ХРУСТАЛЬ ТУПЛИ

Кӧсйӧмӧй менам збыльмис жӧ. Ме — карын, велӧдча педучилищеын. Сідз нин шуа, а унджык кадсӧ эськӧ читса муяс вылын коллялам да. Картупель идралам, турнепс. Раз-мӧдысь нулісны и Сыктыв вылӧ, Красногорка сайӧ, васьыс керъяс лэптавны. Но век жӧ карын ӧд ме. Эм, майбыр, кытчӧ петыштлыны и мый видзӧдлыны. Сӧмын тай эз гажӧд ёнасӧ карыс. Первой вежонъяссӧ ёна гажтӧмтчи гортысь. Рытъя кыасӧ аддза, да сьӧлӧмӧй нёйдны пондылас, мися, сэні вӧд, сійӧ сторонаас, менам гортӧй, чоюкъяс и бабӧ, пӧди, гортынӧсь нин, пемыдгорулалӧны, а колӧкӧ, дзузу би нин ӧзтісны, чоюкъяс урокъяссӧ вӧчӧны. Мамукӧй абу-а, некор нин оз ло ни. Кувсис гожӧмнас. Батьсянь сэки жӧ усьӧм йывсьыс юӧрыс воис-и. Сирӧтаяс ми ӧні.

А велалан тай мортыд быдтор дінӧ. Ылалыштны понді ме. Томлуныд — томлун на. Бара жӧ, общежитиеын ӧти жырйын дас нывка олам, оз сетны, вильышпозъяс, гажтӧмӧ да шогӧ усьны. Кӧть ми и пыр тшыгӧсь, но збодерӧсь, шутка-серамӧнджык шутьлялысь кынӧмъясӧс да гажтӧмалӧмнымӧс ылӧдлам. Кор колхозӧ ветлам, кодкӧ да кодкӧ бара и кыскас рытнас питшӧгсьыс ыджыд мӧс галанка-турнепс: «Ужнайтам, нывъяс!» «Кыдзи нӧ тэ сяммин да лысьтін босьтны турнепссӧ?» А аслыным радыс! Чукӧртчам пызан сайӧ да гырскам-йирам турнепссӧ да варовитам-варовитам.

Кор абуджык мудзӧсь, ставӧн ватаганас петавлам и паркӧ рыт коллявны. Кыскӧ тай томдырйиыд. Сэсся и паркыс дзик матын общежитиесянь да он кӧсйы, но петан. Пырнысӧ йӧр пытшкас руб колӧ, а миян зепъяс пыр вӧлісны «розяӧсь». Ӧграда вомӧныс да кыт да писькӧдчам-пыралам. Сэні гажа, духӧвӧй оркестр ворсӧ, кодъяскӧ йӧктӧны, кодкӧ гычасьӧ качайын, кодкӧ чиганъяслы гадайтчӧ, а со — кодкӧ семдӧма да висьтасьӧ сідз шусяна «Комната смехаысь» петӧм бӧрын. Шуӧны, зоопарк пӧ тані вӧвлӧма и быдӧн, но бӧр нин нуӧмаӧсь, ми эгӧ нин суӧй. Но миянлы и зоопарктӧгыс гажа вӧлі сэні. Чошъялам паркса буса аллеяясті кокъяс лётавтӧдз. Локтам гортӧ да сералыштам жӧ ӧта-мӧд вылӧ индалігтыр. Бусыс ныр розьясӧ пырӧма дай усъяс на кольӧма.

Арыс коскодь вӧлі да лӧсьыд. А сэсся зэрласьны пондіс. Урокъяс бӧрын ӧткӧн-ӧткӧнджык разӧдчавны кутісны. Кодкӧ лестехникумӧ ас сиктса дорас мунӧма, кодкӧ Копӧ, кодкӧ Медӧ, кодкӧ и прӧста карса уличьястіыс жӧвъялыштас. Дерт жӧ, лои пыралӧма нин и музейӧ, ӧтчукӧрын фотографируйтчӧма. Театрӧ на мӧдам дай. «Солдаты Сталинграда» кино пӧ петкӧдлӧны. Водзвыв и босьтім выходнӧй кежлӧ билетъяс. Медбӧръя куим шайт жалиттӧг и видзи билет вылас, лун-мӧдтӧ, мися, тшыг кӧть ола, а театрас медводдзаысьтӧ быть ветла.

Но театрас мӧдӧдчӧмсянь и заводитчис менам бедаӧй. Дзользям-вӧччам театрӧ мунны, кӧмасьны куті да видзӧда — сапӧг пыдӧсӧй чуктӧма. Ой, мый нӧ тайӧ лоӧма? «Пирӧг корӧ кокыд!..» — сералӧны нывъяс. А меным нӧ серам? Мый кута кӧмавны?

Театрас сэтшӧмнас нин и ветлі. Выльлунӧ на училищеӧ ветлі дай, а сэсся дзик эз кут позьны кӧмавны. Чаштіс пыдӧсыс. Кӧнкӧ эськӧ, дерт, дӧмӧны, да мыйӧн на ещӧ и мынтысян?

— Менам сандаль эм, сійӧн пока училищеад ветлан, а сэсся дӧмам! Стипендия регыд сетасны, — сьӧлӧм сетӧ меным Дуся пӧдругаӧй.

— А медым коктӧ он кӧтӧд, кӧшельӧн новлӧдлыны кутам ӧчередьӧн, — серамсорӧн содтӧ пыр шмонитысь Лия.

— Огӧ жӧ ми, — паныдалӧ сійӧс Аня, — зонъяс на эмӧсь сы вылӧ. Этатшӧм мусаник нывкатӧ радпырысь на моздорас новлӧдласны.

Найӧ шутка-серамысь и меным долыдджык.

— Ой, нывъяс, аттьӧ! Но ме ог мун йӧз кӧмнад. Ассьым дӧма, нула мастерскӧйӧ, стипендия босьта да.

Мӧд лун нин эг мун училищеӧ. Пукала дзуртысь крӧвать вылын, книга кута киын, но ог аддзы, мый сэтчӧ гижӧмаӧсь. Сьӧлӧм шуньгӧ. Думысь гижа бабӧлы да чойяслы письмӧ. Шур-шар пырис Аня, кашкӧ-висьталӧ:

— На, менсьым сапӧгӧс кӧмавлы да мун училищеӧ, канцелярияӧ корисны. Миян физ-ра да ме эг кольччы, — Аня пӧрччис сапӧгсӧ, шыбитіс мелань, ачыс нюжгысис-водіс крӧватяс.

— Корисны? Мыйла? Пинявны кутасны? — повзикодь ме. — Стипендиясьыд на киритасны.

— Йӧюк, мун, шуӧны, — китшкӧ-сералӧ Аня. — Ордер кӧсйӧны сетны, ордер, кӧмкот вылӧ. Тэ пӧнимайтан? Мича тупли сетасны, колӧкӧ, Золушкалы моз, хрусталь туфли на... Мун, ӧдйӧ котӧртлы!

Ме нинӧм ог гӧгӧрво, но кӧмалі Анялысь сапӧгсӧ, муні училищеӧ. Миян сэки буретш дошкольнӧй отделениеыс торйӧдчис школьнӧй дорсьыс, он и гӧгӧрво, кӧні мый. Аудиторияяс ӧтгудыр на, но канцелярия торъя нин. Сулала канцелярия ӧдзӧс дорас, а пырнысӧ ог лысьт. Медбӧрын тотшкӧдчи жӧ, пыри.

— Тэд мый? — секретаршаыс, том ныв, ӧтнас пукалӧ.

— Корӧмаӧсь да...

— А-а, тэ — Колегова? Йӧкты, ордер тэныд шуисны сетны. На босьт да талун жӧ мун универмагӧ, сэні и сетасны кӧмтӧ.

Сьӧмтӧг универмагас нинӧм оз сетны. Тайӧс тӧда, но радлунӧй та вӧсна оз чин: печатя кабалаторйыс ӧд киын. Локті общежитиеӧ, Аня паныд уськӧдчис: — Но мый, сетісны? Ме тай шуи, а тэ он верит!

Коркӧ-некоркӧ локтісны и нывъяс. Ставнымлы чӧлӧй событие ордерыд. Видлалӧны, бергӧдлӧны кабалаторсӧ да коді кыдзи кужӧ, сідзи и артасьӧ-мӧвпалӧ. «А сетасны кӧ та вылӧ вылын бӧра тупли? Гӧрд тупли кӧ, мича жӧ, мед кӧть и абу вылын каблука».

Завидьтӧны меным нывъяс, а ме нин и ачым радысла войсӧ весиг узьны ог вермы. Мый сӧмын мӧвпӧн эг муртавлы универмагысь. Пока туплинас и муна училищеӧ, а сэсся, лым усяс да, валеги понда новлыны...

Стипендия босьтан лунӧ и резышті универмагӧ. Сэні шуӧны: талун пӧ кладовщикыс абу нин, аски лок. Нӧшта ӧти узьтӧм вой мича мӧвпъяс юрын бергӧдлі. Аскинас универмагас локті, складас пыри да став мича, югыд мӧвпъясӧй ӧти здукӧн юрысь вушйисны.

«То, бӧрйы, коді тэныд лӧсялӧ», — шуис кладовщицаыс да индіс ыджыд йӧртӧд вылӧ, кӧні чукӧрӧн куйлісны гырысь мужичӧй ботинкияс.

— Меным оз татшӧм ков, — шуа ме.

Но кладовщица наяна вочавидзӧ:

— Тэныд, гашкӧ, хрусталь башмачок колӧ, да миян сэтшӧмыс абу.

«Абу? Вот тэныд и вылын бӧра тупли! Гӧрд рӧма тупли!»

Медся ичӧтыс 38 размер. Сійӧс и босьті да муні нывъяс дорӧ.

— Со, ньӧби! Дас квайт шайт! Менам вурун чулки юр эм, сійӧн буретш лоӧ! — збодера юӧрта нывъяслы, быттьӧ ме и збыль уна тупли пытшкысь бӧрйи дзик ӧтикӧс — тайӧс.

— Этатшӧмӧс и босьтін!? — нывъяслӧн вомныс вежыньтчӧма.

— Вылын бӧрасӧ войнаыс помасяс да сэки кута новлыны, — шуа стрӧга, и нывъяс ньӧжйӧникӧн лӧньӧны.

— А збыль ӧд, татшӧм няйтнас туплисьыд тайӧ надейнӧджык, — шуӧ Аня, быттьӧ кывкӧрталӧ, ставнымӧс вайӧдӧ ӧти мӧвпӧ.

Уна оз и ков, медым усмиритчыны, пӧдтыны колӧм-кӧсйӧмнымӧс, юрыд кӧ этшаника уджалӧ. А миян нывъяслы, коми сиктъясын чужлӧм-быдмӧм войтырлы, оз на ков водзӧсавны тӧлк-вежӧртӧ. Весьшӧрӧ ли мый миянӧс татчӧ вайӧдіс ӧти ыджыд кӧсйӧм — лоны учительӧн, челядьӧс велӧдысьӧн...