ПӦДРУГАЯС

Вой. Гӧгӧр шы ни тӧв. Сӧмын кӧрт туй станциядорса тупикын, кирпич тыра платформа дорын, нокошитчӧны йӧз. Кирпичьяслӧн троньмунлӧмыс кыдзкӧ торъя гораа кыліс войся чӧв-лӧняс.

Енэжыс сэзь. Войнас чорыдакодь заводитӧма кӧдздӧдны. Кок улын му подйыс первойсӧ пычьяліс, а ӧні йи кень артмис, чарскакывны пондіс.

Машӧ тӧждысьӧмӧн видзӧдліс енэжӧ, кысянь, кажитчӧ, пӧльтӧны тайӧ чеплясьысь кӧдзыд тӧвсӧ и жугыльмис ёнджыка. Нинӧм бурсӧ оз тунав сійӧ арся енэжыс. Сэзьмӧ.

«Кынтас тавой ставсӧ», — думыштіс сійӧ став тушанас дрӧжмунӧмӧн и пондіс пинявны асьсӧ ачыс.

«И колі жӧ татшӧм кокниа пасьтасьны. Йӧй моз тэрмаси. Шелӧді-котӧрті, весиг кепысьшой кутшӧмӧскӧ эг удит кватитны. Дыр-ӧ тырмас ректыны та мында кирпичсӧ? Гашкӧ, войбыд. Дзикӧдз гегдан татчӧ. Чунь помъясыс, со, ӧні нин пиалӧны. Кӧть эськӧ вом дорӧдзыс матыстлыны, пӧлялыштны-шонтыштны лов шынас. Да кор нӧ эштан тадзи тэрмасигас? Дзик некор! Сӧмын удитан кватитны водзсяньыд да мыччыны мышвыв, бара нин тэныд чургӧдӧмаӧсь — босьт. Бӧрӧ-водзӧ, бӧрӧ-водзӧ. Сетан — босьтан, сетан — босьтан. Автоматын моз. Лёк, мустӧм, ёрӧм кирпич! Найӧ, со, быд здукӧ скӧрджыкӧсь, кӧдзыдджыкӧсь лоӧны! Ляскысьӧны ки бердад калитӧм кӧрт моз. Быттьӧ эз позь тайӧс аски луннас ректыны? Позис, мый эзыс! Зина тай мыйкӧ думыштӧма войнас уджавны. Бригадирнад лоис да, эз на сетлы спокой некодлы лун ни вой. То сылы рытъя школаӧ ветлы, то сьывны-йӧктыны гижсьы, то ещӧ мыйкӧ. А тарыт татчӧ кирпич ректыны ышӧдіс ставнысӧ...»

И сяммис, майбырӧ. Делӧыс, со, кыдзи вӧлі.

Локтіс кыськӧ узьны водӧм бӧрын нин. Полошуйтіс, кок йылӧ лэптіс ставнас общежитиесӧ.

— Эй, нывъяс! Ура! — ӧдзӧсӧд пыригкості и горӧдіс сійӧ.

Машӧ вӧлі унмовсьӧ нин да узян ун йывсьыс муртса тшӧтш оз горӧд «ура». Чайтіс, бригадиршаыс локтӧма Марс вылӧ морт лэбӧм йылысь ли мый ли юӧртны. Войнас ӧд сэсся сідзтӧ горзыны, пӧжалуй, некутшӧм помка жӧ абу.

— Хы-ы-хы, — упкис-кашкис ачыс. — Кӧрт туй вылӧдз котӧртлі! Тӧданныд мый? Кирпич вайӧмаӧсь! Чӧлӧй платформа! — гажаа синъяснас кодзлалігтыр, висьтасис сійӧ. Аслас лолыс тырӧма. Пушкыштіс-кашкыштіс, тупик-тапик жӧдзыштіс места вылас да бара шыасис, быттьӧ небыд лапаяса кань тувччаліс:

— Ректынысӧ, гашкӧ, ветлам, нывъяс? А? Час-мӧд кежлӧ? — помаліс дзик нин выя бордйӧн малыштӧм моз.

— Ректыны? Кирпич? О-го-го! Кула радысла татшӧм юӧр вылад! — медводз шыасис бригадирша дорӧ Майя, пырджык водзмӧстчысь, ёсь кыввора да бригадаын медся визув нылыс. Сійӧ тешитчӧмӧн мыччыштліс Зиналы вильыш ныр-вомсӧ эшкын увсянь, пыльс серӧктіс и бӧр тювкнитіс-дзебсис. — Рад эськӧ муна, да ёна радейта войнас узьны! — горӧдіс эшкын увсяньыс нин.

— Дерт нин, мунам кытчӧкӧ войнас. Ректытӧм, а «ура» горзан. Он сет узьны, — дӧзмӧмпырысь, дышиника лэптыліс лёзь юрсӧ и Машӧ да Майя пӧдруга мозыс жӧ бӧр юр вывтіыс вевттьысис эшкыннас.

Зина весиг бӧрыньтчыштіс на дорысь воськов-мӧд. Шензьӧмысла синъясыс паськалісны. Котӧртіс, кӧсйис пӧдругаяссӧ радлӧдлыштны, а найӧ... Зиналы лои забеднӧ, ӧдзӧсланьыс бӧрыньтчигмоз сійӧ шуыштіс:

— Чайті, тшӧтш тӧждысянныд стрӧитчӧм вӧснаыс. Чайті, пӧдругаяс. А ті... И тэ, Ия, вод! Унмыд палялас! — и шурк петіс ӧдзӧсӧд.

Ия эз на удит воднысӧ: сійӧ сӧмын на воис урокъяс вылысь да буретш вӧлі ужнайтӧ.

Мыйӧн сӧмын петіс Зина на дорысь, Майя заводитіс китшйыны-серавны эшкын улас, ӧд кутшӧм кокниа мынтӧдчисны бригадиршасьыс. Петіс эшкын увсьыс Машӧ да дивитыштіс Зинаӧс:

— Аддзылінныд? Войнас... Начальство водзын чесьтӧ уськӧдчӧ...

— Ланьт, колӧкӧ, Машуня! — скӧрысь орӧдіс сылысь сёрнисӧ Ия да заводитіс тэрыба меститны пызан вывсьыс сёянсӧ.

Ия — Майялӧн чой, но дзик абу чойыс кодь. Ни абу сэтшӧм варов, ни абу сэтшӧм писькӧс. А вот шуас кӧ нин — сылысь быть кывзысь. Бригадаын Ияӧс пыдди пуктісны. Этша больгӧ, да уна вӧчӧ. Майя, сылӧн ичӧтджык чойыс, наян да визув, а чойсьыс биысь моз полӧ и кывзысьӧ. Ӧні сійӧ гӧгӧрвоис, мый Ия чойыс скӧрмӧма на вылӧ да пырысь-пыр лӧнис. Но вӧлі сёр нин. Эз прӧйдит Иялӧн скӧрлуныс и ичӧт чой бокытіыс.

— А тэ, катша, вай чеччы, пасьтась! — Ия лёкысь нетшыштіс Майя вылысь эшкынсӧ.

— Мӧданныд? — пинь пырыс сӧдзӧдӧмӧн, юаліс Машӧ, и нарошнӧ шебрасис юр вывтіыс да бергӧдчис стенланьыс чужӧмӧн. Ме пӧ бара некытчӧ ог вӧрзьы, мунӧй пӧ, колӧкӧ, ті, кык чой.

Машӧ кыліс, кыдзи Ия да Майя шарзисны-пасьтасисны, сэсся Ия, кылӧ, юаліс: — Машӧ, тэ збыль он мун?

Нинӧм эз вочавидз мӧдыс, узьӧм улӧ сетчис, ачыс думсьыс видіс пӧдругаяссӧ: «Лискунъяс, Зина кок туйӧ тувччалӧны».

Кык чой, кылӧ, петісны. Машӧ коли ӧтнас. Век кӧть ӧні узь, некод оз мешайт. Да эз жӧ мыйкӧ узьсьы нылыдлӧн. Клес шыбитіс вывсьыс эшкынсӧ, чеччыштіс джоджас. Сэсся уськӧдчис порог дорас да, ӧдзӧссӧ кальк восьтӧмӧн, пондіс кывзыны, мый керсьӧ общежитиеас. Первойсӧ коридорын вӧлі лӧнь. Сэсся кутісны кывны гӧлӧс шыяс:

— Сергей кӧсйӧ нуны самосвалнас. Ӧшинь улын нин машинаыс. Миянлы асывводз кежлӧ раз-мӧдысь кирпичтӧ кыскас дай, — кыпыд гӧлӧсӧн кодлыкӧ висьталіс Зина.

Найӧ матысмисны Машӧлань, и Машӧ гусьӧник пӧдлыштіс ӧдзӧссӧ. Нывъяс, кылӧ, котӧртісны коридор кузя ывлалань.

«Ой, ставныс кӧ мунӧны-а? Дзик ӧтнамӧн ещӧ коля! Сё трустӧ, тшӧтш ковмас мунны!»

И сійӧ пондіс тэрмасьны. Лэбаліс жыр пасьта, кватлаліс, мый ки улас веськалӧ, ӧдйӧ пасьтасис.

— Менӧ-ӧ энӧ кольӧй! — кильчӧ вывсянь лёкгоршӧн горӧдіс ныв да уськӧдчис котӧртны. Но машина журкнитіс-саяліс нин керка пельӧс сайӧ. Эз сувт.

«Нарошнӧ колисны! Но и мед! Нарошнӧ вӧтча!» — Машӧ пыркнитіс юрнас и давай пызйыны-котӧртны тӧвзьысь машина бӧрся.

Локтіс кӧрт туй вылӧ, котӧртӧмлаыс дзикӧдз пӧсялӧма-ньылӧмзьӧма. Нывъяс танӧсь нин. Юксьӧмаӧсь кык пельӧ да уджалӧны ӧтар-мӧдар платформа помас. Кымынӧнкӧ сӧвтісны нин кирпичсӧ Сергейлы самосвалас.

Кӧрт туй пӧлӧныс коркӧ кодйылӧмаӧсь канава, и ректынысӧ заводитӧмаӧсь канава мӧдарладорас. Та вӧсна нывъяс нюжӧдчӧмаӧсь чептӧн.

Машӧ кыв шутӧг тшӧтш пырис йӧз костас. Сылысь воӧмсӧ быттьӧ некод эз и казявлы.

«Вомъясас кӧ ва босьтӧмаӧсь-а? Некод тай нинӧм эз и шу», — кокньыдика ышловзьӧмӧн думыштіс ныв. Сійӧ лоис рад, мый некод эз кӧритышт сійӧс, некод эз крукась сы дорӧ.

Ӧні Машӧлы нимкодь эськӧ уджавны йӧзыскӧд радӧн, пӧсяліс удж дорас сьӧлӧм діныс, но пӧгибӧ воис — киыс кутіс кынмыны. Кӧть горӧн бӧрд. Кымыныськӧ каитчис жӧ нин кепысь вунӧдӧмсьыс. Нывъяссӧ и арся войсӧ, и кирпичсӧ дас пӧв нин ёрис, а мыждіс век жӧ асьсӧ. Кольччис йӧз дорсьыс, ыждалыштіс — ӧні ачыс жӧ и терпитӧ. А отсӧгла на дорӧ шыасьны яндзим. Мукӧддырйи ӧмӧй Машӧ мучитіс эськӧ тадзи асьсӧ? Эз, дерт. Эськӧ ки кынмӧмсӧ шутка улӧ лэдзис. Лысьтіс эськӧ и шмонитыштны, и питшӧгас кодлыкӧ гегдӧм кисӧ сюйыштлыны. А гашкӧ, и Сергейӧс бипур пестыны на тшӧктіс эсытчӧ, понӧльяс бокас. А ӧні, татшӧм нелючки бӧрад...

«Кула, а ог петкӧдлы налы кынмӧмӧс», — мӧвпаліс ныв. А ачыс дзик нин матӧ воис, эз тӧд, мый керны. Киясыс вот-вот лётмунӧны, оз кутны кабыртны кирпичсӧ. Мездіс сійӧс Зиналӧн горӧдӧмыс:

— Нывъяс, коді ме пыдди тасянь мыччалыштас!? Маш! Лок, Машук, тэ томджык, татчӧ кай! — платформа вывсянь чуксаліс сійӧс Зина.

Машӧ дрӧгмуніс. «Зинасянь быдтортӧ позьӧ виччысьны. Оз-ӧ нальк кутшӧмӧскӧ меным окты?» — Ныв сулаліс места вылас, песіс гегдӧм кияссӧ.

— Мун кай ӧдйӧджык! — йӧткыштіс Машӧӧс Ия. — Сӧмын тӧлыс сэтчӧ ёнджыка инмӧ, энлы, ме тэныд чышъянӧс сета. Менам кык.

— Оз ков, ог кынмы! — вочавидзис Машӧ, и, югыд кӧ вӧлі, дерт, Ия аддзыліс, кыдзи нывлӧн вежыньтчӧ вом дорыс. Сэтшӧма нормис сьӧлӧмыс тайӧ кывъяссьыс. «Ия кӧть и пинялас, но сійӧ жӧ и тӧждысьыштас», — думыштіс Машӧ и сылы весиг быттьӧкӧ лои шоныдджык. Кокни сьӧлӧмӧн уськӧдчис платформалань.

— Маш, ме звӧнитны котӧртла, тэ тан командуйтышт! — вылас кавшасьӧм бӧрын шыасис сы дорӧ Зина да чургӧдіс Машӧлы кепысьсӧ:

— На, босьт, менам зэв шоныд!

Машӧ весиг кыв эз удит шуны, Зина мыччис кепысьсӧ да тювис му вылӧ. А увдорсянь нывъяс тэрмӧдлісны нин сійӧс:

— Дрӧж босьтіс! Машӧ, мыччав вай ӧдйӧджык!

«Оз лэдзны весиг киӧс шонтыштны. Энлӧ, мед киӧй дугдылас пиалӧмсьыс! Пӧсьӧдла ме тіянӧс!» — грӧзитчыштіс Машӧ да кыдзкӧ пиньяс отсӧгнас сюйис турдӧм кияссӧ Зиналӧн небыдик кепысьясӧ.

Дыр-ӧ, юрсӧ лэптывтӧг, уджаліс ныв, оз тӧд. Сувтіс тай коссӧ веськӧдыштны да аддзис Зинаӧс-а. Орччӧн сыкӧд сувтӧм да тшӧтш шыблалӧ кирпичьяссӧ му вылас.

— Локтін нин?! — шензьыштӧмӧн горӧдіс Машӧ.

— Локті. Зіля зэв уджалан, да эг нин торк тэнӧ. Шыблалышта муас. Бӧрынджык машинаӧ сэсь сӧвтам, а ӧні ӧдйӧджык платформасӧ колӧ прӧстмӧдны, — шуаліс Зина. А Машӧ мучитчис-думайтіс: кытчӧ татшӧм ӧдйӧсӧ котӧртліс Зина? Мыйла сылы колі звӧнитнысӧ? Друг сылӧн ыпнитіс чужӧмбаныс, гӧгӧрвоис: эз звӧнитны ветлы Зина. Бригадирша казяліс, кыдзи мучитчӧ Машӧ и, медым сетны сылы ассьыс кепысьсӧ, думыштӧма кутшӧмкӧ телефон.

«Ок, Зина! А ачыс... кепысьтӧм. Ковта сосъяссӧ, со, лэдзалӧма, тоньвидзӧны фуфайка сосъяс увсяньыс. Абу пӧдикӧ кивыв сылы сідзсӧ?

Видзӧдіс Машӧ бригадирша кияс вылӧ и нюмдіс. Пӧрччис кисьыс небыд кепысьяссӧ. Шоныдӧсь киясыс, жарӧн ыпайтӧны. Кор и шоналӧмаӧсь? Ворсӧдчӧ-тіпкӧ вирыс быд чунь помын, быттьӧ налӧн ичӧтик сьӧлӧмторъяс чужӧмаӧсь пиалӧм бӧрад.

— Зина, на кут! Менам зэв шоныдӧсь, — бригадирша моз жӧ, кыдзи сійӧ ӧнтай, Машӧ шыбитіс сылы кепысьсӧ.

Зина эз сяммы кутнысӧ да вак-вакӧн серӧктіс, тоньвидзысь ковта сос помъяссӧ Машӧлы петкӧдлігтыр. Серавны заводитіс и Машӧ.

— Эй, ті сэні! Он-ӧ нин концерт лӧсьӧдчӧй петкӧдлыны?! — увдорсянь шум лэптісны нывъяс.

— А мый нӧ, концерт кӧ? Со, джоджыс тыдовтчис нин! Позьӧ и йӧктыштны! — Зина лӧсьыдика тутш-тотшкерис кокъяснас платформа джодж кузя, паськыда шеныштчис кияснас.

— Регыд нин ректыссяс! Ок и молодечьяс жӧ ми! — радлыштісны нывъяс.

И, со, платформа прӧстмис.

Мунісны нывъяс. Лӧнь лои кӧрт туй вож вылын. Тыртӧм платформасӧ кытчӧкӧ чушкис-кыскис паровоз. Сӧмын коли сэтчӧ войсӧ узьны ыджыд кирпич чукӧр. Ньӧжйӧник лэбалісны лым чиръяс, вевттисны му эжсӧ еджыд эшкынӧн.

Лӧнис и нывъяслӧн общежитиеын. Чӧскыд унмӧн узисны нин быд жырйын. Машӧ унмовсьтӧдзыс нюмдіс долыд нюмӧн. Тӧд вылас уськӧдіс и ассьыс йӧйталӧмсӧ, и кынмӧмсӧ, и кӧрт туй вывсянь бӧр воигас Зиналысь кывъяссӧ:

— Мыйта лои вӧчӧма! Аски оз ковмы корсьны кутшӧмсюрӧ удж. Сувт аслад местаӧ да тэч выль керка стен! Лӧсьыд, кор этатшӧм пӧдругаяс тэнад эмӧсь!

«А збыль ӧд, лӧсьыд, кор бур пӧдругаясыд эмӧсь, — унмовсигас думыштіс Машӧ. — А Зинаыс...»

Машӧ нюмдіс и сідзи нюмсорӧн и унмовсис.

Югыд думъясӧн садьмис сійӧ и аскинас. И удж вылас муніс долыдпырысь.

Столӧвӧйӧ пыранінын, ӧдзӧс водзас, сулалісны уна йӧз. Сувтовкерис и Машӧ. Аддзис ӧдзӧсас ляскӧм ыджыд бумага лист.

«Молния номер один! — лыддис сійӧ. — Ура! Ура! Коймӧд бригадаса нывъяс...» — вӧлі гижӧма гырысь букваясӧн тайӧ листокас, и ставныслысь, бригадаса нывъяслысь, ним-овнысӧ лыддьӧдлӧма. Машӧлӧн овыс, мыйлакӧ, медводзас сулалӧ.

Лыддьӧ ныв и синмыслы оз эскы. Коді нӧ удитӧма на йылысь тӧдмавны дай тадз гижны? Асьныс тай нӧ муртса вевъялісны сыркнитыштны.

Быдӧнлы нимкодь, кор ошкыштасны. Сӧмын Машӧлы абу лӧсьыд тайӧ ошкӧмсьыс — яндзим. «Колӧ жӧ, сылысь овсӧ ещӧ медводзас гижӧмны. Зина мый шуас, тайӧс аддзас да?»

Машӧлы и сёйнысӧ эз кут ковны. Ия да Майя — кык чой-пӧдругаясыслы — шеновтіс кинас, пырӧй пӧ завтракайтӧй, ме регыд локта, и котӧрӧн стройплощадка вылӧ.

Сё дивӧыд! Тані тай нӧ тшӧтш сэтшӧм листъясыс дӧлалӧны! И лэптан кирпич стенас, и ӧграда пӧвъяс вылас ляскалӧмаӧсь татшӧм жӧ «Молнияяс». А коймӧд судтасянь, кирпич стен вывсянь, Машӧлы ӧвтӧ кинас Зина.

«Тан нин, тӧдӧ нин «Молния» йывсьыд, — жугыльмискодь Машӧ, а сэсся друг вирдыштіс мӧвп: А гашкӧ, ачыс Зина и гижис «Молнияяссӧ» да? Тшук сійӧ, некодлы сэсся! Войнас, кор ми узим, сійӧ гижалӧма дай талун асыв удитӧма нин ляскавны быдлаӧ. Но и сюсь, быдтор вевъялӧ!»

Машӧ кутіс воча ӧвтчыны сылы.