ӦТКА ПӦТКА

Будильникыс важӧнкодь нин тіргис, но Анна Степановна эз на тэрмась чеччыны вольпась вывсьыс. Здук кӧть пӧ ещӧ нежитчышта. Сэсся ӧд, чеччан кӧ, он нин спокой аддзыв. Пока зарядка вӧчан да мыссян-пасьтасян, кадыс и кольӧ. Прамӧя завтракайтны он удит, колӧ удж вылӧ нин котӧртны.

Зарядкасӧ тӧд вылас уськӧдіс да весиг кезйӧдыштіс нывбабатӧ. Но век жӧ вештыштіс вывсьыс эшкынсӧ да пондіс нюжмасьны — вольпась вылад куйлігӧн на пӧ тай и колӧ заводитны песны ки-коктӧ. Войся кузь дӧрӧмыс эз лэдз кокъясыслы вӧльнӧя вӧрны, ковмис быть чеччыны да шыбитны вывсьыс дӧрӧмсӧ.

Пасьтӧг кольӧм бӧрын сійӧ дрӧгмуныштіс да вӧчис воськов-мӧд ӧдзӧса трельяж дорас. Бура ловзьӧм еджыд няньшом кодь вир-яйыс повзьӧдыштіс первойсӧ, ой-ой пӧ тай, дзикӧдз кутӧма кыскыны госӧн! Но кор син улас усины чунькытшъясӧн дзирдалысь киясыс, дӧвӧльпырысь нюмдіс. «Марго кодь кащейыд ли мый лӧсьыд?» Сійӧ тай тӧнлун на завидьпырысь шуис Анна Степановналы-а, киясыд пӧ тэнад настӧящӧй аристократкалӧн. А Маргоыдлӧн абу на вом дорыс йӧй, тӧдӧ на, мый мича да мисьтӧм. Быдӧнлы тадзтӧ оз на шу. А мый ёнджыка нин гӧгрӧсмӧма, ёнасӧ шогсьынысӧ нинӧмла жӧ. Босьтчас вот быд лун зарядка вӧчны да стадионын котравны — бӧр вӧсняммыштас.

Тайӧ мӧвпсьыс сылы лои долыд, и нывка моз заводитіс чеччавны места вылас. «Раз и два! Раз и два!» — чеччаліс и ӧттшӧтш командуйтіс ачыс аслыс. Быд чеччыштӧмысь скӧра дзуртыштлісны джодж пӧвъясыс, и Анна Степановна тӧждысьӧмӧн видзӧдлывліс трельяж тшупӧдас меститӧм хрусталь дозмук вылӧ, мед пӧ, загреки, оз жӧ гылав да пазьгысь.

Сылӧн зымакылӧм шыӧ кухнясянь пырис мамыс, Марина пӧчӧ, броткыштіс:

— Мый, мися, лои? Этайӧ тай бара темешитчӧ... Куш заднас... Джодж плакасӧ кӧть эн чег...

— Но, чега нин сэтчӧ, — пиньыштсис нылыс да дугдіс жӧ чеччавнысӧ, пондіс тивкйысьӧмӧн котравны жыр пасьтаыс. — Ме ӧд кок чунь йылын... Энлы, вежон-мӧд бӧрти дзик кӧч моз кута...

— Этатшӧм тушанад кӧч моз, дерт, — серӧктыштіс Марина пӧч. Анна Степановна скӧрмис:

— Омӧльджыка блиннад верд дай. Шулі нин — эн пӧжав. Талун бара на, кылӧ, блин дзужган. Дукыс татчӧдз кылӧ.

Марина пӧч крапкис-шуис:

— Ыждавны ещӧ он-ӧ кӧсйы? Мед чеччин дай пуин-пӧжалін ачыд, мый колӧ. Мем талун шаньгаӧн окота лои чӧсмасьыштны да шаньга пӧжала-а.

Ӧдзӧсас тринькнитісны ӧтчыд дай мӧдысь. Бабыс уськӧдчис восьтыны:

— Кодкӧ, со, кылӧ, локтӧ.

Марина баб петіс, а Анна Степановна первойсӧ кӧсйис саймовтчыны ӧдзӧс занавес саяс, сэсся думыштчис жӧ: суасны кӧ пасьтӧгыс, абу жӧ лӧсьыд. Арлыд сертиыс и чин сертиыс абу нин сэтшӧм морт, медым сы йылысь серам лыбис. Пондіс шарзьыны-корсьны халатсӧ.

А коридорас лыбис нин мамыслӧн окайтӧм да акайтӧм: «Сьӧлӧмшӧр, дитя! Югыдлун! Витюк!»

Анна Степановна ойӧстіс:

— Виктор кӧ воӧма-а?! — Мича халатсӧ кизялігтыр, уськӧдчис пиыс дорӧ. — Виктор! Мыйла нӧ эн телеграфируйт? Встретитім эськӧ...

— А-а... Тадзсӧ бурджык... Локті тай, мый менӧ встречайтнысӧ?

Нюмвидзӧ Виктор. Ыджыд, мича, ён. Десантник формаа.

А бабыс, кылӧ, кысянькӧ кухнясяньыс нин чуксасьӧ:

— Пӧрччысь, югыд шонді, мыссьы. Тӧдсьӧма гӧсьттӧ, няньшом тӧрыт кӧтлі. Пӧсь шаньга петіс буретш. Ой, чӧскыдӧсь, лок сёй! Нӧкйӧн...

Бабыс ещӧ нин пӧрысьмӧма тайӧ кык вонас. Чинӧма. Чужӧмыс ки пыдӧс пасьта сӧмын кольӧма и чукрасьӧма, но синъясыс абу на чусӧсь, и кок йылас пельк на. Гӧлӧсыс лэчыд на и. Буракӧ, гортас став уджсӧ на водзті моз ачыс вӧчӧ. Мамыс тай, со, пасьтасьӧма да шыльӧдчӧм-мольӧдчӧм, баруня моз пуксис пызан саяс дай. Ещӧ норасьыштіс на пиыслы, быд лун пӧ бабыд пӧжасӧн вердӧ, сідзи нин платтьӧясӧ эг кут тӧрны-а.

Збыль, мамыс Викторлӧн тӧдчымӧн тшӧгӧма, платтьӧ кизьясыс морӧсас резыштны дасьӧсь. Тӧдчымӧн и тшапмӧма. Юрсисӧ лэпталӧма-пушитӧма, гыжъясыс чим гӧрда краситӧма. Да и пукалӧсӧ пызан саяс весиг тшапа. Триньӧдчӧ чайнӧй паньнас чашкаас да сёрнитӧ-варовитӧ пиыскӧд, юасьӧ-висьтасьӧ:

— Буракӧ, тэд гижлі нин, ог нин Минфинад уджав. Дӧзми командировкаясті ветлынысӧ. Ӧні спокой-дорогой. Шоныд и кынӧм пӧт. Ресторанса бухгалтерияӧ вуджи. Аттьӧ Маргарита Ефимовналы...

— Тэ, рӧдимӧй, сёй ёна, сёй! Кывзы мамтӧ да сёй! На, со, этайӧ шаньгасӧ ещӧ видлы, зэв мичаа банйӧма! — бабыс зіль ур моз пӧжассӧ кыскӧ духовкасьыс, нӧкнад мавтӧ, сыртӧ вундӧ, чайтӧ кисьтӧ — ставсӧ удитӧ вӧчны и варовитӧ тшӧтш.

— Быд сёйигӧн тэнӧ гарала, мыйӧн, мися, вердӧны муса пиӧс салдатас? — нюмкерӧ внукыслы бабыс.

— Бабук тэ, бабук! Ме жӧ гижлі: вердӧны бура.

— Бура ли оз ли, а абу гортад моз. Локтін ӧні... Эсся гӧтралам. Кувтӧдз зэв окота тэнсьыд кагушъястӧ видзыштны.

Татшӧм сёрнисьыд Викторлӧн мамыс пыр и вештыштіс водзсьыс чай чашкасӧ, бугжыльтчыліс мамыс вылӧ:

— Мамӧ, тэ мый вылӧ вӧйпӧдан зонсӧ? Гӧтрасьнысӧ сылӧн зептыс на вӧсни дай юр сюяніныс на абу.

— А-а... — бабыс шеныштчис кинас. — Тіянӧс кӧ Маргарита пӧдругаыдкӧд кывзыны, кӧть ветымынӧн эн гӧтрась. Первой кооперативнӧй патера, сэсся машина, сэсся самолёт ковмас!

Анна Степановна сійӧс вочааліс:

— Зато тэныд нинӧм оз ков.

— Меным? Нинӧм меным оз и ков. Кынӧм пӧт, а сэсся кык нэм ог кӧсйы овны дай. Тэныд тай мыйкӧ век оз тырмы-а. Керкаад некытчӧ нин пырны — этані крусталь, этані парпор, сідзи и пов, инмӧдчан да жугӧдан мыйкӧ.

— Мамӧ, тэ мый ӧні та йылысь заводитін? Колӧ, дерт, меным, пи, со, менам эм да. Гӧтрасьны тай тшӧктан. Нинӧм абу дорас ли мый гӧтырсӧ вайӧдас?

— Гӧтрасяс да, и нажӧвитасны, — кайтыштіс бабыс. — Ми гӧтрасьлім идзас перинаӧн да пу тасьтіӧн.

Виктор кывзіс мам да баб костсьыс сёрнисӧ, петіс серамыс:

— Да ті мый, донаяс, вензянныд? — шыасис сійӧ. — Энлӧй, нӧрӧвитлӧй, и гӧтрася, и внукъясӧс лӧсьӧда. Менам ӧд ставыс на водзын. Главнӧйыс, гортын ме ӧні, тіянкӧд, бабук, мамук...

Ӧдзӧсас звӧнок торкис налысь сёрнисӧ.

— Ой, тайӧ ме дорӧ! — мамыс дзик пыр ырснитіс пызан сайсьыс, уськӧдчис ӧдзӧссӧ восьтыны.

— Анна Степановна! Мӧдім! Тэ дась? — кыліс кухняӧдз нывбаба гӧлӧс.

— Маргарита Ефимовна! Мунам, мунам дзик пыр! Пырыштлы вай. Мамӧ, со, шаньга пӧжалӧма, чӧсмасьышт. Миян ӧд Виктор локтіс!

Бӧръя кывъяссӧ Анна Степановна шуаліс нин кысянькӧ мӧд жырсяньыс, а кухняӧ бырс пырис морӧс тырыс сикӧтша нывбаба. Косіник ныр-вома, краситӧм гӧрд юрсиа, сійӧ кокньыдика инмӧдчыштіс бабыс дорӧ чужӧмнас, сэсся сувтӧдіс синсӧ пызан сайын пукалысь Виктор вылӧ, мыйлакӧ «О-о!» — горӧдіс да вӧлись чургӧдіс краситӧм гыжъяса кос кисӧ:

— С приездом, солдатик! Со тэ кутшӧм вӧлӧмыд красавец! Шогси, мися, код сайӧ и ӧтка нылӧс кута сетны. А со, и жӧникыс вӧлӧма! Марина баб, позволитанныд кӧ, ме ӧти шаньга босьта...

Некутшӧм «позволитӧм», дерт, сійӧ эз мӧд виччысьны, пыр жӧ кузь гыжъя кинас кватитіс пызан вывсьыс шаньгасӧ, лӧсьыдика курччыштіс пинь йывъяснас шаньга дорсӧ.

Виктор эз сяммы нинӧм шуны да, кӧть эськӧ и кӧсйис, эз вевъяв. Сылы кажитчис, мый эз нывбаба пыр на ордӧ, а жбыркнитіс лэбач. Буретш лэбач, мича да хищнӧй, коді унаысь нин, тӧдчӧ, шедлӧма лэчкӧ да быд пӧрйӧ сэтысь мездысигӧн кольлӧма лэчкас медмича бордтыридзсӧ. И век жӧ сяммӧма шыльӧдны гӧнсӧ кыдзкӧ бӧр сідз, мый век кажитчӧ мичаӧн, колипӧн.

Марина баб сьӧлӧмсяньыс заводитліс сійӧс гӧститӧдны, сёй пӧ, сёй, чай чашка кисьта и. Но гӧстяыд, шаньгасӧ курччаліг, жбыркнитіс-петіс нин коридорас, кӧні Анна Степановна буретш кӧмасис да маитчис выль босоножкинас.

— Комын шайт сеті, а абу удобнӧйӧсь. Зыртӧма кокӧс.

— Нинӧм, паськалыштас, — Маргарита Ефимовна, кылӧ, сэн жӧ сетӧ сьӧлӧм пӧдругаыслы. — Мича зато, итальянскӧй. Он на быд пӧрйӧ ньӧб татшӧмтӧ... А, между прочим, верма судзӧдны Викторыдлы импортнӧй джинсы, фирменнӧйӧс...

Виктор да бабыс тшӧтш петісны пызан сайсьыс нывбабаяс дінӧ, медым колльӧдны мунысьяссӧ. Мамыс Викторлӧн кӧмасис жӧ кыдзкӧ, тотш-тотшкерис кокъяснас, матыстчис пи дорас, шыасис:

— Кылан, Витюш, Маргарита Ефимовна джинсы кӧсйӧ судзӧдны.

Виктор нинӧм эз шыав, лэптыштліс сӧмын пельпомъяссӧ. Тӧдіс: джинсы ӧні зэв моднӧ, но ёна-ӧ сійӧ сылы колӧ, эз на бурасӧ думышт. Мамыс малыштіс сійӧс морӧсӧдыс, серӧктіс. — Йӧюк на тайӧ менам. Век на, буракӧ, салдатас думъясыс. — Сэсся вайӧдіс вомсӧ пиыслы дзик пель бокас, вашкис: — Тэ варовджыка ов тайӧ аньыскӧд... Рытнас пукалыштны корлам. Андел кодь ныв эм талӧн и...

Та бӧрын сійӧ кватитіс тумбочка вывсьыс сумкасӧ, тэрыба мӧдіс восьса ӧдзӧсланьыс, кӧні виччысис нин сійӧс Маргарита пӧдругаыс.

— Ме талун водзджык старайтча воны, — порог воськовтіг, юӧртіс кольччысьяслы. А Маргарита Ефимовна шеныштчис кинас да гажаа горӧдіс:

— Эн гажтӧмтчӧй! Ми водзджык локтам! Аддзысьлытӧдз, зятьпу!

Коклябӧръяснас котшкакылігтыр, найӧ лэччисны пос кузя увлань. А кор саялісны, бабыс ышловзис:

— Быд асыв, со, тадз тэрмасьӧны... Рыжӧй бесыс эсійӧ зятьпуӧн нин тэнӧ шуис. Ок, баба, дзирыд зад, тьӧщапу... Вай пырам, ещӧ на чайӧвайтыштам. Мед тайӧяс мунісны, дзирняяс. Ёна жӧ гажӧй бырис, рӧдимӧйысь! Югыд шондіысь!..

Удж вылӧ мунігмоз Анна Степановна кӧсйысис водзджык воны. Водзджык и локтіс. Сьӧрсьыс уна сёян вайис, ресторанысь пӧ закажиті.

— Рыт кежлас Микайлӧ вокӧс Анфисакӧд кори, — юӧртіс мамыслы.

— Кутшӧм сьӧм вылӧ нӧ ресторансьыс сёянсӧ ваялан? Али сэтшӧм ыджыд нажӧткаыд? Ачым ӧд верми ужынтортӧ дасьтыны, — лапкучкысис Марина пӧч.

Аннаыс тшапкодя шуис:

— Тэнад дасьтӧмыд...

Шензьӧм босьтіс Марина пӧчӧс.

— Но, мый нӧ нин сэтчӧ аслам пи-моньлы ог куж? Микайлӧ менам ни Анфиса абу чездыллысьӧсь.

— Да, тэнад пи-монь вӧсна тай ме кута ресторанысь блюдояс вайны, — тшапа тракнитіс юрнас да вочавидзис нылыс. — Маргарита гозъяӧс ӧд тшӧтш кори. Найӧ абу тэнад пи-моньыд. Интеллигентъяс. Сервируйтны налы колӧ кужӧмӧн и. Тэ вешйы, эн кутчысь. Ачым.

— Ачыд кӧ и ачыд, — дузмуніс Марина пӧч, мыжа морт моз пуксьыштіс диван дорышас. — Сервируйт...

— Мый огыс, сервируйта! Колӧкӧ, рӧдняяс на лоам. Викторным миян зэв ёна кажитчӧма Маргариталы.

Анна Степановналы сьӧлӧм вылас, буракӧ, долыд вӧлі, сідзи и жбыркъяліс пызан гӧгӧрыс, тэчаліс тарелкаясӧ сёян, сёрнитіс мамыскӧд:

— А мамӧ, збыль ӧд Катрук Галинаыс Викторнымлы бур пара?

Марина пӧч ышловзьыштіс, сетіс нылыслы вочакыв:

— Мый бара аддзӧмыд бурсӧ вежнясьысь эня-нылаыслысь-а? Ен мед видзас миянлысь Витюшӧс Маргарита кодь тьӧщасьыд да сылӧн ныв кодь гӧтырпусьыс. Прамӧйджыкӧс жӧ мед аддзас, дитяӧ, олӧм тӧварышсӧ.

Татшӧм кыв вылад Аннаыс пыр и скӧрмис, крапкис-шуис мамыслы:

— И мый ме тэкӧд сӧветуйтча век, деревенскӧй дуракӧд? Аддзас тэнад дитяыд, аддзас! Ӧдйӧ ылӧдасны Ваня другсӧ моз! Тырмас, ме ылавлі нин... Ті кӧ менӧ, ӧтка нывтӧ, эн кужлӧй верӧс сайӧ сетны, ме ассьым ӧтка пиӧс сідз жӧ али мый гӧтрала? Ог на! Ачым невестапусӧ корся! Маргарита борд улад патераысь ни нинӧмысь Викторлы эськӧ эз ков шогсьыны...

— Патера вӧсна... — Марина пӧч дыр эз тӧд мый шунысӧ, лапӧдыштіс сӧмын кияснас. А сэсся недыр мысти шуис:

— Ок, Анна, муса нылӧй! Сідз кӧ нин сёрнитны, эз шыбитана вӧв тэнад верӧсыд. Позис сыкӧд овны.

— Позис, дерт, сьӧд деревняад. Век на эськӧ тшӧтки молльӧн сельпоын гольӧдчи. Сійӧ тай нэмсӧ цветок стебель да пестик йылысь висьтавлӧ школьникъяслы. Весиг директорнас оз пуктыны, непӧштӧ роноӧ завӧн. Висьталӧны тай, градъяс пӧ челядьыскӧд вӧчӧ да помидор пуктӧ. А ме пуктытӧгыс сёя! Хрусталь дозмукысь. И обслуживайтӧ менӧ ачыс ресторанӧн веськӧдлысьыс, мый угоднӧ пӧ, дона Анна Степановна. Вот, мамаша! А тэ век жалитан непутёвӧй верӧсӧс.

— Жалита, дерт, ӧд тэ ӧтнад. Гозйӧн шулӧма овны да...

— Ӧтнам, да мускӧс ли мый зыртӧ менсьым? — Анна Степановна татчӧ гылыдакодь серӧктіс, гонькнитіс-видзӧдліс зеркалӧсьыс асьсӧ.

Мый эськӧ татчӧ шуан да он шу? Марина пӧчлы дивӧ лои. Абу ӧд нин том Аннаыс, нелямынысь петӧма. Велӧдӧм пыдди кӧ олӧмыс тшыкӧдӧ тайӧс-а? Со тай, ошйысьӧ крусталь дозмукысь сёйӧмӧн. Водзті садяджык быттьӧ вӧвлі. Эсійӧ Марго пӧдругаыскӧд тӧдмасис да пустелька кодь кутіс лоны.

А нылыслы, тыдалӧ, аслас мыгӧрыс кажитчис, эновтіс пызансӧ, матыстчис дзик зеркалӧ водзас, мыйлакӧ пӧрччыліс оборкиа водздӧрасӧ да бӧр пасьталіс, сэсся лӧсьыдика юрсӧ дзӧрӧдыштӧмӧн шыасис мамыс дорӧ:

— А тэныд кӧ сэтшӧма зять колӧ, верма на и верӧс сайӧ петны.

— Пет, пет, — шмонитыштіс мамыс. — Да мед юысь мужик веськалас. Да мед гоз-мӧд кага ваян.

— Тайӧс тэ, мамӧ, меным кевман?

— Кевма, дерт, этшсьыд кутӧмыд петны да.

— Ме — петі? Но и шуан жӧ! Кыдзи нӧ?

— А нелямын арӧснад зеркалӧ водзад титимеритчыны абу нин лӧсьыд. Вот кыдзи, нылукӧ.

— Нылук, дерт нин... — Аннаыслӧн зумышмис чужӧмыс, синъясыс сотыштісны мамсӧ. — Рӧдимӧй ныв кӧ ме тэд вӧлі, эн эськӧ татшӧмтортӧ кевмы.

Марина пӧч эз дзик пыр вежӧрт нылыслысь кывъяссӧ. Сійӧ ачыс радейтліс шмонь кывтӧ да думсьыс шмонитіс нылыскӧд, дай первойсӧ чайтіс, мый и Аннаыс шмонитӧ. Но сылӧн чужӧмыс висьталіс, мый оз шмонит.

Пӧсь ваӧн койыштӧмысь ёнджыка сотісны нылыслӧн нем виччысьтӧм кывъясыс. Нелямынысь петӧм бӧрын тадз шуис, некор водзті эз шулы-а! Понлы кӧ быттьӧ тадзтӧ чужйыны, дыр эськӧ никсіс-горзіс. А мортыд... Гыньыктан тай. Шытӧг гыньыктіс Марина пӧч голясьыс гӧрддзасьлӧм гӧрӧдсӧ. А кор прӧстмис горшыс да шедіс тыясас сынӧдыс, шыасис, сетіс нылыслы вочакыв:

— Збыль, дитяӧ, эг ме тэнӧ чужтыв. Ог ӧти во ӧтлаас олӧ, тайӧс тэ важӧн тӧдан. Гашкӧ и, эг куж бур мам мозыс, но арӧса кагасянь быдті. А ӧні тадз шуны меным! Ме нин и тэнсьыд питӧ быдті да! Анна тэ, Анна! Ме вед, муні батьыд сайӧ да, сразу татчӧ карас овны воим, эновтім керка и карта сиктысь. Медым некод тэныд эз шу: не рӧднӧй дорын пӧ быдман. А воим да, сразу война заводитчис. Батьтӧ нуисны. Ни прамӧй патера, ни нажӧтка менам, неграмотнӧй бабаыдлӧн. А тіянӧс он шыбит. Ковмис удж корсьны. Лесзаводӧ кута мунны удж вылӧ, Микайлӧ узян на кольӧ — сійӧ ӧкмыссянь мунӧ школаас. Тэнӧ ӧтар кар помас яслиӧ котӧртӧда, ачым кар мӧдар помас тэрмася, не дай бог, сёрман! Рытнас локтан, муртса кок йылад сулалан, уль керъяс лунтыр новлан да тэчан станок вылӧ. Бара колӧ яслиӧ котӧртны. А сэн на ещӧ Микайлӧ некӧн оз кыв ни тыдав. Кӧні? Гашкӧ, и школаас эз ветлы?.. Абу, дерт, ме рӧдимӧй тіянлы... Анна тэ, Анна...

Марина пӧчлӧн висьтасьӧмыс, буракӧ, эз и вӧрзьӧд Аннаыслысь сьӧлӧмсӧ. Муніс да вангӧдіс-восьтіс балкон ӧдзӧссӧ, нерыштіс мамсӧ:

— «Анна тэ, Анна...» Вай гораджыка норась, гораджык, мед ставыс кывласны! Да бӧрд ещӧ, гӧсьтъясыдлы воигкежлас гажаджык лоӧ.

Тайӧ кадас кодкӧ тринькнитіс ӧдзӧсас. Анна Степановна стрӧга видзӧдліс мамыс вылӧ, шуис:

— Виктор, кылӧ, локтӧ, сы водзын ещӧ бӧрд.

— Тэнад йӧй сёрни вӧсна тай бӧрдны кута, — вувзьысьыштіс пӧчӧ, мӧдіс ӧдзӧссӧ восьтыны.

— Здоровоти! Гӧсьтъяс локтам! Кӧні салдат-молодечыс? Ноко, лок встречайт вежайтӧ! — Анна дінӧ жырйӧдзыс кыліс Анфиса моньыслӧн паськыд гӧлӧсыс.

— Абу гортын, петіс Ваня друг дорас, — вочавидзис баб.

Викторлӧн Ваня другыс, кодкӧд ӧтлаын велӧдчылісны первой классянь да юксьылісны не сӧмын пирожкиӧн либӧ мороженӧйӧн, но и явӧ да гуся мӧвпъяснаныс, олӧ орчча вит судта керкаын. Сійӧ ыджыдджык Викторысь да армияас водзджык и ветліс. Локтӧма, со, арнас да, висьталӧны, пыр жӧ и гӧтрасьӧма. Ваняясӧдз петны абу и дыр. Но кык керка костсӧ восьлалігӧн, Виктор удитіс бергӧдны быдсяма думсӧ. Тэрыбӧсь тай думъясыд, быдторсӧ ӧти здукӧн шымыртӧны.

Сэтшӧм дивӧ вӧлі Викторлы, мый другыс босьтӧма дай гӧтрасьӧма. Кутшӧмкӧ тӧдтӧм ныв вылӧ кӧ, гашкӧ, и эз дивӧ вӧв. Но ӧд Тоська вылӧ! Ӧти-кӧ, Тоськаыс ар куимӧн ыджыд Ваняысь. Мӧд-кӧ, кага пӧ эм воддза верӧссяньыс. А коймӧд-кӧ, некор Тоська эз вӧв завидьтана нылӧн. Ваняяс керкаын жӧ и олісны найӧ. Виктор бура тӧдӧ, кутшӧм вӧвлі Тоськаыс. Зонпосникӧд и лэбавліс гаражъяс вывті да заборъяс костӧд. И тышкасьліс зонпосни моз да содтӧд ещӧ пинясьліс мисьтӧм ёсь гӧлӧснас. Гырысьджык классъясын велӧдчиг и то киссьӧм гырддзаӧн ветлӧдліс. И кыдзи Ванялӧн артмӧма татшӧмторйыс? Быттьӧкӧ и тӧлка морт Ваняыс. Да и мамыс сылӧн учительница, тӧлка нывбаба жӧ. Ме, буракӧ, ачым на ог гӧгӧрво мыйкӧ, — кывкӧрталӧ медбӧрын ассьыс сэтшӧм-татшӧм думъяссӧ Виктор. Да и Марина бабыс ошкӧ Ваня гозъяӧс. Гознанныс пӧ мебельнӧйын уджалӧны и ладӧн олӧны. Кагасӧ пӧ Ваняыс оз мустӧмт ни. Бабыс на висьтасис, видзны пӧ мем вайлісны, садикыс эз уджав да. Мамыс пӧ ӧд Ваняыдлӧн дыр нин куйлӧ больничаын.

— Больничаын? Мый нӧ сідз? — шензьыштіс Виктор татшӧм юӧрсьыд.

Бабыс вочавидзис:

— Налӧн ӧд зэв неладнӧтор артмыліс. Кагасӧ воштылісны. Петас Катеринаыс гуляйтны каганас дай воштас. Быдлаысь корсисны — эз аддзыны. Бӧрынджык йӧзасис: — Тосяыслӧн воддза верӧсыс пышйӧдӧма. А Катеринаыс веськалӧма больничаӧ...

Виктор тӧдіс, мый Ваня гозъя гортасӧсь. Аддзыліс ӧшинь пырыс, кыдзи гозъя кысянькӧ локтісны. Но эз на керкаас пыр, а ӧшинь дорас локтіс — квартираыс Ваняяслӧн первой судтаас — да шутёвтіс. Ваняяс быттьӧ тайӧс и виччысьӧмаӧсь, дзик пыр ӧшиньыс воссис да гажа ныр-вомъясныс гозъялӧн сэн мыччысисны. Радыс лои кыкнанныслӧн! Ви-ить! Котов Вить! Тайкӧ оз лэптыны ӧшинь пырыс гӧстьтӧ.

Весьшӧрӧ абу ошкӧма бабыс Ваня гозъяӧс. Ваняясын и збыль Викторлы кажитчис. Патераыс ӧти жыръя и эм, а сэтшӧм пельк да сӧстӧм! Быттьӧ и кага абу. Джодж шӧрас ыджыд мач да ӧшинь дорас сулалысь чомъя ичӧтик крӧвать сӧмын и висьталісны, мый керкаыс абу кагатӧм. Полкаторъяс, шкафчикъяс стенас тувъялӧмаӧсь, веж быдмӧгъяс полкаяс вывсянь люзьгӧдӧмаӧсь вожнысӧ. А на пӧвстын то матрёшка, то чибӧ, то машина — став кага чачасӧ сідз меститӧма, мый быттьӧ котӧртӧ, ворсӧ став керка пытшкӧсыс. И сэк жӧ нинӧм оз туплясь ни оз мешайтчы.

Гозъя муртса смена вылысь воӧмаӧсь. Воигас и пыралӧмаӧсь ньӧбасьнысӧ. Виктор пырис на ордӧ буретш сійӧ кадӧ, кор найӧ ӧтув ректісны прӧдукта сумкасӧ. Тося, пытш кодь визулыд, первойӧн уськӧдчис Викторлы паныд.

— Ванюк, тэ вай тэч холодильникад колькъяссӧ, ме пока окалышта Витяӧс, — кухнясьыс лыйыштігмоз тшӧктіс Тося верӧсыслы да ещӧ содтіс: — Денискалаыд садикад тэд ковмас ветлыны и. Ме блин пӧжалышта. Яблочнӧй повидлоӧн зэв на и чӧскыд лоӧ. Виктор, кӧсйӧ кӧ, мед тшӧтш садикас тэкӧд петалас. А колӧкӧ, кольччы, Вить, мекӧд! Блин пӧжавны велӧда. Згӧдитчас! — Вильыш сьӧд синъяснас ворсӧдчигтыр, шмонитіс Тося да чмокйис-окаліс верӧсыслысь другсӧ. Ваняыс жӧ лабутнӧя тшӧтш сибӧдчис другыс дорӧ да грӧзитчыштіс чунь помнас:

— Окалыштны другӧс лэдза, а блин пӧжавны кольччыны — ог! Ветлас мекӧд. Детскӧй учреждениенас тӧдмасьӧмыс ковмас жӧ коркӧ.

Виктор сӧмын нюмъяліс да лэптыштліс пельпомсӧ, меным пӧ тіянкӧд кыкнанныдкӧд зэв лӧсьыд и вӧчӧй пӧ мекӧд мый кӧсъянныд, пыксьыны ог кут.

Тешкодь, сӧмын на татчӧ пыртӧдз вежӧгтіс Виктор другсӧ Тоська дорӧ да кӧсйис, мед керкасьыс аддзас мыйкӧ сэтшӧмтор, коді эськӧ мед омӧльтіс ичмоньӧс Виктор синъясын. Но Виктор сідзи эз и аддзы нинӧм Тосяӧс лёкӧданторсӧ. Сылы быть ковмис миритчыны мӧвпӧн: Тося да Ваня — гозъя. И, тыдалӧ, пыр кежлӧ. Тайӧ тӧдчӧ и ӧтикыслӧн и мӧдыслӧн син видзӧдласысь. Тоська быттьӧкӧ век школьница-нывка, вӧсньыдик, пуысь ва кодь визув, но Виктор пыр жӧ гӧгӧрвоис, мый тайӧ абу нин сійӧ укшаль нывкаыс, кодӧс челядь векджык нимтылісны Тоська-Моськаӧн. Стӧча и висьтавны он куж, но мыйӧнкӧ ёна вежсьӧма. Гашкӧ, синъясыс абу важ кодьӧсь. Сэтчӧ овмӧдчӧма мӧвп. Колӧкӧ, тайӧ мӧвпыс и водзті Тоська пытшкын оліс да эз эштыв петкӧдчывны ортсыӧ. А ӧні эновтчӧма синъясас и вӧчӧма Тоськаӧс Антонинаӧн, нывбабаӧн, радейтанаӧн и радейтысьӧн.

«А ничево, эськӧ, тыдалӧ, Тосяыс, сӧмын кагаа тай», — другыскӧд орччӧн садикӧ восьлалігтыр, думайтіс Виктор. Сэсся эз кутчысь да юаліс:

— Ваня, тэ шуда? Он каитчы?

— Мыйысь?

— Гӧтрасьӧмсьыд.

— Йӧй тэ, — шуис Ваня. Виктор падмыліс.

— Мый тэ пинясян? Ме жӧ ог кулит тэнсьыд Тосятӧ. Вот босьта дай мырддя. Менӧ нывъясыд ёнджыка радейтлісны, кӧсъян кӧ тӧдны.

— Ошйысь, ошйысь... А этайӧ он кӧсйы тӧдны? Ме, буракӧ, тэ дорысь пыр крепыдджык вӧвлі. — Ваня петкӧдліс Викторлы кулаксӧ, сэсся серӧктіс мичаа, лов пытшсяньыс да кыдзкӧ быттьӧкӧ и мудеракодь. — Аддзи кӧ нин ме сійӧс, Тоськаӧс ассьым, ог нин сет некодлы! Тэ тӧдан, кутшӧм сійӧ? Да кысь тэныд тӧднысӧ? — Ваня шеныштіс кинас, содтыштіс восьлассӧ. Тайӧн быттьӧ кӧсйис шуны, мӧдін кӧ пӧ мекӧд, вӧтчы бӧрысь да чӧв ов, эн суитчы, кытчӧ оз ков.

Ванялӧн Виктор дорысь ичӧт тушаыс. Латшкӧсіник. Но крепыд тэчаса. Ичӧт туша вӧснаыс нывъяс сійӧс бракуйтлісны кыдз кавалерӧс, но кыдзи бур друг дорӧ ловъяснас кыссьылісны весиг медся мича нывъясыс. Мыйӧн и Ваня сибӧдліс йӧзсӧ ас дорас? Ёна кыв-вораӧн он шу ни вывті меліӧн. Со, и Викторӧс сы дінӧ магнитӧн моз кыскӧ. Водзті тай, классын мунӧны кӧ походӧ либӧ киноӧ, юалӧны нин: Ваня Елькин мунӧ? Ыджыд вежӧрнас, буракӧ, тыдавтӧм лучьясӧн моз кыскӧ. Задача кӧ кодлӧнкӧ эз артмыв — шыасьлісны отсӧгла Ваня дорӧ. Тӧдтӧм кыв кӧ паныдасяс, бара жӧ Ванялысь юалӧны. Ваня лабутнӧя да ышнясьтӧг висьталас ставсӧ.

Ӧні Ваня быттьӧкӧ ещӧ лабутнӧй лоӧма. А варов да лэчыд кывъя Тосяыскӧд ӧтвыв олӧмысь ли, мый ли, тӧдчымӧн кыв-вора лоӧма да ещӧ и шмонькыв на песовтас-шуас.

Виччысьтӧг Ваня сувтовкерис, лӧсьӧдыштіс сьылі дорсӧ футболкаыслысь, быттьӧ джагыд лои друг паськӧмыс, да Виктор вылӧ видзӧдӧмӧн шыасис:

— Юалан, каитча ог гӧтрасьӧмысь. А тэ кӧ ме моз жӧ гӧтрасян?

— Мыйла тэ моз?

— Сы вӧсна, мый тэнад сьӧлӧмшӧрыд тані жӧ. Быд паныдасигӧн менсьым юалӧ, кор нин локтан армиясьыд, — Ваня шпыньмуныштіс.

— Менам сьӧлӧмшӧр? Быттьӧ тай нӧ ог тӧд сэтшӧмсӧ, — падмыліс Виктор.

— Аллочкатӧ он тӧд?

— Алла Лыткинаӧс? Но и чудак тэ, ачыд вӧлі пель йылӧдзыд сы вылӧ радейтчӧмыд, а менсьым сьӧлӧмшӧрӧн шуан.

— Шуа, дерт, тэнӧ бӧрйис миян кык пытшкысь да. Ме вылӧ несйыны эз кӧсйы да.

Виктор татчӧ гораа серӧктіс.

— Тэ вылӧ несйыны эз кӧсйы, а меным несйис... Кора пӧ водзӧ вылӧ меным не гижны. Менӧ пӧ оз интересуйтны салдатъясыд.

— Тэд сідзи гижліс?

— Но да. А тэ шуан... Но мыйла сійӧ тані? Оз ӧмӧй МГУ-ын велӧдчы? Гижліс тай меным Москвасянь-а.

— Пыравлӧма, буракӧ. А ӧні тані. Универмагын ювелирнӧй отделын уджалӧ. Сэтшӧм гордӧй-величавӧй сулалӧ, вежсӧ петкӧдлӧ став мужичӧйыслысь.

«Сӧран!» — кӧсйис кабыртчыны другыслы морӧсас Виктор. — «Збыль менӧ виччысьӧ?» — кӧсйис радлыштны Виктор. И нинӧм тайӧс эз вӧч. Мыйла? Ӧні дзик нинӧмла нин. Сӧмын и петіс сылӧн кызмырдӧнмоз юалӧм:

— Мыйла... универмагас?

— Ме тӧда... — кайтыштіс Ваня да мыйлакӧ юаліс: — Помнитан Аллочкаыслысь мамсӧ? Учёнӧй дама сэтшӧм. Век миянӧс велӧдліс. — Ті, том йӧз, дасьтӧй асьнытӧ, медым государстволы колана йӧзӧн лоинныд. — Ваня лӧсьыдика нерыштіс Аллочкаыслысь мамсӧ, сэсся стрӧгакодь содтіс: — Сӧветскӧй торговлялы «единственнӧй и пламеннӧй страсьтсӧ» Аллочканым сетны решитчӧма.

Виктор нинӧм эз вочавидз Ваня другыслы. Сійӧ мыйлакӧ думыштіс, мый Ваня век, тыдалӧ, радейтӧ Аллочкаӧс и та вӧсна мустӧмтӧ сійӧс и весиг мамсӧ. «А менӧ вежӧгтӧ».

Виктор тӧдӧ Ваняӧс. Сійӧ вывті сӧстӧм морт, медым лёкысь вежӧгтыны либӧ завидьтыны. Та вӧсна Виктор ассьыс думсӧ висьталӧ другыслы горӧн.

— Вань, тэ век радейтан Аллочкасӧ?

Ванялӧн паськавлісны синъясыс, здук кежлӧ падмыліс, сэсся веськыда вочавидзис:

— Да. Но ме радейта ог Аллочкаӧс, а ассьым медводдза любовӧс. И тэ эн думайт... Менам ӧні Тося и сӧмын сійӧ... А мый мустӧмта, дак сійӧ тэ вӧсна... Чайті тэнад сыкӧд... А абу кӧ, и бур... Со и Денискалӧн садикыс...

Шуис тайӧс Ваня да мыйлакӧ уськӧдчис штакетника забор дорас, сэтысянь пондіс чуксавны Викторӧс дінас:

— Лок видзӧдлы, лок! Ок, ерӧмакань, мырддис ӧд нывкаыслысь великсӧ!

Ваня да Виктор здук кежлӧ ляслісны садик забор дорӧ, видзӧдыштісны, кыдзи ноксисны-ворсісны забор саяс Денискалӧн ёртъясыс, посньыдик челядь. Сэсся мӧдӧдчисны забор пӧлӧныс дзиръя ӧдзӧслань.

Кагаыд дзик пыр аддзӧма батьсӧ, уткапи моз пондіс ваткыльтны дзиръя ӧдзӧсланьыс, велосипедтӧ и быдӧн эновтіс. Но сэк жӧ сійӧс сувтӧдіс воспитательницаыс, туг кодь лӧсьыдик томиник нывка.

— Дениска, эн на тэрмась! Тэнӧ ни папатӧ ме ог на дзик пыр лэдз гортад.

Пушыд виж юрсисӧ кыкнан кинас лӧсьӧдігтыр, воспитательницаыс матыстчис дзиръя ӧдзӧс дорӧ да чолӧмасьӧм бӧрын вежавидзӧмӧн шыасис Дениска бать дорӧ:

— Пӧжалуйста, энӧ мунӧй. Миян субӧтник талун. Со, и лыа вайисны, колӧ пыртлыны... Эштанныд кӧ...

Нывлӧн руд мича синъясыс видзӧдісны веськыда на вылӧ, ӧткымын берин туся бандзибъясыс тӧдчымӧн алӧймыштісны. Яндысьӧ, буракӧ.

Ваня нюмсермуніс, шыасис другыс дорӧ:

— Но мый, салдат, отсыштам? Со, нылыс корӧ...

— Мый огыс. Отсалам, — серӧктіс Виктор да пӧся видзӧдліс алӧй бандзиба нывка вылӧ. Ваня кыйис сылысь видзӧдлассӧ, збодера нин шуис:

— Этатшӧм мича ныв кӧ корӧ... Да ми ӧти здукӧн, со, этайӧ салдатыскӧд пыртлам став лыатӧ! Верман тӧдмасьны, между прочим. Менам и Денискалӧн медбур друг! Нимыс Виктор. И абу гӧтыра. А мый симпатичнӧй — ачыд аддзан!

Ныв дзикӧдз гӧрдӧдіс, лэдзис синсӧ, но нюмсӧ кутны эз вермы. Нюмсорнас и шыасис зонъяс дорӧ:

— Аттьӧ, кӧсйысянныд кӧ отсыштны. Ме зэв рад тӧдмасьны Дениска другкӧд. Дениска менӧ шуӧ Натата Гебовнаӧн. Наташа. Вот и тӧдмасим. А ӧні босьтӧй, со, нӧсилкасӧ и уджалӧй. Кӧсйысинныд кӧ...

Ныв и збыль вӧлі зэв муса. Виктор, буракӧ, сэтшӧм ӧзйӧм синмӧн видзӧдіс нывка вылӧ, мый сійӧ букыштчыліс весиг зон вылӧ да босьтіс Денискаӧс ки пӧлӧдыс, нуӧдіс ворсысь челядь чукӧрӧ.

— Кажитчис нылыс? — нӧсилкаӧ лыасӧ тэчигмоз, юаліс Ваня да шпыньмуніс.

— Тэ кажитчин, — серӧктіс Виктор. — Дзик сваття баба-бабарика. Тэнӧ и ковмас корасьны медавлыны.

— Да ладнӧ, броткынытӧ... Аддза ӧд, синмыд пӧнар моз ӧзтыны кутліс нывсӧ. И медася корасьнытӧ. Ваям Наташасӧ. Тося миян и Дениска пыр ошкӧны Наташа Глебовнасӧ. Дениска быд асыв тэрмӧдлӧ менӧ, ӧдйӧджык пӧ, папа, мунам садикӧ, «а то Натата Гебовна будет плакать, почему Дениськи долго нету».

— Тырмас тэд кывтӧ песны, — шуис Виктор, но аслыс вӧлі любӧ другыслӧн шуткаыс. Сійӧ вӧлі шуда, мый эм сылӧн татшӧм друг, коді збыльысь быд лов вӧрзьӧм аддзӧ и гӧгӧрвоӧ сылысь.

Отсасьысьяс локтісны гортас, Ваняясӧ, час кымын бӧрти сӧмын. Тося вачкучкысис:

— Кӧн нӧ ветланныд? Блинӧй менам важӧн пӧжасис дай удитіс кӧдзавны!

— Э, Антонина, эн сёрнит, — дорйысьыштіс Ваняыс. — Миян, брат, сэтшӧм делӧяс пансисны! Гӧтралам Викторӧс тэнад Наташакӧд, ӧти кывйӧн кӧ...

— Мун сэсь. Ылӧдчӧны ӧд ещӧ.

— Ньӧти ог, со, юав кӧть Викторлысь.

Виктор чӧв оліс, но вомыс шешвидзис. Тося дзоргыштіс сы вылӧ, кайтыштіс:

— Наташа — нылыс зэв шань. А ӧні марш ставныд мыссьыны! Сёйыштам да мамным дорӧ больничаас колӧ ветлыны.

— Мамӧ дорад, гашкӧ, аски ветлам. Тарыт, со, Виктор нуӧдӧ ас ордас, — кайтыштіс Ваня.

Тося дзик пыр вочааліс:

— Виктор ордад петавны ми удитам больничасьыс воӧм бӧрын. Ог ӧд дыр ветлӧ.

Виктор татчӧ шыасис:

— Либӧнӧсь ме тіянкӧд тшӧтш ветла. Екатерина Ивановнасьыс менам гажӧй бырис жӧ.

— Но и правильнӧ! — ӧттшӧтш ошкыштісны Викторлысь кӧсйӧмсӧ и Тося, и Ваня.

Мича гожся рытъяснас, коді этша вермыштӧ, ставныс петӧны дзескыд да дука больнича палатаяссьыд ывла вылас. Екатерина Ивановна, Ванялӧн мамыс, коймӧд лун на и чеччӧ да ачыс петыштлӧ вӧля вылас. Но удитӧма нин кык зонкакӧд тӧдмасьны. Детскӧй хирургияысь кыкнанныс, кӧстыльяс вылын тивкйысьӧны. Ӧтиыс — ар сизима збойиник зонка. Петя пӧ ме, Усть-Куломысь, жытник вывсянь чеччалӧма, коксӧ чегӧма.

— Гортсьыд он гажтӧмтчы? — юаліс Екатерина Ивановна.

— Ог. Со, Славик меным пыр мойдъяс висьталӧ!

Славиклы ар дас кык. Сійӧ абу Петя кодь тольӧдчысь. Чӧв олӧ, зумыш. Синъясыс сылӧн весиг сералігас оз ӧзйыштлыны вильыш биӧн, пыр жугыльӧсь. Жугыльлунсӧ сійӧ синъясысь аддзӧм бӧрын и Екатерина Ивановна шыасис тайӧ кык зонка дорас. И, со, мый тӧдмаліс Славик йылысь: мамыскӧд веськавлӧмаӧсь автоаварияӧ, мамыслы кувтӧдз лоӧма, Славик тӧлысь нин куйлӧ больничаын. Сылӧн кӧть эм бать, олӧ Эжваын, но мыйлакӧ эз на волы писӧ видлыны. И мамтӧг кольӧм зонкалы ещӧ нин сьӧкыд.

— Локтас на. Нӧрӧвитлы жугылясьнытӧ, — сьӧлӧм сетӧ зонкалы нывбаба да индӧ визув Петя вылӧ. — Сы ылнасяньыс Петя дорӧ, буракӧ, оз жӧ частӧ волыны, но сійӧ оз жуглясь, аддзан, со, кутшӧм.

Зонкалӧн вом доръясыс дрӧгмуныштісны, скӧра шуис:

— Некор оз лок! Юӧ, кӧнкӧ... — и никӧстӧмӧн бӧрддзис, кулакнас тупкис синсӧ.

Екатерина Ивановна лапӧдыштіс зонкаӧс мышкуӧдыс. Тайӧ каднас и мыччысисны пи-моньыс да Дениска Викторкӧд. Мыйӧн найӧ шыасисны, Славик пыр и босьтіс Петяӧс ки пӧлӧдыс, дасьтысис мунны. Екатерина Ивановна дивитыштіс зонкаӧс:

— Но-о, бур ёртъяс моз пыр на варовитім да друг пышъянныд. Дениска тшук вайис меным зэв уна гӧснеч. Вайӧ ӧтлаын чӧсмасьыштамӧй гӧснечнас, дай сэсся мунӧй.

Тосялӧн сумка тыр тэчӧма сёян-юан, сэні и преник-кампетыд, и йӧв сулеяыд, и компот банкаыд, и пуӧм колькйыд.

— Эта мында вайӧмны, эта мында! — гажаа кайтіс Ванялӧн мамыс да мыччӧдліс зонкаяслы сумка пытшкӧссӧ. — Йӧвсӧ, инӧ, ме аслым коля, а мукӧдторсӧ менам выль ёртъяслы сетам. Ой, шань зонкаяс! На, Славик, сумканас и босьт. Мунӧ восьтӧй компот банкасӧ да сёйӧй. Денискаысь ме ёна гажтӧмтчи, сыкӧд, инӧ, мелуйтчыштам. Дай, со, коді ме дорӧ воӧма! Виктор! Локтін армиясьыд? Лок ми тэкӧд окыштчам. Тэ ӧд меным Ваня кодь жӧ муса. Виктор...

Кор Виктор аддзис Ванялысь мамсӧ больнича скамья вылысь, быттьӧ эз и казяв некутшӧм вежсьӧм. Водзті кодь жӧ мичаа шыльӧдӧм юрсиыс топыда гартыштӧма балябӧжас. Вылас выль фланелевӧй халат. Кажитчӧ, сӧмын на воӧма школасьыс, вежӧма шерстянӧй костюмсӧ этайӧ дзоридзьяса халатнас, пуксьӧма шойччыны. Но кор Екатерина Ивановна чургӧдіс Викторлань кисӧ да выныштчӧмӧн пондыліс чеччыны места вывсьыс, гӧгӧрвоис: вежсьӧма да омӧльтчӧма ёна.

«Вермис ӧд и кувны», — мыйлакӧ вирдыштіс Виктор юрын мӧвп, да сійӧ ачыс уськӧдчис пӧрысь учительницалы сывтыръяс.

И Дениска дзик пыр жӧ пондіс вӧзйысьны бабыслы водзас. Ваня да Тося эз на удитны меститчыны мамыскӧд орччӧн скамья вылас, лэптісны питорсӧ бабыс дінӧ. Кага пыр жӧ ляскысис еджыд юрнас бабыс морӧсӧ, ніскис нырнас да ичӧтик кекӧньяснас мый вермис судзӧдчис, кӧсйис шымыртны бабсӧ ас сывтыръяс.

— Гажӧй менам, гажӧй, — Екатерина Ивановна пидзӧс вылас босьтіс кагасӧ да юрсӧ окалігтыр шуаліс:

— А медглавнӧйыс олӧмад — челядь. Ме кулан выйын вӧлі, гӧгӧрвои: на вӧсна олам. Видзӧй жӧ нин Денискаӧс став лёксьыс да пежсьыс. Ок видзӧй, Тося да Ваня!

Екатерина Ивановна сьӧкыда ышловзис, а сэсся водзӧ нуӧдіс сёрнисӧ. — Со, Славиксӧ аддзылінныд? Ыджыдджык зонкасӧ. Коньӧрушкоанӧй... Мудзи тай нӧ мыйкӧ...

Друг сылӧн кыкнан киыс лётмуніны, исковтісны Дениска мышку кузя. И юрыс тшӧтш скамья мышланьыс песовтчис. Ваня да Тося повзисны.

— Мамӧ, гашкӧ, тэныд колӧ палатаад пырны да? — кагасӧ мам ордсьыс кватитігмоз, шуис Ваняыс.

— Да ті пыр и повзянныд, ӧні ог нин кув... — юрсӧ турыштіс да нюмсер сетіс Екатерина Ивановна. — Мудзи прӧста, дыр лои ывлаас гуляйтӧмыс да.

Шуис кӧть тадз, но палатаӧ пырӧмысь эз жӧ понды пыксьыны.

— Пыра, инӧ, — сійӧ зэв сьӧкыда чеччис и Ваня да Виктор отсӧгӧн ас кокнас муніс кильчӧ помӧдзыс. Тося, Дениска да Виктор кольччисны кильчӧ помас, а Ваня нуӧдіс мамсӧ палатаӧдзыс.

Ванялысь петӧмсӧ виччысисны ланьтӧмӧн. Дениска и то эз больӧдчы, мамыс киӧ кутчысьӧмӧн сулаліс лӧня. Друг сійӧ нетшыштчис мамыс дорысь да «Натата Гебовна!» горзігтыр уськӧдчис кильчӧ поскӧдыс увлань. Аллея кузя гуляйтысь висьысьяс пӧвстӧд кокньыдика восьлаліс кильчӧлань Денискалӧн воспитательницаыс, клетчатӧй юбкаа, еджыд свитера, пельпом вылас тоньяліс еджыд сумкатор.

Тосяӧс да Викторӧс кильчӧ вывсьыс аддзӧм бӧрын, сійӧ пыр и алӧймыштіс да шуис:

— Бур рыт! Мый ті тані вӧчанныд?

— Дениска баб дорӧ волім, — вочавидзис Тося да дзик пыр жӧ юаліс: — А мый ті таті ветлӧдланныд?

— Ключла локті. Мамӧ тарыт тан дежуритӧ, — вочавидзис Наташа да лыйыштліс синнас бокынджык сулалысь Виктор вылӧ.

— А-а, — гогнитіс юрнас Тося, — мамыд ӧд тэнад тан уджалӧ, врач. — Сэсся збодеракодь содтіс: — Пыр, инӧ, босьт ключтӧ да лок миянкӧд ӧтлаын мунам гортад. Миян, со, Дениска да Виктор вермасны и горт дорӧдзыд коллявны. Викторыскӧд ті, буракӧ, тӧдсаӧсь нин-а.

— Тӧдсаӧсь, — серӧктыштіс Наташа да, бара синнас зон вылӧ лыйыштлӧм бӧрын, висьталіс: — Талун меным найӧ сэтшӧма отсасисны! Молодечьяс... Татшӧм колльӧдчысьясыдкӧд ме радпырысь муна! Энӧ, инӧ, менӧ кольӧй. Ме дзик пыр.

Ныв тэрмасьыштӧмӧн мӧдіс ӧдзӧслань. Регыд сійӧ, ключьяснас ворсӧдчигтыр, бӧр петіс кильчӧ вылӧ, шыасис Дениска дорӧ:

— Но, Дениска, со и ме! Давай колльӧд, кӧсйысин кӧ!

Дениска эськӧ радпырысь вӧтчас воспитательница бӧрсяыд, кутчысьліс нин сылы киас, да мамыс ӧлӧдіс. Ми пӧ тэкӧд ещӧ паптӧ виччысьлам, а Наташа Глебовнатӧ пӧ мед Викторным колльӧдас.

— Тэ мый он вӧрзьы, Виктор?! — тувкыштіс Тося зонлы бокас.

— Ме мый... Ме радпырысь... Ваняыд тай мыйкӧ зэв дыр оз пет...

— Ті мунӧй, мунӧй. Ми тіянӧс вӧтӧдам, — шуис Тося да йӧткыштіс Викторӧс Наташалань.

Первойсӧ найӧ мунісны ланьтӧмӧн. Наташа, колӧкӧ, виччысис, кор Виктор шыасяс. А Виктор эз тӧд, мыйсянь заводитны, и чӧв жӧ оліс. Аллочкакӧд кындзи, сійӧ некор на эз колльӧдчыв нывъяскӧд. Да, буракӧ, Аллочкаыдкӧд эз на и колльӧдчӧм вӧв — ворсӧдчӧм на. Школьникъяс ӧд вӧліны.

— Котик! Котов! Ну менсьым портфельӧс гортӧдз! — вӧзйыліс Аллочка да читкыртліс мича синъяссӧ радысла, мый Котик кватитліс сылысь портфельсӧ да заводитліс чеччалігтыр котӧртны нывка водзын.

Сідзсӧ вӧвлі седьмой классын велӧдчигӧн. Десятӧйын жӧ Виктор восьлаліс нывкӧд орччӧн. И сылы лоліс яндзим, кор ботинки нырыс няйт либӧ гачыс абу утюжитӧма. Пемыд рытъяснас, кино вылысь воигӧн, Виктор смелмыліс, кутліс Аллочкаӧс коскӧдыс и кутшӧмкӧ вын кыскыліс сійӧс окасьны. Аллочка вочавидзліс тшӧтш.

А вот Наташакӧд ӧні эз пет весиг кывйыс, непӧштӧ сывйыштны коскӧдыс. Прӧста орччӧн мунны и то вӧлі любӧ — аддзыны, кыдзи вежласьӧ нывлӧн чужӧмыс. То вом доръясыс воссьыштласны, и мыччысьласны паръяс костныс мича еджыд пиньяс, то зумыштчыласны синкымъясыс, то лыбласны лэбач бордъяс моз.

Медбӧрын Наташа, буракӧ, вежӧртіс, мый дыркодь нин чӧв олӧны, мый абу и лӧсьыд тадзсӧ, шыасис первойӧн:

— А ті тӧданныд, кутшӧм тешкодь Дениска, — гажаа серӧктыштӧмӧн заводитіс сійӧ. — Ӧнтай прогулка дырйи менӧ крепыда-крепыда сывйыштіс да шуӧ: ме пӧ тэнӧ ёна-ёна радейта! Няклялан резинаысь пӧ ёнджыка!

Виктор серӧктіс:

— Няклялан резинаысь на пӧ ёнджыка! Но-о! Меным кӧ эськӧ кодкӧ сідзтӧ шуас. Ме пӧ тэнӧ ёна-ёна радейта.

— Быттьӧ оз шулыны.

— Коді нӧ?

— Нывъясыс но. Пӧдруга, кӧнкӧ, эм.

— Эм, да оз шулы.

— Ачыд, сідзкӧ, мыжа. А Денискалӧн батьыс тэнад вок?

— Абу. Ми Ванякӧд другъяс. Ӧти школаын велӧдчим, ӧтилаын быдмим. Керкаяс миян орччӧнӧсь.

— А-а, тэ эсійӧ турунвиж балконъяса керкаас олан?

— Да. А мый?

— Нинӧм. Папа менам сэн олӧ да сійӧн.

— Батьыд?

— Но да. Мӧд семья сылӧн.

— Менам батьлӧн мӧд семья жӧ. Сиктын сійӧ олӧ.

Виктор друг думыштіс, кутшӧм кокниа Наташаыс пырис сёрниас. Кымынкӧ минут, а ӧта-мӧд йылысь зэв нин уна тӧдмалісны. Висьтавны позьтӧм дивӧ тайӧ Наташаыс! И абу дзирнясьысь...

Таво тулысӧдзыс Наташа оліс тӧждысьтӧм нывка олӧмӧн. Велӧдчанінсьыс, педучилищесьыс, вӧлі локтас гортас да рытывбыд то лыддьысьӧ, то пуксьылас пианино саяс сольфеджио зубритыштны — музыкальнӧй отделениеын велӧдчӧ да чуньяссӧ быть песыштлы быд лун, — то мыйкӧ мастеритӧ-вурӧ. Некытчӧ сійӧс эз кыскыв гортсьыс. И друг таво тулыс мыйкӧ лоис сыкӧд. Инас эз кут ӧшйыны, кутшӧмкӧ быттьӧ тӧжд чужис, мыйкӧ виччысис. Выль ног кутіс кывны да аддзыны и тулысыслысь торъяссӧ да краскаяссӧ. Кыскис гортсьыс кытчӧкӧ.

«Наташа! Тэ кутшӧма шаньмӧмыд да мичаммӧмыд! — шулісны тӧдсаясыс. Мамыс ышловзьыштліс ныв вылас видзӧдіг, нинӧм эз шулы. Сӧмын, кор пӧдругаясыскӧд мӧдӧдчыліс кытчӧкӧ гуляйтны, чирыштліс:

— Наташа, дыр эн ветлы!

Наташа кывзыліс мамсӧ. Воліс недыр мысьт бӧр, пуксьыліс пианино сайӧ да заводитліс ворсны мыйкӧ жугыльӧс. «Время» видзӧдӧм бӧрын мамыс торкліс сылысь ворсӧмсӧ:

— Наташа, он кӧ телевизортӧ видзӧд, ме выключита и вода.

— Вод, мама, вод. Ме тшӧтш вода, ог кут тэд мешайтны. Здук кежлӧ сӧмын петала Маша ордӧ.

Тадзи тулысбыд нин. Гортас оз овсьы и йӧзас абу интереснӧ.

И, со, аддзис тайӧ солдатсӧ садик дзиръя ӧдзӧс дорысь. И кодкӧ быттьӧ вачкис юрас: тайӧс пӧ тэ пыр на и корсин. Наташалы лои страшнӧ: «Ме аддзи корсянторйӧс. А сійӧ видзӧдлас-ӧ ме вылӧ?»

Кор муніс мамыс дорӧ ключла да аддзис бара больнича кильчӧ вылысь Викторӧс, сьӧлӧмыс чеччыны кутліс, абу-ӧ пӧ нин судьба? Зонкӧд орччӧн восьлалігӧн чеччаліс сьӧлӧмыс, эз сет бурджыка думыштны, мый йылысьджык сёрнитны зонкӧд. Гӧгӧрвоӧ: оз сійӧс сёрнит, мый колӧ, но мый вермас сійӧ керны, кор ачыс сідз артмӧ. А кад, со, нин и янсӧдчыны. Найӧ керка дорынӧсь нин.

Наташа шуис:

— Аттьӧ колльӧдӧмсьыд. Ме вои, со, менам керкаӧй.

— Но, кильчӧ дорӧдзыд ылын на, — эз кӧсйы туй помыскӧд миритчыны Виктор. Наташа нюмдіс.

— Сэні пыр пукалӧны пӧрысь бабъяс, ставлысь пожъялӧны лысьӧмнысӧ. Тані торйӧдчам. Окота кӧ лоӧ, позьӧ бара на аддзысьлыны. Тэ тӧдан, кытысь менӧ корсьнысӧ. Аддзысьлытӧдз!..

Наташа шеновтіс кинас да мӧдӧдчис. Виктор коли сулалан. Сійӧ видзӧдіс, кыдзи Наташаыс воис кильчӧ помӧдзыс да ӧдзӧсӧдыс пыртӧдз бергӧдчыштліс на Викторлань, шеновтіс кинас да вошис ӧдзӧс саяс.

«Колӧкӧ, ӧшинь пырыс ещӧ мыччысьлас», — думыштіс Виктор да дыр на сулаліс места вылас. Эз, Наташа эз мыччысьлы ӧшинь пырыс. Сідзи и мӧдӧдчис Виктор аскиа лун вылӧ надея кутӧмӧн.

Кор Виктор локтіс гортас, гӧсьтъясыс эз нин пызан сайын пукавны, чеччӧмаӧсь-разӧдчӧмаӧсь нин. Воча вокыс, Мишаыс, пос вылас, Викторъяслӧн восьса ӧдзӧс дорын, кутчысис-окасис кутшӧмкӧ сьӧд лёзь юрсиа нывкӧд. Ыджыд жыръяс гораа ызгис музыка. Джодж шӧрас зыркйысис-йӧктіс Анфиса тьӧтыс да гораа сьыліс ассьыс радейтана частушкасӧ:

То-опор, рукавицы, рукавицы и топор...

Жена мужа не боится, жена мужа —

об забор! Эх, топор...

Рукавицы...

Сы гӧгӧр тивкйысис-чеччаліс, морӧс тыр сикӧтшнас зёльӧдчигтыр, мамыслӧн Маргарита пӧдругаыс да тшӧтш сьыліс «топорсӧ». Мамыс Викторлӧн пукаліс диван вылас да тшӧтш зымӧдіс кокъяснас да вачӧдіс кияснас. Мыйлакӧ ещӧ и телевизорыс вӧлі включитӧма, сысянь кыліс жӧ ызгӧм шы. Петкӧдлісны футбол. Колӧкӧ, Миша ныв дорас пышйытӧдз видзӧдіс футболсӧ.

Виктор эз понды мешайтны гажӧдчысь нывбабаяслы, веськӧдчис кухняас, кысянь кылісны бабыслӧн да Микайлӧ дядьыслӧн гӧлӧсъяс. Йӧршитчӧмаӧсь татчӧ да кургӧны эня-пиа.

— Оз кажитчы мем Мишаным. Кокни олӧм вылӧ лэччысьны кӧсйӧ. Эсытшӧм ён зон аддзӧма удж — «Москвич» вылын джыйялӧ, пирожки-ватрушки столӧвӧйясӧ кыскалӧ! Ещӧ нылӧс дінас пуксьӧдӧ...

Тайӧ Микайлӧ дядьыс сёрнитіс. Кылӧ, бабыслӧн гӧлӧсыс ышловзьыштӧмӧн шуис:

— А сійӧ, эськӧ, Анфисаыд мыжа. Да и Анна тшӧтш. Воис Анфисаыд кыдзкӧ миянӧ да и шуӧ, Миша пӧ локтіс армияысь, а велӧдчыны оз кӧсйы. Мый и кутас керны? Сэки Анна и шуис: мед пӧ миян Минторгӧ пырас. Прӧдукта кыскалан машинаын пӧ ой скоднӧй уджыс. Ӧти-кӧ пӧ, карас, дінад лоӧ, мӧд-кӧ пӧ, кынӧмыс век нин пӧт. Ме пӧ «Москвич» вылӧ устроитчыны отсала. Вот сійӧ кыдзи лои, — помаліс бабыс.

— Тӧда-а, пӧвадитӧ Анфиса, — вӧрзьыштіс Микайлӧ дядьыс улӧс вылас. Татшӧм жарнас ещӧ и галстука на. Быд лунтӧ ывла вылад уджалігӧн косӧд чужӧмыс тӧлалӧма, кирпич рӧма лоӧма. А гӧлӧсыс раминик. Дай ачыс Микайлӧ дядьыс ставнас рам да пӧслукман. Пырджык чӧв олӧ да машкӧ-вӧчӧ мыйкӧ. Киподтуя зэв. Знатнӧй каменщик, карса почётнӧй гражданин, а некор он кывлы, медым ышнясис. Ок, Микайлӧ дядь!

Виктор дзуркнитіс-восьтіс кухня ӧдзӧссӧ, шыасис:

— Позьӧ тіян дорӧ, Микайлӧ дядь? Бур рыт!

— О-о, племяш! — дядьыс ловзис, чеччыштіс улӧс вывсьыс, кияссӧ чургӧдӧмӧн воськовтіс Викторлы воча. — Служитсис? Локтін? Найӧ сывйыштчисны, пондісны ӧта-мӧдыслысь лапӧдны мышкуяссӧ: — Миян ӧд Мишаыд воис жӧ нин! Со, ӧні на бабыдкӧд сы йылысь сёрнитім. Стройбатын сійӧ миян служитіс. Тэ, аддза, десантын вӧлӧмыд! Но, кыдз шуласны, слава богу, дзоньӧн-здоровӧн локтінныд! Международнӧй обстановкаыд, со, кутшӧм да... О, племяш, зӧлӧта пи!.. — радысла дядьыс вачкис Викторлы морӧсас да сэсся ичӧтик моз кутчысис чужӧмас аслыс, чышкыштіс син доръяссӧ.

— Зӧлӧта пиыд тай здук кежлӧ петіс да рытывбыд кежлӧ воши-а. Кӧн нӧ та дыраыс ветлан? — шыасис татчӧ бабыс.

Виктор сывйыштіс бабсӧ, мыжа морт моз шуис:

— Бабук, эн дӧзмы. Ваняяс мамыс дорӧ ветлісны больничаас, ме тшӧтш накӧд.

— Но-о, мед ветлін кӧ. Бурдӧ оз нин Катеринаыс?

Виктор лэптыштліс пельпомъяссӧ. Вочакывтӧ эз кыв да бабыс кайтыштіс:

— Шань зэв бабаыс да мед эськӧ бурдас жӧ. Ті вай аддзысьӧй, инӧ, вежая-вежапиа. Ме петала эстчӧ бабаяс дінас.

Сы мында и сетісны мужикъяслы аддзысьнытӧ. Эз удит бабыс петны, Анфиса тьӧтыслӧн ыджыд гӧлӧсыс кутіс кывны:

— Кӧн нӧ менам Микайлӧыс? Мишук! То танец йӧктыны кутісны! Лок ми тшӧтш тэкӧд танцуйтам!

Пальзьӧдіс-пырис тьӧткаыс кухняас, лӧсйытӧм гыр кодь кыз да ён, еджыд гипюр ковтаа да лӧз сарапана. Чужӧмыс ӧгралӧ, вомыс эшвидзӧ, киясыс шерӧны-мерӧны. Аддзис демобилизуйтчӧм салдаттӧ верӧс дорсьыс, икӧстӧмӧн уськӧдчис сы дінӧ:

— Витюш, дона пи! Ак, сӧтана, воӧма пӧ да оз и петкӧдчыв! Вай кӧть пӧськиасям да окыштчам! Анфис тьӧтыд ӧд гажтӧмтчис жӧ! А шань да мича лоӧмыд салдатскӧй клебушко вылад! Мишатӧ аддзылін эн нин? Миян ӧд сійӧ воис жӧ! А вежайыд, со, пӧрысьмӧма да косьмӧма! Шуласны тай, синичке пӧ коть пшеничку, коть пшена! Ме ӧмӧй ог тайӧс верд! Нэмсӧ пӧварын уджала да. Забыль, Мишаыс ошйысис эз на нин? Награда ӧд сылы сетісны бара. Орден! Ме талун шуа, пасьтав, мися, вежапиыдлы петкӧдлан. А сійӧ — ог пӧ, шуӧ. То тай выль дӧрӧмӧді да галстукӧді.

Анфиса тьӧткаыс варовитны кӧ босьтчас, оз другӧн ланьт. Микайлӧ дядьыс некымынысь нин шуліс, ланьтышт пӧ. А сійӧ:

— Ме угомонитча? Ог на! Йӧктыны на кӧсъя! Миян зэв на ыджыд радлуныс талун! Асланым на пияныс локтісны, Мишук да Витюш! Миша миян кытчӧкӧ нывъяс дінӧ уйкнитіс нин-а! Ме-ед! Гӧтравны колӧ чоморуӧс! Гӧтыртӧм зонмыд поводтӧм вӧв кодь, пелыстӧм пыж кодь...

Энька мамыс нин, Марина баб, чирыштіс Анфисасӧ ёна увгӧмсьыс. Тэ пӧ, Анфисушко, ачыд пелыстӧм пыжыс, йӧктыны нуӧдчин да ылалін. Пет пӧ йӧкты, мед аддзысясны вежая-вежапиа. Сӧмын тай биӧ карасин койыштӧм кодь жӧ лоины бабыдлӧн кывъясыс:

— А менӧ, матушка, ва визулыд оз на кылӧд, эн пов! — Пыр и ыркмуні Анфиса. — Крепыда на ме сулала земля-мати вылас! Со, кыдзи сулала! — татчӧ тьӧткаыс лэптыштчыліс став кыз тушанас да зымнитіс кыкнан кокнас джоджас, сэсся серӧктіс ков-ковӧн да содтіс ещӧ: — Тувчча муас да дас во менам кок туйӧ туруныс оз пет! Со! А йӧктыныд — пӧжалуйста! Пета. Витюккӧд шу ми петам! Дай Микайлӧӧс босьтам. Микайлӧӧс ог на бракуйт, тайӧ менам ручнӧй медьведь. Ыджыд дорвидзӧг да надёжнӧй вевт! Локтӧ петамӧ!

Анфиса тьӧтыс кватитіс кыкнан мужичӧйсӧ да трактор моз пондіс кыскыны сьӧрсьыс. Регыд сылӧн вына гӧлӧсыс кыліс нин ыджыд жыръяс:

— То-о-пор! Рукавицы.

— А баба этайӧ, мудзлытӧм атаманша. А олӧны тай Микайлӧкӧд ладӧн да сладӧн. Мед эськӧ ӧтка писӧ оз жӧ ёна тшыкӧдны...

Марина баб ышлолалыштіс да тшӧтш петіс челядь бӧрсяыс кухнясьыс. Пуксис улӧс вылӧ бокӧджык, мед не мешайтны йӧктысьяслы, да ас тӧдлытӧгыс вӧйис сьӧкыд думъясӧ.

Кывлан мукӧд пӧчьяслысь норасьӧм, ыштӧ пи-монь ӧбижайтӧны, гортысь вӧтлӧны, либӧ внук пӧ юнысӧ да гуляйтнысӧ ичӧтик пенсияысь пычкӧ сьӧм. Татшӧмторйыд, ен видзӧ, эз на вӧв Марина баблӧн. Ачыс на кӧзяйкаыс да. Ачыс пуӧ и пӧжалӧ, чышкӧ и мыськӧ. Колӧкӧ, оз кут вермыны, да эльтны жӧ кутасны. Талун тай Аннаыс дзерӧдіс нин-а. Абу пӧ рӧднӧй. «Асьсӧ быдті, писӧ сылысь быдті. Со, югыд шонді менам, кутшӧм быдмис! Да лӧсьыда зэв и йӧктӧ! Кокыс муас оз волы. Эсійӧ тай Маргаритаыс пыр и мырддис Анфисаыслысь-а. Зарни пиньнас, со, кыдзи вашъялӧ Витюшлы...»

Марина баб, тыдалӧ, вывті жугыль чужӧма вӧлі тайӧ ставсӧ думайтіг. Витюкыс тай мынтӧдчис рыжӧй Марго дорсьыс да бабыс дінӧ шыасис-а:

— Бабук, гажтӧм ӧмӧй тэныд?

— А тэныд кӧ, югыдлунлы, гажа, меным гажа нин, — нюммуніс бабыс, шылькнитіс косьмӧм кияснас зарни внукыслысь дӧрӧм морӧссӧ.

— Меным, бабук, зэв гажа! Тэ он и тӧд, кутшӧм шуда ме талун! Лок, бабук, мекӧд йӧктыштам!

Виктор кыскыштіс бабсӧ улӧс вылысь да пондіс бергӧдлыны, джодж шӧрас петкӧдігмоз.

— Бабук тэ, бабук! Тӧдан, ме кутшӧм нылӧс талун колльӧді! — висьталіс бабыслы пеляс внукыс.

Бабыс, буракӧ, эз гӧгӧрво нинӧм.

Тайӧ семьяас шойччан лунтӧ пырджык ӧткодя коллялӧны. Узясны да валяйтчасны вольпась вылын дас часӧдз кымын, а сэсся чеччасны да заводитчӧ тэрмасьӧм, гумельга пондас бергӧдчыны патераас.

— Ой-ой, дас час нин тай нӧ! Эта дыра узям! — первойӧн кватитчӧ кӧзяйкаыс, Маргарита Ефимовна, сэсся ырснитӧ вольпассьыс, уськӧдчӧ, тӧдӧмысь, зеркалӧ водзӧ. Хнаӧн краситӧм гӧрд кудриыс сылӧн дзугсьӧм турун ёкмыль кодь, сідзи и чайтсьӧ, вӧсньыдик, блед голяыс чегас сійӧ сьӧкта улын, косіник мыгӧр вылас полокалӧ вылын моз шелвидзӧ войся дӧрӧмыс. Маргарита Ефимовна пыктыштӧм синъяснас здук видзӧдӧ зеркалӧ вылӧ, сэсся ышловзьыштӧ да босьтчӧ томмӧдны да мичмӧдны чужӧмсӧ. То чунь помъяснас лапӧдӧ син доръяссӧ, то ки пыдӧснас шлёпӧдӧ сьылісӧ, то чашйӧ-шыльӧдӧ щӧткаӧн юрсисӧ, ӧтпырйӧ удитӧ котӧртлыны кӧлуй шкап дорас да сэні лукйысьыштӧм бӧрын перйыны платтьӧ либӧ пасьтавлыны шляпа, швыркнитӧ диван вылас, кыскӧ мӧдӧс, кӧлуй сӧмын и лэбалӧ сылӧн. Колӧ чайтны, мый вӧчӧ тайӧ ставсӧ оз ланьтӧмӧн. Сылӧн вом дорысь лэбзьӧны верӧсыслы да нылыслы нарадитан кывъяс:

— Глебушко, кофе кӧть мед пуктін пуны, он ӧмӧй аддзы: мем некор. Базарӧ кӧсйим петавны и... паськӧмӧй дасьтытӧм... Галя, Галя! Тэ бара нин пластинка крутитан! Утюгтӧ включит! Гладитчыны жӧ колӧ! Пока дасьтысям да Анна Степановна ордӧ пыралам, базарыд тупкыссяс...

— Мамочка, тэ ачыд, мем некор. Папа, папа, щипцы пукты шонтыны, юрсиӧс колӧ кудритыштны! — тювкнитлӧ-мыччысьлӧ аслас жырсянь нылыс, кузь кокчӧръясыс кушӧсь.

— Галина, тэ взрослӧй ныв нин, позьӧ бать дорад петігӧн куш кокчӧръястӧ и тупкыштны, — заводитлӧ велӧдны мамыс, но Галина шпынькнитӧ-серӧктӧ, ворсӧдчыштӧ синъяснас:

— Папасьыд? А мый нӧ папасьыд яндысьныс? Папочка, миленькӧй, пукты щипцысӧ...

Милӧй папочкаыс налӧн, Глеб Сергеевич, этшысь петавтӧм морт, шызьытӧг-гызьытӧг кывзӧ и видзӧдӧ ставсӧ тайӧс быттьӧкӧ веськодя. Сійӧ удитӧма нин дӧрӧм-гачасьны, тэрмасьтӧг меститалӧ диван-крӧвать вывсьыс эшкын-пӧдушкасӧ стенас вӧчӧм шкапӧ да ас кежас нюмвидзӧ. Том дырйиыс лӧсьыдик туша-рожаа мужичӧй, ӧні гӧгрӧсмыштӧма, но абу на удитӧма воштыны мыгӧр лӧсьыдлунсӧ ни важкодь шмоньлив гӧлӧссӧ.

— Ну что ж, служитны кык госпожалы, дерт, абу ыджыд окотаӧй, — шыасьӧ сійӧ, — но век жӧ кофетӧ ковмас пуктыны. А то лунтыр кежлӧ верма кольны тшыг, — шлёпанцынас джодж кузяыс шаркӧдчигтыр, петӧ кухняас.

Регыд кухнясянь заводитӧ ӧвтны чӧскыд кофе кӧрӧн, а ещӧ недыр мысти пӧт кань моз вом доръяссӧ нюлігтыр, петӧ сэтысь кӧзяиныс да бара шмоньлив гӧлӧсӧн шыасьӧ кӧзяйка дорас:

— Ме удиті нин завтракайтны, а тэ век пасьтӧм. Извинит, пасьтӧдны ме тіянӧс ог куж. Позволитанныд кӧ, ме пета ывлаас.

Кӧмасьӧм бӧрас сійӧ коридорсяньыс горӧдӧ нылыслы:

— Галина, щипциыд тэнад, буракӧ, сотчис нин! Ме абу гортын! Муні!..

— Миян петігкежлӧ мед машинаыд вӧлі кильчӧ помын! — воча горзӧ сылы гӧтырыс. Тайӧ гӧлӧс шы улас да нылыслӧн мӧд жырсянь увгысь музыка шы улӧ сійӧ петӧ ывлаас. Кысянькӧ сусед квартирасяньыс кылӧ, кыдзи радио пипкӧ дас ӧти час.

Глеб Сергеевичлы колӧ на вайӧдны гаражсьыс машинасӧ кильчӧ помас да нуны нывбабаяссӧ кык квартал сайӧ карса базар вылӧ, а сэсся сы бӧрын — волюшка-воля. Кӧть лунтыр сур ю, кӧть валяйтчы вольпасяд, кӧть дачаад мун да уджав. Мӧд выходнӧй лунӧдз, пӧжалуй, оз и кватитчыны эня-ныла, мый милӧй папочкаыс абу гортас.

Виктор садьмис долыд мӧвпӧн: Наташасӧ талун бара аддзылас. «А мый, ӧні жӧ кӧ петны да Денискасӧ Ваняяслысь нуны садикас? Вот и помка лоӧ аддзӧдчывны...» Тайӧ мӧвпыс кажитчис зонлы, и сійӧ звирк чеччис вольпась вывсьыс. Кухнясянь кыліс гольгӧм шы. Дерт, бабыс тӧрытъя тасьті-пань мыськӧ. Мамыс жырйын вӧлі шы ни тӧв. Тэрыба дӧрӧм-гачасьӧм бӧрын Виктор чургӧдліс юрсӧ кухня ӧдзӧсас:

— Ме, бабук, регыд локта! — и уйкнитіс ӧдзӧс сайӧ. Ваняяс подъездӧ пырис котӧрӧн, чуткыштіс звӧнокас.

Дзик пыр и восьтіс сылы Тося.

— А-а, Виктор, тэ? Чайті, Ваня. — Тосялӧн чужӧмыс зумыш, абу кӧ ещӧ бӧрдӧма на. Виктор, шешвидзысь вома, юалӧ: — Мый лоис?

— Ой, Виктор! Ваня тавой сэні и узис, больничаас, — юӧртіс Тося да горӧн бӧрддзис. Тося гӧлӧсысь садьмис Дениска, лэптіс еджыд юрсӧ, «Мамӧ!» горӧдіс.

Тося кучкысис кияснас:

— Ой, пиук, тэнӧ ещӧ колӧ садикад нуны! Бур кӧть, Виктор, тэ локтін. Вай ну тайӧс. Ме кайла больничаас. Сьӧлӧм поті...

— Тэ, Тося, бӧрдан да меным тшӧтш шог лои. Эн бӧрд. Оз на жӧ ӧд кув Екатерина Ивановнаыд.

— Ог тӧд, ог тӧд... Ой, Виктор, сэтшӧм шог.

Сідзи, бӧрдігтыр, мамыс чеччӧдіс да пасьтӧдіс Денискаӧс. Кага нинӧм гӧгӧрвотӧм синмӧн видзӧдіс мамыс вылӧ да мыйлакӧ эз жӧ вӧв кыпыд.

— Кытчӧ? Кытчӧ? — садик калитка ӧдзӧсӧд пыригкості и паныдаліс Викторӧс кутшӧмкӧ стрӧг гӧлӧса нывбаба. — Оз уджав садйыс!

— Оз уджав? — Виктор кузя шутёвтіс. — А Наташа Глебовнаӧс позьӧ аддзӧдлыны?

— Некод талун абу, санитарнӧй лун. Тӧрыт ӧд, тӧдӧмысь, юӧртлісны.

Водзӧ Виктор нинӧм эз понды юасьны, кватитіс Денискаӧс ки вылас, мӧдӧдчис гортланьыс.

— Мунам ми тэкӧд, Дениска, Марина баб ордӧ, сэн кутам ворсны, — збодера шуис зонкалы. Вӧлі неуна дӧсаднӧ, но мӧдарсянь кӧ, дӧзмынысӧ нинӧм вылӧ, тӧрыт и збыль налы Ванякӧд висьтавлісны санитарнӧй лун йывсьыс.

— Бабук, со, гӧсьт локтіс, вай примит! — ӧдзӧсӧдыс пыригӧн и горӧдіс Виктор да лэдзис зонкасӧ джоджас. Мамыс удитӧма нин чеччыны, гӧрд чужӧма да кизясьтӧм халата, буретш мыссьыны туалетас прӧйдитіс. Аддзис кагатӧ, дӧзмӧмпырысь шуис:

— Тайӧс нӧ нин мыйла ваян? — сійӧ сьӧкыд видзӧдласысь кага дрӧгмуныштіс, шашаритчис Викторлы гачас.

— Тэ мый, мамӧ, этатшӧм гӧсьт вылас абу рад? — серӧктіс Виктор, бӧр босьтіс Денискасӧ ки вылас.

— Тайӧ гӧсьтыд... Жугӧдас ещӧ мыйкӧ. Ну бӧр гортас.

Кухнясяньыс мыччысис бабыс, меліа кайтыштіс:

— Гӧститӧдтӧгыс огӧ жӧ бӧр петкӧдӧй кагушӧс. Витюш, тэ эн пыдди пукты мамыдлысь броткӧдчӧмсӧ. Тӧрыт ёна йӧктіс-гуляйтіс да пӧкмелля, пӧди, талун. Вай кагасӧ мыссьӧдышта, да сёйны пуксьӧй. Талун тэрмасьны некытчӧ: шойччан лун.

Шойччан лун кӧть, но асывсяньыс абу бур руа Анна Степановна. А стӧча кӧ шуны, тӧрыт водігас нин сьӧлӧм вылас сылӧн эз вӧв лӧсьыд. Маргарита Ефимовнаыслӧн верӧсыс сідзи эз и волы, дай Галинаыс регыд муніс. Мунас, дерт, мый миянкӧд пукалас? Виктор кӧнкӧ бокын рытывбыд шляйтчис да. Маргаритаыс мунігас кӧдзыда прӧщайтчис и. Анна Степановна юалӧм вылӧ: «Загорайтныд аски ветлам?» вочавидзис неокотапырысь дай. Ог кӧ пӧ дачаӧ мунӧй. Дачаӧ пӧ. Но и мед мунасны. Менӧ Анфиса корис жӧ дачаас. Вот босьта дай муна жӧ. Сӧмын номъясыс сэн курччаласны. Мый и керны?

Анфиса моньыс бара-й тӧдӧ, мый керны шойччан луннад. Асланыс керкаын олӧны карас, усадьба керка гӧгӧрыс, а содтӧд на ещӧ дача лӧсьӧдісны. Кык воӧн ставсӧ нин участоксӧ кодйӧмаӧсь да садитӧмаӧсь быдтор. Керка нин пуктӧма и, кык чардакаӧс.

— Кодлы нӧ татшӧм ыджыдсӧ стрӧитінныд, асьныд куимӧнӧсь и эм да? — юавлісны тӧдсаясыс.

— А кодлы гаж — локтӧй да узьлӧй-олӧй. Тӧран тай. Тырмас ставныдлы и вотас-пуктасыс. Оз регыд воас, сэсся — ӧмидз. Лук туруныд да редискаыд ӧні нин эм-а.

Быдтор эм Анфиса гозъяыдлӧн, горшӧсь зэв удж вылас да. Микайлӧыс отпуск босьтас да сэні и узьлӧ-олӧ, пыр мыйкӧ вӧчӧ. Анфисаыс дача дорсьыс вӧрсӧ и то лукйӧма. Укроп кӧть пӧ кӧдза. Микайлӧыс эськӧ ӧлӧдліс жӧ, абу нин пӧ сійӧ миян участок, эн вӧрӧд, штрапуйтасны. Абу пӧ тэнад сизим седун горшасьнытӧ. Да Анфисаыд ӧмӧй Микайлӧтӧ кывзас.

— Тільсьы да пессьы, он кӧ мудз, меным мый, — шуыштас медбӧрын верӧсыс. Гӧтырыс пыр и крапкас:

— Уджсьыд он жӧ мудз мортыд! Тэнӧ, лолӧд пуӧс, пилитӧмысь ме сӧмын мудзла!

— Тьфу! — сьӧвзьӧ Микайлӧыс — скӧрмӧдіс, буракӧ, пиня-гыжъя баба дзикӧдз! — Тэ вот менӧ пилитӧмысь мудзан, а пилитыштін кӧть мед ӧтчыд муса питӧ, — стрӧгакодь шыасяс Микайлӧыс гӧтыр дорас.

— Мый нин сідз? Кыті пиыс тэд оз кажитчы?

— Он ӧмӧй аддзы, тунеядӧ кутӧм пӧрны! Талун нёль час асылын войпукысь воис, да тэ сійӧс, татчӧ уджавны вайӧдӧм пыдди, узьны водтӧдін. Сажень пасьта спинаа мужиклы удж аддзӧмыд. Пирожки-ватрушки кыскалӧ легковикӧн. Тьфу! Мед самосвал вылӧ пуксяс, стрӧйка вылӧ мунас!

Скӧрмӧм вывсьыс Микайлӧ ещӧ на мыйкӧ кӧсйис шуавны, но Анфисаыс торкис сійӧс:

— О, господи! Ме чайті, мый нин лоӧма! Мед гуляйтас, томлуныс сы вылӧ и эм. А легковушканас кодлыкӧ колӧ жӧ пирожкисӧ кыскавны. Ставыс мед тэнад моз строительство вылын мырсисны ли мый?

— Мыйла сӧмын строительство вылын? Йӧй бабаӧ... Мед быдӧн ас местаас... Пӧвадитан питӧ, аддза, Анфиса! Тунеядечӧ пӧрас! Ещӧ раз шуа!

— Бур гӧтыр шӧрӧ кӧ веськалас, оз пӧр, эн менӧ повзьӧдлы.

— А лёк шӧрӧ кӧ веськалас?

— Лёксӧ ӧд ми ог вайӧ.

— Тэнсьыд юалас.

— Юалас на, мамыслысь!

Анфиса сэтшӧм эскӧдана да збоя тайӧс шуис, мый верӧсыслӧн серамыс петіс:

— Ёма тэ, ёма, коньӧрушкоанӧй. Кынӧм вӧчас кодлыкӧ, дай тӧдлан сэк.

— Вӧчас кӧ, и быдтыны кутам. Тэ да ме. Чайтан, тэ ӧткажитчан асланым вир войтысь? Он, Мишук, он! — Анфиса кыз кабырнас шылькнитіс верӧсыслысь гежмӧм юрсисӧ, чмок окыштіс вомас дай гажаа серӧктіс.

Йӧр саяс, вӧрас китшкысь катша повзис мыйыськӧ, шув лэбис дзик на дорӧ, пуксис штакетник потшӧс вылас. Потшӧс пӧлӧныс локтіс да сувтовкерис дзиръя дорас нывбаба. Анфиса вачкерис кияснас, уськӧдчис локтысь нывбабалы воча:

— Катша-катша, китш-котш, мый, меся, китшкӧ? Гӧстя тай воӧ! Лок, лок, Аннушка дай свет Степановна! Дзик пыр чай пуктам! Самӧвар, со, кильчӧ помын, колльыс орчча, вӧрас. Салат вӧчам и. Том ӧгуреч менам эм нин кымынкӧ. Ӧтнад тай нӧ? Мый нӧ мамыд да Виктор эз тшӧтш воны?

— Ӧтнам вои... Чолӧм-здорово тіянлы. Мыйкӧ тай зэв гажаӧсь?

— Но, Аннушка, воин кӧ, уджтӧгыд ог видз, — вомсӧ эз пӧдлавлы Анфиса, кор керка пытшсӧ видзӧдлӧм бӧрын петісны бӧр кильчӧ вылӧ.

— Вай пӧрччысь да гожъялыштам, пальӧдчыштігмоз гуляйтышт вӧртіыс, коль ӧктышт самӧвар пуктыны. Ме эсыті потшӧс сайсӧ гудйышті, укроп кӧдза. Микайлӧ эськӧ видӧ, оз ли мый тырмы град вылад пуктӧмаыс. Менымтӧ тырмас, дерт, дай йӧзыслы на разӧда унджыксӧ. А сэті, кушин да, кӧдза, мися, ещӧ. Ар кежлас ой нэриник да веж буретш быдмас. Менам ӧд ребятаыс кымын! Куимсё саяс миян ГПТУ-ын. Ой, скоднӧй зонкаяс! Коді нӧ найӧс чӧскыдасӧ вердас, ог кӧ ме, пӧварыс налӧн?

Анфиса чибльӧгӧн кӧртыштіс юр вылас еджыд ситеч чышъян, кильчӧ боксьыс босьтіс кузь воропа кокан, мӧдіс дзиръя саяс. Анна падъялыштіс да пондіс жӧ пӧрччыны платтьӧсӧ.

— Номъясыс оз вильӧдны?

— Кутшӧм ном? — Анфиса серӧктіс. Ӧтикыд кӧть ӧд курччас.

— Номйӧсь кӧ, ог пӧрччысь, — Анна бӧр сюйис вылас платтьӧсӧ.

Анфиса нӧрӧвитіс муннысӧ. Бӧр бергӧдчис Анна дорас, дивитыштіс:

— Нежнӧйӧсь ӧд ті, кантораад пукалігӧн. Мем бара-й нинӧм ном курччӧмыд. Мед лёк вирсӧ нёнялыштасны. Тэнад ӧд, Анна, лёк вирыд чӧжсьӧма жӧ нин. Кага вайтӧгыд ӧд тшыкӧ вирыд. Верӧс сайӧ эськӧ тэд колӧ петны. Этатшӧм лӧсьыд нывбаба ӧткӧн олан, — кайтіс Анфиса Анналысь зумыд, тшӧг вир-яйсӧ видзӧдігтыр. Татчӧ Анна зэв гылыда серӧктіс. Ӧні пӧ ме абу нин йӧй, сийӧсас юрӧс сюйны.

— Чӧ-ӧл, — шыасис Анфисаыс, — мужика олӧмыд век жӧ на мужика. Аддзылін тай Микайлӧӧс менсьым, сёйыштіс дай петіс кыв шутӧг уджавны. То стружитӧ нин мыйкӧ!

Микайлӧлӧн керка бокас мастерскӧй кодь лӧсьӧдӧма. Сэні и верстактор, и быдсяма инструментыс сылӧн. Керкасӧ тшапитны-баситны кӧсйӧ быдсяма узорнас. Трусик кежсьыс пӧрччысьӧма, кепкатор юрас.

— Дзик сьӧд бубыля! — меліа нюмдыштӧ Анфиса верӧсыс вылӧ видзӧдігтыр. — Отпускас петіс да тані и узьлӧ-олӧ. А менӧ пинялӧ, мыйла пӧ пиыд бӧрся он видзӧд, войбыд гуляйтӧ-войпукӧ. А гӧтрасян кадыс воис да, быть гуляйт. Тэнад ӧд Викторыд армия прӧйдитіс жӧ, гӧтравны жӧ эсся ковмас.

— Анфиса тэ, Анфиса, — Анна Степановна кыкнан кинас ӧвтыштчис Анфиса монь вылас. — Гӧтрасяс да нӧ кытчӧ гӧтырсӧ вайӧдас? Тіян ӧд лӧсьыд эсы ыджда керкаыд да. Ӧтнаслы Викторлы некӧн овныс, непӧштӧ гӧтырӧн. Бабыскӧд ӧти жырйын узьлӧ-олӧ.

— Абу сідзтӧ ладнӧ, абу, — пыр и сӧгласитчис Анфиса да водзӧ нуӧдіс сёрнисӧ: — Аннушкаанӧй, ме ӧд тӧрыт сы йылысь сёрнисӧ панны кӧсйи да ыджыд гажнад... Вуні. Талун и сёрнитыштам. Со, Микайлӧ тані и. Тэ кылан менсьым сёрнисӧ? Микайлӧ! Эновтлы чер-пилатӧ! Миянлысь керканымӧс регыд вештыны кутасны. Колӧ ӧдйӧджык мамтӧ вайӧдны миянӧ да пропишитны. Жырйыс Викторыдлы коляс. Тайӧ ӧти. А мӧд-кӧ, керкасӧ косялӧм бӧрын и мамыдлы аслыс торъя жыр вермасны сетны. А сійӧ сё во олысь оз жӧ нин ло. Анналы да Витюшлы ли позяс овмӧдчыны. Ті кумекайтанныд, мый ме сёрнита? Мишукӧс сэтчӧдз гӧтравны колӧ и. Мед ставӧн патераынӧсь лоам.

Микайлӧыс дӧзмӧдчысь гӧтырыслы броткыштіс:

— Но тэ, баба, сё во водзвыв тӧдан ставсӧ. Колӧкӧ, керканымӧс кызь во на оз вӧрзьӧдны-а.

— Вӧрзьӧдасны. Ме тӧдмалі нин, мӧд во кежлӧ сэтчӧ школа планируйтӧны стрӧитны. Тэ, Анна, мамыдкӧд сёрнитлы жӧ. Да эн кут, мед воас, ми ог ӧбижайтӧ.

— Ме кута! — кайтыштіс Анна да кыліс, кыдзи радысла пӧртмасьны кутіс чужӧмыс. Сійӧ тэрыбиника шур-шар пӧрччис платтьӧсӧ, ляскӧбтіс кильчӧ перилӧ вылас, долыда горӧдіс: — Кутшӧм лӧсьыд пасьтӧгыс! — да кватитіс Анфисаӧн дасьтӧм ыджыд капронӧвӧй мешӧк, мӧдіс забор саяс, вӧр дорас, коль ӧктыны.

Сэсся пӧ эн завидьты Анфисаыдлы, этатшӧм олӧмӧн олӧны да. Со тай, сылӧн ков-ковӧн, кылӧ, серамыс петіс, вӧрӧдзыс, Анна Степановна дорӧдз воис.

Лӧсавтӧм гыр кодь и эм, а чассьӧыс ас водзас чужлӧма. Везитӧ сылы быд боксянь. Мукӧдыслӧн дачаясыс ӧта-мӧд вылас вожасьӧмны, а талӧн — дзиръясӧ петан дай пожӧма ягӧ пыран. Сынӧдыс! Сир дукӧн и, тшак дукӧн и, быдсяма свежӧйнас ӧвтӧ. Жельнӧг куст, со, дзордзалӧ. И чӧдйыд сэтӧн жӧ. Ой, чӧд тусьясыс нин эмӧсь! Посньыдикӧсь, вежӧсь, абу на воӧмаӧсь.

Анна Степановна здук кежлӧ весиг вунӧдліс, мыйла петіс татчӧ вӧрас. Котраліс, чатрасис, нимкодясис вӧр мичнас, ышлолаліс, ыркыд сынӧдсӧ апйӧдліс. Оз нин и помнит Анна, кор вӧрас воліс. Батьыс раз-мӧдысь нуліс турипув вотны нюрӧ, но кор нин сійӧ вӧлі! Вит во, со, кулӧмыслы. А сэсся эз тувччыв вӧр пу сайӧ.

Вот кор сиктас олісны, Васяыс ӧтторъя вӧрӧ да ю дорӧ Аннасӧ тшӧтш кыскис. Дӧзмылас быдӧн Анна, мун пӧ, колӧкӧ, вӧрсаыскӧд шӧйт.

— Но-о, мыйла вӧрсаыскӧд? — серӧктыштас верӧсыс. — Ми ӧд школьникъяскӧд походӧ мунам. Тэнӧ тшӧтш кӧсйи босьтны-а. Он ӧмӧй сельпо кантораад пукалӧмсьыс мудз?

— Мудзи мыйкӧ тшӧті мольтӧ голльӧдлігӧн. Миян нывъяс тыртчыны субӧта рытнас кӧсйӧны, вай кольччы, йӧктыны да сьывны кутам.

— Вӧрас нин мунны дасьтыси да.

Пыр налӧн тадзи кыдзкӧ и артмыліс. Анна вӧччас, клубӧ петны дасьтысьӧ — верӧсыс школаас кольччӧма юннатъяс кружок вылӧ. Май праздник кежлӧ рыт дасьтӧны сельпоса служащӧйяс — Анна ӧтнас рытйысьны локтас, верӧсыс сакасьны ю дорӧ лэччӧма.

Дӧзмис татшӧм олӧмсьыс Анна, карӧ уйкнитіс. Мам-батьыс, пасибӧ, сэнӧсь, примитасны дай питорсӧ видзасны, оз эновтны. Гуся дум Анналӧн вӧлі жӧ сэк, некытчӧ пӧ оз вош верӧсыс, вӧтчас пи да гӧтыр бӧрсяыс. А эз тай вӧтчы. Воліс сӧмын гӧтырсӧ бӧр корны. Да Анна зэв гораа «ог» шуис. И пиӧс пӧ сэсся эн вӧрӧд, мед велалас: абу и абу батьыс. А оз кӧ и... Аддзысьлісны тай важ кавалерыскӧд, техникумсаыскӧд. Карас уджалӧ, потребсоюзын. Кутчысьліс и окаліс, важ пӧдругаӧн, меддонаӧн шуис и. Эн пӧ шогсьы: дінӧ устроита. Гӧтыртӧм на шусьӧ, гашкӧ, и верӧс сайӧ на босьтас. Век тай любитіг шусьӧ. Но кор локтіс потребсоюзас удж вылӧ устроитчыны, другыс, кажитчис, кӧдзыдакодь шутитіс да серӧктыштліс:

— Но, но, но, шуан, пи быдтан? Тэрмасьӧмыд тай...

Тадзи и Анна коли шӧракостас «да» ни «но» кывлытӧг. Сэсся эз нин сы дорӧ шыасьлы. Батьыскӧд муніс Минфинас да сэтчӧ уджавны пырис. А техникумса кавалер водзас эз жӧ кут коньӧрӧ пуксьыны.

— Тэтӧг на аддза! — И эскис, мый аддзас, да воясыд тай кольӧны. Ёна бурыс эз паныдасьлы, а кутшӧмсюрӧыд аслыс эз ков. А сэн сэсся и мамыс дай пиыс гортынӧсь...

«Анфиса тай, со, ӧні на шуис: этатшӧм баба пӧ ӧтнад олан. А мый керан? Ловъя морт, дерт. И пӧсь вирыд мукӧддырйи бунтуйтчылӧ, и мужичӧй ласка-мелілунсӧ быд клеткатор виччысьӧ. Шогыд и гажтӧмыд босьтлас мукӧддырйи, торъя нин праздник лунъясӧ. Мукӧдыс вӧччӧмны, мунӧны параӧн, а тэ — ӧтнад. Бур ещӧ Марго пӧдругаыс эм. Анфисаяс, со, оз жӧ эновтны. Сэсся пи локтіс, мам эм. Сійӧ эськӧ мыйкӧ век кутіс ме вылӧ пинясьны да. Босьтас кӧ Анфисаыс, бурджык нин лоӧ. Колӧкӧ, Марголӧн тӧдсаыс збыль мем кажитчас, тӧдмӧдны тай кӧсйӧ...»

Екатерина Ивановналӧн кулӧмыс вӧлі нем виччысьтӧмторйӧн. Кор Ваня, кельыд чужӧма, локтіс Викторъясӧ да висьталіс лоӧмтор йывсьыс, Виктор здук кежлӧ быттьӧкӧ измыліс да эз тӧд, мый шунысӧ. Сэсся коркӧ петіс жӧ кывйыс, но мыйлакӧ шуис эз сійӧс, мый колӧ татшӧм здукнас, а ляпнитіс дзик нинӧм абусӧ:

— Дениска бабӧкӧд булки ньӧбны петісны. — Быттьӧ Денискаыс тайӧ здукас медся колана мортыс вӧлі да вермис мыйкӧ вӧчны.

Ваняыс, буракӧ, эз и гӧгӧрво другыслысь не местаӧ ляпнитӧмсӧ, шеныштіскодь кинас, мед пӧ, колӧкӧ, и ветлас бабыдкӧд, ӧні не сыӧдз, да Викторлы пельпом вылас кисӧ пуктӧмӧн шуис:

— Вот, другӧ, кутшӧм удж ковмас вӧчны — мамукӧс дзебны. — Ванялӧн доршасис синваыс, сійӧ кыскыштіс нырнас да медым дзикӧдз не бӧрддзыны, содтіс: — Тӧрыт на сёрнитіс, а талун — абу... Да-а, другӧ...

Гортас Ваняясын, Тосяысь кындзи, вӧлі Тосялӧн мамыс, нылыс кодь жӧ косіник нывбаба, сьылі гӧгӧрыс кӧртыштӧм сьӧд чышъяна да сьӧд платтьӧа. Вӧсни кока сьӧд кай моз сійӧ жӧдзис джодж шӧрас да ӧтторъя лап-лапкерліс аслыс косіник бокъясас. Диван вылас пласьтвидзӧмӧн сыркъяліс-бӧрдіс Тося.

— Бӧрд, дитя, бӧрд, — шуаліс мамыс, — бур энька дорад красуйтчӧмыд помасис... Сарство небесной, Екатеринушка, югыдін тэныд да шоныдін, бур сьӧлӧма аньлы! Эн ӧд тэ мустӧмтлы менсьым Тосясӧ да и морт туйӧ пуктылін! Кага водтӧдӧмсӧ да кага чеччӧдӧмсӧ ӧд мамыс эз тӧдлы, пыр тэ сійӧн ноксин-вӧдитчин! Медся бур кывнас да мича серамнад менӧ пыр встречайтін-привечайтін...

Пырӧм мыстиыс Ваня да Виктор недыр чӧв олісны, сулалыштісны порог дорас, сэсся Ваня торкис тьӧщаыслысь оллялӧм-шуалӧмсӧ:

— Тьӧща, мый лоны лоӧма, бӧрдӧмнад он нин бергӧд. Гашкӧ, делӧнас займитчылам?

— Да, да, — чышъянсӧ юрсьыс лӧсьӧдігмоз, дзик пыр шыасис Тосялӧн мамыс. — Эз кӧ ӧд бур вӧв, бӧрдсис ӧмӧй? Энлы, ми Тосякӧд универмагӧ ветлам, лента да мый да ньӧбам.

Ванясянь Виктор гортас воис ӧкмыс час рыт гӧгӧрын нин. Мамыс куйліс диван вылас, тупкысьӧма пельпомӧдзыс пледӧн.

— Мамук, тэ узян нин? — шыасис Виктор. Сылӧн пуӧмӧн пуис морӧс пытшкас шогыс, Екатерина Ивановна кулӧмкӧд миритчытӧм пессьӧмыс. Аслас думъясӧн окота вӧлі юксьыштны мамыскӧд. Но мамыс лӧвтыштіс шебрас увсяньыс:

— Анфисаяс дача вылӧ ветлі да мудзи зэв ёна, энлы на дӧзмӧдчыв, здук шойччышта.

Викторлы мыйлакӧ ӧбиднӧ лои, быттьӧ чужйис сылы мамыс. Коли сӧмын сылы мунны ас жыръяс да ас кежас пӧжны шогсӧ. Позис, дерт, бабыс дорӧ кухняас пырны, но сэні кодкӧ зэв варов да гора гӧлӧса кыліс нин. Кылӧ, юисны бабыскӧд чай да варовитісны. Сюйсьыны на костӧ эз и вӧв лӧсьыд, но кӧсъян кӧть он, а сёрнисӧ налысь быть кывзы, сы вӧсна мый жырйыс сылӧн кухнякӧд орччӧн да став сёрниыс зэв бура кылӧ. Гора гӧлӧсыс тӧдтӧм тьӧтлӧн шор моз визула киссьӧ:

— А карад локті да шензи да шензи жӧ нин! Эсыдзи стрӧитӧмны! Аминь, аминь! Кор бара удитӧмны? Эжваыд чӧлӧй кар лыбӧма и. Нулісны менӧ нарошнӧ сэтчӧ, петкӧдлыны. А олӧм жӧ лои, шондібан! Миян ӧд сиктад ӧні карын кодь жӧ нин. Би и телевизор жӧ нин эм. И вӧччӧны войтырыс карсаяс моз жӧ. Вот сӧмын кокни олӧмсьыс дышмыны кутісны. Мӧссӧ весиг дугдісны видзны, непӧштӧ чипан-петук. Водзті вӧлі голькйӧны-сьылӧны петукъяс, грездтӧ гажӧдӧны, а ӧні вӧлӧсьттӧ прӧйдит — он кывлы кикуруллютӧ.

— Колькнас кӧ вердӧны, мый сэсся чипансьыд, — шыасис, кылӧ, и бабыс. — Колян гожӧм тай ме вок ордӧ ветлі гӧститны, да ведраӧн невесткаыс кольксӧ вайис-а, сельпоысь пӧ ньӧби.

— Сідзи, сідзи! — гора гӧлӧснас кыв ньылыдаліс тӧдтӧм тьӧтыд. — Вайӧны быдтор! Оз ков водзті моз дӧратӧ кыны ни няньтӧ пӧжавны. Быдпӧлӧс ситечыд и шӧлкыд лавка тырыс. Няньыд еджыд и сьӧд. Булкиыд и, преник-кампетыд и. Ӧгурцы-помидортӧ гожӧмнас вайӧны и. Ог асьным быдтӧй. Миян суседъяс, том ичмонь гозъя, картупельсӧ таво эз пуктыны. Ковмас кӧ пӧ ӧд, ньӧбам дай. А градйыс, шондібан, кильчӧ помас. Кыдз, мися, он пуктӧ? Муыс ӧд эжсялас! Ме бӧрти пукті, мед, мися, налы яндзим лоӧ. Том йӧзыс кокни руаӧсь кутісны лоны. Кӧсъям — пуктам, кӧсъям — ог. А муыс, матушка... Уджалӧны эськӧ, нем ог шу. Коді трактор дорад да машина дорад, ёна уджалӧны. Найӧ и удж бергӧдысьяс. Скӧт дорад коді, налы сюрӧ жӧ уджыд. Ме комын ӧти во общӧй скӧт дорад вийси да тӧда. Ӧні тай пензия вылад петі да каръясті, со, джылкъяла-а. Локті, мися, сильӧпиян кӧть ньӧба, частӧ пӧ тай вузалӧ птицефабрикаыс... А сё пассибӧ тшай-сакарсьыд, чӧскыда и юи! Юр пӧв кутіс петавны, кодкӧ гаралӧ. Ныв-зять, пӧди, воисны гортӧ да гаралӧны. Муна эсся.

— Мун, инӧ, да бара коркӧ волы. Ме ӧд пыр гортын, — шуис сылы бабыс да содтыштіс: — Анфиса дачаӧ шочиника сӧмын ветла. Талун Анна ветліс-а. Мудзӧма тай, со, да эз и чеччыв тэ дорӧ.

— А мый эсся мортыс чеччас, мед шойччас. Эсся нӧ сідзи и Аннушка эз петав мӧдысьсӧ? Миян Василейкӧд тай кыткӧ эз артмы налӧн олӧмныс да. Сылӧн ӧти нывка жӧ сӧмын и эм. Олӧны бура. Стрӧитчисны, пуктӧны быдтортӧ керка гӧгӧрыс, быд дивӧыс налӧн быдмӧ. Ӧні тай школьникъясыскӧд кытчӧкӧ Волгоградӧ мунісны. Быд во ветлӧны-путешествуйтӧны. Нажӧвитасны сьӧмтӧ страдуйтіг да картупель босьтіг, сэсся ветлӧны, быд бурсӧ аддзылӧны. Челядьыдлы ӧні лӧсьыд. Василейыс миян любитӧ накӧд ноксьыны-а.

— А эз тай куж Анна овнысӧ, пиыс батьтӧг быдмис...

— Быдӧнлӧн аслас судьба, Маринушко. Мый эсся вӧчан... Сё пассибӧ ещӧ раз! Муна! Ме ӧд варовитныыд кӧ мӧда, помсӧ ог жӧ аддзы. Арнас ельдӧгтӧ вотны волӧй миянӧ дай...

Бабыс, кылӧ, колльӧдіс варов нывбабаӧс ӧдзӧс мӧдарӧдзыс да бӧр пыригас тайкӧ эз люкась Викторкӧд ичӧт коридорас.

— Тэ нӧ гортын? — шензьыштіс бабыс.

— Да. Ме ӧні локті да эг нин торк тіянлысь варовитӧмнытӧ, — вочакыв сетіс Виктор да юаліс: — Коді нӧ тайӧ тьӧткаыс?

— Сиктысь. Чипанпиян ньӧбны воӧма тай.

— А сійӧ код йылысь, менам бать йылысь висьталіс? — бара юаліс Виктор.

— Кывлін? — шай-паймуні бабыс. — Чой тайӧ, рӧднӧй чой батьыдлӧн. — Пыр, мамтӧ чукӧст да вайӧ ужнайтыштам. Тэ ӧд войпукны, кӧнкӧ, тэрмасян. А бать йывсьыд эн нин гарав. Сылӧн аслас семья. Ӧні мый нин...

— Ме ог ли мый гӧгӧрво? Но аддзӧдлыны батьӧс век жӧ окота, — шуыштіс Виктор да кыскыштіс дінас бабсӧ, сывйыштіс сійӧс векни пельпомӧдыс.

Бабыс ышловзис, мынтӧдчис внук сывтырсьыс, тэрыба веськӧдчис ыджыд жыръяс. Регыд сэсянь локтіс бӧр кухняӧ, мыччис внукыслы газет.

— Тайӧс ме пыр на тэныд видзи. На лыддьы. Бать йывсьыд тані гижӧмны. Народнӧй учитель пӧ тай...

Эз удит петны ӧти гӧстя, кылӧ, мӧд пырис. Тшап, збой гӧлӧсӧн шыасис:

— Мамӧ миян абу тані?

Виктор ужнайтыштіс да буретш мамыс жырйӧ зеркалӧ водзас пасьтасьны пырис. Локтысь гӧстятӧ зеркалӧ пырыс и аддзис. Аддзис, и синъясыс паськалісны. А колӧкӧ, и вомыс тшӧтш. Татшӧм мича нывтӧ Виктор эз на некор аддзыв. Юрсиыс — сьӧд сук кудри, пельпомӧдзыс. Кудрияс пӧвстас быттьӧ кык кодзув — синъясыс. Нывлӧн вылас сӧмын вӧсни волыса сарапан. Коссӧ шыркнитӧма кружева сяма эзысь тасмаӧн.

— Абу, эз пырав, — вочавидзис, кылӧ, нывлы бабыс. А мамыс, мыйӧн кывліс нывлысь гӧлӧстӧ, пыр жӧ лэптіс юрсӧ пӧдушка вывсьыс, чукӧстіс. Вӧлӧмкӧ, оз узь, Виктор чайтіс узьӧмӧн-а.

— Галина, пырав татчӧ.

Галина дзӧркнитіс орчча жырйӧ, сэсся чужйыштіс коксьыс бӧртӧм кӧмсӧ, сабосӧ, да тивк пырис жыръяс.

— Бур рыт, Анна Степановна! Аддзан менсьым киясӧс и мышкуӧс? Гожъялӧмаӧсь кыдзи! Лунтыр вадорын вӧлім... — Сійӧ серӧктіс да сэсся быттьӧ вӧлись аддзис зеркалӧ водзысь Викторӧс, ворсӧдчӧмӧн шуис: — Но, тӧдмӧд жӧ менӧ, Анна Степановна, пиыдкӧд! Мамӧ став пельӧс нин сьӧдӧдіс, сэтшӧм пӧ красавец!

— Тӧдмасьӧй, тӧдмасьӧй. То тай зеркалӧ водзын вӧччӧ: нывъяс дорӧ, буракӧ, петны дасьтысьӧ.

Ныв пыр и ырскӧбтіс Анна Степановна дорысь да Викторлань воськов вӧчӧм бӧрын горӧдіс:

— Вот и бур! Петам, сідзкӧ, Виктор, ӧтлаын!

— Но сэсся дзик пыр и петны дась. Гашкӧ, чай юыштам? Абу кӧ гортадӧсь, тэ, колӧкӧ, ӧнӧдз ужынтӧм? Ме мудзи ёна да ужынтӧм на жӧ...

Анна Степановна тэрмасьӧмӧн лӧсьӧдыштіс диван вывсӧ да мӧдіс кухняас, сэсся сысянь нин, кылӧ, сёрнитіс:

— Кӧні нӧ мамыд талун та дырасӧ ветлӧ? Тӧрыт тай ми договоритчим гожъявны жӧ ветлыны, да эз и пырав менӧ чукӧстнысӧ-а. Лӧгасис ли мый ли.

Галина жырсяньыс сылы вочавидзис:

— Тіян вылӧ мыйысь лӧгасяс? Папакӧд найӧ... Асывнас пинясисны. Дачаынӧсь, кӧнкӧ, бӧр миритчӧны. Найӧ пыр сідзи...

Та бӧрын Галина леститчысь кань моз вӧчис ещӧ ӧти воськов зеркалӧ дорӧ Викторлань, меліа-меліа видзӧдліс сылы синмас, гӧлӧссӧ чинтӧмӧн вашнитіс:

— Ме эськӧ некор эг лӧгав, тэнад кодь кӧ муса верӧсӧй вӧлі. — Ныв дзикӧдз сибӧдчис Виктор дорӧ, ниртчыштіс сылы морӧсас. — Тэ кӧсъян ужнайтны? Ме ньӧти ог. Вай пышъям мамсьыд! Танцуйтны мунам. Ме нуӧдла тэнӧ миян дискотекаӧ.

Оз вашкӧд — небыд шӧвкӧн гартӧ-тывъялӧ нывлӧн гӧлӧсыс, кыскӧ-домалӧ вӧсни мыгӧр дорас, юсьлӧн кодь мича сьылі дінас. И Виктор, коді ӧні на лӧсьӧдчис мунны Наташа дорас, тӧкӧтьӧ нин эз шу: «Ветлам. Тэкӧд кӧть кытчӧ». Но кутшӧмкӧ кутӧд, тыдалӧ, абу на жӧ дзикӧдз личалӧма вежӧрас. То ли аддзыліс тӧрыт нывлысь Миша вокыскӧд окасьӧмсӧ, то ли бабыслӧн кывъясыс тӧд вылас усины, сяммис яндысьтӧм мелілунӧн кыскӧмсьыс мынтӧдчыны, гораа серӧктыны да шутка улӧ лэдзны нывлысь кывъяссӧ:

— Миша тӧдлас кӧ, менӧ нӧшалас, — шуис серамсорӧн. — Абу лӧсьыд вокыдлысь нывсӧ мырддьыны.

Колӧкӧ, Галина сюсь нывбаба вежӧрнас гӧгӧрвоис, мый тайӧ зонсӧ он дзик пыр босьт, шутка улӧ жӧ лэдзис ставсӧ. Сійӧ серӧктіс, шурк бергӧдчис ас гӧгӧрыс да, зеркалӧлань чужӧмӧн сувтӧм бӧрын, пондіс шыльӧдны-мольӧдны ассьыс мыгӧрсӧ:

— Тіян Мишаысь ме дӧзми нин, лунтыр нин сыкӧд гожъялім. Рыт кежлас меным эськӧ тэ кодь лӧсьыдыс да авъяыс. А тэ, со, кирпич стена кодь...

Виктор сувтіс Галинакӧд орччӧн, наяна видзӧдліс зеркалӧын тыдалысь ныла-зонма вылӧ, серӧктіс:

— Да, ме сэтшӧм, соседушка, кын мыр ме.

Галина скӧрысь вачкис Викторлы бокас:

— Но ладнӧ... Тэнад ныв эм?

— Эм.

— Мича? Меысь на мича?

Виктор гогнитіс юрнас:

— Тэысь на мича! — лӧсьӧдыштіс кималаснас юрсисӧ, лӧсьӧдчис мунны. — Кӧсъян кӧ, лок мекӧд мунам, — шуыштіс нывлы ӧдзӧслань веськӧдчигӧн.

— Кӧсъя, дерт! — ныв тэрмыштчис сы бӧрся. — Ми мӧдім, Анна Степановна! — горӧдіс петігас ныв, а ӧдзӧс мӧдарас Викторлы шуис: — Но, аддзысьлытӧдз, авъя зон! Мун аслад мича ныв дорӧ. Сӧмын сӧран, абу сійӧ меысь мича. Аддзылі, кыдзи ӧнтай ме вылӧ видзӧдін.

Наташаяс кильчӧ помын весьшӧрӧ быдса час зуйялӧм бӧрын Виктор бӧр мӧдӧдчис гортас. Ас кильчӧ дорас воигӧн нин кыліс килькнитӧм шы, а сэсся сылы паныд петіс веж кустъяс сайысь Галина, вильшасьӧмӧн серӧктіс:

— Регыд тай нӧ, кавалер? Мича нылыд мӧдкӧд ли мый мунӧма?

Джинсы гача, чим гӧрд свитера, сійӧ ӧні кажитчис дзик мӧд кодьӧн, но веж петкӧдлан сямыс абу чинӧма, а, буракӧ, содӧма на. Коскас ӧні сылӧн мӧд тасма, ковбойскӧй, мичмӧдӧма кӧрт бляшкаясӧн. Галина мыш сайсянь гора мужичӧй гӧлӧс чукӧстіс Викторӧс:

— Эй, вокӧ, волы татчӧ!

Миша воча вокыслысь гӧлӧссӧ пыр и тӧдіс Виктор. Миша тшӧтш джинсы гача да гӧрд шӧвк дӧрӧма — водзвыв кӧ сёрнитчӧмаӧсь тадзсӧ пасьтасьны-а — пукаліс тшӧкыд кустъяс пӧвстӧ меститӧм скамья вылын, лэдзчысьӧма мыш вылас. Лӧсьыдик шань чужӧмыс лун шӧр кадся шонді моз донвидзӧ, вомыс вашъялӧ.

— Со, кӧні найӧ койтӧны, — шыасис Виктор вокыс дорӧ сибӧдчӧм бӧрын. — Чолӧм, войдуръяслы!

— Чолӧм, вокӧ, чолӧм. Пуксьы вай. Шуӧны, воӧма пӧ, да тӧрыт рытывбыд тіянын пукалі, виччыси... — Миша вешйыштіс, пуксьӧдіс орччӧн воксӧ. — Кутшӧма служитін? Десантнӧяд ёна, пӧдикӧ, муштруйтісны?

Виктор эз вочавидз, нюмкерис сӧмын. Миша водзӧ нуӧдіс сёрнисӧ:

— А мем везитіс. Стройбатын вӧлі. Кирпич кыскалі самосвалӧн. Калымитны и быдӧн чужан лун кежлӧ удайтчис...

— Но и мый, бура пасйин чужан лунтӧ? — юаліс Виктор.

— Звер кодь старшина дорад! Вежон ковмис бӧрас казарма джодж мыськыны. Но шампанскӧй юим... Тэ, небось, уна приём ӧні тӧдан? — друг юаліс Миша.

— Тӧдышта, — шуис Виктор. — Кӧсъян, петкӧдла ӧтиӧс?

— Мӧдысь коркӧ, ӧні оз ков, — Мишалӧн вежсьыштіс быдӧн гӧлӧсыс, вешйыштіс вокыс дорысь.

— Повзин? — юаліс Виктор.

— Ачым на кодӧс колӧ чергӧда! Ӧні ныв дырйиыс абу лӧсьыд.

А Галинаыдлы, буракӧ, сійӧ сӧмын и абу тырмӧма. Воча ки вачкучкис, горӧдіс:

— Ой, зонъяс, кутшӧм интереснӧ! Виктор, петкӧдлы приёмтӧ!

— Мӧдысь, — шуис Виктор, чеччис скамья вывсьыс. — Мусукасьӧ вайӧ, ме пыра, ог кут мешайтны.

— Татшӧм водз кӧсъян пырны? — Галина пыр и сирасис Викторлы сойбордъяс. — Вайӧ кӧть паркӧдз ветлам. Да ӧд, Миша?

Куимнанныс кутчысьӧмӧн петісны улича вылӧ да ньӧжйӧ мӧдісны довгыны. Кор аддзисны налы паныд локтысьясӧс, Галина горӧдіс:

— Ой, видзӧдлӧй! Папочкаыс менам кык дама костын! Пӧрысь дуралей...

Локтысьяс вӧліны куимӧн жӧ. Ӧти мужичӧй да кык ныв. Ӧти нывсӧ Виктор пыр жӧ тӧдіс: тайӧ вӧлі Наташаыс. Мӧдыс — Наташа кодь жӧ сяввидзысь еджыд юрсиа да гырысь ясыд синъяса, сӧмын тушанас латшкӧсджык. Найӧ матыстчисны дзик ӧта-мӧд дорас, и мужичӧй серӧктыштіс, шыасис Галина дорӧ:

— Шензян, Галина, кык ныв костын ме да? Сідзкӧ, папыс абу на ёна шыбитана. Верманныд тӧдмасьны — Елена да Наталья Глебовнаяс, менам нывъяс. Папсӧ, со, гортӧдзыс колльӧдӧны.

Мужичӧй вӧлі гажакодь да дугдывтӧг нюмвидзис.

Галина наяна видзӧдліс нывъяс вылӧ, шуис:

— Зэв приятнӧ! Ме ассьым чоюкъясӧс мыйкӧ мында тӧдышта нин. — Та бӧрын сійӧ эновтіс зонъяссӧ да батьыслысь чужӧмсӧ малыштігмоз шуис: — А тэныд, папочка, талун бара сюрас мамочкасянь, эта дыра ветлан да.

— Но, сідзи нин и сюрас! Тэ ӧд менӧ дорйыштан. Он ӧмӧй папыскӧд гортӧ кӧсйы пырны?

— Ой, кутшӧм тэ тӧлка! А ме кӧ ог на кӧсйы?

— А тэтӧг кӧ збыль мамыд менӧ нӧшалас?

Ая-ныла пудъясигӧн Виктор сибӧдчис Наташа дорас, кыскыштіс и Миша воксӧ сьӧрсьыс:

— Лок, Миша, ми, инӧ, этайӧ нывъяссӧ колльӧдыштам, пока Галинаыд папсӧ пыртӧдас.

Татчӧ Галина чушмуніс, ӧгырӧн резыштіс чоюкъяс вылас да кватитіс батьсӧ сойбордйӧдыс:

— Папочка век нин мыйкӧ надурнӧ мем вӧчас!.. Лок... Тэ, буракӧ, и код талун? — сэсся «бура колльӧдчӧй» том йӧзлы горӧдӧм бӧрын мӧдісны батьыскӧд гортланьыс.

Кор найӧ ылысмыштісны том йӧз дорысь, Галина юаліс:

— Тэ бӧр на дорӧ мӧдан, папочка? Эновтан мамӧӧс?

Глеб Сергеевич виччысьтӧмысла сувтовкерис, шпыньмуніс:

— Ме, дерт, верма и не вочавидзны тэныд, но ӧтитор век жӧ кора тшупны нырад: найӧ тӧдӧны аслыныс донсӧ и некор оз примитны ми вок кодь батьястӧ. Поняла?

— Сідзи оз и примитны... — люг-легкерис Галина пельпомъяснас да вежыньтліс вомсӧ. — Святӧйяс... А тӧрыт, инӧ, кӧн шляйтчин?

— Тӧрыт? Сійӧ, Галка, пустяк, пустяк. Овлӧ... Вот верми и тарыт ылавны... Эз кӧ нывкаясыс горт дорӧдз колльӧдны... Збыль, ме код талун. Вай мунам гортӧ ӧдйӧджык. Мудзи...

Шулӧны, сы серти пӧ, кымынӧн колльӧдӧны морттӧ медбӧръя туяс, позьӧ тӧдмавны, кутшӧмджык тайӧ мортыс вӧлі да кыдзиджык оліс. Колӧкӧ, тайӧ тадз и эм. Екатерина Ивановнакӧд прӧщайтчыны воӧмны сымда йӧз! Керка пытшкыс, подъездыс и кильчӧ помыс — ставнас тыр.

— А Екатерина дай свет Ивановна менсьым челядьӧс и внукъясӧс быдтыліс да умӧ-разумӧ велӧдліс. Царствие небесной сылы... — Джын гӧлӧсӧн, кылӧ, висьтасис орччӧн сулалысьяслы ӧдзӧс дорӧ топӧдчыштӧм пӧрысь ань.

— Миян Эдик да Соня ӧд та дорӧ жӧ ветлісны кыкнанныс, — воча вашкӧ сылы мӧд нывбаба.

Джодж шӧрас, ковёрӧн вевттьыштӧм улӧсъяс вылын, шыньвидзис-куйліс сійӧ, коді медбӧръяысь чукӧртӧма ас дорас та мында йӧзсӧ. Шыньвидзис чӧв, морӧс вылас кияссӧ пуктӧмӧн, да быттьӧ кӧсйис на шуны йӧзыслы: олӧй лючки, менам овсьӧма. Мый верми вӧчи, а мый эг удит, ті вӧчанныд.

Юр весьтас сылӧн, ичӧтик пызан вылын, сьӧд лентаӧн мичмӧдӧм портретыс — мелі видзӧдласа да нюмдыштӧм вома ань. Да кык гӧрд плюш подушечка. «Знак Почёта» орден да Ленинскӧй юбилейнӧй медаль — сылысь олӧмсӧ да уджсӧ донъяланторъясыс. Ещӧ пирӧг да шаньга тыра тасьті. Бокас — пи-моньыс, Ваня да Тося, курыд шогысла сьӧдӧдӧм чужӧмаӧсь, йӧзсӧ ни вӧльнӧй светсӧ оз аддзыны, кутчысьӧмаӧсь мамыслы горт пӧвъяс, пукалӧны лӧня. Оллявны мастер, Тосялӧн мамыс, сьӧлӧмтӧ нетшкӧ-косялӧ, бӧрдӧ-омлялӧ лыддьӧдлӧмӧн:

— Чеччы, чеччы да и, сватьюшка, Катерина Ивановнаӧ! Он ӧмӧй аддзы, мыйта йӧзыс тэ дорӧ локтӧмны? Нюмдышт мелі нюмнад да мелі кывтӧ шу...

Виктор, траурнӧй лентаӧн кӧрталӧм киа, сулаліс Екатерина Ивановна кок улын почётнӧй караулын да оллялӧм шы улас думайтіс ассьыс думъяссӧ. Сылы тӧд вылас воисны ӧти бӧрся мӧд югыд серпасъяс, кыдзи найӧ Ваняыскӧд да и найӧ классысь уна мукӧдъяс коллявлісны Ваняясын рытъяс. Лыддьысьлісны, вензьылісны. Кыдзи Екатерина Ивановна гӧститӧдліс найӧс ас пӧжасӧн либӧ ньӧбӧм кексӧн да чайӧн, тшӧтш сюйсьывліс челядькостса венӧ. И кутшӧм ас кадӧ да дельнӧ пыр вӧліны сылӧн шыасьӧмъясыс. Та вӧсна Ванялысь мамсӧ радейтліс став классыс, унаӧн волісны Ваня ордӧ эз сӧмын лыддьысьны да вензьыны, но и гортас кӧ нелючки да сьӧлӧм вылас гажтӧм. Уна кад коллявліс на ордын и Виктор, торъя нин дед кулӧм бӧрас. Бабыс эськӧ и бур да мелі век вӧвлі, но ӧд неграмотнӧй нывбабаыд оз вермы пыр кутны зонпоснитӧ ас дорас. А мамыс пырджык командировкаясын вӧлі дай гортас кӧть веськавліс, кыдзкӧ кӧдзыд быттьӧкӧ вӧвлі. Некор мама-пиа костын эз чужлы ни сьӧлӧм сетан сёрни, ни шутка-серам. А Ваняясын пыр аддзыліс сьӧлӧм инӧдантор. То Екатерина Ивановна выль книга вайӧма, то кроссворд мыччӧ, ноко пӧ, зонъяс, песыштӧй юрнытӧ, а то и шуас: петаламӧй жӧ, зонкаяс, гуляйтыштам ывла вывтіыс, небесаас кымын кодзув лыддям... И со, куйлӧ Екатерина Ивановна, нинӧм оз вӧзйы, оз шыась...

Друг Викторӧс кодкӧ тувкис бокас, торкис думъяссьыс. Ыпмуні Виктор ставнас. Сы бокын сулаліс Аллочка Лыткина да краситӧм гыжнас разис Виктор сойысь траурнӧй кӧртӧдсӧ.

— Вай ме тшӧтш сулалышта. Полчаса кежлӧ удж вылысь лэдзисны, — шуис Аллочка да, кор кӧртӧдыс лои разьӧма, нюмдыштіс, мыччис сойсӧ Викторлы. — Вай кӧртышт мен. Кывлі воӧмтӧ... Тэнӧ аддзылӧм ради и вӧзйыси ёнджыкасӧ.

Бӧръя кывъяссӧ Аллочка пӧшти вашкӧдіс да видзӧдіс Викторлы веськыда чужӧмас. Виктор нинӧм сылы воча эз шу, сӧмын думыштіс: «Ещӧ на мичаджык лоӧма». Викторлӧн морӧсыс ставнас ёнтыштіс, киясыс асьныс нюжӧдчисны Аллочкалань. Сійӧ босьтіс ныв киысь кӧртӧдсӧ да кутчысис нывлы чургӧдӧм куш сояс. И друг сылы тӧд вылас уси письмӧыс: «Кора меным водзӧ не гижны...» Пушыд киыс Аллочкалӧн быттьӧ вачкис сылы чужӧмас, мича вом доръясыс быттьӧ сьӧвзисны синмас. Сьӧд пемыдӧн тупйысьліс зонлӧн син водзыс, шатовмуніс юр бергӧдчӧмсьыс. А кор бӧр югдіс син водзыс, аддзис Наташасӧ. Кутшӧмкӧ том нывбабакӧд кыкӧн найӧ кытшовтісны Екатерина Ивановна горт гӧгӧр да лӧсьӧдчисны нин дзескыдінсьыс бӧр петны ывлаӧ. Тайӧ каднас найӧ и паныдасисны синъяснас. Наташа повзис: Викторыслӧн сэтшӧм блед чужӧмыс. Дыр думайттӧг, йӧзсӧ юклалігтыр, ныв писькӧдчис Виктор дорӧ, кватитіс киӧдыс да пондіс кыскыны ӧдзӧслань.

— Тэнӧ шогӧдны кӧсйӧ? Кулӧма вылас дыр видзӧдны ме ог жӧ вермы. Лок ӧдйӧджык сынӧд вылас!

Кильчӧ помас петӧм бӧрын Наташа юаліс:

— Кокниджык лои?

Виктор довкнитіс юрнас.

— Ме тай шуи... Тэ менӧ садик дорӧдз колльӧд, пӧжалуйста. Ме ӧд здук кежлӧ сӧмын волі Дениска бабкӧд прӧщайтчыны. Кагушъяс менам кольӧма...

Наташа кутчысьліс Викторлы сояс, сэсся бӧр мынтӧдчис да кияснас шевкнитӧмӧн горӧдіс:

— Всё, Виктор, ме талун медбӧръя лун уджала! Отпускница ме и туристка! Болгарияӧ шутьнита!

Наташалӧн Болгарияӧ мунӧм йылысь юӧрыс эз нин вӧв выльторйӧн Викторлы. Кодкӧ рытӧ Миша вокыскӧд кык чойӧс колльӧдігӧн Наташа ошйысис нин, мый путёвка налӧн, Болгария аддзыласны, Чёрнӧй мореын купайтчасны. Но Виктор эз чайт, мый татшӧм ӧдйӧ мунан кадыс воас.

— Тэ эн ӧмӧй шу: мӧд вежоннас? — юаліс Виктор, кор найӧ выльысь аддзысисны Екатерина Ивановнаӧс дзебӧм бӧрын, рытъявылыс.

— А талун ӧд мӧд вежоныс нин и эм, — нюмсерӧн вочавидзис Наташа, а сэсся жугыльмыштіс. — Миянлы, буракӧ, эз и ков аддзысьлыны. Тэ всё равно менӧ вунӧдан.

— Мыйла нӧ вунӧда?

— Вывті мича суседка тэнад эм да.

— Суседка? Галинасӧ ли мый шуан? — Виктор серӧктыштіс да содтіс: — Сы дорӧ тэ менӧ верман не вежӧгтыны. Сійӧ... Но кыдз тэныд шуны? Збыль зэв мича, но меным мӧд пӧлӧсджыкъяс кажитчӧны. Тэ кодьясыс, — Виктор сибӧдіс Наташаӧс дінас, шмонитыштіс: — Тэ сӧмын сэні болгарин саяс эн пет-а. Кӧсъян, ветлам универмагӧ и ньӧба ме тэныд козин. А-а, тэ повзин, мый ньӧба ме тэд норка пась? А мый, и ньӧбам! Эм менам быдса вит шайт!

Наташа гажаа серӧктіс:

— Но, норка пась кӧ, ветлам!

Асывнас бабыс сетліс Викторлы кык вита. Ӧтисӧ сійӧ пуктіс Екатерина Ивановна морӧс вылӧ, сэтшӧм тай мода комияслӧн, пуктӧны кулӧмалы морӧс вылас, кодлы мыетш абу жаль. Викторлы эськӧ и даснаныс абу жаль, да баб сетӧм сьӧмнад он ёна паськӧдчы.

Ньӧбисны найӧ универмагын 70 ура акань-негритёнокӧс. Наташалы сэтшӧма кажитчис козиныс. Окыштіс весиг зонмӧс, кужан пӧ ньӧбанторсӧ бӧрйыны. Ещӧ Виктор ньӧбис пластинка. Наташа висьталӧм серти кӧ, чукӧртӧ сійӧ пластинкаяссӧ. И тайӧ Наташалы кажитчис.

— Сӧмын менам кык пластинка нин татшӧмыс, — серӧктіс сійӧ.

— Но и мед, куим лоӧ!

Кыпыд лолаӧсь, ветлісны найӧ универмагті, и Наташа ӧтторъя окыштліс акань-козинсӧ да дзик пыр и Гримо ним аканьыслы пуктіс.

Код тӧдас, мыйла Виктор буретш талун локтіс нылыскӧд универмагас, гашкӧ, кутшӧмкӧ бес и тойлаліс сійӧс, ӧд тӧдіс: Аллочка универмагас уджалӧ. Колӧкӧ, Аллочка водзын ошйысьыштны кӧсйис Наташанас. А колӧкӧ, и некутшӧм сэтшӧм дум эз вӧв зонмыслӧн. Локтіс Наташакӧд универмагӧ — и ставыс.

Мӧд судтаӧ катӧдан пос вывсянь на аддзис Виктор Аллочкаӧс. Быттьӧ ачыс ювелирнӧй изделие, дзирдаліс синъяснас и мича чужӧмнас, сьыліас зарни цепочкаӧн да пельясас исергаӧн. Ньӧбасьысьыс отделас пӧшти некод эз вӧв, кутшӧмкӧ кык зон видзӧдісны часіяс да куим-ӧ-нёль нывбаба бӧрйысисны сикӧтшъяс дінын.

И Аллочка аддзӧма Викторӧс нылыдкӧд, вомтырнас шпыньмуніс, быттьӧ кӧсйис нин горӧдны: «А-а, воан! Сэки эн кӧсйы мекӧд сёрнитны, а ӧні ачыд локтан!» Но сійӧ эз тадз шыась, а тӧкӧтьӧ мӧд пӧлӧсджык кывъясӧн:

— О, Вить! Ваняясын эг удитӧй видзӧдлыны ӧта-мӧд вылӧ ни кыв шуыштны! Вай кӧть ӧні тыр-бур синмӧн видзӧдла! Ой, лӧсьыд лоӧмыд! Мый нӧ татчӧ мог суис? Чунькытшла, гашкӧ? Он-ӧ нин гӧтрасьны кӧсйы?

— Мый огыс? Буретш гӧтрасян кад! — збодера вочавидзис Виктор да меліа видзӧдліс Наташа вылас, содтіс: — Тӧдмась, невеста менам, Наташа.

— Поздравляйта, — тшапа шуис Аллочка да, Наташа киысь аканьсӧ дзоргиг-видзӧдігтыр, серӧктыштіс. — И акань нин ньӧбӧмныд будущӧй кагушыдлы. Али ачыс на невестаыд аканьнас ворсӧ?

Аллочка кывъясын тӧдчис тешитчӧм и лёк серам. Наташа тайӧс гӧгӧрвотӧг эз ов. Скӧрмис, шеркнитчис Виктор дорысь дай уйкнитіс-пышйис. Уськӧдчыліс жӧ эськӧ Виктор сы бӧрся, да Аллочка удитіс кватитны сійӧс сойбордйӧдыс, скӧра вашнитіс:

— Тэ мыйла тайӧ нывкасӧ ме дорӧ вайӧдін? Менсьым письмӧӧс он вермы вунӧдны? Ме жӧ тэд нарошнӧ гижлі...

Виктор тракнитчискодь, серамсорӧн шуис:

— Лэдз вай, ньӧбасьысьясыд, со, видзӧдӧны. Кӧсъян кӧ тӧдны, менӧ некор эз интересуйтлыны универмагса вузасьысьясыд. Аддзысьлытӧдз...

Наташасӧ суӧдіс ывла вылас нин. Котӧрӧнмоз вӧтӧдіс нылӧс, чукӧстіс:

— Наташа, тэ мыйла пышйин?

Мӧдыс бергӧдчыштліс да быттьӧ эз аддзы некодӧс, мӧдӧдчис водзӧ.

— Наташа, энлы! Ме тэд ставсӧ висьтала, — заводитліс бурӧдны нылӧс Виктор, но весьшӧрӧ. Тэрыб тшап восьласӧн Наташа вуджис улич мӧдарас. Сідз найӧ недыр восьлалісны, ӧтиыс — ӧтартіыс, мӧдыс — мӧдартіыс. Регыд Наташа кежис асланыс улич вылӧ да саяліс веж пуяс сайӧ. Виктор колльӧдіс сійӧс синнас да пиняліс ачыс асьсӧ: «Но и правильнӧ, дураклы мем, сідзи и колӧ. Да и коді вермис думыштны, мый Аллочка сэтшӧм лоӧма. Дӧзмытӧг оз ов Наташаыс...»

Друг сылы тӧд вылас уси, мый Наташаыс аски оз нин ло тані, лэбас самолётӧн. Кыдзи нӧ тадз? Сэсся найӧ оз нин и аддзысьлыны? Виктор уськӧдчис котӧртны. Сылы паныдасьысьясыс повзьӧмӧн кежалісны бокӧ, йӧймӧма пӧ, буракӧ, зонмыд. Но кысь на и суӧдан, кор Наташаыс эз гортас мун, а кежис пӧдруга ордас, коді накӧд мунӧ жӧ Болгарияӧ да кӧні колӧ лоны и Лена чойыслы. Виктор, дерт, тайӧс эз тӧд да котӧртіс Наташаяс керка дорӧдз, сэсся вошӧм ыж моз дыр дзӧръяліс ӧшинь улас. Медбӧрын пырис подъездас да звӧнитіс ӧдзӧсас. Сылы некод эз восьты. Пондіс ӧдзӧсас таркӧдны. Сэк орчча патерасьыс петіс ар даса ныв, шуис:

— А налӧн некод абу.

— А кӧнӧсь? — юаліс Виктор. Нывка лэптыштліс пельпомсӧ.

— А позьӧ, записка коля? — бара юаліс Виктор.

— Позьӧ, — гогнитіс юрнас нывка. Сэки Виктор корис нывкалысь ручка да бумагатор. Нывка чожа пыраліс да петкӧдіс гортсьыс тетрадь лист да авторучка. Мӧдыд босьтіс да шаркӧдӧмӧн гижис: «Наташа, дерт, зэв мисьтӧма артмис, но ме ньӧти абу мыжа. Ме тэд кӧсйи висьтавны ставсӧ, но тэ эн кӧсйы кывзыны менӧ. Гӧтрасям да огӧ кӧ кутӧй ӧта-мӧднымӧс гӧгӧрвоны, олӧмным оз артмы, думыштлы та йылысь. Тэнад Виктор».

Запискасӧ кусыньтіс куим кусыньӧн да сюйыштіс ӧдзӧс костас. А ачыс петіс ывлаӧ. Сійӧ надейтчис на, мый аддзылас на кыськӧ Наташасӧ, и мунігчӧжыс гоньяліс, смекайтіс гӧгӧрпӧв, друг да пӧ этайӧ керка сайсьыс мыччысяс али этайӧысь.

Инасьтӧм сьӧлӧмӧн и воис горт дорӧдзыс. Кильчӧ помас зурасисны Глеб Сергеевичкӧд. Петкӧдӧ буретш суседыс болонка понсӧ гуляйтны.

— О-о! Как раз тэ, том морт, мем и колан! — радлыштіс сійӧ Викторӧс аддзӧм бӧрын. Долыдджык сьӧлӧм вылас лои и Викторлы. Тайӧ ӧд Наташалӧн бать, гашкӧ, мыйкӧ и Наташа йывсьыс на юӧртас.

— Эм кӧ кадыд, пукалыштам, — вӧзйис Глеб Сергеевич да индіс неылын сулалысь скамья вылӧ.

Виктор пуксис. Глеб Сергеевич малыштіс гач зепсӧ, шуис:

— Ок, тшынасяныд абу сьӧрысь лоӧма! Тэнад абу жӧ?

Виктор кыскис донтӧминик сигарет. Мӧдыс босьтіс, серӧктіс:

— Салдатскӧйыд на... Да но ладнӧ. — Найӧ пестысисны, и Глеб Сергеевич шыасис: — Тэ пӧнимайтан, мӧд рыт нин жӧйялӧ миян ӧдзӧс дорын. А Галка преспокойнӧ мӧд зонкӧд кӧнкӧ ветлӧ. Чӧртовка! Ме нин шуа зонмыслы, мися, дыр Галинаыд оз лок, мун гортад. Либӧ, чёрт возьми, мӧд нывкӧд лэччы паркӧ гуляйтны! А сійӧ: ог пӧ, Галинаыд тшӧктіс виччысьлыны. Буракӧ, вок сійӧ тэнад? Пыр висьтав, мед йӧй русӧ оз пес. Миян Галкаыд тальӧдас сійӧс ас кок туяс!

Виктор нинӧм эз шыав, думыштіс сӧмын воча вок йывсьыс: «Ок, Мишка, помнитан, пыр ошйысьлін, нывтӧ пӧ ылӧдны — ӧтчыд синмӧн лапнитны сӧмын мем».

Недыр мысьт сійӧ шыбитіс куритчансӧ, чеччис да гораа дакнитіс:

— М-да... Пыра ужнайтны да кӧть Мишаӧс чукӧстла, — шуис сійӧ.

— Вот именнӧ! — мыйлакӧ горӧдіс Глеб Сергеевич да весиг лэптыштліс чуньсӧ. Сэсся корис ещӧ ӧти сигарет, шуис: — Клиент менам вот-вот должен воны. Сійӧс виччысигмоз тшынасьышта. Ме ӧд рытъяснас практикуйта гортын.

— Мый, мый? — эз гӧгӧрво Виктор.

Глеб Сергеевич восьтыліс вомсӧ да чуньнас петкӧдліс пиньяссӧ:

— Протезируйта...

Марина баб пукаліс балкон ӧшинь дорас да кыис Витюшыслы тӧв кежлас шоныд свитер. Нэмсӧ уджалысь киясыс сылӧн век зэв зільӧсь, кысян емъясыс быттьӧкӧ асьныс и ветлӧны, нокӧны шӧртсӧ петля бӧрся петля. Шӧрт мозыс жӧ дугдывтӧг кысьысьлӧн лювгис и синваыс. Кор сійӧ ёна нин мешайтліс видзӧднысӧ, бабӧ копыртчыштлӧмӧн чышкыштліс синвасӧ бӧждорнас да дугӧдліс кысьӧмсӧ, пондыліс видзӧдны ӧшинь пырыс ывла вылас. Сэсянь кыліс челядь чилзӧм да мотоцикл таргӧм шы, тыдалісны пашкыр юра топольяс, еджыд кока кыдзьяс. Кымын во нин видзӧдіс Марина пӧч ӧшинь пырыс на вылӧ...

Волісны карас найӧ войнаӧдзыс на. Муртса и овмӧдчисны пу керкаын ӧти жырйӧ. Нажӧтка ни патера эз кольлы верӧсыс война вылад мунігӧн. Сиктад вӧльнӧя олӧм бӧрад делӧ вӧлі велавнысӧ дзескыдінад, да велалан тай быдторйӧ. Став сьӧкыдсӧ кыскыны велавлісны. Слава богу, Степаныс ловъя локтіс. Бӧр важ местаас, Минфинас, уджавны пырис. И патера сетісны налы выль керкаысь. Кык жыръяӧс. Олӧм пуксис — сьыв да ов. Степаныс — рам мужик, нажӧтка вайӧ. Микайлӧ пиыс ФЗУ помаліс, ас нянь вылӧ петіс, регыд гӧтрасис да аслыс керка карас пуктіс. Аннаыс кооперативнӧй помаліс, сиктӧ уджавны индісны. Верӧс сайӧ сэні петіс. Марина баб сӧмын нин гаж ради уджалыштіс кокни уджъяс вылын садикын да яслиын. Ставыс бур йӧзыслӧн моз жӧ вӧлі, кытчӧдз Анна эз йӧймы. Сё трасичаыд, сійӧ пышйӧма верӧс дорсьыс, кагасӧ эновтіс бать-мамыслы, ачыс кытчӧ и шутёвтіс-муніс. Во эз петкӧдчыв. Сэсся эськӧ локтіс жӧ кага дорас да прамӧя эз жӧ нин видзӧдлы. Минфинад пырис уджавны да командировкаясті ӧтарӧ ветліс. Марина баблы и ёнджыкасӧ сюри быдтысьӧмыс.

«Аслам быдтас, лабутнӧй тай зонкаыс, пӧрысьма да, оз жӧ кут ӧбижайтны», — тшӧкыда думайтліс бабӧ да кутіс надея внукыс вылӧ.

А со, и надейтчы! Асывнас удж вылас мунігӧн Аннаыс шуис, эм пӧ зэв серьёзнӧй сёрни, да ог пӧ эшты ӧні, бӧрти рытнас сёрнитыштам. А удж вывсьыс воӧм бӧрын пыр и паніс. Гӧлӧсыс мелі, абу тракайтчысь мукӧд лунся моз. Анфисаясыдлысь пӧ керкасӧ косявны кӧсйӧны, тэныд пӧ быть колӧ сэтчӧ пропишитчыны да олыштны. А тані пӧ Викторлы кабинет лӧсьӧдам, мед велӧдчас.

Мед эськӧ, мед велӧдчас и мед, колӧкӧ, кабинет лӧсьӧдасны. Абу паныд Марина баб. Дай Анфиса гозъя примитасны. Но сэні ӧд абу нин ачыд кӧзяйка, сэні ӧд патераын кодь олӧмыс лоӧ. Дась пуӧм-пӧжалӧм ковмас сёйны, дась мыськӧм-песлалӧм кӧлуй пасьтавны. Анфисаыд сійӧ оз лэдз некодӧс ас пач вом дорас...

Виктор пыртіс Миша воча воксӧ буретш сэки, кор бабыс лимзӧмӧн бӧрддзис.

— Бабук! Тэ кӧні? Ми Мишакӧд локтім! Кынӧмным сюмалӧ! — пыригмоз шыасис Виктор да, бабсӧ аддзӧм бӧрын, ставнас шенмуні. — Бабук, бӧрдан тай нӧ! Мый лоис?

— А нинӧм, дитя, — синвасӧ чышкигмоз шуис бабыс. — Сідз, мыйя думыштчи да, синваӧй петіс, дедтӧ, поконикӧс, гарышті.

— Дедтӧ? О, дедукӧс ме помнита на бура! Вуграсьны вадорӧ лэччывлім... Бабук, висьталышт мыйкӧ дед йылысь, ми Мишакӧд кывзыштам.

— Мый нӧ дед йывсьыд висьтавны? Асьныд сійӧс помнитанныд на да, — ышловзьыштіс бабыс.

— Но, кыдзи тӧдмасьлінныд да кыдзи окасьлінныд, — отсыштіс бабыслы Миша, шнёпкысис-пуксис диван вылас, лӧсьӧдчис, быттьӧкӧ, кывзыны.

— А кыдзи, дитяяс... Комилес кантораын. Сплав вылысь локтім, пырим кантораас нажӧтка пӧлучитны. А меным шуӧ: абу пӧ тэд. Кыдзи абу?! Забеднӧысла пыр и бӧрддзи. А сійӧ, дедыд, щӧтӧвод сэні, этатшӧм мича ныв пӧ бӧрдан! Гижам, уджалін кӧ! Кыдзкӧ сідзи и сэсся артмис. Гӧтрасимӧ. Ой, лӧсьыд да лабутнӧй вӧлі, а окасьӧмтӧ ог тай помнит...

Тайӧяслы ӧд оз висьтав, мый дедыс кык челядя дӧвеч вӧлӧма. Тайӧяслы ӧд оз висьтав, кутшӧм яр биӧн ӧзйис на костын радейтчӧмыс и кутшӧм яра паныд сувтісны мам-батьыс и рӧдвужыс. Дӧвеч сайӧ пӧ, кык челядя сайӧ пӧ он жӧ пет! А петіс, петіс, мырдӧн петіс! Судьба аслыс корсис.

Марина баб кватитчис да век пукалӧ. Шлопкис кинас пидзӧсас, чеччис:

— Ті ӧд, дитяяс, сёйны шуинныд. Энлӧ, ме тіянлы картупель жарита.

— Тэ, бабук, пукав, пукав, ми асьным жаритам, — шуис Виктор да чукӧстіс воксӧ сьӧрсьыс: — Лок, Миша!

Регыд ӧдзӧсас звӧнитісны, Марина баб петіс восьтыны.

Локтіс Аннаыс, сетка тыр мыйкӧ бумагаӧн гартыштӧм нюшкис-пыртіс кухняас. Брунгис сеткасӧ джоджас, ачыс шлопкысис-пуксис улӧс вылӧ:

— Уф, лов петіс! Яй консерв судзӧдім Маргокӧд. Виктор, вай ректы шкапад... Мый нӧ асьныд картупель чиститанныд? Ыждалӧ ли мый бабыд, оз кӧсйы вердны?

— Мыйла ыждалӧ? — шыасис Виктор. — Асьным ог ли мый вермӧй?

— Верманныд эськӧ да... Ме чайті, тіян вылын тшӧтш зуйялӧ. Ме тай ӧнтай висьталі сӧмын, мися, колӧ тэд Анфисаясад олыштны. А сійӧ сразу дузгысис, быттьӧ ме вӧтла сійӧс гортысь. Быттьӧ пи-монь дорас муссӧ кутас сылысь зыртны.

— Миянӧ мунӧм вӧсна ли мый бабукыс бӧрдӧ? — пыр и эновтіс Миша картупель чиститансӧ, сибӧдчис бабыс дорӧ. — Чайтан, миянын тэд омӧль лоӧ? Эн пов, бабӧ, ог ӧбидитӧ. Нинӧм ог тшӧктӧ вӧчны ни. Коркӧ кӧ гач меным гладитыштан и. — Сійӧ хикнитіс-серӧктіс, сэсся содтіс: — Мем аслым зэв дыш.

Викторлы тайӧ эз кажитчы, мисьтӧма дзоркнитліс вокыс вылӧ, юаліс:

— Тэ кыдзи шуин? Гач тэд гладитны?

Миша пыр и эновтіс бабсӧ, бӧр веськӧдчис картупель весавны.

— Мый ме вылӧ сідз сувтӧдін синтӧ? — шыасис Виктор дорӧ. — Ме прӧста сідз шуи. Мамыд тай то висьталӧ...

Виктор нерыштіс сійӧс:

— «Мамыд тай то висьталӧ». Мамыд мый оз висьтав да! Ме вот некыдз ог гӧгӧрво, мыйла бабыслы колӧ тіянӧ мунны? Аслас сылӧн эм гортыс да. А, мамӧ?

Викторлӧн, буракӧ, скӧр лои чужӧмыс. Мамыс тай нинӧм шыавтӧг видзӧдіс-видзӧдіс пиыс вылӧ да сэсся ырскӧб чеччис улӧс вывсьыс-а. Скӧрысь шуис:

— Да матере, олӧй, колӧкӧ, асланыд жырйын, кыдз кӧсъянныд! Мися, университетӧ велӧдчыны пырас, письменнӧй стол да книжнӧй шкап ковмас. Тэныд жӧ бур вылӧ кӧсйи-а... Оз кӧ ков...

— Оз ков, мамӧ, меным ни шкап, ни пызан. И университетӧ ог пыр велӧдчыны. Ми Ванякӧд договоритчим нин: кута накӧд мебельнӧяс уджавны и рытнас лесотехническӧйын велӧдчыны. А дзескыд кӧ тэныд, верма и общежитиеӧ вуджны.

Мамыс шлопкерис кинас бокас:

— О господи, код рӧдӧ тэ рӧдйӧмыд?! Общежитиеӧ пӧ! Мед йӧзыс сераласны? Ӧтка писӧ пӧ вӧтлӧмны общежитиеӧ.

— А мамтӧ вӧтлӧмысь йӧзыс оз кутны серавны?

— Коді нӧ мамсӧ вӧтлӧ? Да мый тіянкӧд сёрнитны... Ваняясӧ петавлан. Бур вылӧ сэн велӧдасны. Кагаа баба вылӧ на ещӧ гӧтраласны...

Ропкӧдчигтыр мамыс уйкнитіс кухнясьыс да, кылӧ, чуткис телевизор.

Мӧдіс ӧдзӧслань и Миша.

— Миша, тэ кытчӧ? Жаритӧм картупельтӧ эг на сёйӧ да, — чукӧстіс Виктор.

— Муна, — Миша шеновтіс кинас ывлалань. — Ті мыйя пинясянныд да. Мем ӧні ньӧти абу окота баситӧм ныр-вомнас ветлыны: гӧтрасьны кӧсъя. А этайӧ то...

Миша петіс. Бабыс, шай-паймунӧма, сулаліс кухня ӧшинь дорас да тілис синсӧ.

— Но вот, бабӧ, — шмонитіс Виктор, — ушумгайтчисны! Миянлы унджык жаритӧм картупель вичмас.

Бабыс нинӧм эз шыав, видзӧдіс кытчӧкӧ ӧшинь саяс, и тӧрыт на томлӧн кодь визув синъясыс сылӧн ӧні вӧліны кык ичӧтик гудыр ва войтъясӧн.

Викторлӧн нюкыртчис сьӧлӧмыс. «Мый нӧ тайӧ ме вылӧ став шогыс друг валитчис? Наташакӧд лӧгасим, мамӧ дӧзмис, Миша, со, муніс дӧзмӧмӧн жӧ. И бабӧ весиг оз сёрнит».

Сійӧ эновтіс картупель жаритӧмсӧ, сувтіс бабыскӧд орччӧн да пондіс ӧшиняс жӧ видзӧдны.

Быттьӧкӧ и эз ёна дойд Наташаӧс Викторкӧд лӧгасьӧмыс. Пӧдруга ордас воис, пыр жӧ тшӧктіс пластинка пуктыны, чеччаліс-йӧктіс бурпӧт, сэсся вӧзйис Мичуринскӧй паркӧ ветлыны. Тӧлысь пӧ пӧшти огӧ лоӧй асланым карын да огӧ на жӧ гортӧ мунӧй, гуляйтыштам ещӧ.

— Тэ, нывкаӧ, мыйкӧ талун зэв ыззьӧмыд. Висьтав, мый лоис? — юаліс Лена чойыс, кор нин найӧ кутісны локны гортас.

— Нинӧм эз.

— Висьтав, висьтав...

— Но... Викторкӧд лӧгасим, — скӧрысь горӧдіс Наташа. — Но мый, бурмис сьӧлӧмыд?

— Кысь, мися, миян дорӧ воин да... Ёна ли мый нӧ лӧгасинныд? Мыйысь?

Наташа друг сывйыштчис чойыс дінӧ да пондіс синваӧн бӧрдны.

— Но йӧюкыс. Бӧр бурасянныд. Эн бӧрд, — такӧдыштіс чойыс, но мӧдыс эз лӧнь, бӧрдіс ичӧтик кага моз, кулакъяснас синсӧ тілигтыр.

Сідзи найӧ и воисны асланыс подъездӧдз. Лена чирыштіскодь чойсӧ:

— Мамӧтӧ повзьӧдан, гортын кӧть эн бӧрд. Вай чышкы чужӧмтӧ да нюмдышт. — Наташа и збыль нюмдыштіс да шуис:

— Абу мамыд гортын. Дежуритны тарыт муніс, медым аски миянӧс колльӧдны вермис. Звӧнитліс мем удж вылӧ.

— Но и мед абу кӧ. Всё равно дугды бӧрдны. Суседъясӧс, со, садьмӧдан, узьӧны нин ставыс. — Подъезд и збыль узис. Лӧньӧм пос кузя найӧ кайисны асланыс ӧдзӧс дорӧдз, кӧн виччысис найӧс Викторлӧн запискаыс.

Первойсӧ лыддис Лена, сэсся Наташаыс. Лена босьтчис серавны, шмонитны чой вылас. А Наташа лыддис и лыддис уна пӧв, быттьӧ нинӧм сэтысь эз гӧгӧрво.

Сійӧ дыр на эз вермы унмовсьны-лӧньны, но кыдз унмовсис, пыр и заводитіс лэбавны.

Вӧтнас лэбаліс и Виктор. Сӧмын эз Наташа моз бордъяс вылын, а парашютӧн. Кык вонад, буракӧ, вемас и куас нин пырӧма десантнӧй войскаас службаыс. Шоч вой оз вӧтав самолётъяс да парашют. То быттьӧ десантируйтӧны гырысь самолётъяс пытшкысь, то тшын-бус тӧвзьӧны нин сійӧ машинаяс вылас, то виччысьӧны боевой приказ, то стрельбищеын нин сяркӧдӧны-лыйсьӧны. И тавой сійӧ лэбаліс жӧ парашютӧн. Но мыйлакӧ парашютыс эз кӧсйы пуксьыны муас, и тайӧ зэв ёна шогӧдіс салдатӧс. Ӧд та дыранас ставныс нин ёртъясыс пуксисны, колӧкӧ, виччысьӧны Викторӧс. Мыйкӧ маитчис жӧ. А вӧлӧмкӧ, важӧн нин пукалӧ боевӧй машина пытшкас. Сійӧ жӧ затяжнӧй прыжок вӧчис. Ӧні сійӧ шогсис мӧдторйысь нин. Мыйла ёртъясыс сы дыра оз локны? Гашкӧ, найӧ индӧминсяньыс ылӧ пуксисны да оз аддзыны машинасӧ? Гашкӧ, колӧ пальнитны пушкасьыс? Виктор кутчысис нин боевӧй орудие дорас, но друг кодкӧ лапкис сылы пельпомас да комбат гӧлӧснас шуис: «Эн виччысь, некод оз лок. Тэ жӧ тӧдан, вӧйис миян машинаным йи улас, ми эг выполнитӧй боевӧй задание!» Виктор аддзис комбатсӧ и шемӧсмис. Сы водзын сулаліс шынеля да красноармейскӧй шлема Павка Корчагин. «Ой, Корчагин! Тэ ӧні миян комбатыс? Разрешите обратиться, товарищ комбат. Кор торъялінныд Рита Устиновичыдкӧд, тэныд зэв шог вӧлі? Ми Наташакӧд лӧгасим...» «Разговорчики!» — стрӧга чирыштіс Павка Корчагин, а сэсся мыйлакӧ кутіс серавны. Сераліс зэв дыр, но тайӧ эз нин вӧв Павка, вӧлі Миша. Виктор, вылӧ чуньнас индігтыр, шуаліс: «Ыджыд шогыд кӧ абу, ичӧтсьыс шогсьы, шогсьы! Менсьым, небось, он юав...»

Татчӧ Викторӧс садьмӧдісны. Садьмӧдысьыс вӧлі Миша воча вокыс. Сійӧ сулаліс Виктор раскладушка дорӧ кок пӧвсӧ лэптӧмӧн да жервидзис:

— Эта дыра узян! Дыр тай гуляйтӧмыд тӧрыт!

— Гуляйті! А тэ мый татшӧм водзыс ветлан? Сэтшӧм вӧт вӧталі, торкин.

— Во-о-дз? Ме, брат, рейсын нин. Мамӧӧс татчӧ вайӧді дай дачаӧ на найӧс журкнита-нуа!

Викторлы и збыль кыліс Анфиса тьӧтыслӧн гӧлӧсыс:

— Давай, давай, пасьтась, ветлам. И Викторыд, окотитас кӧ, мед мунас. Миян сэн лӧсьыд...

Виктор звиркнитіс вольпасьсьыс. Сылы мыйлакӧ кажитчис, мый мунас кӧ бабыс, сэсся оз нин некор волы. Гашкӧ, ветлыны тшӧтш дачаас да? Сэні Микайлӧ дядьыс и быдӧн. Но уськӧдіс тӧд вылас, мый талун Наташаыс мунӧ, и эновтіс тайӧ мӧвпсӧ. «Аэропортас кӧть аддзӧдла».

Аэропортад йӧзыд пыр зэв уна шуксьӧ. Ӧтияс воӧны, мӧдъяс мунӧны. Стекляннӧй ӧдзӧсъясыс оз и удитны пӧдлассьывны, гычасьӧны ӧтарӧ-мӧдарӧ йӧз пырӧм-петӧмысь.

Не кӧ Глеб Сергеевич, Виктор эськӧ эз на другӧн аддзы корсянторсӧ. Кытшовтіс залсӧ кыкысь, нывъяс эз вӧвны некӧн. Мӧдіс вывлань катӧдысь послань и аддзис Глеб Сергеевичӧс — пукалӧ, газет лыддьӧ.

— Глеб Сергеевич, — радлыштіс Виктор. Сійӧ эз лыддьы коланаӧн дзебны Наташа дорӧ локтӧмсӧ да пыр жӧ юаліс: — Найӧ кӧнӧсь?

— Мамсӧ встречайтны, буракӧ, петісны.

Виктор жугыльмис. «Ӧдвакӧ меным вичмас кад Наташакӧд сёрнитыштны, — думыштіс сійӧ да кӧсйис нин чепӧсйыны ывла вылӧ автобус сувтанінӧ, но сэк жӧ аддзис, кыдзи Наташа да Лена, ӧткодь югыд платтьӧаӧсь, нюмъялысь чужӧмаӧсь, восьлалісны зал шӧрӧдыс найӧлань. Кык чой шӧракостын нюмвидзис кыӧм костюма лӧсьыдик нывбаба. «Мамыс», — ыпмуні Виктор да лӧсьӧдчис нин кежыштны бокӧ, но нывъяс казялӧмны сійӧс. Лена весиг шеновтыштіс кинас, чолӧмаліс Викторӧс, а Наташа дзиркнитліс жӧ Виктор вылӧ да яндысьӧмӧн лэдзис синсӧ, пондіс мыйкӧ висьтавны мамыслы да Леналы.

— Со и ми! — матыстчиганыс шыасисны нывъяс. Глеб Сергеевич зэв мудера чӧвтліс синсӧ Виктор вылӧ, шуис:

— И ми, со, танӧсь! — сэсся чеччис да босьтіс вӧвлӧм гӧтырыслысь кисӧ, окыштіс. — Матушкаанӧй, тэ век важ кодь мича! Висьталӧны, дежуритӧмыд.

— М-да, дежуриті, мудзикодь, — шыасис мамыс, мичаа нюмдіс. — Тэнад комплиментыд, чайта, сідз прӧста. Пӧрысьмыны куті... А нывкаяс менам талун сэтшӧм кыпыдӧсь! Неужели, мися, гортысь мунӧны да сійӧн? Вӧлӧмакӧ, миленькӧй папочкаыс тан!

Тайӧ кадас висьталісны, мый заводитчӧ регистрация, и ставныс тэрмыштчисны, — весиг Наташалӧн мамыс, коді муртса удитіс пуксьыны скамья вылӧ, бӧр чеччис. Виктор дзикӧдз шогӧ усис. Сійӧ бокӧвӧй моз сулаліс тайӧ семья дорас да мый вермис кыйис Наташалысь син видзӧдлассӧ. А сійӧ, буракӧ, яндысис мам-бать дырйиыс веськыда видзӧдлыны зонмыс вылӧ. «А колӧкӧ, эз кӧсйы? А оз кӧ кӧсйы?» — мучитчис Виктор. Мездіс сійӧс Лена, дай кутшӧм кокниа на мездіс! Кватитіс ӧти чемодан, мыччис Викторлы, мӧдсӧ босьтіс ачыс, а мам-батьыслы шуис:

— Ті тані пукавлӧй. Ми чемоданъясӧс сдайтам да бӧр воам татчӧ.

«Ӧні позьӧ сёрнитыштны», — радлыштіс Виктор да чепӧсйис чемоданнас кык чой бӧрся. Но он на тай! Кыськӧ ныв чукӧр уськӧдчисны, кытшалісны кык чойӧс:

— Кӧні ті ветланныд? Регистрация важӧн объявитісны!

Викторлӧн весиг лӧгыс кутіс петны нывъяс вылӧ. Но недыр кежлӧ кольлісны жӧ тай найӧс ас кежаныс Наташаыскӧд.

Быттьӧ ичӧтик нывка да зонка сулалісны найӧ ки на ки кутчысьӧмӧн аэровокзал паськыд ӧшинь водзын да ланьтӧмӧн видзӧдісны, кыдзи ӧтторъя пуксьӧны да лэбзьӧны выльысь-выль самолётъяс. Ӧти на пӧвстысь регыд лэбӧдас и Наташаӧс. Лэбӧдас ылӧ и зэв дыр кежлӧ. Тайӧс найӧ висьтавтӧгыс кыкнанныс тӧдӧны. Мыйла ковтӧм сёрни вылас кадсӧ видзны? Сійӧ и сідз зэв этша коли. Йитӧм киясас тёпкӧдчысь вирыс висьталас ӧта-мӧдыслы унджык.

Аэропортсянь Виктор да Глеб Сергеевич мӧдӧдчисны ӧтлаын. Восьлалісны нинӧм шыавтӧг.

Магазин дорті муніг друг вӧзйис Глеб Сергеевич:

— Гашкӧ, пыралам, коньяк доз босьтам?

Виктор паныд лои, дай Глеб Сергеевичӧс на ӧлӧдыштіс: тіянлы пӧ ӧд удж вылӧ мунны.

— Э-э-э, удж вылад ещӧ ӧбед бӧрын на! Пакталас на, — гажаа ӧвтыштчис Глеб Сергеевич да зымгис кулакнас Викторлы морӧсас: — Молодеч! Оз кӧ кыскы, эн и видлась! А Наташасӧ менсьым — радейт, нывкаыс сійӧ авъя зэв. Куимнанныс найӧ авъяӧсь. Сӧмын ме... Да мый сэні... Извинит, ме пырала. — Сійӧ мӧдӧдчис ыджыд восьласӧн магазинлань. Со нин, воис кильчӧ помас, кайис поссӧ, регыд бердас паськыд ӧдзӧс саяс. Виктор колльӧдіс сійӧс синнас да думайтіс: «Менам кӧ рӧдимӧй бать вӧлі, вӧтчи эг эськӧ сы бӧрся? А колӧкӧ, куті пырӧмсьыс? Уджалан лунӧ коньяк юны...»

Виктор мышкын тутӧстіс машина да дзик сы бокӧ пырысь-пыр и дзумнитіс-сувтіс ящик кодь кузова «Москвич». Восьса ӧшинь пырыс сылы шензис катшасинъясӧн Галина. А Миша пыр жӧ восьтіс ӧдзӧссӧ да гоньгӧдіс юрсӧ.

— Привет, вокӧ! Мый тані гоньялан?

— Магазинас пырис ӧти тӧдса, да сійӧс виччыся, — вочавидзис Виктор.

— Татшӧм мича лунӧ он жӧ магазинъясті ветлы! Ми купайтчанінсянь локтам! — бырс петіс кабина пытшсьыс асфальт вылӧ Галина.

— Мишаыд ӧмӧй талун оз уджав? А Миша, он ли мый уджав? — юаліс Виктор.

— Уджыд сійӧ оз пышйы, абу вӧв! — серӧктіс Мишаыс.

Виктор дивитана видзӧдліс Галина вылӧ, шуис:

— Но и Галина, тэ тай бур гейша вӧлӧмыд.

— Мый, мый? — юаліс Галина.

— Гейша, мися. Мужичӧйясӧс ыджыд подвиг вылӧ ышӧдысь инӧ.

— М-да, ме сэтшӧм, — вужынь-вежынькерис Галина бекнас, ниртчыштіс Викторлы бокас. Виктор сійӧс сывйыштліс, меліа шуис:

— Лэдз Мишасӧ, мед мунас, уджалас. Тэ, со, батьтӧ гортад колльӧд.

Коньяк дозйӧн киас, петіс магазинысь Глеб Сергеевич зептас дозсӧ сюйигмоз, сійӧ буретш матыстчис том йӧз дорӧ.

— Галка! Тэ кытысь татчӧ усин? — шыасис сійӧ ныв дорас.

— Метӧ уси, а тэ мый магазинъясті ветлан? Бара юны кӧсъян?

— Талун позьӧ, Галка. Муртса нывъясӧс колльӧді.

— Ах, с горя, инӧ, ті... Гӧгӧрвоана. Виктор, тэ нӧ кодсӧ колльӧдін, Ленасӧ али Наташасӧ?

— Кыкнансӧ, — серӧктіс Виктор.

— Ӧні, сідзкӧ, менӧ колльӧд. Мунам да гортын папалысь дозсӧ ректам.

— Ме тай шулі нин, мися, тэд ковмас паптӧ ӧтнадлы колльӧдны. Мед менӧ Мишаыд дачаас тӧвзьӧдлас. Бабӧ менам сэн. Ветлам, Миша, ваям бабӧӧс. Тэ он жӧ нин уджав-а...

Миша вак-вакӧн серӧктіс:

— Менсьым мырддясны? Оз на! Шуа, мися, жугавлі дай. Ас йӧз менам сэтӧн. Вай пуксьы, гӧнитӧдла, кӧсъян кӧ!

Виктор мӧдысь тшӧктӧм эз виччысь, тюркнитіс «Москвич» кабинаӧ, сысянь шеныштіс кинас Галиналы.

Галина брызь шыбитіс катшасин букетсӧ машина кӧлеса улас.

— Но и весасьӧй! — сідзи и скӧралан коли. Миша вылӧ ли Виктор вылӧ, а колӧкӧ, и Глеб Сергеевич вылӧ, коді думнас ошкис зонъясӧс да эз дзеб ассьыс думъяссӧ и Галина водзын.

Татшӧм пӧсь сёрнинас, сьӧлӧмсянь петан сёрнинас баба-внука эз на удитлыны сёрнитны Виктор воӧм бӧрын. И со, талун, дачасьыс воӧм бӧрын, и пансис. Заводитіс бабыс:

— Витюш, тэ эськӧ он тшӧкты, да ме шуи мунны Микайлӧ гозъя дорӧ.

— Бабӧ! Мый тэ сёрнитан? — чирыштчис бабыс вылӧ Виктор. — Тэ кӧ мунан гортысь, и ме муна жӧ! БАМ-ӧ шутёвта!

— Чӧ-ӧл, пиук, гортын ов! Лючки ов! Верӧсыскӧд овны мамыдлӧн чассьӧыс эз ло, да мед кӧть пиыскӧд олас. Эн дзерӧд мамтӧ.

Виктор тшӧкмуныштіс:

— Ме ӧмӧй дзерӧда! Сійӧ тэнӧ дзерӧдӧ.

— Ой, эн шу сідзтӧ, — кевмысьыштіс бабыс.

— Кыдзи нӧ, дзерӧдӧ и эм да! — Виктор скӧрмискодь. Водзті тай нӧ тӧрлім. Ӧні сэсся огӧ тӧрӧй ли мый? Тэ, бабук, зэв кокниа миритчан ставыскӧд. Тэнӧ, кӧнкӧ, пыр ӧбижайтлісны.

Бабыс нюмсермуніс, вочавидзис:

— Эз пыр. Абу ӧд ставыс лёк йӧз. Ӧтчыд сӧмын. Ё-ёна ӧбӧдитлісны! Мися, эм кӧ Енмыс, мед мыждіс жӧ тайӧясӧс, шулі сэк.

— Но и мый, эм Енмыс? Мыждіс? — серӧктыштіс Виктор, кутыштліс бабсӧ косӧд пельпомӧдыс. — Коді тэнӧ сідзсӧ ӧбидитліс?

— Эмӧсь тай... Тэ, кӧнкӧ, помнитан на, ичӧтик садикад тай уджавлі.

— Помнита, дерт. А код тэнӧ ӧбӧдитліс?

— А завыс да пӧварыс. Гусясисны зэв ёна. А ме паськыд вомнад ӧтчыд кайтышта, мӧдысь, мися, абу ладнӧ тадзтӧ. Найӧ и решитасны меысь мынтӧдчыны. А кыдзи на ещӧ и мынтӧдчан? Ме ӧд бура уджавлі, бура уджалысьтӧ он на другӧн вӧтлы. Вот и думыштӧмны пеж ногӧн... — бабыс дзӧрӧдыштіс юрнас, кузякодь ышловзис. Викторыс сійӧс тэрмӧдлыштіс:

— А кыдзи, бабӧ, пеж ногӧныс?

— Пеж ногӧныс кыдзи? — тайӧ юалӧмнас водзӧ нуӧдіс бабыс висьтсӧ. — Локті ӧти асылӧ удж вылӧ, а пӧварикаыс ме дорӧ гӧрд вина дозйӧн да мелі кывйӧн. Чужан лун пӧ талун менам, ыдждӧдлыштам пӧ вай именничасӧ. И мыччӧ румка, чурснит пӧ. Ой, мися, коддза дай уджавныд ог вермы. А сійӧ: Ӧтисьыд пӧ нинӧм он ло. Юышті. Сійӧ мӧдӧс кисьтіс, мӧд син пӧвтӧ пӧ быть, он кӧ менӧ брезгуйт да радейтан кӧ. А ме ӧд сэтшӧм мортыд, пӧслукман. Юи и мӧдтӧ. И друг сэтшӧма коддзи. Спиртӧн, буракӧ, сорлалӧмны. А налы тайӧ и колӧ. Ӧдйӧджык мунасны дай чукӧстасны родительскӧй комитет. Со пӧ, видзӧдлӧй, быд лун тадзи кодалӧ...

— А тэ, бабӧ?

— Мый ме... — бабыс курыда нюмдыштіс. — Мӧд детсадйӧ сэсся муні. Пензия вылӧ петтӧдз сэн уджалі. Грамота на сетлісны и...

Виктор зымгыштіс кулакнас пызанас:

— Эк, бабук! Асьтӧ эн дорйышт и найӧс эн накажит?

Бабыс вочавидзис:

— А ме, дитяӧ, ачымӧс бур уджӧн сӧмын и кужлі дорйыныс. А найӧ — асьнысӧ асьныс и накажитлісны. Сюрлӧмны вӧлі. Менӧ свидетельӧ и быдӧн чукӧстлісны судӧ. Мый ме вылӧ сідз видзӧдлін? Эг сюй ме найӧс суд вылас ни. Шуи сӧмын: Ме, мися, важӧн накӧд ог уджав, юасьӧй, кодкӧд ӧтлаын уджалӧны.

— Бабук тэ, бабук! Миянлы некор эн и висьтавлы та йылысь.

— А мыйла висьтавнысӧ? Тіянӧс тшӧтш тревожитнысӧ. Дедыдлы весиг эг висьтавлы. Ачым мыжаыс да. Эг ӧд дас сизим арӧса вӧв, позис и аслым тӧдны, кодлысь именничасӧ ыдждӧдла. Мый сы йылысь ӧні гаравны? Важӧн кольӧма. Медым ті энӧ ылалӧй сэтшӧмъясыскӧд. Мамыд мыйкӧ ёна кутіс Маргокӧд пӧдругаасьны. Мед эськӧ лэчкӧ эз жӧ шедны... Талун, со, яй консерв судзӧдӧны Маргокӧд, аски — мыйкӧ мӧдтор... Пола... Сэсся нылыс мыйлакӧ тэ дорӧ котралӧ и. Мед эськӧ оз жӧ смилит колип гӧлӧснас да краситӧм чужӧмнас.

— Ой, бабук! — Виктор гажаа серӧктіс. — Ме вӧсна эн пов! А вот Мишатӧ смилитӧма. Со, и ӧні петіс миянысь, кӧнкӧ, бара найӧ ӧдзӧс дорын жуйялӧ.

— Ой, сьӧлӧм поті! Збыль ли мый? Мишукыс ӧд менам рӧдимӧй жӧ. Мед оз жӧ Галина вылас гӧтрась.

— Эн пов, бабӧ, оз Галинаыд Миша саяд мун. Ворсӧдчыштас дай эновтас.

— Кыдзи ворсӧдчыштас дай эновтас? Миянлысь Мишуксӧ? Тэ, дитяӧ, тшук кӧ тадз, сёрнитлы Мишаыскӧд. Вок ӧд...

— Мем тай делӧ...

— Чӧ-ӧв, эн сідзи шу.

— Заводитлі ме сёрнитны. А Мишаыд шуис: аслыд пӧ тэд Галинаыс кажитчӧ, да кӧдзӧдны ме дорысь кӧсъян. Ме бара-й ог сэсся суитчы, мед йӧй русӧ песас. А колӧкӧ, и лӧсьӧдчасны дай гӧтрасясны. И тэ на налысь кагасӧ кутан видзны. Мӧдан тай на ордӧ.

Бабыс лӧвтыштіс, чӧвтіс пернапас:

— Господьӧй-енмӧй, берегит и кранит...

Мый тайӧн кӧсйис шуны бабыс, Виктор сідзи и стӧчасӧ эз гӧгӧрво.

Тося да Ваня уджалӧны разнӧй цехъясын да смена помасьӧм бӧрас век виччысьӧны ӧта-мӧдсӧ кильчӧ помас, фабрикаӧ пыранінас. Сэні вӧсньыдик кыдзьяс пӧвстын сулалісны югыдвижӧн краситӧм скамьяяс, позис пукалыштны-шойччыштны. Лак да краска дука цех бӧрад рай кодь на тані и вӧлі.

Талун Ванялӧн водзджык лои петӧма. Тосясӧ, кыдз цехса комсомольскӧй нырщикӧс, чукӧстісны партком вылӧ да ӧдвакӧ дзик пыр петас. Ваня тайӧс тӧдіс. Бура дыр сійӧ ветлӧдліс ӧтарӧ-мӧдарӧ из плитаӧн вольсалӧм кильчӧ водзтіыс, сэсся пукалыштіс скамья вылас. Жалитіс, мый сьӧрсьыс книга абу, лыддьысис эськӧ пӧттӧдзыс. Медбӧрын сійӧ чеччис пукаланінысь да муніс яръюгыд дзоридзьяса град дорӧ, пондіс копыртчыштӧмӧн видзӧдны. Сэки и чукӧстіс сійӧс Тосяыс:

— Вань, тэ менӧ виччысян?

— Виччыся, дерт. Мый сы дыра?

— Партком вылын жӧ вӧлі.

— Тӧда: партком вылын. Мый йылысь сы дырасӧ сёрнитінныд?

— Кыдзи мый йылысь? Квартал помассьӧ. Сэсся турун пуктан кад локтӧ, совхозӧ бара ковмас мунны.

— А-а, да, — сӧгласнӧя гогнитыштіс юрнас Ваня. — Таво бара сійӧ совхозас?

— Кытчӧ нӧ сэсся, асланым нин сійӧ, подшефнӧй да. Вай ми таво вӧзйысям кыкнанным совхозас.

— Кыкнанным? А Денискаӧс кытчӧ?

— Денискаӧс позьӧ мамӧлы кольлыны либӧ, бурджык, сьӧрысь босьтны. Сиктас ӧд детсадйыс эм жӧ.

— А сэтчӧ, чайтан, примитасны?

— Примитасны ӧтитӧ, бура кӧ вӧзъям. Йӧз жӧ ӧд сэні.

— Ог тӧд...

— Мый он тӧд! Позьӧ быдса тӧлысь сиктын овны да видз вылын уджавны, а сійӧ оз тӧд! Йӧюк тэ! Вӧзйысям?

— Позьӧ вӧзйысьлыны. Колӧкӧ, и Виктор миянкӧд мунас. Тӧдан, сійӧ сиктас Викторлӧн батьыс олӧ?

— Да? Тэ кытысь тӧдан?

— Ачыс Виктор висьтавліс... Ме талун кадровикъяс дінӧ пыралі сы кузя сёрнитны.

— Но и мый?

— Тарнӧй цехӧ пӧ колӧны йӧзыс. Ог тӧд, сэтчӧ Виктор сӧгласитчас, оз.

— Мыйла нӧ оз, уджавны кӧ кӧсйӧ? Тэ тай нӧ тарнӧйын жӧ первойсӧ уджалін. Специальносьттӧгыд сразу оз экспериментальнӧй вӧзйыны.

— Сідз эськӧ да... Аскӧдыс рытнас сёрнитлам.

Тадз, варовитігтыр, найӧ воисны автобус сувтанінӧдз. И Тося друг вӧзйис:

— Вань, вай подӧн мунам. Пыралам кутшӧмкӧ кафеӧ, сёйыштам да гуляйтыштам картіыс. Паркӧ вермам лэччывны, мебельнӧйӧ пыравны. Зэв нин важӧн мебельнӧяс, между прочим, эг волӧй. Мем кажитчӧ, кор йӧзыс бергалӧны миянӧн вӧчӧм шкапъяс дорын, малалӧны югыд полировкасӧ, видзӧдчӧны трюмоӧ. Мем сэтшӧм окота налы горӧдны: «Ме ӧд тадзсӧ полируйті. Менам Ванечка тэчис-чукӧртіс торъя пӧвторъясысь этатшӧм мича шкапъяссӧ».

— Но и ыкпаш тэ, Тося, — серӧктыштіс Ваня.

— А мый нӧ кӧть, асланым уджӧн ӧд. Мунам подӧн? — Тося бӧр кутчысис верӧсыслы сойбордас, кыскыштіскодь сулаланінсьыс. — Гортӧ пыра да, син водзын век на быттьӧ Екатерина Ивановналӧн гортйыс.

Магазинӧ буретш вайӧмаӧсь выль мебель партия да ӧдзӧс водзас, дзик пыранінас, и ректӧмаӧсь. Сэні шуксисны йӧз, видлалісны-малалісны полировкасӧ, клопӧдісны шкап ӧдзӧсъяснас, лючкиа-бура-ӧ найӧ пӧдласьӧны-воссьӧны да крепыда-ӧ найӧс йитӧмны-дзиръялӧмны. Тося да Ваня бура дыр тшӧтш бергалісны ньӧбасьысьяс пӧвстын. Налы, дерт, платтьӧ шкап ни стенка оз ков, дзескыд ӧти жыръяд уна он пукты, но видзӧдны, кыдзи йӧзыс бӧрйысьӧны да мыйджык шуасьӧны-сёрнитӧны, вӧлі кыскӧ. Ӧд тайӧ налысь вӧчӧмторъяссӧ видлалӧны йӧзыс. Дерт, шуам, Тося торъя пӧв торъяс сӧмын и полируйтӧ, кӧнкӧ мӧд цехын нин артмӧны тайӧ мича шкапъясыс да трюмоясыс, но кутшӧмкӧ пай эм и сылӧн.

Эз веськодь синмӧн найӧ видзӧдны и павильон пытшкас выставка вылӧ моз паськӧдӧм импортнӧй гарнитур вылӧ. Тані позис пасйыштны да босьтны тӧд вылӧ, мый бурыс да кажитчаныс йӧз муысь вайӧм мебеляс, ӧткодявны асланыс фабрикаса вӧчӧмторъяснас.

Касса дорын пӧрысь пӧчӧ бӧрдан гӧлӧсӧн пинясис магазинса кык вузасьысь нывбабакӧд. Тося да Ваня сувтовкерисны, кывзысьыштісны. Пӧрысь пӧчӧ ӧтторъя лӧсьӧдыштіс чунь помнас ситеч чышъян увсьыс дзор юрси пратьсӧ да топыдджыка зэлӧдліс голя увсьыс чышъян помсӧ, быттьӧ юрсиыс либӧ чышъян помыс вӧліны мыжаӧсь, мый сійӧс эз гӧгӧрвоны этайӧ кык нывбабаыс.

— Мекӧд, пӧрысь морткӧд, дерт, тіянлы неокота сёрнитныыд, — шуаліс пӧрысь бабыс. — Но ӧд ми ичӧт пенсия вылӧ ньӧбим... Сэтшӧм кӧ миянлы веськаліс... Первой луннас и жугаліс да...

— Жугаліс кӧ, ми ли мый мыжаӧсь? Воасны да ыждалӧны... Миянлы кутшӧмӧс ваясны, сэтшӧмӧс и вузалам! — крапкӧмӧн шуис ӧти вузасьысь, том, тшап нывбаба, да пуксис касса саяс, мӧдыс тшӧтш шурк бергӧдчис баб дорсьыд да пырис кытчӧкӧ мӧд жырйӧ нуӧдысь ӧдзӧс сайӧ.

Пӧчӧ, гӧрдӧдӧм, ӧбидитчӧм чужӧма, коли сулалан. Тося да Ваня аддзисны, кыдзи баблӧн дзӧрисны вом доръясыс забеднӧысла. Сійӧс дорйыштӧм могысь Тося шыасис кассирша дорас:

— Мый нӧ пӧрысь мортыскӧд он лючки сёрнитӧй?

— Мый сыкӧд сёрнитнысӧ? Жугӧдасны-жугӧдасны да сэсся татчӧ норасьны воӧны! Мед бурджыка бӧрйисны дай...

Ваня шыасис пӧчӧ дорӧ:

— Бабӧ, мый нӧ тэнад жугаліс? Мый ньӧблін?

Бур кывнад шыасисны да, пӧрысь мортлӧн шорӧн пондіс лэччыны синваыс.

— Ой, бур пи, — шыасис сійӧ, синвасӧ чышкалігмоз, — крӧвать ньӧбим, крӧвать. Войдӧрлун. Асьным ог вермӧй да, ныв гозъя субӧтанас волісны, ньӧбны отсалісны... Дедукыс менам висьӧ-куйлӧ. Сійӧс и водтӧдім сӧмын крӧвать вылас. Жугаліс... Этыяс то шуӧны: асьныд пӧ жугӧдінныд. А кыдзи сэсся асьнымыс...

Ваня дзик пыр мӧвпыштіс, мый крӧватьяссӧ налӧн цехын чукӧртӧны, сідзкӧ, и сылӧн эм мыж, мый бабыс бӧрдӧ. Сылы окота лои ассьыс мыжсӧ кыдзкӧ-мыйкӧ вештыштны, и недыр чӧв олӧм бӧрын юаліс бабыдлысь:

— А ылын оланныд? Ме эськӧ ветлі, видзӧдлі.

Бабыд падмыштіскодь, тільны пондіс синсӧ, эз удит вочакыв сетны. Кодкӧ найӧ мышвывсянь шуис:

— Йӧй старука, нуӧд, нуӧд гортад этайӧ гуськульсӧ! Дедыдлысь на тэнӧ вермас гусявны... Хе-хе-хе!

Мисьтӧм гора гӧлӧс лёкысь ракӧстіс-серӧктіс дзик Ваня мышвылын, и сійӧ жӧ каднас мыйӧнкӧ чорыдӧн зырыштісны сылысь мышкусӧ. Кыліс матьӧктӧм шы. Ваня бергӧдчис и аддзис, кыдзи кык мужичӧй, руд спецовка халатаӧсь да кушенча кепысяӧсь, пуктісны Ваня дорӧ зеркалӧясӧн югъялысь ыджыд, мича шкап.

— Сулаланныд туй вылас, быттьӧ он аддзӧ, — шуис ӧтиыс Ванялӧн стрӧг видзӧдлас аддзӧм бӧрын. Мӧдыс пӧрччис кушенча кепысьсӧ да, дэльӧдчӧмӧнмоз, лӧсьӧдыштіс аслас ныр улысь абутӧм усъяссӧ, мисьтӧма шпыньмуніс. Тайӧ вӧлі Тосялӧн воддза верӧсыс. Мый сылы колӧ? Ванялӧн пемдіс син водзас. Но век жӧ удитіс кыйны видзӧдласнас, кыдзи дрӧгмуніс сы дорын сулалысь тӧдтӧм пӧчыс да, пернапас чӧвтігтыр, петитчыштіс бӧрлань. Колӧкӧ, пӧрысьыд ёна и повзис, со пӧ, лун шӧр лунӧ муртса эз ылӧдны шпанаясыд. Аддзыліс и Тосялысь бледмӧм чужӧмсӧ да тшап кассиршалысь дзирдӧн ловзьӧм синъяссӧ. Ми вылӧ пӧ вувзьысянныд, а асьныд кодъяс на и эмӧсь. Ӧти здукӧн тайӧс ставсӧ кыйис и удитіс вежӧртны Ваня. А сэсся кыліс Тосялысь збодер гӧлӧс:

— Валера, кыдз тэныд абу яндзим? Мыйла нӧ повзьӧдлан пӧрысь бабсӧ? Сійӧ ӧд и збыль чайтас, мый ми кутшӧмкӧ вӧръяс.

Мӧдыс кань моз воча воськов вӧчис Тосялань да, ӧти кинас шкап пельӧсӧ мыджсьӧмӧн, лӧсьыдика легӧдыштіс кокнас:

— А коді сійӧ тэнад? Шуан: абу гуськуль? А гӧтырӧс менсьым эз гусяв?

Ваня муртса и кутіс асьсӧ, медым не уськӧдчыны да кватитны шошаӧдыс этайӧ пеж ловсӧ. Но сылӧн пыр крепыд вӧвлі кутӧдыс. Сӧмын и кыскыштіс Тосясӧ сьӧрсьыс.

— Лок, Тося, мунам татысь. Код вылӧ тэ бур кывтӧ видзан? Гӧгӧрвоас-ӧ?

Найӧ мӧдӧдчылісны нин, но Тосялӧн воддза верӧсыс шамыртіс Ваняӧс пинжакӧдыс.

— А-а, яндзим лои? Пышъянныд! А ті сёрнитыштӧй на мекӧд! Гашкӧ, гӧгӧрвоа...

— Да весась, буди! Тэ код! — тракнитчис Ваня да сідз ӧвтыштіс кулакнас кимльӧскивыв, мый дӧзмӧдчысьыд лёкысь шатовмуні да швачкысис юрнас шкап пельӧсӧ. И пондіс нёрны. А сэсся грымгысис-уси джоджас.

Зыксянінад ӧдйӧ йӧзыд чукӧрмӧ. Пыр и найӧс кытшалісны. Здук кежлӧ пуксьыліс сьӧкыд чӧв-лӧнь, а сэсся напарникыс, юыштӧма жӧ, тыдалӧ, воча вачкерис кушенчаа кинас, шыасис кӧдзыд гӧлӧсӧн:

— Кулі кӧ-а? Кодкӧд ме кута пыртлыны мебельсӧ?

Ваня тойыштіс сійӧс дінсьыс:

— Ме пыртла, зэв кӧ нин... Эн пов, ог пышйы... Тося, звӧнит, кор милициясӧ!

Вӧлись увгӧм шы йӧзыслӧн лыбис. Кодкӧ, кылӧ, жалитіс пласьт усьӧм мортӧс, кодкӧ лӧгпырысь пиняліс Ваняӧс, вот пӧ бандитыд, лыйлыны эськӧ татшӧмъяссӧ, кодкӧ ропкӧдчис, мый пӧ милицияыс видзӧдӧ.

Тайӧ став увгысь шум пӧвстас кыліс Тосялӧн сьӧлӧм дойдана ымӧстӧм. И здук мысти скӧр, гусьӧн пуран гӧлӧс:

— Пуртыс абу сьӧрысь, эськӧ решиті да!

Йӧз бара ставыс, кыдзи ӧти, акнитісны да сявмунӧмӧн сетчыштісны бӧрлань. Пласьтвидзысь морт друг ӧдӧбсьӧмӧн звирк пуксис места вылас да гӧгрӧстӧм кодзлалысь синъясӧн корсьыштіс, буракӧ, Тосяӧс да кирган гӧлӧсӧн равкнитіс:

— Только попробуйт милициясӧ корны!

Но кодкӧ корӧма нин милициятӧ. Туй шӧрас пукталӧм мебель пӧвстті восьлалісны налань кык милиционер.

Другыслӧн милицияӧ веськалӧм йылысь Виктор тӧдмаліс рытнас нин, кор петіс Ваняясӧ пальӧдчыштны.

— Мездыны ӧд колӧ, — Тосяӧс кывзӧм бӧрын ыззис Виктор.

— А кыдзи? — жугыля ышловзис Тося. — Ме ӧд сэки Ваня бӧрся милицияӧдзыс вӧтчылі. Шуисны мем сэн, мун пӧ гортад, разберитчам. Абу кӧ мыжа, ог тані видзӧй. А кутшӧм мыж Ваняыслӧн? Кутшӧм мыж вермас Ваня вӧчны? Тэ ӧд ачыд сійӧс тӧдан. Ме ужын кежлӧ думысь виччыси, мися, ӧд лэдзасны жӧ. А, со, эз лок. Мыждасны кӧ и...

Тося татчӧ бӧрддзис да мый вермис пондіс асьсӧ пинявны да мыждыны. Шудтӧм жӧ нин пӧ ме морт, сымда нин шог вӧчи Ванялы. Виктор бурӧдыштіс Тосяӧс, энлы пӧ на бордныд, лэдзасны. Вай пӧ ме тшӧтш ветла милицияас да сёрнитла.

Рытнад, дерт, милицияад, дежурнӧй милиционерысь кындзи, некодӧс эз аддзыв. Но мунігчӧжыс дасьтӧм пӧсь кывъясыс, тыдалӧ, йиджисны дежурнӧйыдлы, телефон пыр йитчыліс кутшӧмкӧ капитанкӧд. Но мӧдыс эз кӧсйы нинӧм кывзыны, вочавидзис сӧмын дежурнӧй сёрни вылӧ:

— Аски, аски, аски!

Тайӧс Виктор бура кыліс. И шогӧдліс морттӧ. Но асывнас Викторӧс вольпась вывсьыс пальӧдысьнас вӧлі Ваня. Быттьӧ нинӧм абу и вӧлӧма сыкӧд, быттьӧ абу и милицияӧ веськавлӧма, сёрни паніс дзик мӧдтор йылысь:

— Тося тэныд висьталіс эз, ме ӧд пыралі тэнад удж кузя. Тарнӧй цехӧ пӧ колӧны зонъяс аккумуляторнӧй погрузчик вылын уджавны. Кӧсъян кӧ, кӧть талун жӧ, корисны. Ме пета да завтракайтышта, сэсся вермам ӧтлаын и мунны.

Виктор аслас синлы ни пельлы эз эскы, мый, со, сы дінын Ваняыс. Тільыштіс синсӧ, кутчысис другыслы киас:

— Энлы, энлы, Ваня, тэ эн ӧмӧй... Тэнӧ лэдзисны?

— Аддзан тай, — серӧктыштіс Ваня. — Тэныд на ещӧ пӧсь чолӧм капитаныс ыстіс. Оз-ӧ пӧ кӧсйы миянын уджавны тэнад демобилизованнӧй другыд? Миянлы пӧ сэтшӧмъясыс ёна колӧны. Вот, ме и локті висьтавны. Гашкӧ, збыль милицияас мунан да? Думыштлы. А сёрнитныд удитам на. Пета ме, Тося виччысьӧ.

Ваня муніс, а Виктор пырысь-пыр и заводитіс дасьтысьны удж вылӧ. Сылы кажитчис, мый оз кӧ талун сыкӧд мун, бара Ваняыскӧд мыйкӧ лоӧ, вермас воштыны другсӧ.

— Бабӧ, Ваня, со, нуӧдны воліс. Удж вылӧ талун пета, — бабыс дорӧ кухняас пыригмоз, юӧртіс Виктор.

— Талун ли мый нин? Эн на шойччыны удит да? — нормыштіс быдӧн бабыс, пондіс жӧдзны. — Тэ, дитяӧ, инӧ, этайӧ дӧрӧмтӧ пасьтав. Да эн вунӧд босьтны документъястӧ, ковмас, гашкӧ, сэн да. Ок, югыдлун, ас нажӧтка вылӧ мӧдӧдчан! — кайтіс бабыс да мый вермис отсасис внукыслы.

Мамыс садьмис жӧ, петіс аслас жырйысь, тільыштіс пыктыштӧм синъяссӧ:

— Ті мый ноксянныд та водзасӧ?

— А то, пиыд удж вылӧ мӧдӧдчӧ, — юӧртіс бабыс. Шыасис и Виктор:

— Ваня пыраліс нуӧдны.

Мамыс кӧдзыдакодь видзӧдліс Виктор вылӧ, муніс кран дорас мыссьыны да, кылӧ, сысянь ропкӧдчыштіс:

— Бур йӧзыс удж корсьӧны, кӧні выгӧднӧджык, а тэ — бус исавны. Позис ӧд и Мишаыд кодь удж аддзыны. Он мекӧд сӧветуйтчы да.

— Буссӧ кодлыкӧ колӧ жӧ исавны, — серӧктыштіс Виктор. — Менам решитӧма нин да, мый сэсся та йылысь! Талун ветла Ванякӧд-а...

Мамыс скӧрмис. Тэрыба койышталіс чужӧмас васӧ да, ки чышкӧда киас, и уськӧдчис пиыс дорӧ:

— Со тэ кутшӧм! — горӧдіс сійӧ, чужӧмсӧ чышкӧднас ниртігтыр. — Тэнад решитӧма нин! А мамыдкӧд и лыддьысьыштны оз позь? Быдмин!.. Сэсся юасьтӧг-висьтасьтӧг и ичмонь гортӧ верман вайны. Эм пӧ тай... Ачыд эськӧ он висьтась, да бур йӧзыс висьталӧны. Кага видзысьӧс аддзӧмыд.

— Мамӧ! Кутшӧм бур йӧз тэд висьталӧны? Ковмас кӧ, ме ачым ставсӧ висьтала! Но, эм ныв, и ме сійӧс радейта! Мый ещӧ тэд колӧ висьтавны?

Эня-пиалӧн кыкнанныслӧн гораммисны да чорзисны гӧлӧсъяс. Марина пӧч сӧмын нин кывзіс найӧс да мелі гӧлӧснас кайтыштліс:

— Ӧвсьӧй, ӧвсьӧй нинӧм абусьыс вентӧ лэптыны.

— Ачыс тай мам заводитіс, — мыжа морт моз шуыштіс бабыслы Виктор. А Аннаыс пӧкаитчӧм пыдди эльтчыштіс на мамыс вылӧ: тэ пӧ эн суитчы, кор оз ков. Тэ пӧ и пӧвадитін пиӧс да аснырасьныыс велӧдін. Меным супротив вӧчанныд кыкнанныд. Сідзтӧ кӧ ӧд... Инӧ ме дорӧ мед эз вӧв шыасьӧма.

Виктор том петук моз кӧсйис на мыйкӧ мамыслы шуны, да бабыс кыскыштіс сійӧс сойӧдыс, вашнитіс:

— Эн велӧдчы мамыдлы лёкӧн ӧтвечайтны! Лок петам кухняӧ да, сёйышт. Сэсся мун, бласлӧ кристос, уджав. Быд удж ас местаас бур. А мамыдлысь кывъяссӧ эн пыдди пукты. Бӧр небзяс.

Небзис Анна сӧмын сэк, кор мамыс ни пиыс эз лоны дінас. Викторыс вежон кымын ветліс мебельнӧяс, а сэсся совхозӧ турун пуктыны ыстӧмаӧсь, коймӧд вежон нин абу гортас. А Марина пӧч Виктор мунан лунас жӧ и кайис Анфиса дачаас да эз лок сійӧ рытнас узьны, ни аскинас эз лок. Коймӧд вежон жӧ нин оз волы. Дачаас пӧ тай и узьлӧ-олӧ. Миша сьӧрысь ыстывлӧ Анналы гӧснеч: свежӧй ӧгуреч да стӧкан оз. Мишаыс тай шуӧ: лӧсьыда пӧ олӧ, оз гажтӧмтчы. А Галина дорас быд рыт волӧ Миша. Мыйкӧ артмӧ оз налӧн-а? Пасибӧ, тьӧтка ордас пырыштлӧ быд рыт и. Пырас да быд пӧрйӧ первой делӧ юалӧ: — Викторыд эз на лок?

— Гашкӧ, оз и лок да, — воча шуӧ тьӧткаыс. — То тай Ванялӧн Тосяыс муртса на воліс тэ водзвылын, пыртіс сысянь письмӧ. Гижӧ: батькӧд пӧ тӧдмаси. Аддзӧма, мый мем гижны. Ӧткодьӧсь ӧд...

Анна Степановна татчӧ ланьтыштіс. Писяньыс письмӧ лыддьӧм бӧрас гыркыс тырыштӧма, да ачыс гӧгӧрвоис: Мишакӧд сёрниын нинӧмла петкӧдлыны лёклунсӧ. А сэсся и вежис сёрнисӧ мӧд визьӧ:

— Ті кыдзи-мый оланныд? Батьыдлӧн ӧд отпускыс помасис нин, нырӧ-уджалӧ, пӧдикӧ, бара строительство вылас.

— А-а... — Миша шпыньмуныштӧ да шеновкерӧ кинас, — менӧ быд лун пурӧ. Тырмас пӧ «Москвичнад» голлявны, строительство вылӧ мекӧд мунам. Гӧтрасьны оз тшӧкты ни...

— Но-о, мый нӧ сідз? Мый кутӧ? Миян тай гижӧма: Наташасянь кӧ пӧ письмӧыс воас, ысты татчӧ мем. Коланторъяс... Невеста, буракӧ, аддзӧма. Гӧтрасьны жӧ, колӧкӧ, кутас...

Миша петӧм бӧрын Анна Степановна выль пӧв лыддис пиыслысь письмӧсӧ, и друг морӧспань увсӧ нёньыштіс шог мӧвп: кажитчас кӧ батьыс, да сы дорӧ кӧ пиыс кольччас збыльысь? Быдтіс, быдтіс да... Дзикӧдз сэсся кӧдзаласны ӧта-мӧд дорсьыс, сідз нин ыджыд пӧсьлуныс эз вӧв да. Бабыс быдтіс, сійӧ и мам пыддиыс Викторлы. Ачыс Анна Степановна пырджык командировкаясын вӧлі да. Сэсся, мый и дзебны, гашкӧ, сыкӧд и ачыс кӧдзыдджык вӧлі. Батьтӧм пиыд ӧд мешальник ӧтка нывбабаыдлы. Сы вӧсна, колӧкӧ, сэсся и некутшӧм мужичӧйкӧд олӧмсӧ эз йит. Позис раз-мӧдысь да. Марго тай ӧні на неважӧн тӧдмӧдіс бара ӧтикӧд. Сы сайӧ кӧ пӧ мунан, вый кутан юны да овны. А страшнӧ мыйкӧ... Абу нин велалӧма да сійӧн ли мый ли. Сэсся мортыс збыль-ӧ надёжнӧй? Сідзсӧ мича, крепыд мужичӧй. Ветымын кык арӧс на и эм. Культурнӧй сёрниа и. Уджыс скоднӧй и. Снабженец ыджыд учреждениеын. Колӧкӧ, вывтіджык писькӧс. Маргокӧд сы вӧсна некымынысь нин венӧдз волісны.

— А абу жулик тэнад тӧдсаыд? — шуткаӧн юавліс Анна Степановна. Мӧдыс ланьтӧмӧн дыр видзӧдас Анна Степановна вылӧ, сэсся дивитыштас:

— Абу яндзим тэныд? Меным он эскы! Ме ӧмӧй тэныд лёксӧ вӧзйи эськӧ? Но и морт тэ! Абу баба, а кирпич!

Гашкӧ и, збыль абу лёк мортыс. А мый гӧтырыскӧд торйӧдчӧма... Но ӧд унаӧн тай торйӧдчылӧны. Но ӧні нинӧм нин та йылысь. Маргокӧд лӧгасим, и ещӧ вӧчас ставсӧ, мед миянӧс кӧдзӧдны. Но и мед, гашкӧ и, бурджык, мый лӧгасим.

Лӧгасисны пӧдругаяс, кольӧм пекничасянь нин дузъялӧны ӧта-мӧд вылас. Паныдасясны да скӧр каньяс моз чушнитӧны сӧмын, кутшӧм нин чолӧмасьӧм да нюмсер сетӧм.

А лӧгасьӧмыс лои чорыдкодь. Пекничаӧ кутісны чукӧртны ресторанса уджалысьясӧс собрание вылӧ. Трестысь пӧ представитель воӧма. Вӧлӧмкӧ, норасьӧм трестас гижӧмны. Буфетчица пӧ миян лэдзӧ официантъяслы вина, сок, фруктыяс вевтыра донысь.

— Коді нӧ тадзсӧ гижӧма-суклялӧма? — пыр и щӧтьсӧ сувтӧдіс буфетчицаыс, биа-бордъя кодь сюсь нывбаба. Эз на кӧть ёна пӧрысь вӧв, ставӧн шуисны сійӧс тётя Пашаӧн.

— Ме гижи, — сувтіс томиник ань, коді неважӧн на и уджалӧ ресторанас официанткаӧн. Виччысьтӧмысла унаӧн тшӧкмуныштісны. А Маргарита Ефимовна вашкис орччӧн пукалысь Анна Степановналы:

— Эз на удит локны, бедняга, а мунны нин кӧсйӧ.

— Мыйла мунны? Уджавны кута. Мем тані кажитчӧ, — кылӧма Маргаритаыдлысь вашкӧмсӧ да стрӧгакодь видзӧдліс аньыд главнӧй бухгалтерша вылӧ. — Сӧмын ог кӧсйы клиентъясӧс ылӧдлыны. Найӧ локтӧны татчӧ шойччыштны да гажӧдчыштны. Миянлы эскӧны, а ми... Ми пӧрйӧдлам.

— Коді миыс? — пыр и шыасис места вывсяньыс Маргарита Ефимовна. — Но, муса аньӧй... Став коллективӧс ті кӧсъянныд сьӧдӧдны.

— Ог тӧд, ставсӧ-ӧ, но тӧрыт на два рубляа портвейн муніс «марочнӧй» дон серти, — вочавидзис аньыд да кытшовтіс видзӧдласнас став пукалысьсӧ. — Мый, ме нинӧмсӧ сёрнита? Али меным ӧтнамлы лэдзисны донтӧм винасӧ «марочнӧй» пыддиыс?

— Миян могыс — клиентъясӧс бура обслужитны, ценаяснад ог интересуйтчӧй, — шуис ӧти официантка, а сэсся некод кыв ни джын эз шу.

Собрание нуӧдысьыс — налӧн профорг, том мужичӧй, банкетнӧй залысь официант, лапкӧдыштіс синлысъяснас:

— Но, коді кӧсйӧ сёрнитны? Вайӧ эн чӧв олӧй, асьныд аддзанныд: делӧыс серьёзнӧй.

— А мый нӧ кутасны висьтавны, — быттьӧ пулемётысь сяркнитіс, шыасис тётя Паша буфетчицаыс. — Ӧти суклялӧ, а ми ставӧн кывзам! Ме дас во тані уджала да... Лӧжсӧ кута кывзыны? Кадыс абу...

Собрание нуӧдысь муртса и сійӧс ланьтӧдіс, ті пӧ чӧв овлӧй на, мед мукӧдъяс сёрнитасны.

— Ме чӧв ола, ме кута чӧв овны? — заводитліс на ещӧ буфетчицаыс, но производствоӧн заведуйтысь, стрӧгкодь нывбаба, чирыштіс сійӧс, вӧзйис собрание нимсянь: миян пӧ эм бухгалтерия, учёт нуӧдысьяс, мед пӧ найӧ мыйкӧ шуасны, а то збыльысь кадыс абу.

— Мый ми шуам? — сувтіс Маргарита Ефимовна. — Пока нинӧм ог. Ме кывъяслы ог эскы, мем доказательство колӧ, документ. А сідзтӧ — суклясьӧм и лоӧ. Ме чайта, мед собраниеыс решитас ревизия вӧчны буфетын. Ми, со, Анна Степановнакӧд — пӧжалуйста. Кыдз положено по уставу, коймӧд мортӧс босьтам.

Маргарита Ефимовна сэтшӧм сьӧлӧмсяньыс тайӧс ставсӧ шуис, сэтшӧм авторитетнӧя, мый выль официантка, коді гижӧма трестӧ норасьӧмсӧ, чеччис пукаланінсьыс да мелі синмӧн видзӧдліс Маргарита Ефимовна вылӧ. Сійӧ видзӧдласын тӧдчис и эскӧм, и бухгалтерияӧс пыдди пуктӧм.

— Ме сӧглас тайӧ предложениеыс вылӧ, — нюмдыштіс ань, — прӧверитӧй. Но сета честнӧй комсомольскӧй кыв — ме нинӧм эг лӧсьӧдлы. Мыйла меным сійӧ колӧ?

Собраниеыс сідзи и решитіс, кыдзи вӧзйис бухгалтерия. Нуӧдны буфетын ревизия.

Бухгалтерия жырйӧ локтӧм бӧрын Маргарита Ефимовна папирос ӧзтіс да, азыма тшынсӧ ньылаліг, пиняліс буфетчицаӧс:

— Эг чайт, мый сэтшӧм бӧлбан тётя Пашаным! Коді сылы тшӧктіс залас лэдзны эсійӧ бурдасӧ? Дерт, шуам, рыт помланьыс мыйӧн кӧть юктав шоналӧм клиенттӧ, ставыс мунас марочнӧй пыдди. Но... Позьӧ ӧмӧй тӧдтӧм мортлы, выль официанткалы дӧверитны? Вот сійӧ и — тӧ-тӧ-тӧ! Ляпӧдіс ставсӧ, эськӧ вомас кӧть зор сюй. Ревизия аддзас кӧ буфетысь тётя Пашалысь донтӧм портвейнсӧ, нинӧм и виччысьны бурсӧ. Некутшӧм документация сы вылӧ абу. Вайлім быдса партия донтӧм вина, некутшӧм накладнӧйтӧг, выльлунӧ да асывъяснас вузалӧм вылӧ. Но, тётя Паша, тётя Паша... Вермас скандал лоны. Сюрӧ кӧ ревизияыдлы сунис помыс, кыскас унаӧс — базасаясӧс и весиг винзаводысь кодсюрӧӧс. Но да ладно! — скӧрысь шыбитіс Маргарита Ефимовна чигарка помсӧ, бӧрсьыс сьӧвзис: — Кувтӧдз огӧ на гортйӧ водӧй! Вӧчлам ревизия, а сэн тыдавны кутас. Энлы, ме звӧнитла трестӧ ӧти тӧдсалы. Буракӧ, ӧд трестысь мортсӧ ревизия вылас индасны? Да ми тэкӧд кыкӧн...

Ой, Маргарита Ефимовнаыд сюсь, да и тётя Пашаыд абу йӧй вӧлӧма. Ме пӧ отпускӧ мӧда да коля ли мый сэтшӧмторсӧ мӧд киӧ? Менам буфетын пӧ нинӧм абу менӧ сьӧдӧданторйыс. Ичӧтик коляс вӧлі, да менам грек вылӧ ли менам шуд вылӧ ли, тӧрыт буретш и мынтӧдчи. Выль официанткаыд тай шуис... А ӧні он докажит! Ме ещӧ сійӧс судӧ на сета. Менам кыз мошняын нин сійӧ винасьыд сьӧмыс, югӧ нуны лӧсьӧдча дай тіянлы на кольышта...

Ревизия нуӧдӧм бӧрын бура дыр бызйысис да кратайтчис тётя Пашаыд Маргарита Ефимовна водзын. Мӧдыс кывзіс сійӧс да шмыньвидзигтыр думайтіс, хорошо, хорошо пӧ.

— Чёрт подери, вот баба! — Анна Степановнакӧд сёрниын мый вермис ошкис да завидьпырысь нимкодясис тётя Пашаӧн Маргарита Ефимовна. — Со, коді кужӧ овнытӧ! Жаль весиг торйӧдчыны сыкӧд. Но менӧ кӧсйӧны вуджӧдны трестӧ, ог жӧ ӧткажитчы! А тэ кольччан ме местаӧ главнӧйӧн.

— Ме бара-й ог! — горӧдіс Анна Степановна.

— Мыйла? Вот йӧйыс, главнӧйысь ӧткажитчӧ!

— Ог куж главнӧйнад, — нюмсермуніс Анна Степановна. — Тэ повзин да пышйыны кӧсъян, а менӧ колян.

— Но, тэ шуан... Кодысь пышъя, тётя Пашасьыд? Кӧсъян кӧ тӧдны, ог пышйы, а муна мукӧд тётя Пашаясӧс корсьны. Меным сэтшӧмыс уна колӧ... — Маргарита Ефимовна татчӧ сярӧбӧн серӧктыштіс да, тшапа юрсӧ дзӧрӧдігтыр, видзӧдліс Анна Степановналы чужӧмас. — А тэнӧ ме бӧрынджык босьта ас дінӧ трестӧ. Бара лоам ӧтлаынӧсь.

— Ог, ог, та йылысь сёрни оз вермы лоны, — ышловзис Анна Степановна. Первойысь, буракӧ, гӧн паныдыс лоӧ шуӧма дона пӧдругаыслы.

Мӧдыс ёнасӧ эз и кевмысь, чӧвтліс скӧр видзӧдлас, горӧдіс:

— Он кӧ и эн, ёна тай! Гашкӧ, эсійӧ официантка-дура дорас котӧртан да сыкӧд пӧдругаасьны кутан? Пӧжалуйста! Мед сӧмын эн каитчы...

Регыд вежон лоӧ налӧн лӧгасьӧмлы. Веськыд мат лои Анна Степановналы. Удж вылас и гортас. Весиг узян унмыс воши. Ӧні эськӧ сылы, ӧтка пӧткаыдлы, некод нин оз мешайт, вод сӧмын да нисты узь. Да оз узьсьы, бергалӧ войбыд.