ГАЖА АСЫВ
ВОРСЫСЬЯС:
КОЛЯ — армияысь воӧм зон
МАТРӦН ПӦЧ
ТАБАК ВАНЬ — косньӧдіник, визув-варов, олӧма нин мужичӧй
ПЕВРОНЬ — Ваньлӧн гӧтырыс, стрӧг, ыджыд тушаа ань
МАВРА ЧАНЬ — Ваньлӧн сусед-другыс, сьӧкыд вӧраса кыз мужичӧй
МАВРОНЬ — Чаньлӧн гӧтырыс, шурыд, варов нывбаба
АНЯ да ТАНЯ — сиктса нывъяс
МЕДВОДДЗА ПЕТКӦДЧӦМ
Ворсӧмыс мунӧ Коляяс ӧшинювса ласта вылын. Сцена веськыдвылын кильчӧ выв, льӧм пу да сы улын раскладушка. Шуйгавылас потшӧс да дзиръя. Сиктса асывлӧн гора шыяс. Потшӧс сайті йӧз мунӧны удж вылӧ.
КОЛЯ (куйлӧ раскладушка вылас, йӧз шумсьыс тупкӧ юрсӧ эшкыннас, бергӧдчӧ мӧд бок вылас. Сэсся друг ырс чеччӧ).
Дзиръя дорӧ локтӧ Матрӧн пӧч, тележкаын кыскӧ ыджыд картон кӧрӧб. Тележкасӧ кольӧ дзиръя дорӧ, ачыс ньӧжйӧ матыстчӧ куйлысь Коля дорӧ, чӧвтӧ пернапас.
МАТРӦН. Свят... Свят... (Уськӧдчӧ бӧр дзиръялань.)
КОЛЯ (звирк чеччӧ). Алльо-о! Пӧчукӧ, тэ мый?
МАТРӦН (кутчысьлӧ морӧсас). Господи! Весьӧпӧртін! Чайті, кулӧмыд. Темешитчан жӧ эськӧ да... Гачтӧм и... (Век ышлолалӧ.)
КОЛЯ. Гачтӧм... Зарядка вӧча да, дерт.
МАТРӦН. Зарядка? Куйлан да! Зарядкасӧ, тӧдан кӧ, то кыдзи вӧчлӧны! (Пӧчӧ чеччалӧ, шенасьӧ кинас. Коксьыс тювгысьӧ ӧти кӧмыс.) Ой, кӧмӧй уси! (Тэрыба бӧр сюйӧ кокас да бара чеччалӧ.)
КОЛЯ (сералӧ). Но и артистка тэ, Матрӧн пӧч! Мый нӧ телеганас кыскан? (Индӧ дзиръяланьыс.)
МАТРӦН. Эн юась, эн. Телевизор вая, телевизор. Дугдіс вӧлкаличыд сёрнитнысӧ. Водзті эстчӧ, Быт керкаад вӧлі нулан дай. А ӧні... Тэныд тай со вая, гашкӧ, видзӧдлан?
КОЛЯ. Ме-е-ным? Менымсӧ нӧ мыйла?
МАТРӦН. Кыдзи мыйла? Лӧсьӧдны! Меным ӧд гажтӧм тайӧ ёрттӧгыс. Ме вед, Колюк, дзик ӧтнамӧн коли. Кань эм да ме моз жӧ пӧрысьмис-а. Водзті моз оз нин шыртӧ вай да кок улӧ пукты. (Лапкерӧ кыкнан кинас.) Ойя дай ойя жӧ нин! Дедыд менам босьтіс да клопкылӧ куліс, югыдін да шоныдін сылы. А Люсяыд... Чеччыштіс, титимера, верӧс сайӧ! Сэрапом кодь сьӧд зятьӧй, тотарин-я, грузин-я. А варов сідзсӧ. Волісны колян гожӧм отпускавны. Усинскынӧсь найӧ: эсійӧтӧ... нептьтӧ земля-матушкаыслысь пычкӧны да быдлаӧ пӧ тай нуӧны. Кӧрт проводъяс пыр пӧ тай... Ог тӧд, эг на ветлы гӧститнысӧ. Окота эськӧ да... Колӧкӧ, асьныс бара на воласны. Друг да бабӧн шуысьӧс ваясны! (Чиктылӧ.) О, со кыдзи варовми! Колюк, тэныд нораси и ошйыси. Сэсся ӧд гӧтрасьны жӧ ковмас тэныд. Лючки-ладнӧ гортад воин да. Чечняад эз тшытшны Васьӧ Педӧрлысь писӧ моз да.
КОЛЯ. Пӧчук тэ, пӧчук! Гӧтрася! Вот невестасӧ аддза дай...
МАТРӦН. Корсьлам. Медмичасӧ! Медавъясӧ! Ме тэнад свадьба вылын ёна и йӧкта! Колюкӧ, вай тэ, дитяӧ, телевизорсӧ менсьым видзӧдлы. (Котӧртӧ дзиръя дорӧ тележкаысла.)
КОЛЯ (отсалӧ пӧчӧлы). Кыдзи нӧ ме видзӧдла, ог кӧ нинӧм гӧгӧрво?
МАТРӦН. Матрӧн пӧчыдлы, инӧ, ӧткажитан? Ме ӧд тэнӧ видзлі на коркӧ. Морӧс бердӧ топӧда да ӧввӧ сьыла. (Петкӧдлӧ.)
КОЛЯ (серӧктӧ). Ок и мудер жӧ тэ! Радпырысь эськӧ отсала, да ог ӧд куж.
МАТРӦН (ӧбидитчӧ). Пиля дедлы ӧти здукӧн радиосӧ вӧчӧмыд-а...
КОЛЯ. Да ӧд сылӧн приёмникыс мӧд волна вылын вӧлі! Ме сӧмын бергӧдышті.
МАТРӦН. И меным бергӧдышт. (Копыртчӧ тележкаын сулалысь кӧрӧб дорас, мыйкӧ сэні лукйысьӧ.) Отсышт! Мый сулалан?
КОЛЯ (тшӧтш копыртчӧ, восьтӧ кӧрӧбсӧ да гораа шутёвтӧ). Но и фокусник тэ, пӧчӧ! Шуан, телевизор, магнитофон да!
МАТРӦН (вомыс паськалӧма). Господь тӧдӧ... Вежисны, гашкӧ, мутиясыс да... Час, котӧртла... (Уськӧдчӧ дзиръя саяс.)
КОЛЯ. Лыйыштіс со... (Лэптӧ магнитофонсӧ кӧрӧбсьыс, видлалӧ-малалӧ, сьылӧ аслыс вомгорулас.)
Потшӧс сайсянь кылӧ ныв серам, мыччысьлӧны кык юр да бӧр саялӧны.
КОЛЯ. Кодъяс сэн? Мый кильксянныд? Пырӧ вай, эн дзебсясьӧй!
НЫВ ГӦЛӦС. А позьӧ?
МӦД ГӦЛӦС. Гачтӧм да. Гашкӧ, водны лӧсьӧдчан?
КОЛЯ. Гачтӧ вед позьӧ и пасьтавны. (Льӧм пу вож вывсьыс босьтӧ паськӧмсӧ, гачасьӧ.) Пырӧй!
Пырӧны Аня да Таня, дзоръялӧны, шешвидзӧны.
АНЯ (зыралыштӧ кисӧ да уськӧдчӧ Колялань). У-у, салдатӧ-молодечӧ, кутшӧм лоӧма! Вай пӧськиасям! (Кутчысьлӧны, окасьӧны.)
ТАНЯ. Да-а... Кӧть дзик пыр крукышт да сельсӧветӧ нуӧд! Либӧ весиг вичкоӧ! (Лэбыштӧ-уськӧдчӧ Коля дорӧ, кутчысьлӧ-окалӧ.)
КОЛЯ (зыралӧ окыштӧминсӧ). Пӧдтіс, анябиыс!
АНЯ. Тэа-меалы, Танюшка, тайӧ молодечыс ӧдвакӧ и вичмас. Кутшӧмкӧ гуся мусук талӧн эм нин.
КОЛЯ. Весигтӧ гуся мусук! Коді нӧ эськӧ?
АНЯ (петкӧдлӧ чуньсӧ). Соссьы, соссьы! Тӧрыт пыралім библиотекарь Надякӧд гортас, мися, гудӧкнас мед петалас. А сылӧн дукыс нин абу. Важӧн войпукны пӧ петіс, шуис мамыд.
КОЛЯ. Петалі и эм. Войпуки.
АНЯ. А петалін кӧ, кӧні ветлін? Некысь эг аддзӧй да.
КОЛЯ. Пиля дед ордын чай юи да вом паськӧдӧмӧн виччыси, кор нывъяс пыраласны да нуӧдасны дискотека вылӧ.
АНЯ. Дискотека, дерт нин, тэныд. Клубыс пӧдса да. Опонь Вась воліс отпускас да Клуб Катяӧс пышйӧдіс. Ті вед, зонъяс, сэтшӧмӧсь...
КОЛЯ. Кутшӧмӧсь?
АНЯ. Эн жеръяв, эн жеръяв! Тӧрыт нывъяс шуим Коля служивӧйӧс индыны клубӧ завӧн! Гӧгӧрвоин? Баян тэнад эм. Клуб томансӧ восьтыны-игнавны кужан жӧ. Мый миянлы нӧшта колӧ? Асьным йӧктам и сьылам!
КОЛЯ. Но и нывъяс! Но и нывъяс! Уджтӧгыд тай тіянкӧд ог коль! Шогси уджтӧмалӧмысь-а... А менӧ энӧ на гӧтралӧй?
ТАНЯ (жбырк лэбыштӧ Коля дорӧ). А кӧсъян? Гӧтралам! Со кӧть ме вылӧ! (Зэв тшапа лэптыштӧ юрсӧ.) Мый, абу невестапу? Передӧвӧй доярка! Батьӧ — фермер, ме — сылӧн медбур лысьтысьысьыс! Кутан нӧк панявны. (Меліника вашкӧдӧ да малалӧ Коляӧс мышкӧдыс.)
АНЯ (йӧткыштӧ пӧдругасӧ). Эн малав, эн малав зонсӧ. Тэнад Васюкыд эм нин. А ме вот Колялы буретш! Ог сӧмын йӧлӧн да нӧкйӧн кут вердны — быдторнас! Пӧжаснас и! Школаын пусьысь-пӧжасьысь ме, челядьӧс, зарни тупыльясӧс, верда-юктала! И ачым... Видзӧдлы... (Шурк бергӧдчылӧ ас гӧгӧрыс: и юрсисӧ малыштӧ, и бекъяссӧ петкӧдлӧ.)
КОЛЯ (сералӧ). А кыкнанныд вылӧ ӧтпырйӧ оз позь? Вот эськӧ райыд мем лои! Вердӧны и юкталӧны, пӧся радейтӧны и! А ме, йӧйыд, шогала. Татысь, мися, удж оз сюр, уджтӧгыд невестаыд — оз жӧ, карӧ кӧ нин лоӧ визгыны-а... Ы-ым! Ок, нывъяс, аканьяс!..
АНЯ. Карӧ кӧ быттьӧ окота, огӧ жӧ мырдӧн кутӧй. Ставыс тай ӧні карлань сетчӧны ыджыд нажӧтка корсьны.
ТАНЯ. Ме тӧвнас лэччылі карад да тайкӧ машина улӧ эг веськав. Ставныс оллялӧны-бӧрдӧны: «Омӧля олам! Омӧля олам!» А машинаыс! Уличсӧ вуджны некыті!
АНЯ. Чӧвлы тэ, Таня, карнад. Мед, колӧкӧ, и дзужъялӧны машинаӧн, нинӧм кӧ вӧчнысӧ. А миян колӧ клуб восьтны! Ӧбиднӧ, тӧвбыд дасьтысим смотр кежлӧ. Заклад вартлім первой места босьтны. И со вот... Ӧдзӧсас томан!
ТАНЯ. Колюк, шу, и мездас миянӧс. Да ӧд, Коля?
КОЛЯ. Да месӧ нӧ кыдзи? Специалист вед сэтчӧ колӧ.
ТАНЯ (меліа ниртчӧ зон дорӧ). Да ладнӧ куражитчынытӧ. Ми ӧд тэнӧ ог пыр кежлӧ клубас доддялӧй.
АНЯ. Да но. Ог пыр кежлӧ. Миянлы вед сӧмын баянистыс.
КОЛЯ (шӧйӧвошӧмӧн моз). Но, нывъяс... Матрӧн пӧч со воліс, телевизор дзоньтавны тшӧктӧ, ті — баянӧн ворсны.
АНЯ. А кодӧс нӧ сэсся корам? Тэ — салдат! Тэ вылӧ и став надея!
КОЛЯ (шеновтӧ кинас). Да ладнӧ... Пырала, видзӧдла, баяныс местаас абу. Вои да эг на и чуткысьлы сы дорӧ. (Мӧдӧдчӧ кильчӧлань.)
Занавес
МӦД ПЕТКӦДЧӦМ
Сэні жӧ. Раскладушка вылас пукалӧ Аня да геджгӧ-ворсӧ баяннас. Таня бергалӧ сы дорын да жугылиника сьылышталӧ.
ТАНЯ (сьылӧ).
Тэа-меа, пӧдругаӧй, сьылыштам да йӧктыштам,
Тэа-меа, пӧдругаӧй, асьнымӧс гажӧдыштам.
Эх-и!
АНЯ (тшӧтш сьылӧ).
Клуб ӧдзӧсын ыджыд томан,
Эз нин воссьыв гожӧмбыд.
Кольӧ, Кольӧ, мый нин керан?
Петкӧдлы кӧть ассьыд ныр.
Кольӧ, тэныд ӧд сьыла! Кылан он?
КОЛЯЛӦН ГӦЛӦС. Кыла, нывъяс, кыла! Виччысьыштлӧй нӧшта здук! Кассетаяс кӧнкӧ вӧліны. Корсьла.
ТАНЯ (жбыр кайӧ кильчӧ вылас). Часлы, Кольӧ, ме тэныд отсышта.
АНЯ. Менӧ ӧтнамӧс кӧсъян кольны?
ТАНЯ. Нинӧм тэкӧд оз ло. Ме, гашкӧ, ылӧдлыны кӧсъя Колюксӧ да.
АНЯ. Йӧюк тэ... Ассьыд Василёктӧ нӧ кытчӧ?..
ТАНЯ. Сійӧ карӧ мӧдӧ да.
АНЯ. Мед ветлас. Велӧдчыны ӧд мунӧ. Тӧв кежлас бӧр локтас.
ТАНЯ. Локтас тай! Выльгортӧ пӧ вӧвъясӧс видзны медася, шуӧ. А ме и ачым регыд тшӧтш муна! (Чиктылӧ)
АНЯ. Майбыр тай... Тэсӧ нин кытчӧ?
ТАНЯ. Карӧ жӧ. Тэ моз пӧварӧ велӧдча да сэтчӧ ресторанас уджавны кольчча. Мый, ме йӧзсьыс лёкджык али мый? Воліс тай нӧ Петыр Валя неважӧн. Рочасьӧ. Тэ пӧ интеллектуальнӧ меысь улынджык. Лысьтысьысь. А ме пӧ ресторанын сэтшӧм йӧзӧс обслуживайта!.. (Вӧраснас и вомнас нерӧ Валяӧс.)
АНЯ (сералӧ). Дзик вед сэтшӧм и эм Валяыс! А сы кодь тупичаыс школаын некод эз вӧв. Мун, баквал Валятӧ пӧсь би дорӧ эн кыскы! (Дӧзмӧмӧн шеновтӧ кинас да бара чутӧдӧ баян кизьясас, сьылӧ.)
Сьылышт, сьылышт, зарни гӧлӧс,
Йӧкты, йӧкты, кокни кок,
Гудӧк кизьыс уна пӧлӧс,
Чуньӧй ветлӧ — чик и чок!
ТАНЯ. Эх-ма! (Йӧктӧ кильчӧ помас.) Аня, тэнад артмӧ нин, регыд велалан сідзи ворсны, кӧть вальс йӧкты!
АНЯ. А ме ог и майшась! (Тшапа дзӧрӧдыштӧ юрнас, сэсся индӧ дзиръяланьыс.) Аддзан, кавалеръяс ми дорӧ локтӧны.
Дзиръя дорӧ локтӧны Табак Вань да Мавра Чань. Пельпом выланыс чер.
ВАНЬ. Ак, сола рӧсол! Салдатыс оз-ӧ нин гӧтрась? Кежалам!
ЧАНЬ. Позьӧ куритчыны сувтыштлыны. (Пестӧ чигаркасӧ.)
ТАНЯ (уськӧдчӧ налы паныд). Но-о, кодъяс, мися, сэн? Ударникъясыд тай удж вылӧ мӧдӧмны! Мый нӧ талун сэтшӧм водз? Дас кык часыс абу на да.
ВАНЬ. Тэнсьыд тай эг юалӧй. Миян асланым нарадщик эм.
ЧАНЬ. Тіянлысь гажа сьылӧмтӧ кывзыны воим. (Лэдзӧ папирос тшынсӧ.)
ТАНЯ. А, ті ми дорӧ? Чайті, мися, помечавны мунанныд эсія карса дачникыслы. Но, пырӧй! Аня, ворс марш!
АНЯ (гин-ганкерӧ баяннас, сэсся пуктӧ раскладушка вылас, чеччӧ). А сьӧлӧм татчӧ поті радысла! Этатшӧм кавалеръяс! Удждонтӧ мӧй эз на сет выль кӧзяиныд? Веськыдӧсь тай нӧ талун?
ВАНЬ. Уджыс эз на эшты да.
ЧАНЬ. Талун эштӧдам. (Шпуткӧ-куритӧ.)
ТАНЯ. Мый сэсся ӧні локтанныд? Эштӧданныд да аски волӧй. Доз сьӧрсьыд вайӧй.
ВАНЬ. Мый, сэсся миянӧс ӧнісӧ бракуйтанныд али мый?
ТАНЯ. Огӧ жӧ бракуйтӧй! Тіянӧс! Шуи тай: аски волӧй.
ВАНЬ (кӧсйӧ кутны Таняӧс). Ок, борда андел! Кута кӧ эськӧ...
ТАНЯ (ворсӧдчӧ сыкӧд). Тэ помысь! Вот Чань кӧ...
Чань гӧрӧктӧ, кӧсйӧ уськӧдчыны ныв дорӧ, но виньдӧ табак тшыннас да заводитӧ кызны. Сэсся шеновтӧ ныв вылад да лэччысьӧ потшӧс дорас.
ТАНЯ (вильшалӧ сійӧс). Но, кавалер! Водін! (Сьылыштӧ.)
Чаньӧй шуӧ: черӧй ныжмис,
Водзӧ тшупсьӧм оз нин ло,
Татшӧмыдлы лоӧ тыртны
Пятилеткатӧ кызь во!
Чань мыйкӧ кӧсйӧ вочавидзны Танялы да сӧмын ёнджыка кызӧ.
АНЯ. Пӧкмелля на сылӧн. Танюш, прӧста эн дзерӧд мортсӧ.
ВАНЬ (уськӧдчӧ Аня дорӧ). Вот тайӧ ныв! Вот бур сьӧлӧма! Кольӧыслы тшук велӧда, мед тэнӧ ваяс! Ок эськӧ, кутыштлыны тэнӧ, сьӧлӧм бердӧ ляскывны!
АНЯ. А мый нӧ узян? Ляскыв но!
Потшӧс сайсяньыс кылӧ Певроньлӧн, гӧтырыслӧн, гӧлӧсыс. Ваньӧ падмӧ, бӧрыньтчыштӧ ныв дорсьыс.
ПЕВРОНЬ. Баль, бобӧяс, баль! (Дзиръя весьтӧ сувтыштлӧ, аддзӧ верӧссӧ, скӧрысь пырӧ йӧрас.) Со сійӧ кӧні потшсьӧ! Яндысьтӧм бугыль! (Киас ньӧрторйӧн шеныштчӧ верӧс вылас.)
ВАНЬ (петитчӧ гӧтырсьыс). Певруша, эн дур!
ПЕВРОНЬ. Ме тэныд сета «эн дур»! Уджалысьяс! Тӧнлун асыв лавка дорын дзайгӧны, пӧкмелитчыны корсьӧны, талун танӧсь... Ок-к...
ВАНЬ. Певруша, эн скӧрав. Ми здук кежлӧ сӧмын кежалім салдат-молодечыскӧд чолӧмасьны. Кӧнкӧ тай оз тыдав да... Певруша, мися... (Петитчӧ скӧр гӧтырсьыс сэтчӧдз, кытчӧдз эз шлёпкысь-пуксьы Матрӧн пӧч тележкаӧ. Ставӧн сералӧны, медгора гӧрӧктӧ Чань другыс. Кӧсйӧ чеччыны, но гӧтырыс выль пӧв тойыштӧ.)
ПЕВРОНЬ. Пукав, юр янӧдысь! (Кыскӧ тележкасӧ дзиръялань.)
ВАНЬ. Певруша, ме тэнӧ став сьӧлӧмсянь, кыдз шуласны, а тэ... Лэдз но! Чань другӧ, мезды!
ЧАНЬ (гӧрӧктӧ). Этатшӧм кльӧщи увсьыс...
ПЕВРОНЬ (Чаньлы). Тэ эськӧ эн гӧрдлы! Тэнӧ тшӧтш пуксьӧда да нуа, няйт гуранӧ быгыльта! Урӧсъяс... (Петӧны дзиръя сайӧ, Ваньлӧн кевмысян гӧлӧсыс век на кылӧ дзиръя сайсянь.)
ЧАНЬ. Нуис ӧд... Вот ёмаыд. (Кӧсйӧ бара на гӧрӧктыны да виньдӧ быттьӧ, ланьтӧ.)
ТАНЯ. Певронь тьӧтка молодеч, эз небось дыр думайт.
АНЯ (сералӧ). А тэнӧ гӧгыльтны кӧ нӧшта волас?
ТАНЯ. А мый... Волас ӧд!
Керкасьыс петіс Коля, киас пластинкаяс да тетрадь.
КОЛЯ. То аддзи... Радейтана музыка со ӧнӧдз на ловъя. И тетрадь, кытчӧ радейтана сьыланкывъяссӧ гижлі.
АНЯ. Кольӧ, а мый медрадейтанаыс? Абу кӧ гусятор...
КОЛЯ. Мыйла нӧ гусятор? Ӧні кӧть сьылышта! Ме весиг ачым рочсьыс коми вылӧ вуджӧдлі.
ТАНЯ. Да-а? Ноко сьылышт!
КОЛЯ. Сьылыштны?
АНЯ. Сьыв. А то Чаньӧ-кавалерӧ миян дзикӧдз унмовсяс потшӧс дорас.
ЧАНЬ. Ме унмовся? Да меным ветлыны колӧ, потшсян уджсӧ эштӧдны. (Чеччӧ куйланінсьыс.)
КОЛЯ. Эн на мун, ме сьывны на кӧсъя да. Пӧлинӧ, кыдз тэ дорӧ шыасьны, ним-вичтӧ ог тӧд да.
ЧАНЬ. Батьӧ эськӧ Чен ним гижӧдлӧма сельсӧветын, да мамӧ Чаньӧн кутӧма шуны. Буракӧ, чань кодь вывті визув вӧвлі да...
Таня да Аня вак-вакӧн серӧктісны.
ТАНЯ. Збыль, тэ чань кодь визув и эм!
АНЯ. Гӧрдлан да сійӧн буди татшӧм нимыс лясіс-а! (Сералӧ.)
КОЛЯ. Чен Иванович, сідзкӧ. Китайскӧй али корейскӧй ним. Зэв и лӧсьыд.
ЧАНЬ. А батьӧс менсьым, Гитлерыдкӧд воюйтӧм бӧрын, Японияӧ нӧшта нулӧмаӧсь, сэтысь и вайлӧма меным нимсӧ. Ме ӧд война бӧрас чужлі. А сьӧлӧм век том, радейта томъяссӧ. Мавронья меысь дас арӧсӧн том... (Гӧрӧктыштӧ.)
АНЯ. О, кутшӧм тэ шуда... Коля, сьыв нин вай, манитан Чен Ивановичсӧ, тэрмасьӧ то удж вылӧ да. (Босьтӧ Коля киысь пластинкаяссӧ, видзӧдӧ.) Кодсӧ нӧ сьылан? Кыкнанныс зэв лӧсьыд да.
КОЛЯ. Кыкнансӧ и сьыла! Гортын вед ме, чёрт возьми! Гортын! Вои! (Паськӧдлӧ бордъяс моз кисӧ, легӧдыштӧ кокнас и заводитӧ первой рочӧн, сэсся вуджӧ коми вылӧ.)
Гляну на село-о...
Пета кильчӧ помӧ,
Кыла гудӧк шы,
А кӧнкӧ сикт помас дай-и,
Виччысьӧ нин ныв... Ох, да...
Котӧрта сы дорӧ,
Чолӧм, рочакань!..
Торкис Колялысь сьылӧмсӧ дзиръя саяс сулалысь Мавроньялӧн гӧлӧсыс.
МАВРОНЬ. А менӧ рочаканьӧн ыдждӧдліс! Чолӧм, чолӧм, Колюк! Тіян тай сэні зэв гажа!
КОЛЯ. Мавронь тьӧт, ог и аддзы. Лок тшӧтш, гажӧдчы.
МАВРОНЬ. Ог эшты! Кӧлуй пожъявны муна.
АНЯ. А ми репетируйтам (няжкнитӧ баяннас.)
МАВРОНЬ (пырӧ йӧрӧ, киас кӧлуй тыра таз, позьӧ кӧлуй карнан). Репетируйтанныд? А менӧ эн и чукӧстӧй. Ме нэмсӧ самодеятельностяд да. (Лӧгасьӧ.)
ЧАНЬ. Воан тай со.
МАВРОНЬ (вӧлись аддзӧ верӧссӧ). А тэ тай нӧ потшсьыны мӧдін... Ноко, на кутлы тазсӧ! Ме пайтӧм Макар ли мый? (Пондӧ легӧдны бекъяснас да сьывны.)
Алӧй розӧвӧй ленталы
Ящикын не места,
Муса Чанюшкокӧд мийӧ
Жӧник да невеста.
Да вед, Чанюшко?
ЧАНЬ. Аддзысьӧма алӧй лента. На босьт тазтӧ, уськӧда вед, уськӧда.
МАВРОНЬ (кватитӧ тазсӧ верӧс кисьыс). Этайӧ вир юысьыс! Оз сет бур йӧзыскӧд гажӧдчыштны! Пукты но муас! (Пуктӧ верӧсыслы кок улас, бара уськӧдчӧ йӧктыны.)
Сад йӧрын пӧ да ныв гуляйтӧ,
Сэтчӧ зон волывлӧ дай...
(Лажзьӧдӧмӧн кытш вӧчӧм бӧрын сувтӧ Колялы воча, вӧчӧ копыр.) Колюк, муса пи, чолӧм да здорово! Служитсис, детиналӧн? Слабог, слабог! Мамыд ёна нин виччысис. Асывнас аддзылі, муніс картупель му вылӧ.
КОЛЯ. Муніс. Мамук ӧд уджтӧгыд оз вермы овнысӧ. Ме то шойчча коймӧд лун нин-а. Нывъяс со гажӧдны воисны. Чен Ивановичыд ӧшинь увті прӧйдитӧ да кежис и. Эн дӧзмы мусук вылад.
МАВРОНЬ. О-ог. Тайӧ менам дыш лодырыс лунтыр вермас тіянкӧд, томъяскӧд, гажӧдчыны. (Чужйыштӧ кокнас мышвылыс.)
ЧАНЬ (воча тувкыштӧ гӧтырсӧ). Кӧлуй пожъявны кӧ мӧдін, мун.
МАВРОНЬ. Мунам, дерт! Менам сьӧлӧм бурмис-а. На босьт! (Лэптӧ тазсӧ кок увсьыс, тювгӧ верӧсыслы да кыскӧ сійӧс дзиръялань.) Ми мӧдім! Пасибӧ Колюклы и нывъяслы. Чанюшко, восьлав!
Гозъя мунӧны. Коля да Таня колльӧдӧны найӧс дзиръя дорӧдз. Аня дзуж-дзажкерӧ баяннас.
АНЯ. Туш ворсышта, мед бура кӧлуйнытӧ пожъяланныд.
Потшӧс сайті локтӧ Матрӧн пӧч, горалӧ.
МАТРӦН ПӦЧ. Эг-ӧ нин сорсьы керканас. Мавронь гозъя тай нӧ...
МАВРОНЬЛӦН ГӦЛӦС. Выжывмӧмыд жӧ эськӧ нин да.
МАТРӦН ПӦЧ. Эг на дзикӧдз. Колюк дорӧ ме! (Пырӧ дзиръяас.) Колюк, ме вед сорси, чайті ывла чуланӧ петкӧді ковтӧм радивола-магнетопонсӧ, а вӧлӧмакӧ, телевизорӧс. Кӧрӧбынӧсь да... Час, ветла да вая! Тележкаыс нӧ менам кӧні? Татчӧ кольлі да... (Смекайтӧ гӧгӧрыс.)
АНЯ. Тележкаыд тэнад утёвтіс! Табак Вань гозъя пышйӧдісны!
МАТРӦН ПӦЧ. Кыдзи пышйӧдісны? Налы нӧ нин мыйла ковмӧма менам тележкаӧй?
АНЯ. А вот ковмӧма тай. (Сералӧ.)
ТАНЯ (сералӧ жӧ). Певронь тьӧтлы окота лоӧма мусуксӧ коляскаын джыййӧдлыштны!
МАТРӦН ПӦЧ (дӧзмӧ). А сӧтанаяс, тешитчанныд ме вылын. Кытчӧ тележкасӧ лотінныд?
КОЛЯ. Пӧчукӧ, лӧньышт вай. Пуксьы то менам раскладушка вылӧ, шойччышт. Магнитофонтӧ тэнсьыд включитлам, кывзышт музыкасӧ. Ме видзӧдлі, зэв на и лючки уджалӧ. Важ пластинкаяс ме ассьым аддзи и. Час, ме пыра да ӧшинь вылӧ сувтӧда магнитофонсӧ, а ті кывзӧй.
Коля пырӧ гортас. Регыд восьса ӧшинь пырыс юркнитӧ сьылӧм шы.
Жизнь красивую прожить,
Что-то надо каждому, ребята,
В нашей жизни совершить!
КОЛЯ (ӧшинь пырыс). Важ пластинка на, а ӧнія кадыслы лӧсялӧ жӧ. Колӧ и эм, нывъяс, миянлы бурджык олӧмсӧ лӧсьӧдны.
МАТРӦН ПӦЧ. Колӧ, Колюк, колӧ. Миян колхоз-совхозъястӧ бырӧдісны, да дзикӧдз олӧмыс чусмис. Коперативтӧ эськӧ лӧсьӧдлісны жӧ да... Колян ар капустасӧ ставнас лым улӧ кольлісны... Некодлы веськӧдлыныс. Прамӧйясыс пышйисны, а сямтӧгыд... Коля, вот ме думайта, да тэныд колӧ кутчысьны сійӧ уджас. Видз-муыс эндас тадзикнад кӧ, леторосӧн тырас.
КОЛЯ. Но, пӧчӧ, оз жӧ! Миян сиктсаыд сэтшӧм зіль войтыр.
МАТРӦН ПӦЧ. Зільӧсь вӧвліны, да торксисны. Ме тай шуи: бур нырщикӧн кӧ... То Танялӧн батьыс эськӧ и кужас, да ачыс тай ас овмӧс лӧсьӧдӧ, пермеравны кӧсйӧ.
ТАНЯ. А мый батьӧыс? Миян лючки-ладнӧ ставыс.
АНЯ. Тіян... А мукӧдыслӧн? Велалӧмаӧсь нин вӧлі сизимдас вонад ӧтувъя олӧмнас овны да. Быдӧн фермеравныд оз на и босьтчы. Со тай кык друг, Чань да Вань...
МАТРӦН ПӦЧ. А збыль, дитяяс, сёрнитанныд. Тадзисӧ нӧ водзӧ овнысӧ позьӧ?
КОЛЯ. Оз позь. Этатшӧм нывъяс миян да! А босьтчам кӧ? Нывъяс, ті мый шуанныд?
АНЯ да ТАНЯ (ӧтув, быттьӧ кӧсйысьӧмаӧсь, горӧдӧны).
А ми кӧсъямӧ,
А ми вӧчамӧ!
А ми кужамӧ!
А ми вермамӧ!
А ми ытшкамӧ, а ми куртамӧ, а ми гӧрамӧ, а ми кӧдзамӧ, огӧ сетӧй видз-му эндӧдны! Коля, тэкӧд быд лёк венам!
МАТРӦН ПӦЧ. Кужанныд, бобӧяс, кужанныд. Сиктын быдминныд. Тіянлы водзӧ овнысӧ...
КОЛЯ. А ме думайта жӧ та йылысь. (Кутӧ ӧти кинас Матрӧн пӧчӧс, мӧднас Аняӧс да Таняӧс, кутчысьӧмӧн ставӧн сьылӧны.)
Колӧ, колӧ, колӧ, ныв-зон, миян,
Бурджык олӧм лӧсьӧдны!
Колӧ, колӧ, колӧ, ныв-зон, миян,
Став сикт-грездсӧ ловзьӧдны!
А ми вермамӧ, а ми кужамӧ, а ми кӧсъямӧ, а ми вӧчамӧ... Да и гажӧдчыны кутамӧ!
Занавес
