УРӦДИК КАКТУС ЛЭДЗӦМА ДЗОРИДЗ

1 юкӧн

Егорша садьмис пӧлатяс. Гыӧра ӧшинь сайын муртса лӧзӧдыштӧ. Оз тэрмась асъя югыдыс. Сӧлӧ бабыс, кылӧ, ноксис пач вом дорын. Ломаліс сартаса би.

Егорша тювис пӧлатьсьыс, синсӧ тілигтыр сибӧдчис бабыс дорӧ.

— Тэ нӧ чеччин нин, войдур? — шыасис бабыс.

— Морта нига лыддьыны чеччи.

— А нига жӧ нин тэнад лоӧма, — пачсьыс картупель чугун кыскигмоз кайтыштіс бабыс да меліа содтіс: — Югыд би инӧ ӧзтам. Лыддьысь. Да горӧн лыддьы, бабыд тшӧтш кывза.

Регыд пызан сайсянь кыліс нин Егоршалӧн лэчыд гӧлӧсыс:

Гожся лун гажа, гожся лун бур...

— Бабӧ, тэныд кылӧ?

— Кылӧ, дитя, кылӧ, лыддьы...

Кыдз татшӧм лунӧ вӧрӧ он тюр?..

Кильчӧ помас кыліс южмӧм лым дзуртӧм шы, сэсся ӧдзӧсас гуль-голькерисны.

— Кодкӧ локтӧ, — бабыс уськӧдчис кильчӧсӧ восьтны. Ыркнитіс посводзсьыс кӧдзыдыс.

Егорша эновтіс книгасӧ, пондіс дзоргыны ӧдзӧслань. Бабыс бӧрсьыс порогсӧ воськовтіс колхоз бригадир Педӧр дядь:

— Оланныд-выланныд! Грамотейыд тай водз чеччӧма. Ывлаӧдзыс гӧлӧсыс кылӧ. Молодеч...

— Вай прӧйдит водзланьджык, Педӧрушко. Важӧн нин эн волы. Могӧн ӧд, кӧнкӧ? — корис кӧзяйка.

— Мога, — вочавидзис ӧти кывйӧн бригадирыс да керка пытшсӧ синвидзӧдласнас кытшовтӧм бӧрын содтіс: — Думайта да тіян керканыд медся скоднӧй кажитчис. Москваса геологъяс Чибъюӧ мунӧны да сибдӧмаӧсь Гӧрд чойӧ. Вӧла-доддяӧс ме сэтчӧ ысті нин. Кытчӧдз турӧбыс оз лӧнь, да кытчӧдз угольник оз кыскыны, водзӧ мунны оз вермыны. Вай, Соломея Сидоровна, лэдз йӧзсӧ.

Шлапкерис Сӧлӧ бабыс кыкнан кинас.

— Да мыйла нӧ, Педӧрушка, та мында сёрнитан? Кыдз нӧ туй йӧзӧс ог лэдз? Шоч вой ми Егоршакӧд ас кежад узьлам, пыр кодкӧ, туй мортыд, эм. Мукӧддырйи морт сизим ямщикъяс чукӧрмасны. Ӧтияс Мурашӧ грузла мунӧны, мӧдъяс грузӧн локтӧны нин. Кор найӧ абуӧсь, ми Егоршакӧд и гажтӧмсям на. Вайӧд, вайӧд бур йӧзсӧ.

Бригадир лӧсьӧдыштіс шапкасӧ. Петіс. Бара ыркнитіс кӧдзыд ру. Егорша уськӧдчис ӧшинь дорӧ. Но гыӧра ӧшинь пыр нинӧм эз тыдав. Пӧсь лов шынас писькӧдыштіс ичӧтик розь, пондіс видзӧдны сэтчӧ.

— Некод оз тыдав. А кор эсыйяс, бабӧ, московскӧйясыд, локтасны?

— Дзик пыр оз на локны, — бабыс вайӧ пызан вылӧ вый латка да нянь пӧв тыр картупеля шаньга. — Сёй вай пӧсь няньсӧ.

Чӧскыд шаньга дук здук кежлӧ вӧтлӧ Егоршаӧс ӧшинь дорысь, но кык шаньга кусмыльтӧм бӧрын бара ляскысьӧ ӧшиняс.

Важӧн кусӧдӧма лампа, бабыслӧн пачводз уджъяс эштісны, со нин бабыс мӧдӧдчӧ картаас мӧс лысьтыны, а Егорша век дзоргӧ ӧшиньӧ. Сылӧн шоныд ышлолысь ӧшинь гыӧрыс пӧшти ставнас нин сылӧма, а ывлаын век некод оз тыдав.

Медбӧрын мыччысис жӧ вӧла-доддя, кежис найӧ керкалань.

— Ой, локтӧны! — чилӧстіс зонка да ризӧбтіс ывла вылӧ, шапкатӧгыс да дӧрӧм-гач кежсьыс. Кильчӧ вылас лёк тӧв койыштіс сылы паныд кӧдзыд лым чиръяс, скӧра чепӧльтіс бандзибсӧ да пельсӧ. Но Егорша нинӧм тайӧс эз кыв.

Рӧзвальысь чеччисны куим дядьӧ. Тулупаӧсь. Ӧти на пӧвстысь вӧлі тошка. Тошкаыс дзик пыр шыбитіс вывсьыс тулупсӧ, лоис гӧна воротника кучик пальтоа. А кокас гуга пасьысь ыджыд кӧм. Дядьӧяс ректісны рӧзвальсьыс чемоданъяссӧ, а тошкаыс сералігтыр копыртчис да лэптіс тӧбӧм-пасьтӧдӧм ёкмыль, сувтӧдіс лым вылӧ.

— Ой, тапикасьӧ тай нӧ! Ошпи кӧ-а? — шемӧсмис Егорша.

Но сійӧ вӧчис кымынкӧ воськов да кильчӧ вывсьыс Егоршаӧс аддзӧм бӧрын чирӧстіс вӧсни, збой гӧлӧсӧн:

— Ой, папа, коді тайӧ? Кутшӧм тешкодь! — сярк серӧктіс, тӧбӧм чышъянъяс косттіыс тыдыштлісны визув синъяс.

Тошкаыд видзӧдліс кильчӧлань, кӧні кӧйвидзис Егорша, да нюмсермунӧмӧн шуис:

— Тайӧ, буракӧ, кӧзяиныс? Сыкӧд тэ пыр керкаас. Да на босьт ассьыд добратӧ, — дядьыс лэптіс рӧзваль пыдӧссьыс лӧз лентаӧн кӧртыштӧм картон кӧрӧб.

Ичӧтикыд дзик кӧлӧб моз гӧгыльтчис кильчӧ пос дорас, шыасис Егорша дорӧ:

— Но, мый сулалан? Пыртӧд менӧ гортад!

Эз кажитчы Егоршалы тайӧ. Кватитіс нывка киысь кӧрӧбсӧ, тюркнитіс посводзас. Чирзысьыс мед, колӧкӧ, вӧтчас.

«Колантор тай, нывка... Пӧдикӧ оз куж Егорша моз гораа лыддьысьны ни вӧв вылын рӧдтыны, а командуйтӧ».

Но регыд нывкаыс жаль лои сылы: пемыд ӧд посводзыс. Кватитіс нывкатӧ сойбордйӧдыс, пондіс кыскыны бӧрсьыс. Нывка тольӧдчис:

— Ой, кутшӧм пемыд тані! Ме нинӧм ог аддзы. Тэ аддзан? А мыйла тэ ме вылӧ скӧралан?

— Ме скӧрала? А эсійӧ тошка дядьыс коді? Тэнад бать? Менам батьӧ вӧрӧ сортовитны кайис. И мамӧ тшӧтш. Ме быдма да кая жӧ.

Кузь посводзсӧ прӧйдитісны, со нин вуджисны керка порог вомӧн. Егорша кӧрӧбсӧ шыбитіс крӧвать вылӧ, зыралыштіс гегдӧм пельяссӧ да шыасис нывка дорӧ:

— Пӧрччысь. Миян тані баруняяс абуӧсь.

Пырис Сӧлӧ бабыс, йӧв тыра ведраа, аддзис ичӧтиктӧ, икӧстіс:

— Ой да, налӧн и кага эм! Егорша, мый нӧ он пӧрччӧд? Отсышт, дитя, гӧсьт ӧд.

— Нывка тайӧ — абу гӧсьт, — букыштчыліс Егорша, но нывкаӧс пондіс пӧрччӧдны.

— Чышъян гӧрӧдсӧ мыш вылысь разь, — ачыс и ичӧтикыд велӧдіс, мый колӧ Егоршалы вӧчны.

Пӧрччӧдӧма лои нывка вылысь ыджыд шальсӧ, гӧна шапкасӧ, пасьсӧ, батьыслӧн кодь жӧ гӧна вылыс кӧмсӧ. И со, Егорша водзын нывка, быттьӧ тірибобӧ. Матросскӧй костюма, юрас ыджыд бантик.

Тірибобӧыд кекеначасьыштіс, а сэсся лэбовтліс виж охраӧн мавтӧм лабич вылас, чеччалігтыр котралыштіс джоджтіыс, горзіс: «Кутшӧм тіян тані лӧсьыд!» Медбӧрын пидзӧсчанясис да тадз пондіс вартӧдлыны кимӧдзьяснас...

Сӧлӧ бабыс видзӧдіс нывка вылӧ да нюмвидзис.

— Ай да нывка! Ай-да бобӧ!

И Егоршалы лои нимкодь.

— А тэ збыль Москваысь?

— Да, ме Москваысь. Сэн менам баба Сима.

— А кыдзи тэнӧ шуӧны?

— Валерияӧн... Тэ мекӧд ёртасьны кутан? Ме тэныд мыйкӧ петкӧдла.

— Петкӧдлы.

Нывка бауӧн кайліс крӧвать вылас, босьтіс сэсь кӧрӧбсӧ, лӧсьыдика тювис бӧр джоджӧ, нуис кӧрӧбсӧ бӧр лабичас. Пидзӧсчанясис сы весьтӧ, пондіс кӧрӧбсӧ разьны.

«Коді нӧ сэні сылӧн? Каньпи, гашкӧ?» — мӧвпаліс Егорша да синсӧ вештывтӧг дзоргис нывка вылӧ. Нывка перъяліс кӧрӧбсьыс рузумторъяс, вата. Медбӧрын мыччысис румка ыджда ичӧтик гырничын кутшӧмкӧ мучудӧ. Гӧгыль сяма веж быдмӧг.

Егоршалӧн пӧлӧстчыліс вомыс. А нывка лелькуйтіс ассьыс мучудӧсӧ медмича кывъяснас, кыпыда ыдждӧдліс:

— Ловъя?! Зарни тэ менам! Кактусик тэ менам! Мунам ми тэкӧд ылӧ-ылӧ. Сэні вой тӧв. А тэ ӧшинь вылын кутан быдмыны. И ӧти гажа лунӧ лэдзан сэтшӧм мича дзоридз!..

Посводзын гуля-голякылӧм торкис нывкалысь лелькуйтчӧмсӧ. Пырисны кык дядьӧ, тырис керка пытшкыс кӧдзыд руӧн, кынмӧм йӧзлӧн лов шыясӧн. Тошка дядьыс на пӧвстын эз вӧв.

— А папа менам кӧні? — нывка уськӧдчис пырысьяслы воча.

— Сійӧ колхоз кантораӧ муніс, регыд локтас, — вочавидзис ӧтиыс. Мӧдыс шензьыштіс:

— Миян барышняным, буракӧ, шоналӧма нин!..

Рытнас вӧлі пӧсь пывсян кыдз пу корӧсьӧн. Пывсян бӧрын, ӧгыр кодь чужӧма, чурскӧ чай сора пӧжӧм йӧв ичӧтик москвичка. Вом доръясыс чӧскыда чопйӧдлӧны.

— Скусно молочко-то паренное? — рочасьӧ сыкӧд Сӧлӧ баб.

— Вкухно, — вочавидзӧ нывка. Сылӧн вом тырыс сёян.

— Бабушка корошо веничком драла?

— А я не плакала, только хотела плакать.

А Егоршалӧн аслас мӧвп: «Кӧть и москвичка, а абу дрӧчка. Весиг пӧсь корӧсьысь абу повзьӧма. Егорша ачыс и то няргылӧ пывсянас.»

* * *

Мунісны роч гӧсьтъясыд коймӧд луннас, кор лои лымйӧн пӧльтӧм мир туйсӧ весалӧма. Кызь кымын вӧлӧн ыджыд угольник кыскисны. Найӧ и мездісны лым пленсьыс москвичьясыдлысь ЗИС-сӧ. Дзик Егоршаяс кильчӧ помӧдз журкнитіс-локтіс ЗИС-ыс. Егорша некор на эз пуксьыв машина вылад, а ӧні кабинаас весиг пукалыштіс. Сикт помӧдзыс на журкнитліс. А чеччис машинасьыд да дядьӧясыд сылы кинас пондісны шенасьны. Прӧщайтлы пӧ, другӧ, да быдмы ӧдйӧджык! Миян дорӧ Чибъюӧ пӧ локтан уджавны!

Егорша шенасис налы воча.

Вӧлі сэк Егоршалы дасӧд арӧс. И вӧлісны сэк буретш каникулъяс.

Вӧлі 1945 вося тулыс.

Водз асывсянь дзорвидзӧ югыд шонді, тёпкӧ вевтъяс вылысь войтва. И муніс на кӧть война, помыс тыдаліс нин. И тайӧ ставыс радуйтіс том сьӧлӧмъяссӧ куим зонкалысь, кодъяс мӧдӧдчисны райцентрӧ комсомоллӧн районнӧй комитетӧ.

Петісны водз асывнас. Кок уланыс туй южыс зумыдкодь на, кӧть и ёнакодь нин сылӧ. Медводдза километръяссӧ восьлалісны зонъяс тэрыба да ворсігтыр. Егоршалӧн другыс, Паша Моторин, тивксьӧдіс водзас да дугдывтӧг болӧдчис:

— Эй, дедӧ гудӧкасьӧ да бабӧ йӧктӧ, бабӧ гудӧкасьӧ да дедӧ йӧктӧ.

Егорша Стрекалов Ӧльӧксанкӧд вӧтчисны сы бӧрся сідз жӧ вежнясигтыр. Но ӧдйӧ и раммисны. Мудзисны.

— Шойччыштам, — вӧзйыліс Пашка да кепысьсӧ кынӧм улас дасьтӧм бӧрын нюжгысьліс туй пӧперегыс. Тадзи найӧ шойччисны кыкысь. Коймӧдысь шойччӧг эз ковмы, суӧдісны вӧлаяс. МТС-ӧ горючӧйла мӧдӧмаӧсь. Самӧй райцентрӧдз сэсся и гӧйгӧдісны зонъястӧ.

Зэв тешкодь на и артмис тайӧ вӧвъяснад. Пашка, мудерпозйыд, кылӧма, буракӧ, вӧлаяслысь воӧмсӧ, друг пуксис туй вылас, шуӧ:

— Ой, мудзи татчӧ! Кула! Кута кевмыны, мед Енмыс вӧлаясӧс ыстас. И збыль, кунис синсӧ да пондіс мыйкӧ вашкӧдны. Сэсся гораммис гӧлӧсыс:

— Акула, бакула, пакула!

Кыла нин кыла! Локтӧны!

Воронӧй водзас, сы бӧрысь гнедӧй, медбӧрын шлёпиктӧ кӧбыла рыжӧй. Чур, меным рыжӧйыс! А тэныд, Ӧльӧксан, кутшӧм колӧ?

— Меным воронӧйыс! — тшапа вочавидзис Ӧльӧксан.

— Егоршалы кольӧ гнедӧйыс, — туналӧ Пашка да восьтӧ синсӧ. Горӧдӧ:

— Локтӧны! Збыль локтӧны!

Со нин сійӧ жервидзысь вома, ӧзъялан синма, пӧрччӧма шапкасӧ да шенасьӧ сійӧн вӧлаяслы:

— Гӧйгӧдӧй!

Кыдз нӧ он босьт татшӧм мусаяссӧ? Чеччисны зонъяс вӧв доддьысь, райком кильчӧ помӧ вайисны, ӧдзӧсас зым-зым, а сійӧ оз воссьы, игана.

— Асьныс корӧны, а игнасьӧмаӧсь, — броткӧ Паша да йиркӧдӧ кокъяснас. Петіс лёзь юрсиа да партука нывбаба, пинялыштіс:

— Мый морсӧ игӧдчанныд? Он мӧй тӧдӧ, куим часын воссьӧ?

— Куимын? — ыджыд шогӧ эз и усьны зонкаясыд. Райцентрас пӧ гежӧда и волывлам, гуляйтыштам кӧть.

Мӧдісны улич кузяыс. Ӧти керка дорын сувтовкерисны. Сэні потшӧс саяс том нывбаба пес поткӧдлӧ. Ставнас нин гӧрдӧдӧма, ӧтторъя сетӧ чуркаас, а сійӧ некыдз оз и пот. А кильчӧ вылас ичӧтик нывка чеччалӧ да бӧрдӧ:

— Ой, мамӧ, пырам нин гортӧ!

Нывбаба сӧмын нин ӧвтыштчылӧ сылань, тэ кӧть нин пӧ эн дӧзмӧдчы.

— Отсыштам гашкӧ да? — вӧзйӧ Пашка и пыр жӧ чукӧстӧ нывбабасӧ.

— Эй, тьӧтушка! Примитан он помечалысьясӧс?

Том аньыд эновтіс черсӧ чуркаас, бужгыльтчыліс тӧдтӧмъяс вылад: — Ті кодъяс?

— Ми — ракпольсаяс! Воимӧ комсомолӧ пырны да райкомыс пӧдса.

— Комсомолӧ? — аньыдлӧн дзик пыр югдыштіс чужӧмыс, серӧктыштӧмӧн шуис: — Ой, зонъяс, куимсянь ӧд бюроыс лоӧ. А отсыштанныд кӧ быттьӧ, ме зэв рад лоа. — Нывбаба муніс да босьтіс ки вылас нывкасӧ, а зонъяс первой делӧ лӧсьӧдісны чер пусӧ, сійӧ, вӧлӧмакӧ, зэв ёна легӧ, клин тувйыштісны. А сэсся жуллисны-поткӧдлісны да тэчисны чӧлӧй пес чипас. Кадыд муніс, зонкаяс пондісны тэрмасьны. Кӧзяйкаыс ӧлӧдыштіс найӧс. Пока пӧ онӧ пыралӧй керкаӧ да нуръясьыштӧй, ог лэдз. Онӧ на сёрмӧй, ме вед бюроса член жӧ, ӧтлаын и мунамӧй.

Ӧльӧксан чепӧльтіс Пашкаӧс, тьӧтушкаӧн пӧ ӧнтай шуин, а то коді вӧлӧма.

— Но и мый? Тьӧтушкаыс ӧмӧй лёк кыв? — ӧвтыштчис Ӧльӧксанысь Пашка.

Капустаӧн чӧсмасьыштӧм бӧрын сэтӧра чай юисны, а сэсся ставӧн, весиг ичӧтик нывка, мӧдісны комсомол комитетлань. Пырисны, а коридорас чукӧрмӧма сы мында зонка да нывка, мукӧд сикт-грездысь тшӧтш воӧмаӧсь комсомолад пырны.

Ӧти нывка дзик пыр и шыасис пырысьяс дорад:

— Ті абу Ракпольысьӧсь? Тіянӧс чукӧстісны нин.

Нывкаыс мыйлакӧ Егорӧс йӧткыштіс ӧдзӧсланьыс, да Егорлы и ковмис быть пырны медводзӧн бюро вылас.

Бӧрас нин, кор куим друг петісны кильчӧ помас да нӧшта нимкодясьыштісны выльӧн сетӧм комсомольскӧй билетнас, Пашка друг юаліс:

— А тіянлы кутшӧм вопросъяс сетлісны? Менсьым тай юалісны, кодӧн пӧ тэ кӧсъян лоны? Мися война вылӧ кӧсъя мунны, да чӧртъясыд оз босьтны.

— Менсьым юалісны жӧ да ме шуи, мися Воркутаӧ, горнӧйӧ велӧдчыны муна, — висьталіс и Ӧльӧксан. А Егоршалысь тайӧс эз юавны, ошкыштісны сӧмын колхозлы бура отсасьӧмысь. Но юалісны кӧ быттьӧ, Воркутаӧ, горнӧйӧ жӧ эськӧ висьталіс.

Картаяс вылӧ абу на пасйӧмны тайӧ каръяслысь нимъяссӧ. Но йӧз сёрниысь пыр частӧджык позис кывны Ухта да Воркута кывъяс. Тайӧ нимъясыс, быттьӧ мойдвывса странаяс, кыскисны ас дінас быдмысь том войтырӧс. Школа помалысьяс да гырысьджык классъясын велӧдчысьяс юасьлісны велӧдысьяслысь да ветлысь-мунысь войтырлысь тайӧ выль каръяс йывсьыс.

— А Чибъюыс кӧні, Чибъюыс? — юасис Егорша. — Ме жӧ бура помнита, Москваса роч геологъяс Чибъюӧ мунісны.

— Чибъюыс сійӧ Ухтаыс да Воркутаыс и эм, буракӧ, — зэв збыльпырысь шуӧ Ӧльӧксан, Егоршалӧн другыс.

— Абу, абу! Ме тӧдмалі нин: Чибъюыс — сійӧ, точнӧ, Ухта! Сэні нефть перйӧны. Балдаяс... А Воркутаас из шом, — вомалӧ сійӧс Пашка, Егорлӧн мӧд друг.

— А ми инӧ кытчӧ мунам, нефтьсӧ али из шомсӧ перйыны?

— Дерт жӧ, из шомсӧ, — сигӧраліс быттьӧ, зумыда кайтыштіс Ӧльӧксан.

Школа помалӧм бӧрын куим друг пыр и ыстісны заявление Воркутаса горнӧй техникумӧ да, шудаӧсь, пондісны виччысьны воча кыв. Эз и дыр ковмы виччысьны воча кывсӧ. Куимнанныслы ӧти лунӧ воис пакет, кӧні ичӧтик бумагатор вылын юӧртісны: «Вы приняты без приёмных экзаменов...»

— У-у да, экзамен весиг оз ков сдайтны! А сэні ӧд и стипендияыс ыджыд дай нянь паёкыс!

Ак, дзескӧдӧм томлун! Война кадыс велӧдіс быдсяма сьӧкыд дорас и быд удж вылӧ. Став сиктса уджсӧ найӧ кужӧны дай из шомтӧ перйыны велаласны. Сэні, гашкӧ, удайтчас кӧть выль сапӧг лӧсьӧдны, а, колӧкӧ, и кромӧвӧйӧс на, югъялысь гӧленяӧс, кутшӧмӧн локтіс фронт вылысь Закар дедлӧн пиыс, ранитчӧм капитан.

Зонкаяслы позьӧ прӧститны татшӧм колӧмсӧ, ӧд налы дас квайт арӧс, самӧй зонмалан кад. А унджыксӧ найӧ оз и кӧсйыны.

Ылі Воркутаӧ Егоршаӧс колльӧдысьясыс мамыс да Сӧлӧ бабыс и вӧліны. Бӧрдісны-омлялісны.

Омляліс и Пашкалӧн мамыс. Ӧтнамӧс пӧ тай, муса пиӧ, колян. Пашкалӧн батьыс ещӧ война мӧд вонас на усьлі Волховскӧй фронт вылын. Ӧльӧксан медшуда куим друг пиысь: сылӧн батьыс ловъя воис страда заводитчигкежлӧ нин. Сійӧ и лои бать пыдди кыв шуысьыс куимнан зонкаыслы. Бура пӧ ветлӧй да поездад эн вугралӧй, быдсяма йӧзыс сэн эм.

Нывъяс, дерт, сьылісны зонъястӧ колльӧдігӧн, налы мый, гудӧкалӧны кӧ — и сьывсьӧ. Шогӧ усьӧмны жӧ вӧлі. Мунасны тайӧяс да коді кутас гудӧкасьны войпук дырйи? Пашкаысь лӧсьыда некод оз ворс найӧ сиктын. Важ «хромка» и эм зонмыслӧн, а ворсӧм шыыс «йӧкты-йӧкты» и шуӧ. А сэсся ӧд мусукасьыштісны нин сэк ныла-зонмаяс, янсӧдчӧмныс ёна нин дойдіс кодсюрӧӧс.

А асьныс зонъяс шудасьыс-шудаӧсь. Йӧюкъяс, мыйысь эськӧ и тадзсӧ радлӧны? Тӧдӧны оз, мый сэтшӧм Воркутаыс?

Но кузь туяд тай петан да ӧдйӧ гӧгӧрвоан, мый сійӧ сэтшӧмыс йӧзас петӧмыс да ветлӧм-мунӧмыс.

Кыдзкӧ эськӧ и локтісны Княжпогост кӧрт туй станцияӧдз. Тані найӧ первойысь аддзисны поезд. Сьӧдасьӧм паровоз да из шом кыскалан вагонъяс тшӧкыда прӧйдитлісны станцияті. А налӧн поездыс, коді нуас ылі Воркутаӧ, абу на. Рытъявылыс нин пассажиръяс шызисны: локтӧ войвылӧ мунысь пассажирскӧй поезд. Но кыдзи на ещӧ сэтчӧ пуксян? Кӧть и билетъяс кианыс нин. Поездыс сулалӧ сӧмын куим минут, а йӧзыс! Та мындасӧ зонъяс эз на и аддзывны сиктаныс крам праздник, Иван лун дырйи. Ставыс уськӧдчисны поездлань, а поездыс, буракӧ, тыр нин, пытшкас некодӧс оз лэдзны проводникъясыс.

Егорша кыдзкӧ регыд и торъяліс другъяс дорсьыс. Зырыштісны сійӧс кытчӧкӧ паровозланьыс. Со нин поездыс вӧрзьӧ, а йӧз сідзи и колины. И Егорша тшӧтш.

«Пашка да Ӧльӧксан, колӧкӧ, пуксисны?» — пурт йыв моз сатшліс маитчан мӧвп.

Поезд вӧрзьӧм бӧрын йӧз чукӧрыс быттьӧкӧ бӧрвыв сетчис, лои вӧляджык. Кутшӧмкӧ збой войтыр со кавшасьӧны вагон подножка вылас веськыда поезд мунігас.

«А ме кӧ тшӧтш? Пока поездыс ньӧжйӧ на джыгйӧ. Верма ӧд...» Сійӧ пондіс котӧртны ньӧжйӧ исковтысь поезд пӧлӧныс, сетчис думнас ӧти вагон подножка вылӧ. Эз артмы. Мӧдӧ — бара эз. Киас панера чемоданыс мешайтӧ. Но ӧд чемодантӧ он шыбит? Медбӧрын сяммис жӧ звиркнитны да кутчысьны ки пӧвнас медбӧръя вагон подножка вылӧ.

«Ура! Ура! Муна!»

Видзӧдліс перронӧ кольӧм йӧзӧс, а сэн быттьӧ тӧдса чужӧмъяс Пашкаыслӧн да Ӧльӧксанлӧн вуджӧртчылісны.

«Абу пуксьӧмны! Колины! — Муртса эз чеччышт Егорша бӧр. Но поездыс содтіс нин ӧдсӧ. Ӧні он нин чеччышт, он нин. — Бурджык кутчысь ёнджыка, усян дай лы торпыригтӧ он коль».

Егоршалӧн ставнас яйыс сырмис повзьӧмсьыс да майшасьӧмсьыс. А регыд гӧгӧрвоис, мый и збыль йирмӧг босьтӧ. Тӧлыс лы пырыд мунӧ. Тадз кӧ, дыр он вермы кутчысьны, разьсяс кабырыд и тутан эстчаньӧ. А ывлаыс пемдӧ нин, пемыднас кӧдзыдджык лоӧ.

Коркӧ-некоркӧ сэсся воис жӧ мӧд станция, кытчӧ сувтыштліс поездыс. Тані пуксьысьяс пӧшти эз вӧвны. Егорша сюйсьыштіс тамбурас. Сэні тшем жӧ сулалӧны йӧз, дзескыд и сьӧкыд лолавнытӧ, зато шоныд. Сідзи сувтсӧн и муніс сэсся войбыд.

Асъя войнас ӧти станцияын кутісны унаӧн чеччыны. Чибъю пӧ тайӧ.

— Чибъю? — пыр и ыркмуніс Егорша. Йӧз валнас петіс тшӧтш ывлаӧ да лӧз пемыдас аддзис сарай кодь кӧрт туй станциясӧ да бокысьджык сэтшӧм жӧ стрӧйбаяс.

— Ой, ещӧ шуӧны кар пӧ! — шензьӧмысла горӧдсис Егорлӧн.

— Карыс эстӧн, бокынджык, — воча шыасис сылы картуза, но куш дӧрӧм кежсьыс, кузь тушаа зон. Сійӧ куритчис, азыма апайтіс табак тшынсӧ. Сы дорын шуксисны чемоданъяса зонкаяс да дзик ӧти нывка. Нывкасӧ Егорша пыр и тӧдіс, аддзыліс комсомол райкомын, кор куим друг ветлісны районас комсомолӧ пырны. Тайӧ нывкаыс сэк йӧткыштіс Егоршаӧс ӧдзӧсланьыс, пыр пӧ, эн пов. «Миян районысь жӧ тайӧяс, — пасйис аслыс Егорша да пыр и думыштіс: — Ме, гашкӧ, татчӧ жӧ кольчча да? Чибъю ӧд тайӧ. Но Воркутаӧ нин ыстісны документъяссӧ да».

Поезд дасьтысис вӧрзьыны, и Егорша бӧр тюркнитіс вагонас. Ӧні вӧляджык лои муннысӧ. Весиг вагон пытшкас вермис пырны дай пуклӧс аддзис — ящиктор. А водзӧ станцияын и куйланін сюри. Коймӧд судтаас, труба дорас джадж прӧстмис. «Вот райыд! Позьӧ узьыштны».

Унмовссьӧма чорыда. Садьмис поезд тракнитӧмысь. «Воим кӧ-а?» Увдорас кыліс лабутнӧй гӧлӧс, кодкӧ висьтасис:

— Тані Кожвасянь Воркутаӧдзыс кӧрт туйсӧ лои вӧчӧма сё кӧкъямысдас лунӧн. Сё кӧкъямысдасӧн! У-у, мыйта йӧз да пӧсь нёняліс тайӧ туйыс! Стрась казьтыштныс... Нелямын ӧтиӧд во помас сквознӧй нин вӧлі. Уджаліс лун и вой. Сэтчӧ — грузъяс, сысянь — из шом.

Егорша чошкӧдіс пельсӧ, пондіс кывзыны, но асьсӧ висьтасьысьӧс эз аддзы. Гоньгӧдіс юрсӧ увлань. Сэні пукалісны ӧта-мӧд дорас жмитчӧмӧн морт вит. Висьтасьысьыс вушйӧм гимнастёркаа да вӧйӧм синма косіник дядьӧ.

— А Хальмеръюсӧ вермисны эз сийӧс-заводавнысӧ? — юасис кодкӧ. — Ме, брат, сэні сорок второй годын тӧкӧтьӧ лолӧс эг лэдз. Медпервой экспедицияыскӧд Хальмеръюас тӧвйи. Пӧгибӧ воӧмысь тай мездісны жӧ. Кын чуркаясӧс моз нин миянӧс сэсь петкӧдлісны... А вот, аддзанныд, фронт вылын ловъя коли — бӧр сэтчӧ муна.

Дядьыд варов вӧлӧма, сёрни паніс Воркутаын невеста аддзӧм йылысь. А Егорӧс бара унзільыс босьтіс. Бӧр унмовссьӧма. Эз и кывлы, кыдзи Воркутаад воисны. Садьмис — петӧны нин пассажиръяс. Кватитчис, панера чемоданыс некӧн абу. Сотӧмаӧсь. Сё лешакӧ, ӧд Ӧльӧксанлӧн батьыс унаысь долис, энӧ пӧ вугралӧй поездад. Воштіс со чемодансӧ. А сэні порсь тшӧг дай рысь туис. Пувъя пирӧгъяс бабыс пуктыштіс и. Ойя жӧ эськӧ да! Бур, кӧть нопйыс сьӧрсьыс. Юр улас пуктыліс. Но да ладнӧ, воис тай.

Воркута. Ещӧ эз на удит Егорша бура-лючки видзӧдлыны гӧгӧрпӧв, а мыйӧнкӧ пытшкӧснас гӧгӧрвоис: ачыс му помыс тайӧ. Букыш. А эстчаньын куш эрд шыльквидзӧ, рудоввиж.

Йӧз бӧрсяыс петіс карас. Мышкас коли кӧрт туй станцияыс, сьӧдасьӧм паровозъяс, а водзын лажмыдик баракъяс, вушйышталӧм гижӧдъяс быд стенын:

«Всё для фронта, всё для победы!»... Станция дорсянь кыліс кӧртӧн клёнгӧм шы да паровозлӧн тутӧстӧм, кӧнкӧ ылын точӧдчис мыйкӧ, быттьӧ ыджыд часі тічи-точимуніс. А паныд фуфайкаа нывъяс, ыджыд табун. Нывъяслӧн дзирыд синъясыс дзик пыр вежисны Егоршалысь зумыш мӧвпъяссӧ. «Со тэ кутшӧм, Воркута!» Кытчӧ ӧні сылы сетчыны? Гашкӧ, нывъяслысь юавны? Но найӧ асьныс нин со шыасисны зонка дорад: эй пӧ, красавец, пойдём с нами вагоны разгружать! Татшӧмъясыдкӧд пан сёрни, ачыд он ло рад. Бурджык эсійӧ зонкаыслысь юалас. Сійӧ, со, чемодана, колӧкӧ, Егор моз техникумӧ жӧ велӧдчыны локтӧ...

Аски рытнас сӧмын явитчисны Егорлӧн другъясыс — Моторин Паш да Стрекалов Ӧльӧксан. Сӧмын и маитчыштісны, мый водз воӧмны, ӧд найӧс, дас класс помалысьясӧс, экзаменъястӧг примитӧны.

— А-а, кутам тай шогсьыны! Шахтаас уджавны медасям! — Пыр и вӧзйис шогӧ усьлытӧм Паша.

— Збыль! Сьӧмтор кӧть нажӧвитыштам! — ӧзйис и Егорша. — Но и, Пашка тэ, югыд башка!

Ӧльӧксан вӧлі жугыль, сійӧ оліс чӧв. Сылӧн кык другыс эз и кужлыны думыштлыны, мый Ӧльӧксан, коді во чӧж кӧкӧдіс найӧс мунны сӧмын Воркутаӧ, горнӧйӧ, велӧдчыны, кӧсйӧ пышйыны на дорысь.

* * *

Примитісны, дерт жӧ, зонкаясӧс удж вылас.

«Проходчикъяс дорӧ, забойӧ», — вӧлі гижӧма шахтаса начальникыс налӧн заявление вылӧ. Кутшӧма на и радліс участокнас веськӧдлысьыс выль вынъяслы. Локтӧй пӧ аски жӧ сизим час асыв кежлӧ.

И со аскинас кык друг, Егор да Паша, места вылынӧсь. Ӧльӧксан туяс кынмӧма ли, мый ли, биаліс, коли общежитиеас вольпасьӧ. Сменнӧй мастер, латшкӧс, крепыдик тэчаса дядьӧ, нуӧдӧ найӧс паськӧм вежанінӧ. Брезент паськӧма зонкаяслы сетӧны и шахтёрскӧй лампа. И настоящӧй из шом перйысьяс моз нин восьлалӧны зонкаяс шахтаӧ лэччанінӧ.

— Тайӧ вентиляционнӧй ствол, — висьталӧ мастер, тӧдмӧдӧ шахтавевдорса овмӧсӧн. Сэні сулалісны морт дас, шмонитісны ас костаныс. Регыд мысти му пытшсяньыс журкнитіс-лыбис клеть. Бубыля кодь сьӧд чужӧмаӧсь, сӧмын пиньясыс еджыдӧсь, петісны му улысь шахтёръяс. А на местаӧ увдорӧ лэччысьяс пуксисны. Тшӧтш и Егор да Паша.

Кысянькӧ кыліс нёльысь дзиньк-звӧнитӧм, и йӧз тыра клетьыс мӧдіс увлань. Первойсӧ быттьӧкӧ лыбыштліс, сэсся мӧдіс тювны. Лэччан увлань, а кылан, быттьӧкӧ лэбан бӧр выліас. Пемыд. Чапкӧ нырад ва руа гу дук. Кӧнкӧ кылӧ сёльгӧ ва. Со уліас тыдовтчис би югӧр.

— Воимӧ. Тайӧ руддвор, — клетьсьыс петігмоз висьталӧ мастерыс.

Руддворын югыд, вӧля, бетонируйтӧм стенъяс. Стенъяс кузя быдлаын нюжвидзисны кабельяс, быттьӧ сьӧд змейяс. Кӧнкӧ сёльӧдчӧ ва. Татшкӧ-стучитӧ движок. Сулалӧны из шом тыра вагонеткаяс.

— Вӧтчӧй, энӧ кольччӧй. Ылӧкодь мунны ковмас, — тэрмӧдлӧ мастер. Чӧртыс тӧдӧ, кыт сӧмын эз мунны! Страк быдӧн босьтлӧ, но интереснӧ. Сап пемыд и лӧнь. Жебиник лампочкаыс сӧмын и кок увтӧ югдӧдыштӧ. А кок улас булькакылӧ ва, кытсюрӧ кӧрт рельсъяс вывті клопакылісны сапӧгъясыс.

Первойсӧ найӧ мунісны веськыда, свежӧй сынӧд ыргис налы чужӧмас. Сэсся некымынысь кежавлісны бокӧ. Кыкысь лэччисны чой горув моз увлань, гӧрбыльтчӧмӧн и весиг пидзӧсчаньӧн, кутшӧмкӧ трапъяс кузя.

Сэтшӧма нин мудзисны зонкаяс, а мастер век мунӧ и мунӧ, висьталӧ тӧдтӧм кывъяс: — тайӧ бромсберг, тайӧ квершлаг, тайӧ скат. А зонъяслы ставыс ӧти чӧрт — мупытш, склеп, гу. Ӧти пӧраӧ кывлісны неылысь кӧртӧн гольскӧм шы, вӧвлысь корскӧм да вӧв вӧтлысьлысь морт гӧлӧс шы. Сэсся бара пельтӧ поткӧдан чӧв-лӧнь.

«Би югӧр, кӧть тэ эн кус!» — сӧмын ӧти мӧвп Егорлӧн юрас.

И со медбӧрын найӧ забойынӧсь, асланыс уджалан местаын. Уф!

— Со, воим... Шойччыштӧй... — шыасьӧ мастерыс да чышкыштӧ ньылӧмзьӧм чужӧмсӧ. — Кыланныд гар дуксӧ? Сӧмын на взорвитӧмны. Со тай мый ыджда чукӧр породаыс куйлӧ. Тайӧс тіянлы и колӧ идравны. Грузитны вагонеткаясӧ. Тані, со, тыртӧм вагоныс эм, сэсся ваясны ещӧ. Зыръяс эмӧсь жӧ. Гырысьджык изъяссӧ верманныд кинад шыблавны вагонас. Мый ещӧ? Да-а, эсыті абу крепитӧма йиркыс, видзчысьӧй, вермас усьны юр выланыд изйыс. Ставсӧ гӧгӧрвоинныд? Мен колӧ тэрмасьны мӧдлаӧ. Локыла на. Давайте, зонъяс...

Мастерыс лап-лапкерыштіс кык друглы пельпомас да мӧдӧдчис бӧр сылань, кысянь ӧні на сӧмын воисны. Муніс, кок шыыс сӧмын кылӧ. А зонкаяс колины. Сулалӧны. Шемӧсмӧмаӧсь, лӧньӧмаӧсь. Гупвидзысь пемыд и вӧсни кык югӧр. И кык зонка.

Первойӧн вӧрзис да шы сетіс Пашка. Видзӧдіс эстчӧ забояс, крепиттӧминас да шутёвтіс гораа:

— Ф-ють! Да мый ми? Ас кокӧн воимӧ асьнымӧс ловйӧн дзебны? Пока абу сёр, утьыштны колӧ, другӧ!

— Кыдзи утьыштны? — шыасис Егор.

— Кыдзи? Сідз жӧ, котӧрӧн!

— А тэ кӧть письтан?

— Письта кӧть ог, а татчӧ ог кольччы! Он мӧй аддзы, эсійӧ из глыбаыс увкнитны нин миян вылӧ кӧсйӧ!

— Да, тэнӧ сӧмын и виччысьӧ.

— А мый, усяс дай.

— И мед усяс. Ӧти трусӧн этшаджык лоӧ!

— А тэ, быттьӧкӧ, он пов. Тіралан жӧ со.

— Тірала... Тайӧ ме мудзӧмсьыс. Вот шойччышта и кута уджавны.

— И уджав!

— И уджала. А тэ мун, мӧдін кӧ.

— И муна!

— Мун!

— Но ладнӧ скӧравныд! Чӧрт с тобой, кольчча! Лямӧдас кӧ, мед мамӧлы гижасны: «Пал смертью храбрых». Тэныд назло сё вагон сӧвта!

— Но и бур. Кыкӧныслы кыксё лоӧ! — Егорша копыртчис, босьтіс кок увсьыс медыджыд изсӧ, грым шыбитіс вагонетка пытшкас. Пашка тшӧтш. Ӧтиӧс, мӧдӧс, коймӧдӧс... Заводитіс кӧ Паша, оз нин бӧрыньты, гымӧдас! Абу ӧд сылӧн весьшӧрӧ овыс Моторин — мотор кывйысь, гашкӧ.

Сыркакыліс вагонеткалӧн кӧрт пыдӧсыс грымӧдысь изъясысь, а кӧнкӧ ылынкодь, бокын, сідз грымӧбтіс, весиг сыркмунліс ставнас этайӧ из мешӧкыс.

— Нинӧм оз ло, — нюмдыштӧ другыслы Егорша.

Тӧдіс кӧ Пашка, кутшӧм вӧлі страшнӧ Егоршалы тайӧ здукас. Гашкӧ и, нюмыс артмис повзьӧмысла. Но Пашка гӧгӧрвоис сійӧс ас ногыс, и тайӧ вӧлі бур.

* * *

Первой уджалан лун. Со, вӧлӧм, кутшӧм шахтёрскӧй нянь паёкыс. Со, вӧлӧм, кыдзи кромӧвӧй сапӧг вылас нажӧвитчӧны. Шорӧн лэччысь ньылӧм да мудзӧмысла тіралысь ки-кок.

Мастерыс ошкыштіс да быттьӧкӧ Егоршалы морӧсас медся главнӧй наградасӧ, самӧй дона орденсӧ, сатшкис. Мудзӧмысла шатлӧдлӧ, но морӧс кудйыс петны кӧсйӧ радысла. Найӧ вевдорынӧсь. Юр весьтас кодзула енэж. Мый эм мичаджыкыс кодзула енэжысь? Гашкӧ, ачыс муыс.

Тадзи ыззьӧмӧн и воисны найӧ общежитиеас да пласьт усины дзуртысь векни крӧвать вылас.

Егоршалӧн мудзӧмысла синъясыс асьныс тупкыссисны. Унмовсян ру пырыс сійӧ аддзӧ батьсӧ. Пукалӧ пызан саяс, видзӧдӧ школьник пиыслӧн географическӧй карта вылӧ. Сэсся шуӧ Егоршалы, чуньнас войвыв муяс да Сибыр вылӧ индігтыр, — вот пӧ этайӧ ставсӧ кор бур йӧзӧн овмӧдам да сэтысь озырлунъяссӧ босьтны кутам, сэки и олӧм миян пуксяс, бур да озыр. Збыль ӧд коркӧ батьыс тадз шуліс. Вот пӧлучитас Егорсянь письмӧсӧ и гӧгӧрвоас: заводитӧмны нин войвывтӧ бур йӧзнас овмӧдны.

Егор ещӧ эз на тӧд, мый батьыс абу нин. Воркутаас Егор мунтӧдз на волӧма батьыслӧн усьӧм йылысь юӧрыс, да сиктса почтальон абу лысьтӧма сетны зонкалӧн туйӧ петігӧн.

Та йылысь Егорша тӧдмаліс сӧмын тӧлысь мысти, кор гортсяньыс воис письмӧ.

Сійӧ письмӧас жӧ мамыс вӧлі гижӧма: пӧсь синваӧн пӧ кора, лок бӧр гортӧ. Стрекалов Ӧльӧксаныд пӧ воис да, майбырӧ, школаӧ секретаравны пырис. Мам-батьыслы ловъя кӧпейка кӧть кутас вайны. А мем налог нинӧмӧн мынтыны, тэныд отсыштны дзик ог вермы...

— А-а, Ӧльӧксан пышйис татысь да школаӧ секретаравны пырӧма, — письмӧсӧ лыддьӧм бӧрын кайтыштіс Егор.

— А мый, гашкӧ, ми тшӧтш свистнитам гортӧ да? Вӧрӧ сортовитны каям, — дзик пыр шыасис Паша.

— Ме абу рак, медым бӧрлань кысйыны! — зэв скӧрысь равӧстіс Егор, да Пашка сэсся кыв эз лысьт шуны, ышловзис сӧмын. Но здук бӧрти аддзис: Егорша бӧрдӧ, письмӧнас чужӧмсӧ тупйӧма да.

— Егорей, тэ мый? Тэ мый?

— Батьӧ... — Сійӧ мыччис другыслы письмӧсӧ...

* * *

Нёль во. Кутшӧм дыр кыссисны тайӧ воясыс! Кутшӧм ӧдйӧ найӧ исковтісны!

И со нин техник-шахтостроитель дипломӧн Егорша да Паша локтісны гортаныс медбӧръя каникул вылӧ. Быдмӧмаӧсь-сӧвмӧмаӧсь, выль шевиот костюмаӧсь, тшапӧсь. Мамъяслы радыд! Ошйысьныыс оз вермыны. Козин чышъян ӧд налы вайисны тшӧтш! А грездса суседкаяс быттьӧкӧ и завидьтыштӧны. А кыдзи костюмныс да мамъяслы козиныс шедіс, некод оз юав. Мукӧдыс ӧд каникулъяс дырйи гортас шойччыны мунӧны, а Егор да Паша проклятӧйяс моз тӧвся ни тувсов каникулъяс эз аддзывны, кольччылісны шахтаӧ уджавны.

А невестапуыс мыйта завидьтан жӧникъяс дортіын бергалӧ! Мамысъяс налӧн кутшӧм меліӧсь!

— А тӧдан, другӧ, ме ӧти нылӧс аддзи! Гӧтрасьны, гашкӧ да? — Пашалӧн ызбыльтӧ серамыс, синъясас беспиян чеччалӧны.

— Коді нӧ сэтшӧмыс? — шензьыштіс Егор.

— Ог висьтав, мырддян.

— Он кӧ и... — Веськодя шуӧ Егор, но ныв йылысь гарыштіс Паша да нёймунліс жӧ аслас сьӧлӧмыс. Сылы ӧд ӧти ныв кажитчӧ жӧ. Но медым ӧні гӧтрасьны! Водз на.

— Гӧтрасян да кытчӧ гӧтыртӧ нуан, патера ни нинӧм на ӧд абу? — пытайтӧ другсӧ Егор.

— Мӧд во локта дай нуа. Таво мед гортас на, тан олас, — ньӧти падъявтӧг и вочакыв сетӧ Пашкаыс.

— Ачыд тӧдан, — шуӧ медбӧрын Егор.

Кыткӧ чегӧ-я, оз-я, кыткӧ орӧ-я, оз-я,

Некыті, буди, оз чег, некыті, буди, оз ор...

Войпук дырйи медся визула йӧктӧ Егорлӧн воча чойыс, Линаыс. Пашкалы, буракӧ, Лина старайтчӧ. Но и йӧй! Лина лӧсьыдик да зумыдик, и удж вылад сюсь. Пара быттьӧкӧ Павеллы. Но ӧд Павелыс велӧдчӧм морт. А Лина вит класс сӧмын помаліс. Дай велӧдчыны сійӧс оз и кыскы. А Павел мӧдпӧлӧсджык. Гӧтрасясны кӧ, кутасны-ӧ лӧсявны? Оз, буракӧ, ков ышӧдны Пашкаӧс. Но кывзас-ӧ? Вермас Пашка пакӧститны, и Лина чойыс жаль лоӧ.

— Тэ, другӧ, менсьым чоюкӧс кӧ ылӧдан, меным абу и друг, — мунан луннас, торйӧдчигас, шуис Пашалы Егор. Сылы удж вылас быть колӧ мунны август первой лун кежлӧ. Пашалы жӧ индӧмны чӧлӧй вежонӧн сёрджык. Та вӧсна найӧ эз ӧти лунӧ петны, да Егор полыштіс Лина вӧсна.

— О-ог, — эскӧдыштіс Паша да мыйлакӧ пӧся содтіс: — Но Линаыд меным зэв ёна кажитчӧ!

Тайӧ сёрнинас и кык друг торйӧдчисны да чайтісны: регыдӧн оз и аддзысьлыны. Оз ӧд ӧтлаын пондыны уджавны. Паша из шом перъян шахтаын, а Егорӧс индісны геологоразведочнӧй экспедицияӧ.

* * *

И со, Егор стӧч урчитӧм лун кежлӧ воис геологоразведочнӧй управлениеса кадръяс отделӧ. Олӧма нин нывбаба мыйлакӧ радлыштіс:

— Да ӧд Олег Александрович буретш тані! Лок ме тэнӧ сы дорӧ нуӧда!

Коридортіыс восьлаліг кадровичкаыс сёрнитіс том специалисткӧд:

— А томиник на тэ кутшӧм! Но нинӧм. Солнцевыс миян стрӧг кӧть, зэв прамӧй мужик. Чайта, сы дорын лӧсьыд лоӧ...

«Стрӧг? Вермас на и не босьтны. Но и мед оз кӧ... Шахтаӧ десятникӧн муна...»

Коридорті ӧтарӧ-мӧдарӧ жуисны йӧз: служащӧй паськӧмаӧсь и брезент спецовкаа войтыр. Егор вылӧ некод эз и чӧвтлы видзӧдлассӧ. Сылы весиг забеднӧ лои. Ас шахтаас кӧ эськӧ индісны, ставыс сэн тӧдсаӧсь, а тані некодлы и он ков.

Но ӧти ӧдзӧс друг воссис и петіс сэтысь ён мича дядьӧ, кушӧдз бритӧм юра багатыр.

— Олег Александрович, — шыасис сы дорӧ кадровичкаыс, — со, локтіс миян выль специалистным. — И индіс кинас Егор вылӧ.

Бритӧм юраыс сатшкысьліс здук кежлӧ Егор вылӧ, шпыньмуныштіс:

— Ме зэв рад! Кыдз тіянӧс шуӧны? Пырам, сёрнитыштам.

Найӧ пырисны неыджыд жырйӧ, кӧні ыджыд пызан вылын пасьвидзисны кутшӧмкӧ чертёжъяс.

— Но, Егор Филиппович, пуксьӧй. — Ыджыд пызан саяс меститчӧм бӧрын бритӧм юраыс пыдди пуктӧмӧн шыасис Егор дорӧ. — Ме тіян документъясӧн тӧдмаси нин, эска: справитчанныд. Аски лэбам. Сизим час асыв кежлӧ лоӧй аэропортын. А ӧні мунӧй оформитчӧй да сэсся аскиӧдз шойччӧй да дасьтысьӧй.

А мый и Егорлы дасьтысьнысӧ? Чемодан киас — и айда! Асывнас сійӧ вӧлі нин аэропортын. Регыд воис и экспедицияса начальникыс. Киасисны. На дорӧ ещӧ локтісны куимӧн. Олег Александрович тӧдмӧдіс найӧс Егоркӧд, выль десятник пӧ миянӧ воис, шахта стрӧитысь.

Егор налы небыдджык кажитчис, али том на вывті, кыдзкӧ эскытӧма муртыштісны сійӧс юр вывсяньыс да кок улӧдзыс куимнанныс, сэсся серӧктіс ӧти зон, визув ныр-вома, сьӧд берета:

— Мунам, миян сэн номйыс быдӧнлы тырмас.

Олег Александровичыс быттьӧкӧ Егорӧс дорйыштіс: — Этатшӧм молодечьясыдлы номйыд абу страшнӧ. Да ӧд, Егор Филиппович?

Егор скӧрмис эсійӧ пинь жерйӧдлысь вылас, бужгыльтчыліс сылань, ярскӧбакодь шуис:

— Полан кӧ номъяссьыс, эн мун дай. А ме ветла!

— О-о! Кылін? — шуис мӧд сьӧд беретаыслы. Та бӧрын найӧ эновтчисны быттьӧкӧ выль десятникысь, ас кежаныс пондісны намӧдчыны-сёрнитны. А начальникыс мыйсюрӧ юасис да висьтасис Егорлы.

«Оз, буракӧ, ыджыдӧ пуксьы», — пасйыштіс аслыс Егор.

Самолётсӧ ковмис виччысьны бура дыр. Коркӧ сэсся сетісны жӧ ичӧтик самолёт. Ӧдйӧ сӧвтісны экспедициялы колана груз, и со найӧ сынӧдынӧсь.

Егор эз на лэбавлы самолётнад да эз и вештыв синсӧ иллюминаторсьыс. Улын тыдаліс тундра — помтӧм-дортӧм веж от. Помсявыв дзирдалісны тыяс. Тундра-матушка ещӧ веж на, регыд вижӧдас, сэсся едждӧдас. Техникумас велӧдчигӧн Егор веськавліс тундраад и тӧлын, и гожӧмын.

Нем тӧдлытӧг водзын тыдовтчисны Полярнӧй Ураллӧн лымйӧн дзирдыштлысь гӧраясыс. «Сэтчӧ, лымъяинас, буракӧ, нуӧны?» — думыштіс Егор. Но гӧраяс регыд бердісны.

Лэбисны найӧ час кымын. И со медбӧрын нёрӧны увлань. Инмӧдчис самолётыс муас, жургыштіс, сувтіс.

— Воим! — ёртъясыс пондісны петны ывлаас.

Петӧм мысти Егорлы шыбитчис синмас паськыдкодь площадка — аэродромыс. Ещӧ казяліс: аэродромыс джуджыд мыльк йылын. Неылын сулаліс тшупӧм ичӧтик керка. Тайӧ и аэропортыс экспедициялӧн. Керкасьыс паныд налы петісны кыкӧн. Ӧтиыс лётнӧй формаа, мӧдыс бакенбардъяса. Аэропортса начальникыс да радистыс. Ставныс ӧдйӧ ректісны грузсӧ самолётсьыс, новлісны неыджыд сарайӧ.

Регыд локтіс ыджыд кепкаа да зыр пасьта тошка дядьӧ. Завхоз пӧ тайӧ, Захарыч. Пельк вӧраса, гора гӧлӧса, сійӧ примитіс грузсӧ да сетіс быттьӧ ставыслы приказ:

— Мунӧй сэсся, мунӧй, лэччӧй!

Збыль, круткодь чой горув ковмис лэччыны. Трӧпасӧ тальӧмны бура жӧ нин. Гӧра лэччиг бура тыдаліс уліас чуклясьысь векни ю да сы пӧлӧн вӧр кустъяс. Ю дорын некымын керка да палаткаяс. Тайӧ и экспедициялӧн шӧр базаыс.

Егорӧс, выльӧн воӧм мортӧс, завхозыс тӧдмӧдіс ичӧтик посёлокнас.

— Этайӧ ыджыд баракас и кантора, и столӧвӧй, и медпункт меститчӧма. Мукӧдас экспедицияса войтыр олӧ. А эстӧн, палаткаясас, передвижнӧй электростанция, конюшня да складъяс, — кинас ёна шенасигтыр висьтасис завхозыс. А Егорлы, сиктын быдмысь детинкалы, любӧ лои, мый и вӧвъяс тані эмӧсь.

— А овны тэ кутан кантораын, аскӧдыс Олег Александровичкӧд, — висьталіс водзӧ завхозыс. — Шахматасьны кужан? Ой, ёна радейтӧ... Мун пырт чемодантӧ да бӧр пет. Вольпась ещӧ на тэн сета.

Егор веськӧдчис канторалань. Кильчӧ вылас кайӧм бӧрын тэрыба кутчысис ӧдзӧс вугъяс. Чайтіс, пырас да сразу и Олег Александровичӧс аддзас. Но кантора вӧлі тыртӧм, овтӧм дук кыліс. Егор пуктіс чемодансӧ стен пӧлӧныс нюжвидзысь скамья вылӧ, пондіс дзӧръявны-видзӧдны стенас ляскалӧм плакатъясӧ. Но друг воссис бокыса ӧдзӧстор да мыччысис экспедицияса начальникыс, гортса паськӧма нин, пижама гача да дӧрӧма. Вылын кымӧсыс да бритӧм юрыс югъялісны, тӧдчӧ: сӧмын на мыссьӧма.

— Но, тӧдмасин посёлокнад? А ӧні пыр, бӧрйы аслыд узьланін. Коді медся ёна кажитчас, сійӧс и босьт. — Стен пӧлӧн кык судта наръяс вылӧ индігтыр вӧзйис сійӧ да содтыштіс:

— Тэнад ӧні тайӧ горт.

Егорлы тешкодь кажитчис начальникыслӧн оланіныс. Самӧй жыр шӧрас кӧрт пач, ичӧтик ӧшинь дорас бумагаӧн вевттьӧм пызантор. Пызан вылас руасьысь алюминевӧй чайник да сэтшӧм жӧ кружкаяс. Сэн жӧ гӧгрӧс нянь чӧвпан да печенньӧ пачка. И быттьӧ мойдкывйысь веськалӧма татчӧ мичаник узоръяса гӧрд хрусталь ваза, тырыс посньыдик еджыд сакар торъясӧн. Но збыль мойдыс вӧлі ӧшинь вылас. Ичӧтик пу дозйын сатшвидзис ыджыд кактус, кодлӧн йылас алӧй шапка моз ломаліс синтӧ пӧртмӧн мича дзоридз.

— Менам со чай нин, дона гӧсьтлы, дась. Давай юыштам пӧсь васӧ! — кайтыштіс Олег Александровичыс да шмонь гӧлӧсӧн пондіс лыддьӧдлыны:

— Ваыд сійӧ мельнича бергӧдлӧ, пароход новлӧдлӧ, миянлы вын-эбӧс сетӧ да лов пытштӧ малыштӧ — тадз шулӧ миян пыдди пуктана Захарыч, завхозным, кор самолёт лэбавтӧм вӧсна столӧвӧйын кизьӧрджыка вердӧны. Так што, давай пӧрччысь, мыссьы...

Олег Александровичӧс быттьӧкӧ Егор эз и кыв, видзӧдіс мича дзоридз вылас да шензис: — Но и дивӧ!

Олег Александровичыс тшӧтш видзӧдліс ӧшинь вылас, шуис:

— А-а, красавицанас нимкодясян? Кымын во ме тайӧс новлӧдла сьӧрысь, чередита, и со... Дзоридз! Но мый, чайыд кӧдзалас! А то и чайтӧ юны оз сетны. Шӧтасны кантора тыр. Докладъясӧн, юасьӧмъясӧн, норасьӧмъясӧн — пӧшти вежон эг вӧв.

И збыль. Первой Захарыч налысь чай юӧмсӧ торкис.

— Тэ нӧ мый, зонмӧ? Виччыся ӧд. — Ӧдзӧсас мыччысьліс завхозлӧн паськыд тошкыс.

Олег Александрович чукӧстіс сійӧс:

— Пыр, Захарыч, чай юам! Сет зонмыслы туй бӧрас горшсӧ веськӧдны.

— А ме сійӧс мырдӧн ог нуӧд. Вольпасьтӧ ачым и верма вайны. — Завхозлӧн тошкыс вошис ӧдзӧс саяс. Олег Александрович серӧктіс:

— Пӧслукман старикыс. «Челюскин» вылын Вой Полюс штурмуйтлӧма. Отто Юльевичкӧд. Со тай, сы кодь жӧ пашкыр тош быдтӧма, оз шыр... И ме коркӧ тош жӧ новлі, — недыр чӧв олыштӧм бӧрын шпынь-серӧктіс Олег Александровичыс. — Томдырйиыд тай окота мыйӧнкӧ ошйысьны йӧз водзас. А ӧні, аддзанныд... — Сійӧ кыкнан кинас малыштіс тшӧка лысӧ да куш юрсӧ, вильыш зонка моз бара серӧктіс: — Мый, шыльыд и сӧстӧм!

Эз удитны и чай кружкасӧ юны, экспедицияса начальниклы вайисны радиограмма.

— Мый нин сэн? — эновтіс чай кружкасӧ Олег Александрович, босьтіс радиограммасӧ.

— М-да, Егор Филиппович, делӧяс... Миянлы татчӧ кык специалист шахта стрӧитысьыс быть колӧ. Ӧтиыс со тэ эм нин. А мӧдыс... Сёрнитчылім нин ӧтикӧд Донецкысь. Кӧсйис воны и, со, телеграфируйтӧ: ог пӧ вермы. М-да, м-да... — Сійӧ дыр зыраліс чунь помъяснас плешсӧ, а Егор друг ыпмуніс юрас вирдыштӧм мӧвпсьыс:

— Пашкаӧс кӧ татчӧ!

— Кутшӧм Пашкаӧс?

— Друг менам. Ӧтлаын велӧдчим и помалім.

— А сійӧ... Чайтан, справитчас?

— Ӧтлаын ӧд велӧдчылім, — Егорлӧн гӧрдӧдыштіс чужӧмыс.

Аддзытӧг эз ов начальникыс зонлысь чужӧм вежласьӧмсӧ.

— Ладнӧ... Но ачыд тӧдан, кутшӧм ответственнӧй миян уджыс. Кодӧссюрӧ босьтан, да бӧрыннас каитчыны кутан. Сідз кӧ нин шуны, менам тані быд морт «на вес золота».

— И Паша тшӧтш лоӧ «на вес золота». Вот аддзыланныд, — пӧся дорйыштіс другсӧ Егор.

Вашмуніс Олег Александрович:

— Тэ кӧ татшӧм пӧся кӧсъян, радируйтам... Кыдзи памилиеыс?

* * *

Посёлокнас да кутшӧмсюрӧ техническӧй документацияӧн Егор, экспедицияса выль десятник, удитіс тӧдмасьны воан луннас на. Аски кежлас начальникыс эз бура висьтав, мыйджык вӧчны выль десятниклы. Водігас тай шуис, узь пӧ, «утро вечера мудренее», аски пӧ и думыштлам, мый керны.

Рытнас дыр эз вермы унмовсьны Егор, а асывнас сідз унмовссьӧма, ичӧт кагалӧн моз весиг дульваыс лювдӧма. Садьмис ӧшинь саяс лэбачьяс дзользьӧмысь. Шонді серти кӧ, водз на, но Олег Александровичыслӧн нарйыс тыртӧм нин вӧлі.

«Ой, узьсис мӧй? — звирк чеччис Егор, видзӧдліс часі вылас. Вит час асыв на муртса. — Кӧн нӧ Олег Александровичыс? Позис ӧд и менӧ тшӧтш садьмӧдны».

Шур-шар пасьтасис, петіс кильчӧ вылас. Кутшӧм лӧнь асылыс. Шондіыс кень пытшкын кодь на, ичӧтик ю веркӧссянь гежӧд ру лыбӧ вывлань.

Кутшӧмкӧ кыз дядьӧ, еджыд пӧварскӧй курткаа, пуджӧм сосъяса, вадорысь катӧдӧ ыджыд ведраясӧн ва. Столӧвӧй кильчӧ вылӧ быйк петіс пусьысь да вердчысь Миля нима ныв. Сылӧн киас паськыд тасьті.

— Типи, типи! — пондіс койны тасьтісьыс тӧрытъя сёян коляссӧ. Кысянькӧ пыр и жбырк лыбисны пышкайяс, пыстаяс. Ныв весьтӧ воӧм бӧрын кыз дядьӧыс сувтіс, лэдзис ведраяссӧ, качӧдлыштіс кияссӧ — позялӧмны, буракӧ.

— Со ӧд кыдз велалӧмны сёян дорад! Ить, кутшӧм сюсьӧсь! — лэбачьясӧн нимкодясигтыр шыасис дядьыс ныв дорӧ.

— Сӧмын пета кильчӧ вылӧ — локтӧны нин, — нюмсермис ныв.

Асъя сынӧдын сэтшӧм гора кылӧны налӧн гӧлӧсъясыс.

«Пусьысь-пӧжасьысьяслы водз колӧ чеччыны. Но Олег Александровичыс кытчӧ татшӧм водзсӧ мунӧма?»

Егор пырис бӧр каморкаас, босьтіс ки чышкӧд да сӧмын на мӧдіс вадорӧ мыссьыны, пырис Олег Александрович.

— Бур асыв! Тэ нӧ чеччин нин? Ме кок чунь йылын петі, мед мися узьыштан на. А садьмӧді, буракӧ?

Сійӧ майка кежсьыс, пельпом вылас ки чышкӧд, киас майтӧг доз да пинь весалан кӧлуйыс — щӧтка да порошок кӧрӧб.

— А ме повзи, узьсьӧма мися, — кайтыштіс Егор да вӧлись чолӧмасис.

— Абу на сёр, — лабутнӧя шуис начальникыс да содтіс: — Ме со вадорӧ лэччылі, лӧсьыда и польтыкаси...

Столӧвӧйын нуръясьыштӧм бӧрын начальник шуис:

— Талун ми тэкӧд ветлам шурф перъянінӧ. Ӧти сайысь и разведшахта дорӧ кежалам. Сэні уджалісны жӧ нин вежон-мӧд. Вевдор слӧйсӧ муыслысь кульӧма лои. Из нин сэсся воис. Буриттӧг да взрывайттӧг он нин нинӧм вермы вӧчны. Пока эновтӧма. Сэсся тэд ковмас Поздеевкаӧ ветлыны, тӧдмасьны. Сэтчӧ мӧд разведшахтасӧ индӧма перйыны. Верст кызь сэтчӧдз лоӧ, аски буретш прӧдукта Поздеевкаӧ кутасны нуны. Тэ тшӧтш лӧсьӧдчы туйӧ.

* * *

Рытъявылыс геб кыськӧ петіс. Веськыда сапкӧ!

Егорлӧн вӧлыс дугдывтӧг ӧвтчис бӧжнас да дась вӧлі кыккокйыв сувтны. Аслас Егорлӧн брезент спецовка да номдӧра. Оз лэдзны вир юысьястӧ куш яй дорас.

Нёль сутки манитчис Егор Поздеевкаас. Тӧдмасис сэні мунан уджъяснас да мый да. Ӧні со бӧр нин локтӧ шӧр базаас. Первойысьтӧ тӧдтӧм местаясад гажтӧмкодь. И туйыс кузь кажитчӧ. Сійӧ чукльӧдлӧ то дзик куш тундра эрд вывті, то пыралӧ вӧрӧ. Вӧрті мунны лӧсьыдджык. Рӧдтыштны на позьӧ, дай чӧв-лӧньсӧ торкласны вӧв кок увсьыс жбыркнитысь пӧткаяс. А кушинас нитш да вутш, карлик кыдзьяслӧн вужъясыс сідз и парсыштны видзӧдӧны вӧв коксӧ.

Сэтчӧ мунігӧн Егор быттьӧ эз и казявлы тайӧ ставсӧ. Эз гажтӧм вӧв ни. Экспедицияса кыскасьысь Юлай дядь зэв варов вӧлӧма. Егор сӧмын юаліс сылысь, мыйла пӧ тэнӧ завхоз Захарычыс нимтыштіс Салават Юлаевнас. А сійӧ плеть воропнас зутшкис аслыс морӧсас, заводитіс висьтасьны да эз нин сэсся тупкыв вомсӧ.

— Краброй я, потому Захар звал меня «Салават». Ты вона пушка таскай на спина — медьведь бойся, а Юлай — нет. Юлай клеб вези, мясо вези, карасин вези. Всё Юлай делай!..

Сэтчаньӧ воисны. Юлай сдайтіс грузсӧ дай бӧр шӧр базаӧ мӧдӧдчис, а Егорлы шуис:

— Ты мало-мало начальник — оставайся, а Юлай — гуляй домой.

Егорлы, воӧма да, быть кольччы. Манитчис со мый дыра и.

А Поздеевкаыс кажитчис Егорлы. Поздеевканас объектсӧ шуӧны сы вӧсна, мый шурф перйысьяс кындзи, сэні олӧны ас керка-картанас Поздеев дед, Степанида гӧтырыскӧд да гӧтыртӧм Игӧ пиыскӧд. Экспедиция корӧм серти матысса сиктысь Поздеевъясыс татчӧ вуджӧмны. Колхозыс козьналӧма налы купеческӧй ыджыд ыргӧн самӧвар, мед пӧ ставлы тырмас пӧсь ваыс.

Дедыс тані завхоз пыдди, и стӧрӧж пыдди, и кӧзяин пыдди. Гӧтырыс томджык на, гырысь лысера баба, пусьысь да мыськысь. Игӧыс шурф перъянінын мырсьӧ.

Став уджнас сэні юрнуӧдӧ десятник Коржов. Специальносьт сертиыс механик. Механизмыс эськӧ налӧн кӧрт бадья сӧмын да. Насос вӧлӧма шурфсьыс васӧ качайтны дай сійӧ жугалӧма.

Егор локтан лунӧ Коржовыс висьмӧма. Суис сійӧс Егор пӧсь пывсянысь. Поздеев дедкӧд лечитчисны пӧжӧм пӧсь корӧсьӧн. Шурф дорын уджалысь зонъясӧс эз жӧ су места вывсьыс. Ваӧн тырӧма шурфыс дай эновтӧмны. Вӧрас пув да тшак вотны петӧмны.

— Мед, мед вотасны, тӧвнас згӧдитчас, — кайтіс Степанида тьӧтыс, а Егорлы окота лои дивитыштны Коржовсӧ. Запастӧ вӧчны эськӧ абу лёк, да ӧд абу та вылӧ ыстӧма войтырсӧ татчӧ.

Та йылысь и пывсян бӧрын сёрни паніс Коржовкӧд Егор.

— А мый нӧ зонъясыслы керны? Васӧ качайтны дай уджыс лоӧ, — татшӧм и вочакыв сетіс десятникыс.

— Он ӧмӧй тӧдӧй: разведывательнӧй шахта тан кутасны стрӧитны? Шахтаыд абу шурф, уна вӧр ковмас. Вӧр пӧрӧдны мед ставнысӧ ыстін. Вӧрыс тай орччӧн.

Коржовлӧн вомыс кӧрсьыліс:

— Ме эг и думыштлы та йылысь. Дай начальство тшӧктытӧгыс нӧ кысь лысьтан?

«Тыдалӧ, тані прӧста лун-вой сёйысь», — мӧвпыштіс Коржов йылысь Егор. Десятникыд ӧд сійӧ коді? Уджалысь войтырсӧ ышӧдысь да кыпӧдысь. А тайӧ: эг пӧ думыштлы. Аслыс Егорлы и ковмис чер босьтны да петны вӧрас, сы бӧрся нин мукӧдъясыс черӧн-пилаӧн вӧтчисны.

Ӧні, бӧр нин шӧр базаӧ мунігӧн, Егор бара на донъяліс ас вӧчӧмторсӧ. «Правильнӧ-ӧ вӧчис шурф перъян уджъяссӧ дзикӧдз дугӧдіс да? Збыль ӧд та вылӧ указаниеыс эз вӧв. Но пыр кӧ виччысьны вылісянь индӧд, кутшӧм нӧ инӧ сійӧ ышӧдысь да кыпӧдысь?»

Егор тӧдіс: эм приказ кыдз позьӧ ӧдйӧджык сувтӧдны шахтасӧ. Сідзкӧ и вӧрсӧ заптыны быть колӧ. Буракӧ, коланатор вылӧ веськӧдіс Поздеевкаысь войтырсӧ. Тайӧ мӧвпнас ылалӧмӧн сійӧ эз и казявлы, кыдзи вутшкӧсь кушиныс помассис. Муртса тӧдчысь телега туйыс пыртіс сійӧс вӧр діӧ.

Сӧмын на удитіс вӧрас пырны, шпач-шпач ыджыд шумӧн лэптысис кодкӧ дзик вӧв кок увсьыс, повзьӧдіс вӧвсӧ и асьсӧ Егорӧс.

— Сӧтана! Дозмӧр кӧ-а? Со, кылӧ шлопкӧдігтыр лэбис неылӧ дай пуксис.

Сиктад олігӧн зонпосни тшӧкыда ветлісны матіса вӧръясті. Этша-этш кужӧ торйӧдны борд шы сертиыс тар ли дозмӧр, сьӧла ли ябыр.

Со тай чӧдлачыс мыйта, сійӧс, буракӧ, сапйис.

— Рыжко, вай сувтыштлам! Гашкӧ, эсійӧс кыйны вермам да. Завхоз Захарычыс туяс петігӧн сетіс том десятниклы ТОЗ. Босьт пӧ, згӧдитчас. Ошкӧс лыян — асьтӧ кыян. Сьӧла-тар — яя шыд дар! Поздеевкасьыд пӧ кыйдӧстӧгыд некод на эз волы.

Егор чеччыштіс вӧв вывсьыс, домаліс Рыжкосӧ пу бердӧ, лэдзис мелкокалиберкасӧ пельпом вывсьыс.

«Энлы, шӧйтышта», — мӧдіс кыйкъявны пуяс костӧ. А чӧдлачыс — вольсалӧма! Кватитыштас вомас тусьсӧ да воськов вӧчӧ.

Эз и ковмы ёна вӧтлысьны дозмӧр бӧрсяыд. Йӧюкыд матӧ и пуксьӧма. Лажмыдик кыдз пу вож вылысь Егор сійӧс аддзис. Чикнитіс сӧмын винтовкаыс, лыйӧм шыыс эз кыв. Егор эз и чайт, мый веськаліс. А сійӧ шмоткысис-уси, усигас пу вожъяснас сӧмын шаркнитіс.

Вайис дозмӧрсӧ вӧлыс дорӧ, горӧдіс:

— Рыжко! Вай ӧдйӧджык посёлокас гӧнитам! Сӧмын тайӧс нопйӧ вот ковмас сюйны, эськӧ посёлокті мунігӧн ставыс казялісны-а.

Томдырйиыд тай окота, мед кодкӧ быть пасйыштіс тэнсьыд удаллунтӧ да сюсьлунтӧ.

«Столӧвӧйӧ пӧварика нылыслы пырта. Ог, Олег Александровичлы кок улас пукта. А сійӧ мый шуас? Тэнӧ пӧ делӧ вылӧ ыстӧма, а тэ пӧ вӧрті шӧйтан, пӧткаяс бӧрся вӧтлысян...»

Неыджыд вӧр ді помассис. Юыслӧн кушиныс тыдовтчис. Вӧлыс рӧдтіс. Быд пемӧс тай тӧдӧ ассьыс гортсӧ, матысмигас ӧддзӧдӧ восьлассӧ. Со нин посёлокыс мыччысис.

«Тешкодь, Поздеевкаын ӧти керка и эм, да ним пуктӧмны, а тайӧ посёлокыс, буракӧ, нимтӧм на. Колӧ мыйкӧ пуктыны жӧ. Экспедицияса начальникыслӧн Солнцев овыс, позьӧ «Солнечнӧйӧн» и нимтыны.

Друг вадорысь кыліс сьылӧм шы. Мича ныв гӧлӧс ливкйӧдліс:

В рубашке нарядной к своей ненаглядной

Пришёл объясниться хороший дружок...

«Но, лешак, кутшӧм лӧсьыд сьыланкывйыс!» Регыд аддзис и асьсӧ, сьылысьӧ. Дзик ю берегсьыс. Еджыд платтьӧа, паськыд еджыд шляпаа. Юсь кодь. Дзоридз ӧктӧ.

— Рыжко! Тэ аддзан? Мем тай нӧ висьталісны, нывъясыс пӧ посёлокын абуӧсь. Видзӧдлы! Ой, шляпасӧ пӧрччис, шенасьӧ сійӧн!.. Котӧртны кутіс! Ӧвадыс, буракӧ, тэрмӧдлӧ. Лэбӧ юсь моз, оз — енэжвывса кокни кымӧр моз! Кысь нӧ татшӧм нылыс? Колӧкӧ, кыськӧ бурӧвӧйысь локтіс коллектор? Пробаяс, буракӧ, вайис.

Позис, дерт, вӧвтӧ ӧддзӧдны да нывтӧ вӧтӧдны. Егор эськӧ сідзи и вӧчис, кыйдӧсыс кӧ быттьӧ эрдын вӧлі. Но он ӧд сувтӧд вӧвтӧ да ноптӧ тані разь. Эновтчыны ковмис вильыш мӧвпсьыс. Веськӧдіс вӧвсӧ палатка-конюшняланьыс.

* * *

Столӧвӧйӧ пыригӧн сёян дуксьыс дрӧгмуніс быдӧн Егорлӧн став тушаыс. Ёна кынӧмыс сюмалӧма. Асывнас ӧд йӧв кружка сӧмын юліс Степанида тьӧткалысь, сэсся сёйлытӧм. Рыт нин со, шондіыс лэччӧ.

Ӧдзӧсас сылы паныдасисны мужичӧйяс, петӧны тэрмасьтӧг, ужнайтӧмны, буракӧ. Столӧвӧй пытшкӧ ӧти сӧмын кольӧма. Пукалӧ кузь пызан сайын. Порог воськовтігкостаыс и Егорӧс гымньӧв видзӧдласӧн гӧститӧдіс да бара сатшис курччасьысь синвидзӧдласнас вердчысь Миля вылӧ. Миля, гӧрд чужӧма, чукӧртӧ ӧтчукӧрӧ тасьті-пань. Сылӧн сьӧд синъясыс лап-лапкерлӧны мыжа мортлӧн моз.

Егорлы эз ло лӧсьыд, быттьӧ гусясьысь пырис, чайтіс: ныла-зонма костын радейтчӧм. Дзик порог дорас и сувтіс. Но пыр жӧ гӧгӧрвоис: абу на костын радейтчӧм. Мӧдарӧ — пинясьӧны. Кратайтчӧ, вӧлӧмкӧ, зонмыд. Скӧрысь йӧткыштіс ныр увсьыс алюминевӧй тасьтісӧ, равӧстіс:

— Синмӧн нин ог аддзы этайӧ греча роксӧ, да бара талун ныр улӧ вайин!

— Абу рок, а яй сора греча, — тӧдчӧдыштіс нылыд.

— Ак, яй сора! Но и сёй ачыд! — чилгис ыдждалысьыд тасьтісӧ Милялы кок улас, прысьмуні сёяныс, тасьті тур-тар гӧгыльтчис джодж кузяыс.

— Ак, тэ тадз! — эз и дыр думайт нылыд, тшӧтш тыртӧм тасьті стопасӧ шляпкис джоджас. — Марш татысь! Мед дукыд эз вӧв! Мун ресторанын чӧскыд сёянсӧ сёй!

Зонмыд торӧдыштіс чунь помнас пызанас, мисьтӧма серӧктіс:

— Хи-хи! Пӧвари-ха! Быттьӧ тӧдан, мый сійӧ настоящӧй рестораныс! «Дельфин», «Магнолия», «Золотая рыбка»! И сідз водзӧ...

Сылӧн быд горӧдӧмысь тӧдчис вышитчӧм, ошйысьӧм. Он мӧй пӧ аддзы, нывкашой, кутшӧм ме кӧзыр туз! Лысьтан пӧ мекӧд вензьыны. Но Миляыд абу на сэтшӧм нывкашой вӧлӧма, кужис на буянтӧ лӧньӧдны. Кыдз тай другысьӧн юаліс:

— А Тутанхамонлӧн гробницаын эн на ӧбедайтлы?

— Мы-ый? — нюжалыштіс улыс льӧбйыс зонмыдлӧн.

— Мый кылін... Весась! Со, бур йӧзыс сёйны локтӧмны...

Миля, буракӧ, сӧмын на аддзис порог дорсьыс Егорӧс, мелі, нюркнитан гӧлӧсӧн чукӧстіс сійӧс:

— Товарищ инженер! Пырӧй, пырӧй, эн повзьӧй!

Зонмыд ырс чеччис пызан сайысь, кватитіс скамья вывсьыс сьӧд беретсӧ, пуктіс шырӧм юрас, сӧдзӧдыштіс:

— Сс-сука! — и тэрыба мӧдіс петанінлань. Сылӧн сьӧд синъясыс петігас бара на сотыштісны Егорӧс.

«Эз ӧмӧй тайӧ и вӧв самолётас? Тайӧ, буракӧ сы дорӧ крукасьны жӧ кутліс», — мӧвпыштіс Егор да шыасис ныв дорӧ:

— Видзӧдтӧ, кутшӧм чизыр.

Егор чӧвтіс нопсӧ да винтовкасӧ мышку вывсьыс, пуксис пызан дорас.

— Да тэ, товарищ инженер, эн та вылӧ видзӧд. Мед ыждалас. Мусукасьны ме дорӧ зыртчӧ, а мем оз ков татшӧмыд. Лёк мустӧм Томас...

Миля шлюпнитыштіс нырнас да тэрмыштчис:

— Ой, да энлы, ме тэнӧ дзик пыр верда! — котӧртліс кухняас да пыр и вайис ыджыд тасьті тыр греча рок, пуктіс пызан вылас:

— Сёй, зэв чӧскыд! Этайӧ Хватовлы сӧмын пыр оз кажитчы.

Рок тасьтіысь и збыль чӧскыд дукӧн паркйис. Веськыда кӧ шуны, татшӧм пӧтӧса да чӧскыд роксӧ Егор эз на и сёйлы бӧръя дас вонас. Война кадӧ гортас тшыгъялісны, техникумас велӧдчигӧн эз жӧ ёна убӧлитлы сьӧмторсӧ таргайтны. А этайӧ, кутшӧмкӧ бычӧ, со, и джоджас койыштіс! Сёянсӧ! Сӧтны эськӧ татшӧмъясыслы веськыда винтовкасьыс!

Егор кыскыштіс ас дорас матӧджык тасьтісӧ, гораа шуис:

— Ок и чӧскыд! Ок и паньӧн уджалышта! А тэ, мича нылӧ, эн менӧ инженернад шу. Абу инженер, ме — техник. Прӧстӧй десятник. Техникум вот помалі, татчӧ экспедицияас ыстісны.

— А тэ сёй, сёй! Тэ меным сразу кажитчин... Абу этайӧ Томас Хватов кодьыс...

Столӧвӧйысь петігӧн Егорлы тӧд вылас усины экспедицияса начальникыслӧн кывъясыс: «Менам тані ставыс «на вес золота». Сідзкӧ, и эсійӧ, сьӧд берета вельмӧм зонмыс, «на вес золота» жӧ.

«А молодеч нывкаыс, эз повзьы эсыысь. Кыдз тай зымгис тасьтіяссӧ джоджас! Характер... Буракӧ, татшӧминъясас йӧзыс ӧдйӧджык збоймӧны? И Егорлы ӧні колӧ быть жӧ збойӧн лоны. Этайӧ сутшӧдӧм киа зонмыс пӧ шурф перъянінын уджалӧ. Вермас лоны, зурасьласны на ӧтувъя уджад. Татшӧмъясыд ас кок туяс тальӧдасны, повзян кӧ...»

«Олег Александровичыс гортын абу-а?» — мӧвпаліс Егор кантораӧ пыригӧн.

Тэрыба кватитчис ӧдзӧс вугъяс, восьтіс. И пыр жӧ синмыс паськаліс, вомыс, буракӧ, калькаліс и. Порогсӧ воськовтны сідзи и эз вермы. Джодж шӧрын павъяліс-йӧктіс эсійӧ вадорса сьылысь нылыс!

— Ой! — нылыд джӧм сувтіс, дзоргис Егор вылӧ. Егор вуджис порогсӧ, пуктіс нопсӧ да винтовкасӧ кузь лабичас, чышкыштіс чепӧсйӧм пӧсьсӧ, вӧлись чолӧмасис. Ачыс думыштіс: «А тайӧ кӧ ИТР жӧ, да пондас тані узьлыны-овны и?»

— Ті Егор Филиппович? — мелі да гажа гӧлӧсӧн юаліс ныв.

— Да, Егор. А мый? — Егор, буракӧ, ещӧ на падмис.

— Ме Валерия, Олег Александровичлӧн нылыс. Вои гӧститны пап ордӧ. Ті абу радӧсь?

Ныв жбыркнитіс кантора пызан дорӧ, кӧні куйлісны видзвывса дзоридзьяс, босьтіс найӧс киас, шуис:

— А ме виччыси тіянӧс. Со, ме и вадорӧ котӧртлі дзоридзьясла, мед тіянлы гажаджык вӧлі. Папа шуис: Поздеевкаысь пӧ шань зон локтас — примит. Вот ме и... Кутшӧм гӧснеч Москваысь да Сочиысь вайи — ставсӧ пызан вылӧ лэпті. Мися, шань зонлы абу жаль.

Ныв сёрнитіс, серамыс ызбыльтіс, ачыс ставнас кажитчис Егорлы гажа серамӧн.

— А Олег Александровичыс нӧ... Папыд кӧні? — юаліс падмӧм зон.

— Сійӧ срочнӧ лэбис управлениеас. Аски бӧр локтас. Но, мый ещӧ? Юась, ме дась вочавидзны... Тэ, буракӧ, повзин меысь? Эн пов, ог выжывит аслад патераысь! Муна узьны медпунктӧ либӧ Миля дорӧ.

— Бурджык, ме муна баракӧ зонъяс дорӧ, — заводитліс Егор, но нылыд зэв мелі серамбанӧн потшыштіс:

— Тэныд мый шуӧма, кывзысь! Тайӧ папалӧн приказ. А папа миян ёна дӧзмӧ, он кӧ сылысь приказсӧ олӧмӧ пӧрт. Тэд, буракӧ, мыссьыштны колӧ да сёйыштны?

— Ме столӧвӧйын сёйи нин, — нурбыльтіс Егор. — А мыссьыны вадорӧ котӧртла, энлы, пӧрччыся да.

Егор вӧрзис места вывсьыс. Нылыд бара гажмис.

— Но и умница, мый вадорӧ! Ме кӧсйи купайтчыны да эг лысьт, номъяссьыс повзи. А ті онӧ полӧй номъяссьыс? Да мый ме нинӧм абусӧ юася, ті жӧ со кутшӧмӧсь! И винтовка тіян... Лыйсьыны кужанныд?

Ныв помся варовитіс, быттьӧ кӧлӧкольчик тольӧдчӧ. Сылӧн тольгӧмыс ньӧти оз дӧзмӧд Егорӧс, кӧть и больӧдчысьяссӧ оз радейт.

«Тайӧ кӧ збыль балерина и эм-а?» — мӧвпалӧ Егор да нимкодьпырысь видзӧдӧ еджыд бобув кодь ныв вылӧ.

А нылыс бара нин тольгӧ:

— Кӧсъянныд кӧ, ме тшӧтш тіянкӧд купайтчыны ветла. Сӧмын ӧти яблӧг кӧть сёйӧй, персик ли.

Егор смелмис, юаліс:

— Персик? Мый сійӧ сэтшӧмыс, синмӧн на эг аддзыв.

Сійӧ, буракӧ, шмонитыштны кӧсйис, но ныв кыскис нин сійӧс ки пӧлӧдыс каморка жыръяс.

— Коньӧрӧй, весиг персик он тӧд! Лок петкӧдла. Со аддзан...

Кинас паськыда шевкнитӧмӧн нылыд индіс джоджшӧрса пач вылас.

Нылыд ӧтувтӧма пызансӧ да пачсӧ, вевттьӧма еджыд пызан дӧраӧн да сӧвтӧма сэтчӧ, веськыда пызан дӧра вылас, быдпӧлӧс фруктысӧ, кодъяслысь и нимъяссӧ Егор збыль вылӧ оз тӧд, непӧштӧ кӧрсӧ.

— Аддзанныд, тайӧ ставсӧ тіянлы дасьті, — нюмдыштӧ ныв да босьтӧ пызан вывсьыс ӧти фрукт, мыччӧ Егорлы:

— Персикыс меным медъёна кажитчӧ, видлы, тэныд кажитчас оз.

— А ме талун дозмӧр кыйи, — персиклысь сарӧга виж кучиксӧ кывнас нюлігмоз друг юӧртіс Егор.

— Дозмӧр?! Ой, кутшӧм интереснӧ! Вай пуктам этатчӧ пызан вылас, мед миян сэтшӧм натюрморт артмас!

— Ме сійӧс столӧвӧйӧ сдайті нин, — жугыльмис Егор.

— Милялы? Ок тэ...

Ныв шеныштчис кинас да, быттьӧ сійӧс пӧльыштісны, лэбыштіс ичӧтик ӧшинь дорас, чукӧстіс Егорӧс:

— Егор Филиппович! А этайӧ дзоридзсӧ энӧ на аддзылӧй? Ме кымын во чередиті, да меным эз лэдзлы дзоридзсӧ, а паплы, со, козьналӧма! Но тэ уродец! Но тэ безобразнӧй! А ті тӧданныд, Егор Филиппович, мыйла Полина Виардосӧ безобразнӧй красавицаӧн шулӧмны?

— Мый ог тӧд, сійӧс ог тӧд. А тайӧ дзоридзыс збыль синпӧртмӧн мича. — Ныв дінӧ ӧшинь дорӧ сибӧдчӧм бӧрын кайтыштіс Егор да, чӧрт тӧдӧ, кыдзи тӧд вылас уси ичӧтдырся кывлӧм-аддзылӧмторйыс.

«Ловъя? Зарни тэ менам! Кактусик тэ менам! Мунам ми тэкӧд ылӧ-ылӧ, сэні вой тӧв. А тэ кутан ӧшинь вылын быдмыны. И ӧти лунӧ лэдзан сэтшӧм мича дзоридз...», — Егорлы сэтшӧм ясыда кылісны тайӧ кывъясыс, мый окота лои горӧн казьтыштны. И сійӧ шыасис, гӧлӧсыс лои дзик коркӧя нывкаыслӧн кодь:

— Сэні вой тӧв, а тэ кутан быдмыны ӧшинь вылын. И ӧти лунӧ лэдзан сэ-э-тшӧм мича дзо-ридз...

Ныв шензьӧмӧн видзӧдліс сы вылӧ, юаліс:

— Тэ кытысь тайӧс тӧдан? Папа удитіс нин висьтавны?

— Эз. Ме ачым кывлі ичӧтдырйи. Ичӧтик нывка картон кӧрӧбын нуис ылі Чибъюӧ кактус мучудӧӧс.

Ныв чилӧстіс, тупкис кыкнан кинас вомсӧ, пондіс гажаа серавны.

— А тэ вӧв вылӧ менӧ сэки эн пуксьӧдлы? Помнита! Помнита! Но и но! Тэ жӧ сэки мужичок с ноготок вӧлін, а ӧні... Егор Филиппович! Мед кӧть папа ӧдйӧджык воас! Висьталан — оз эскы...

Бара тавой Егорлы чорыд кажитчис нарйыс. Бергаліс, эз узь.

* * *

— Пашка-а! — Аэропорт мыльк вылӧ нуӧдысь трӧпаті чой паныдыс котӧртігтыр горзіс Егор да шенасис кинас. — Пашка-а!

Валерия эз кольччы сыысь, тшӧтш шенасис еджыд шляпанас, горзіс батьыслы:

— Пап-ка-а!

Пашкалӧн киас гудӧк, мышкас ноп, бокас полевӧй сумка, кепкасӧ тшапитчӧмӧн пуктӧма юрас. Вочаасисны кык друг, сідз шымыртчисны ӧта-мӧд дорас. Чайтісны: дыр оз аддзысьлыны, а со, бара ӧтлаынӧсь!

Кычипи моз окасис батьыскӧд Валерия да мыйкӧ дугдывтӧг тольгис-висьталіс. Сэсся ставӧн веськӧдчисны канторалань.

Олег Александрович регыд и Егорлысь юаліс Поздеевкаын олӧм-вылӧм да удж йылысь.

— Поздеевкаад... — Егор ланьтыштліс, мӧвпыштіс, кыдзиджык висьтавны, мед дженьыда вӧлі и ясыда. — Десятник Коржов висьмӧма, шурфыс ваӧн тырӧма, насос жугалӧма. Зонъясыс уджтӧмӧсь шӧйтӧны, — лыддьӧдліс Егор да водзӧ нуӧдіс сёрнисӧ: — Ог тӧд, ті мый шуанныд, но ме вӧр пӧрӧдны ставнысӧ сувтӧді. Ме локті тӧрыт, талун ичӧтика пукалышті нин копёр проект вылын.

Помаліс Егор ассьыс висьтсӧ, видзӧдліс начальникыс вылӧ. Олег Александровичлӧн кӧрсьыліс кымӧс кучикыс:

— Весигтӧ?! — кайтыштіс сійӧ. — Аддза, ас вӧляа тэ зонмыс. Индӧдъяс он виччысь. Тайӧ бур. Но... А тэ тӧдан, лесничество миянӧс самовольничайтӧмысь вермас штрапуйтны.

— Кыдзи штрапуйтны? Мыйла?! Асьныд жӧ ті шуинныд: шахта стрӧитны пӧ колӧ босьтчыны дзик пыр! Вӧртӧгыс нӧ кыдзи шахтасӧ стрӧитан?

— Ог суссьы: шуи. И тӧда — вӧр колӧ. И ошка тэнӧ: абу падмӧмыд, петан туйсӧ аддзӧмыд. Дерт, жаль вӧрыс... Тундрасӧ водзӧ паськалӧмысь пыкӧ. Но колӧ. Тэ, том другӧ, лючки гӧгӧрвоан ассьыд могъястӧ.

Эз, нинӧм сэки эз гӧгӧрво Егор. Мудрӧй кывъяссӧ геологлысь вежӧртіс ёна сёрӧнджык, верстьӧ мужичӧйӧн нин. Кор збыльысь пондіс аддзыны, кыдзи Коми муысь бырӧдалісны гажа ягъяссӧ, тыртісны сӧдз юяссӧ, тундралысь веж веркӧссӧ кулисны тракторъяслӧн гусеницаясыс.

* * *

Сійӧ жӧ рытнас кантораӧ чукӧртчисны экспедициялӧн став юралысьыс: механикъяс, мастеръяс, бригадиръяс да весиг завхоз и аэропортысь начальникыс.

Пока виччысисны медыджыдсӧ, Олег Александровичӧс, — сійӧ манитчыштіс аслас жырйын — чукӧртчӧм йӧз шмонитісны ас костаныс. Торъя варов вӧлі уска дядьӧ. Бӧрыннас Егор тӧдмаліс — тайӧ главнӧй механик. Сійӧ сёрнитіс кыскасьысь Юлай гӧлӧсӧн да жерйӧдліс вомсӧ:

— На круги выходи, много речь не говори. На одной нога стой.

Егор да Паша пукалісны орччӧн, торйӧнкодь мукӧдсьыс. Гортса дӧрӧм-гачаӧсь, торъялісны спецовка паськӧма татчӧс войтырсьыс.

— Вот, тӧдмасьӧй, — ас жырсьыс петӧм бӧрын пыр и шыасис Олег Александрович да индіс кык друг вылӧ. — Выль том специалистъяс воисны, шахта стрӧитысьяс. Егор Филиппович Карманов да Павел Васильевич Моторин. Кыдз шуасны, любитӧй да жалуйтӧй... А чукӧрті ме тіянӧс ыджыд сёрни вылӧ. Шурфъяс миянлы ёнасӧ нинӧм эз сетны. Шуӧма кык разведывательнӧй шахта стрӧитны. И, кыдз позьӧ, ӧдйӧджык. Ӧдйӧджык. Тайӧ абу сӧмын менам кӧсйӧм, а вылісянь приказ. Вот тадз... Егор Филиппович талун пукалыштӧма нин шахтнӧй копёр проект вылын.

Тайӧс шуигӧн сійӧ видзӧдліс кыкнан зон вылас, сэсся чӧвтіс синвидзӧдлассӧ завхоз да эсійӧ шмонлив дядьӧ вылас.

— А тіянлы, Захарыч, да главнӧй механиклы дасьтыны став оборудование, мед шахта стрӧитігкежлӧ ставыс вӧлі дась: компрессор, лебёдкаяс, кабель и сідз водзӧ. Гӧгӧрвоана?..

Тайӧ кывсӧ Олег Александровичыс быттьӧ эз юав, а крепыд точка пуктіс.

— Аэропортлы уджавны лун и вой, поводдя дзугсьытӧдз став грузыс мед вӧлі местаын. Арыс оз виччысь...

Арыд эз виччысь. Паша шуӧм серти, «без объявления войны» уськӧдчис шоныд гожся лунъяс вылӧ, ӧти войӧн нюмыль-нямылькерис гожӧмсӧ. Тӧрыт на уфкайтісны жарысла брезент спецовкаа да номдӧраа йӧз, а со, войнас вежсьӧма тӧлыс, вой море дорсянь пӧльыштӧма, дай ӧти войӧн нырмунӧмны берегдорса шӧвк туруныс да бадь кустъяс вылысь коръясыс.

— Номйыс кӧть ӧні оз ло, — ю дорӧ мыссьыны лэччиг радліс ыркалӧм поводдя вылӧ Паша.

— Мӧд пӧлӧс номъяс регыд курччасьны кутасны, — шуӧ Егор. — Лымъялас.

— Кысь, тӧрыт юсьяс лэбисны да. Бӧж йылас и шоныдсӧ нуисны.

Тӧрыт лэбис и Валерия. Сёрнитчӧма быттьӧ юсьясыскӧд.

Этайӧ лысва мозыс гыӧрзьӧма и Егорлӧн морӧс пытшкас. Бурджык, мед дзикӧдз эз волы Валерияыс. Сылы нӧ мый Егорыд, сылӧн, пӧди, дас зон Ленинградас, медмичаыс, медбурыс. Но мыйта кӧть тай тайӧс он доль, сьӧлӧмтӧ он пӧрйӧдлы. Валерия дырйи праздник вӧлі быд рыт эз сӧмын Егорлы, но и став посёлокса олысьлы. Столӧвӧй лоліс рытнас клубӧн. Патефон шы улӧ ёна и танцуйтлісны. Пашка на гудӧкавліс и. А кыдз сӧмын эз ворслыны! Весиг челядьлысь гораньсӧ да «Каравайсӧ». Зэв прӧстӧйӧсь да кокниӧсь ворсӧмъясыс, а ставныслы гаж да радлун. Быдӧн артист, некод абу видзӧдысь. Мортыдлы тай колӧ, буракӧ, мед ачыс асьсӧ кыліс ворсысьнасджык. Тайӧс Ленинградса гӧстяыд зэв бура сяммыліс котыртны.

Паша сюсь синнас пыр и гӧгӧрвоӧма Егорлысь жуглясьӧмсӧ. Мыссьыны копыртчис ю дорӧ, резыштіс другсӧ кӧдзыд ванас, дэльӧдыштіс:

— Льӧбтӧ тай нӧ нюжӧдӧмыд. Бӧрддзы вай кыз синваӧн!

— Тэ вай эн из тыртӧм мельнича моз! — скӧрысь горӧдіс Егор. Койыштіс содзсьыс васӧ Пашалы мыш вылас.

— А ми Милякӧд тӧрыт окасим! — здук мысти шуис Пашка.

— Тэ жӧ тӧлысь водзті на Лина вылӧ гӧтрасьны кӧсйин! Бабник ли мый тэ?

— Но, бабник нин сэтчӧ. Ачыс окыштіс да.

— А боктӧ кӧ Хватовыс косьтас?

— Но и мый? Любов кӧ миян. Али бӧрыньтчыны тшӧктан? Омӧля тай тэ тӧдан ассьыд другтӧ!

— Татшӧмыд тэ меным абу друг, — дӧзмис Егор, ӧдйӧ косӧдчыштіс чышкӧднас, мӧдіс гортланьыс. Пашка сылы горзіс:

— Меысь кӧ ӧткажитчан, каитчыны на кутан! И со тэныд доказательство — йиа ваас купайтча! Висьма кӧ, тэ лоан мыжа, ӧтнадлы ковмас став уджсӧ вӧчны!

Егор мышкын кыліс ваӧ ызгысьӧм шы. Сылы бӧр ковмис косны берег дорӧ.

— Пашка, эн дур! Вай пет, кынман!

— Пета, дерт, ог татчӧ кольччы, — Паша ырснитіс васьыс, ыкайтігтыр уськӧдчис вартӧдны гортланьыс. Пиньясыс зяткакылісны, кор лыйыштіс-пырис канторабердса каморкаас.

— Павлуша, тайӧ нӧ нин мый? Решитін моржӧ дасьтысьны? — Повзис Олег Александровичыс.

— А, васӧ видлі, уна-ӧ градус, — вочавидзис Пашка да ыджыдалыштіс Егор вылын: — Мый сэтшӧм ньӧжйӧ вӧран? Вай ӧдйӧджык поштанник ли мый ли!

— Да, да, мыйкӧ аддзам, — Олег Александрович плавгис ассьыс пижамасӧ Пашалы мышку вылас. — Тіян костын эз-ӧ зык да вен вӧв?

— Кутшӧм секрет, — Егор киысь кос паськӧмсӧ судзӧдігмоз шешмуніс Пашка. — Шуи, мися, мӧд во ар кежлӧ шахта дась лоӧ.

— Со мый. А Егор Филиппович оз эскы?

— И сійӧ эскӧ. Ми кыкнанным эскам. Ми ӧд другъяс, ӧтмоза мӧвпалам.

Олег Александрович зэв пыдди шуис:

— Но, зонъяс, аттьӧ, менам шогӧн оланныд да. Колӧкӧ и водзджык на эштӧдам. Сійӧ ӧд, кыдзи кутам уджавны.

* * *

А уджыс муніс эз нин сэтшӧм шыльыда. Абу прӧстӧ куш тундра шӧрӧ сувтӧдны шахта, мед кӧть и ичӧтикӧс. Самолётъяс эз удитны ваявны став колана грузсӧ да техникасӧ.

Тайӧ лунъясас Егорӧс срочнӧ командируйтісны областнӧй центрӧ взрывчаткаӧн вӧдитчӧм-керӧм вылӧ судзӧдны кабалатор.

— Майбыр, карӧ волан, — завидьтіс Егорлы Паша другыс да тэрмасис-гижис письмӧ. — Карсяньыс гортӧдз быть жӧ нин ветлан-а. Тайӧ письмӧсӧ ачыд тӧдан, кодлы сетны.

— Линаыдлы гижан?

— Тӧдан да мый юасян. Вот локтан да ме тэнсьыд кута юасьны! А ӧні... Эг эськӧ кӧсйы сетны да... На... Миля тшӧктіс сетны.

— Мый тайӧ? — кабалаторсӧ босьтігмоз юаліс Егор.

— Кын вый тайӧ... Видзӧдлы мышкас, мый гижӧма! Ленинград... Кужан лыддьысьнысӧ? Адресыс сылӧн. Гиж ӧдйӧджык письмӧ — нылыс виччысьӧ. Истукан тэ...

Егорлӧн бергӧдчыштіс юрыс...

Пашакӧд сёрниыс Егорлы кыліс самолётын лэбигчӧжыс. Дерт жӧ, Паша прав. Кын мыр кодь и эм Егор нывъясыскӧд. А мый нӧ гижас письмӧас? Валерия, тэнӧ радейта? А сійӧ сӧмын сералас.

Самолётыс кӧть ёна летіс туяс, мыйӧн пуксисны, дзик пыр Егор мӧдӧдчис управлениеас. Колӧ сэсь босьтны колана документъяс да бара мӧдны туйӧ, ӧні Сыктывкарӧ нин. Олег Александровичыс сетіс вежон срок. Мӧмляйтны кӧ кутас, оз удит Сыктывкарын делӧсӧ вӧчны дай сиктӧдз ветлыны. А окота гортас волыны кӧть ӧти лун кежлӧ.

Гашкӧ, сюрс верст лоӧ ылі войвыв тундрасянь республикалӧн столицаӧдз. А со Егор ӧти лунӧн та ыджда туй вӧчис дай удитіс на пыравны командируйтӧм бумагаяснас каршӧрса ыджыд зданиеӧ. Тані сылысь видлалісны документъяссӧ, шуисны: лун-мӧд бӧрти пӧ пырав.

— А позьӧ куим лун бӧрти?

— Позьӧ и куим бӧрти, — шуисны сылы.

Егор радысла весиг вунӧдліс, мый петанінас постӧвӧй сулалӧ. Сійӧс здук кежлӧ сувтӧдлісны, босьтісны пропусксӧ. И со сійӧ прӧст.

Рӧдвуж сылӧн карад эм, Ӧндрей дядьыс. Налӧн асланыс керка. Ветліг-мунігас Пашакӧд на ордын пыр жыкруйтлісны. Гӧснеч доз кӧ дядьыслы босьтан, сёысь пасибӧ шуас, аслас крӧватьӧ водтӧдас. Юыштас да сэсся варовмас, мыйсӧ и оз висьтав. Быдлаын мортыс вӧлӧма, уна аддзылӧма. Гражданскӧй война дырйи партизанитӧма архангельскӧй да удорскӧй вӧръясын. Отечественнӧй война кадӧ служитӧма разведкаын. Ён, крепыд дядьыдлы унаысь ковмылӧма ас вылас кыскыны «языктӧ», кык «За боевые заслуги» сылӧн.

— А ті молодечьяс! Крестьянскӧй пиян лоанныд шахтёръясӧн! Шахтёр да актёр ӧткодя и быттьӧ кылӧ! Кыкнаныс боевӧй профессия! Менам Таняыд — актриса...

Сӧмын на кулакнас шенасис, а со нин бӧрдӧ. Винаыс унджык лои али гӧтыр вылас забеднӧыс босьтіс?

Гӧтырыс Ӧндрей дядьлӧн драматическӧй театрын артистка, тшӧкыда гастрольясӧ ветлӧ, ӧтнасӧн Ӧндрей дядьӧс кольлӧ.

— Мича ӧд менам Таняыд! Мырддясны ӧд, — лимзӧ дядьыс. Зонъяс бурӧдӧны сійӧс: — Тэнсьыд!?

Тешкодь дядьыс: и бӧрдас, и сералас, и йӧктас, и сьылас тэныд, сӧмын сы дорӧ пыр да эн вунӧд сулея пыртны.

Тайӧс Егор тӧдӧ, да магазинъяс пӧдлыштсьытӧдз тэрмасьӧмӧн и ньӧбасис-керис. Ӧні сылӧн зептыс кызджык воддза дорысь, позьӧ лышкыдджыка сьӧмсӧ видзны, мамыслы и бабыслы удитіс тшӧтш козин босьтны. Вермас кӧ сиктӧдзыс волыны. Арся туйыд ӧд нильзьӧма да машинаясыд лёка и ветлӧны. Ӧндрей дядьыс буди отсалас, сылӧн став шоперыс тӧдса. «Автогужтранспортын» уджалӧны.

Ньӧбасьӧм бӧрас Егор сы ордӧ и мӧдӧдчис. Кузь на и кокыс вӧлӧма дай. Ещӧ кӧ здук манитчис магазинъясад, суис сӧмын кильчӧ ӧдзӧс томансӧ. Ӧндрей дядьыс керкасӧ нин игналӧма.

— Сӧтана пызь! Егорша! Тэ нӧ кысянь кытчӧ? — Дона гӧсьтсӧ аддзӧм бӧрын воча ки вачкис дядьыс. — С корабля да сразу на бал, Егорӧйӧ! Мунам мекӧд! Ме театрӧ мӧді! Премьера ӧд талун! Таня менам герцогиняӧс ворсӧ! «Слуга двух господ».

И со Егор театрын. Пукалӧ Ӧндрей дядьыскӧд орччӧн. «Колӧкӧ, и Валерияыс Ленинградас театрын жӧ». Театрлӧн залыс ставнас шыалӧ, Ӧндрей дядьыс гӧрдӧдӧма да горзӧ «Бис!», ӧтторъя Егорлы тувкӧ бокас:

— Аддзан, аддзан! Дьяконов слугасӧ ворсӧ! Бис!

Сцена вылын артист да артистка, кык слуга, радейтчӧмысла кольмӧмаӧсь, йӧктӧны тірибобӧ пара моз. А Егорлӧн мыйлакӧ син доръясыс вазисны.

И микӧд вӧвлі коркӧ татшӧмторйыс,

Вальс йӧктыны тэ менӧ ӧтчыд бӧрйин.

Ми бергалім, кыдз бушков гумыль вӧчӧ,

И кывтім юсьяс моз, ньӧжйӧник да стӧча.

И тэнад киыд менам пельпом вылын,

А менам шудӧй — ог куж шуны кылӧн...

«Егорша, а тіян, комияслӧн, эмӧсь асланыд поэтъяс, артистъяс? Ленинградын менсьым юасьлӧны комияс йылысь, а ме нинӧм и ог куж висьтавны», — казьтыштӧ Егор нывлысь сёрнисӧ да думыштӧ: «Тайӧс кӧ эськӧ Валерия аддзыліс, эз и юась».

Туяд петан да он век чой горув исковт. Колян луннас тысяча верст мойвиис кокниа венны, а талун со лун шӧр кад нин, да Егор век туйын, дай туйыслӧн помыс на оз тыдав. Буксуйтан-буксуйтан, да петас кӧ эськӧ коркӧ машинаыс. Капот улас моторыс ставнас тіралӧ, ваыс радиаторас булькйыны-пуны кутас. А Егорлӧн шоперыс оз тэрмась, оз пузьы да сьӧлась машина мозыс. Фуфайка соснас чышкыштас ныр-вомсӧ, шуыштас сӧмын:

— Вот чӧртыд, бара сибдім.

А Егорлӧн пуӧмӧн пуӧ ставнас пытшкӧсыс. Талун да аски — ӧд кык лунӧн колӧ ветлыны рӧднӧй сиктӧдзыс дай бӧр бергӧдчыны карӧ.

Но шоперыс вежӧ васӧ радиаторсьыс, майбыр, ваыд канаваас тыр, да пуксьӧ бӧр кабинаас:

— Эн шогсьы, узьны быть воан гортад.

«Воан тай тэкӧд», — дивитыштӧ быттьӧкӧ шоперсӧ Егор. Тэрмасьтӧмсьыс, но мӧдарсянь быттьӧкӧ и завидьтӧ на, кужӧ пӧ ас пытшкас дӧзмӧмсӧ да скӧрмӧмсӧ видзны. Тӧлкыс ӧд скӧралӧмсьыд да тэрмасьӧмсьыд сымда жӧ. Со тай, бӧрын кымын машина нин коли, гӧгйӧдзыс сибдӧмны няйтас, а талӧн век жӧ мунӧ водзӧ.

Шонді лэччытӧдзыс на воисны райцентрӧ. Но водзӧ машинаыс оз мун. Егор сиктӧдз эськӧ абу нин ёна ылын, но подӧннад вой шӧрӧдз на ковмас лойны няйтсӧ.

Арся рыт. Чӧв-лӧнь. Туй ӧтар-мӧдар бокас узьӧ вӧр. А Егор сувтлытӧг мунӧ и мунӧ. И сконъясьлас, и сапӧгыс няйтас сибдылас, но сутш кежлӧ оз сувтлы шойччыны. Морӧсас сьӧлӧмыс діпкӧ, пӧсьыс синсӧ сёйӧ, а век жӧ сылы зэв долыд, ӧд регыд гортас воас.

Кор медбӧрын локтіс асланыс потшӧс дорӧ, сывйыштіс потшӧс праслӧсӧ да дыр сулаліс-ышлолаліс, нӧйтчысь сьӧлӧмсӧ шойччӧдіс. А нырисас швачкис чӧскыд пывсян дукӧн, му дукӧн да босьтӧм картупель кор дукӧн. Уна-ӧ кадыс, оз тӧд. Сиктыс узис нин, некутшӧм би югӧр оз тыдав, оз кыв нывъяслӧн сьылӧм шы ни весиг пон увтыштӧм. Но мамыслӧн ӧшиньыс мыйлакӧ биа.

«Мыйла нӧ та дыра оз узьны?»

Сійӧ юалӧм вылӧ быттьӧ вочакыв, кильчӧыс гуль-гольмуні, кодкӧ, кылӧ, петӧ. Петісны пӧнара кык нывбаба. Ӧтисӧ Егор дзик пыр тӧдіс. Тайӧ вӧлі мамыс. А вот мӧдсӧ Егор некысь на эз аддзыв.

Мамыс шуис:

— Пемыд жӧ арся войыд! На, пӧнарнас, аканьӧ, мун.

Мӧдыс сылы вочавидзис:

— Аски бара на вола. Ме, мый верми, вӧчи, а сэсся ог тӧд... Войсӧ, гашкӧ спокойнӧя узяс.

Найӧ сёрниысь Егор дзик пыр гӧгӧрвоис: бабыс висьмӧма. Эсійӧ тӧдтӧмыс сиктса пельшӧрича, буракӧ.

«Сӧлӧ бабыс висьмӧма!» — Уськӧдчыны эськӧ керкаас, бабсӧ кутыштлыны да окавны. Но вермас ӧд мамсӧ да пельшӧричасӧ повзьӧдны, друг кӧ немвиччысьтӧг уськӧдчас. Корсис зепсьыс папирос да истӧг, пестіс чигарка, мед би югӧрыс эсыйӧяслы тыдавмӧн дзулснитас. Сылысь би югӧртӧ пыр и аддзӧма сюсь синма пельшӧричаыд, чилӧстіс:

— Ой, шыш, тыдалӧ, эстӧн потшӧс саяд!

— Тайӧ ме, мамӧ, ме, Егорыд! Энӧ повзьӧй!

— Бласлӧ кристос! Муса пи, Егор, тэ ли мый? — ымӧстіс мамыс.

— Ме. Локта со, муртса машина вылысь чеччи... Няйт тупыль кодь.

* * *

Мамыс лимзіс-бӧрдіс да дасьтіс муса пиыслы сёян-юан, ваяліс пызан вылас. Паччӧрсянь кыліс бабыслӧн сьӧкыд лов шыыс. Егор видзӧдіс баб вылас да эз лысьт весиг лолыштны, непӧштӧ кисӧ малыштны муса бабыслысь. Лӧнис кӧ, мед узяс...

— Тэнӧ пыр на гаралӧ, сьӧлӧмшӧр дитякӧд пӧ прӧститчытӧгыс и кула, — висьтасис мамыс. — Тайӧ ме радысла нин бӧрда. Тэнӧ со Енмыс вайис. Дыр-ӧ кежлӧ нӧ кӧть воин?

— Аски чӧлӧй лун лоа тіянкӧд, мамук да бабук! Картупельтӧ босьтны отсышта, пывсян ломтылам, бабукӧс пывсьӧдам.

Татшӧм кывъяссьыс мамыслӧн бара и нормис сьӧлӧмыс, синва сорӧн и кайтыштіс:

— Ок, пиук, ӧти лун кежлӧ инӧ сӧмын? Бур кывсьыд аттьӧ, а бабтӧ пывсьӧдысьыс эм, суседъяс отсалӧны. А картупельтӧ ставсӧ ачыс на бабыд босьтіс, ме рыт-асывнас сӧмын петыштлі, луннас колхоз удж вылын... Мыйысь и висьмис бабыд, биалӧ нёльӧд лун нин. Уколъяс и быдӧн першалка вӧчӧ. Господь тӧдӧ, ловзяс ли оз сэсся... Ас йывсьыд сэсся, ас йывсьыд, пиук, висьтав. Миян ӧд тані мый, олам со. А тэ кыдзи? Письмӧад кык кыв и сӧмын гижан да.

Егорлӧн кынӧмыс ёна сюмалӧма, панясис азыма да висьтасис мамыслы. А паччӧр вылас муса бабукыс пошиктіс сьӧкыда, и таысь кажитчис ставнас керка пытшкӧсыс жугыль да гажтӧм.

* * *

Чеччӧм пырысь мамыс Егорӧс нарадитіс пывсян лӧдсавны, котӧртлы да пессӧ пӧ ещӧ сюйышт. Ачыс ноксис пач водзас, пӧжаліс шаньга.

Егор котӧртіс пывсянас. Горсӧ лӧдсыштӧм бӧрын бура дыр сулаліс пывсян бокас. Колхознӧй йӧрын босьтісны картупель, морт комын ноксьӧ му вылас. Со, вӧла-телегаа кыскалӧ картупельсӧ. Ямщикыс ныв, зэв мылаа сьылӧ. Абу-ӧ воча чойыс, Лина?

— Эй, чоюк! Лина-а!

Ямщик сувтӧдіс вӧвсӧ, видзӧдліс чуксасьысь вылас, сэсся тай чеччыштіс телега вывсьыс, резны кутіс Егоръяс пывсянлань.

— Чолӧм, вокӧ! Кор нӧ воин?

— Тӧрыт войнас вои.

— А Моторин Пашыс эз лок? Ме эськӧ сылы... локтас кӧ, петкӧдла!

— Мый нӧ сідз скӧрмин?

— Он тай скӧрмы... Кӧсйис быд лун гижны, а ӧти письмӧ на эз волы.

— Ме сьӧрысь ыстіс. Тэ сулав тані, ме чожа петкӧда.

— Ог и тӧд, лыддя ог сылысь письмӧсӧ. Вӧлӧма и бырӧма! — ярскӧба шуис ныв да весиг Егор вылӧ бугжыльтчыліс.

— Меным тшӧктіс, да сета-а. Лыддьы кӧть эн сэсся, — серӧктіс Егор. — Ыстіс да — лыддьы. Вочакыв гиж и.

— Вочакывйыд эськӧ сылы — пигу! Верман висьтавны: мӧд во отпускас воигкежлӧ пи вая. А сэсся нинӧм. Вунӧдӧма пӧ! — горӧдіс Лина да кыкнан кинас тупкис чужӧмсӧ, котӧртіс бӧр вӧлыс дорӧ.

— Лина, ме ӧд аски бӧр нин муна! — горзіс Егор, но чоюкыс эз весиг бергӧдчыв.

Рытъявылыс Лина ачыс локтіс Егоръясӧ.

— Вай, письмӧ тай шуин, — порог воськовтігкостаыс и горӧдіс. Егор буретш тайӧ кадас сёрнитіс бабыскӧд, сулаліс паччӧрас каян пос вылын. Киас кутіс выль мича чышъян.

— Сьӧлӧмшӧрӧй, тэ тай инӧ кывлін менсьым висьӧмӧс да нарошнӧ воин? — сьӧкыда кашкиг-лолалігтыр юасис бабыс да чунь помнас малаліс внукыслысь козин чышъян помсӧ.

— Да, бабук, да, нарошнӧ вои. Самолётӧн лэби. Аски бӧр муна, но ме ещӧ вола на, — воча кайтіс бабыслы Егор да малаліс бабыслысь чужӧмсӧ, пельпомъяссӧ.

Бабыс никӧстӧмӧн бӧрддзис.

— Тэнӧ аддзылі да ӧні позьӧ и кувны. Сӧмын мамыд жаль: ӧтнас кольӧ... Ок-ок-ок...

Баба-внукалысь сёрнисӧ кывзыштӧм бӧрын Лина шыасис:

— Пыри ӧд висьтавны... Аски бӧр нин мӧдан да, мися, мыйӧн и мунас? Машинаясыд ӧд ӧні зэв шоча ветлӧны. Лавка дорын кык машина ӧні сулалӧ, тӧвар вайӧмны. Мун ветлы да и юавлы, кор бӧрсӧ мӧдасны.

— Чоюк, тэ чоюк! Пасибӧ ме вӧсна тӧждысьӧмсьыд. Ме инӧ котӧртла, а тэ пукышт бабӧкӧд.

— Райпоса машинаяс... Тарыт мӧдӧны... Менӧ босьтны кӧсйисны... — юӧртіс Егор воӧм бӧрас.

Мамыс пырис йикиӧсь фуфайкаа, кушенча кепыся:

— Мый нӧ?

— Мамук, машина сюри. Ме пета тарыт. Аски сюрас оз-а...

Мамыс сӧмын сяммис горӧдны:

— Бӧр нин мунан?!

Тэрмасьӧмӧнкодь и лои Егорлӧн гортсьыс петӧмыс. И некор на сылы эз вӧв татшӧм шог, и некор на эз нормыв татшӧма сьӧлӧмыс. Пукаліс нин машина кабинаас, зумышкодь шоперкӧд орччӧн, а син водзас сідзи и верзисны сьӧкыда лолалысь бабыс да вошӧмкодь мамыс.

Бӧрас дыр на Егор каитчис тадзсӧ, тэрмасьӧмнас гортсьыс петӧмысь. Но сэки сылӧн, том зонлӧн, комсомолецлӧн, уджыс вӧлі медся-медся главнӧйыс.

Сӧлӧ баб кулӧм йылысь юӧрыс регыд и воис Егорлы экспедицияас. Петан войнас и кулӧма.

Сійӧ жӧ письмӧ пытшкас вӧлі гижӧдтор и Лина чойсяньыс. Муса вокӧ пӧ, эг удитӧй волігад сёрнитыштны и гижышта кӧть кыв-мӧд. Моторин Пашсӧ пӧ эн жӧ ёна эльт ме вӧсна. Абу сійӧ мыжа, ачым мыжаыс. Тӧді: абу ме сылы, велӧдчӧм мортыслы, пара. Ме и сійӧн шуда, мый сійӧс радейтлі да кага сысянь лоӧ. Ме и ӧні нин ичӧтиксӧ любита. А быдтыныыс кыдзкӧ быдта жӧ...

* * *

Локтіс Егор экспедицияас урчитӧм срокысь лунӧн водзджык. Локтіс дзик мӧд мортӧн. Сылысь вежсьӧмсӧ Паша другыс, дерт жӧ, гӧгӧрвоис.

— Тэ, Егорша, мыйкӧ зэв зумыш. Олег Александрович, со, аддзан, кутшӧм дӧвӧльнӧй тэӧн. А тэ... радлыны колӧ! — Пашалӧн вомыс шешвидзӧ.

Егор чӧвтліс сы вылӧ жугыль видзӧдлас, ышловзис:

— Эх, Пашка, оз радлыссьы: мамӧ кыз синваӧн бӧрдан коли... Тэ кӧ ветлін, кӧть гажӧдыштін Линатӧ-а.

— Тэ гортӧдз волін? Мый сэні? Кыдзи олӧны? — ылӧсас юаліс Пашка.

— Олӧны, — бара ышловзис Егор. — Нянь вундӧны да вартӧны, картупель босьтӧны, тшак вотӧны. Мый ещӧ тэд колӧ?

— Тӧдан ӧд мый — письмӧ!

— С-сійӧ вот и абу! Эз удитны гижнысӧ — некор. Гӧснеч мамыд ыстіс.

— Да ладнӧ, Егор, вай письмӧсӧ!

— Шуӧны: абу.

— Збыль?

— Збыль.

— Но, сідзкӧ... Босьта дай вот гӧтрася Миля вылӧ!

— Давай, гӧтрась. Свадьбуйтам кӧть.

— А мый огыс. Тэ кӧть друг, а татшӧмторсӧ тэнсьыд ог жӧ кут юасьны...

Орчча жыръяс, кантораас кодкӧ пырис, и другъяслӧн сёрниыс та вылын торксис.

Олег Александровичыс вӧлӧма. Сыкӧд тшӧтш кантораас пырис кӧр видзысь паськӧма дядьӧ. Шапкатӧм, ружьеа. Олег Александрович индіс скамья вылас, шуис тӧдтӧм дядьыслы:

— Пуксьӧй, ме кывза тіянӧс.

Мӧдыс тэрмасьтӧг лэдзис ружьесӧ мыш сайсьыс, пуктіс скамья вылас, ачыс эз пуксьы, пондіс жӧдзны места вылас. Шылькнитіс кымӧс водзсьыс юрсисӧ, шыасис:

— Дак ме мый кӧсйи шуны... Некорошо это. Весь поверкносьт Сьӧд ты рыбка плавает верк брушком. Амонал глушил. Еда нету — почему однако вся рыбка не собрал? Еда нету, почему начальник нам не собшал? Бери мясо! Есть мясо!

Та бӧрын сійӧ бара шыльӧдыштіс юрсисӧ, ставыс пӧ сэсся менам, помалі пӧ ме.

Олег Александрович оліс чӧв, зыраліс чунь помнас кымӧссӧ. Суитчис Пашка. Сійӧ нин оз вермы ланьтӧмнад овны. Ӧдзӧс пырыс и юаліс:

— А мыйла чайтан, мый ми черисӧ глушитім?

Юаліс Паша комиӧн, но дядьыд мыйлакӧ вочавидзис бара жӧ рочӧн. Буракӧ, мед начальникыс тшӧтш кылас:

— Оленевод амонал нету. Экспедиция есть. Сто верс деревня тоже нету.

Пашалӧн суитчӧмыс, тыдалӧ, эз кажитчы Олег Александровичлы. Сійӧ чӧвтліс стрӧг видзӧдлас ӧдзӧсас мыччысьӧм зонъяс вылӧ. И Паша да Егор сэсся пӧдласисны асланыс жырйӧ. Но Олег Александрович регыд и пырис на дорӧ. Бара заводитіс чуньнас зыравны плешсӧ. Зонъяс тӧдӧны нин: зыралӧ кӧ плешсӧ, сідзкӧ, мыйкӧ сьӧкыдтор мӧвпалӧ.

Шыасис кыкнан вылас дзоркнитлӧм бӧрын.

— А ті, том ёртъяс, мый шуанныд? Коді вермис взрывчатканас дурны? Ме эг виччысь татшӧмторсӧ.

— Ме ог тӧд, — вочавидзис Егор.

— Колӧкӧ, бурӧвикъяс либӧ геофизикъяс. Миян — некод эз. Ме амоналнас ачым сӧмын вӧдитча, ачым личнӧ быд шпур зарадита и, — шуис Паша.

— М-да-а, — кузя ышловзис Олег Александрович, сэсся дзик нин мӧд гӧлӧсӧн содтіс:

— Ладнӧ, зонъяс... Босьтӧй гудӧкнытӧ да петӧ гуляйтӧй. Ті — рекрутъяс. Тіянӧс призывайтӧны.

Егорысь да Пашаысь кындзи, экспедицияысь ещӧ кык зонмӧс призывайтӧны: ӧтиыс налӧн проходчик, мӧдыс геофизикъяс партияысь. Та вӧсна ичӧтик посёлокад ставныс нин тӧдісны зонъяслысь мунӧмсӧ, да рытнас ставныс чукӧртчӧмны столӧвӧйӧ, коді дзик пыр жӧ лоліс клубӧн и танцплощадкаӧн. Дугдывтӧг бергаліс пластинка «Что, друзья, случилося со мною, обломал я всю черемуху весною...», да пӧсь петтӧдз гажаа шыркйисны-бергалісны параяс. Сы вӧсна, мый нывъяс посёлокын абуӧсь, пусьысь Миля да медсестра Клава — кӧть верӧс сайын нин Клаваыс, быд рыт том гозъя волӧны гажӧдчыны клубӧ — дугдывтӧг ӧти зон киысь вуджӧны мӧдӧ. Паша петіс клубӧ «хромканас». Заводитлас няжгыны вальс либӧ танго, но бӧр лӧньӧ. Егор пукаліс Пашакӧд орччӧн, гажтӧмтчис. Сы дорӧ, паськыда нюмъялігтыр, воис Хватов, мичаа копыртчыштліс, кайтыштіс:

— Десятник, кора тіянӧс составитны мем партия. Тайӧ благороднӧй тангосӧ кӧсъя благороднӧй морткӧд и танцуйтны. «Утомлённое солнце нежно с морем прощалось...»

Егор чеччис, джодж шӧрӧ петӧмкӧд заводитіс сёрни:

— Но, Томас, ме чайті: тэ сӧмын нывъяс вылын ыджыдавны кужан, а со вӧлӧм, кутшӧм мастера йӧктан!

— Начальник, ті эсійӧс, коркӧя столӧвӧйсатӧ, век помнитанныд? Бросьте! Ичӧтик психологическӧй атака кодь Миля вылӧ вӧлі!

— Висьталӧны, и десятник Моторин вылӧ психологическӧй атаканад уськӧдчылӧмныд, — серӧктіс тшӧтш и Егор.

— Да кыдз тіянлы шуны, вӧлі ичӧтика. Но ме гӧгӧрвои: милашка Миля ачыс аслыс другсӧ бӧрйис. И колӧ чайтны: ті мунанныд, да Миля бӧр на мелань бӧжсӧ бергӧдас. А мыйла оз? Ме — зон симпатичнӧй...

Друг зал пасьтаыс кыліс Пашалӧн гудӧк шыыс да гӧлӧсыс:

Видза коляд, зонъяс, менам другъяс,

Видза коляд, муса нывъяс ті!

Аски тась ме кыакӧд тшӧтш муна...

— Внимание! Сольнӧй номер! Исполняйтӧ миян пыдди пуктана десятник Павел Моторин. Сійӧ жӧ — миян призывник. Кывзам сылысь тары-бары-растобарысӧ!

Тайӧ Хватов. Эновтіс Егорӧс джодж шӧрас, ачыс тшапа лэптіс кисӧ да раз-мӧдысь пырк-пырккерис кокъяснас чечётка.

Сюв-сявмунісны йӧктысьяс, бӧрыньтчисны стенланьыс, пондісны кывзыны Пашалысь сьылӧмсӧ. Паша сьыліс помӧдзыс, сьӧлӧмсяньыс, пӧся. Сэсся пуктіс гудӧксӧ скамья вылас, мӧдіс джодж шӧрланьыс, кӧні артист моз век вежнясис-сулаліс Хватов.

— Тэ... — Пашалӧн кабыртчис кулакыс. — Ноко повторит, мый ме сьылі! Тары-бары? Тэ, рӧдтӧм-вужтӧм лэбач, лысьтан серавны менам кыв вылын!

— Десятник, тэ мый? — мышлань петитчигтыр мичаа вашмуніс Хватов. — Ме тэнӧ афишируйта, кыдз шуасны, а тэ... Брось...

Паша сылы зутшкис кулакнас кынӧмас:

— Эн жерйӧдлы пиньтӧ, эн! Гад тэ! Кыш татысь! А то нӧшала, да армияӧ пыдди менӧ тюрмаӧ пуксьӧдасны!

Пашалӧн, тӧдчӧ, пуӧ скӧрыс, дась збыльмӧдны грӧзитчӧмсӧ. Хватов тайӧс бура аддзӧ да мый вермӧ бӧрыньтчӧ зонъяслань.

— Вежӧгтан? Да оз ков меным тэнад нылыд!

— Тэ эн вежӧгтӧм вылад ассьыд мыжтӧ вешты! — Паша уськӧдчис кыкнан кулакнас Хватов вылӧ.

Эз кӧ зонъяс сійӧс кутны, ыджыд и кось лыбис. Егор некор на эз аддзыв другсӧ татшӧм скӧрнас да кыскис сійӧс ывлаӧ.

Тадзи и гажа рытыс торксис. Кӧть и лидерыс, Томас Хватов, збодера на горзіс джодж шӧрас: — Друзья! Нинӧм лёкыс эз ло! Дамскӧй вальс! Дамаяс, босьтӧй кавалеръястӧ!

Клубысь петӧм бӧрын Егор шыасис Паша дорас:

— И мый тэ эсійӧ свист дорас крукасян?

— Мый крукася? — Паша бара пузис да пондіс нетшкысьны Егор дорысь. — Мый крукася? Тэ чайтан: сійӧ сӧмын свистун, хвастун, балалайка десять струн? Ого!.. А тэ тӧдан, коді Сьӧд тыас пакӧститчис? Тшук тайӧ, сэсся некодлы! Ме Олег Александровичлы висьтала, мед кӧть мый мекӧд вӧчас!

— Энлы, энлы... — торкис сійӧс Егор. — Тэ скӧр йывсьыд сідз шуан, али эм доказательство?

— И доказательство эм! Рытывбыд думайті... Уси тӧд вылӧ... Помнитан, висьтавлі, мися, талун патронъяс ӧткажитісны? Ме ӧні гӧгӧрвои: эз ӧткажитны, а зарадиттӧмӧсь вӧліны!

— Кыдзи? Тэ жӧ шуин: ачым пӧ быд шпур зарадита. Гашкӧ, Хватовыскӧд ӧтув взрывчатканас пакӧститчинныд?

— Ме? Сыкӧд? Да тэ мый? Прӧста сійӧ менӧ ылӧдіс! Вот гад... Отсасис ӧтчыд... Техническӧй резинаыс сэк эз вӧв, вӧдитчим, но эсійӧн... аптекасанас. Зонъяс гадь пӧльтісны, сералісны нывъяс вылын. А сійӧ, Хватовыс... Мый нӧ сераланныд, абу пӧ ӧд войпук вылынӧсь. Мем пӧ сэтшӧм интереснӧ взрывникыслысь уджсӧ видзӧдлыны, босьт пӧ менӧ, десятник, отсалышта пӧ.

— И тэ босьтлін?

— Вӧзйысьӧ да. Эг ӧд чайт: сэтшӧм мудера ылӧдас.

— Ок, Паша, мыйла эн висьтав Олег Александровичыслы сразу?

— Эг на ӧд сэки тӧд. Ӧні сӧмын тӧд вылӧ уси, кор эсійӧ артистыс тшапа кутіс кинас шенасьны. Мездінныд, эськӧ дубаситі гадӧс!

— Эн сёрнит нинӧм абусӧ. Мед эз вӧв кинад воӧма. А вот мед ачыс, Томасыс, пӧкаитчас, кыдзкӧ колӧ вӧчны. Вермасны ӧд шуны: вежӧгтӧм радиыс Хватов вылас индӧ Моториныс. Ок эськӧ жӧ да... Мун, то эстӧн Миляыд тэнӧ виччысьӧ. Вай гудӧктӧ ме пырта.

* * *

А весьшӧрӧ татшӧм рытсӧ и чукӧртлісны, весьшӧрӧ торйӧдчисны да янсӧдчисны. Призывнӧй пунктӧдзыс и ветлісны сӧмын зонъяс. Кык лун бӧрти бӧр самолёт найӧс вайис. Бергӧдӧмаӧсь найӧс, сетӧмны бронь. Татшӧм специалистъясыс пӧ экспедицияыслы колӧныджык.

Олег Александрович радліс: оз ков корсьны выль специалистъясӧс. Но ӧні аслас десятникъяскӧд сёрнитігӧн видзӧдліс дырджык зонъяс вылӧ.

«Эсійӧ кӧр видзысь дядьӧ волӧм бӧрад оз эскы ӧні миянлы», — пыр и мӧвпыштіс Егор да юксьыштіс Паша другыскӧд.

— А тӧдмалас Олег Александровичыс менсьым мыжӧс дай вытуритас Ыджыд му вылӧ, — маитчыліс Паша. — Кыдзи ме сэні кута овны? Радейта ӧд збыль Миляӧс. Сы вӧсна, чӧрт вӧсна и менам став шогӧй лои. Чайтан, эсійӧ Томасыс водзӧ вылӧ оз кут пакӧститны? Оз тай...

Тадз сёрнитігас Пашалӧн чужӧмыс вӧлі серам петмӧн тешкодь. Егорлы сійӧ жаль лои и сэк жӧ серамыс петіс.

— Но, Пашка, нывъяс вӧснаыд ӧні сэсся бӧрд!

— Эн дэльӧдчы! — Паша зэв ёна скӧрмис.

— Ладнӧ, ог кут, ог. А Олег Александровичыдлы быть ковмас висьтавны. И Миля вылад быть жӧ гӧтрась, он кӧ сытӧг вермы овныс. А Линаыдлы алимент мынтыны кутан.

— Но кута, кута! Татшӧмӧс кӧ мамӧ менӧ чужтылӧма. Тэныд лӧсьыд, нинӧм он гӧгӧрво любовсьыс да...

* * *

Рытнас найӧ, кыдзи и пыр, ворсісны шахматӧн. Егор Олег Александровичкӧд пукалісны кантора пызан сайын, Паша сэн жӧ матькигтыр вурис орӧм пинжак кизьсӧ.

— Но, другъяс, торйӧдны ме тіянӧс кӧсъя, — друг шыасис зонъяс дорӧ Олег Александрович. — Егорша, шах тэныд!.. Кыдз тэ чайтан, кодӧс татчӧ кольны, а кодӧс Поздеевкаӧ мӧдӧдны?

— Абу на шах, менам конь на эм! — Егор вештіс фигурасӧ да вӧлись сетіс начальникыслы вочакыв:

— Мем кӧть кытчӧ. Ӧткодь.

Дзик пыр шыасис и Паша:

— А мем быттьӧ абу веськодь!

Но кизь вурӧм бӧрас сійӧ век жӧ вӧзйис:

— Вай пудъясям.

Поздеевкаӧ мунны пудйыс уси Егорлы.

— А ме кольчча татчӧ! — Пашалӧн вомыс радысла пельӧдзыс паськаліс. Олег Александрович зэв мудера нюмдіс сылы. Сійӧ ӧд тӧдтӧг эз ов, мый пусьысь Милякӧд Пашалӧн роман. А Егорлы шуис:

— Да, Поздеевкаӧ тӧвнас туй оз ло. Оборудование и сёян-юан нуны сэтчӧ лоӧ зэв делӧ. Давай, Егор Филиппович, вничью помалам да, гашкӧ, сы йылысь и сёрнитыштам.

Паша, визув мортыд, пыр и шыасис:

— Вот эськӧ сэтшӧм самолёт кӧ вӧчны, мед вайӧдіс тэнӧ любӧй местаӧ дай лэдзис муас. Сідз жӧ и грузъяссӧ. Вот эськӧ олӧмыд вӧлі.

Олег Александрович дзоркнитліс Паша вылӧ, нюм-сермуніс:

— Сэтшӧм самолётсӧ, буракӧ, мӧвпыштӧмны нин. Вертолёт кутас шусьыны. Но кор на сійӧ лоӧ. А миянлы ӧні колӧ, кыдз шуасны, мый эмнас уджавны. Ок, оз ло кокни тӧвйыны ни Поздеевкаын, ни тані.

* * *

Поздеевкаын тӧвйӧм йылысь Егор вежӧрӧ кольӧма яръюгыд би чутъясӧн куим ыджыд лоӧмтор. Не кӧ быттьӧ лыддьыны быдлунся мырсьӧм-пессьӧмсӧ. Шуам, сійӧ выль барактор — юр сюянін лэптӧмсӧ. Гырысь турӧбъяслысь дурӧмсӧ? Ӧд ковмыліс весавны лым толасӧ эз сӧмын кильчӧ помысь да шахта стрӧитанінысь, но унаысь ковмыліс писькӧдны и туй тракторлы, коді вайліс колана груз шӧр базасянь.

Ноябрскӧй праздник водзвылын друг векӧвешнӧй чӧв-лӧньсӧ Поздеевка гӧгӧрса вӧръяслысь торкис трактор ургӧм шы. Воис ас кокнас татчӧдз! А кутшӧм колана груз тракторыс вайис! Компрессор! Ӧні кутасны му пытшкас пырны топӧдӧм сынӧд отсӧгӧн. Абу тайӧ кайлӧнад из перйӧмыд.

Тшӧтш воисны и отсасьысьясыс, нёль том ён мужик.

— Выль вынъяс вайи, проходчикъясӧс, — йӧз вылӧ индігтыр шуис главнӧй механикыс. Сійӧ ачыс и трактор руль саяс пукаліс. — Эм приказ — личӧдчытӧг, кыдз позьӧ ӧдйӧджык помавны разведывательнӧй уджъяс. Кутасны куим сменаӧн уджавны.

Егор нинӧм эз вочавидз. Сійӧ аддзис выль воӧм йӧз пӧвстысь Хватовӧс. «Сійӧ нин мыйла татчӧ воӧма?»

— У-у, Карманов ёрт! Чолӧм-здорово! Аддзан, тіян дорӧ ковмис локны. Сэні нӧ верман овнысӧ...

— Но, воин кӧ, и уджав, — кӧдзыдакодь и артмис Егорлӧн. — Сӧмын водзвыв шуа: тані оз артмыны тэнад фокусъясыд.

— Кутшӧм фокусъяс, десятник? Клубсьыд коркӧятӧ ли мый шуанныд? Но сэки ми, ачыд аддзылін, эг тышкасьӧй.

— Тані бара кутан взрывчатка гусявны да фейерверкъяс тыяс вылын вӧчавны?

— Десятник, сійӧ пустяк вӧснаыс выжывитісны нин менӧ татчӧ дай тані бара та йылысь! А кӧсъян кӧ тӧдны, дзик мӧдторйысь ӧд бӧчкасӧ ме вылӧ быгыльтӧны. Моторин аслас пӧварика дорӧ вежӧгтӧ. А Олег Александрович сылы пӧтакайтӧ. Сы вӧсна, мый сылӧн аслас ныв эм. Х-хи, х-хи, йӧз серам! А кӧсйи кӧ быттьӧ, Ленинградса нылыд меным пӧперега кыв эз шу. Любитчӧма вӧлі пель йылӧдзыс. Но ме абу на и сэтшӧм йӧй, папашаыс сылӧн зэв кузь бӧж новлӧдлӧ — 58 статья. Рӧдняасьны накӧд ог на кӧсйы...

Кыдз бара-й вермис Егор кутчысьнысӧ-а? Эз ныр-вомас вачкы суклясьысьлы и весиг гӧлӧссӧ эз лэпты. Стрӧгакодь, но спокойнӧя и орӧдіс Хватовлысь пеж сёрнисӧ. Менӧ пӧ оз интересуйт нывъяскӧд тэнад ротъялӧмыд, меным пӧ уджалысь колӧ, и шуи нин: локтін кӧ, уджав.

«Сӧрӧ, сӧрӧ, пеж лов! И Валерия йывсьыс, и сійӧ бать йылысь» — горзіс сылӧн пузьӧм сьӧлӧмыс, а кок увсьыс муыс эз тыдав, сідз пемдаммисны синъясыс.

* * *

Мӧдторйыс йитчӧма Выль вокӧд да бара жӧ Хватовкӧд. Поздеев гозъялӧн Игӧ пиыс, дас сизим арӧса зон, да Хватов Выль во водзвылын друг кытчӧкӧ вошины. Вӧлӧмкӧ, сёрнитчӧмаӧсь дай гусьӧн утьыштӧмны сиктӧ нывъяс дінӧ. Сиктӧдз, лыжи вылын кӧ веськыда, верст квайтымын лоӧ. Квайтымыныд лыжинад абу и уна. Мунісны кӧ и мед ветласны. Но коли лун дай мӧд, а гулякъяс век абуӧсь. Зонъяс шмонитӧны, гашкӧ пӧ, гӧтрасисны нин да. Но Поздеев дед скӧрмӧма пи вылас да Степанида гӧтыр вылас, мыйла пӧ юасьтӧг-висьтасьтӧгыс лэдзин питӧ. Корсьны мӧдӧдчис. Воис сӧмын аскомысьнас. Вайӧдіс гулякъястӧ. Тошкассьӧмаӧсь. Хватовлӧн горшыс пыктӧма, киргӧ.

— Ёна тай сиктса нывъясыд сӧзнытӧ нёнялӧмны! — жеръялісны зонъяс. Хватов вашкан гӧлӧсӧн дорйысис:

— Мый гӧрдланныд? Ме ӧд чайті: Игнатыс туйсӧ тӧдӧ. А некутшӧм туй абу и вӧлӧма. Сутки кружитім, тайкӧ дзикӧдз ог турдӧй. Бӧрти кер пӧрӧдысьяс дорӧ веськалім. Шонтысим, бутылкасьыс джинсӧ лои видлыштӧма и. А нывъяскӧд окасьтӧм и лои. Нямӧд Игнатыс вӧлӧма да. Сылы, буракӧ, сюри батьыссянь!

— А тэныд, чайтан, оз сюр? Десятник зэв скӧр, дай Степанида тьӧт пӧсь коколюкаӧн ойкӧдны тэнӧ кӧсйӧ.

Хватов гораа ышловзис:

— Мый ті кӧсъянныд, медым Хватовӧс эз мыжавны? Хватов пыр мыжа! Сы вӧсна, мый завидьтӧны Хватовлы! Сы вӧсна, мый том йывсьыс, йӧй йывсьыс налькйӧ шедліс Хватов. Но нӧрӧвитлӧй, Хватов ещӧ асьсӧ петкӧдлас на! И водзӧс на кодсюрӧлысь босьтас! А стӧча кӧ шуны, мед десятникыс радлас, мый ми дзикӧдз эг вошӧй. Сійӧс эськӧ эз жӧ гӧн ньылыдыс малыштны. И эсійӧс... Экспедицияса начальниксӧ.

Да, стӧча кӧ сёрнитны, Егор и збыль вӧлі рад, мый сюрины ловъяӧсь Игӧ да Хватов.

* * *

Коймӧд лоӧмторйыс, коді кольӧма Егорлы вежӧрас — тайӧ Паша другыслӧн гӧтрасьӧмыс. Нывбаба праздник дырйи, март 8 лунӧ.

Поздеевкаысь свадьба вылӧ шӧр базаӧ лыжи вылын ветлісны Егор да Томас Хватов. Хватовӧс тшӧтш корӧмаӧсь Миля да Паша.

Свадьба свадьба и эм, войбыд сьылісны да йӧктісны. А сэсся югдігас кодкӧ друг вӧзйис, вайӧ пӧ, десятник Кармановӧс да Томасӧс колльӧданмоз, Поздеевкаӧдз шырзьыштлам лыжи вылын. Невесталы тайӧ вӧзйӧмыс зэв ёна кажитчис, да гӧсьтъясыс унаӧн сувтісны лыжияс вылӧ. Жӧник да невеста и. Артмис поход. Ёна и ыззьӧмны да гажаӧсь вӧліны войтырыс! Найӧ серамысь да сьылӧм шыысь Поздеевка гӧгӧрса вӧръяс бура юргисны. А Поздеев дедлӧн пывсянын лунтыр эз и рекмывны корӧсьӧн швачӧдчысьясыс. И ведернӧй ыргӧн самӧварыс Степанида тьӧтыслӧн эз косьмыв.

Татшӧм свадьба бӧрад Хватов бара на вежон ветліс сибдӧм гӧлӧсӧн. Эз ӧд этша тешит да смешит жӧник-невестаӧс. А мыйта лои горзӧма «горькотӧ» и «Салют молодожёнамтӧ!» и «Привет участникам культурпоходатӧ!»

— Ой свист, ой артист! — довкйӧдліс юрнас Поздеев дед, ошкӧ ли дивитӧ ли Хватовӧс, он и гӧгӧрво.

Гӧсьтъяссӧ колльӧдӧм бӧрын, кор Егор коли дедыскӧд ас кежас, паніс сёрни. Мукӧддырйи кӧ, дерт, эз воссьы вомыс тайӧ сёрни вылас, но талун свадьба винанад гӧститчыштӧм бӧрын, каличыс, буракӧ, личалыштіс.

— А тӧдан, дед, мый шуӧ тайӧ артистыс миян Олег Александрович йылысь? Сійӧ пӧ... 58 статья пӧ сылӧн...

— Со тэ мый... — гыжйыштіс дедыд балябӧжсӧ да лапкис пельпом вылас ыджыд кабырсӧ. — Ме чайта, Олег Александрович кодь дас «народлӧн враг» абу сэтшӧм опаснӧ, кутшӧм тайӧ артистыс. Тӧд тайӧс да тшуп нырад. А менсьым сэсся эн нинӧм юась. Видзӧд ачыд...

Та бӧрын сэсся регыд и аскӧдыс Олег Александровичкӧд лои аддзысьлӧма да мыйсюрӧ тӧдмалыштӧма. Локыліс Поздеевкаас, сэні олӧм да удж мунӧмсӧ видзӧдлыны. Быдӧнкӧд пӧсь сьӧлӧмсяньыс сёрнитыштіс эз сӧмын удж йывсьыс, но и лов дойяс йывсьыс. Тшӧтш и Егорлысь юаліс, мый пӧ мамыд гижӧ, кыдзи олӧ да сиктас мый керсьӧ. Ме пӧ ӧд зэв на бура помнита сійӧ сиктса войтырсӧ, кӧть и кадыс уна нин кольӧма.

Сэки и Егор сылысь юаліс, ті пӧ эн ӧмӧй Чибъюӧ мунлӧй, мыйла веськалінныд Воркутаас?

— Мыйла? — Олег Александрович дыркодь зыраліс плешсӧ, сэсся вӧлись сетіс вочакыв:

— Ме, кыдз геолог, шуам, верми и сідз веськавны Воркутаад, но, стӧча кӧ шуны, менӧ сэтчӧ нулісны. Пукалі ме, Егорша.

— Кыдзи?! — горӧдӧмкодь и артмис юалӧмыс. Томдырйиыд тай мортыд веськыдджыка сёрнитӧ, озджык на куж нюглясьӧмнас.

— Кыдзи, юалан? — Олег Александрович курыдакодь нюмдыштіс. — Та вылӧ ме тэныд, пӧжалуй, ог вермы сетны вочакывсӧ. Но ме чайта... Тэ ӧд поезднад ветліг-мунігӧн аддзылін уна лыда вышка, лагпункт? Чайта, абу ставыс сэні мыжа морт да вӧрӧг. И ме ачымӧс ог лыддьы мыжаӧн. И та йылысь вай огӧ кутӧй. А вот мый йитчӧма талунъя миян уджкӧд, тэ век жӧ должен тӧдны. Ме ещӧ сэки на, экспедицияын зэк-чернорабочӧйӧн уджалігӧн, казялі, мый эм тані, миян му пытшкын, сійӧ металлыс, кодӧс ӧні ми корсямӧ. Вӧля вылӧ петӧм бӧрын, 46-ӧд воын, ме куті туйзьысьны, мед меным сетісны позянлун аслым чукӧртны экспедиция да прӧверитны тӧдмалӧмторйӧс. Пӧшти нёль во лои сы вылӧ воштӧма, но медбӧрын меным эскисны да шуисны «да». И со ӧні ачыд аддзан, ме эг ӧшыбитчы. Ӧшыбитчыны меным некыдз оз позь, чайта тэ гӧгӧрвоан менӧ... А ӧні миян мог: ӧдйӧджык тайӧ корсьысян уджъяссӧ помавны. Тэрмӧдлӧны ёна.

— А нывкаыд... Валерияыд... Тіянкӧд жӧ вӧлі али кыдз? Ме ог гӧгӧрво, — юаліс Егор.

Мӧдыс нюммуныштіс, шуис:

— Мекӧд? Кыдзи позьӧ? Сійӧс босьтліс ленинградса тьӧткаыс ас дінас.

Та бӧрын Олег Александрович лӧнис, тшӧка лысӧ ки вылас пуктӧмӧн пондіс мыйкӧ пыдіа мӧвпавны. Егорлы лои яндзим юасьӧмсьыс, асьсӧ эльтыштіс, йӧй пӧ, мыйла мый оз ковсӧ юасян. Но ӧд мӧдарсянь кӧ, Егорлы эз вӧв веськодь Валерияыслӧн олӧм-вылӧмыс. Кыдзи нӧ, ӧні позянлун лои да, юавтӧгыс олас? И Олег Александровичыс, буракӧ, эз дӧзмы юасьӧмсьыс. Сылы, колӧкӧ, и любӧ на лои юалӧмыс. Валерияыс ӧд быд письмӧын ыставліс ставыслы пӧсь чолӧм да гарыштліс и том десятникъясӧс, Егорӧс да Пашаӧс. Персональнӧй привет пӧ налы, папа, висьтав. Гашкӧ, та вӧсна и окота лои Олег Александровичлы юксьыштны зонкӧд ныв йывсьыс мӧвпъясӧн. А, колӧкӧ, батьыдлӧн ас тӧдлытӧгыс ылькнитіс сьӧлӧмшӧр дойыс. Зэв тай кузя ышловзис да кайтыштіс-а:

— М-да-а... Менам нывкалы олӧмыс удитіс нин петкӧдлыны быдсяма страсьтсӧ. Вит арӧссянь коли мамтӧг, кӧкъямыссянь — батьтӧг. Сэки жӧ и тӧдмаліс, мый сійӧ позорыс. А Ленинградас, блокадаын, тӧдмаліс, мый сійӧ войнаыс да тшыглы кулӧмыс. Да-а... петӧм бӧрын, тӧдан, ме сійӧс кытысь аддзи? Вологодскӧй обласьтысь, ичӧтик сиктын, детдомын воспитательница. А аслыс муртса дас вит арӧс тырис. Аслыс на воспитательыс коліс. Но норасьӧм ни жуглясьӧм сылӧн эз вӧв. Ой, шуас, папа, меным сэтшӧма кажитчӧ посниясыскӧд ноксьыны! Дас класс пӧ помала да быть пыра педагогическӧйӧ велӧдчыны! И пырис. Ленинградын ӧні Герцен нима педагогическӧйын и велӧдчӧ. Буракӧ, и ачыс тайӧс тіянлы висьтавліс. Ті ӧд ас кежад тшӧкыда варовитлінныд.

— Да, висьтавліс, — вочавидзис Егор кык кывйӧн. Сылы окота вӧлі Валерия батькӧд сёрнитны и сёрнитны ныв йылысь, но ӧд сёрнитысь ёртыс абу кодкӧ, ас кодь зонка, а ачыс экспедицияса веськӧдлысьыс. Уна больӧдчыны абу и лӧсьыд.

Тадзи и налӧн помасис юасьӧм-висьтасьӧмыс. Но, колӧ чайтны, тайӧ сёрни бӧрас кыкнанныслӧн ӧта-мӧдыскӧд гуся йитӧдъясыс содісны. А Валерия дорӧ нӧшта на ёнджыка кыскыны кутіс Егорӧс.

* * *

Нывбаба праздниксянь Май праздникӧдз ӧдйӧ кыдзкӧ лун-войыс и коли, лунъясыс кузьджыкӧсь и югыдджыкӧсь лоины. Шахтаысь петігӧн зонъяс пыр тшӧкыдджыка горӧдлісны:

— Шондіыс, вокъяс!

Шондіыс пыр вылӧджык и вылӧджык качӧдчыліс, яра койис югӧръяссӧ. Лымйыс сёйӧмӧн сёйис синъястӧ. Но сэсся коркӧ и ляпкысьны кутіс, сьӧдасьны. Со и войтва нин тёпкӧ лун и вой. «Двинь-двинь!» — жбыръялісны пуысь пуӧ посни лэбачьяс, асывъяснас гажа сьылӧмныс налӧн садьмӧдліс Поздеевкаса войтырӧс. Поздеев дед дасьтысис тулыс кежлӧ, любӧпырысь ноксьыліс ружьенас да шуліс:

— Регыд тар да дозмӧр койтны кутасны.

Яр шондісьыс коддзис быттьӧ вӧр-ваыс, юраліс быдпӧлӧс шыяснас. Тувсов шыяссьыс коддзӧмаӧсь и зонъяс.

— Лунвылӧ эськӧ, море дорӧ, ӧні шутёвтны! — кылӧ Хватовлӧн гӧлӧсыс.

— Помалам татысь дай позяс море дорӧ ветлыны, — шыасьӧ кодкӧ мӧд, лабутнӧй гӧлӧса. А Игӧ, кылӧ, маитчӧ:

— Ой, воксик, помасяс татысь да кытчӧ инӧ мунанныд?

Кывзыліс проходчик-зонъяслысь татшӧм сёрнияссӧ Егор да жугыльмыліс. «Да, помассяс тан уджыс, разі-пели коді кытчӧ мунас. И найӧс Пашакӧд, дерт, ыстасны бӧр комбинатас. А сэн нин сэсся индасны кытчӧкӧ. И некор сэсся Егор оз аддзыв Олег Александровичлысь нывсӧ, Валерияӧс, ассьыс мечтасӧ. Мечта — сійӧ мечта и эм, сы вӧсна и мича сійӧ да кыйны позьтӧм».

«Мыйла бара-й Антон Павлович Чеховыс шулӧма, мортыс пӧ чужӧ радлӧм да шуд вылӧ? Чужӧ, буракӧ, мортыд маитчыны, сьӧлӧмсӧ дойдавны. Но ӧд, колӧ чайтны, ни ӧти бур книга ни картина, ни керка оз артмы мырсьытӧг да маитчытӧг. Гашкӧ, сійӧ и шудыс, кор мырсьӧм-пессьӧм бӧрас артмас мыйкӧ йӧзыслы коланатор. Ӧд и найӧ вӧчӧны тані коланатор жӧ. Олег Александровичыс кымынысь шуліс: металл, кодӧс ми корсям, вежас став мирыслысь оласногсӧ. Гашкӧ, сӧстӧм тундра лист бок вылас тшӧтш жӧ лоӧ Егорлӧн гижыштӧма бур да колана серпастор».

Но тайӧ мӧвпыс, кӧть кутшӧм мича эз вӧв, эз личӧд зонлысь сьӧлӧмсӧ. Кымын уджыс воис помлань, сымын шог да гажтӧм топӧдліс том десятникӧс. Быттьӧ воштіс татчӧ мыйкӧ зэв донаӧс да сійӧс аддзӧм вылӧ надеясӧ тшӧтш. Ещӧ июль тӧлысь заводитчытӧдзыс на лои тӧдса, мый июль пом кежлӧ эштӧдасны ӧшмӧс перъян уджсӧ. А Валерияыс батьыс дорӧ, воны кӧ, волас августын сӧмын.

Томас Хватовлӧн кывъясыс сатшӧмӧн сатшисны сылы юрас. Ме вылӧ пӧ пель йывтіыс любитчӧма начальниклӧн нылыс. Дристун-хвастун кӧть Хватовыс дай, веськыда кӧ шуны, неморт сійӧ, а нылыдлысь синтӧ пӧртны кужӧ, ас колігас пеляд пыралас и чегӧм лытӧ йитас. Ныр-вомнас да туша-рожанас дультӧ петкӧдлас и. Гашкӧ и, Валерияыс збыль любитчис сы вылӧ, гижӧ сылы письмӧяс? Егор тӧдӧ: Хватовлы корсюрӧ письмӧяссӧ вайлӧны. Кодсянь, дерт, оз тӧдмав, абу ӧд шпион, татшӧм модаыс сылӧн абу. А збыль кӧ Валериясяньыс, кыдзи сылы юӧртан, мый Хватовыс син водзад кывнас мавтыштӧ да бӧрас вузалӧ. И татшӧмтор вылас сылӧн сямыс абу жӧ. Валерияыс нӧ оз вермы шуны, тэ пӧ нарошнӧ лӧсьӧдлан. Ёнджыкасӧ тайӧ помкаяс вӧснаыс и эз гиж.

А век жӧ, ӧти письмӧ Егор гижліс Солнцева Валериялы.

Шахта перъян уджыс налӧн эштіс. Коліс эновтны экспедициясӧ. Сэки и гижліс письмӧсӧ. Ыштӧ, колана уджыс эштіс, мунӧны бӧр татысь. Тайӧ юӧр дорас Егор нӧшта содтіс, мый сылы зэв лӧсьыд вӧлі овны да уджавны Олег Александрович юрнуӧдӧм улын и мый медся югыд казьтылӧмӧн кольӧ Егор вежӧрӧ Валериялӧн экспедицияас волӧмыс.

Тайӧ письмӧыскӧд ӧти самолётын лэбис и ачыс, письмӧ гижысьыс, да сылӧн друг гозъяыс Павел да Миля Моторинъяс. Тайӧ самолётас жӧ нӧшта лэбис и Томас Хватовлӧн шыӧдчӧмыс, кодӧс ыстіс Сыктывкарӧ культурно-просветительнӧй училищеӧ.

— Ыстыла, примитасны, оз, — ышнясис Хватов. — Помавны окота. Менам ӧд кык курс нин эм. Ӧні эськӧ важӧн помалі, дзескыдінас кӧ, йӧйыд, эг веськавлы.

Тайӧ шыӧдчӧм йывсьыс Егор зэв бура тӧдіс — ачыс на и ышӧдліс велӧдчынысӧ — да думсьыс кӧсйис, мед примитасны сійӧс училищеас. Збыль, Хватовлы местаыс сцена вылын, нинӧм он шу: артист.

Сэсся ӧд и, мунас кӧ, Олег Александровичлы сытӧг бурджык на лоӧ. Тадз мӧвпаліс Егор, но думыштныыс эз кужлы, мый туйвежъясыс налӧн и сэтчаньын, паськыд му вылас, паныдасясны на. И уна на маитчыны да каитчыны ковмас Хватовӧс велӧдчыны ышӧдӧмсьыс.

Думыштнысӧ Егор эз куж и сы йылысь, мый судьбаыс эз весьшӧрӧ сійӧс зурӧдлы кыкысь нин роч нывка Валериякӧд. Мый судьбаыс сылы дасьтӧ коймӧд паныдасьӧм, коді гантайтас-йитас найӧс сэтшӧм гӧрӧдӧн, мый ӧтиыслӧн мӧвпыс кыв шутӧг лоӧ яснӧ мӧдыслы, ӧтиыслӧн дойыс и радлуныс лоӧ радлунӧн да дойӧн мӧдыслы. Ӧти юлӧн кык берегнас и лоӧны. Веськыд берегыс кӧ буждӧ — шуйга берегас лыа кӧса пуктӧ...

II юкӧн

Шӧйӧвошӧм, ставнас рудзмунӧм, петіс Егор Филиппович врачкӧд сёрнитӧм бӧрын больнича кильчӧ вылӧ. Чорыда нӧйтӧм бӧрын моз. Сійӧ лэччис кильчӧ поссӧ да веськӧдчис неылын сулалысь скамьялань. Больнича пытшкас колис сылӧн медся бур да дона ёртыс, медся радейтанаыс, кодкӧд лои олӧма нин комын саяс во, торйӧдчывтӧг, ӧтсӧгласӧн.

«Валерия, донаӧй, кыдз нӧ тадз? Тэ жӧ пыр вӧлін шор кодь визув, мудзлытӧм да збой. И со тані... Больничаын. И врачьяс шуӧм серти кӧ, виччысьӧ тэнӧ пом. Збыль ӧмӧй воис кад? Дерт, коркӧ ставӧн лоам сэтӧнӧсь, но ӧні... Оз лӧсяв тайӧ некыдз. И эн лысьт, пӧжалуйста! Валерия, тэ верман, эска, верман смертьсӧ...»

Егор Филиппович пукаліс юрсӧ кыкнан кинас кватитӧмӧн да быттьӧкӧ сёрнитіс эз сӧмын гӧтырыскӧд, но и олӧмыскӧд. Кевмис, корис судьбасӧ не вӧчны сэтшӧм нелючкисӧ. Валерия — и друг оз ло! Тайӧ миритчыны позьтӧмтор. Со и ачыс шонді-мамӧыс оз кӧсйы тайӧс. Сійӧ видзӧдӧ енэжсянь, сэтшӧм меліа да лышкыда койӧ шоныд югӧръяссӧ тайӧ больничагӧгӧрса садъяс.

Баба гожӧм, ставнас зарни паськӧма, ыпайтӧ шоныдӧн. Ставыс, мый аддзӧ синмыд и кылӧ пельыд, быттьӧкӧ горзӧ: «Эз на лок сійӧ кадыс!»

Мый эм мортлӧн, коді некор сійӧс эз вузав ни пӧрйӧдлы? Паметьыд. Сійӧ быд здук тэкӧд. Видзӧдіс Егор Филиппович медводзын усьӧм ӧтка кор вылӧ, а син водзас сувтіс эз тайӧ корйыс, а дзик мӧд серпас. Лэчыд вой тӧв скӧрысь шуркйӧ-бергӧдлӧ усьысь лым чиръяс, чеплялӧ ичӧтик Егоршалысь пельяссӧ да бандзибъяссӧ. А сійӧ, Егорша, дӧрӧм кежсьыс, куш юра, сулалӧ кильчӧ помас да, шензьӧмысла калькалӧма вома, видзӧдӧ, кыдзи тӧбӧм ичӧтик нывка ошпи моз тапиктіс Егорша дінӧ кильчӧланьыс.

Челядьдырыс уси тӧд вылас. Сэтшӧм ясыда. Егор Филипповичлӧн нинӧм абу вунӧма, быд кыв, быд воськов помнитӧ аслас муса гӧтырыслысь.

Аслас шогӧ вӧйтчӧм Егор Филиппович эз и казяв, кыдзи сы дорӧ локтіс да пуксис орччӧн кутшӧмкӧ дядьӧ.

— А, другӧ, сьӧлӧмыд, тыдалӧ, дільквидзӧ жӧ менам моз. Вай куритчыштам, эм кӧ быттьӧ папиросыд, — шыасис сійӧ збодер гӧлӧсӧн. — Киӧй быдӧн тіралӧ, став лолӧй сырмунӧма и. Этайӧ ӧд врачьясыдлы мый? Огӧ на пӧ лэдзӧй гортад. А ме больничасӧ видзӧдны нин ог вермы. Пашка — толовая шашка оз вермы дыр больничаад куйлыны.

Сійӧ лӧнис, дзоркнитліс пукалысь вылӧ, кӧсйис нин дӧзмӧмӧн горӧдны: тэ пӧ мыйла он вӧрзьы ни кывпас мортыслы сет, кор сійӧ тэкӧд сёрнитӧ?

Но пукалысьыд друг лэптыштіс юрсӧ да весиг нимнас сійӧс ыдждӧдліс:

— Паша, тэ?

— Да, ме — Паша! А тэ... Энлы, энлы... Едриттвой! Егорша! — сійӧ чеччыштіс места вывсьыс, паськӧдіс кыкнан кисӧ. — Но и аддзысьӧм! Кыдзи тэ татчӧ кар-столицаас веськалін, больнича кильчӧ помас?!

— Валерия менам тані, больничаас. Кулан выйын...

Тайӧ кывъяс бӧрас Егор Филипповичлӧн артмис ымӧстӧм. Павел эз тӧд, мый шуны, да шӧйӧвошӧмӧн видзӧдіс Егорша другыс вылӧ.

Медбӧрын аддзис жӧ такӧдан кыв, шыасис збодер гӧлӧсӧн:

— Кулан выйын, шуан? Но ӧд больничаыд абу на шойна выв. Лечитасны!

— Ог тӧд, Павел...

— А тэ тӧд! Больничаад, брат, ме тэд шуа, докторъясыд вӧчӧны быдсяма дивӧсӧ! Весиг кулӧмсӧ ловзьӧдӧны. Менӧ жӧ, со, ловзьӧдісны! Со, сулала тэ водзын!

Павел кыкнан кинас малыштіс ассьыс пельпомъяссӧ, кынӧмсӧ, пуксис Егор дорӧ, кутыштліс сійӧс мышкуӧдыс, кабыртліс веськыд кисӧ.

— Сы дыра нин эг аддзысьлӧй! Тэ со мый, другӧ, мунам миянӧ! Тані пукалӧмнад сылы он отсав, а менам Эмилиялы ыджыд радлун ваян! Айда!.. Гостиницаӧ ӧд, кӧнкӧ, сувтін?

— Эг. Лина воча чой дорӧ.

— Лина ордӧ?! — Павел дрӧгмуныштіс тайӧ юӧрсьыс, но пыр и аддзис, мый шунысӧ:

— Ой, Линукӧ, Линукӧ, менам коркӧя мусукӧ! Кыдз нӧ кӧть сійӧ олӧ? Тӧда: карас, да эг и паныдасьлӧй. Ми ӧд татчӧ неважӧн на жӧ воим. Кооперативнӧй квартира ньӧбим... Да мый ме, дуракыд, ас йылысь... Визув Олеговнаыскӧд мый лои? Кыдзи татчӧ больничаас веськаліс?

Кыдзи и став пӧсь да кыпыд сьӧлӧма йӧзыс, Павел юасис да висьтасис вомсӧ тупкывтӧг. Егорлӧн шогнас падмӧмӧн юр вежӧрыс уджаліс ньӧжмыда да, буракӧ, эз и лючки кыв Павеллысь став сёрнисӧ.

А Павел бара нин тойліс сійӧс:

— Давай, давай, чеччы! Мунам! Ме ӧд пенсионер нин. А тэ, Егорша, молодеч! Век руль дорас нёльӧд шахтаад. Партийнӧй секретар! Лыддьывлам газетъясысь да и радио пыр на гӧлӧстӧ кывлам!.. Лок ветлам! Казьтыштам томдырнымӧс... Сэсся ӧд и менам пикӧд, Анатолийкӧд, ӧтлаын уджаланныд, окота юасьыштны и...

Павел вӧчис воськов-мӧд, чайтіс и другыс сыкӧд мӧдас, но Егор Филиппович эз чеччы, места вывсяньыс шуис:

— Павел, ме ог на ӧні, окота ас кежын на олыштны. А тэ мун, мун. Ме талун вола тшук. Адрестӧ коль...

* * *

Томдырся другыскӧд, Павел Моторинкӧд, тайӧ нем виччысьтӧм аддзысьӧмыс ас ногыс вӧрзьӧдіс Егор Филипповичӧс.

Егор Филиппович кӧсйис нӧшта на пыравны больничаас да эз мун сыкӧд, кольччис. Но мыйӧн торъялісны, телепит лои вӧтчыны Павел бӧрсьыс. На ордын, гашкӧ, вунӧдчыштлас курыд шогсьыс. Лунтыр ӧд тані он пукав. Валерия дорас палатаас оз лэдзны, Лина чойыс, колӧкӧ, абу жӧ луннад гортас.

Линакӧд водзті найӧ зэв ёна лӧсявлісны. Ӧта-мӧдсьыс гусятор эз вӧв. А ӧні кӧдзалыштӧмны. Мортыд тай вежсьӧ. Лина водзті сир тшытш кодь вӧлі, йӧз дорас мелі. Ӧні, карад овмӧдчис да, пур кодь кыз лоӧма дай, буракӧ, колан висьӧмӧн висьмӧма. Сиктса аньыд ӧмӧй мӧвпыштлас лук позтыр вузалӧм да сы помысь сьӧм нажӧвитӧм йылысь. А ӧні Линалӧн ӧти сёрни — базарын вузасьӧм. «Ой, астраяс менам паськалӧны нин, колӧ аски нуны, бура ньӧбӧны астрасӧ. Кык дзоридз вылӧ быдса шайт сетӧны». Либӧ: «Выльысь кӧдзи редис дай укроп, ар кежлас быдмас».

Лина — во дас нин карса олысь. Моторин Пашлӧн Ӧндрей дядьыс артистка гӧтыр кулӧм бӧрас Лина вылӧ и гижӧдіс керкасӧ, ачыс казённӧй квартираӧ вуджис. Найӧ керкаын и ӧні олӧ Лина. Ӧтнас. Пияныс быдмисны, лэбыштісны мам дінсьыс. Анатолийыс, Пашасянь чуркаыс, ӧні Егор Филиппович дорын шахтаын уджалӧ. Мӧд пиыс бара жӧ мамыскӧд оз ов, — сиктын механизатор.

— Ме ӧд ӧні купеч моз ола, — гӧсьтъясыслы воан рытнас, пызансӧ корсигмоз, висьтасис Лина. — Пензія гортӧдз вайӧны, патернӧй оз ков мынтыны, град йӧр мыйсюрӧ сетыштӧ. Толикыд быд тӧлысь ыстыштӧ и...

Егор вокыслы жаль быдӧн лои Линаыс. «Ок, Лина, Лина, ошйысян, а мыйла нӧ асьтӧ удзӧдан? Омӧлик ситеч платтьӧшойӧн ветлан. Локтіс воча вокыд — ылі гӧсьт да позис жӧ вежсьыштны. Эз. Бурджык платтьӧ оз убӧлит пасьтавны».

Водзті сьӧкыда кӧпейкаыд шедліс да сійӧн, колӧкӧ, ёна век топыда олӧ. Батьтӧм кагаӧс, Паша Моторинлысь чуркасӧ, быдтіс, мӧд пиыслӧн эськӧ и батьыс вӧлі, да пыр жӧ юис, юӧмсьыс и сотчыліс. Олӧмыс, буракӧ, велӧдӧма топыдаыс овны. Колӧмыс, тӧдчӧ, эм и. Валерия дорас тай, больничаас, мӧдіс Егор, да Линаыс эз и шу, ыштӧ нуышт гӧстинеч, ӧмидз стӧкан либӧ сэтӧр кабыр. Шуыштіс сӧмын:

— Талун ог эшты, эськӧ кӧть тэкӧд ветлі да.

Чушис тайӧ Егор Филипповичлы. Аслыс тай нӧ, Линаыслы, мый вермис, отсаліс. Писӧ, Анатолийӧс, ас дінас босьтіс, горнӧй техникумын велӧдіс, да и уджавнысӧ ас дорас шахтаас вайӧдіс.

Гашкӧ, Линалы эз ло шань, мый Толясяньыс ни ачыс нинӧм эз вай, некутшӧм гӧснеч. Да кор нӧ эштан гӧснечнас да козиннас ноксьыны? Да сы йылысь мӧй вежӧртан, кор сэтшӧм телеграмма ваясны? Гӧтырыд пӧ больничаын, срочнӧ лок. Удж вылас юасьны да висьтасьны эз удит прамӧя, тэрмасис самолёт вылӧ. Татшӧмторсӧ нӧ Линаыс оз мӧй гӧгӧрво? Олӧма морт. Воддза сьӧкыд олӧмыс али нӧ ӧніяыс чорзьӧдӧмны Линаӧс?

Мукӧддырйи кӧ, дерт, Егор Филиппович эз и пыдди пукты Лина чойыслысь кӧдзыд русӧ. Но ыджыд шог дырйиыд тай мыйлакӧ ставыс чушӧ сьӧлӧмӧдзыд. Со, вӧлӧмкӧ, мыйла Павел дорас сійӧс друг кутіс кыскыны. Павелыс томдырся другыслысь шогсӧ кыліс став ловнас и сьӧлӧмнас. Абу ӧд весьшӧрӧ шулӧмны: радлуннад юксян морткӧд — кык радлун лоӧ, шогнад — джын шог аслыд кольӧ.

* * *

Экспедицияысь воӧм бӧрын кык другӧс торйӧдлісны дзикӧдз. Комбинатса кадръяс отделын Павел Моторинӧс бӧр колисны уджавны ас шахтаас, кытчӧ и индылісны техникумсӧ помалӧм бӧрын. А Егорӧс ыстісны шахта стрӧитан управлениеӧ, кысянь и веськаліс выль шахта-миллионерша стрӧитанінӧ да весиг мӧд карӧ — Интаӧ.

Ёртасьнытӧ, дерт, кык каркост ылнаыд оз торк, медтыкӧ сьӧлӧмад ёртасян биыд эз кус-а.

Орліс-ӧ на костын йитӧдыс? Кусліс-ӧ ёртасьӧмыс? Кыдз та вылӧ вочавидзан? Эз, буракӧ, дзикӧдз. Ёна кӧ лӧсялан томдырйиыд, и пӧрысьмӧм бӧрад дзикӧдзыд он вунӧд. Первойсӧ быд праздникӧн и чужан лунӧн ӧта-мӧдсӧ чолӧмалісны, а сэсся, дерт, гежӧдджыка и гежӧдджыка.

Егор гӧтрасигӧн Павел гозъяыс нарошнӧ волісны Интаӧ, кык луна-воя олісны. И Валерия водзӧссӧ найӧс видлыны быд пӧрйӧ жӧ пыравліс, кор воліс Воркутаӧ батьыс дінӧ. Олег Александрович дыр кад чӧж Воркутаас оліс. Кӧдзалыштӧмыс, гашкӧ, сэки и лоис, кор Олег Александрович муніс Воркутаысь Москваӧ овны. Но век жӧ дзикӧдз йитӧдыс эз ор. Сы вӧсна, мый Воркутаса шахта, кӧні уджаліс Павел Моторин, пондіс ордйысьны выльӧн стрӧитӧм Интаса шахта-миллионершакӧд. Егор Филиппович сэк тайӧ шахтаас вӧлі нин участокӧн веськӧдлысьӧн. Опытӧн юксьӧм могысь да мый да шахтаяс тшӧкыда ӧта-мӧд дорас ыстывлісны ассьыныс войтырсӧ. Раз-мӧд-коймӧдысь и Егор Филипповичлы мойвиліс ветлыны Воркутаӧ Павел другыслӧн шахтаӧн тӧдмасьны. Сэки и аддзысьлісны кык друг. Эмилия гӧтырыс ыджыд гӧсьтъясӧс моз примитліс, и войыс сідзи и кольліс син лапнитлытӧг, сы мында варовитасны.

Тӧдӧ быттьӧкӧ Егор Филиппович Павел друг олӧм йывсьыс ставсӧ не ставсӧ, а унатор. А вот тайӧс, мый паныдасясны Сыктывкарын больнича кильчӧ помын, эз и куж думыштлыны. Эз ӧд тӧд, мый пенсия вылӧ петӧма Павелыс да вуджӧма овны Сыктывкарӧ. Сідзкӧ, бӧръя кык вонас эз аддзысьлыны ни юӧртор эз сетлыны. Абу и дивӧ, некор. Олӧмыс век тэрмӧдлӧ. А кытчӧ и тэрмасям? Со, Павел пенсия вылын нин шусьӧ. И Миляыс, колӧкӧ, тшӧтш. Павел тшӧгыштӧма да дзормӧма. А сёрни сямыс да серамбаныс век на важкодь.

Асьныс ӧмӧй Валерияыскӧд тайӧ бӧръя вояснас эз вежсьыны? Егор Филипповичлӧн байдӧг рӧма нин юрыс. Кыдзкӧ зэв и водз сійӧ дзормис. Ыджыд рушку, шуам, абу, но век жӧ гӧгрӧсмыштіс. А вот Валерияыс кутшӧм туша-статя вӧлі, век сэтшӧм. Сійӧ визувлун дырйи ӧмӧй госыд ӧшъяс яяд? Мича чужӧмыс косӧд лои да нӧшта на муса. А модаыс век нывкалӧн. Школаас кодъясӧс велӧдӧ, визувлуннас наысь оз и торъяв. Со тай, вывті визулыд больнича койка вылӧ и вайӧдіс. А чеччас-ӧ сэтысь? Чеччас-ӧ?..

Таво гожӧм шуисны 8–9 классъясса челядьлы восьтыны шойччан да уджалан лагер. Пионерлагерӧ найӧс нырагезйӧн нин он кыскы — ми пӧ абу нин посни челядь. И уджавны он жӧ доддяв. А уналӧн мам-батьыс матӧ кутіс воны наӧн. Вердӧны-юктӧдӧны ӧд ай-мам бура, а том выннысӧ ныв-пиыслы некытчӧ воштыны. Со и быд зонка да весиг нывка дзюдо да самбо тӧдӧ, ӧта-мӧдсӧ туз-тукманалӧны. Ичӧтджыктӧ да жебджыктӧ оз жалитны ни.

Школаысь томджык педагогъяс то ичӧт кагааӧсь, то полӧны чуден челядькӧд кытчӧкӧ бокӧ, тӧдтӧм сиктӧ мунны. А Валерия Олеговналӧн ичӧт кага абу, сэсся ачыс жӧ и медъёна кӧкис татшӧм лагер йывсьыс. Да и сиктсӧ бӧрйисны эз дзик тӧдтӧмӧс, а Егор Филипповичлысь чужанінсӧ, рӧднӧй Ракпольсӧ. Валерия сэні раз-мӧд-коймӧдысь вӧлі.

— Валерия Олеговна, ми эг ӧмӧй море дорӧ мунны кӧсйысьлӧй? Гашкӧ, кодкӧ мӧд лагерас мунас? — корис да ӧлӧдіс верӧсыс. Но мӧдыс сӧмын серӧктыштіс.

— Таво эновтчылам на. Ме бура думайті. Ӧти-кӧ, Олегным кандидатскӧй вылын уджалӧ, некор сылы лоӧ и миянкӧд ноксьыны, и море дорад тшӧкӧлдывайтны. А мӧд-кӧ, лагерсӧ котыртны кодлыкӧ колӧ.

— Да, колӧ... — ышловзьыштіс сӧмын Егор Филиппович. Мый татчӧ шуан да он шу? Ӧлӧдан али дугӧдан? Партийнӧй секретар, сійӧ ӧд ачыс жӧ и медводзӧн сиктӧ лагер котыртӧм йылысь мӧвпсӧ сетліс.

Первойсӧ Валерия Олеговнаыс и ветліс ӧти профкомса ёрткӧд сиктӧ сёрнитчӧм могысь. Вежон ветлісны. Локтісны сэтшӧм радӧсь. Артмис пӧ ставыс, договор кырымалім. Бок грездысь пӧ посниясӧс велӧдан школа сетісны миян войтырлы узьлан-оланін пыддиыс. А местаыс пӧ кутшӧм скоднӧй! Купайтчыны ичӧтик ю эм, уджыс орччӧн — ферма сэні дай гӧгӧр видз-му.

А мый сельсӧветын ни совхоз кантораын первойсӧ и сёрнитнысӧ эз кӧсйыны, та йылысь шы эз сетлыны. Бӧрыннас нин Егор Филиппович тӧдмаліс местком заседание вылын.

Та бӧрын Валерия и вежонсӧ эз ов гортас: бӧр муніс ас котыртӧм лагерас. Тайӧ пӧрйӧ дыр кежлӧ нин. Шуисны 15-ӧд сентябрӧдз сэн видзны ныв-зонмӧс, медым удитасны град выв пуктас да картупель идралыштны. Валерия Олеговна веськӧдлысь пыддиыс муніс, а физкультура велӧдысь, Радий Андреевич, — сылы отсасьысь пыдди.

Регыд и мунӧм бӧрас Валерияыс письмӧ ыстыліс. Ӧні пӧ ог нин соссьы: полі первойсӧ. Но, буракӧ, менам нывкаяслы да зонкаяслы кажитчӧ тані. (Унджыкыслы.) «Унджыкыслы» кывсӧ мыйлакӧ скобкаӧ босьтӧма. Тайӧ Егор Филипповичӧс мыйкӧ мында джӧмдӧдыштліс. Но водзӧ лыддис да, быттьӧкӧ, нинӧм омӧльсӧ эз аддзы. Мӧдарӧ — збодер письмӧ.

«Ми ог сӧмын шойччӧй, но и уджалам. Мӧсъяслы веж кӧрым заптам да асьным и тракторӧн ваялам ферма дорӧ. Кодсюрӧ весиг мӧсъяс дорӧ нин кутісны сибӧдчыны. Зонкаяс отсалӧны дояркаяслы лысьтысян аппаратсӧ дзоньтавны. Сиктса войтыркӧд йитӧд корсям и. Концерт дасьтім. А кутшӧма сиктса пывсян миян зонкаяслы сьӧлӧм вылас воӧ! А тӧдан, Егорушка, босьт отпуск да тшӧтш лок татчӧ. А, локтан? Он ӧд кут каитчыны...»

«Ветлыны буди и эм-а?» — гӧтырыслысь письмӧсӧ лыддьӧм бӧрын мӧвпаліс Егор Филиппович. Сы дыра нин эз волы. Мамыс кулӧм бӧрын быттьӧкӧ тупйысис сэтчӧ туйыс. Код дорӧ мунас, чой-вок абуӧсь. Рӧдвуж, дерт, кодсюрӧ эм на, мунан кӧ, оз тойыштны. Купайтчыштас, вуграсьыштас, ельдӧг вотны вӧрӧ кайлас. Да и Валерияыслы... Норасьны оз радейт, збодер письмӧ гижӧма, а колӧ, буракӧ, орччӧн ме кодь ёртыс».

Кӧсйис, кӧсйис ветлыны. Да со... Эштӧма и вуграсьӧмыд, и ельдӧг вотӧмыд. Со, больнича кильчӧ помын ковмас жӧдзны. Пытшкас пырны оз лэдзны, ни эновтны больничасӧ сьӧлӧмыс оз лэпты. Павел дорас, гашкӧ, час-мӧд кежлӧ ветлыны. Луныс кӧть ӧдйӧджык коляс.

* * *

Карын быд улича вылын вузалісны гӧрд бока яблӧгъяс, гырысь арбузъяс. Сэн жӧ, чукӧрын, еджыд кӧчан мачьяс, гӧрд свекла да виж морков, чӧскыд кӧра турунъяс — укроп да петрушка. Ставсӧ, мый козьналӧма озыр арыс, вайӧмаӧсь карса войтырлы.

Ньӧбасьысьяс: шань том аньяс, дедъяс, бабъяс, кузь кока нывкаяс — артмӧдӧны кузькодь ӧчередь, зыртласьӧны, ызгӧны.

Егор Филиппович восьлаліс карса уличаяс кузя да, ас мӧвпас вӧйтчӧм, эз аддзы ни шондіӧн тырӧм уличасӧ, ни ӧтарӧ-мӧдарӧ сунысь йӧзсӧ, ни ӧчередьын шуксьысь войтырсӧ. Сы вылӧ видзӧдігӧн унаӧн, буракӧ, мӧвпыштлісны: ӧкуратнӧй ныр-вома да паськӧма пӧ ачыс, а асывсяньыс видлыштӧма. Мунӧ-зульссьӧдӧ, оз йӧз вылас видзӧд. А мый сьӧлӧмыс мортыслӧн абу местаас, некод оз тӧд. Оз тай паськӧм мозыд лов пытшкыд тыдав.

— Дядя, дядя, тэ яблӧг кӧсъян? Сувт со татчӧ, менам мам бӧрся! — быттьӧ вӧтын кыліс Егор Филиппович кага гӧлӧс. Сійӧ эз и чайт, мый сы дорӧ шыасисны. Но нывка ичӧт кекӧньяснас лап-лапкерис Егор Филипповичлы бокас.

Пыр жӧ шыасис сы дорӧ и мичаник нывбаба:

— Ми регыд бӧр локтам, сӧмын автоматсянь звӧнитлам. Со этайӧ бабуш бӧрсьыс и кутчысьӧй.

Егор Филиппович кӧсйысис сулавны да сэк вӧлись тӧд вылас уськӧдіс: збыль ӧд сійӧ кӧсйис яблӧгсӧ ньӧбны. Павел гӧтырлы, Эмилиялы, гӧснеч. Куш киӧн абу и лӧсьыд пырны.

Недыр мысти сійӧ, сетка тыр яблӧгӧн да киняулас ыджыд арбузӧн, вӧлі нин Павел другыс квартира ӧдзӧс дорын. Тринькнитыштіс звӧнок, ӧдзӧс пыр и воссис. Порог сайын сулаліс щӧгӧль кодь тшап нывбаба. Вом доръясыс краситӧма, сьӧд юрсисӧ гартыштӧма балябӧжас ыджыд зудӧсӧс моз. Пельпом вылас пласьтвидзӧ гырысь розаяса мича шаль.

— Ой! — чилӧстіс сійӧ. — Да Егорей жӧ тайӧ! Ме пыр и тӧді! Ме пыр и тӧді! Милости просим, милости просим, дорогой гость!

Паськыда нюмъялігтыр сійӧ лэдзис гӧсьтсӧ керка пытшкас, чукӧстіс верӧссӧ:

— Павел! Павел Васильевичӧ! Видзӧдлы, коді локтіс! Вай ӧдйӧ мезды сылысь кияссӧ да ме кутыштла сійӧс да окышта!

«Миляыс-ӧ тайӧ тшӧгӧм нывбабаыс? Кутшӧм ӧдйӧ кадыс исковтӧ, кыдзи мортыд вежсьӧ», — вирдыштіс Егор Филиппович юрын мӧвп.

А Эмилия эз понды виччысьны, кор верӧсыс локтас да прӧстмӧдас дона гӧсьтыслысь кияссӧ, ачыс босьтіс яблӧг сеткасӧ да арбузсӧ, пуктіс зеркала водзас тумбочка вылӧ, уськӧдчис кутлыны да окавны.

— Дзормӧмыд жӧ менам Павел моз, — бан боксӧ окаліг кайтіс Эмилия да жарӧн ышлолаліс Егоршалы чужӧмас. Сылӧн краситӧм вом доръясыс мисьтӧма торъялісны пӧрысьмӧм, госӧн кыскӧм чужӧм вылас, но Егор Филипповичлы эз вӧв мустӧм тайӧ окалӧмыс. Мӧдарӧ, лои зэв рад, мый со тадзи пӧся да меліа Эмилияыс примитӧ сійӧс.

Сэні и Павелыс мыччысис мӧд жырсьыс.

— А-а, локтан... Менӧ бабаӧ пыр на вильӧдӧ, вир йӧй пӧ, мыйла эн вайӧд Егорушкасӧ. Діпляӧ, ӧтнасӧс кольӧмыд.

— Дерт, пиняла, друг шусян — кольӧмыд мортсӧ, — эльыштчыліс верӧс вылас Эмилия да варова заводитіс висьтасьны:

— Ме, со, вӧччи, ті дорӧ больничаӧдзыс нин кӧсйи ветлыны. Павел со висьталӧ: притча коньӧранӧйясӧс суӧма. Господи, Валерия пӧдругаанӧй... Кыдзи нӧ, мыйла больничаас веськалӧма?

Тайӧ кывъясыс гӧсьтсӧ пыр и нормӧдісны, ышловзьӧмӧн вочавидзис:

— Пасибӧ, Эмилияӧ, дона аньӧ, абу вунӧдӧмыд пӧдругатӧ да. А кыдзи да мый, ме и ачым бурасӧ ог на тӧд. Висьталӧны тай: автоаварияӧ веськалӧма. Сійӧ ӧд эз вӧв гортын. Школаса челядьыскӧд лагерын вӧлі. Тані, миян Ракпольын. Кыдзи веськалӧма аварияяс? Куйлӧ ставнас бинтуйтӧм. Менӧ эз и лэдзлыны сёрнитыштны ни нинӧм.

— Ой-я, ой-я! Сэтшӧма ли мый доймӧма? — Ымӧстіс Эмилия. Павел пыр и тувкыштіс сылы бокас:

— Эк-ма, юмов ма! Тупйыштлы вомтӧ! Матын ӧд бабаыдлӧн синваыс! Но... Доймис... Мый сэсся, омлявны тадзи кутан? Отсалас сылы? Быдтор тай мортыдкӧд овлӧ. Ловйӧн кӧ коли, бурдас! И нинӧм люпкӧдчыны. Вот чередитны доймӧм морттӧ колӧ. Вай тэ, мӧдӧдчин кӧ, ветлы. Вотӧстӧ нуышт, да ачыд и чӧскыд тусьнас вердны вӧзйысь. А тэ, Егорша другӧ, эн сэтшӧма шогсьы! Ковмас кӧ сы дорын дежуритны ли мый ли, Эмилия менам оз ӧткажитчы. Дай ныв миян сэні, больничаас, медсестра. Сувтӧдам Олеговнаӧс кок йылас! Тайӧ ме тэд шуа, Пашка — толовая шашка! Эскы! Вай пӧрччысь, пукалыштам...

Вежавидзтӧг да шмонь гӧлӧсӧн кӧть сёрнитіс Павелыс, а быд сійӧ кыв шуӧмысь личалыштліс быттьӧкӧ Егор Филипповичлӧн морӧс кудйыс. Чужис эскӧм: бурдас Валерияыс. Сувтас.

* * *

Сиктӧ нуӧдысь мир туй тракт вылӧ петӧм бӧрын Павеллӧн важиник «Москвичыс» нетшыштчискодь быттьӧ да ӧдсӧ содтӧмӧн пондіс тюрны шыльыд асфальт вывті. Восьса ӧшинь сайын недыр вирдалыштісны кутшӧмсюрӧ стрӧйбаяс, а сэсся заводитчис вӧр. Кык друг олісны чӧв.

Егор Филиппович пукаліс воддза пуклӧс вылас Павелкӧд орччӧн да аттьӧаліс думсьыс другсӧ.

«Но и Пашка, зарни башка. Мый эськӧ ме тэтӧг вӧчи? Эн кӧ вӧзйы сиктӧ ветлыны, ме ачым, колӧкӧ, и эг гӧгӧрво ветлынысӧ. А быть ӧд колӧ. Челядьыс сэнӧсь. Дай юасьны да тӧдмавны кӧть, мыйла Валерия Олеговнаыс карас мунӧма, мыйла абу рейсӧвӧй автобусӧн вӧрзьӧма, а пуксьӧма тӧдтӧм «жигулиӧ». Карса ГАИ-ас тай висьталісны: ас кежся машина пӧ «жигулиыс». Тангысьӧма грузӧвиккӧд карас пыригӧн нин. Шоперыс больничаын жӧ, да тӧлкӧн нинӧм висьтавны оз сяммы.

Павел эз на жӧ вомсӧ восьтыв. Сійӧ, буракӧ, кывзіс машина моторыслысь сьылӧм шысӧ. Друг тай сэсся инмӧдчыштліс Егор Филипповичлы сояс да юаліс-а:

— Но мый, Филипповичӧ, менам чибук йылысь шуан? Бура на ӧд рӧдтӧ? Кытсюрӧ дӧмышталі да ӧні, чайта, во вит-квайтсӧ котралас на.

— Котрала-ас, — веськодьпырысь артмис Егорлӧн.

— Должен, — кайтыштіс Павел. — Вит тысячасӧ зра ли мый козьналі?

Та бӧрын сійӧ серӧктіс да зэв мудера юаліс: — А тӧдан кодлысь тайӧс ме ньӧби? Он дӧгадайтчы?.. Стрекалов Ӧльӧксанлысь!

— Кутшӧм Ӧльӧксанлысь? — ас мӧвпас вӧйтчӧмысла юаліс Егор.

— Но да. Томдырся другтӧ вунӧдін ли мый нин?

— Дзикӧдзыс эг на эськӧ да... Дак сійӧ тані, карас олӧ? Ме нинӧм сы йылысь ог тӧд. Тӧда сӧмын: юридическӧй помалӧма.

— Кысь тӧдан?.. Ӧльӧксаныд ӧд гусьӧнджык радейтӧ овны да. Он ӧмӧй помнит, Воркутасьыд сэк юасьтӧг-висьтасьтӧг и мыськовтӧма вӧлі гортас. Помнитан? Но вот... А ыджыд чинӧдз, буракӧ, лыблӧма. Министерствоас шусис уджалігӧн. А сэсся улӧ, тыдалӧ, усьӧма. Сократитісны пӧ, висьталӧ вӧлі меным. А ме кывлі: шывылпатеруйтӧмны. Быттьӧ пӧ йӧзыслысь мавтас пычкывлӧма. Збыль ли, лӧж ли сэсся. Но карас пенсияӧдзыс эз ов. Сиктын ӧні жируйтӧ. Коймӧд во нин Ракпольын сельпо пред. Чайта и эсійӧтӧ, де-пе-циттӧ, шкапъясас уна нин удитіс сӧвтны. Ветлам, пыралам сы ордӧ гӧститны. У кутшӧм чача-керка пуктіс! Ме ӧд, ыж бӧжыд, сы ордын и доймылі. Помечалі тшӧтш. Сигӧрсӧ лӧсьӧдігӧн вылісяньыс уси да лопйӧй али сӧпйӧй потӧма, чӧртыд. Слабог тай лечитісны... Видзӧд-тӧ, сійӧ сэтшӧм интеллигентнӧй, аслас сигӧр йылӧ оз кай. А ме — мужик. Кайи... Извенит, Егорӧ, ассьым другӧс саӧн мавта. Да мый нӧ, лӧг и петӧ. Кор сы дорын уджалі, тшупси да мый да, быд лун вӧлі «жигулиӧн» да «волгаӧн» локтӧны кутшӧмкӧ карса барушняяс. «Александр Фёдорович, целуем ручку! Индийскӧй чай пачку! Сапожок бы с каблучком! Кофею не дашь ли?» Тьфу, блатнӧй!

Павел мыйкӧ нӧшта ропкӧдчыштіс на, но Егор Филиппович эз нин кыв сійӧс. Буракӧ, доза дыр чӧла пукалісны.

— Но мый, Егор другӧ, бара ас мӧвпъясад вӧйтчин? Сьылыштны, гашкӧ, тэныд да?

— Сьылышт, кӧсъян кӧ, — вочавидзӧ Егор.

— Ог. Энлы, ме тэд мойдышта. Кӧчиль йылысь. Чужӧма пӧ, значит. А сійӧс повзьӧдлӧны. Вот пӧ тӧв локтас, ковмас сэк быд страксӧ аддзывны. Усяс лым. Кӧчильяс чеччалӧны, лым эшкынсӧ вышывайтӧны.

— Тайӧ тӧв нин? — юалӧ кӧчпи.

— Тайӧ нӧ кутшӧм на тӧв! Вот турӧбъяс босьтчасны, толаяс лыбасны!

Увгӧ-авгӧ турӧб, кын пуяс нюжа-няжакылӧны. Кӧчильяс ӧти пу улӧ дзебсьыласны, мӧдӧ, быттьӧ дзебысь ворсӧны.

— Тайӧ тӧв нин? — бара юалӧ кӧчпи.

— Тайӧ кутшӧм на тӧв. Вот кӧинъяс кор кутасны омлявны!..

Со и збыль, кӧин омлялӧм кылӧ вӧрас, да ӧд лун тӧв нин пӧльтӧ, тулыс локтӧ! Вот и лёк тӧвлы пом! Тадзи и мортыдлӧн... Ӧти кывйӧн — ставыс прӧйдитӧ...

Тадзи сёрни-басниӧн и найӧ воисны Ракпольӧдз. Бокыса Шорйыв грезд фермаӧдз журнитісны. Ферма дорысь некодӧс эз суны. Лун шӧр луннад нӧ коді сэн олас. Йӧв примитысь лаборанткаӧс тай аддзисны жӧ. Мыськӧ пробиркаяс. Быд мӧслысь пӧ жирносьтсӧ тӧдмалам, да колӧ уна пробирка.

— Школаас эн пыралӧй? Сэні кык нывка, пусьысьясыс, долженӧсь лоны. А мукӧд гайдураыс со эстӧнӧсь, турнепс му вылын, — висьтасис нывбаба локтӧм йӧзлы.

Турнепс му вылӧ Егор Филиппович муніс ӧтнас, Павел вадорас мыссьыны лэччис. Ӧти нывка, сійӧс аддзӧма да, пыр и паныд котӧртіс: староста пӧ ме. Тӧдіс Егор Филипповичӧс, чукӧстіс ёртъяссӧ. Гузь ставӧн котӧртісны. Кытшалісны Валерия Олеговнаыслысь верӧссӧ, юасьӧны да висьтасьӧны.

— А ыджыдджык ёртъясыд нӧ, воспитательясыд, кӧнӧсь? — юаліс гӧсьтыс.

— Радий Андреевич зонкаяскӧд веж кӧрым тракторӧн кыскалӧны. А Валерия Олеговна карӧ муніс. Сійӧ тіянкӧд эз лок?

«Учительница доймӧм йывсьыс оз на тӧдны. Оз кӧ, и мед, тадз, колӧкӧ, и бурджык», — пасйис аслыс Егор Филиппович да юаліс:

— Мый могӧн карас муніс Валерия Олеговнаыд?

Нывкаяс вашкӧдчыштісны ас костаныс, сэсся старӧстанас шусьысь нылыс воськов вӧчис водзлань, сетіс вочакыв:

— Да... ЧП миян лоис да...

— Че-пе? — шензьыштіс Егор Филиппович.

— Хватов Юра, дундукыс...

Со кодыр воссис нывкаяслӧн вомныс. Ӧта-мӧд вежмӧн пондісны горзыны:

— Сійӧ ПТУ-са Сидорчуккӧд дружитӧ! Ӧтлаын кайфуйтӧны!

— А Сидорчукыс... Шпана! Марпа бабыслысь сьӧмсӧ гусялӧма...

— Картёжник! Миянлысь зонъясӧс картіӧн ворсны велӧдӧ.

— Алкоголик! Вина юӧ мужикъяскӧд...

Кутшӧм нин сӧмын ним эз сетны нывкаяс кутшӧмкӧ гепетеушниклы, лыддьӧдлісны да лыддьӧдлісны, пока кытш пытшсянь эз горӧд ӧти нывка:

— А миян зонъяс, сідзкӧ, бурджыкӧсь? Зонкаяс, мый чӧв оланныд?

Зонкаяс, бокынджык нывъяссянь, торъя стаяӧн сулалӧны. Унджыкыс коскӧдзыс куш яяӧсь. Ӧти на пӧвстысь заводитліс вильшасьны, кок увсьыс му корӧгсӧ чужйис, серӧктіс. Но мӧд сылы зутшкис бокас, ӧвсьы пӧ, а нывкалы вочакывсӧ сетіг дивитыштіс нывъясӧс:

— Бабаяс ли мый ми, тіян моз лявзыны кутам.

— Уй, кутшӧм авъя пияныс! Хватов Юраыс нӧ абу тіян ёрт? Мыйла лэдзинныд сійӧс?

— Юасяс миянлысь...

Ныв-зон висьтасьӧмысь Егор Филиппович гӧгӧрвоис, мый тані бабыс ордын гӧститӧ ГПТУ-ын велӧдчысь зон, коді пышйӧдӧма ферма дорысь совхознӧй грузовик. Сійӧ грузӧвикнас кӧсйӧмны нуны мясокомбинатӧ тшӧгӧдӧм ӧшъясӧс, а зонмыд сійӧ грузӧвикнас мыськыштӧма карӧ, быттьӧкӧ пӧ вина ньӧбны. Сиктса зонкаяс сійӧ грузӧвиксьыс тшӧтш аддзылӧмаӧсь и Юра Хватовӧс. Артмӧ: ӧтвыв и пышйӧдӧмаӧсь.

Егор Филиппович кывзіс ныв-зонмӧс да эз тӧд, мый шуны ни мый вӧчны. Ньӧръяв эськӧ ставнысӧ. Да ӧд ньӧрйыд ӧні оз отсав. Крепитчис, такӧдіс пуысь сьӧлӧмсӧ да чӧліника шуис:

— Вот ті меным и висьталінныд. А ӧні ме тіянлы висьтала. Оз лок сэсся Валерия Олеговнаыд ті дорӧ. Висьмӧма. Тіянлы ас кежад и ковмас овны да уджавны, кодӧскӧ кӧ мӧдӧс оз ысты школаыд Радий Александровичыдлы отсӧг вылӧ.

— Ы-ы? — гы моз исковтіс ныв-зон пӧвстӧд шум. — Миянлы некод оз ков, ми виччысьлам Валерия Олеговналысь бурдӧмсӧ. Ми бура кутам овны. Миян Хватов сӧмын оз кывзысь, пыр горзӧ, ме пӧ ачым личносьт!

— Личносьт — тайӧ абу лёк, — нюмсермуніс гӧсьтыс да бара юаліс.

— А сійӧ, Хватовыд тіян, кор пышйыліс? Кык лун водзті нин, шуанныд? Сы дыра нин абу, да он и тӧждысьӧй? Оз кӧ дзикӧдз лок? Грузӧвиксӧ кӧ бӧр оз вайны? Совхозыс мый шуас? Тайӧ став йывсьыс ті думыштлінныд? Али кодкӧ мӧд тіян пыдди кутас думайтны? Ме висьталі нин: Валерия Олеговнаыд висьмис. Гашкӧ и, кулӧ на яндзимысла да шогысла.

Мӧрччисны-ӧ, эз-ӧ Егор Филипповичлӧн кывъясыс, но лои сэтшӧм чӧв-лӧнь.

Тайӧ кадас и Радий Андреевич трактор дорын уджалысь зонъяскӧд таркӧдісны-воисны. Зон вит веж кӧрым кыскалан прицеп вылысь чеччыштісны му вылӧ. Руль саяс зонка вӧлі и. Радий Андреевич пукаліс сыкӧд орччӧн. Кабинасьыс чеччанмоз сійӧ горӧдіс:

— О-о, ачыс Карманов ёрт миян дорӧ локтӧма! Чолӧм! Валерия Олеговна тіянкӧд?

Егор Филиппович мыччис сылы кисӧ, но эз нинӧм вочавидз. Нуӧдыштіс бокӧ да висьталіс ставсӧ, мый тӧдіс.

Радий Андреевич, быг кодь еджыд чужӧма, кывзіс сійӧс да чабраліс-песіс ассьыс кияссӧ.

— Ме мыжа, эз ков лэдзны Валерия Олеговнаӧс карас...

Егор Филиппович орӧдыштіс сійӧс:

— Ӧні абу та йылысь сёрниыс, коді мыжа да мыжтӧм. Ті тӧданныд совхозса грузӧвикыслысь номерсӧ? Грузӧвиккӧд «жигулиыс» тангысьӧма.

— Ті кӧсъянныд шуны?.. — Учительлӧн чужӧмыс нӧшта бледмис.

— Ме нинӧм на ог шу. Но зонкаясыс... Накӧд кӧ мыйкӧ тшӧтш лои? Кӧнӧсь найӧ? Ме сӧмын тӧда: грузӧвиксьыс гаишникъяс некодӧс абу аддзӧмаӧсь. Грузӧвикыс пӧ туй вылас пӧперег, а «жигулиыс» канаваас кымыня...

Ӧти шог пӧ бӧрсьыс мӧдӧс кыскӧ, шулӧмаӧсь. Валерия Олеговна вӧсна шог дорӧ содтіс Егор Филипповичлы мӧд маета — зонкаяс. Ӧти джаггӧрӧдӧ чукӧрмис сы мында юалӧм да мӧвп, мый разьнысӧ ӧти-кыкӧннад Радий Андреевичкӧд он и вермы.

* * *

Павел другыс локтіс ферма дорӧ буретш ас кадӧ. Сійӧ удитӧма нин кытшовтны ставнас грездсӧ да унатор тӧдмавны. Ичӧт грездад тай нинӧм гусьӧн оз видзны.

— Рӧдняӧс на татысь аддзи, чай юны корисны, — висьтасис Павел. — Управляющӧйыслӧн орчча керкаыс и. Ӧбедайтны муртса воӧма, тшӧктіс пыравны.

— Он ӧмӧй ми ордын ӧбедайтӧй? — ӧбидитчис быдӧн Радий Андреевич. — Миян тӧданныд, кутшӧм бура пусьӧны нывъяс!

— Дерт жӧ, тіянкӧд ӧбедайтам, — пыр и такӧдіс сійӧс Егор Филиппович. — Управляющӧй дорас ветлам дай позяс ӧбедайтны. Чайта, колӧ сиктса начальствоыскӧд мыйсюрӧ тӧлкуйтыштны.

* * *

Лун-войыс кольӧ. Но Валериялӧн бурлань бергӧдчӧм век эз тыдав. Егор Филипповичӧс лэдзлісны гӧтыр дорас здук-мӧд кежлӧ сӧмын.

Буракӧ, лючки кылӧ и аддзӧ Валерияыс, но сёрнитнысӧ оз вермы. Абу уна кывъя и верӧсыс. Видзӧдӧны ӧта-мӧд вылас — тайӧ налӧн и сёрниыс. Егор Филипповичлы сьӧлӧм ортӧдзыс жаль лоліс гӧтырыс. Палатасьыс петіс да сідзи буксыны-бӧрдны окота. Не кӧ Павел другыс, коді сійӧс пырджык виччысьліс кильчӧ помас, збыль эськӧ бӧрдіс. Но сёрни-басниа Павел эз лэдзлы сылы шогӧ усьны, кыдзкӧ пыр сяммыліс ылӧдны.

Витӧд луннас Егор Филиппович локтіс гӧтыр дорас юӧртны, мый кӧсйӧ лэбзьывны гортас, лун-мӧд кежлӧ Валериясӧ кольлас ӧтнасӧн.

— Оформита отпуск дай бӧр локта тэ дорӧ. Кута тані овны, кытчӧдз он бурд, — гӧтырыслысь пыкӧса чужӧмсӧ кӧртӧд пырыс меліа малалігтыр сёрнитіс верӧсыс. Валериялӧн синмыс вазис, нюмдыштіс вомыс и мыйкӧ друг вашнитіс. Верӧсыс эз гӧгӧрво, юалӧмӧн видзӧдліс лечитысь врач вылас, коді сэн жӧ вӧлі. Врачыс висьталіс: «Сьылышт пӧ миянлысь».

— Кыдзи? Тані сьывны? — шай-паймуніс Егор Филиппович. Но врачыс гогнитіс юрнас: позьӧ пӧ, сьыв.

Кӧдзыд пӧсь чепӧсйис Егор Филипповичлӧн мышкуас, кор кыліс ассьыс гӧлӧссӧ. Сійӧ сьыліс гӧтыр весьтас копыртчӧмӧн, кыдз мамъяс сьылӧны кагаӧс унмовсьӧдігӧн.

В рубашке нарядной к своей ненаглядной

Пришёл объясниться хороший дружок...

Сьыліс, а гӧлӧсыс тіраліс. Дивӧ кодь вӧлі кывны тайӧ, реанимация палатасьыс, сьылӧм шысӧ. Но Валериялы тайӧ воис сьӧлӧм вылас, чужӧмыс югдіс, синсьыс тюрис синва, а вомас тӧдчис нюмтор. Кор сьылӧмыс помассис, сыркмуныштіс да кузя ышловзис, а сэсся кунис синсӧ.

Егор Филиппович ырс чеччис, сэтшӧма повзис, чайтіс кулӧмӧн. Но докторыс лапкис сылы пельпом вылас кисӧ. Видліс висьысьлысь пульссӧ, шуис:

— Сьӧлӧмыс лючки тіпкӧ. Мудзис. Ме чайта: тіянлы позьӧ спокойнӧя лэблыны гортад.

«Кысь нин спокойнӧйыс, но быть колӧ лэблыны. Аски кежлӧ индӧма чукӧртлыны партком. Вывті колана сёрниыс, медым сытӧг нуӧдны, парткомса секретартӧг. Шахта дасьтысьӧ вуджны выльнога уджӧ».

* * *

Аэропортӧ Егор Филиппович воис, кор регистрация вӧлі помасьӧ нин.

Чукӧстӧмсӧ эз кыв да бергӧдчис сӧмын сэк, кор кодкӧ инмӧдчыштліс сы дорӧ.

Тайӧ вӧлі Борис Борисович Маршев, налӧн шахтаса начальникыс. Еджыд дӧра кепкаа да футболка кежысь. Пинжакыс ӧшаліс сой вылас. Мӧд киас сылӧн тоньвидзис лакӧн югъялысь неыджыд чемодан.

Кыкнанныс шензьыштісны татшӧм аддзысьӧмсьыс да ӧтув и кыкнанныслӧн артмис:

— Но-о, да тэ нӧ кыдз татчӧ веськалін?!

Киасисны да первойӧн вочакыв сетіс Егор Филиппович:

— Да со... Волі... — ылӧсас и артмис вочакывйыс. А мӧдыс чемодансӧ трук-траккерис, гораа юӧртіс:

— А ме — транзитнӧй пассажир. Муна гортӧ. Сыктывкарӧ войколӧн сувтлі, кӧсйи сёрнитыштны обкомын, да отделсьыс завыс отпускӧ петӧма, замыс — командировкаын.

— Тӧда, ме пыралі жӧ, — кайтыштіс Егор Филиппович да шензьыштіс: — Тіян жӧ отпускыд эз на помась. Ми чайтім, сентябр помӧдз на кутанныд жаритчыны лунвыв шонді улын.

Борис Борисович серӧктіс:

— Гортын шойччам.

Пассажиръяс заводитісны чукӧртчыны пыран-петан ӧдзӧслань, сэсся увкнитісны ывлаас, кӧні кык вагончикысь артмӧдӧм поезд виччысис нин найӧс. Сёрни налӧн ори. Но мыйӧн пуксисны самолётас, бӧр пансис сёрниыс.

— Но, партийнӧй секретар, висьтась, кутшӧм миян сэн делӧясыс? — Егор Филипповичкӧд орччӧн креслӧӧ пуксьӧм бӧрын шыасис отпускникыс.

— Менам петан лунӧдз, быттьӧкӧ, нормальнӧ ставыс вӧлі, — вочавидзис партийнӧй секретарыс да кызӧктыштіс, содтіс: — Но ме вит лун тан олі.

Маршев крута бергӧдіс сылань юрсӧ.

— Мый сідзи? Кутшӧмкӧ совещание?

— Валерия Олеговна менам тані. Больничаын.

— Больничаын? Висьмис?

— Эз. Доймис. Машинаӧн тангысьӧмны.

Борис Борисович дрӧгмуніс:

— Ёна доймӧма? Мый врачьясыс шуӧны?

— Зэв лёк сылы, — кайтыштіс Егор Филиппович да ышловзис.

Ёртыс, нинӧм шутӧг, пуктіс ассьыс сьӧкыд кабырсӧ сылы пидзӧс вылас, топӧдыштліс: гӧгӧрвоа пӧ, крепитчы.

— М-да-а! — кузя нюжӧдіс сэсся сійӧ. — Колӧ чайтны, врачьяс вӧчасны ставсӧ, медым миянлысь Валерия Олеговнаӧс сувтӧдны кок йылас. Чёрт возьми, ог вермы сійӧс больнича койка вылысь думыштны. Ӧнӧдз син водзын сылӧн йӧктӧмыс. Помнитан, посёлокса выль культура керкатӧ восьтігӧн кыдз йӧктіс? Чудеса! Сцена вывтіыс быттьӧ лэбаліс, тірибобӧ. Шуа тэд: медбур театръяссьыс сэтшӧм дивӧсӧ эг аддзыв... Пиыдлы нӧ юӧртін эн мам доймӧм йывсьыс?

— Эг на, — вочавидзис Егор Филиппович. — Мед спокойнӧя уджалас. Кывлас кӧ, эновтас ставсӧ да лэбас мамыс дорӧ. А мыйла? Валерия ӧд и сёрнитнысӧ на оз вермы. Коркӧ сёрӧнджык позяс юӧртны.

— Колӧкӧ, и сідз, — ньылыд муныштіс Борис Борисович да босьтіс креслӧ зепсьыс «Огонёк» журнал. Пондіс шарӧдчыны листъяснас. Ӧти лист бок вылын серпасалӧма кага нёньӧдысь нывбаба.

Тайӧ серпасыс пыр и нуӧдіс Егор Филипповичӧс воддза олӧмас. Тӧд вылас усис гӧтыр дорас, кага чужтан керкаӧ, ветлӧмыс. О Господи, кор сійӧ вӧлӧма, а кутшӧм ясыда помнитӧ!

Ыджыд сумка тыр сёян-юан вайис гӧтырыслы да моздор тырыс тундраса дзоридзьяс. Кутшӧма усьлі шогӧ, кор сумкасьыс и коймӧд пайсӧ эз босьтны. Бергӧдісны и дзоридзьяссӧ. Но висьталісны, кыдзи позьӧ аддзыны гӧтырсӧ да питорсӧ: мун пӧ витӧд ӧшинь дорас, буретш мамъяс нёньӧдчӧны.

Ӧдйӧ ырснитіс ывлаас, а мӧмӧтыд, кодарсянь витӧд ӧшиньыс, эз юав. Ӧти ӧшинь улӧ котӧртӧ, мӧдӧ. Бӧрти веськаліс жӧ. Видзӧдӧ кык пӧвста стеклӧ пырыс, а Валерияыс пукалӧ крӧвать вылас, еджыд халата, и куш морӧсыс еджыд жӧ. И нюмъялӧ сэтшӧм югыд нюмӧн пидзӧс вылас ёкмыльвидзысь чужтасыслы. Господи, да ачыс жӧ Мадоннаыс тайӧ. Оз ӧд весьшӧрӧ гырысь художникъяс, му пуксьӧмсяньыс да ӧнӧдз, нимӧдны нывбаба-мамӧс. Мичлун радиыс, шуд радиыс, радейтӧм радиыс.

Нимкодьыс вомас эз кут тӧрны и том батьлы, кор Валерияыс аддзис сійӧс ӧшиньсьыс да мыччыліс кисьыс еджыд ёкмыльсӧ. Ичӧтик гӧрд чужӧмыс кагалӧн чукыртчис да сэсся сійӧ горӧн бӧрддзис. Валерияыс нюмвидзис да мыйкӧ висьталіс-висьталіс. Но стеклӧ пырыс нинӧм эз кыв. Сэки Валерияыс пуктіс кагасӧ да мыйкӧ ӧдйӧ гижыштіс кабалатор вылӧ.

«Тэ кӧ аддзылін, кутшӧм мича миян пиным! — гижӧма Валерияыс. — Ме кӧсъя дедсӧ моз Олегӧн нимтыны. Тэ абу прӧтив? Дзик тэнад кодь кымӧсыс и синмыс. А сюсь кутшӧм! Кватитіс кыдзи нёньӧс, чушкӧ сӧмын! Из йирысь жӧ, буракӧ, тэ моз лоӧ. Ме сэтшӧм шуда, сямми козьнавны тэныд тайӧ чушӧсӧ да...»

Чужигас мамыс туналіс пиыслы бать мозыс жӧ му гыркӧ писькӧдчысьӧс, из йирысьӧс. А пиыс наукалань сетчис. Биология да химия сійӧс кыскис. Биоорганическӧй химия институтын и уджалӧ ӧні. Москваын. Кандидатскӧй дасьтӧ. Дедыс, Олег Александрович, топыда видзӧ сійӧс, оз сет личӧдчыны...

Борис Борисович тупйис «Огонёксӧ», гартыштіс трубкаӧн да бӧр сюйис креслӧ зептас. Инмӧдчыштліс суседыслы пельпомас:

— Кывзы, другӧ, ме кӧ тэ местаын отпуск босьті да Валерия Олеговна дорад овмӧдчи. Извинит, ме тэныд сӧвет сета да. Но миян арлыдын татшӧмторсӧ гӧгӧрвоанджык.

— Ме сідзи и кӧсъя вӧчны. Вот сӧмын парткомлысь заседаниесӧ нуӧда и...

— Кор парткомыд?

— Аски кежлӧ индылӧма вӧлі.

— И кутшӧм вопросъяс?

— Быд пӧлӧсыс эм. Приём, 112-ӧд лавасянь 212-ӧ вуджӧм. И нӧшта... Норасьӧм парткомӧ проходчикъяс вайисны.

— Мый йылысь норасьӧмыс? Оз кажитчы пӧдраднас уджавны?

— Мӧдарӧ! Ми пӧ вермим эксплуатационникъяслы выль штрек сдайтны ёна водзджык, шахтаса администрация кӧ ассьыс сетӧм кывсӧ помӧдз кутіс да кодсюрӧлысь стрӧгджыка уджсӧ юаліс.

— На серти кӧ, мыйӧн администрацияыс эз кут сетӧм кывсӧ?

— Борис Борисович, асьныд тӧданныд: ленточнӧй конвейертӧ сёрмӧмӧн нюжӧдісны да и рельса туйсӧ бара жӧ эз ас кадӧ. Чайта, проходчикъясыс правӧсь.

— Да-а? — Борис Борисович дзоркнитліс парторг вылӧ мегыр пыр видзӧдысь вӧв моз.

— Да, — вочавидзис Егор Филиппович да водзӧ нуӧдіс сёрнисӧ: — А тӧданныд, Борис Борисович, гашкӧ, вӧзйыны налы, мед арендаӧ босьтасны? Ме та йылысь ёна нин думайті. Экономистъяскӧд сӧветуйтчи и.

— Но и мый найӧ, экономистъясыс?

— Ми пӧ артыштім да лӧсьӧдім нин шахталы асьсӧ ачыс финансируйтан да ас тшӧт вылӧ бергӧдчыны верман план. Но миян пӧ пока став арталӧм-лыддьӧмыс коллективнӧй пӧдрадӧн уджалӧм вылӧ дасьтӧма.

Егор Филиппович чайтіс, мый броткыны на кутас Борис Борисовичыс, но сійӧ виччысьтӧг сӧгласитчис, мед пӧ пӧдрадалӧны.

* * *

Самолёт салонын стюардесса новлӧдліс лимонад.

Борис Борисович босьтіс кык стӧкан, Егор Филиппович эз ю, ӧти сорысь и сылысь пайсӧ юис, ружӧктіс, чышкыштіс вом дорсӧ да орӧдлӧм сёрнисӧ нуӧдіс водзӧ:

— И нӧшта сёрни эм. Ме тэныд, шогӧ усьӧм мортлы, эг кӧсйы ӧні юӧртны, но збыль кӧ тэ Валерия Олеговна дорад бӧр мунан, некор лоӧ. Ӧні юксьышта. Со мый... Тэд колӧ думыштлыны шахтаса выль юралысь йылысь. Воис кад и меным...

Егор Филиппович сатшис сы вылӧ видзӧдласнас.

— Мый сідз видзӧдан? Том йӧзлы колӧ сетны рульсӧ. Менам чомкост вуджсьӧма. И, чайта, бура вуджи. Шахта миян ӧні ритмичнӧя уджалӧ, буретш и оз ло яндзим вожӧдны кодлыкӧ мӧдлы ношасӧ.

Ачыс аскӧдыс быттьӧ сёрнитіс Борис Борисович. Сійӧс кывзігӧн тасасьліс ловгоршыс Егор Филипповичлӧн. Сылы ньӧти эз вӧв окота торйӧдчыны тайӧ пӧсь сьӧлӧма да этш тӧдысь мортыскӧд. Но кадыс и збыль тшӧктӧ мӧвпыштны томджык веськӧдлысь йылысь.

«Вешйыны ас кадӧ оз быдӧнлӧн выныс тырмы», — думыштіс Егор Филиппович да гораа шуис:

— И менам чомкостӧй топавны жӧ кутіс.

Борис Борисович дӧзмискодь:

— Тэ йылысь сёрни мӧдысьджык лоӧ, партийнӧй собрание вылын. Ӧні ме йылысь мунӧ сёрниыс. Тэ эськӧ кодӧс вӧзъян?

— Сэтшӧмыс менам ӧти эм, но... Ковмас на виччысьлыны. Сэсся ӧд кодӧс коллектив вӧзъяс.

— Коллективлысь ме ассьыс жӧ юала. А ӧні пока тэнсьыд. Мыйла виччысьлыны? Тэ код йылысь шуан?

— Анатолий Моторин йылысь.

— Моторин... Но сійӧс жӧ пуктӧма кольччысь участокын удж ладмӧдӧм вылӧ.

— Ме сійӧн и шуи: виччысьлыны колӧ. Мед сэні асьсӧ помӧдз петкӧдлас, а сэсся тіянӧс вежӧм йылысь мӧвпыштлыны. Ме Моторинлы эска. Сӧмын эн чайт: рӧдпом да сы вӧсна.

— Тӧда: Моторин — зонмыс крепыд. Меным ӧд абу жӧ веськодь, код киӧ сетны ассьым чужтас-быдтасӧс. Шахта — менам и збыль чужтас-быдтас. Ачым кыпӧдлі и сеті сылы комын саяс во.

Борис Борисович ышловзис кузякодь татчӧ, водзӧ сёрнитіс:

— Эг радейтлы туй пом дженьдаммӧм йылысь норасьны, да, буракӧ, чой горув мӧді. Талунъя ыджыд вежсьӧмъясыс абу нин меным. И тэ медводз тайӧс казялін. Ещӧ колян во на. Помнитан: локтісны демобилизуйтчӧм салдатъяс удж вылӧ медасьны. Тэ шуин: босьт! А ме — оз на, мися, ковны миянлы уджалысьясыс дай овмӧднысӧ некытчӧ, воддза босьтӧмаясыс на общежитиеӧ пропишиттӧмӧсь. Тэ бара мем: — Стрӧитчы! А ме... Да мый ӧні сы йылысь гаравны. Правильнӧ сэки тэ менӧ «чинушаӧн» нимтыштін. Юралысьыд коді сійӧ? Коді думайтӧ ылӧ водзӧ, а оз сӧмын талунъя лунӧн ов. А ме тшӧкыда нин водзӧсӧ, перспективасӧ, ог аддзы. Да, пӧрысьми. Томыс — водзӧ вылӧ овны думайтӧ, а пӧрысьыс ас пытшкас лукйысьӧ, ас висьӧмъясас да пойгӧмъясас. И перспективаыс сылӧн со эстӧн, енэжас, райскӧй кымӧръяс саяс. Кымын ӧдйӧ менӧ вештанныд, сымын бур. Кык инфарктыс меным тырмылас.

Тайӧс шуалігӧн Борис Борисовичлӧн гӧлӧсыс вӧлі збодер да весиг ярскӧбкодь.

— Нинӧм нин ӧні мен петушитчыны да шашаритчыны начальник пуклӧс бердас.

Егор Филиппович дрӧгмуныштіс.

— Инфаркт? Бара?

— Да, сӧмын на мездми. Шоныдінсьыс ӧмӧй водзджык эськӧ локті?

Егор Филиппович уна вонад ӧтлаын уджалігӧн зэв бура сійӧс тӧдіс да ӧні жальыс петіс: «Сьӧкыд талы лоӧ торйӧдчыны шахтаыдкӧд...»

Сылы син водзас пыр и сувтіс ветымынӧд воясся олӧмсьыс паськыд ота джуджыд серпас, кор сійӧ, томиник горнӧй мастер, локтіс выль шахта-миллионерша стрӧитанінӧ. И медводзысь паныдасис со тайӧ мортыскӧд, Борис Борисович Маршевкӧд, выль ШСУ-са — шахта стрӧитан управлениеса — юралыськӧд. Сэки кажитчис, биа изйысь тайӧ мортыс. Бикинь чеччыштӧ быд сійӧ тувччӧмысь. Мыйта кад нин сысянь кольӧма! Лыддьы, комын саяс во.

Асьсӧ шахтасӧ стрӧитны абу на заводитӧмны, но том посёлокыс гызис лун и вой, тэчисны брусысь да чукӧртӧм щитъясысь керкаяс выльӧн воысь йӧзлы. Но век жӧ ставыслы юр сюянін эз тырмы. Кытысь и сы мында йӧзыс локтӧ? Быттьӧ сюрӧн кыскӧны, локтӧны и локтӧны. Партияясӧн, ӧткӧн, семьяясӧн, вый тупыль кодь зонъяс, жулик сяма шляйтчысь войтыр, авъя да лабутнӧй верӧсъяс да батьяс.

Сьӧд полушубок пася да пеля шапкаа ШСУ-са юралысь гӧлӧс сибдытӧдзыс сеталӧ индӧдъяс. Кодӧс комендант дорӧ ыстӧ, кодӧс туй вӧчанінӧ, кодӧс шахтаса проходкаӧн веськӧдлысь дінӧ.

Сибдӧмкодь гӧлӧсыс сылӧн кылӧ то ӧти туй вӧчанінас, то мӧдас. Лунтырӧн кысь сӧмын сійӧс он аддзыв. А рытнас, планёрка дырйи, лунтыр котралӧм бӧрад, гӧрд дон чужӧма да раммӧм гӧлӧса, кывзіс отсасьысьясыслысь рапортъяс да пасъявліс аскиа лун кежлӧ могъяс. Дивӧыд босьтӧ, татшӧм кутерьма пӧвстас тырмыліс сылӧн выныс гӧлӧссӧ лэптывтӧг да суетитчытӧг планёркасӧ нуӧдны.

— Но, пыдди пуктана ёртанӧй, вай висьтав, мый талун удитінныд керны, мый эн сяммӧй, аски мый думайтанныд вӧчны? Хорошо. Ме тэ дорӧ нӧшта морт-мӧдӧс ыста... Но кодсянькӧ кывліс кӧ личӧдчӧм либӧ ылӧдчӧм — видзчысь сэк: петшӧралас, сылӧн петшӧрыс абу стрӧг приказ ни яр пинясьӧм, а серам. Сідз нин кыдзкӧ серамвыв лэптіс — мӧдысь он окотит кывзыны. Планёрка вылӧ чукӧртчӧм войтырлысь тшӧкыда позис кывны шмонь сёрни: талун пӧ бара на Бор Борычным бритас юр и тош, портретӧс тшыкӧдас — гортын гӧтырӧй оз тӧд. Эз ӧд ставыс шыльыда да мольыда артмыв.

Маршев пыдди Маршалӧн тшӧкыдджыка и шулісны сійӧс.

* * *

Шуда кад жӧ сійӧ вӧлӧма, сё морӧ!

Кыдзкӧ ӧтчыд татшӧм планёрка дырйи воссис жыр ӧдзӧсыс да тэрмасьӧмӧн пырис еджыд пухӧвӧй шалля да югъялысь сьӧд пася ныв. Ывла кӧдзыдсьыс бандзибъясыс ымралӧны алӧй биӧн, вом доръясас ворсӧ нюм.

— Извинитӧй, пӧжалуйста, ме сёрми, — пыригкостаыс збоя шыасис нылыд да пукалысьяслы ставлы юр копырӧн чолӧм висьталӧм бӧрын, веськӧдчис Маршал пызан дорӧ, пӧрччис еджыдик кепысьяссӧ, чургӧдіс кисӧ:

— Борис Борисович, энӧ дӧзмӧй, чукӧстытӧгыс ачым локті да.

Мӧдыс кыз кабырнас кутыштліс мыччӧм кисӧ нывлысь, индіс пукалысьясӧн тыр скамья вылӧ. Пуксьӧй пӧ, тӧрӧдчӧй.

«Коді тайӧ? Коді тайӧ? — вашкӧдчисны стрӧг чужӧма дядьӧяс. Быдӧн, буракӧ, ас ногыс мӧвпыштіс: ӧтияс косіника кызӧктыштісны, коді пӧ тайӧ татшӧмыс, кыдзи лысьтӧ локны сёрмӧмӧн да тадзикӧн торкны налысь сёрнисӧ. Гашкӧ, кодкӧ партия горкомысь? Но вывті жӧ томиник! Мукӧдыслӧн пыр и дзирдавны пондісны син бугыльясыс, ас тӧдлытӧгныс кутісны шыльӧдны юрсинысӧ.

Ныв пуксис главнӧй механик да главнӧй инженер костӧ воддза радас, дзик Егор Филиппович весьтӧ, коді вӧлі мӧд радас. Ичӧтджык чинаяс дорын.

Сійӧ дзик пыр тӧдіс локтысь нывсӧ да тайкӧ эз горӧд шензьӧмысла да радысла. А кор ныв пуксис сы весьтӧ да пась гӧныс инмыштіс куш киас, чур-чермунліс, быттьӧ пытштіыс ток лэдзлісны.

«Помнитӧ-ӧ менӧ, помнитӧ-ӧ? Вунӧдіс нин, буракӧ. Весиг со менӧ эз и казяв да. Мыйла бара татчӧ локтӧма? Валерия! Да, Солнцева Валерия тайӧ! Олег Александровичлӧн нылыс!» Нылыд сёрнитнысӧ петіс Маршев пызан дорӧ. Исыштіс сынӧдсӧ, серӧктіс:

— Куритӧмныд! Гашкӧ, форточкасӧ восьтамӧй?

Дивитыштіс нылыд, да морт-мӧд уськӧдчис форточка восьтыны. А Борис Борисович мудера читкыртліс синсӧ, чабыртліс ыджыд нырсӧ:

— Да, ёртъяс, некутшӧм яндысьтӧг куританныд. Этайӧ вый латкатӧ и збыль колӧ шыбитны.

— Ыстісны менӧ татчӧ восьтыны выль детскӧй сад тіян посни челядьлы. Ӧти группа лои восьтӧма нин ичӧтик финскӧй керкаӧ...

Кодкӧ водзас пукалысьяс пӧвстысь торкис сійӧс:

— Барышняӧ, гашкӧ, тані огӧ кутӧй детсад йывсьыд сёрнитны?

Сылы нӧшта гӧлӧс-мӧд отсыштісны, нинӧм абу вӧснаыс пӧ и збыль нинӧмла кадсӧ сёйны.

Но ставнысӧ шензьӧдіс снегурочка-нывлӧн асьсӧ кутны кужӧмыс. Сылӧн быттьӧ и ловгӧныс эз вӧрзьы. Мичаа нюмдіс:

— Ме абу «барышня», менӧ шуӧны Валерия Олеговнаӧн. А детсад йылысь буретш тані и сёрнитыштны колӧ.

Сылӧн гӧлӧсыс зэлалыштіс, нюмыс чужӧм вывсьыс воши.

— Ме кӧсъя, дона ёртъяс, медым тіян удж вылад посни челядь вӧсна сьӧлӧмныд эз вись. А челядьыс мед локтісны садйӧ окотапырысь. Вот и ставыс. Сад пытшкас найӧс гажӧдны да велӧдны — миян мог. А вот петасны кор ывлаӧ, ме ог кӧсйы, медым челядь сӧмын котралісны да тойласисны. Кора дасьтыны площадкатор, мед сэні и чомйыд, и качайыд, и машинаыд, и исласян чойыд вӧлі. Мед челядь вермисны ворсны и физкультураӧн занимайтчыны... Аддза, бара кӧсъянныд паныдавны. Но ме шуа тіянлы: тайӧ челядьыс водзӧ вылӧ — тіян кадръяс. Кольӧ кутшӧмкӧ дас, дас вит во, и найӧ локтасны ті дорӧ уджавны. Ме чайта, миян ичӧтик корӧмным оз ёна манит тіянлысь зэв важнӧй уджтӧ вӧчны.

Татчӧ ныв ланьтыштліс, сэсся серӧктіс да содтіс:

— Ме со весиг сьӧрысь вайи чертёжъяс, ог тӧд, босьтанныд он. Ме сёрнитлі нин та кузя пыдди пуктана Борис Борисовичкӧд, но стӧч вочакыв эз вӧв. Та вӧсна тарыт и локті татчӧ. И ог мун, кытчӧдз оз ло вочакыв. Стӧч кыв. Ылӧсас сёрни-басни мен оз ков.

Пукалысьяс пӧвстын унаӧн нин вашъялісны, ошкисны нывлысь кӧсйӧмсӧ. Кодсюрӧ пондісны вӧрӧшитчыны, увгыны, но сёрнитысьыс лэптыштіс кисӧ, эг на пӧ помав. Збоя шуис:

— Тайӧ менам первой сёрни. Эм нӧшта мӧд. Вот миян новостройка, выль посёлок. Нимыс мем сэтшӧма кажитчис! Музыкальнӧй кутшӧмкӧ — Верди! Мем висьталісны: тайӧ пӧ роч ног дзугӧм коми кыв «Вӧр ді». Мед лоас Вӧр ді, чайта, великӧй композиторыс оз ӧбидитчы. А вот выль посёлоканым мед оз жӧ вужъясьны лёкторъясыс да ковтӧмторъясыс. Тӧрыт посёлок кузя бовъялісны садьтӧм код зонъяс да равзісны-сьылісны улич тырӧныс. Мый сьылісны — бур, а мый кодӧсь — яндзим. Мыйкӧ ӧдйӧджык колӧ вӧчны, ёртъяс. Ичӧтик клуб кӧть восьтыны. А ковмас кӧ месянь кутшӧмкӧ отсӧг... Ме эськӧ радпырысь босьтчи самодеятельнӧй кружок нуӧдны. Да и тіян пӧвстысь сюрасны, шуам, шахматӧн ворсысьяс. Унджыкыс ӧд том войтыр тані... Ме помалі. Эн дивитӧй, маниті кӧ.

Сёрни бӧрас ныв мӧдіс аслас местаӧ да друг паныдасис Егор Карманов синъяскӧд. Эз вермы не паныдасьны, ӧд Егорлӧн синъясыс ӧзйисны да сідз чуксалісны.

Ныв здук кежлӧ падмыштліс да сэсся эз весиг пуксьы, бӧр бергӧдчис пызан дорас, юӧртіс:

— Ёртъяс, ме кӧсъя шуны: бур войтыр шахта стрӧитанінӧ воӧмны! Со ӧтиӧс ме аддза! Сы йылысь ме сы мында бур шуӧмъяс кывлі! Со сійӧ — Егор Филиппович Карманов, пукалӧ чӧліника. Да чолӧм жӧ, Егор. Менӧ помнитан?

Кыкнан кисӧ нюжӧдӧмӧн, ныв мӧдіс веськыда Егор дорӧ, воськовтіс воддза радсьыс скамьясӧ, копыртчылӧмӧн инмӧдчыштліс чужӧмнас Егор чужӧмӧ.

Нывлӧн татшӧм лов ыззьӧмыс унаӧс тешитіс. Кодкӧ гӧрӧктӧмӧн серӧктіс, горӧдіс:

— Дак сійӧ миян абу гӧтыра! Тэ кӧ абу верӧс сайын, гӧтралам! Первой свадьба выль посёлокын лоӧ!

Егор яндзимысла ставнас ыпмуніс, пукаліс гӧрдӧдӧм чужӧма.

Планёрка вылысь разӧдчисны тайӧ разыс кыпыд сёрниӧн да шутка-серамӧн. Ачыс Борис Борисович, кылӧ, шуис кильчӧ помас:

— Аддзылінныд? Со кыдзи колӧ босьтчыны удж бердас!

— Ме эськӧ видзчыси на тадзтӧ ошкӧмысь, — кыліс главнӧй инженерыслӧн гӧлӧсыс. — Нывка, вежавидзтӧм.

— А мыйла черемонитчынысӧ, абу ӧд кикутанінын нылыс? — дорйис кодкӧ Валерияӧс.

* * *

Медбӧрын найӧ ас кежас колины, кор разӧдчисны планёркавывса войтыр. Енэжас яра дзирдалісны кодзувъяс да гӧгыльвидзис тыр тӧлысь. Веж морозысла лымйыс кок уланыс ойӧстӧмӧн дзуртіс. Улича пӧлӧн тёпвидзысь финскӧй керкаторъяслӧн ӧшиньясыс югыдӧсь на, кӧнкӧ рабочӧй баракъяс дорын кылӧны том йӧзлӧн гора гӧлӧсъяс. Посёлок оз на узь.

— Тэ мыйла менӧ янӧдін? Сідз ме йылысь висьталан йӧзыслы, — первойӧн торкис чӧв-лӧньсӧ Егор.

— А мый нӧ, ме нинӧм абусӧ висьталі? Мед тӧдасны, код вылӧ позьӧ пыксьыны. Да мед активизируйтчасны. Мукӧдыс ӧд, он кӧ кыскы, дзикӧдз кусӧны. Мортыс мортсянь ӧзйӧ.

— Сідзкӧ, тэ ногӧн ме — эсійӧ «мукӧдыс»?

— Гашкӧ и... — ныв серӧктыштіс да друг юаліс: — Позьӧ ӧтитор юавны?

— Юав, сямма кӧ, вочавидза.

— Сямман. Эн на гӧтрась?

— Мамӧ эськӧ быд письмӧын тшӧктӧ, да невестаыс оз сюр.

— Да-а?

— Да.

— А честнӧ, сӧмын честнӧ, ме йылысь казьтыштлін коркӧ?

— Быттьӧ он тӧд. Письмӧ и быдӧн ыстылі да.

— Ой, ме сійӧс вунӧді! Аттьӧ, воліс ӧтик. Гижӧмыд, воліс, папатӧ пӧ тэнсьыд зэв ёна радейта! — ныв бара кыпыда серӧктіс.

Водзӧ найӧ мунісны сёрниттӧг. Егор чайтіс, мый ныв сы вылын смекайтчӧ, но терпитіс, эз дӧзмы. Мед сӧмын ачыс нылыс оз пышйы сы дорысь-а. Ӧні, кор выльысь аддзис тайӧ нывсӧ, воштыны некыдз оз нин позь. И вӧчас ставсӧ, мед сылы кажитчыны. Кокниа ныв дорысь ӧні оз нин эновтчы.

Ӧтик финскӧй керка дорын Егор сувтіс.

— Со менам керкаӧй. Сэн ичӧтик жыр менам дзик ӧтнамлӧн, — юӧртіс Егор.

— А ӧтнадлы абу гажтӧм?

— Ог соссьы: гажтӧм. Ме эськӧ рад вӧлі, ті кӧ сійӧ жыръяс тшӧтш олінныд.

Егорлӧн тайӧс шуӧмысь быттьӧкӧ ловгоршыс тасасьліс, тайкӧ оз пӧд. Но шуны — шуӧма, и мый лоны — ло.

Мӧдыс гора кӧлӧкӧльчик моз мӧдіс серавны:

— Но, Карманов! Тэ ёна вежсьӧмыд бӧръя кадас! Вельмӧмыд! Тэ он-ӧ нин корав менӧ тадзикӧннас? А, Карманов?

Зон ӧбидитчис, нурбыльтіс:

— Мӧд ногыс ме ог куж.

— Но вот... Ме, думысь, ошкышті, а тэ и дӧзмин, — вильшалыштіс ныв да сэсся друг юаліс:

— Пӧлинӧ, мыйла менам бать йылысь нинӧм он юав? Сійӧ тэнӧ век гаралӧ-а.

— Олег Александрович йылысь мем Моторинъяс гижлісны.

— А-а, Миляяс! Но и мый гижлісны?

— Мый... Ӧні пӧ Воркутаын. Аддзывлам пӧ сійӧс. Тэныд привет тшӧтш сысянь.

— И сӧмын?! А папочка ӧд менам диссертация гижны пуксис! Оз кӧ тулыснас бӧр тундраӧ пышйы. Бара ӧд кутшӧмкӧ выль экспедиция думыштас. Папочка ӧд менам сэтшӧм... Москваӧ ӧні муніс. Регыд бӧр локтас. А ме йылысь Миля нинӧм эз гижлы? Ме помалі институт, локті бать дорӧ уджавны. А менӧ со татчӧ, выль шахта стрӧитанінӧ, тювгисны, ветлы пӧ, сэтысь кӧть Карманов Егоршатӧ аддзылан...

Сераліс ныв, вильшаліс Егоршаӧс, но эз дӧзмӧд сылӧн вильшасьӧмыс, мӧдарӧ на — нимкодь вӧлі. Ӧд эз тэрмась Валерияыс пышйыны сы дорысь.

* * *

Самолёт пондіс пуксьӧдчыны. Стюардесса лӧсьыдик гӧлӧсӧн юӧртіс места вылӧ воӧм йылысь.

Бетон вывті таркӧдӧм бӧрын налӧн ТУ-ыс сувтіс. Дзиньгыштіс моторыс, сэсся салонын лои пель чунӧдан чӧв-лӧнь. Сӧмын кӧнкӧ ывлаас кылісны гӧлӧсъяс да служебнӧй юкӧнсянь кылыштіс дозмукӧн гольскӧм шы. Пассажиръяс вӧрзисны, пондісны чеччавны места вывсьыс.

— Ог тӧд, миянлы машинасӧ ыстісны эз. Тӧрыт эськӧ звӧнитлі да, — самолётысь петігӧн маитчыштіс Борис Борисович.

Шахтаса начальниклы машинасӧ ыстӧмаӧсь. Шоперыс петанінас нин сійӧс виччысьӧ. Нюмвидзӧ. И со нин тӧвзьӧны найӧ уазикын рӧднӧй посёлокланьыс.

А скоднӧя, бура думыштлӧмӧн, планируйтлӧмаӧсь татчӧ стрӧитчынысӧ. Туй ӧтар бокас тундра, дзик куш эрд пласьтвидзӧ, сӧмын шахтаыс тундра шӧрас часӧвӧй моз сулалӧ. А туй мӧдарас — вӧр. Вӧр пытшкас и посёлокыс пуксьӧма. Сійӧн и «Вӧр ді» нимсӧ пуктылӧмаӧсь. Ӧні эськӧ пуясыс ёна нин шочмӧны да. Сад пыдди сӧмын нин и кольӧма. Посёлокыс ӧд быдмӧ. Стрӧйбаясыс со дзик туй дорас нин воӧмаӧсь. Гырысь, мича, уна судта керкаяс. Посёлок шӧрас, ылысянь тыдалӧ, зымвидзӧ культура керка.

Ӧні со бара, керкасӧ аддзис да, Егор Филипповичлысь кырыштіс кыткӧ лов пытшсӧ. Абу, дерт, культура керкаыс мыжа. Мыжа культура керканас веськӧдлысьыс Томас Хватов. Мӧвпыштны кӧ, смек и грек артмӧ налӧн Хватовыскӧд. Быттьӧ кодкӧ кӧвъялӧма найӧс. Экспедицияас ӧтлаӧ веськавлісны дай татчӧ тшӧтш. Буракӧ, рӧксьыд он пышйы. Локтіс татчӧ Хватов, кор посёлокас лыбис ыджыд да мича выль культура керка. Воссигкежлас и явитчис — директор. Киняулас портфель.

— У-у, Карманов кӧ тайӧ-а! Едриттвой! Встреча старых друзей!

Тадз найӧ паныдасисны посёлокса улича вылын. Егор Филиппович буретш локтіс шахтасянь войся смена бӧрын: мудз, тшыг, гын сапӧга да полушубок пася. Кадыс март пом нин кӧть вӧлі, войяснас ёна на трачкакылісны кӧдзыдъяс. Но Хватовлы мартпомса морозъясыд, буракӧ, тшаква нин. Тувсов моз пасьтасьӧма — шляпаа да макинтоша. И сӧмын кокас абу туфли, а еджыд фетрӧвӧй бурки, кутшӧмӧс новлісны сійӧ кадас гырысьджык чина войтыр.

— Шуан, муркӧдчан шахта стрӧитанінын? Ме, кыдз культура фронт вылын уджалысь, приветствуйта от всей души! — Егор Филипповичӧс юр вывсяньыс да кок улӧдзыс дзоргӧм-донъялыштӧм бӧрын чолӧмасис сійӧ да ошйысьыштіс и аслас геройскӧй олӧм-вылӧмнас.

— А менам, кыдз аддзан, ставыс в ажуре. С блеском помалі культпроска Свердловскын и айда татчӧ, войвылӧ! Филармонияӧ кольӧдісны, Свердловскӧ, ыджыд музыкальнӧй карӧ, а ме, значит, кыдз романтик... И шуда, мый веськалі татшӧм ыджыд стройка вылӧ. Кыдз шуласны, и миян пай лоӧ пуктӧма!.. А тэ тӧдан: Солнцева Валерия тан жӧ! Тӧрыт культура керкаысь аддзи! Олег Александровичлӧн нылыс!

— Тӧда, — серӧктыштіс Егор Филиппович. — Сійӧ менам гӧтыр.

— Солнцева — тэнад гӧтыр? Но и но! Оз эскыссьы. Поздравляйта...

— Аттьӧ. Регыд кутам пасйыны кык вося юбилей.

— Ме этайӧ... Маршев дорӧ мӧдӧдчи. Извинит, коркӧ аддзысьлам на.

Аддзысьлісны, дерт. Аддзысьлытӧг эз овны, сы мында во нин ӧти посёлокын олӧны да. Егор Филиппович сійӧс быд сикаснас нин аддзыліс. И кор Хватовлӧн юрыс и бӧжыс вӧвлі ӧтвылнаын, и кыдзи вегыль моз веглясьліс, и кыдзи коклябӧръяссӧ нювліс. И став тайӧтор вылас сылӧн кутшӧмкӧ торъя талант вӧлі. Да и он мырддьы сылысь йӧзсӧ гажӧдны кужан сямсӧ.

Егор Филиппович ни ӧти абу прӧтив, медым оліс найӧ посёлокын да гажӧдіс йӧзсӧ татшӧм мастер специалист. Но мыйӧн казьтыштас гӧтрасьӧмбӧрса том кадсӧ, мустӧм ачыс аслыс лолӧ да и Хватовыс тшӧтш. Ӧні, уна во кольӧм бӧрын, гашкӧ, позьӧ шуны: дзик нинӧм вӧснаыс пӧ, йӧйталӧм вӧсна. Кыдзи клуб сцена вылас кутасны йӧктыны да сьывны ӧтлаын Хватов да Валерияыс, йӧзыс ставыс «бис!» горзӧны. А Егор, Валериялӧн дона верӧсыс, йирӧ пиньяссӧ, лёкысь песлалӧ чуньяссӧ. Вежӧгтӧ. Сылӧн вежӧгтӧмыс аслыссяма, буракӧ, тайӧ абу и вежӧгтӧм, а мыйкӧ дзик мӧдтор. Оз ӧд пов гӧтырсӧ мырддьӧмысь ли мый ли, а быттьӧкӧ зывӧктӧ, мый Хватовыс пеж кинас кутлӧ сылысь гӧтырсӧ, сӧстӧм да югыд Валериясӧ. Валерияыс гӧгӧрвотӧг эз ов верӧсыслысь дузъялӧмсӧ да вежӧгтӧмсӧ. Первойсӧ сійӧ дэльӧдлывліс Егоршаӧс.

— Карманов, да тэ он-ӧ вежӧгты менӧ Хватов дорас? Йӧюк, эн асьтӧ увтырт, ог радейт увтырасьысьяссӧ. Да, ог суссьы: нимкодь мем сыкӧд сцена вылас, сы вӧсна мый сійӧ профессионал. Но ме ӧмӧй тэнӧ ог радейт? Тэныд мекӧд лёк? Гажтӧм? Няйт дӧрӧмӧн да тшыг ветлан?

— Валерия, донаӧй, любӧ тэ меным, и быд боксянь бур. Сӧмын эн сувт эсыкӧд йӧктынысӧ, — кевмысьӧ-корӧ верӧсыс.

— Но мыйла? Мыйла оз позь! — скӧрмӧ Валерияыс.

Но, чёрт возьми, кыдзи Валерияыслы сюйны юр вемас ассьыс казялӧм-гӧгӧрвоӧмсӧ? Он ӧд сылы висьтав Хватовлысь коркӧя ошйысьӧмсӧ.

Медбӧрын гӧгӧрвоис жӧ, тыдалӧ, Валерияыс, мый дой вӧчӧ верӧсыслы, ӧтчыд шуис:

— Ладнӧ, тэд кӧ оз кажитчы, ог сувт сэсся Хватовкӧд, но сідзи и тӧд: сцена ме ог эновт, ме кӧсъя овны тыр вир-яйӧн. Луннас удж вылӧ петыштлӧмыд меным зэв этша. Меным унджык колӧ, медым сьӧлӧмӧй бурмис. Ме тэныд висьтавлі нин, кыдзи Ленинградскӧй блокадаын куліс мамӧлӧн чойыс, тётя Полина. Кулігас мен наказ сетліс. Ловйӧн кӧ пӧ колян, нывкаӧй, ов миян ставӧн пыдди. Со ме и кӧсъя овны.

Татшӧм бура-лёка зурасьлӧм бӧрас налӧн пуксьыліс зарни кад, ӧта-мӧдсӧ сьӧлӧмсянь радейтӧм, быд кызӧктӧм да быд лӧвтыштӧм казялӧм, быд лоӧмтор и кывлӧмтор ӧтлаын видлалӧм-сёрнитӧм.

Сійӧ кад йывсьыс позис, дерт, унатор казьтыштны, но Егор Филипповичлӧн медъёна вежӧрас кольӧма, кыдзи сійӧ рытъяснас, удж бӧрас тэрмасьӧмӧн вежліс паськӧмсӧ да петаліс клубӧ Валериясӧ встречайтны. Шудаӧсь, волісны найӧ гортас, ужнайтлісны, сэсся водтӧдзыс варовитісны-юксьылісны мӧвпъяснас, мечтаяснас.

Ӧтувъя интересъясыс том гозъяӧс нӧшта на ёна йитісны: тайӧ кадас налӧн чужис пи. Кутісны быдтысьны. Хватов лои Егор Филипповичлы веськодь: Валерия вӧснаыс эз нин пов.

А со ӧд кыдзи, вӧлӧмкӧ, артмӧ, батьыс эз вермы, да пиыс ӧні со кыдзи кӧмӧдіс.

* * *

Водзті морӧс пасьтанас ветліс Хватов. Мунӧ посёлок улич кузя, кокъясыс муас оз инмыны. Ӧні арлыдыс талялӧма. Восьласыс абу важкодь. Со, коньӧрӧ, ӧтторъя воськов вӧчӧ, мед, загреки, аняби кодь том гӧтырсьыс не жӧ кольччыны. Гӧтырыс тувччӧ — сарапан бӧждорыс лӧз биӧн дзалкнитлӧ, киас сумкаыс чеччалӧ-йӧктӧ. Аддзӧмаӧсь Егор Филипповичӧс, рӧднӧй дорӧ моз котӧртӧны. Гӧтырыс верӧссӧ туй джынъяс колис.

— Ой, Карманов ёрт, ми ӧд буретш тіянӧс и кӧсйим аддзӧдлыны! — суӧдіс Егор Филипповичӧс, кашкӧ. Лолыс шедыштіс, пыр и пондіс каттьысьны: — Юсьтик миян лагерсьыс воис. Кутшӧм имеитіс право Валерия Олеговнаыд вӧтлыны зонкасӧ? Ӧтнасӧн. Сійӧ ӧд миян некытчӧ на миянтӧг эз петав. Ставнас нюкыртчӧма да вижӧдӧма коньӧрӧй... Томик, да Томик! Лок ӧдйӧджык! Он мӧй аддзы, синваӧй сідзи и петӧ, носӧвиктӧ кӧть вайлы! — Тайӧ нин верӧс вылас ыджыдалыштіс нывбабаыд.

«Томик... Юсьтик... Кыдз бара абу дыш тадзсӧ тетькӧдчыны? Регыд армияӧ мунан кад пиыслы, а найӧ век — Юсьтик!»

Егор Филипповичӧс тайӧ сэтшӧма скӧрмӧдіс, тірзьӧм быдӧн босьтіс. Скӧрысла эз и другӧн вежӧрт, мый век жӧ бур юӧр вайис тайӧ биа висьӧм кодь мустӧм вома нывбабаыс. Юсьтикыс гортас, аддзысис — ӧти шог быри. Но кыдзи лысьтӧ эсытшӧм быдтасыслӧн мамыс мыжавны Валерия Олеговнасӧ, коді найӧ пи вӧсна муртса ловсӧ эз сет.

Шуан да шуӧма лоӧ, а кутчысьны быть колӧ, татшӧмъясыдлы сӧмын сет пинясян помкасӧ. Егор Филиппович сулаліс гортас пыран туй вылын нинӧм шуавтӧг да кывзіс Хватов гӧтырлысь пинясьӧмсӧ. Сы коста на дорӧ локтіс и ачыс Хватов, шляпасӧ пӧрччӧмӧн копыртчыштліс.

— Приездом ли мый тіянӧс, Егор Филиппович? Висьталӧны: Сыктывкарӧ мунӧмныд. Гӧтыр дорад лагерӧдзыс ветлінныд эн? Пацаныс миян локтіс...

— Мыйла локтіс, чайта, ачыс висьталас муса пиыд. А ме тіян кага бӧрся вӧтлысьны эг на медасьлы! — ярскӧбакодь и артмис сылӧн вочакывйыс. Но мӧд ног эз нин вермы. И сулавны сэсся тан накӧд эз жӧ вермы. Мӧдіс кильчӧланьыс.

Хватов гӧтыр чуш-чаш шашаритчис верӧсыслы сояс, чилӧстіс:

— Томик, лок! Колам тай ми тайӧ бюрократыслы! Быттьӧ управаыс оз сюр! Мунам!

— Розуня, шаньлы! — кутліс жӧ пыксьыны верӧсыс, да мӧдыс трактор моз пондіс кыскыны сійӧс сьӧрсьыс.

* * *

Ӧтчыд ӧмӧй тадзсӧ Егор Филипповичкӧд вӧвлі: пырис гортас, а сэні шыч ни рач, некод оз шыась, гӧтырыс абу гортас. Но некор эз чайтлы, мый ӧтнас да гажтӧм.

А талун, мыйӧн воськовтіс порог вомӧныс, пыр жӧ увкнитіс сы вылӧ сьӧд гажтӧм. Йирмӧг быдӧн босьтіс. Ветлӧдлыштіс ӧти жырсянь мӧд жырйӧ, петаліс кухняас, ӧшинь пырыс видзӧдліс ывлаас. Некыдз инас эз ӧшйы. Ӧшинь вылас яр бипурӧн сотчисны дзоридзьяс да лажмыдик пу ящикын зарвидзисны Валериялӧн радейтана быдтасъясыс — кактусъяс. Ӧти со и дзоридз лэдзӧма — ичӧтик алӧй бипуртор.

Егор Филиппович быдӧн повзьыштіс, тракнитіс юрнас. Сылы кӧ каститчӧ нин-а? Ичӧтик нывка гӧлӧс и збыль быттьӧ мыш сайсяньыс шуалӧ:

— Зарни тэ менам, кактусик тэ менам! Тэ кутан быдмыны ӧшинь вылын и ӧти гажа лунӧ лэдзан сэтшӧм мича дзоридз...

Челядьдырсяыс, коркӧ зэв важӧнсяыс кымынӧдысь нин тайӧ бӧръя лун-вояс вӧзйысьліс сійӧ вежӧрӧ, сувтліс син водзас. Некыдз эз вермы мынтӧдчыны майшасян думъяссьыс.

* * *

Сыктывкарӧ мунтӧдз на тані кос да жар поводдя сулаліс. И талун со бара на пӧсь, быттьӧ абу и Полярнӧй кытш сайын.

Егор Филиппович гортсьыс петіс сійӧ жӧ паськӧмнас, мыйӧн воис Сыктывкарсянь. Костюма, галстука. Тундра кушинӧ петӧм бӧрын сійӧ разис пинжак кизьяссӧ, личӧдыштіс галстуксӧ. Позис кӧ, и майка кежсьыс на пӧрччысис, тӧлӧдыштіс да пальӧдыштіс жуялӧм ки-коксӧ. Кымын вой нин ӧд бурасӧ эз узьлы, руш кушман кодь лоӧма.

Тундра паськыд эрд вылад, майбыр, пыр тӧлакодь. Ӧні гожся жарнад сэтшӧм и любӧ тӧвруыс. Тӧвнас кӧ тундра эрдыс шыльквидзӧ еджыд эшкын улын. А то и вой кыа на ворсӧдчӧ. Но корсюрӧ ышмылӧ тундра. Омлялӧ да бӧрдӧ, сералӧ да горзӧ сэк шыльыд эрдыс. А енэжыс да муыс ӧтгудыр гудыртчӧ, гумыльгаӧн бергӧдчӧ быд лым чир.

Тайӧ Войпель, татчӧс кӧзяиныс, петӧма гуляйтны. Став сивко-буркосӧ доддялӧма, став сьылысь-йӧктысьсӧ и бӧрдӧдчысьсӧ босьтӧма сьӧрсьыс. Эн лысьт, морт, тайӧ здукас петны эрд вылӧ.

Веськавліс неӧтчыд сійӧ гумыльга улас Егор Филиппович. А век жӧ, йӧзыс вынаджыкӧсь Войпельысь. Йӧз петӧны шоныд патераясысь любӧй поводдя дырйи, мунӧны тундра эрд шӧрас зымвидзысь шахталань, кодӧс асьныс жӧ и зымгисны да коді ӧні, гӧрд звездаа часӧвӧй моз, оз и эновтлы вахтасӧ. Копер вылас сылӧн куслытӧг ломалӧ би, да дугдывтӧг бергалӧ шкивыс. Из шом тыра составъяс ӧта-мӧд бӧрсяыс гымӧдӧны-мунӧны кӧрт рельсъяс кузя став страна пасьтала. Тулыснас тундралӧн эрдыс гажтӧм, и сӧмын гожӧм шӧрнас вӧччас веж паськӧмӧ, гожӧм помланьыс озырмас быдсяма дзоридзнад и вотӧснад. Ӧти тайӧ кад радиыс позьӧ радейтчыны тундра-матушка вылӧ нэмыд кежлӧ. Кӧвъясис и Егор Филиппович сы бердӧ. Стӧча кӧ, ӧд кольӧма тані комын куим во.

Сы мында вонад мыйӧн сӧмын эз уджав Егор Филиппович. И сменнӧй мастернад, и мастер-взрывникнад, дас во пӧшти веськӧдліс проходческӧй участокӧн, и со, бӧръя квайт восӧ, парткомын секретар. Коммунистъяс сылы эскӧны. Сьӧлӧмнад кӧ маитчыны да тӧждысьны шахта вӧснаыс, уджыс парткомад юр вывтіыд. Сы ыджда коллективас абу на быдӧн ангел, эмӧсь на и удж торкалысьяс, и дышӧдчысьяс, и ылӧдчысьяс, и гортас кампужитчысьяс. Шуласны тай: семьяыд пӧ абу урӧдтӧм.

А семьяыс налӧн ыджыд. И колӧ шуны: Егор Филиппович ставнысӧ шахтасьыс тӧдӧ, веськӧдлысьяссянь да столӧвӧйын пусьысьӧдз.

50–60-ӧд воясӧ шахтаас унджыкыс вӧліны вайӧдлӧм йӧз, Сталин дырйи репрессируйтӧмъяс. Водзӧ вылӧ найӧс вежисны томджыкъяс, бара жӧ тані пукалӧм бӧрас кольччысьяс, но и страна пасьтаысь быд пельӧсысь воӧм том йӧз. Унджыкыс на пӧвстысь «кузь рубладжык» воӧны. Стӧча кӧ шуны, татшӧмъясыс уджалӧны бура, уджавтӧгыд кузь рубыд оз чукты. Но Егор Филиппович пондіс гӧгӧрвоны, кутшӧм веськодь налы мукӧдторйыс. Курыштны унджык, а сэн сэсся кӧть турун сі оз пет, кӧть рака оз кравкнитлы. Тадзи и юралысьяс, и рабочӧйяс. Ӧні шахтагӧгӧрса веж тундраыс дзик нин абу сэтшӧм, кутшӧм вӧвлі сійӧ 50–60-ӧд воясӧ. Ставсӧ талялӧма да варӧдӧма машина кӧлесаясӧн, тыртӧма быдсяма кламнас.

Егор Филиппович аддзӧ тайӧс ставсӧ, а норасьны, быттьӧкӧ, и абу кивыв. Партийнӧй секретар, а мый вӧчис, медым, шуам, сійӧ жӧ шахта гӧгӧрсӧ эз тыртны породасьыс из толаясӧн да шыблас, из шом шлак гӧраясӧн.

Километр кык лоӧ посёлоксянь шахтаӧдз. Пока восьлаліс партийнӧй секретар тайӧ кык километрсӧ, унатор бергӧдіс юр пырыс. Маитчис, дерт жӧ и, кыдзи аски мунас парткомыс. Ачыс вит лун-воя эз вӧв гортас, ставыс-ӧ дась парткомса ёртъясыслӧн, бура-ӧ лӧсьӧдчисны тайӧ чукӧртчылӧм кежлас.

Уна пӧлӧс думъяссьыс да маетасьыс весиг вунӧдчыліс аслас курыд шог йылысь. Но мыйӧн пырис шахтоуправлениеса вестибюльӧ, бара на больничаын куйлысь гӧтырыс тӧд вылас уси. Водзті быд пӧрйӧ, кыдзи пырас Егор Филиппович татчӧ, сылы лоліс долыд сьӧлӧм вылас: веськалан быттьӧ садйӧ, веж быдмӧгъяс быдлаын, весигтӧ йирксӧ кутысь кык колонна гартчӧмны веж лианаӧн. Шахталӧн тӧвся садйыс чуймӧдлӧ унаӧс, коді волӧ на ордӧ кыськӧ мӧд карысь, министерствоысь ли, опытӧн юксьыны волысьяс ли. Да и удж вылӧ медасьны локтысь войтыр. Ывлаас пӧ веж мороз, а тіян кыпъялӧны веж быдмӧгъяс.

Кӧсъян, он кӧсйы, а ичӧтик нывкалӧн вой муӧ кактустор нуӧмыс вежӧртӧ вӧрзьӧдӧ, тыртӧ казьтылӧмъясӧн, гӧрдитчӧмӧн. А талун со и нормӧдіс на Егор Филипповичӧс. Но дыр песны морӧспытшса кылӧм горсӧ эз жӧ вермы. Син улас уси самӧй тыдаланінас ӧшӧдӧм кузь кумач от, кытчӧ гырысь шыпасъясӧн вӧлі гижӧма: «Проходчики 7-го участка! Обеспечим своевременный переход передовому добычному участку с пласта Третьего на Четвёртый!»

Буретш и тайӧ шыӧдчӧмсӧ ӧшӧдысьясыс танӧсь на. Шахтаса художник да сизимӧд участокысь начальниксӧ вежысь. Вӧчӧмторнас нимкодясьӧны. Ӧтиыслӧн киас мӧлӧт да кӧрт тувъяс, мӧдыслӧн — улӧс.

— О, Карманов! Кузь и кокыд: муртса гаралім! Локтін нин?

— Вои со... — киасигмоз Егор Филиппович индіс кумач от вылас: — Тайӧс кыдзи гӧгӧрвонысӧ?

— Тайӧ... — участокса начальникӧс вежысь йирыштіс вом дорсӧ. — Тайӧ — сідз шусяна нагляднӧй агитация. Смена вежсиг кежлас со шлапкимӧ.

Сылӧн улӧсыс ӧти кисяньыс вуджис мӧд киас, нӧшта содтіс: — Ассьыным войтырӧс корам татшӧм ногӧн нӧшта зільмыны.

— Аддза: коранныд. Но мый радиджык, ме ог гӧгӧрво?

— Мый ради? — курыда нюмкерис висьтасьысьыс: — Пикӧ воӧма Моторин участокса Расовлӧн бригадаыс, коді сідз нин кольччис да вӧлі партком контроль улын. Зурасьӧма чорыд песчаник вылӧ, комбайнлӧн победита пиньыс весиг сійӧс оз йир. Ки помысь проходчикъяс заводитісны уджавны. Пола, мый лаваӧ вуджан туйсӧ ас кадӧ ог вермӧй писькӧдны. Ӧдсӧ ёна лоӧ чинтӧма, — помаліс ассьыс висьтсӧ участокӧн веськӧдлысь Моторинӧс вежысьыс.

— Да. Ӧтарӧ кӧ мӧдас, ӧтарӧ нин, — кайтыштіс партийнӧй секретарыс да тэрмыштчис вылӧ катӧдан послань. — Ачыс, Моториныс, тані?

— Наряднӧйын, — кыліс вочакыв.

Дзик пыр, некытчӧ кежавтӧг и мӧдіс Егор Филиппович сизимӧд участокса наряднӧйӧ, пырис. Моторин буретш телефон пыр сёрнитӧ, ӧдзӧсыслы мышкӧн сулалӧ, гӧлӧсыс чорыд. Пырысьлӧн шы-тӧлыс здук кежлӧ нетшыштліс сійӧс телефон трубкасьыс, и Егор Филиппович аддзыліс, кутшӧм блед чужӧма Моториныс, вежайӧн шуысьыс, Лина воча чойыслӧн чурка быдтасыс.

Трубкасӧ пуктӧм бӧрын сійӧ шыасис Егор Филиппович дорӧ, быттьӧ сійӧ эз муртса на пыр, а пукаліс тан важӧн нин.

— Кывлін? Кутшӧм скӧр гӧлӧсыс.

— Кодкӧд сідзсӧ сражайтчан, вежапи? Бледӧдӧмыд быдӧн.

— Бледӧдан... — кайтыштіс вежапиыс да быттьӧ вӧлись гӧгӧрвоис, коді сы водзын, горӧдіс: — Егор дядь! Вежай! — кватитіс кыкнан кисӧ дядьыслысь. — Воин нин? Но мый сэні? Висьтась! Мый Валерия Олеговнаыдкӧд?

— Висьтала, Анатолий, висьтала. Ставсӧ бӧрас висьтала. Мамыдсянь поклон вайи. Но пока ог бура тӧдмав, мый тіян, ог вермы висьтасьны.

— Миян... Да миян ставыс бур. Уджалӧны. А мый дзескыдджык, ачыд тӧдан: абу войпук вылынӧсь. Шахта — шахта и эм...

«А молодеч Линалӧн пиыс! Оз норась», — Моторин дорысь петігӧн мӧвпаліс Егор Филиппович да мыйлакӧ тӧд вылас уськӧдіс самолётас Маршевкӧд сёрнисӧ. «Во-мӧд бӧрти кӧ, тайӧ вермас Маршевтӧ вежны. Но сійӧ ӧні нин мунны кӧсйӧ...»

* * *

Шонді лэччан кадӧ шахтоуправлениеын унджык кабинетыс нин тыртӧм, уджалан луныс служащӧйяслӧн важӧн кольӧма. Но кӧнсюрӧ, торъя нин наряднӧйяс дорын, вуджрасисны йӧз: коймӧд смена кежлӧ чукӧртчӧны шахтаын уджалысьяс. Регыд смена вежсян кад. Тайӧ кадсӧ Егор Филиппович медъёна радейтӧ. Ӧтияс лэччӧны шахтаӧ, мӧдъяс кайӧны, унаӧс позьӧ аддзӧдлыны да сёрнитыштны.

Тарыт сійӧ смена вежсигкежлас дасьтысис ачыс лэччывны забойӧ. Ас синнас видзӧдлас, кыдзи вежсьӧны звенояс. Коді кыдзи локтӧ, эз-ӧ сёрмыны, кутшӧмджык настроениеыс. Да и кыдзи петысьясыс кольӧны забойсӧ. Моторинлӧн участокысь кольччысь бригадаса войтыр дорас и лэччылас. Кадыс кӧть сэні ӧдйӧджык кольӧ, гортас ӧд, гажтӧмысь кындзи, нинӧм сійӧс оз виччысь.

Лэччытӧдзыс партком кабинетас здук кежлӧ и пыравліс. Художникыс вайӧма кутшӧмсюрӧ заказъяс да ӧти сайысь петкӧдліс партсекретарлы. Регыд ӧд Шахтёр лун. Тшӧтш и звӧнитліс тасянь кодсюрӧлы. Комсомолкӧд ноксьысь ёртыслы закажитіс аски кежлӧ быть чукӧстлыны парткомӧ Хватов ая-пиаӧс. Звӧнитліс и главнӧй инженерыслы.

— Тӧда, тӧда воӧмтӧ, — кыліс главнӧйыслӧн гӧлӧсыс трубкаас. — Маршев висьталіс нин. Воӧма тай...

Маршев воӧма. Тайӧ юӧрыс ӧдйӧ и разаліс шахта пасьта. Паськӧм вежанінын и лампӧвӧйын, и рукоятчикыс клетьӧ пыригӧн юасисны:

— Филиппович, збыль нӧ мый ли батюшконым воӧма? Помассьӧма нин отпускыс?

«Айтӧг кольӧм челядь быттьӧ», — мӧвпалӧ Егор Филиппович клетьӧ пуксигмоз. — Тӧдмаласны кӧ, мый мунны кӧсйӧ Маршевыс, кыдз бара-й та вылӧ видзӧдласны? Жалитны, буракӧ, унаӧн кутасны. Бур сьӧлӧма мортыс ни ӧти абу вышитчысь ни».

Главнӧй инженерыс тай коркӧ, воӧм бӧрас регыд, дивитыштіс быдӧн бур сьӧлӧма начальниксӧ-а. Маршев пӧ миян быдӧн водзын чесьтӧ уськӧдчӧ, быдӧнкӧд ас вокыскӧд моз панибратствуйтӧ. Юралысьыдлы пӧ, ме ногӧн, оз лӧсяв татшӧмыс.

Егор Филиппович сэки партийнӧй секретар нин вӧлі. Крутакодь и орӧдіс том специалистсӧ: панибратствуйтӧны пӧ сур кружка юанінын, а йӧз дорас бур кывйӧн шыасьӧмыс пыр лыддьыссьыліс мортсӧ ошкана приметаӧн.

— Да, да... Но... — мыкталыштіс том главнӧйыс. А Егор Филиппович нӧшта стӧчмӧдыштіс: — Маршев миян, кыдз ме тӧда, оз видлась сур кружкаяссьыд. Да и ачыд тӧдан: эз «да» шу, кор тэ вӧзйин мукӧд шахтаясын моз лӧсьӧдны эсійӧтӧ... гӧсьтъяскӧд культурнӧй кульманін.

Сійӧ сёрниыс на костын важӧнкодь нин вӧлі. Мӧрччыліс эз сӧмын-а. Видзӧдлам, кыдзи кутас сёрнитны йӧзыскӧд, сійӧс кӧ быттьӧ бӧръясны шахтанас веськӧдлыны. Да, тайӧ на вопрос! Коді вермас Маршевтӧ вежны? Ӧні, отпускас ветлігкості, главнӧй инженерыс и вежӧ. А водзӧсӧ? Лӧсялас-ӧ сійӧ? Дерт, тайӧ абу ӧтнаслӧн тӧжд — став коллективлӧн, но век жӧ, сылысь, партийнӧй секретарлысь, юаласны медводз.

Сменнӧй мастер, коді веськаліс Егор Филипповичлы пӧпутчикӧн, том зон, визув да кыв-вора, эз сет партийнӧй секретарыслы чӧв овны да мӧвпавны ас кежас.

— А висьталӧны, тайӧ шахтасӧ пӧ ті Маршевкӧд первойсяньыс стрӧитӧмныд. Збыль?

— Висьталӧны кӧ, збыль нин, — серӧктыштіс Егор Филиппович. — Ме сэки тэ кодь жӧ том вӧлі.

Тӧд вылас пыр и уси сійӧ кадыс, кыдзи ӧтчыд, буретш тайӧ стволсӧ перйигӧн, муртса эз тювгысь самӧй ӧшмӧс пыдӧсӧдзыс. Лэдзисны полок — кыз канатъяс вылын ӧшалысь кӧрт джодж. Тайӧ вывті кывкутана да сьӧкыд удж. Джодж вылас и сулаліс ачыс, томиник сменнӧй мастер, видзӧдіс джоджлысь увлань лэччӧмсӧ. Сувтас либӧ мыйкӧ кӧ неладнӧ, пыр и должен сетны сигнал выліас. Юкмӧс стволыслӧн стеныс ӧтилаті абу дзик шыльыд, тшупӧдакодь вӧлӧма, да полокыд крукасис, оз водзӧ прӧйдит.

Егор сӧмын на сигналитіс нелючки йывсьыс, но кодкӧ, буракӧ, ӧти канат личӧдӧма, чуръёвтчис полокыд да Егор исковтіс горулыс. Вермис ещӧ кыдзкӧ шашаритчыны-кутчысьны канатас, эськӧ войтыштіс улас дай лы ни сьӧм эз коль.

Быд метр сылы тані тӧдса и ас. Мыйта позьӧ гарыштны и бурсӧ, и лёксӧ, и серамбанасӧ. Ӧтчыд стволас электровоз уськӧдісны, кыдзи нин и сяммӧмны сэтшӧмторсӧ вӧчны выліас? Егор Филиппович сэк сменнӧй мастерӧн на жӧ вӧлі. Буретш телефон дорӧ ствол дінас забойсянь тэрмасис. Кыдз тай бумгысис вылісяньыс мыйкӧ! Варӧдіс ва чукӧртан гӧптыслысь-зумфыслысь вевтсӧ да упкысис ваас. И пыр жӧ взорвитчис. Взрывнӧй валйыс шыбитіс зонтӧ бетон стен бердас сэтшӧм вынӧн, чайтіс вуджӧр печатыс сӧмын стенас кольӧ. Сьӧкыд пеля вежон вӧлі сы бӧрын. А ёна доймӧмъяссьыс кыдзкӧ пыр Ен видзліс. Сійӧ сменаӧ да сійӧ участокын некутшӧм притчаяс да доймӧмъяс некор некодкӧд эз лолы.

Ёна жӧ ӧд и тӧждысьліс, эз мукӧд моз личӧдчыв, смена чӧжыс котралас ӧти забойсянь мӧдӧ, ӧти звеносянь мӧд звеноӧ. Медым нин ставыс лючки-ладнӧ вӧлі и идӧрӧн уджалісны.

* * *

Джын туйсьыс унджык гургисны электровоз вылын да ӧдйӧ и воисны колана выработкаӧдзыс, Расов бригадаса проходчикъяс уджаланінӧ. Забойлань выработка кузя восьлаліг том мастерыс висьтасис:

— Водзті вӧлі мунан таті да сідзи и зурасян туплясьысь эновтӧм электродвигатель вылӧ либӧ кӧлесатӧм вагонӧ, а то и крепитчан вӧрсӧ абу идралӧмны ас местаас. Унаысь горноспасательнӧй инспекция индыліс та вылӧ да штрапуйтліс. Ӧні, Моториныд локтіс да, — пӧрадок! Первой лунсяньыс сідз-тадз уджалысьясыдлы и шуис: «Онӧ кӧ кӧсйӧй лючки уджавны — весасьӧй! Ӧні кык звено нин миян комсомольско-молодёжнӧй. Менӧ комсоргӧн бӧрйисны».

Том мастерлӧн висьтасьӧмыс унатор тӧд вылас уськӧдіс партийнӧй секретарлы. Помнитӧ: участокнас воддза веськӧдлысьыс кымынысь сетліс кыв да бара ылавліс вина юӧмӧ. Чери пӧ сісьмӧ юрсяньыс. Стрӧг видзӧдластӧгыд сідзи лэдзчысисны и бригадиръяс, и звеньевӧйяс, и асьныс проходчикъясыс. Вештыны ковмис морттӧ. Индісны сы местаӧ Моторинӧс. Колӧкӧ, Анатолийыс и ӧбидитчыліс дядьыс вылӧ, кольччысь участокӧ пӧ туркнитіс. Но Егор Филиппович тӧдӧ: сыысь бура да регыдъя кадӧн ӧдвакӧ кодкӧ мӧд вермис участоксӧ сувтӧдны кок йылӧ.

— Звенояс ӧні миян вежсьӧны забойын уджсӧ сутш кежлӧ сувтӧдлытӧг, — водзӧ висьтасис варов зонмыд. — Машинист эновтӧ комбайнсӧ сӧмын сэк, кор вежысьыс дінас нин. Конвейер огӧ жӧ сувтӧдлӧй. Крепильщикъяс удж костаныс вежсьӧны и...

Тайӧ Егор Филипповичлы абу нин выльтор, но сылы любӧ вӧлі кывзыны том мастерлысь кыпыд гӧлӧссӧ. Зонлӧн латшкӧс тушаыс брезент спецовка паськӧмнас кажитчӧ нӧшта на лажмыдӧн, а бокас тоньвидзысь самоспасательыс, газ тӧдмалан приборыс да кок увсӧ югдӧдысь лампочкаясыслӧн батарейкаыс вӧчисны сійӧс мупытшса олысь суседко кодьӧн. Егор Филипповичлы сылӧн сёрни-басниыс висьталіс: локтӧны найӧс выль вежысьяс. Наысь грамотнӧйджыкӧсь, унджык тӧдысьӧсь, выль ног овны да уджавны кӧсйысьяс.

* * *

Забойӧ воисны буретш сійӧ кадӧ, кор звеноса зонъяс удитӧмаӧсь нин ӧти цикл вӧчны дай со вевъялӧмаӧсь выльысь буритны. Забойлӧн из ныр-вомас тыдалісны буритӧм шпур розьяс. Дасьтысисны взорвитны. Со кыкӧн зарадитӧны, сюялӧны розяс взрывчатка. Мукӧдыс помалӧмаӧсь йирк мыджӧдӧмсӧ, идралӧны забойсьыс кламсӧ да ёгсӧ.

— Чолӧм мырсьысь войтырлы! — шыасисны воысьясыс да кыввора мастерыс пыр и уськӧдчис шпур зарадитысьяс дінӧ. А Егор Филиппович кольччис идрасьысьяс дорӧ.

— Перекур, воксик! Начальство локтіс, ачыс партийнӧй секретар! — Эновтіс уджсӧ ӧти том зон, вильыша югнитлісны сылӧн бубыля кодь няйт чужӧм вылас син еджыдъясыс да пиньясыс.

— Кутшӧм ӧні перекур тэныд? Вай отсышт этайӧ кер помсӧ идравны, — пыр и чирыштіс зонтӧ олӧмакодь нин проходчик-звеньевӧйыс да кушенчаа кинас шенасьыштіс Егор Филипповичлы: чолӧм пӧ, но некор на ӧні кыв шуны.

Забойсӧ лючки-бура идралӧм-весалӧм бӧрын вӧлись сійӧ пӧрччис кушенчасӧ, чышкыштіс кималаснас кымӧссьыс ньылӧмсӧ, нюжӧдіс кисӧ ыджыд гӧсьтыслы:

— Аддзан, Пилипович, — шпурӧн розьӧдлӧм забой вылӧ индіг шыасис сійӧ. — Мӧд лун нин тадзи мырсям, киӧн буритам, взрывайтам. Синсьыд би чеччӧ, сэтшӧм изйӧ веськалім.

— Мый керан, оз кокньыда шедны метръясыд: абу видз вывті восьлалӧм, а му пытшті из йирӧм, — кайтыштіс Егор Филиппович да веськыда и висьталіс ассьыс татчӧ воан могсӧ.

— Ме со нарошнӧ ті дорӧ пыри, кӧсъя тӧдмавны: верманныд-ӧ тайӧ выработкасӧ ас кадӧ сдайтны? Талялӧны из шом босьтысьяс.

— Пилипович, — пыр и зумышмис звеньевӧйыслӧн чужӧмыс. — Тайӧс ми зэв бура гӧгӧрвоам да думъясӧн ёна жӧ и зілям. Комбайннад кӧ ӧд мый! Включит и мед йирас, писькӧдчас водзӧ, ми сӧмын эськӧ чибукӧн моз веськӧдлам сійӧн. А ки помсьыд пондісны, шондібан... Пока буритан да взорвитан, сэсся виччысян, кор тшыныс разалас. А кадыс мунӧ. А век жӧ талун миян циклӧн-джынйӧн эм! Мукӧд сменаяс кӧ миян моз жӧ кутасны, то лыддьы: суткинас вит-квайт метр лоӧ мунӧма. Чайта, лун витӧн эштӧдам.

Налысь сёрнисӧ торкис мастерлӧн лэчыд гӧлӧсыс:

— Эй, давай маршируйтӧй петанінлань! Взрывайтны кутам!

Ставӧн веськӧдчисны петанінлань.

Выработкалӧн кузьтаыс километр гӧгӧр, пока тайӧ туйсӧ дженьдӧдан, позьӧ уна варовитны. Но войтырыс, тӧдчӧ, зэв ёна мудзӧмны.

«Водзті ӧти циклысь уна сменанад эз вӧчлыны» — пасйӧ ачыс аслыс партийнӧй секретар да шыасьӧ орччӧн восьлалысь звеньевӧй дорас:

— Менам со кутшӧм дум чужис. Мый эськӧ ті шуанныд, отсӧг кӧ тіян бригадалы, морт ӧтиӧн кӧть быд сменаӧ, содтӧд сетны? Сійӧ кад кежлас ме шуа, кытчӧдз он эштӧдӧй тайӧ выработкасӧ? Кытысь йӧзсӧ босьтам? А парткомса членъяс мед и лоӧны отсасьысьяснас. 17 морт — тайӧ ӧд вын! Но, шуам, сизимыс отпускын, а дасыс ӧд эм. Кутам ог сӧмын вылысяньыс веськӧдлыны, но и ас киӧн забойын пессьыштны. Мед тшӧтш отсалӧны.

— Ме абу прӧтив, но ӧд налӧн ставныслӧн асланыс удж.

— Но и мый? Зэвтчыштласны.

— Лишнӧй киыд татшӧм здукъясад эськӧ и колӧ. Со тай зонъяс менам кутшӧма мудзӧмаӧсь талун. Оз весиг шмонитны.

Зато выль смена вылӧ воысьяс ӧдйӧ кытшалісны партийнӧй секретарӧс. Ӧти зон пыр и сирасис. Ме пӧ юавны кӧсъя, мыйла тшӧтш и миян культура керкаӧ оз чукӧстлыны Алла Пугачёвасӧ? Шуӧны: Комиӧ пӧ локтӧ.

— Но лешак машина, и меным тшӧтш окота аддзӧдлыны! — Гажмис Егор Филиппович. — Да ӧд сійӧ ӧтнас, а миян республиканым паськыд.

— Тайӧс ме гӧгӧрвоа, но ӧд, тадзтӧ кӧ, нинӧм и лоӧ казьтыштны кулігад. — Зонмыд курыда вешкыртліс вомсӧ, быттьӧ нин сэтшӧм ыджыд шог сійӧс суӧма.

Егор Филиппович быттьӧкӧ и дивитыштіс зонтӧ:

— Но, сідзи нин и нинӧм аддзывтӧмӧсь ми? Этайӧ шахтасӧ коді стрӧитіс? Сы мында из шомсӧ коді сетӧ? Ог ӧмӧй ми асьным? Чайта, лоӧ и миянлы мый казьтывны кулігад!

— Удж — сійӧ ӧтитор, а искусство — мӧдтор, — эз сетчы зонмыд. Но кодкӧ мӧд сійӧс вештыштіс Егор Филиппович дорысь, вильшалыштіс:

— Кӧсйӧ миян знаменитосьт, мед ачыс Пугачёва сылысь сьылӧмсӧ экзаменуйтӧ! Он кӧ сылы гораа «бис!» горзы, оз и сцена вывсьыд ушумгайтчы.

Сӧрысьыд тилькнитӧмӧн серӧктіс, а зонъяс ставӧн гӧрӧктісны. Пугачёва радейтысьыдлы ковмис лэдзны синсӧ да вильшасьысьлы гусьӧн петкӧдлыны кулаксӧ.

Но Егор Филиппович тані эз сувт сералысьяс дор. Шуис:

— А мортыслӧн ӧд тайӧ абу сералана кӧсйӧм. Гижӧй, шыасьӧй комсомольскӧй организациясяньыд веськыда обласьтӧ. Гашкӧ, и волас.

Зонъяс аддзӧны: зэв пыдди сёрнитӧ накӧд партийнӧй секретарыс. Мӧд зон пыр и шыасис сы дорӧ:

— А ме татшӧмтор кӧсъя юавны. Бӧрйисны менӧ общественнӧй инспекторӧн, но, сійӧтӧ... электроэнергия экономитӧм кузя. А кыдзи водзті тыртӧг бергаліс конвейер, и ӧні век сідзи. Ме кута шуны: зраыс эн видзӧй энергиясӧ, сувтӧдлӧй. А найӧ ме вылын сералӧны: ок пӧ тэ экономист, папирос вылад он жалит, а истӧг вылад жалитан! А мыйла инӧ менӧ бӧрйисны?

— А абу и тэнӧ колӧма бӧрйыны, — пыр и суитчис татчӧ Пугачёваӧс радейтысьыс.

— А мыйла?

— Да сы вӧсна, мый тэ — придира!

— Ме — придира?

На костын лыбис не то вен, не то кывъясӧн печласьӧм. Звеньевӧй пыр и ӧлӧдыштіс найӧс:

— Но-о, ичӧтикъяс моз пондінныд! Ог на и кужӧй идӧрнас да топыднас уджавны, быттьӧ йӧз зептысь мунӧ. Чӧвлӧ, гӧтрасянныд да гӧтырныд велӧдас быд грӧш артавны!

Тайӧ звеноса зонъяс ставныс на, звеньевӧйяс кындзи, вӧліны гӧтыртӧмӧсь, сийӧсавлытӧм ужъяс. Гӧтрасьӧм йывсьыд гарыштӧмыс нӧшта ыззьӧдіс ставнысӧ. Невестапу йылысь да юр сюянін йылысь сэсся пансис сёрниыс. Шахтёрскӧй посёлокад ӧтиыс и мӧдыс оз на тырмы. Зонмыд уна, нылыд этша...

Шахтаысь петӧм бӧрын, гортас восьлаліг, Егор Филиппович казьтыліс тайӧ сёрнияссӧ да юксис тшӧтш сыкӧд орччӧн мунысь Моторин вежапиыскӧд.

— А абу лёкӧсь тэнад зонъясыд, Анатолий. Сӧмын вот, ме чайта, озджык асьныс писькӧдчыны, а надейтчӧны кодкӧ вылӧ. Эг-ӧ ми велӧдӧй том йӧзсӧ кокниджыка видзӧдны олӧм вылас? Дерт, и вылісяньыс отсӧгыд налы колӧ, сійӧ жӧ невестаяс кузяыс кӧ панны сёрни. Ваяс миян молодеч гӧтырсӧ кыськӧ Россияысь. А патера ни удж тані гӧтырыслы абу. Колӧ либӧ гознанныслы эновтны тайӧ местасӧ, либӧ торйӧдчыны, либӧ ичмоньлы уджтӧг пукавны. Ӧні тай эськӧ гортын кутшӧмсюрӧ кипом уджъяс котыртӧм йылысь эм нин правительственнӧй постановление. И кооператив йывсьыд. А могмӧднысӧ тайӧ ставсӧ быть миянлы, юралысьяслы. Медым мыйкӧ тӧдчанаӧс вӧчны, первой ӧчередь колӧ мӧвпсӧ олӧмӧ пӧртысь морт — личнӧсьт. Мыйла ме пані тайӧ сёрнисӧ? А сы вӧсна, гашкӧ, мый тэныд и ковмас тайӧс ставсӧ ас вылад босьтны. Маршевным мунны кӧсйӧ.

— Кыдзи мунны?

— Пенсия вылӧ петӧ. Арлыдыс важӧн тырӧма.

— Яснӧ. Но месӧ сэтчӧ мыйла?

— А тэнӧ кӧ бӧръясны? Ме вот думайта да, оз на ёна и туплясь Маршевтӧ вежысьыд.

— Да, сылӧн авторитетыс ыджыд. Оз ло кокни сы бӧрын йӧзсяньыс пыдди пуктӧмтӧ перйыны. Ме чайта, главнӧй инженерыс сійӧс ӧні вежӧ нин да мед сійӧ и кольччӧ.

— А сійӧ, тэ ног кӧ, буретш?

— Ог тӧд. Быд боксянь думыштлыны колӧ. Ӧні вед, ачыд тӧдан, олӧмыс кутшӧм юралысьӧс тшӧктӧ корсьны. Мед выль ногӧн мӧвпаліс да пыдӧджык аддзис.

— Сійӧ и эм. Огӧ кӧ кодӧскӧ бокысь корсьӧй, ме думайта да, тэ — медся надёжнӧй кандидат. Вот, тэд мый ме, вежайыс, шуа.

— Ме пока и сідз на вуж додь кыска, кольччысь участокӧс ньӧръяла да зоръяла.

— Ме Маршевлы сідзи и шуи, мися, во-мӧд бӧрти кӧ...

Тундра весьтӧ лайкнитчӧма август тӧлысся шоныд вой.

Енэжас кывтӧ югыд тӧлысь. Кок увсяньыс ыркйӧдлыштӧ уль ру дукӧн. Гӧлӧсъясыс шахтаса войдуръяслӧн намӧдчӧм моз и кылыштӧны войся чӧв-лӧняс.

— Сідзи нин сьылідзирйӧй чегӧ, да нӧшта на валитчис ме вылӧ тайӧ тӧждыс, — недыр чӧв олігтыр муныштӧм бӧрын выльысь шыасис вежайыс вежапи дорас. Кузя ышловзис.

— Валерия Олеговнаыдкӧд лёк?

— Некытчӧ шогмытӧм, Анатолий, — гӧлӧсыс сылӧн дрӧгмуніс да вежапиыс сэсся эз и лысьт юасьны Валерия Олеговна йывсьыс.

Гортас локтӧм бӧрын — найӧ ӧти керкаын и олӧны, сӧмын торъя подъездъясын — Моторин вӧзйис вежайыслы пыравны на ордӧ ужнайтны.

Мӧдыс дзӧрӧдыштіс юрнас. Пасибӧ пӧ, оз и сюмав кынӧм. Кадыс пӧ сёр нин, шойччыны колӧ.

Гашкӧ и, вежапиыс ӧбидитчис на ӧткажитчӧмсьыс, но Егор Филипповичлысь дыркодь морӧс пытшсӧ шонтіс тайӧ чукӧстӧмыс. Но сылӧн кынӧмыс и збыльысь эз сюмав, сёян вытьыс тшӧтш кытчӧкӧ воши, и эбӧсыс бырӧма.

* * *

Ылі кӧрт туй станция дорын войбыд чуксасисны паровозъяс. Войся сынӧдас мыйкӧ зэв кузя да вӧсниа дзиньгис. Водзті некор эз кывлы татшӧм шыяссӧ — крепыда узьліс. А тавой мыйкӧ оз сет унмовсьны и ставыс. Му пытшкас шахтёръяскӧд шогыс эновтліс да быттьӧ морт вӧлі, а кыдзи гортас воис, бара и шедіс сьӧлӧм дой налькъяс. Бергаліс да бергаліс вольпась вылас. Сылы кажитчис, мый эсійӧ дзиньгӧмыс — ылі миръяслӧн ӧта-мӧдныскӧд чуксасьӧм. А гашкӧ, Валерияыслӧн лолыс тадз чуксалӧ сылысь ловсӧ? Здукӧн-здукӧн сійӧ дугдыліс кывны асьсӧ и кадсӧ, быттьӧ сійӧ абу на вольпась вылас, а кӧнкӧ эсійӧ чуксасьысь миръяс пӧвстас тшӧтш лэбӧ. Но лунся тӧждъясыс бӧр вайӧдісны сійӧс ас садяс.

Егор Филипповичлӧн выль пӧв син пырыс котӧртӧны Хватовъяскӧд талунъя аддзысьлан серпасъясыс, сэсся шахтаас ветлӧмыс, проходчик-зонъяс, Анатолий вежапиыс, сыкӧд ӧтлаын гортас локтӧмыс. Узян унмыс медбӧрын личкис жӧ.

Но и узигас эз эновт сійӧс тӧждыс, гажтӧмыс. И бара вӧтнас лэбис кытчӧкӧ, ӧтнасӧн эновтӧм. И мучитіс сійӧс мӧвп: «Мыйла ме тані?» И со кутшӧмкӧ сьылӧм шы пондіс кывны. И мунӧ нин быттьӧ сійӧ югыд да паськыд штректі и скӧралӧ: «Забояс тай нӧ сьылӧны?! Эсійӧ Пугачёваӧс радейтысь зонмыс, буракӧ. Сідзи и уджалӧны найӧ! А штрекыс абу нин штрек, а Валериялӧн больнича палата. Сэні быттьӧ уна йӧз, и ставныс пинялӧны Егор Филипповичӧс: мыйла эновтіс гӧтырсӧ ӧтнасӧн? Кулӧма. Тэныд шахтаыд донаджык гӧтыр дорсьыд!

— Кулӧма!.. — сэтшӧм курыда бӧрддзис. — Валерия-а!..

Тайӧ горӧдӧмсьыс и садьмис, ставнас сыркъялӧ.

Мӧд жыръяс радио сьылӧ гимн. Асъя шондіыс швачкис ӧшиньясас, занавесъяс косттіыс югдӧдіс векни лентаӧн крӧватьдорса стенсӧ.

«Ой... Вӧт вӧлӧма. А пуктан вӧт кӧ? Збыль кӧ кулі?» — мӧвпыштіс.

Тайӧ мӧвпыс тайкӧ оз поткӧд сьӧлӧмсӧ. Жуялӧмаӧн и чеччис вольпасьсьыс да мӧдіс мыссьыны, кӧдзыд ваыс, гашкӧ, пальӧдыштас вежӧрсӧ.

Тайӧ здукас кодкӧ и звӧнитліс ӧдзӧсас. Егор Филиппович быдӧн чур-чермунлі повзьӧмысла: телеграмматӧ нин вайӧны.

— Коді?

— Тайӧ ме, вежай, — кыліс ӧдзӧс сайсяньыс Анатолийыслӧн гӧлӧсыс.

«Фу-у, Анатолий...» — личмуніс ставнас лов пытшкыс Егор Филипповичлӧн. Повзьылӧм сьӧлӧмыс сылӧн ёна топавлӧм бӧрад чеччавны-йӧктыны пондіс морӧс тырнас. Восьтіс ӧдзӧссӧ вежапиыслы.

— Гӧтыр менӧ ыстіс, мун пӧ да вайӧд Егор Филипповичӧс завтракайтны. Сытӧг пӧ эн и лок. Со, пыри... Петалам. Тэтӧг и збыль гӧтыр менӧ оз нурйӧд. Чайта, луныс миян бара на шахтаын кольӧ. Парткомыд талун и...

Да, талун Егор Филипповичлы зэв кузь лоӧ луныс, зэв сьӧкыд лун. Лоӧны и нӧшта на кузь да сьӧкыд лунъяс сійӧ олӧмын. Но мортыд тай ставсӧ на терпитлӧма да венлӧма, колӧ чайтны, терпитас да венас и Егор Филиппович, ичӧтик коми сиктын, Ракпольын, чужлӧм-быдмӧм морт. Сылӧн пӧльясыс да пӧчьясыс, айыс и мамыс овлӧмаӧсь видз-му вӧдитӧм да вӧралӧм помысь, а найӧ йылӧмлы олӧмыс индіс дзик мӧдпӧлӧс удж да олан сям. Сы вӧсна, мый олӧмыс ёна дзугсис да вежсис, дзугис и вежис и коми крестьянинлысь олӧмсӧ.

А Коми муыс вӧлӧма зэв паськыд да озыр.

А Коми муыс вӧлӧма, шондібанӧ, шудтӧм, синва кисьтысь муӧн, енмӧн ли, чӧртӧн ли, лёк мортӧн ли ёрӧм муӧн.

А Коми муыс вӧлӧма пемыд тюрмаӧн уна-уна тысяча мортлы да уналы и кольӧма нэм кежлас куйланін-шойнаӧн.

Мед и дзор тундра весьтын шутьлялысь вой тӧлыс да паськыд веж пармаыс сьыласны налы упокой. Югыдін да шоныдін налы. Кын мусӧ садьмӧдӧмысь да шонтӧмысь. А наӧн чужтӧм мича каръясыс, посёлокъясыс, шахтаясыс мед и сӧвмасны да дзордзаласны водзӧ вылӧ.

Парткомыс артмис шума-зыка. Унакодь лои сёрнитӧма, да кузя и нюжаліс. Вӧлі уна йӧз, морт нёль воӧмаӧсь весиг чукӧстытӧгыс. А сэні нӧшта Хватов гозъякӧд муса быдтас йывсьыс бур здук варовитӧма лои дай.

Тайӧ партком бӧрас, колӧ чайтны, уналы юр вежӧрас пыдӧджык пырисны партиялӧн да правительстволӧн выль лозунгъясыс: Ускорение. Перестройка. Самостоятельносьт. Самофинансирование...

Но Егор Филиппович ставнас пытшкӧснас кыліс нӧшта на мыйкӧ выльӧн кыпӧдчысьӧс. Тайӧ кылӧмыс быттьӧкӧ и майшӧдліс партийнӧй секретарӧс и ӧттшӧтш чужтіс морӧсас да вежӧрас выль би. Кыдзи шуны тайӧ майшӧдлысьсӧ да би чужтысьсӧ, сійӧ пока эз на тӧд, и сӧмын сёрӧнджык выль лозунгӧн пондіс юравны: демократия да свобода!

Регыдъя кадӧн и демократия да свобода ним улас лои кисьтӧма Сӧветскӧй Союз. Республикаяс кӧсйисны овны ас кежас, Москваысь торйӧн. Лои вӧтлӧма и компартия. И со нин страналысь чашйӧны-юклӧны эмбурсӧ. Приватизация. Вуджӧны аскежся олӧмӧ. Чужӧны акционернӧй обществояс да выль купеч-тӧргӧвечьяс, коммерсантъяс. Главнӧй сёрнитанторнас лои рыноклань вуджӧм. Эз мун ыджыд тӧв ныр Россия весьтті, эз сыркакыв муыс, а олӧмыс вежсис увлань юрӧн сувтӧдӧм моз...

Но олӧмыс олӧм и эм, сійӧ восьлалӧ водзӧ. Историяысь тӧдам: киссьӧны империяяс, чужӧны выль государствояс, а йӧзыс кольӧны да нуӧдӧны олӧмсӧ водзӧ да нӧшта на писькӧдчӧны бурланьӧ...

* * *

Партком нуӧдӧм бӧрын Егор Филиппович, кыдзи и кӧсйис, аскинас жӧ босьтіс отпуск, сдайтіс партийнӧй делӧяссӧ вежысьыслы да лэбис Валерия дорас Сыктывкарӧ. Ӧдйӧджык, ӧдйӧджык сӧмын! Сэтчӧ, кӧні сійӧс виччысьӧ мусаыс, донаыс. Куим тӧлысь чӧж Валерия вӧлі кулӧм да олӧм костас, и Егор Филиппович тшӧтш жӧ сыкӧд куимнан тӧлысьсӧ кувліс да ловзьыліс. И со медбӧрын найӧ гортасӧсь. А гортас воӧм мысти Егор Филиппович дзик пыр гӧгӧрвоис парткомъяслысь и ассьыс, кыдз парторглысь, ковтӧмлунсӧ. Веськӧдлан вӧжжиыс вуджӧма рабочком да стачком киясӧ.

Колӧ шуны, быттьӧкӧ и кивыв на тайӧ ставыс лои Егор Филиппович гозъялы. Ӧні, Валериясӧ гортас вайӧм бӧрын, калека гӧтырнас быть коліс кодлыкӧ ноксьыны. А медым кодкӧ мӧд, бокӧвӧй, чередитіс сылысь гӧтырсӧ, Егор Филиппович и думыштныс эз кужлы. Ачыс, и сӧмын ачыс. Лунтырӧн ноксьыліс бур кӧзяйка моз, пусис, песласис, ветліс магазинӧ, вердіс гӧтырсӧ да гольйӧдліс коляскаын. Бур кӧть нин сійӧ, мый коляскаыс лӧсьыд сюри, импортнӧй. Гортас джодж кузяыс Валерия ачыс и гӧглясьліс. Ывлаӧ петны сӧмын мӧд морт коліс. Сідзсӧ, Валерияыслӧн вежӧр и кыв-вор, и чужӧм да кияс вӧліны лючки мортлӧн, сӧмын кокъясыс эз уджавны, кӧть сёысь ойя горӧд. Кутшӧм нӧ нӧшта удж йылысь верӧсыс вермис сёрнитны, кор гортас юр выв тырыс вӧлі удж-маетаыс. Корсюрӧ ас кежас бӧрдліс и быдӧн, но медым Валерияыслы петкӧдлыны дӧзмӧм ли шогсьӧм — некор эз вӧв. Сідз, буракӧ, и гӧтырыслӧн артмыліс, ас кежас бӧрдыштас, а верӧсыслы эз петкӧдлы некор пойгӧм ни ойзӧм, векджык серамбанӧн да шмонь кывйӧн сёрнисӧ панліс.

Коркӧ ӧтчыд, важӧн нин, томдырйиыс на, петаліс Егор Филиппович тундраӧ вӧравны. Брӧдитіс лунтыр, веськӧдчис нин гортлань юрӧн и друг веськаліс зыбуч нюрӧ. Тувччан да кок улыд сідзи лайкмунлӧ, удит сӧмын водзӧ воськов вӧчны. А то, мӧмляйтан кӧ, нёньыштас зыбуныс дай некод оз кут тӧдны, кытчӧ воши мортыс. Бӧрвыв косны, гортлань нырвизьӧн нин мӧдӧма да, эз жӧ вӧв окота. Колӧ кыдзкӧ да быть кевны водзӧ. Водзын, со, эстчаньын вежӧдӧ вӧр, сэні гортыс, сэні виччысьӧ сійӧс том ичмоньыс, Валерияыс.

Собыштіс жӧ сэки! Гортас воис пемдандорыс нин, тшыг и мудз, но и чӧртовски довольнӧй: талун сійӧ веніс мыйкӧ зэв лёкӧс, юрнас и ловнас ёна пудъясьӧм бӧрын. Дука ваыслӧн повзьӧдчӧмӧн чилӧстӧмыс да змей сяма гуся чушкӧмыс со пеляс век на кылӧ, но кылӧ и мӧд шы — радлунлысь горзӧмсӧ.

Мыйлакӧ ӧні, уна кад кольӧм бӧрын, сійӧ нюрті келӧмыс пондіс тшӧкыда уськӧдчывны Егор Филипповичлы вӧтнас. Сӧмын сэк келіс ӧтнас, а вӧтасигас келӧны кыкӧн Валерияыскӧд. Кӧнкӧ ылын бӧрвылас на бӧрся вӧтчӧны кодъяскӧ. Мужичӧй, нывбаба и челядь гӧлӧсъяс горзӧны налы: — Эй, ті, сувтыштлӧй! Гашкӧ, бӧр бергӧдчам? Либӧ нин кежыштлӧй кӧть шойччыштны эстчӧ дітор вылас, кӧні кустъясыс тыдалӧны!

Но Валерияыс оз кыв найӧс, собӧ и собӧ водзӧ, эстчаньын тыдалысь веж вӧрланьыс. А Егор Филипповичлы быть жӧ колӧ лоны сыкӧд орччӧн. Ӧд найӧ ӧти шӧртлӧн путшпӧлъясыс, ӧти юлӧн берегъясыс, ӧти мамлӧн быдтасъясыс. А мамныс налӧн кыкнанныслӧн — сьӧкыд да тшыг челядьдыр, быдтор тӧдны зільысь томлун, кӧні сьӧкыдджык да коланаджык удж вӧчысь верстьӧлун. А пӧрысьлуныд кутшӧмкӧ да воас нин, кильчӧ помас нин кӧ тотшӧдчӧ. Мед сӧмын Енмыс сетас вын терпитны ставсӧ да не лэдзчысьны ловнас. Мед сӧмын оз быр ӧта-мӧд дорас муслуныс.

БӦРКЫВ ПЫДДИ

Поезд тювис войвывлань. Ӧшинь сайын кывтіс кӧдзыдысла турдӧм, гыӧрӧн вевттьысьӧм вӧр. Тӧвся шонді муртса мыччысьӧма прӧшви кодь вӧр йывсянь. Сылӧн югӧръясыс жебиник кӧчпиянӧн ворсӧдчӧны купе стенын.

Ывлаын кӧдзыдысла руа. А купеын шоныд. Ичӧтик пассажирка Лерочкалы со и жар, шебрассӧ чужъялӧма, нискӧ-узьӧ.

Муса дедукыс сылӧн, Олег Александрович, тупйыштіс нывкаӧс, восьтіс купе ӧдзӧссӧ, мед сынӧдыс вежсьыштас. Ачыс петіс коридорас лолалыштны. Регыд сысянь кутіс кывны варов сёрни.

Ичӧтик Лералӧн батьыс, папа Олег, лэччис полка вывсьыс, нюжмыштчис, чуткис мӧд вылыс полка вылын куйлысь гӧтырсӧ:

— Кӧзяюшкаӧ, тэ дыр на мӧдан вольпасьын туплясьны?

— Ме ог узь, ме ывла вылас видзӧда, — шыасис гӧтырыс. — Сэтшӧм мича, чернитӧм эзысь кодь вӧрыс! А кӧдзыд, буракӧ!

— Да, веж мороз. — Видзӧдліс и верӧсыс ӧшиньӧ. — Градус нелямыныд лоӧ.

— Нелямын? Став ловъя лолыс кынмас!

— Он, дерт, завидьты вӧрса олысьясыдлы, но олӧны миян ичӧтджык вокъяс! Тайӧ январскӧй кӧдзыд дырйиыс буретш уркайяс колькнысӧ пӧжӧны. Ӧні жӧ чужӧны и ошпиян. Налим кульмӧ.

— И мамыд тэнад татшӧм кӧдзыднас жӧ чужлӧма.

— Збыль! И мамӧ менам январскӧй! Смелъяс рӧдысь тшӧтш!

Ольга мисьтӧмакодь серӧктіс, сэсся недыр мысти шыасис: — А тэ он чайт, мый йӧйруалӧ мамыд? Нимлун вылӧ чукӧртӧ ставнымӧс.

Оля гӧлӧсын тӧдчис дӧзмӧм, да верӧсыс дыр эз аддзы, мый шунысӧ. Медбӧрын кайтыштіс:

— Оля, сылӧн ӧд абу прӧста нимлун — юбилей. Сэсся и ӧні сылӧн быд лун быдса во мында. Гӧгӧрво тэ тайӧс.

— Гӧгӧрвоа, но мыйла калекаыслы, сідз кӧ нин шуны, сэтшӧм паськыда юбилейсӧ пасйыны? Тэ эн дӧзмы, но сы ылнасянь, этатшӧм морознас да нӧшта на уджалан кадӧ колӧ кысйысьны сы дорӧ юбилей пасйыны!

— Но и мый, Оля? Миянлы бур прогулка лоӧ дай мам-батьлы радлун. Со ӧні на ачыд вӧрнас нимкодясин. Миянлысь войвылӧс аддзылан. Тэ ӧд эн на и вӧв сэні.

— А мый ме сэтчӧ вошті? Нималӧ тай тіян Воркутаыд забастовщикъясӧн!

— Оз сӧмын забастовщикъясӧн, но та йылысь ог кутӧй, венӧ бара воам. Со Лерочканым садьмис.

Улыс полка вылын налӧн быдтасыс кыстур моз нявӧстіс: — Ня-ав! Кысукным миян садьмис!

Батьыс босьтіс сійӧс ки вылас, окыштіс. Мамыс, чушкысьӧм паръя, бара пондіс видзӧдны ӧшиняс.

Ӧдзӧсас мыччысис Олег Александрович, гораа юӧртіс:

— А мый ме тіянлы вая! Со, газет. Лериклӧн баб йылысь тан гижӧны!

Сійӧ мыччис газетсӧ Лерик батьлы, ачыс босьтіс сы ордысь кагасӧ.

Лералӧн Олег папыс чӧвтліс видзӧдлассӧ дедыс вылӧ, сэсся гӧтырыс вылӧ, сэсся пуксис да пондіс шарӧдчыны газет лист бокъяснас. Недыр мысьт кыліс сылӧн гӧлӧсыс:

— Читатели нашей газеты с большим интересом встретили недавно опубликованный рассказ Валерии Кармановой «Цветы на снегу». Сегодня наша газета предлагает новый рассказ этого же автора «Я буду танцевать».

Лыддис Олегыс горӧн, сэсся видзӧдліс дедыс вылӧ. Дедыслӧн банбокъясыс тӧдчымӧн бледӧдӧмаӧсь.

— Давай, лыддьӧй, — шуис дедыс, — ме пета мыссьӧдышта Лерочкаӧс.

Олег Александрович кагаыскӧд петісны. Эз кӧ пет, вермис внука-моня дырйиыс бӧрддзыны.

Ольга ичмоньыслы калека энька-матушкаыслӧн газетын йӧзӧдӧм гижӧдыс лоис, дерт, выльторйӧн, кыдзи и сійӧ верӧслы да Олег Александровичлы, но эз тайӧ ёна сійӧс шызьӧд. Хмыкнитыштіс сӧмын да думыштіс:

«Но и мый, гижис кӧ? Прӧста куйлӧм дорысь век нин удж».

Энька мамсӧ Ольга аддзыліс сӧмын на кыкысь. Первойсӧ гортас, Москваын, найӧ свадьба вылӧ волісны гозъя. Ольгалы сэк кажитчисны энька-айкаыс. Ылі войвыв посёлокын кӧть олӧны, абу провинциалъяс кодьӧсь. Оля ачыс интеллигент семьяысь да ньӧти эз яндысь выль рӧдвуж вӧснаыс. Ошйысьыштіс на тӧдсаясыслы, кутшӧм пӧ жӧникӧс крукышті, ачыс шань, дай мам-батьыс абу лёкӧсь.

Мӧдысьсӧ аддзыліс доймӧмасӧ нин, больнича койка вылысь. Батьыс телеграммаӧн корліс, да Сыктывкарӧдз нарошнӧ самолётӧн лэбзьылісны.

«Тайӧ абу олысь, мед бурджык, мучитчанінысь, кулас» — мӧвпыштіс сэк Ольга. А со, эз кув. Олӧ. Весигтӧ юбилей на пасйыны кӧсйӧ. А мый сэтшӧм калекаыслы юбилей пасйӧмыс сетас? Йӧзыслысь жальсӧ сӧмын пычиктас. А Олялы, том, мича аньлы, быд бур да гаж дорас Москваын олысьлы, ньӧти абу окота сьӧлӧмсӧ пыдзравны. На ордӧ мунан да, гашкӧ на, ковмас калекасӧ чеччӧдны-водтӧдны да?

Татшӧм мӧвпъяссьыс Оляӧс, колӧкӧ, и оз ёна дивитны позь. Томнад унаӧн сэтшӧмӧсь. Но ӧні Ольга весьшӧрӧ и полӧма. Локтісны места вылас, да аддзис эз коньӧр кодь куйлысь калекаӧс, а кыпыд чужӧма, востер кывъя, мичаа вӧччӧм аньӧс. Сӧмын сійӧ эз ас кок йылас вӧв, а пукаліс коляскаын.

— А со и найӧ! Со и найӧ медбӧрын! — кыліс сылӧн гӧлӧсыс ыджыд жырсяньыс, сэсся ачыс мыччысис ӧдйӧ гӧгыльтчысь креслӧ-кӧляскаын:

— Папочка! Оленька! Лерочка менам! Олег, дона пиӧй! А Филипповичӧй менам кӧні? Ме сійӧс ог аддзы.

Сылӧн вына ки вӧрасыс, ӧдйӧ гӧгыльтчысь кӧляскаыс, шуда кыпыд гӧлӧсыс сэтшӧма шензьӧдісны Ольгаӧс, мый эз пыр сяммы мыйкӧ шуны да кутыштлыны энька мамыслысь чургӧдӧм кисӧ. Коркӧ сэсся киасис жӧ да окыштчис именничаыдкӧд. А батьыс кодакӧкоста удитӧма нин пӧрччӧдны кагасӧ, бабыс дорын нин Лерочка, кӧляскаас пукалӧ.

Ыджыд жыръяс югыда ломаліс люстра. Вӧлӧмакӧ, сыктывкарса гӧсьтъяс тшӧтш воӧмаӧсь, Моторин Павел Эмилия гӧтырыскӧд да ичӧтик нывкакӧд, дедӧн шуысьыскӧд. Выль воысьясыдлы и найӧ радлыштісны, тшӧтш пӧся киасялісны да окасисны-керисны. Чолӧмалісны именничаӧс и ӧта-мӧдсӧ.

А кор лӧнисны да пуксисны ставӧн ыджыд пызан сайӧ, бара на сьӧлӧм бердысь петан сёрни-басни пансис.

Ӧтнас Валерия Олеговна, именничаыс, эз пукав пызан сайын, но сійӧ вӧлі ставыскӧд. Кӧлясканас шуркнитлас-сибӧдчылас то ӧти дорӧ, то мӧд дорӧ и рад сійӧ татшӧм гӧсьтъясыслы, татшӧм аддзысьӧмыслы, и варовитіс ставкӧд ӧтвылысь.

— Частӧ юавлі ачым ассьым, мыйла мися и ме ловйӧн коли, бурджык нин вӧлі кувны. А талун шуа: кыдзи нӧ ме верми чесьт тӧдтӧм мортнас лоны, пуктыны морӧс вылӧ киӧс да кувны, кор эсымда бур йӧз тӧждысисны да маитчисны ме вӧсна? Врачьяс, сестраяс, доноръяс. Со и ловъя. И ола! А этайӧ кӧляскаыс мед и лоас меным выль чужӧм кагалы моз зыбка-люлюӧн. Папочка менам, рӧдимӧй, тэ эн жугыльвидз, радлышт тшӧтш мекӧд! Ме со, аддзан, — ловъя! Ті ӧд ставӧн, донаяс ті, отсалінныд меным ловзьынысӧ! Медпервой менам дона Егор Филипповичӧ аслас мелілунӧн. А тэ, Эмилия! Менам койка дорысь ӧд эн и вешйыв, дӧзьӧритін! Висьтавныд он куж, колӧ ас вывтіыд нуӧдны... Помнитан, Эмилия, кыдзи Егор Филипповичӧ да тэнад Пашаыд пыртісны менам куйланінӧ гырничторйын дзордзалысь быдмӧг, менсьым кактусӧс...

Татчӧ Валерия Олеговналӧн доршасис синваыс, чунь помнас и чышкыштіс синъяссӧ да веськӧдіс кӧляскасӧ верӧсыс дорӧ, шылькнитіс сылысь мышкусӧ, сойяссӧ.

— Дона мортӧй, тайӧ менам некор оз вун, мӧдаръюгыдас на кута помнитны. Талун сы мында мем, именничалы, бур сиисны. А ме эськӧ кӧсйи сійӧ став бурсӧ сины тэныд. И мед на тэныд Енмыс терпенньӧ сетас.

Та бӧрын сійӧ бара чышкыштіс чунь помнас синъяссӧ и гӧгыльтіс кӧляскасӧ пызан мӧдар помас, кӧні пукалісны Эмилия гозъя.

— И тіянӧс, гозъяӧс, ёна эськӧ и окалі, да чеччыныс ог вермы. Но сёрни нуӧда аслам Егор Филиппович йылысь на. Кывзӧй, папа, и тэ, Олежка, муса пи, и ставӧн. Тіянлы висьтала нин по секрету. Выль гижӧд заводиті. Нимыс и быдӧн нин эм. «Урӧдик кактус лэдзӧма дзоридз» кутас шусьыны. И тӧданныд, коді менӧ чуйдіс тайӧс гижны? Егор Филипповичӧ менам. Сійӧ и темасӧ индіс дай. Войвыв йылысь. Коми му йылысь. Кымын мича кар ӧні войвылас! Ухтаыд и Печораыд, и Воркутаыд и... Том йӧз, со Оленька кодьяс чайтӧны пӧди кӧ: пыр нин вӧліны тайӧ каръясыс. А найӧ ӧд чужисны-быдмисны менам син водзын. Менӧ, квайт арӧса нывкаӧс, папа вайліс татчӧ войвылас. Папа, помнитан? Господи, ӧні казьтыштан да... Лымъя эрдъяс, толаӧн тыртӧм баракъяс, веж мороз. И вышкаяс! Вышкаяс! Ловъявывсьыс кынмӧм морт шойяс. Ме аддзылі, кыдзи писькӧдчис кӧрт туйыд войвывлань. Сэсся, кор папӧс арестуйтісны — Ленинград. А война, вӧлӧмкӧ, таркӧдчӧ нин ӧдзӧсам. Ми, нывкаяс да зонкаяс, кытшалӧм Ленинградын котралам кӧрт туй станция дорӧ, медым чукӧртыштны кӧть из шом буссӧ. Но кор аддзылім тыра из шом состав, ме гӧлӧс сибдытӧдз горзылі: «Да тайӧ жӧ Воркутасянь! Менам пап ыстӧма!» А папасянь письмӧ эз и волы. Ӧти морт вайліс сӧмын юӧр, Воркутаын пӧ батьныд, ловъя. И ставыс. Вот та йылысь, ассьым аддзылӧмторъяс и понда гижны. Мед и менам ичӧтик гижӧдтор тшӧтш лоас паметьӧн налы, став кулӧмаясыслы и ловъяяслы, кодъяс ловзьӧдісны этайӧ вой мусӧ, стрӧитісны кӧрт туй, каръяс, шахтаяс, промыселъяс.

Валерия Олеговна ланьтыштліс, кузя ышловзис да шыасис батьыс дорӧ: — А, папа, колӧ ӧд та йылысь гижны? Гашкӧ, менӧ судьбаӧй тайӧ гижӧд радиыс и ловйӧн колис да. И сэки Ленинградас, и ӧні аварияӧ веськавлӧм бӧрын. Ачым тай тадзи лыддя-а. Сы вӧсна, мый чайта: олӧмыс ачыс индӧ быдӧнлы сӧмын сылы лӧсялана места да олӧм пӧртӧм вылӧ мог. Кутам ньӧжйӧникӧн гижны. Да ӧд, Егор Филипповичӧ? Гижам тшӧтш и сы йылысь, кутшӧм ыджыд дӧзьӧр да лелькуйтӧм колӧ, медым ичӧтик мучудӧ кактус лэдзис дзоридз. Но медым и миян ловзьӧдӧм Войвыв водзӧ вылӧ дзордзаліс, колӧ видзӧмӧн да кужӧмӧн жӧ вӧдитчыны сійӧ вӧр-ваӧн, видзны сӧстӧм тундралысь лӧз эрдсӧ, сылысь югыд шоръяссӧ да тыяссӧ — ставсӧ, мый миянӧс кытшалӧ. Оленька, — тайӧ монь дорас нин шыасис, — тэныд кажитчис-ӧ миян Инта карным? Энлы, лун-мӧд олыштанныд, петкӧдлам ставсӧ, тундраӧ нуӧдлам. Вот олӧмыс дзугсьыштіс. Миян ӧні бастуйтӧны то шахтёръяс, то учительяс, то туй вылын уджалысьяс. Кыткӧ-мыйкӧ, значит, абу ладнӧ йӧз олӧмас. Корсьӧны бурланьыс петан туй. Со тай и менам Егор Филипповичӧ пондіс вошлывлыны гортысь. Здук кежлӧ пӧ петала, а локтас сёр рытнас. Извенит пӧ, бара стачкомын манитчимӧ. А мый нӧ, извенита. Он ӧд пинясь, пинясьӧм мода миян некор эз вӧвлы да. Пи-моньӧй со танӧсь, да найӧс велӧдӧм ради и тайӧс гарышті. Лёкнад он нин нинӧм босьт, бур сӧветӧн сӧмын. Тайӧс жӧ и бастуйтысь войтырыслы вӧзъя, мед кось оз жӧ лэптыны. Бур ногӧн кӧ, чайта, ставыс на ас местаас пуксяс. Бӧр на овмӧдчам и...

Ольга моньыс кывзіс энька-матушкасӧ да лои яндзим аслас лёк мӧвпъясысь, кыдзи нӧ пӧ ме верми кевмыны сьмерт аслам энькалы, этатшӧм мортыслы? Со сійӧ кутшӧми да. Оз бара-й жуглясь ни норась мукӧд висьысьяс моз, гӧлӧсас кыпыдлун, олӧм радейтӧм. И со на сійӧ мый йылысь мӧвпалӧ, абу ас дойясас игнасьӧма.

А кытысь и тӧдас Оленькаыс, сьӧкыд ли кокни энькаыслы кыпыдлунсӧ петкӧдлыны, шань гӧлӧссӧ сетны, вежӧра сёрнисӧ баитны.

Тайӧс тӧдӧ сӧмын ачыс Валерия Олеговна да нӧшта сылӧн верӧсыс Егор Филиппович. Энькаыслӧн путш пӧлыс, Енмӧн индылӧм мортыс, сӧдз да свежӧй ваа юкмӧсыс, шоныд паччӧрыс, шондіа ӧшинь улыс да небыдик пемыд войыс. Мед и оласны на да уна на юбилей пасъясны. Мед сӧмын олӧмыс му вылас оз дзикӧдз торксьы-а.