс). Здорово, здорово, Степанӧ! Оз ӧд вунӧд суседным миянӧс. Ас кадӧ на и пырин! Ме со чай юны дасьтыся.

СТЕПӦ. Пыри, тэысь гажӧй быри. Кутшӧм здоровйӧыд, бабуклӧн?

ӦГАШ БАБ. Слава Богу, слава Богу, кок йылын! Тэ ӧд абу першал, мый юасян?

СТЕПӦ. Ха! Оз гӧгӧрво! Сустав-йӧзвиыд кӧ висьӧ, сідзкӧ, эм тэнад кыдз пу гар зелляыд? Мекӧд ӧд юксьыштан? Аддзан, горшӧй висьӧ.

ӦГАШ БАБ. Кӧртӧда и эм, пиук. Ки чышкӧдтӧ ли мый нӧ сэтчӧ гартін?

СТЕПӦ. Быть ӧд, юрсӧ ог вермы бергӧдны да.

ӦГАШ БАБ. Лым перина вылын, гашкӧ, узин да?

СТЕПӦ. Нет, бабук, Степӧыд абу на сэтшӧм пьянича! Гортӧ туйтӧ аддза на, лым вылад ог вод. (Шпыньмунӧ.) Степӧыс абу на пьянича, прӧстӧ Степӧлы винӧ глянечча!

ӦГАШ БАБ. Пес, пес кывтӧ. А пиукӧ, оз и ков лым вылас водны.

СТЕПӦ (петкӧдлӧ чуньнас стопка). Ичӧтика виӧдышт. Кула ӧд, он кӧ сет.

ӦГАШ БАБ. Пӧкмелля инӧ? А зелляторйыд вот и абу. Войт абу. То ӧмидз корйӧн тшай завариті. Юышт, кокньӧдас.

СТЕПӦ (шеновтчис кинас бабӧсьыс, тэрыба кытшов вӧчис джодж пасьталаыс, аддзис шкап вывсьыс духи доз, кватитіс). Эх-ма-а! Юмов ма-а! (Любуйтчӧ дознас.)

ӦГАШ БАБ (уськӧдчӧ Степӧ дорӧ). Сё лешакӧ! Сійӧ ӧд Ларисалы козин!

СТЕПӦ. А, тӧда, коді Ларисалы духияссӧ козьналӧ. Видлам, чӧскыд абу. Ёна-ӧ радейтӧ Ларочкаӧс эсійӧтӧ... Том учительыс. (Вӧчӧ вид, быттьӧ юыштӧ доз помсьыс, сэсся акнитӧ чӧскыда.) Троя таысь чӧскыдджык!

ӦГАШ БАБ (шензьӧмӧн видзӧдӧ Степӧ вылӧ). А Степӧ, Степӧ, дитюкӧ! Мый нӧ тэкӧд лоӧма? Менам ӧд синва доршасис. Эсытшӧм зонка быдмигад вӧлін! Мый нӧ ме Ларисалы кута шуны? Туйтӧм горт олысь ме лои, син водзысь гусялӧны...

СТЕПӦ. Но, бабук, эн сідз жугӧд асьтӧ! Ме ӧд вильшалі сӧмын. Эг ю... (Мыччӧ бабӧлы дозсӧ.) А тӧдан, бабӧ, кутшӧма ме радейта Ларочкаӧс! Первой классянь на... (Бӧрддзӧ.)

ӦГАШ БАБ. Унаысь и дзерӧдлін нывкасӧ. Кӧсаӧдыс кыскалін.

СТЕПӦ. Любя сійӧ, любя! Думайті сэк: быдма да гӧтрася. Некодлы ог сет! А ӧні... Сійӧ ӧд, Ларочкаӧй, медся мича нывка вӧлі! Котӧртам школаӧ, сійӧ тіри-бобӧ моз, еджыд бантика, водзас котӧртӧ, а ме рыцарь моз бӧрсьыс... А ӧні аддзас менӧ, да бергӧдчӧ! (Бӧрдӧ.)

ӦГАШ БАБ. Да кыдзи нӧ он бергӧдчы, кляшшӧй дук вомсьыд петӧ да.

СТЕПӦ. Абу кляшшӧй, а тройнӧй! А вообщесӧ, ме ог дивит... Дедӧ кӧ ловъя вӧлі, сітанӧ на чужйис-а. Менсьым Епим дедсӧ, бабук, помнитан? Кувны нин водӧма, куйлӧ сарайын, а председатель воис да увгыны кутіс, водӧмыд пӧ, куйлан, кук йӧр потшӧс пӧрӧма-а. Чеччы пӧ!.. Потшсянінас и ловсӧ вӧлі лэдзӧма. (Бӧрдӧ.)

ӦГАШ БАБ (малыштӧ Степӧлысь мышкусӧ). А мый нин тэныд, коньӧрӧйлы, чужъян! Этадзи бӧрдан! Кагалы моз нёнь колӧ сетны!

СТЕПӦ (дрӧгмунӧ). Мый шуин?! А-а, ноко вай, бабукӧ, йӧктыштам! (Кыскӧ бабӧӧс, мӧдыс петитчӧ.) Но, он кӧ ӧд, ӧтнам на йӧкта! (Йӧктігтыр мунӧ зеркалӧ водзӧ, малалӧ голи гартӧдсӧ, любуйтчӧ аснас.) А кӧртӧднас дзик кардинал Ришелье кодь!.. (Шурк бергӧдчӧ бабӧлань.) А ме ӧд, збыль кӧ, могӧн тіянӧ пыри. Гриша дядьыд тшӧктіс пыравны. Юӧрт пӧ тьӧщалы и гӧтырлы: праздник кежлас пӧ вола. Победа лун ӧд регыд! Ок и пасъям! Ме доручастокад абу уджалысь. Локті...

ӦГАШ БАБ. Пассибӧ эськӧ юӧр вайӧмсьыд, но локтін да мый кутан тані керны? Сэні кӧть сьӧмтор нажӧвитыштін-а.

СТЕПӦ. По-новому, по-новому, бабук, мыслитны колӧ! Ме, гашкӧ, предпринимательӧн кӧсъя лоны. Пукта уна картупель, капуста. Быдта да нуа вузавны эстчӧ, туй вӧчанінас. Да коді шуис: Степӧ пропадьтас?!

Пырӧ Люба. Пӧрччӧ чышъянсӧ.

ЛЮБА. Ывла вылас тулыс! Лун тӧв пӧльтӧ. (Аддзӧ Степӧӧс.) Бур гӧсьт тай миян?

СТЕПӦ. Люба тьӧт, здорово! Зять пуыд, зять пуыд! Пыри, верӧссяньыд привет вайи! Локті со...

ЛЮБА. Аддза, локтӧмыд. Лӧсьыда кодалан! Пермер Ёгор гортсьыд корсьӧ тэнӧ-а. Трактор вылӧ кӧсйӧ пуксьӧдны. Мун чожа гортад, пывсянтӧ ломты! Пальӧдчы! Аддзан — тулыс! Уджыс сы мында! Давай, чожа котӧрт! Мун! Мун! (Йӧткӧ ӧдзӧслань.) Эн вунӧд пывсьынысӧ миянӧс чукӧстны! Пе-ет!

ӦГАШ БАБ. Чай стӧкан мед юас да. Кӧлӧбнас. (Кӧсйӧ бергӧдны Степӧӧс.)

СТЕПӦ. Тэ, бабук, сэтшӧм бур. Муна. (Лэптыштлӧ кисӧ, петӧ.)

ЛЮБА. Локтіс пӧ да мӧд лун нин буалӧ, мамыс шуӧ. Мый тайӧяскӧд и керны? (Мунӧ ӧшинь дорас, видзӧдӧ.) Мунӧ то. Оз тай ёна шатлась-а...

ӦГАШ БАБ. Кристос отсӧгӧн... Палялас, гашкӧ. (Любалы.) Но мый, висьтась. Дыр тай ветлін. Мый сэні Ёгорей-пермерыслӧн?

ЛЮБА. Сылӧн?.. Да сійӧ, сё ей богу, молодеч! Уджалӧны ёна гозъя. Вокъясыс и... Дивитіс миянӧс. Колхоз кооперативӧ пӧ чукӧртчинныд, а онӧ сюся уджалӧй. Коді юсьӧма, коді ортсы нажӧвитчыны мунӧма. А колӧ пӧ тані, ас гортын, ладсӧ лӧсьӧдны. Ставӧн кӧ юсям да разӧдчам, коді кутас пӧль-пӧч гуяс вылӧ ветлыны? Видз-мусӧ, керка-карта овмӧсъяссӧ коді кутас дӧзьӧритны? Уна керка нин вежыньтчӧма бур кӧзяинтӧгыс...

ӦГАШ БАБ. Сідзи, сідзи... Ме тай шула жӧ да, кывзасны ӧмӧй.

ЛЮБА. А мамӧ, кывзы, миянлы ӧні зэв бур позянлун эм кооператив-котырнымӧс кыпӧдны. Ыджыд туй вӧчысьясыс орччӧнӧсь. Американскӧй чипан кокъяссӧ мед мӧдлаын сёясны. Асьным кутам вердны! Ёгорейыд тай шуӧ: менам пӧ скӧт уна, яйӧн кута вердны. Ті пӧ — град выв пуктасӧн. Столӧвӧй пӧ сэтчӧ восьтам. (Кост.) Ог тӧд, мамӧ, тэ мый шуан... Ёгор Васильевичыс ёна сӧветуйтіс, босьт пӧ ас киад кооперативнас командуйтны...

ӦГАШ БАБ (довкйӧдлӧ юрнас). Да-а... сэні туй вӧчысьыд ставыс мужикулов. Вердны найӧс колӧ... Со, со, бур делӧ сёрнитӧма Ёгорейыс... Лоӧ кӧ ӧд кытчӧ инавны быдтас-пуктассӧ, бӧр на войтырыс шызяс-зільмас.

ЛЮБА. Туйсӧ кутасны писькӧдны эстчаньӧдз, нефть да газ перйысьяс дорӧдзыс. Ми кӧ накӧд ладмам-йитчам, иналаніныд лоӧ.

ӦГАШ БАБ. Ме тай и шуа... Оз ков мӧмляйтны! Чукӧртчылӧй, сёрнитлӧй. Лукасӧ, пуксис кӧ юралысьӧ, ёнджыка чутӧдӧй.

ЛЮБА. А Лука Ильичыд ачыс дышмӧма и юсьӧма да.

ӦГАШ БАБ. Ме важӧн шуа — мынтӧдчӧй сыысь. Да кывзанныд мӧй пӧрысьтӧ...

ЛЮБА. Быть эськӧ на кывзы да. Ме инӧ, мамӧ, ветла Лука Ильич дорас, чукӧртлас, гашкӧ, войтырсӧ, собранньӧ вӧчлам. Час, нуръясьышта да и ветла.

ӦГАШ БАБ. А ме талун гу вылӧ мунысь, шойнаӧдз лашиктыла, оллялышта верӧс гу дорын. Рӧдимӧйӧ, мися, тэ да и Максимушка, куйлан тані да и шойччан-узян. Менам да и виричӧй пӧрны кутіс, лӧсьӧдыштны некодлы. Гортӧ колим куш нывбаба. Зятюшконым муніс гортысь нажӧтка корсьны. Нефть да газ пӧ уна колӧ, сэтчӧ писькӧдчӧны, ыджыд туй вӧчӧны... Тулысыс талялӧ сиктсаясӧс...

ЛЮБА. Но, мамукӧ, мӧдін сэні омлявны. Писькӧдчасны, дерт, колӧкӧ. Став вӧснаыс шогсян. Том йӧзыс ӧні ми дорысь сюсьджыкӧсь, вӧчасны, эн пов. То нӧ Усьтик и, Никит и, Лара и кутшӧма дасьтысьӧны Победа лунсӧ пасйыны! Квайтымын во. Тэ гу дорас мунан да на йылысь и висьтав батьӧлы, шу оз вунӧдны йылӧмъясыд, гаралӧны. Ыджыд юбилейсӧ зільӧны бура пасйыны.

ӦГАШ БАБ. А быть ӧд ошйысьышт. Норасьӧмыс нӧ кодлы кажитчас. Норасьнысӧ и ачым ме ог радейт. Ветла-а...

Занавес

МӦД ПЕТКӦДЧӦМ

Кыр йылын. Кустъяс сайсянь тыдыштлӧ юлӧн веркӧсыс. Сцена вылын шуйгаладорас усьӧмаяслы обелиск да мемориальнӧй пӧв, скамьяяс. Кустъяс сайсянь петӧ Ӧгаш баб, беддя, киас кӧрзина. Сувтӧмӧн видзӧдӧ гӧгӧрпӧв, нимкодясьӧ вӧр-ванас. Сылы паныд варовитігтыр локтӧны Паладь эня-ныла.

ПАЛАДЬ. Ӧгаш пӧдруга тай нӧ кысянькӧ лашиктӧ! Мудзӧма, ышлолалӧ.

ӦГАШ БАБ. Ышлолала. Апайта тувсов чӧскыд сынӧдсӧ... Сувтӧмӧн то любуйтча мича вӧр-ванас. Сэсся, мися, кула дай тайӧ ставыс оз ло. А татӧгыс нӧ кыдзи сэні кутан?

ПАЛАДЬ. Но, мыйысь шогӧ усьӧма! Тэнӧ да менӧ он на регыдӧн свет вывсьыс выжывит! Эськӧ кӧть и кулін нин да!

ВАЛЯ. Но, мамӧ. Сідз он жӧ шу! Сьывны на мунам да!

ПАЛАДЬ. А сьывны и мунам. Клубӧ. Корӧны да. Ошкӧмаӧсь на да. Газетӧ гижӧмны. Ой, зэв паськыд вома снимок вылас. (Сералӧ.) Тайӧ нӧ, мися, ме татшӧм мичаыс, паськыд вомаыс? Тэ пӧ, тэ, солиска миян!

ӦГАШ БАБ. Но-о... Мый нин сэтчӧ...

ПАЛАДЬ. А збыль, ог нинӧмсӧ сёрнит. Ми ӧд собранньӧ вывсянь. Соборуйтімӧ. Сэтчӧ и пыртліс газетсӧ клубса мича нылыс.

ВАЛЯ. Сетны кӧсйис газетсӧ на память. Библиотекаысь пӧ сета.

ӦГАШ БАБ. Инӧ сэсся тэ коді ӧні? Артистка ли мый.

ПАЛАДЬ. Артистка. Лок тшӧтш мунам миянкӧд клубас, ӧтув сьылыштам!

ӦГАШ БАБ. Ме ӧні тіянкӧд абу мунысь. Ме праздник луннас муна. Нучкаяс шуӧны, тэ пӧ миян войнавывса герой да труженича, пуксьӧдам пӧ креслӧ вылӧ медводзас да чествуйтны кутам. Ме ӧд шойна вылӧ ветлі, аслам дедук гу вылӧ. Талун сылӧн кулан луныс. Кызь кык во нин абу. Первой май вечернянас и кувлі, шонъянӧй менам. Сэки гӧрд плагъясӧн и колльӧдісны шойнаӧдзыс. Ӧні тай мыйкӧ Первой майтӧ дугдісны войявны.

ВАЛЯ (меліа лӧсьӧдыштӧ бабӧлысь чышъянсӧ, малыштӧ чужӧмсӧ). Ӧні Победа лунсӧ тай. Но мун нӧ инӧсь гортад. Ми ветлам клубас. Мамӧ, лок давай. (Кутчысьӧ мамыслы сояс. Ӧгаш баб тшӧтш кватитӧ Паладьӧс мӧд сойӧдыс.)

ӦГАШ БАБ. Ог бара-й лэдз. Нолтӧ, эстчӧ крест дорас сувтыштлам. Казьтыштам усьӧмаяссӧ. Менам ӧмидза винатор то коли на. Гортӧ ӧд бӧр ог ну. Пӧ-румки юыштӧй, бурджыка сьывны кутанныд.

Куимнанныс кутчысьӧмӧн и кежӧны крест дорӧ, пернапасасьӧны.

ӦГАШ БАБ. Менам тані батьӧй дай куим вок. Сэтчаньӧ юрнысӧ пуктісны, а ловныс пӧди тані.

ПАЛАДЬ. А менам... Код тӧдас, коньӧрӧй, кулӧм ли ловъя. Батьтӧ, Валя, тэнсьыд шуа.

ВАЛЯ. А менам нӧ Виталейлӧн кӧні лолыс? Афганад талибъяс тшытшисны да. (Бӧрддзӧ.)

ПАЛАДЬ (нывсӧ бурӧданмоз). А кӧнкӧ тані жӧ...

ӦГАШ БАБ (чӧв оліг перйӧ кӧрзинасьыс пӧжассӧ да вина дозсӧ, видзӧдлӧ доз пытшкас да заводитӧ кисьтыны румкаас). Чурснитыштам.

ПАЛАДЬ (уськӧдчӧ сы дорӧ). Блин! Ортсӧ кисьтан да!

ӦГАШ БАБ. Валюк, на тэ инӧ кисьтав. Тэныд да меным румка. Паладьлы — кыкӧс. Зэв культурнӧя матькӧ да. Блин пӧ!

ПАЛАДЬ. А велӧдысьыс нӧ менам абу? Батьтӧм дитяӧс быдтам да. Сійӧ миян куим пӧвста мать на лэдзас. Но, пӧминитам инӧ тані кулӧмаяссӧ. Югыдін да шоныдін налы. А быдтасъяслы — кузь нэм да бур шуд!

ӦГАШ БАБ. Да, мед война бисӧ оз аддзывны.

ВАЛЯ. Таво ар миян быдтасным армияӧ нин мунысь. Чечняас кӧ веськалас...

ӦГАШ БАБ. Арӧдзыс ӧд лӧнясны жӧ сэсся. Мыйта позьӧ зытласьны. (Юыштӧм бӧрас тыртӧм дозсӧ Валя кӧсйӧ шыбитны, бабӧ кватитӧ сы киысь дозсӧ. Сюйӧ аслыс кӧрзинаас.)

ӦГАШ БАБ. Татчӧ эн шыбит. Таті огӧ жӧ кутӧй ёгӧсьтны. Тані сӧстӧм ловъяс. То нӧшта небыд кӧлӧбнас пӧминитӧй да мунӧй сэсся, сьылӧй. Ме муна жӧ гортӧ. Челядьыс ӧбедайтны воасны, а ме абу. (Копыртчылӧ кулӧмаяслы да мунӧ.)

ПАЛАДЬ (пуксьӧ скамья вылас). Ӧгаш мед тэрмасьӧ. Челядьыслы ёна пӧтакайтӧ. Ме пукалышта на. Валюк, тэ пуксьыв тшӧтш. (Дыр чӧв олӧм бӧрын.) А этайӧтӧ... Сьӧлӧм вед полӧ, нылукӧ. Оз кӧ артмы менам сьылӧмыс? Янала кӧ? Мый нӧ эськӧ сьыла? Ме вӧд унатор тӧда да.

ВАЛЯ. Чиганкатӧ и сьыв. Лӧсьыд тай сійӧ.

ПАЛАДЬ. А-а, энлы... (Кызӧктышталӧ да друг горӧдӧ.) Чиганка гадайтіс. Чиганка гадайтіс...

ВАЛЯ. Эн тайӧс. Мӧдӧс но сьыв.

ПАЛАДЬ. Ой, сійӧс кӧ ӧд сьывны кута, ачым бӧрддза. Дай видзӧдысьяссӧ дзерӧда. Зэв ӧд нор сійӧ.

ВАЛЯ. Мед но. Победа лунас ӧд позьӧ бӧрдны и сьывны.

ПАЛАДЬ. Но инӧ. Видла. (Ышловзьӧ да заводитӧ.)

Коркӧ меным гадайтліс чиганка,

Нэм чӧжыд пӧ кутан синва кисьтны,

Радейтан пӧ ёна ӧти зонмӧс,

Сы вӧсна и кутан, нылук, висьны.

— Нинӧмсӧ эн сӧр тэ, сьӧд чиганка!

— Ярскӧба и сеті воча кывсӧ, —

Сыысь шаньыс, бурыс некод абу,

Лелькуйтӧмӧн видзас муса нывсӧ.

Сійӧ кадсянь чӧлӧй нэм джын коли,

Менам юрӧй важӧн ставнас дзор нин,

Абу сэки сӧрӧма чиганка,

Казьтышті да сьӧлӧм ставнас нормис...

(Бӧрддзӧ да чышкалӧ синвасӧ.) А збыль ӧд менсьым олӧмӧс тайӧ песняас сьылӧны.

ВАЛЯ. Збыль тай нӧ бӧрддзин. Оз ӧд позь.

ПАЛАДЬ (чеччӧ пукаланінсьыс). Ог кут... (Мыйкӧ кывзӧ, сэсся лэптӧ чуньсӧ.) Кылан?

ВАЛЯ. Челядь войлӧны. Тулыс ӧд.

ПАЛАДЬ. Абу челядь. Эталӧн, Ӧгашыслӧн дрӧчкаыс.

ВАЛЯ. Кутшӧм дрӧчка? Устясӧ ли мый шуан?

ПАЛАДЬ. А кодӧс нӧ? Никитӧс чуксалӧ да.

Ылын кылӧ Усьтиклӧн гӧлӧсыс: Ники-ит! Кылӧ ныв серам да горӧдӧм.

ПАЛАДЬ. Ой, татчӧ воӧны! Вай эстчӧ куст саяс дзебсьыштлам. Кывзам, мый сёрнитӧны. Любов пӧ вед налӧн.

ВАЛЯ. Мед но. Тэныд мый?

ПАЛАДЬ. Эн шу, эн шу... Томӧсь на, кагаяс на...

Усьтиклӧн гора гӧлӧсыс да кыпыд серамыс матысмӧ.

УСЬТИК. Никит, вӧтчы! Ноко кут менӧ!

НИКИТА. Тэнӧ кутан! Лэбан да! Кыр йывсяньыс ваас кӧть эн лэбышт!

УСЬТИК. Лэбышта! Енэжас! Дзебся кымӧр костас, дай некор он аддзы.

НИКИТА. Татчӧ лок, татчӧ! Видзӧдлы, медбӧръя йи нин кывтӧ! Ваыс югыд...

УСЬТИК. Но, локті... Кӧні йиыс? Ваыс муткырасьӧ...

НИКИТА. Со и куті! Шедін! Окышта вот!

УСЬТИК. Попробуйтлы... Тонӧ ӧтка йитор сӧмын нин кылалӧ!

НИКИТА. Йиыс таво кокниа кылаліс.

УСЬТИК. Шуда во лоӧ. Таво школа нин помалам... Никит, видзӧдлы, нӧшта йитор кывтӧ. (Заводитӧ сьывны.)

Кылалӧ йи,

Бара дзирдалӧ тувсовъя шонді,

Кылалӧ йи,

Бара сьӧлӧмӧй ыпъявны пондіс.

Никита тшӧтш босьтчӧ сьывны.

Кылалӧ йи,

Бара муса ныв кыр йылӧ петас,

Кылалӧ йи,

Нылыс муслунсӧ тані мем сетас.

А-а-а-а...

Ныла-зонма тыдовтчӧны кустъяс сайсянь. Паладь кватитӧ Валяӧс сой пӧлӧдыс, кыскӧ сьӧрсьыс дзебасӧ.

ПАЛАДЬ. Лок, шуӧны, эсытчӧ дзебсьылам. (Саялӧны куст сайӧ.)

Никита да Усьтик кутчысьӧмӧн, сьылігтыр матысмӧны обелиск дорӧ.

Юргӧ йӧлӧга эстчань ю сайын (сайын),

Лӧсьыд овнытӧ, майбырӧ, майын (майын).

Ловзьӧ ывлавыв, шоналӧ, бурмӧ,

Сьӧлӧм радысла доймӧ да сырмӧ...

А-а-а-а... сырмӧ.

Усьтик уськӧдчӧ Никита дорӧ, сывъялӧ сійӧс. Мӧдыс босьтӧ нылӧс моздорас.

НИКИТА. Жбырӧ-лэбачӧ, шедін.

УСЬТИК. Лэдз, уськӧдан! Курчча ӧд.

НИКИТА. Ог лэдз. Ноко вай висьтав, мыйла двойкасӧ английскӧйсьыс пӧлучитін?

УСЬТИК. Тэ йылысь думайті да.

НИКИТА. Ме йылысь? Мый нӧ думайтін? (Малалӧ юрсисӧ нывлысь.)

УСЬТИК. Думайті, мися, Никитыс дзик жӧ нин йӧй, двоечниклысь юрсисӧ малалӧ.

НИКИТА. Ог и малав, окавны кута...

Куст сайсянь кылӧ Паладьлӧн икӧстӧм али несйылӧм шы. Усьтик тойыштчӧ Никита дорысь.

УСЬТИК. Кодкӧ эстӧн несъялӧ. Кывзысьӧ, гашкӧ, а тэ... Окышта. Мед бабӧлы соритасны, да бабӧ менӧ петшӧралас. Тэ тайӧс кӧсъян?

НИКИТА. Тэнӧ петшӧралан... Сулав вай тані, ме видзӧдла, коді сэні.

Никита веськӧдчӧ несъялӧм шы улӧ, сылы паныд куст улысь кысйӧ-петӧ Паладь пӧч.

НИКИТА. Пӧчӧ, мый нӧ тэ тані вӧчан? Кытысь усин?

ПАЛАДЬ. Клубӧ то мунам Валякӧд да татчӧ кежалі. Господи, суин кӧ, юр яндзим, муртса удиті бӧждорӧс лэдзны. Меным ӧд, пӧрысь мортыдлы, тшӧкыда куст улад лоӧ кежавны. (Чукӧстӧ нывсӧ.) Валя, Валя! Кӧні тэ? Лок мунам, сёрмам ӧд!

ВАЛЯЛӦН ГӦЛӦС. Вошин, мися, сэтчӧ. Лок, тані ме. Мунам!

Паладь да Никита дорӧ воӧ Усьтик.

УСЬТИК (шенмунӧ). Паладь пӧч! А ме чайті Никитлӧн пӧдругаыс кывзысьны дзебсьӧма. Да тэ меным и колан, пӧчукӧ. Онӧ на сёрмӧй, ми сэтчӧ жӧ мунам, клубас. Лок пуксьыштлы скамья вылас, юавны кӧсъя ӧтитор. Зэв важнӧйӧс.

ПАЛАДЬ. Мый нин сэтшӧмсӧ?

УСЬТИК (серӧктӧ). Тӧда ӧд, мудеритан тэ, Паладь пӧч. Тӧда, кывзысин. Окота кӧ лоӧ кывтӧ песны, бабуклы висьтав, шу, окасисны, верӧс сайӧ петны ӧні жӧ кӧсйӧ, школасӧ помавтӧг.

ПАЛАДЬ. А бобук тэ... Но-о, кывзысьышті бӧждор лэптанмоз, да ӧд эг лёк сёрни лэптанмоз. Окасьӧй, пока томӧсь. Ме тіян арлыдын чурка нин вайлі. То этайӧ Валяӧс. Пӧшти ӧтув и быдмим дай пӧрысьмим.

На дорӧ локтӧ Валя.

ВАЛЯ. Мамӧ, бара на пуксьӧмыд, мӧдӧдчылім нин да. (Тшӧтш лэччысьӧ скамья вылӧ.)

УСЬТИК. Ме то сійӧс манита. Юавны кӧсъя, кыдзи сэки том йӧзыс гажӧдчывлісны.

ПАЛАДЬ. Гажӧдчывлім жӧ. Томӧсь ӧд вӧлім. Войнаыд кӧть мунӧ, дай зонъясыд оз тырмыны, том вирыд ворсӧ жӧ. Шондібанӧйтӧ сьывлім и быдся танечсӧ йӧктывлім. Помнита, Победа луныд суис миянӧс сплав вылын. Кер бунтъяс буретш разялім, быглялім ваас. Ставным нывъяс да том бабаяс. А сійӧ луннас буретш да миянлы отсӧг вылӧ вайисны ружйӧ улын уселон-шышъясӧс, мужикъясӧс. Морт сизим вӧлі. Война пӧ помасьӧма, ӧти стражникыс и юӧртіс миянлы. Господи, мый и сэки вӧлі! Коді ымзӧмӧн бӧрддзис, коді чилзӧ, коді сьылӧ, быдӧн ас ногыс сьӧктӧм ловсӧ личӧдӧ. А меным йӧктыны да сьывны окота. Йӧй нывка... Ӧти-кӧ, кавалеръяс воисны, ружйӧ улынӧсь кӧть, синнад ворсыштны век нин позяс. А сэсся ӧд менам война вылас некод эз вӧв, некод эз усь сэтчӧ. Батьӧ мужичӧйыс миян семьяын да кос соя, эз и босьтлыны война вылас. Шуа тай, окота йӧктыны, а гудӧкасьысь некод абу. Ме гора гӧлӧсӧн пӧттӧдз нывъясӧс гажӧді, вомӧн ворса краковяк да подоспань.

УСЬТИК. Нолтӧ петкӧдлы кыдзи!

ПАЛАДЬ (первойсӧ вомнас гунӧдчӧ, сэсся и гора заводитӧ сьывны, медбӧрын оз пукавсьы да чеччӧ, кватитӧ на дорын чӧла сулалысь Никитӧс). Таті топйӧдлы тэрыба кокъяснад, таті бергав, да сюсьджыка, кавалер!

Русский, немеч и поляк

Стансовали краковяк,

А я дура, ок дурак,

Не умею стансовать.

Эх-и ля-ля-ля-ля-ля-а.

Эновтӧ сьӧкыда вӧрысь Никитӧс, ӧтнас йӧктӧ, ышмис сідз, Валя нывсӧ да Усьтикӧс чеччӧдӧ места вывсьыс.

ПАЛАДЬ. Ноко, ме моз вӧчалӧй! Зонмыслы мигнитлӧй да.

ВАЛЯ. Ме тайӧ танецъястӧ ставсӧ кужа. Меным тустепыс медся ёна кажитчыліс. Лясан зон бердад бергалігас да сывлан! (Сералӧ.)

УСЬТИК. Менӧ либӧ Никитӧс инӧ велӧд. (Кутчысьӧ Валя дорӧ, Никиталы индӧ Паладь баб вылӧ, босьт пӧ сійӧс.)

Валя вомнас ворсӧ, мамыс тшӧтш гора гӧлӧснас отсалӧ, йӧктӧны тустеп. А Паладьлӧн кывйыс на гилялӧ подоспаньӧ сьылыштны да йӧктыштны.

ПАЛАДЬ. Нӧшта, нӧшта то мый йӧктывлім... (Йӧктӧ и сьылӧ.)

Танка, танеч...

Танечка, танеч,

Танеч корошый,

Танцевать это

Очень легко,

Два шага вперёд, два шага назад, дай...

Кругом вернёмся снова в поход!

НИКИТА. О-о! Тайӧ — да-а! Тайӧс позьӧ рытбыд, Паладь пӧч, бергавны.

УСЬТИК (кыпыда). Походӧн!

Ставӧн серӧктӧны, а Паладь баб друг ымӧстӧ.

ПАЛАДЬ. Сійӧ Победа луныд нэм чӧж кежлӧ паметьӧ коли. То тай Валялы квайтымын регыд тырас. Йӧй томдырыд тай... Заключённӧйястӧ ӧд сэні эз ёна топыда видзны. Пышйынысӧ некытчӧ — гӧгӧр ва, ытва. Ми дорын бергалӧны... Менӧ йӧюкӧс васаыс буди чутӧдіс... Том мужичӧй, лӧсьыд ныр-вома вӧлі ӧтик... Ляскысьлім... Ӧльӧксан нимыс... Лун-витӧн кер бунтъястӧ лои лэдзӧма ваас, найӧс бӧр нуисны. Ми ва кузя керъяскӧд дай. Сы мында и ми найӧс аддзылім. А... А тӧвнас Рӧштво кежлӧ то Валяӧс, нывка, кос соя батьӧлы видзнысӧ козьналі... Кӧсйылі и ваас вӧйтчыны, и кер бунт улас сюрны, а со... Ола ӧнӧдз. Пышъяланкаӧн да пиаланкаӧн эськӧ тшӧкыда бабаяс нимтылісны да. Эг пыдди пуктыв, серамбана ӧд ме вӧвлі... Батьӧ, поконик, сарсво сылы небеснӧй, некор эз кӧритлы-а, шулас вӧлі сӧмын: питор кӧ пӧ, мужикулов вайин... Со ӧд Паладь пӧчыд кутшӧм, дивитӧ кӧть эн сэсся менӧ. Сьыла тай то, клубъясті ветла кӧкъямысдас арӧс тыриг... Сійӧ, коньӧрӧй, Валялысь батьсӧ шуа, кулӧм ли ловъя, Ӧльӧксанушко... (Заводитӧ сьывны аслас радейтана сьыланкывлысь бӧръя куплетсӧ.)

Котӧртісны-исковтісны вояс,

Гулящӧйлысь нимсӧ нэм чӧж новлі,

Казьтылӧмыс сӧмын сьӧлӧм шонтіс,

Ӧні шудсӧ курыштыны сёр нин...

Со ӧд ышми кыдзи, ошйыси и нораси, и сьылі тіянлы. Мунам сэсся. (Чеччӧ.)

УСЬТИК. А сэтшӧм лӧсьыд гӧлӧсыд. Медбур призсӧ тэныд сетасны, пӧчукӧ.

ПАЛАДЬ. Сетісны нин, сетісны! Валя, тэ ордын абу газетыс? Снимайтӧмаӧсь менӧ сэтчӧ, гижӧмаӧсь дай, ветеран пӧ дай солиска, лӧсьыда сьылӧ. Вот! Эсійӧ зонкаыс газетсьыд, пыраліс тай кодкӧ рытӧ клубад, гижӧма. Кувтӧдз нимкодь лоӧ и яндзим йӧзсьыс.

УСЬТИК. Сыысь яндзим?!

ПАЛАДЬ. Эн шу, эн шу... А тэнсьыд окота юавны, мыйла эн Ӧгаш бабыдлысь юась краковяк йӧктӧмъяссӧ? Сійӧ ӧд и меысь на кокниа йӧктӧ. Сійӧ эськӧ меысь на мичаа петкӧдліс.

УСЬТИК. Колӧкӧ и петкӧдліс, да ми сыысь гусьӧн вӧчам. Кӧсъям сюрприз вӧчны олӧма ветеранъясыслы. Ме чайта, кажитчас, велӧдам кӧ ми школьник-челядьӧс сійӧ кадся краковяк танецъяссӧ да праздник лунас сувтӧдам ставнысӧ этайӧ йӧрас ыджыд кытшӧ. Мед тіянлы казьтылӧм вылӧ йӧктасны. (Ворсӧ вомнас шыладсӧ краковяклысь, йӧктыштӧ.)

Занавес

КОЙМӦД ПЕТКӦДЧӦМ

Сійӧ жӧ керкаас. Рытъя кыа писькӧдчӧ ӧшинь пырыс. Ӧшинь дорын рӧсада ящикъяс. Ӧгаш баб да Люба ноксьӧны рӧсада дорас, Ӧгаш баб сьылыштӧ.

ӦГАШ БАБ. Кор ме вӧлі кызь арӧса, сэки вӧлі вывті збой... Тайӧ медрадейтана сьыланкыв батьыдлӧн вӧвлі. (Ышловзьӧ.) Рочысь кӧть вӧліс, ӧдйӧ коминас велавліс. Став коми песнясӧ вӧлі сьылӧ.

ЛЮБА. Ме помнита ставсӧ. Пуксяс вӧлі вурсьыны, машинаыс тіч да точ, а батьӧ нуркйӧдлӧ. Мукӧддырйи и тэ отсавлін сылы. Кыкнанныд боссянныд сьывны. И сэтшӧм мичаа тіян артмывліс! (Сьылыштӧ.) Мыйла ме сэтчӧ ветлывлі... Сэні овліс мича ныв...

ӦГАШ БАБ. Ладӧн овлім, ладӧн. Сьывны кӧ — кыкӧн, уджавны кӧ — бара жӧ гозйӧн... Рам батьыд вӧвлі, пызан пӧвйӧ эз вачкыв, ӧдзӧсӧ эз чужйыв, код юрӧн эз волы, ичӧт нывкасӧ эз повзьӧдлы.

Тӧв ныр моз пырӧ Усьтик, уськӧдчӧ ӧшиняс.

ӦГАШ БАБ (Усьтиклы). Но, мый нӧ рӧмпӧштанӧ моз ӧшиняс видзӧдчан?

ЛЮБА (гонькнитлӧ ӧшиньлань). Никитыс то сэні.

Ывласянь кылӧ музыка шы: «На тебе сошёлся клином...»

ӦГАШ БАБ. Важӧн вӧлі нывъястӧ гудӧкӧн колльӧдӧны, ӧні радио сьӧрсьыс новлӧдлӧны... Господи, кыдзи олӧмыс вежсис! Водзті вӧлі сю да ид кӧдзам, капуста да кушман. Ӧні переч да укроп, астра да хризантема.

ЛЮБА. Астраыс да хризантемаыс тай колӧ жӧ. Лолыдлы радлӧм вылӧ.

УСЬТИК (вешйӧ медбӧрын ӧшинь дорсьыс). Мый, бабӧ, ас кежад намӧдчан?

ӦГАШ БАБ. Ог ас кежын, тэныд тшӧтш висьтала. Он тай кывзы-а.

УСЬТИК. Мый нӧ висьталан?

ӦГАШ БАБ. А вит пуд вый висьтала. Тіян йылысь, томъяс йылысь. Сюсьӧсь, мися, вывті! Дышӧсь да горшӧсь! Мед Енмыс сетас налы мывкыд да шуд. Мед кужасны овнысӧ.

ЛЮБА. Кужӧны тай, сьылӧны да олӧны. Кодікӧ пессьӧ-нырсьӧ, удж вӧчӧ. Кодікӧ кывсӧ песӧ, кодкӧ чӧжӧ-кӧвтӧ, а кодкӧ и ставсӧ промотайтӧ.

ӦГАШ БАБ. А ми тай то и чветъяс быдтам.

УСЬТИК. Бабӧ, вунӧдін нӧшта шуны: кодікӧ зонмӧс радейтӧ да радлӧ!

ӦГАШ БАБ. Коді нӧ сійӧ сэтшӧмыс? Абу-ӧ нин тэ, чикышӧ?

УСЬТИК. Ларисаыд тай... А ме кӧ, бабук? Мый сэсся?

ЛЮБА. Тэнад, нылук, челядь руыд на радлӧ.

ӦГАШ БАБ. Эн шу, эн шу сідз. Никиттӧгыс то овныс оз вермы да. Быттьӧ потшӧс да майӧг, эзысь тасьті да зарни пань.

УСЬТИК. Ой, бабӧ, сэтшӧм лӧсьыда шуин! А тэ, тэ радейтлін, зарни паньнас панясьлін?

ӦГАШ БАБ. А кыдзи нӧ, радейтлі жӧ, буракӧ. То тай нӧ мамукыд тэнад. Ме чужтылі-быдтылі.

УСЬТИК. Бабӧ, да ме ог сійӧс юав!

ӦГАШ БАБ. Мый нӧ инӧ?

УСЬТИК. Настӧящӧй йывсьыс ме юала.

ӦГАШ БАБ. Настӧящӧй йылысь? А мый сійӧ настӧящӧйыс? Гашкӧ, ме дедуктӧ тэнсьыд ёнджыкасӧ жалитлі. Радейтӧмыс ӧд сійӧ вывті пӧсь, вермас на и сотны. А жалитӧмыс — шоныд, ловтӧ малыштӧ. (Серӧктӧ.) А йӧй пӧсь радейтӧмыс ӧтчыд вӧлі жӧ. Йӧй радейтӧм.

УСЬТИК. А мыйла йӧй шуан? Сійӧ тэнӧ эновтіс? Висьтышт! Ӧбедитіс?

ӦГАШ БАБ. Менӧ ӧбедитан! Ме ӧд тэнад кодь жӧ томдырйи вӧвлі. Война вылас эз весь босьтлыны. Ворошиловскӧй стрелок вӧлі. Батьӧ урсӧ кыйны век сьӧрсьыс новлӧдліс. Вокъяс быдӧн ас кежас вӧрсӧ гежмалӧны, а батьӧ мекӧд.

УСЬТИК. Но, бабӧ, тэ кутшӧм геройскӧй! Но эсы йылысь он висьтав да. Радейтчӧм йывсьыд.

ӦГАШ БАБ. Пані кӧ сёрни — висьтала нин помӧдз. Нӧрӧвитлы. Менам ӧд батьӧ и куимнан вокӧй мунісны война вылад. Юрнысӧ сэтчӧ пуктісны. А ме... Ме нӧ тан кута овны? Тшӧтш вӧзйыси сэтчӧ, вир кисьтанінас. Босьтісны. Нуисны миянӧс нелямын кыкӧд вося арнас Вӧлӧгдаӧ, пулемётчикӧ велӧдчыны. Ставным нывъяс. Казармаас, гашкӧ, сё ныв... А командирыс миян том лейтенант, би улӧ нин веськавлӧма. Кӧртӧда соя. А ачыс зэв мича ныр-вома. Сьӧд синма, сьӧд устора. Казарма ставнас любитчӧма сы вылӧ. Ме, быттьӧ тӧлкӧс вошті, маршируйта стройын, а юрам ӧти дум: видзӧдлы жӧ, мусаӧ, ме вылӧ, ме ӧд мича жӧ, чужӧмӧй гӧгрӧс, бандзибын алӧй вир ворсӧ, маршируйта медся збодера! Но сідз нин сылы зіля! Рытнас ӧдва нар вылӧдз воа, а унмовсьны ог вермы, чӧрс моз бергала. Любовыд оз сет лӧньны. Мечтайта. Аски, мися, тшук нин менӧ казялас, чукӧстас рытнас гуляйтны, окыштас... (Кост.) А аскинас, сё лешакӧ, маршируйтны куті, да кыла, гач кӧвйӧй брынс ори! Ой-я дай! Усяс кӧ гачӧй?! Мед кӧть мусукӧ оз казяв. Кыла команда: ать-два, стой! Сувтім. Бара команда — напр-раво! Стой! Бергӧдчим. Ме гачӧс кута. А мусук бара на командуйтӧ: рядовӧй Чувъюрова, два шага вперед! Ме воськовті, по стойке смирно сулала, гачӧс кута. Сійӧ бара на командуйтӧ: встать по стойке «смирно»! И видзӧдӧ меным синкытшам. Ме сы вылӧ барга. И гӧгӧрвои: тешитчӧ ме вылын. И кыла, кыдзи менам великӧй любовӧй кутіс пактавны морӧс пытшкысь. (Кост. Ышлов.) Шуласны, радейтчӧмсянь немӧстӧмӧдз ӧти воськов. А ме ас куӧн тӧдмалі — кык воськов. Строевӧй! (Ышлолалӧ.) Вот, нылукъяс...

УСЬТИК. Бабукӧ! А гачыд, сувтін да, уси?

ӦГАШ БАБ. Но и йӧюк тэ менам, ме ӧд эг гач усьӧм йылысь висьтав — аслам медводдза любов йылысь!

УСЬТИК (семдӧмӧн сералӧ). Серамӧй петӧ, прӧстит, но ать-два, вперёд! По стойке смирно! Ыджыдджык геройствоыс нӧ таысь ӧтдор эм-ӧ?

Усьтик сывъялӧ бабсӧ, малалӧ, бабыс чышкалӧ синвасӧ и ӧттшӧтш нюмъялӧ. Пырӧны Лариса да Вадим Петрович.

ЛАРИСА. Мыйкӧ тай нӧ лӧньӧмныд? Ӧшинь пыр гора гӧлӧсъяс кылісны-а.

ЛЮБА. Пемыдгорулалам. Бӧрдыштім и сералім.

УСЬТИК (уськӧдчӧ чойыслы паныд). Кокъясныд дженьыдӧсь да. Мый миян тані вӧлі! Бабук мый висьталіс!

ӦГАШ БАБ. Чӧв, йӧгӧза, нинӧм абусӧ... То гӧсь локтӧ, учительыд, примит.

ВАДИМ ПЕТРОВИЧ. Бур рыт! Локта, то Лариса Григорьевнаӧс колльӧді да.

ЛЮБА. Мед, мед, локтін кӧ. Пыр, дона гӧсьт лоан.

ӦГАШ БАБ. Видза, видза, бур пиӧ! Лок, то этатчӧ ӧшинь дорас и пуксьы. Мекӧд орччӧн пукалыштам. (Йӧткыштӧ улӧссӧ водзлань.)

ЛАРИСА (пуксьӧ тшӧтш). Висьталыштӧй миянлы тшӧтш, мыйысь бӧрдід и сералід.

ӦГАШ БАБ. Ёна висьтавныс нинӧм, сідзи ас костын. Усьтиклӧн серамыс, тӧданныд, пыр ызбыльтӧ, а менам бара синва дай. (Усьтиклы.) Тэ, йӧгӧза, мун самӧвартӧ пукты. Аслад ӧд учительыд воис.

УСЬТИК (мунанмозыс). Бабӧ висьталіс воюйтӧм йывсьыс.

ВАДИМ ПЕТРОВИЧ. Ті, Ӧгаш баб, война вылын вӧлінныд? Ме эг на тӧдлы.

ӦГАШ БАБ. Мый нӧ, пиукӧ, быдӧнлы сюрис войнаыд. Воюйті куим во. Берлинӧдз волі.

ВАДИМ ПЕТРОВИЧ. Вот кыдз! Герой инӧ тэ! А ми война йывсьыс киноысь да книгаясысь сӧмын лыддям.

ӦГАШ БАБ. Ӧні тай, слава богу, огӧ воюйтӧй, да олӧмыс бергӧдчис мышнас жӧ. Утюг чуткыны полан, то этайӧ чайник-самӧварнымӧс и...

УСЬТИК (буретш электрочайник кӧсйӧ пуктыны, шнурсӧ чуткӧм пыдди шыбитӧ джоджас). Мыйла, бабӧ, полан?

ӦГАШ БАБ. А мый нӧ... телевизор чуткан, водзті атомнӧй груз висьтавлісны, ӧні террористъясӧс, Бен Ладенӧс. Чуткан утюгтӧ да взорвитчан кӧ!

Ставӧн серӧктӧны.

УСЬТИК. Бабӧ нин кужас повзьӧднытӧ и серамтӧ петкӧдны. То шнурсӧ змейӧс моз шыбиті. (Бӧр лэптӧ.)

ӦГАШ БАБ. Ог ме, дитяяс, ог ме. Телевизор пырыд лун и вой петкӧдлӧны лыйсьӧм, взорвитчӧм да.

ВАДИМ ПЕТРОВИЧ. Любовсӧ петкӧдлӧны жӧ да.

ӦГАШ БАБ. Петкӧдлӧны жӧ, кыдзи нӧ сытӧгыс. Сы вылын пӧ и муыс держитчӧ да. Окасьлӧны ёна и вольпасяд ноксьӧны.

ЛЮБА (пырӧ пызандӧраӧн киас). Но, варовитыштінныд. Ужнайтыштам.

Нывбабаяс дасьтӧны пызан, бабӧ да Вадим пукалӧны.

ӦГАШ БАБ. Эновтісны миянӧс ас кежӧ. Ми варовитыштам на бур пиыскӧд.

ВАДИМ ПЕТРОВИЧ. Ме радпырысь тіянӧс кывза.

ӦГАШ БАБ. Пӧрысьтӧ эськӧ ӧні некод нин оз кывзы да. Тэтӧг пӧ тӧдам, шуасны дай.

УСЬТИК. Бабӧ, учительыслы нинӧмсӧ норасян.

ӦГАШ БАБ. Немся ог. Учительыс и должен тӧдны, кутшӧмӧсь ті, томиник чибукъяс. Усьтик вылӧ эськӧ ог норась, кывзысьӧ на. Школаад ог тӧд, ёна-ӧ вильшасьӧ-а. Но кодсюрӧ, гырысьджык зонкаясыс, нывкаясыс и.

ВАДИМ ПЕТРОВИЧ. Тӧдам, бабӧ, тӧдам. Юсьӧны и кулиганитӧны. Но ми ӧд найӧс та вылӧ ог велӧдӧй.

ӦГАШ БАБ. Тӧда — он. А ме вот кӧсъя критикуйтыштны школатӧ.

ВАДИМ ПЕТРОВИЧ. Простите, мыйысь нӧ?

ӦГАШ БАБ. А ме тшӧтш извинит шуа, абу кӧ ме прав! (Гӧлӧсыс лыбыштӧ.) Тӧнлун суседлӧн Юрикыс, Никитаӧн вокыс, кыз синваӧн бӧрдӧ, ӧбӧдитӧмныдӧсь. Медся бура пӧ олимпиада вылас задачаяс решиті и вочакывъяс сеті, первой места босьтӧма, а гожся лагерас индӧмныдӧсь мӧдӧдны директоршалысь писӧ. Тадз мӧй позьӧ? Мортыс старайтчис. Миян Лариса ӧтнас шыасьлӧма, Юраӧс дорйыштӧма, а мукӧдыс ставныс пӧ чӧв олӧны.

ВАДИМ ПЕТРОВИЧ. Да... Артмис... Ме тшӧтш чӧв олі... Ме выль морт на тані, том учитель, собственнӧ... Коді на и менӧ кывзас. А сэсся ӧд меным директорлы паныд сувтны дзик оз позь. Во помас, гашкӧ, бӧр муна карӧ, да лёк характеристика босьтны абу окота. Одним словом, зыксьыны ог радейт.

ӦГАШ БАБ. Гӧгӧрвоа. Быдӧн ас вӧснаыс... А олӧмыс таысь тшыкӧ, да лёкыс ставнымлы на и вачкӧ! Тайӧс ог гӧгӧрвоӧ. (Легӧдӧ юрнас.) Со тай быдласянь и кывсьӧ разбой.

ЛЮБА (шыасьӧ, кывзыштӧма налысь сёрнисӧ да). Мамук ӧд миян сэтшӧм, правда корсьысь. Вадимушко, зятьпуӧй, эн пыдди пукты. Миянӧс ставнымӧс топӧдлӧ. Усьтиклы и Ларисалы сюрлӧ.

ӦГАШ БАБ (серӧктӧ). А мыйла инӧ, донаясӧй, ме воюйтлі, бать и вокъяс юрсӧ пуктылісны и... Эг ӧмӧй правда вӧснаыс да бур олӧм вӧснаыс? Весьыс мед некод некодӧс оз ӧбӧдит.

ЛЮБА. Дерт эськӧ да... Пызан миян дась, вайӧ вешйӧ пызан саяс. Нуръясьыштӧй да чай юанмоз бара на позяс варовитыштыны.

Ӧшинь сайсянь кылӧ Никитлӧн гӧлӧсыс: «Юсьтик!»

ӦГАШ БАБ. Но, рытъя петук чуксасьӧ нин. Ужнайтӧй. Ужынтӧгыс пышъянныд. Югыд войыс, тувсов войыс манитӧ ывлавылӧ.

УСЬТИК (гӧгӧртӧ пызан гӧгӧрыс). Ме-е-ным оз на ков, бӧрти пыра да сёя. (Босьтӧ шкапсьыс кутшӧмкӧ книга, веськӧдчӧ ӧдзӧслань. Учитель дорті прӧйдитіг сюся видзӧдӧ сы вылӧ да сьылыштӧ.) Талун менӧ нимтыштісны трусӧн...

Вадим гӧгӧрвоӧ: сылы адресуйтӧма тайӧ кывъясыс да кутыштлӧ Усьтикӧс киӧдыс.

ВАДИМ ПЕТРОВИЧ. Выль сьыланкыв? Кодлы посвящайтан, Устинья Чувьюрова?

УСЬТИК. Тайӧ абу сьыланкыв. Тайӧ кывбур. Никит гижӧма. Праздник дырйиыс кутас лыддьыны.

ВАДИМ ПЕТРОВИЧ. Никит кывбуръяс гижӧ? Ме ог и тӧд. Ноко вай тӧдмӧд, лыддьышт, кывъяссӧ кӧ тӧдан. Донъялам Никитлысь поэзиясӧ.

УСЬТИК. На сто процентов бур! Кӧсъянныд кӧ, лыддя! Али ог, мӧдысь!

ВАДИМ ПЕТРОВИЧ. Кӧсйысин кӧ.

ӦГАШ БАБ. Ворсӧдчӧ вед со, зятьпуыскӧд, учительыскӧд.

ЛЮБА. Челядь руыс на, вильшасьӧ. Усьтик, уважит учительтӧ. Корӧ да. Кывбурсӧ вед лыддьӧм вылӧ и гижӧны.

ӦГАШ БАБ. Никитыс гижӧ. Меным на лыддьывлӧ и.

ЛАРИСА. Сідзкӧ, ме ӧтнам и ог тӧд. Учительясыд медбӧр и тӧдмалӧны.

ВАДИМ ПЕТРОВИЧ. Артмӧ сідз. Но вай, Устинья, лыддьы, эн каймӧдлы. Ми ӧд кӧсъям унджык жӧ тӧдны тэнад жӧник йылысь. Но он кӧ...

УСЬТИК. А вот и лыддя, босьта да. (Вешйыштсьӧ джодж шӧрланьыс, ичӧт школьница моз гораа лыддьӧ, оз весиг жестикулируйт.)

Талун менӧ нимтыштісны трусӧн,

Сы вӧсна мый сувті налы мышкӧн,

Кыв эг шу ни киясӧн эг шеновт,

Вежӧр мырдӧн тшӧктіс — найӧс эновт.

А ме некор на кодьсьыс эг повлы,

Мырдӧн тшӧктӧм меным эз жӧ ковлы,

Мый ме кӧсйи, пырджык вӧчлі сійӧс,

Шедтӧм вӧв моз эг радейтлы сийӧс.

Таысь меным кодыркӧ и сюрліс,

Тшӧкыдакодь мырддьывлісны юрлӧс,

Но быд пӧрйӧ аддзысьліс бур ёрт,

Сюсь вежӧра, югыд вира морт.

Усьтик помалӧм бӧрас лӧсьыдика копыртчыштлӧ да вӧлись ас кодьыс лоӧ, визув да варов.

УСЬТИК. Тайӧ ме — сюсь вежӧраыс да югыд вираыс! Вот так, мед тӧдінныд! А ӧні — чао, ме муні. Никит виччысьӧ. Миян колӧ на грездысь корсьлыны лейтенантскӧй военнӧй паськӧм Никитлы...

Петӧ. Ӧшинь сайысь кылӧ сылӧн гӧлӧсыс.

УСЬТИК. Ок и тулыс, тулыс, гажа тулыс...

Пукаланінсьыс чеччӧ Вадим.

ВАДИМ ПЕТРОВИЧ. А ме, собственно, пыри могӧн жӧ, военнӧй паськӧм жӧ корся. То, Лариса Григорьевна нуӧдіс да. Миян пӧ батьӧлӧн вӧвлі кӧнкӧ военнӧй паськӧмыс.

ЛЮБА. Лӧсялас кӧ, эм, видзам ӧнӧдз. Ужнайтыштӧй дай мерайтанныд, корсьлам. Ужыныс ӧд то пызан вылын кӧдзаліс. Этайӧ Усьтик ылӧдіс кывбурнас. Сибӧдчӧй пызан дорас, Вадим Петрович. Лариса, мый виччысян?

Занавес

НЁЛЬӦД ПЕТКӦДЧӦМ

Сійӧ жӧ керкаас. Ӧгаш баб да Лариса пукалӧны воча ныр.

ӦГАШ БАБ. Нылукӧ, висьтав, збыль нӧ йӧзыс сёрнитӧны. Гортын тай нӧ ог тӧдӧ.

ЛАРИСА. Мый нӧ сёрнитӧны?

ӦГАШ БАБ. Верӧс сайӧ пӧ мӧдан.

ЛАРИСА. А миян сиктын несйыныд он лысьты! Сарапана поштаыд разӧдас... Збыль, бабук, сёрнитӧны. Но ме ачым бурасӧ ог на тӧд, кык пельӧ на вежӧрӧй юксьӧма.

ӦГАШ БАБ. Нэмтӧ ӧд мам питшӧгад он ов, дитяӧ. Енмыс шулӧма пӧлӧн овны да. Ладманныд кӧ, мун. Миянсянь невӧлитӧм оз ло сэтчӧ ни татчӧ. Ачыд тӧд. А сьӧлӧмыд кык пельын на кӧ... Ог и тӧд, мый шуны. Оз на, буракӧ, ков тэрмасьны. (Кыскыштӧ дінас внучкасӧ.) Дитюкӧ, тіянӧс кӧ ӧд бура меститам, меным позяс кувны кокни сьӧлӧмӧн.

ЛАРИСА. Бабӧ, киясыд тэнад сэтшӧм меліӧсь. Помнита, ичӧтдырйи пыра исласянінысь лым куль кодь, а тэ пӧрччӧдан, юрсиӧс чышъян улысь лӧсьӧдыштан, «а зарни пыш юр тэ» шуан. Меным дзик пыр сэтшӧм долыд лоӧ! Керка пытшкын пемыд, а меным и битӧгыс гажа бабӧкӧд.

ӦГАШ БАБ (ышловзьӧ да чышкыштӧ доршасьӧм синвасӧ). Верми-ӧ думыштлыны, ыштӧ нучкаӧс верӧс сайӧ сеттӧдз ола. А со... ола! Колӧкӧ тэнсьыд на кагуктӧ аддзыла. Друг ӧд тӧд вылӧ уси эсійӧ проклятӧй войнаыс, менам медся страшнӧй здукъясыс. Кызь арӧса нывка на ӧд сэки ме вӧлі. Высота вылӧ ӧтнам коли, гӧгӧр ёртъяслӧн шойясыс, пулемётлӧн лентаыс помассис. А фашистыс зырӧ, кылӧ, понъяс моз никӧстлӧны, вир дуктӧ кыласны да. Менӧ эз на казявны, раненӧйяссӧ бытьйӧдлӧны штыкъяснас... Господи, кымынысь сійӧ меным вӧтӧ уськӧдчыліс! Вирыс резсьӧ... Лэччысь шондіыс аддзӧ, да нинӧм оз шыав, а найӧ звермӧмаӧсь. Ме му бердас ляскыси, ёрт шойӧн тупйысьышті дай куни синмӧс, мый лоны ло. Земля-матушкаӧ, дзеб, сывйышт ас пытшкад — сӧмын кевма вежӧрӧн...

Пырӧ Усьтик, киас ем-сунис да вурсян, мунӧ югыдджыкинӧ, ӧшинь дорас. Лӧньӧ. Бабӧ висьталӧ водзӧ.

ӦГАШ БАБ. Повзьӧмысла садьӧс кӧ воштылі-а. Кыла тай «Ура!» горзӧны. Миян! Асланым воӧны! Бара садьӧс воштыссьӧма. А кор палялі, менӧ моздорас босьтӧма том боец. Тайӧ дедныд вӧлі, нылукӧ. Максим менам...

ЛАРИСА. Бабукӧ, войнаыс кӧн нин помасьӧма, а тэ пыр на мыйкӧ выльтор висьталан.

ӦГАШ БАБ. Да ӧд война страсьтыслӧн пом ни пыдӧс абу, мыйкӧ бара и тӧд вылад усьӧ. Тайӧс висьтавлывлі нин.

УСЬТИК. А дедӧыдкӧд сэні и гӧтрасьлінныд?

ӦГАШ БАБ. Эг жӧ сэки! Ме висьтавлі нин, Брестын аддзысим, случайнӧ. Сэкисӧ торъявлім на. Ранитчис сійӧ, госпитальӧ нуисны. А ми водзӧ на Берлинлань мӧдім... Кузь ӧд туйыс вӧлі. А Господи тай, судьбаыд йитас. Война помасьӧм бӧрас гортӧ нин локта. Брестын поезд виччысям. Видзӧда да, Гриценко Максимыд. Зэв слабиник, муртса пӧ госпитальысь петі, а мунныс сылы некытчӧ. Налысь Дубровичи рӧдвужсӧ бомбаӧн изведитлӧма немечыд. Ме дыр думайттӧг и шуа, мися, мунам мекӧд Комиӧ, миян вӧр-ваыс лечитас. Локтіс. Эстӧн важ керка вӧвлі миян. Сэтчӧ и пырим... Олім тай. Эг лёка... Тайӧ керкасӧ выльӧс стрӧитлім... Сӧмын кантужитчӧма вӧлі да приступъяс дырйиыс чер и пурт ковмыліс дзебны...

ЛАРИСА. Ме ӧд, бабӧ, сійӧс ставсӧ нин помнита. Ар вита нин вӧлі. Менӧ чуксалӧ, лок пӧ мышкуӧс гыжйышт, ог судз. Ме гыжъяла, а сійӧ малыштӧ менсьым юрӧс, шуӧ: «Гарнэ дытына, бурда да выль дадь тэныд вӧча». Куйліс нин сэки.

УСЬТИК. А ме инӧ мыйла ог помнит? Менӧ мед тшӧтш гарна дытынаӧн шуис.

ӦГАШ БАБ. А детинасӧ тай, коньӧрушколы, эг и вайлы. Мамнытӧ сӧмын и чужтылі. Миян рӧдӧ мужикыс эз овмӧдчы. Батьнытӧ тіянлысь со мамыд дорӧ тайӧ керкаас и вайӧдім. И слава богу, ӧні асланым семья тай. Колхоз-совхозтӧ кӧ эз кисьтыны, шыньгӧмӧн эськӧ и олімӧ, а ӧні батьыдлы ковмас нажӧтка перйыны гортсянь бокын. Туй вӧчанінад тай муніс.

УСЬТИК. А мамӧ аски кӧсйӧ батьӧ дорӧ туй вӧчанінас ветлыны.

ӦГАШ БАБ. Висьталӧ тай, колхоз делаяснас пӧ ыстӧны.

УСЬТИК. Столӧвӧй миян сэтчӧ кӧсйӧны восьтыны. Давай, Лариса, ми каникулъяс дырйиыс сэтчӧ уджавны медасьлам! Официанткаӧн. Вы что желаете, дорогой клиент? Грибочки или пельмени? К вашему сведению, грибочки-то я сама собирала...

ЛАРИСА. Да ладнӧ, Усьтик, вежнясьнытӧ. Нинӧм сійӧ оз артмы.

УСЬТИК. Мыйла нӧ, кӧсъям кӧ?

ЛАРИСА. А ме кӧсъя Египетӧ ветлыны!

УСЬТИК. У-уть! Египетӧ?! Эсыкӧд? Сыкӧд, дерт! И ме кӧсъя Египетас! Никитӧс босьтлам и!

ӦГАШ БАБ. И менӧ, бабуксӧ тшӧтш. Ок, дитяяс, лолыд кытчӧ оз вӧзйысь да. Вот олӧмыслӧн аслас закон. Вӧжжинас олӧмыс веськӧдлӧ. Мортыд сӧмын видзӧд, мед оз шыбельт либӧ тёпканӧ вӧйт. Сюся кӧ видзӧдан да ас кадӧ сямман вӧжжи дорас ачыд кутчысьлыны, водзӧ шыльыда олӧм кузяыс лэбан, а он кӧ и, ковмас лым пытшкас собавны и тёпкана гуас буавны.

УСЬТИК. Бабӧ, ме тӧда, ме ӧд шуткаӧн. А сэтшӧм окота кытчӧкӧ ылӧ-ылӧ ветлыны! Вот школа помала дай муна карӧ велӧдчыны. Сӧмын вот колӧ нӧшта этайӧ платтьӧсӧ праздник кежлас помавны. Дыш, бӧждорсӧ колӧ мичаа кружевӧн вӧчны.

ӦГАШ БАБ. Ӧні ме тэныд та йылысь и доли да.

УСЬТИК. Тӧда. (Мунӧ мӧд жырйӧ, скӧрысь босьтӧ платтьӧсӧ улӧс юр вылысь.)

ЛАРИСА. Усьтик талун мыйкӧ дузъялӧ. Но мед. Меным петавны колӧ ӧтилаӧ. Бабӧ, ме дзик пыр бӧр локта, эн гажтӧмтчы.

Петӧ ӧдзӧсӧд, ӧдзӧсас паныдасьӧны мамыскӧд.

ЛЮБА. Но, тэ кытчӧкӧ бара нин петан?

ЛАРИСА. Регыд локта. Пыр, Усьтик гортын, бабӧ и.

ЛЮБА (паськӧмсӧ пӧрччиг и шыасьӧ). Бара тай муніс-а. Тэныд, мамӧ, нинӧм эз висьтав? Мунны пӧ лӧсьӧдчӧ кытчӧкӧ да. Олӧм лои, мамыд медбӧрӧн тӧдмалан.

УСЬТИК (мыччысьлӧ вежӧс сайсяньыс). Тэныд коді висьталіс? Паладь баб кӧ, сылысь эн верит.

ЛЮБА. Марпа сэн вӧлі и, висьталісны кыкнанныс.

ӦГАШ БАБ. Тэнсьыд юасьтӧг-висьтасьтӧг оз мун.

ЛЮБА. Эз на тай ӧнӧдзыс асвӧляасьлыны да. Ачыс нин нажӧвитӧ, мед эськӧ, но мыйла йӧзыс, а оз ачыс юӧрт. (Шыасьӧ Усьтик дорӧ.) Усьтик, ыжъясыд воӧмаӧсь, няньтор босьт, вай петалам. Межсӧ торйӧн колӧ йӧртны, ӧтнамлӧн оз артмы.

Ӧшинь сайын кылӧ Никиталӧн гӧлӧсыс: «Юсьтик!»

УСЬТИК (уськӧдчӧ ӧдзӧсас). Мамӧ, тэ верман кольччыны гортӧ. Ми Никиткӧд йӧртам.

ЛЮБА. Но инӧсь. Нывъяс пышйисны, мамӧ дорын шойччышта.

Ӧдзӧсӧ тотшнитӧ да пырӧ Вадим Петрович.

ВАДИМ ПЕТРОВИЧ. Позьӧ оз?

ЛЮБА. Мыйла нӧ оз позь. Абу ӧд пыртӧм керка. Лок, лок.

ӦГАШ БАБ. О, варов учительыд! Лок, ме буретш и гажтӧмся. Лариса и Усьтик кытчӧкӧ петісны-а.

ВАДИМ ПЕТРОВИЧ. Пуксьыла инӧ бабӧкӧд. Сёрнитны эськӧ локті, да Лариса Григорьевнатӧг сёрниыс оз артмы.

ӦГАШ БАБ. Ловъя йӧзлӧн сёрниыд пыр артмас. Нинӧм кӧ висьтавны, поводдя йылысь пан дай.

ВАДИМ ПЕТРОВИЧ. Тэ, бабӧ, пыр дельнӧйтор шуан. Тэнад ӧд ыджыд нин арлыдыд, кымын арӧс тыртан?

ӦГАШ БАБ. Ӧкмысдасыс абу на, позяс кӧ, нӧшта на та мында ола. Кокниа ӧні войтырыс олӧ. Норасьӧны эськӧ сьӧкыд вылӧ, но абу важ моз. Нянь ог кӧдзӧй, а сёям.

ВАДИМ ПЕТРОВИЧ. Но, бабӧ! А ті онӧ вывті уна кӧсйӧ? Мӧд та мында...

ӦГАШ БАБ. А миян семьяын мӧдаръюгыдас пӧрысьяссӧ некор оз тэрмӧдлыны.

ВАДИМ ПЕТРОВИЧ. Дӧзмин, бабук? Ме ӧд эг лёк вылӧ. Тіян энергия вылӧ шензя!

ӦГАШ БАБ. А энергияыд... Пӧрысь да вӧрысь. (Серӧктӧ.)

ЛЮБА (чеччӧ). Час ме муна самӧвар пукта.

Пырӧ Степӧ.

СТЕПӦ. Тотшӧдчытӧг и пыри. Усьтяыд кильчӧ помад тшӧктіс пырны да. Здоровоти ставныдлы! (Аддзӧ Вадимӧс.) О, тіян татшӧм гӧсьт! Усьтялӧн учительыс! (Чургӧдӧ сылы кисӧ.) Здорово!

ВАДИМ ПЕТРОВИЧ. Здорово! (Степӧлысь кисӧ оз босьт.)

ӦГАШ БАБ (казялӧ тайӧс). О, Степӧ, суседӧ локтӧ! Видза, видза! Дыр нин эн пырав. Талун зэв вӧччӧмыд, гӧтрасьны онӧ нин лӧсьӧдчы?

СТЕПӦ. А корасьны и пыри! Юӧмысь эновтчи, то мича дӧрӧм ньӧби.

ӦГАШ БАБ. Аддза. Ме загреки чайті, эталытӧ, муса учительыслы, дружка пыдди пырин. Корасьны жӧ инӧ локтін?

СТЕПӦ. Ме талы абу дружка. Мед дружкаяссӧ тайӧ карсьыс вайӧдас. Сійӧ меным кисӧ весиг эз мыччы. Менам и збыль няйтӧсь киясыс, солярка да маслӧ йиджӧма.

ВАДИМ ПЕТРОВИЧ. Няйт киӧн ошйысьны нинӧм. Ӧні вузалӧны майтӧгтӧ да шампуньтӧ быдпӧлӧсӧс.

СТЕПӦ. Ой, кутшӧм тайӧ сӧстӧм! Менам сэсся ошйысьныс нинӧмӧн. Выль гитара ньӧби, кильчӧ помад Никит да Устя мырддисны. Но гитара абу ошйысянтор, сійӧ — гажӧдантор. (Йӧктыштӧ да сьылыштӧ: — «ля-ля-ля-а», гӧгӧр бергӧдчыштӧ.) А кӧн нӧ менам невестапуӧй?

ӦГАШ БАБ. Тэнад кӧ невеста, тэ и тӧд.

СТЕПӦ. Кужан тэ, бабӧ, вочакывтӧ сетны. А этайӧ мый тані пукалӧ? Сійӧс виччысьӧ? Некор оз вермы лоны, медым Ларочка этайӧ сайӧ петіс! Ог лэдз!

ВАДИМ ПЕТРОВИЧ. Интереснӧ, кутшӧм право серти?

СТЕПӦ. А тэ сы доныс он на сулав.

ВАДИМ ПЕТРОВИЧ. А тэнад доныс ыджыд-ӧ? Троя доз?

СТЕПӦ. Кужан, мыйӧн бытшкыны, но меным оз нин имит. Ме дугді!

ВАДИМ ПЕТРОВИЧ. Кымын лун кежлӧ? Али магазин воссьытӧдз?

СТЕПӦ. Тэныд назло, вомӧ сэсся некор ог босьт. Ок, эн кӧ учитель вӧв, нӧшалі эськӧ.

Пырӧ Лариса, пыркнитӧ сьылівыв чышъянсьыс васӧ.

ЛАРИСА. Ывлаас зэрмӧ. (Аддзӧ зонъясӧс, налысь чокышасьӧмсӧ.) А этайяс мый тан керӧны? Коб улӧ зэрсьыс дзебсинныд?

ӦГАШ БАБ. А шонді да тӧлысь тай быттьӧ мӧда-мӧдыскӧд венласьӧны.

ЛАРИСА. Тӧлысь да шонді оз вермыны венласьны. Ӧтиыс луннас, мӧдыс войнас мыччысьлӧ.

ӦГАШ БАБ. Тьфу, эз лӧсяв! Пыжа да мыжа моз инӧсь. Пыжаыс вабергачын бергалӧ, мыжаыс берег дортіыс котралӧ.

ВАДИМ ПЕТРОВИЧ. Коді нӧ пыжаыс, бабӧ?

СТЕПӦ. Мыжаыс, дерт жӧ нин, ме. Кортӧгыс вои да. Ме по соседству, кыдз шуласны, пырыштла. Ларочка, эн дӧзмы, ме кортӧг пыри, вӧтлытӧг пета.

ӦГАШ БАБ. А бур пиянӧ, со ачыс Лара локтіс, сійӧ и висьталас. А ме мудзи, муна мӧд жыръяс пӧрӧдчыштла.

ЛАРИСА. Бабук, тэнӧ ӧбӧдитісны?

ӦГАШ БАБ. Ачыд, дитя, ачыд видзӧд. Тэныд овны, тэныд и друг-братӧс бӧрйыны. Ме дӧнзи, юрӧй висьмис. (Мунӧ.)

ЛАРИСА. Зонъяс, мыйла бабӧыс висьмис? Ноко висьталӧй!

СТЕПӦ. Ларочка, ме муртса на пыри. Ме — нинӧм... Кӧсйи тэнӧ поздравитны. Абу мӧй ичӧтысянь бур ёртъяс?

Ӧшинь сайын кылӧ гитараӧн ворсӧм шы.

СТЕПӦ. То, гитара и быдӧн сьӧрысь босьті, мися, гажӧдышта.

ЛАРИСА. Степӧ, тэ век ичӧт зонка кодь. Мыйӧн нӧ поздравитны кӧсъян?

СТЕПӦ. Регыд велӧдчан воыд помасяс. Сійӧн. Нӧшта верӧс сайӧ пӧ мӧдан да.

ЛАРИСА. Кытысь нӧ татшӧм юӧрыс?

СТЕПӦ. Со тай нӧ кутшӧм важнӧй жӧник пукалӧ. (Индӧ Вадим вылӧ.)

ЛАРИСА. А тэ, Вадим Петрович, мый он чеччы? Ӧти ӧдзӧсӧд и кыкнанныд петӧй. Бабукӧс дӧзмӧдӧны...

ВАДИМ ПЕТРОВИЧ. Да ме сёрнитны локті, чӧлӧй час тэнӧ виччыси. Сэсся сідз прӧста мунны...

ЛАРИСА. Некутшӧм сёрни талун оз ло, шуӧма тіянлы!

ВАДИМ ПЕТРОВИЧ. Кывзыся. Но... (Мунӧ Степӧ бӧрся ӧдзӧслань, броткыштӧ мыйкӧ, бӧр бергӧдчыштлӧ.)

ЛАРИСА. Мунӧй, мунӧй!

Мӧд жырсяньыс петӧ Люба, ӧти киас пӧсь чайник, мӧдас сакарнича.

ЛЮБА. Но, гӧсьтъясыд тай нӧ мунӧны нин! Ме то пӧсь самӧвар вая, чай, мися, кутам юны-а.

ЛАРИСА. Вӧтлі ме найӧс.

ЛЮБА. Степӧыс эз вӧв код да. Мыйкӧ нӧ эз лӧсявны ли мый? (Пуктӧ чайниксӧ да сакарничасӧ пызан вылас, мунӧ ӧшинь дорас. Лариса тшӧтш.) А то ӧд зытласьӧны и эм. Тыш лэптасны.

Ӧшинь сайын кылӧны зонъяслӧн гора гӧлӧсъясыс.

СТЕПӦ. А тэнӧ, жӧникӧс, тодмышкалісны тшӧтш!

ВАДИМ ПЕТРОВИЧ. Мун син водзысь, весась.

СТЕПӦ. Ӧтлаын мунам. Кыкнаннымӧс шывыл-патеруйтісны да. Ми ӧні тэкӧд товарищи по несчастью! Никит, кӧні тэ? Ноко вайлы гитарасӧ, на прощанньӧ ворсышта! (Кылӧ сылӧн ворсӧмыс да сьылӧмыс.)

Ваше благородие, госпожа удача,

Кодлыкӧ тэ юмов ва, кодлыкӧ переча ва.

Тарыт тэд и меным перечыс и вичмис,

Таысь менам, сё ей богу, морӧс быдӧн личмис.

Вадимлӧн (зэв дӧз) гӧлӧс. «Да пошёл ты!» Степанлӧн серам. «Во, во! Важӧн тадз колі!» Кылӧ ворсӧ да тотшӧдӧ кокъяснас. Люба да Лариса век видзӧдӧны ӧшиняс.

ЛЮБА. Степӧлӧн вед чунь помъясыс ой мастерӧсь. Со кыдз ворсӧ!

ЛАРИСА. Степӧнад и быдӧн! (Дӧзмӧ ӧшиняс видзӧдны, пуксьӧ да лӧньӧ.)

Кынӧмас кутчысьӧмӧн лашиктӧ-петӧ мӧд жырсьыс Ӧгаш баб, шыасьӧ ныв дорас.

ӦГАШ БАБ. Мый нӧ ӧшиняс юртӧ сюйӧмыд?

ЛЮБА. Колльӧді Ларисалысь жӧникъяссӧ. Лючки мунісны разі-пелиӧн.

ӦГАШ БАБ (видзӧдӧ сюся Лариса вылӧ). Невестаыс мыйкӧ жугыля пукалӧ?

ЛЮБА. Жугыльман ӧд...

ЛАРИСА. Ме немся абу жугыль. Этайӧ рытъя кыасӧ аддза ӧшинь пыр да окота лолӧ лэбзьыны кытчӧкӧ зэв ылӧ. Вадим Петровичыскӧд туристическӧй путёвка Египетӧ закажитімӧ. А вӧрзьыныс пола.

ӦГАШ БАБ. Мыйысь нӧ полан? Гортыд ӧд оз пышйы.

ЛАРИСА. А муна да сэтчаньӧ кӧ сьӧд тошка египтянин сайӧ пета? Этатшӧм гажа ӧшинь улыс нӧ сэні эм? Этатшӧм вой кыаыс да?

ЛЮБА. Со тайӧяскӧд и сёрнит. Шутка улӧ лэдзасны дай.

ЛАРИСА. А мый нӧ, шу, бабӧ, шогсьыны ли мый кутам?

ӦГАШ БАБ. А ме эг кӧ шмонитлы, важӧн эськӧ абу ловъя. Мед шмонитас нылукыс. Аддза ӧд, шогӧ усьӧма.

Мамыс дасьтӧ пызан, бабыс пуксьӧ Лариса дінӧ, кутыштӧ кинас. Лариса заводитӧ нориника сьывны.

Радейта ме тэнӧ,

Аслам чужанінӧй,

Муна кӧть мӧд муӧ,

А тэ дінын думӧй.

Пырӧ Усьтик, радлыштӧ.

УСЬТИК. А ме буретш ужын кежлӧ! (Уськӧдчӧ ӧшинь дорас, шенасьӧ Никитаыслы.) Эсійӧ, Вадим Петровичыс меным мыйлакӧ шуис, Усьтиння пӧ, чойыд тэнад кодь жӧ вылын ныра. Мыйла эськӧ? Тэ, Лариса, лэптӧдлін ли мый ныртӧ? А ме чайті, тарыт сыкӧд и сійӧ патераӧ узьнысӧ мунан.

ЛЮБА. Йӧюк тэ...

ӦГАШ БАБ. Свадьбасӧ эгӧ на ворсӧй да. Свадьбуйттӧг тэнӧ ни Ларочкаӧс гортысь ог лэдзӧй... Миян рӧдын нэмыс сэтшӧм мода вӧвлі.

Занавес

ВИТӦД ПЕТКӦДЧӦМ

Вадор кыр йылын, мемориальнӧй крест дорсянь неылын, карса ныв буретш ӧшӧма ыджыд плакат, вомгорулас сьылігтыр, ылыстчылӧ, видзӧдӧ, ладнӧ абу артмӧма. Вылыс пельӧсыс абу лючки лясӧма. Кайӧ скамья вылас, кӧсйӧ лӧсьӧдыштны. Ю дорсянь мыччысьӧ Степӧ, абу код, лӧсьыдик дӧрӧм-гача. Сьылӧ:

Воссис ва, воссис ва,

Вежсяс и менам юква,

Йӧршысь артмӧ ведра юква,

Прӧщайтлы жӧ тэ мойва.

Локтӧ ныв дорӧдз, лыддьӧ плакатсӧ.

СТЕПӦ. Вель ком! О, английскӧйӧн!

АНАСТАСИЯ (чеччыштӧ скамья вывсьыс). Повзьӧдіс!

СТЕПӦ. О, леди Спиктик! (Вомыс шешкысьӧма.)

АНАСТАСИЯ (серамсорӧн). О-о, модель! Супер! (Кузь юрсисӧ тшапитчӧмӧн лӧсьӧдышталӧ да нимкодясьӧ орччӧн сулалысь зоннас.)

СТЕПӦ. Мый нӧ эськӧ татчӧ татшӧмсӧ ляскин?

АНАСТАСИЯ. Он мӧй аддзы? Реклама. Тувсовъя ярмарка волас праздник кежлас. Промышленно-торговый дом да сельхозпотребительскӧй общество...

СТЕПӦ. Гӧгӧрвоана. Тэ инӧ тӧргӧвечыс лоан? (Шпыннялӧ.)

АНАСТАСИЯ. Ме... Ме — организаторыс. Водзвыв локті карсянь, реклама ӧшӧді. Нӧшта мый тіянлы висьтавны? Бурджык, вай скамьясӧ кутыштлы, ме кайла, эсійӧ чуктӧм пельӧссӧ лӧсьӧдышта. (Тэрыба кайӧ скамья вылӧ, командуйтӧ.) Кут! А то уся!

СТЕПӦ (малалӧ кокъяссӧ). Мусаникӧсь...

АНАСТАСИЯ (бӧр чеччыштӧ муас). Кокӧс гильӧдан да! Вот ачыд и кай да лӧсьӧд!

СТЕПӦ (кайӧ). Этатшӧм анделыслы нӧ ӧткажитан! (Лӧсьӧдыштӧ, лэччӧ.) Мыйла английскӧйӧн? Эз мӧй позь «Видза корам» комиӧн гижны?

АНАСТАСИЯ. Кад нин европрестижнӧя овны. Кольччӧмыд олӧмсьыс дзикӧдз. Миян ӧд тӧварыс высшӧй сорт!

СТЕПӦ. Да тэ ачыд высшӧй сортыс! Ой-я андел! (Сывйыштӧ, малыштӧ нывлысь кузь еджыд юрсисӧ.) Вай шойччыштам, пукалыштам скамья вылас. (Кыскыштӧ нылӧс, ачыс пуксьӧ.) Пидзӧс вылӧ пуксьӧда.

АНАСТАСИЯ. В принципе, можно пукалыштны! (Синмасигтыр пуксьӧ, сывйыштӧ зонмӧс.)

СТЕПӦ. Но вот, ӧшӧдін рекламатӧ. Сэсся ковмас пукавны-стӧрӧжитны, мед зонпосни оз косявлыны улыс пельӧссӧ. Найӧ ӧд чигарка вылӧ вермасны.

АНАСТАСИЯ. Да мый ті...

СТЕПӦ. Лунъюгыднас, гашкӧ, и оз, а рытнас войпукны петасны да... Миян ӧд вильышӧсь! (Сывйыштӧ нылӧс топыдджыка.) Да тэ эн шогсьы, ме талун выходнӧй, верма лунтыр тэкӧд стӧрӧжитны. Рытнас и...

АНАСТАСИЯ. Ой ӧд мудер пӧръячка! Чепӧльта вот ныртӧ! Мыйла он юав, кыдзи менӧ шуӧны?

СТЕПӦ. Но, юала... Кыдзи?

АНАСТАСИЯ. Анастасия нимӧй. Но тэ верман менӧ шуны Сияӧн. Пӧдругаяс весиг Сияниеӧн нимтӧны.

СТЕПӦ. А ме — Степан, верман Стёпукӧн шуны. Представитча инӧсь бурджыка. Вӧвлӧм тракторист. Ӧтувъя фермерско-колхознӧй собрание вылын утвердитісны экспедитор должносьт вылӧ. Кута сопровождайтны продовольственнӧй тӧвар асланым сиктсянь стратегическӧй ыджыд туй вӧчанінӧ. (Сералӧ.) Эн кӧ гӧгӧрво, верма и прӧстӧйджыка, сиктса моз. Кыскасьысь. Вӧлӧн ковмас туй вӧчанінас кыскавны сельхозпродукта.

АНАСТАСИЯ. Ой, кутшӧм интереснӧ! А менӧ вӧв вылас пуксьӧдлан?

СТЕПӦ. А тайӧ ог тӧд. Менам водзын кӧ пукалыштан, гашкӧ и... (Ныв кӧсйӧ меліа ляскысьны Степӧ дорӧ, но Степӧ друг йӧткыштӧ сійӧс да ырснитӧмӧн сувтӧ.) Блин, твою... Самӧй ответственнӧй здукас! Тонӧ бабаяс локтӧны! Эз вермыны пажнайтны дырджык! Тьӧщапу вед менам накӧд. Соритас кӧ невесталы! Зэв ӧд вежӧгтысь! Ме усйысьла...

Степӧ уйкнитӧ кустъяс сайӧ. Нывбабаяс варовитігтыр сувтӧны реклама дӧска дорас.

ПАЛАДЬ (бедьнас индӧ реклама вылас). О, тонӧ концерт йывсьыд ӧшӧмаӧсь нин объявлениесӧ!

ЛЮБА. Тайӧ мыйкӧ абу миян шыпасъясӧн гижӧма. Абу концерт йывсьыд. Сійӧс ӧд клуб дорӧ ӧшӧдлӧны.

ВАЛЯ. Колян во тані ӧшаліс «Береги лес от пожара». Сійӧ жӧ буракӧ. Гожӧм ӧд локтӧ.

На дорӧ сибӧдчӧ карса нылыд.

АНАСТАСИЯ. Тані гижӧма: «Видза корам карысь вайӧм тувсов ярманга вылӧ». Ме ӧні муртса рекламасӧ ӧшӧді. Рекламатӧг ӧні оз позь.

ЛЮБА. Со мый. А ми и лыддьыныс ог кужӧй.

ПАЛАДЬ. Ярманга кӧ, гашкӧ, ситеч чышъян вайисны! Гожӧмнас ситеч чышъяныд медся дельнӧ.

АНАСТАСИЯ. Быдтор ваям! Инструментъяс, культиватор, удобрение, дзоридз кӧйдыс, сепаратор...

ВАЛЯ. Быдтор и эм. Да ӧд ньӧбнысӧ мый вылӧ, сьӧмыс абу. Чер да зыр миян эм нин-а. Сэсся нинӧм и оз ков.

ЛЮБА. Нывкасӧ повзьӧдін. Зэв на том да мичаник. Ньӧбасны мужикъясыс бур инструменттӧ. Гашкӧ, и ми на котырӧн сепараторсӧ ньӧбам.

ПАЛАДЬ. Вит лавка нин сиктын да нӧшта вузасьысьяс локтасны? Мунамӧ, луныс кольӧ. Стёпук пӧди важӧн сэн. Виричьястӧ вед рыт кежлас ковмас тупкавны.

Мунӧны. Степӧ кустъяс сайсянь шутёвтӧ, мыччыштлӧ юрсӧ.

СТЕПӦ. Сияние, югыд шондіӧй, лок берег дортіыс гуляйтыштам. Тані пыр эм ветлысь-мунысь.

Ныв уськӧдчӧ Степӧ дорӧ. Саялӧны. Локтӧны Лариса да Вадим Петрович.

ЛАРИСА (портфельсӧ пуктӧ скамья вылӧ, ачыс пуксьӧ жӧ). Мудзи. Пукалыштам. Быд лун урӧкъяс, репетиция. Да нӧшта и тэ, Вадим Петрович, тӧрыт шызьӧдін. Войбыд эг узь.

ВАДИМ ПЕТРОВИЧ. А ме нӧ узи? Тӧрытсӧ вӧтлін да... Эсійӧ лёк алкоголикыс... Да, собственно, коді сійӧ сэтшӧмыс? Висьтав. (Пуксьӧ тшӧтш.)

ЛАРИСА (сералігтыр окыштӧ Вадимӧс). Сійӧ — миян кума-сваттялӧн воча вокыс!

ВАДИМ ПЕТРОВИЧ. Сералӧ ӧд. А ме...

ЛАРИСА. Да эновт Степӧсӧ. Сы вылӧ эн ыстысь. Ме тэ вылӧ дзикӧдз жӧ дӧзми да. Нӧшта и тэрмӧдлан да.

ВАДИМ ПЕТРОВИЧ. Но ӧд путёвкасӧ мамӧлӧн ньӧбӧма!

ЛАРИСА. Со ӧд сылы мыйысь шог! Ок, муса вом дор! Челядь дорад уджалысьлы и збыльысь уна колӧ тӧдны да аддзывны. Ме абу паныд туристалыштны Европаті кӧть Египетті, но медым тадзи тэрмасьӧмӧн верӧс сайӧ петны... Вот батьӧ праздник кежлас волас дай оз лэдз.

ВАДИМ ПЕТРОВИЧ. Да, Ларочка! Тэ гӧгӧрвоан он...

ЛАРИСА. Гӧгӧрвоа. И чайта, колӧ миянлы тані школаас нӧшта ӧти во уджавны, бурджыка мӧда-мӧдӧс тӧдмавны. Сэсся ӧд тані и позьӧ гӧтрасьны да тані овны. Мыйла быть карас мунны? Тані нӧ лёк? ( Чеччӧ да видзӧдӧ гӧгӧрпӧв.) Видзӧдлы! Вӧр! Ю! Лолыд радлӧ! Карас мунан да удж ковмас корсьны, квартира...

ВАДИМ ПЕТРОВИЧ. Сійӧ абу мича нывлӧн мог, Ларочка. Сійӧ могыс менам. Кӧсъян кӧ тӧдны, менам батьлӧн куим жыръя патера. Евроремонтӧн! Мый нӧшта колӧ? Ларочка!.. Ки вылын кута новлӧдлыны.

ЛАРИСА (радпырысь). Ой, вай босьт! Ну гортӧдз! Ме унмовсьыштла ки вылад.

ВАДИМ ПЕТРОВИЧ. Тешитчан? Но, босьта. Нуа. Мый тэ чайтан. Мед ставыс аддзылӧны. (Кӧсйӧ збыль босьтны. Лариса ӧтдортчыштӧ сыысь.)

ЛАРИСА. Вешйы. То челядьыс локтӧны. Усьтик Никитыскӧд и. Шуасны, учительясным пӧ миян эсійӧтӧ... (Индыштлӧ пель бокас.)

ВАДИМ ПЕТРОВИЧ (скӧра видзӧдӧ воысьяс вылӧ). Найӧ, видзӧда да, миысь водз ӧтувтчасны. Простите, конечно, но мед кага оз вӧчны.

ЛАРИСА (сералӧ). А мый, быдтам!

ВАДИМ ПЕТРОВИЧ. Тэ, Ларочка, серьёзнӧ?

ЛАРИСА. Вполне. (Серамсорӧн.) Тэ, менам великӧй педагог-математик! Водзӧ вылӧ вед быдтор аддзӧ! Вай мунам татысь ӧдйӧджык. Пыралам миянӧ. Бабӧ талун кӧсйис тшака шыд пуны. Тэ радейтан тшака шыдсӧ? Кутам панясьны да окасьны. Бабӧлы радыс лоӧ! Тэнӧ сійӧ зэв пыдди пуктӧ.

ВАДИМ ПЕТРОВИЧ. А тэ?

ЛАРИСА. И ме тшӧтш, ме тшӧтш...

Мунӧны. Кылӧ Усьтиклӧн гора гӧлӧсыс: «Никит, тэ меным верба-балясӧ ӧти вож судзӧд!» Котӧрӧн локтӧ скамьяяс дорӧ, сьылӧ гӧгӧрпӧв дзоръялігтыр: «Юргӧ йӧлӧга эстчань ю сайын! Лӧсьыд овнытӧ майбырӧ майын!» Куст сайысь петӧ Степан, тупкӧ нывкалысь синъяссӧ.

УСЬТИК. Никит, эн дур! Лэдз! Ме ӧд тэнӧ ай лав ю-у!

СТЕПӦ (гӧрӧктӧ). Вот и сӧрин, бальӧпи, вӧрсьыс петіс кӧин дай нямис.

УСЬТИК. Степӧ?! Вот дуракыс! Тэ кытысь татчӧ веськалін?

СТЕПӦ. Вӧрсьыс и петі, гуляйта вот. Тэ мый шуин? Ай лав ю! О-хо-о!

УСЬТИК. Но и мун гуляйт, меным эн мешайтчы. Меным англичанка бара на двойка шняпкыны кутліс. Аски кӧ пӧ татшӧм лёка вочавидзан — пукта двойка! (Пуктӧ сумкасӧ скамья вылас, ачыс пуксьӧ сумка вылас, заводитӧ мыйкӧ аскӧдыс сёрнитны. Но регыд звирк чеччӧ да ӧвтыштсьӧ Степӧ вылӧ.) Мун, мися, эн мешайтчы! Тэ дырйи юрӧ нинӧм оз пыр!

СТЕПӦ. Повзьӧдіс. Дзик чойыс кодь. Сійӧ тай менӧ аддзас да чушнитӧ парнас-а. Карса сылы мусмӧма, учитель. Кӧсйӧ кӧ тӧдны, ме ачым гӧтрася карса вылӧ! Тӧдмасимӧ талун. Сійӧ сэтшӧм ныв! Сэтшӧм... Нимыс Сияние. Сияние! Шонді югӧр...

Локтӧ Никита, мыччӧ Усьтиклы верба-баля вожъяс.

НИКИТА. На, корин да, беръялышті. Пукты то усьӧмаяс гу вылӧ, мед тэныд отсаласны английскӧйтӧ велӧдны. (Серӧктӧ.) На, Степӧ, тэныд и, тшӧтш пукты. Кодӧс шуан шонді кодьнас? Тэ Усьтик дорын эн бергав!

УСЬТИК. Ошйысьӧ пыр на. Карса нывкакӧд тӧдмасьӧма. Шонді кодь пӧ.

СТЕПӦ. А шонді кодь и эм да.

НИКИТА (видзӧдлӧ енэжас). Но, чайті шондіыс кымӧр саяс дзебсис. Му вылас инӧ татчӧ лэччӧма! Кӧн нӧ, ме тай нӧ ог аддзы? Пышйис?

СТЕПӦ. Тэ эськӧ эн серав. Сійӧ ӧд карысь воӧма. Торговӧй домлӧн представитель. Сельсӧветӧ кӧ по делам муніс? Меным шуис: виччысьлы пӧ.

НИКИТА. И тэ тані виччысян? А сэні кодкӧ кӧ и шондітӧ тэнсьыд кутас?

СТЕПӦ. Шонді, шонді и эм. Сійӧс он кут. (Сьылыштӧ.) Сияние, сияние шонді югӧрыс кӧ сійӧ...

Вадорсянь локтӧ Паладь пӧч, шенасьӧ бедьнас.

ПАЛАДЬ. Степӧ! Со сійӧ кӧні, школьникъяскӧд ворсӧдчӧ! Бедьнас кӧ ӧжга! Люба да Валя сэні гырысь рамаясӧн вийсьӧны! Чожа мун! Трасича...

СТЕПӦ. Муна, муна. Ой, бабӧ, эн беддяв!

ПАЛАДЬ. Ог вермы, копрасьышті да, юрӧй потны кутіс. Ӧжги эськӧ да... Уф-ф! Мудзи. Этан пукалышта. (Лэччысьӧ скамья вылӧ.) Кула кӧ ӧд талун, праздник дырйиыс сьывнысӧ ог вермы. Уф-ф!

УСЬТИК. Пӧчук, збыль висьмин? Вай ми тэнӧ гортӧдзыд колльӧдам. Никиткӧд.

ПАЛАДЬ (чеччӧ). А зэв ӧд бур сьӧлӧмаӧсь, бобӧяс. Нуӧдӧ и эм, бобукъяс. А тэ, Степӧ, мун эн сулав! (Лэптыштлӧ бедьсӧ Степӧлань.)

СТЕПӦ. Стращайтӧ ӧд... (Мунӧ вадорлань. Усьтик да Никита мунӧны пӧчӧс кыкнан боксяньыс кутӧмӧн.)

Сцена вылӧ петӧ карса ныв Сияние, видзӧдӧ юланьыс, кытчӧ муніс Степӧ. Кисӧ чургӧдлӧ, кӧсйӧ чукӧстны, сэсся заводитӧ сьывны, первойсӧ жугыля, сэсся збоймӧ, вильшасьӧмӧнмоз сьылӧ:

Ёна жӧ нин муса тайӧ зонмыс,

Окав эськӧ сійӧс лун и вой,

Сӧмын кикутӧма тай мӧд нывкӧд,

Сьӧлӧм бердӧ лясіс мустӧм дой.

Клубас, кылӧ, няръялӧ нин гудӧк,

Йӧктан кытшас уськӧдчыла тшук!

Йӧкта, кытчӧдз ныр вылӧ ог усь ме,

Гашкӧ, вунлас зонмыс ӧти здук.

Сиктса нылӧй, свӧячкаӧй менам,

Прӧща кора тэнсьыд ме сё пӧв,

Зонтӧ тэнсьыд, кӧсъян кӧть он, мырддя!

Лыддьы: тэнад некор и эз вӧв.

Сьылігтыр мунӧ. Кӧсйӧ быттьӧ Степӧ бӧрся вӧтчыны. Сыладорсянь жӧ петӧны Люба да Валя.

ВАЛЯ. Кодкӧ эстӧн лӧсьыда жӧ сьылӧ. Клубӧ кӧ нин мунӧ-а? Меным ӧд тшӧтш тарыт ветлыны колӧ. Медбӧръя репетиция шуисны.

ЛЮБА. А Степӧ ӧбед бӧрас сідзи и эз лок. Отсасьысь... (Валялы.) А тэ ветлы. Мамтӧ видзӧдлыны пыралам да.

ВАЛЯ. Мамӧ ме бӧрся тшӧтш вӧтчас. Сьыланінад сійӧ и кулӧм бӧрас на котӧртас.

Занавес

БӦРЪЯ ПЕТКӦДЧӦМ

Водз асыв. Ӧгаш баб чеччӧма нин, ноксьӧ пызан дорас. Кильчӧ ӧдзӧсас кылӧ йигнитісны. Бабӧ уськӧдчӧ пыран ӧдзӧслань.

ӦГАШ БАБ. Абу ӧд игана кильчӧыс. Люба сӧмын на петіс. (Пырӧ зятьыс. Нопъя, резина сапӧга, кепкаа. Мудзӧма.) Зятюшкоӧ, Григорейӧ, локтан! А ме чайті Люба бӧр бергӧдчӧма мыйлакӧ. Муртса петіс да.

ГРИША (пӧрччӧ кепкасӧ). Уф, наконец-тӧ гортын. Брӧд пӧсялӧма и мудзи. Войбыд шлёпиктім подӧн. Туйыс ӧд, вӧрса туйыд...

ӦГАШ БАБ. Пӧрччысь, пиукӧ, пӧрччысь... Тулыс ӧд... Самӧварыд то пӧсь. Люба петтӧдзыс юыштіс жӧ... Пывсян ломтам... Праздник ӧд талун... Йӧз дорас петтӧдз удитан на и мыссьыштны пывсянас... (Мунӧ мӧд жыр ӧдзӧс дорӧ да чуксалӧ внучкаяссӧ.) Челядьӧ! Нывкаяс! Усьтик! Лариса! Чеччӧй! Батьыд локтіс!

Та бӧрын мунӧ джодж шӧрас, сувтӧмӧн шыасьӧ видзӧдысьяс дорӧ. Ньӧжйӧникӧн сы дінӧ петӧны и мукӧд ворсысьяс: Усьтик, Лариса, Никита, Вадим, Паладь, Валя, Анастасия. Никита да Вадим Петрович военнӧй паськӧмаӧсь.

БАБӦЛӦН КЫВЪЯС: Батьыд локтіс... Коді висьталас донсӧ тайӧ кывъясыслы? Гашкӧ, эсійӧ зонкаыс, коді Победа лунӧ восьлалӧ батьыскӧд орччӧн? Али эсійӧ нывкаыс, кодлӧн батьыс эз во, коді ичӧтик вокыскӧд сирӧта коли?.. (Кост.) Ох... Став сьӧкыдлунсӧ сэки ми венлімӧ, но ӧд ми вермимӧ! Вермимӧ! Вермимӧ! Став му шар пасьтаыс йӧлӧга юраліс!

ГРИША. Венам и ӧні ми став сьӧкыдлунсӧ, венам лёксӧ и шедӧдам бурсӧ!

ПАЛАДЬ. Сьыланкыв — отсасьысь вӧвлі пыр миян. (Сьылыштӧ). Скромненький синий платочек...

ВАДИМ. Вьётся в тесной печурке огонь...

СТЕПӦ. Эх, дороти, пыль да туман...

ЛАРИСА. Как-то летом на рассвете...

УСЬТИК. Старинный вальс «Осенний сон» играет гармонист...

ВАЛЯ. Шондібанӧй, важ потшӧсӧй век на тай тэ сулалан...

АНАСТАСИЯ. Муса жӧ нин тайӧ зонмыс, окав эськӧ лун и вой...

НИКИТА. Мы друзья, перелётные птицы...

ГРИША. Татшӧм сьылысь войтырыслы нинӧмысь и повны! Татшӧм сьылысь войтырыслы водзӧ овны-вывны! Венам и ӧні ми став сьӧкыдлунсӧ! (Заллы.) Сиамӧ тіянлы ставлы быд бурсӧ!

Сцена вывті прӧйдитӧны параӧн йӧктысь челядь «Краковяк» мелодия шы улӧ... Кылӧ «День Победы» сьылӧм.

Занавес