ТУВСОВ КОЗИН

Онялӧ вӧр тувсов шонді улын, шойччӧ тӧвся кӧдзыдъяс бӧрын. Но кысянькӧ уськӧдчылас вильыш кӧдзыд тӧвру, ловзьӧдас-садьмӧдас великан пожӧмъясӧс, и яг ставнас нин, кылан да, увгӧ.

Помтӧм-дортӧм веж парма да лӧз енэжыс сэтшӧм жӧ помасьлытӧм шыльквидзӧ сы весьтын. И сӧмын дзоляник ю енэжсьыс шӧрыштӧм векни лента моз чукльӧдлӧ-мукльӧдлӧ вӧр пӧвстӧдыс.

Дзик ю дорас, неыджыд кушинын, зарвидзӧны ёсь йыла брезент вонъяс. Сэні олӧны геолого-разведочнӧй партияса уджалысьяс.

Уна гажа нӧрыс эм пармаад, но татшӧм мичаинсӧ экспедицияса зонъяс аддзисны первойысь: кымын ылӧ видзӧдан, сымын джуджыдджык вӧр пуыс, енэжас медбӧрын тшукӧ.

— А-а-а-у-у! — нарошнӧ горӧдас кодкӧ.

— У-у-у! — воча йӧлӧгаалӧ чунавлӧм вӧр.

А юыс! Унаысь шемӧса гӧлӧс кодлӧнкӧ горӧдліс: — Видзӧдлӧй, видзӧдлӧй! Сотчӧ быттьӧ юыс!

— Збыль ӧд, ӧзйӧ! — шензьӧны и мукӧдъяс. Воисны найӧ татчӧ колян арын, кор вӧрыс ставнас буретш ӧзйис эзысьӧн да зарниӧн. Пуксисны шойччыны тайӧ берег дорас, видзӧдалісны гӧгӧрпӧв и быдӧнлӧн нимкодьмис лолыс.

— Ёртъяс, гашкӧ, татчӧ и поздысям да? — шуис партияса начальник.

— Гажа местаыс! — медводз сетіс начальниклы вочакыв русыд юра великан.

— Но, Жоралы кӧ кажитчӧ, миянлысь, начальник, эн и юась! — гӧрдлігтыр зонъяс уськӧдчисны ӧзйысь ю дорӧ мыссьыны. Берег йылӧ колисны сӧмын кыкӧн: партияса начальник да тайӧ ыджыд мыгӧра зонмыс, Жора.

«Шуисны эськӧ мед прӧста Егорӧн, кыдз водзті асланыс грездас, либӧ кӧть нин овӧй серти Кановӧн, а то Жора...» — дӧзмӧмпырысь думыштліс мукӧддырйи зон. Роч ним эз вӧв сылы ёна сьӧлӧм вылас.

Егор Канов чужліс сиктын, некытчӧ сэтысь эз петавлы, не кӧ лыддьыны армияӧ ветлӧмсӧ да кольӧм во карын велӧдчӧмсӧ. И некутшӧм экспедиция йылысь водзті эз думайтлы. А, со, веськаліс пыдӧ пармаӧ геологическӧй партиякӧд и, кӧть эз позь шуны, мый аддзис тась шуд, век жӧ вӧлі зэв рад сыысь, мый буретш татчӧ шыбитіс сійӧс олӧмыс.

Паськыд парма — мун сё верст, и морткӧд он паныдасьлы. Егорлы татшӧминыс и коліс. Сылӧн ӧні ӧти кӧсйӧм: дырджык не петны тась йӧзаинӧ, дырджык не аддзысьлыны ни ӧти тӧдса морткӧд. Дас тӧлысь нин лоӧ, кыдзи Егор йитіс ассьыс олӧмсӧ, со, тайӧ экспедицияыскӧд. И уджыс сідзсӧ кажитчӧ. Аддзисны руда. Коліс тӧдмавны, уна-ӧ сійӧ, кыдзи му пытшкас куйлӧ — ӧти кывйӧн кӧ, чукӧртны став геологическӧй коланторъяссӧ. Та могысь и кольччисны тӧвйыны экспедицияса зонъяс ӧзйысь ю дорӧ. Налы отсӧг вылӧ ещӧ ыстісны йӧзӧс да техника. Ӧні найӧ буритӧны, взрывайтӧны да лэптӧны ковтӧм породасӧ — пырӧны му пытшкас юкмӧсӧн моз. А медым эз бужды артмысь шахтаыс, юкмӧсӧс моз жӧ срубъялӧны.

Тырмымӧн шпуръяс, неыджыд розьяс, писькӧдӧм бӧрын забойӧ волывліс варов да пельк вӧраса дядьӧ, сьӧрсьыс вайлывліс ыджыд сумка тыр взрывчатка. Егор зільліс пырджык тайӧ морт дорас лоны, мед отсалыштны сылы да тӧдмасьны взрыв вӧчӧмнас. Егор радейтліс быд выльтор видзӧдны да тӧдмавны. Взрывник ошйысьӧмӧнкодь сёрнитліс зонкӧд: — Взрывайтчысьыд шахтаад медколана морт. Сытӧг ӧти воськов му пытшкӧдыд он мун. Кӧсъян кӧ, верма велӧдыштны тайӧ делӧас. Петан мӧдысь Ухтаӧ и сдайтан, аслыд право сетасны.

— Взрывникӧ агитируйтан зонсӧ? — шыасис ӧтчыд на костӧ инженер Ким. — Дерт, взрывникыд колана морт шахтаад, и ме абу прӧтив, медым Жора велӧдчӧ взрывнӧй делӧӧ, но тэ, Митрич, содтыштін жӧ неуна. Ӧні сэтшӧм машинаяс, комбайнъяс эмӧсь, мый асьныс му пытштіыс мунӧны, оз ков буритны ни взрывайтны.

— Сідзтӧ эськӧ сідз, — довкнитыштіс юрнас Митреич, — но тані наперво менам отсӧгӧн на ковмас уджавны-а, — ни ӧти падмытӧг вочавидзис сійӧ.

Оз позь шуны, мый Егорлӧн вӧліны кутшӧмкӧ думъяс взрывникӧ велӧдчӧм йылысь. Митрич гӧгӧр гартчыліс прӧста сідз. Частӧ сійӧс позис аддзыны и тракторист Вася дорысь.

— Вай кӧть недыр руль саяд пукалышта, — унаысь кевмысьліс зон Васялы. Тракторыд, дерт, корсюрӧ и жугавліс. Егор сэки вӧвлі радсьыс рад. Лунтыр кӧть гурйысяс моторас либӧ гатшӧн куйлас трактор улас. Сэтшӧма радейтӧ ноксьыны быд пӧлӧс техниканас: машинаяснад да тракторъяснад.

Помнитӧ, ар дас кыка на вӧлі, кор сійӧс вӧв вӧтлыны вундан машина дорӧ сувтӧдісны. Видзӧдіс-видзӧдіс сэки зонка машина удж вылад дай думыштчис, кыдзи вундынысӧ вермӧ. Пажын кадӧ, кор став йӧзыс муніс, разяліс винтъяссӧ, а бӧрсӧ тэчны эз удит дай эз сяммы. Вот и кывліс видӧмтӧ. Но машинаяс тӧдмавны кӧсйӧмыс эз чин.

Инженер Кимлӧн быдпӧлӧс машинаяс йылысь казьтыштӧмыс кӧрт тув моз сатшис Егорлы юрас.

«Да, позис эськӧ и сылы механикӧ велӧдчыны да», — ышловзьӧмӧн думыштіс ас йывсьыс зон. И первойысь скӧрмис ас вылас сыысь, мый пышйис пармаӧ, эновтіс велӧдчӧмсӧ карса механизация школаын. Тӧд вылас пыр и уси Аннушкаыслӧн кывъясыс: «Тэ, Егорушко, сэтшӧма радейтан машинаяс дорын бергавны, лэччы карӧ механизация школаӧ, велӧдчы, а сэсся и...»

Казьтыштіс Аннушкасӧ и сьӧлӧм доймытӧдзыс окота лоис аддзысьлыны сыкӧд, сёрнитыштны став йывсьыс, мый чӧжсис сыкӧд янсалӧм бӧрын. Но пондас ӧмӧй ӧні Аннушка сёрнитны сыкӧд?

А войвыв парма весьтӧ лышкыдджыка и лышкыдджыка пондіс мыччӧдчывны шонді, важӧн нин воссис ю, и, со, мыччысисны нин веж пу коръяс. Рытъяснас Егор пыр частӧджык видзӧдлывліс шуньгысь ю вылӧ, и сэк босьтлывліс сійӧс сьӧлӧм дой. Инас эз понды ӧшйыны.

Медся сьӧкыд вӧвлі коллявны шойччан лунъяс.

Со, и талун. Войтырыс коді чери кыйны муніс, коді посёлокӧ кольччис пластинкаяс кывзыны да шахматасьны, а Егор шӧйтӧ, места оз аддзы. Мӧдлапӧв берегвывса джуджыд пожӧм йылысь казяліс сьӧд тарӧс. Дыр видзӧдіс сы вылӧ. «Коньӧр, буракӧ, сійӧ ме моз жӧ ӧтка...» — думыштіс зон да ачыс эз тӧдлы, кыдзи думъясыс бара на шыбельтісны чужан сиктас.

«А миян, пӧдикӧ, ӧні самӧй гӧрӧны-кӧдзӧны, механизаторъясыдлы лолыштныс здукыс оз сюрлы. А ме... жӧйяла нем вӧчтӧг. Вӧрӧ пышйи йӧз дорсьыс. Ок, Аннушка, тэ кӧ тӧдін, кутшӧм мем сьӧкыд тан овлӧ».

Вӧлі сэк татшӧм жӧ юралысь тулыс. Егорлӧн том вир-яйыс ворсіс тувсов шыясысь. Кор рытъяснас коллявліс нылӧс, медся мичасӧ и медся мусасӧ, шудасьыс шуда овліс. А ӧтчыд эз нин вермы кутны ортсӧ вӧзйысьысь кыпыд чувствосӧ да моздораліс нылӧс, нуис сійӧс веськыда ас кильчӧ помӧдзыс, шуис:

— Тэ лоан менам! Миян керканым шуда. Тӧдан, кымын вок ми быдмим, ставным багатыр кодь ёнӧсь. И миян... багатыръяс жӧ лоӧны...

— Ой, Ёгорей, эн петкӧдлы серамӧс! — Аннушка пыльк-серӧктіс, но кор аддзис зонлысь чужӧмсӧ, копыртіс юрсӧ сылы паськыд морӧс вылас:

— Лэччы, велӧдчы первой, а сэсся и гӧтрасям. Бӧръя кывсӧ эськӧ Аннушка эз шу, но Егорей буретш тайӧс и гӧгӧрвоис. Бур ногӧн кӧ, тадзи и должен вӧлі лоны, да, со, тай... торксис кыдзи...

— Эй, Жора! — кодкӧ гажа гӧлӧса друг чукӧстіс Егорӧс, торкис сылысь казьтылӧмсӧ.

Первойсӧ Егор эз гӧгӧрво, кысянь да коді сійӧс чуксалӧ. Видзӧдліс гӧгӧрбок, юрсӧ весиг чатӧртліс. Сэсся аддзис жӧ берегдорса вожа кыдз вылысь седлӧӧ моз лӧсьыда меститчӧм мортӧс.

— Инженер Ким! — радлӧмӧн горӧдіс Егор да шензьыштіс: — Мый ті тан вӧчанныд?!

— Рисуйтча, — вочавидзис мӧдыс да друг горӧдіс: — Энлы, энлы, сулышт сідз!

— Мый нӧ? — падмискодь зон. — Менӧ он-ӧ нин рисуйтны кӧсйы?

Мыйсӧ сӧмын оз куж вӧчны тайӧ инженерыс! Воис сійӧ геологическӧй партияӧ отсӧг вылӧ ыстӧм йӧзкӧд. Вертолётысь чеччиг кості и шыасис зонъяс дорӧ, кодъяс ӧти здукӧн чужисны кысянькӧ вертолёт дорад.

— Гажтӧмтчанныд, робинзонъяс? Ӧнісянь онӧ кутӧй! Ме вайи гитара и баян, сё гӧгӧр пластинка, эм Эдита Пьеха, шахматъяс, домино, дзонь библиотека! А главнӧйыс... выль оборудование вайи!

«Нырыс Буратинолӧн кодь вӧсни да кузь, а кывйыс, тыдалӧ, ещӧ кузьджык», — думыштіс сэки Егор тайӧ варов морт йывсьыс. Бӧрынджык тӧдмаліс, мый тайӧ инженерыс абу нин сэтшӧм прӧста сёльгысь-больгысь морт, мӧдарӧ, зэв делӧвӧй, лабутнӧй и киподтуя. Со, весиг и рисуйтчыны кужӧ.

— Сулыштлы, мися! Но, пӧжалуйста, — корис сійӧ Егорӧс.

Но мӧдыд зумыша шуис: — Аддзӧмыд кодӧс рисуйтны. — И ас кежас мыйкӧ ропкигтыр, воис дзик кыдз пу дорӧ да пуксис пӧрӧдӧм мӧд кыдз вылӧ.

Инженер чеччыштіс пу йывсянь и Егоркӧд орччӧн пуксиг моз шыасис:

— Тэ, зонмӧ, мыйкӧ талун абу лючки? Эсытшӧм картина рисуйтны торкин. Эк, тэ! Тулысыс али мый сьӧлӧмтӧ вӧрзьӧдіс, нывъяс тӧд вылад усины?

— Усины, да мый сыысь... — шеныштчис кинас Егор, гаравны пӧ нинӧмла та йылысь.

— Но-о, тэ и збыль мыйкӧ абу лючки. Кӧсъян кӧ, вай пукалыштам, сёрнитыштам либӧ чӧв олыштам, асланым муса нывъяс йылысь думайтыштам. А бурджык, дерт, сёрнитыштны, абу кӧ быттьӧ секрет-а.

Инженер перйис зепсьыс папирос пачка и пестысис куритны.

— Секрет кутшӧмкӧ, — шуис Егор и тшӧтш чургӧдіс кисӧ куритчанла.

Недыр мысти сійӧ висьталіс инженерлы, со, тайӧс:

— Грамота менам абу ыджыд, — заводитіс висьтасьысь, — кӧкъямыс класс сӧмын помавлі. Аслам нэмӧн некодӧс эг ӧбӧдитлы, эг пӧръясьлы, дась вылӧ да йӧз добра вылӧ эг жӧ ыштыв. Мый верми, отсалі гортсаяслы, уджалі совхозын и лыдди ачымӧс шудаӧн, ныв вӧлі. Армияысь воӧм бӧрын гӧтрасьны думайті, да невеста кутіс пыксьыны. Первой пӧ велӧдчы, радейтан пӧ машинаяс гӧгӧр бергавны, лэччы пӧ карӧ, школа механизация помав, локтан гортӧ механизаторӧн. «А ӧд дельнӧйтор вӧзйӧ» — думышті ме. Но и лэччи. Дерт, совхозсяньным направлениеӧн.

Школаад меным кажитчис. Быд пӧлӧс машинасӧ велӧдӧны, не сӧмын трактор, — трактортӧ ме, ыджыд вокъяс трактористалӧны да, тӧді буракодь нин. Сьӧлӧмсянь понді велӧдчыны. Некытчӧ вӧлі ог и петав, весиг киноӧ шоча ветлі, пыр лабораторияын да книга дорын. Гортсянь и Аннушкасянь письмӧяс воӧны. Мый ещӧ колӧ? Велӧдчы да велӧдчы. Но... Ӧтчыд тӧварыш менам, Ӧльӧксан, миян сиктысь жӧ, шуӧ меным: «Сиктад каян да мый нӧ кар йывсьыс пондан висьтавны? Ветлам, гуляйтыштам». Ӧльӧксан — мудер, пельӧ пырысь кодь и юр вундысь кодь. Веськыда кӧ шуны, оз мем вӧлі кажитчы. А вот эг сяммы пыксьыны. Ветлам, мися, сӧмын огӧ дыр кежлӧ. «Ог! — вочавидзӧ Ӧльӧксаныд и вӧзйӧ: — Лэччылам тарыт лесзаводӧ, сэні менам дядь-тьӧтка олӧны, тӧдмасян накӧд, зэв гажа йӧз». Но, мися, лэччылам. Мунім. Примитісны миянӧс бура, чай пуктісны, вина доз на вайисны и. Асьныс кӧзяин-кӧзяйкаыс гажмисны: сьылыштӧны да йӧктыштӧны, миянкӧд варовитӧны. А налӧн ныв вӧлі ещӧ. Лӧсьыдик. Розаӧн шуисны.

«Ті кӧть эськӧ мед Розуксӧ миянлысь киноӧ нуӧдлінныд», — шуӧ медбӧрын кӧзяйкаыс.

«Кӧть быд рыт! — кӧсйысис Ӧльӧксан. — Егор миян ёна жӧ радейтӧ кинотӧ видзӧдны». Тадзи вузаліс менӧ, а ачым ме эг жӧ кут вензьыны гӧститӧдӧм бӧрад.

— Пасьтась, Роза, мунам! — тэрмӧдліс нин менам тӧварышыд.

Киноӧ веськалім медбӧръя сеансас нин. Ньӧбим билетъяс, пырим. И сэк жӧ Ӧльӧксан кытчӧкӧ шунькнитіс-пышйис миян дінысь. Розаыдкӧд и коли ме. И колльӧдны ковмис сійӧс кино бӧрад гортӧдзыс. А май рытӧ... Том йӧз вой шӧр бӧрӧдз гажӧдчисны каршӧрса площадь вылын, сьылісны да йӧктісны. Ми Ӧльӧксанкӧд тшӧтш сэні вӧлім. А сэсся кыськӧ кӧвъясис миян дорӧ лесзаводса Розаыд: «Ой, сёрми! Автобус оз нин ветлы. Кыдзи и муна гортӧ?» «Колльӧдам! — такӧдыштіс сійӧс Ӧльӧксан вокыс, сэсся кыскыштіс менӧ бокӧджык да шуис: — Колльӧд». Ӧткажитчыны эськӧ и позис, да нылыс жаль лои, збыль ӧд, мися, ӧтнассӧ абу лӧсьыд эновтны. Ӧльӧксан, видзӧда да, партитчис кутшӧмкӧ мӧд нывкӧд нин-а. Кӧсйысьныс ӧд сӧмын сійӧ мастер.

Но, ми мӧдім Розаыдкӧд. Восьлалім тэрыбакодь. Праздник войнад, вӧлӧмкӧ, ветлысь-мунысьыд пыр эм. Лесзавод дорас воигӧн нин паныдалісны миянӧс кык зон. Ӧтиыс мыйкӧ дзоргӧмӧн дыр видзӧдіс миян вылӧ, сэсся пондіс лёка пинявны менсьым нывтӧ. Тэ пӧ сэтшӧм-татшӧм, карса зонъяскӧд нин колльӧдчан, ми вок пӧ абу нин тэныд пара, гашкӧ.

Ме мыйкӧ шуи, кӧсйи дорйыштны нывтӧ. И друг... швачкӧбтісны меным мыйӧнкӧ зэв чорыдӧн чужӧмӧ. Синмысь би петавліс. Онджык пӧ заритчы йӧз нывъяс дорас!

Эг ӧд усь кок йылысь. А менӧ сӧмын скӧрмӧдлы! Шышъяс ті, мися! Сюри ӧтиыс ки улӧ, сеті му бердас — лолыс эз кут шедны. Сюри эськӧ и мӧдыслы, да, понмыд, мудер зэв вӧлӧма. Сэтшӧмъясыд ӧд кужӧны! Кыдз тай заводитіс чирӧм гӧлӧсӧн чирзыны: «Мездӧй! Караул!»

Кыськӧ пыр и лӧсялісны йӧзыд — морт вит-ӧ-квайт. Сэсся и милиционер локтіс.

«Другӧс менсьым начкис. Со, куйлӧ шойыс! — ме вылӧ индігтыр, горзӧ мӧд шышыд. А йӧзыдлы мый. «Бандитлӧн кодь и эм рожабаныс!» — кыла, шуис нин кодкӧ ме йылысь. А ме... ме шензьӧмла и повзьӧмла — гашкӧ, мися, и збыль эсійӧ гадсӧ кувтӧдзыс вӧчи да, — сулалі нинӧм шыавтӧг, ачымӧс дорйытӧг. Роза, гашкӧ, повзьӧмысла, а гашкӧ, и яндзимысла тшӧтш чӧв оліс юрсӧ муас копыртӧмӧн.

Нуисны миянӧс милицияӧ. Но, а сэтчӧ сӧмын веськав. Аскинас эськӧ менӧ лэдзисны, да праздник бӧрас раз мӧдысь корлісны повесткаӧн милицияад. Сэтчӧ ветлӧмсьыд ме, дерт, нинӧм ёна лёксӧ эг и думайт. Да вежон бӧрти локтіс Аннушкасянь письмӧ. Татшӧм жӧникыд пӧ меным дарӧм оз ков, гижӧма.

Вӧлӧмкӧ, Ӧльӧксаныд менам мыйсӧ и абу суклялӧма ме йылысь гортын: и гуляйтысьнад, и морт виысьнад. Колӧ жӧ! Со, кутшӧм тӧварыш дорӧ верман веськавны!

Ме скӧр йывсьыд куснялышті Ӧльӧксанлысь лысьӧмсӧ, а сэсся кватиті крӧвать улысь чемоданӧс и пышйи... Рытнас нин ме чай юи Ухтаын, Анна дядь ордын. Кор висьтаси, сійӧ менӧ дивитіс, но шуис: «Ладнӧ! Уджтӧ корсьны отсала. Геологоразведочнӧй управление чукӧртӧ йӧзӧс Тиманӧ. Позьӧ сэтчӧ. Пармаӧ мунан, кадыд сэн лоӧ ставсӧ выль пӧв артыштны». Вот и артала, со, регыд во лоӧ, инженер ёрт, — помаліс Егор ассьыс висьтсӧ да кузя ышловзис. Ӧзтылӧм, но сідзи и куриттӧм папироссӧ бокас клеснитӧм бӧрын чеччис места вывсьыс, ещӧ содтіс:

— Вот тадзикӧн:

— А Аннаыд?.. Тӧдӧ, мый тэ тані? Письмӧсӧ гижлывлан? — юаліс инженер, эз на лэдз зонмӧс ас дінсьыс.

— Гижлі, да мый тӧлкыс. Колантор ӧні сылы ме кодьыд! Аддзан? — зон перйис пытшкӧс зепсьыс газет тор да мыччис Кимлы. — Вундылі тӧвнас. Карын дояркаяслӧн выльвося бал вылын вӧлӧма. Танцуйтӧ, со, кутшӧмкӧ том морткӧд... Передӧвик, пӧдикӧ. А ме...

— Эх, зонмӧ, — тапкис инженер Егорлы мышкуас. — Кыдз шуасны рочьяс, наломал ты дров. Но всё-таки, сэтшӧм кокниа ӧткажитчыны аслад невестаысь оз ков. Ӧд радейтан...

— Радейта кӧть, мый нӧ керныс?

— Мый керны? Гижны частӧджык мелі письмӧ, мый сэсся, — серӧктіс Ким да содтіс лабутнӧй гӧлӧсӧн нин: — Регыд вертолёт локтас, вай мун и ӧні жӧ гиж, мӧдӧдан. Ок тэ, жӧник, велӧдны татшӧмторйӧ колӧ! Видзӧдан да, и вежон-мӧд бӧрти вочакыв локтас.

А, вӧлӧмкӧ, вочакывйыс лэбӧ нин парма весьтын шыльквидзысь лӧз енэжті. Пажын кад гӧгӧр, ыджыд чирк кодь, жургигтыр посёлок весьтті гӧгравны заводитіс вертолёт. Пуксьыны эз пуксьы, но мыйсюрӧ татчӧс олысьяслы лэдзис аслас ыджыд гырк пытшкысь: почта да кучик мешӧкъясын сёян-юан запас.

Вертолётлысь быд волӧм тані енмӧс моз виччысьӧны, ӧд сійӧ ӧтнас йитӧ найӧс паськыд мукӧд, сэтчӧс олӧмкӧд, тӧдсаяскӧд и рӧдняяскӧд. Уськӧдчисны ставӧн сы дорӧ, ӧтнас Егор эз тэрмась. Дыш пӧ, меным ӧд всё равно нинӧм жӧ абу-а. Завидьӧй сӧмын босьтас, письмӧястӧ понданныд лыддьыны да.

Вертолёт дорӧ котӧртӧм пыдди сійӧ довгис-муніс конюшняӧ экспедицияса вӧв Рыжко дорӧ. Пӧдикӧ пӧ эз на жӧ некод пажнӧд сійӧс-а, муна да кӧть зӧрйӧдышта.

Вӧв дорсьыд и аддзис сійӧс инженер Ким: сыналӧ вӧлӧс да варовитӧ мыйкӧ сыкӧд.

— Жора, вот из мортыд! Тэ мый тан керан? Письмӧ тэныд!

— Письмӧ? Ноко вай лыддям. — Егор эновтіс вӧвсӧ, зырыштіс-чышкыштіс кияссӧ ас бокас и ньӧти радлун петкӧдлытӧг босьтіс инженер ордысь письмӧтӧ. Адрессӧ видзӧдлӧм бӧрын мыйлакӧ путор кодь повзьӧм гӧлӧсӧн шуис инженерлы: — Аннасянь.

Сэсся тэрмасьтӧг восьтіс конвертсӧ да пондіс лыддьыны. Инженер аддзис, кыдзи сылӧн быд кыв лыддьӧм бӧрын ловзисны-югдісны синъясыс и вомдоръясыс паськалісны гажа нюмысь.

Нюм шымыртіс и письмӧ вайысьӧс.

— Но, мый гижӧ? — юалӧ сійӧ медбӧрын.

— Пинялӧ, — вочавидзӧ Егор. Аслас ызбыльтӧ гажа серамыс. — Вот пӧ муна верӧс сайӧ мӧд сайӧ, кутан тӧдны, кыдзи вӧръястіыд пышъявны!