ПИТЕРСАЫД — АСЛЫССЯМА ЙӦЗ

Думыштан да, тешкодь лолӧ, кыдзи вермӧ судьбаыд морттӧ новлӧдлыны олан туйвежъястіыс. 1970 воын, кӧкъямыс класс помалӧм бӧрын, дас нёль арӧса нывка Машенька пӧдругаясыскӧд тшӧтш муніс Ленинградӧ. Пӧдругаясыс дас класс помалӧм бӧрын пырисны медицинскӧй институтӧ велӧдчыны, а Маша кӧкъямыс класснад некытчӧ абу веськалӧма. Но гортас бӧрсӧ абу локтӧма. Кольчча пӧ Ленинградӧ и ставыс! Медасьӧма вӧлі ӧти семьяӧ кага видзны. Во гӧгӧр кага видзӧма. А сэсся больничаӧ пырӧма санитаркаӧн уджавны да ӧти сайсянь и рытъя школаӧ ветлыны кутӧма.

Писькӧс, сюсь нывкаыд сэксянь и олӧ Петербургас. Ӧні со нин, быттьӧ тӧждысьысь кӧзяйка, карыслӧн шог-могнас юксьӧ да висьтасьӧ аслас олӧм-вылӧм йылысь. Нева вылас сылӧн семья, ныв-пи, бабӧн шуысь да весиг и дача. Верӧсыс военнӧй моряк, важӧн семьясьыс кӧдзалӧма, оз ов накӧд, но корсюрӧ пӧ челядьӧс видлыны волӧ. Мария Алексеевна оз и жалит верӧсыскӧд торъялӧмсӧ. Сыкӧд пӧ ме эськӧ эг и вермы удж кузя быдмыны, а ӧні пӧ ме — госслужащӧй...

Висьтасьӧ Мария Алексеевна Питерын олӧм-вылӧм йылысь, а ме кывза сійӧс, да син водзӧ сувтӧ войнабӧрся Ленинград. Нэм джын кольӧма сійӧ кадсяньыс, кор ме ачым первойысь волі Ленинградӧ, а нинӧм на абу вунӧма, ставыс на син водзын. А сэки буретш пасйисны карыслысь 250 вося гӧгрӧс пас. Ме, дерт, сэтчӧ мунігӧн эг и думыштлы некутшӧм юбилей йылысь. Ми семьяӧн буретш сійӧ тулыснас суйӧр сайын квайт во коллялӧм бӧрын воим Интаӧ овны. Пока, мися, удж вылӧ эг на пыр, ветла Ленинградӧ, карсӧ видзӧдла да чоюк гу вылӧ кӧть ветла. Кызь арӧса невеста нылӧн ӧд сійӧ кувліс Ленинградас, веськыда операционнӧй пызан вылас вӧлі лэдзӧма ловсӧ. Сэні и дзеблӧмаӧсь. Кыдзи нӧ он ветлы гу вылас, эм кӧ позянлун?

Муні поездӧн, а бӧрсӧ локны ог вермы. Сибді сэтчӧ. Куим-ӧ-нёль лун кежлӧ муні, да ковмис овны кык вежон. А, колӧкӧ, и нӧшта на вежон ковмис овны сэні, не кӧ Жора дядьӧ. Сійӧ кыдзкӧ вермис военнӧй эшелонӧн, салдатъяскӧд, менӧ мӧдӧдны Вӧлӧгдаӧдз.

Вӧлӧмкӧ, ыджыд карыдлысь юбилейсӧ пасйыны воӧмаӧсь гӧсьтъясыд быд пельӧсысь. Бӧрсӧ мунӧм вылӧ найӧ водзвыв билеттӧ босьтӧмаӧсь, а меным эз сюр.

Петербургад тай миян землякъяс, Комиысь петӧм войтырыс, и водзті, царь дырйи на овмӧдчылӧмаӧсь, да и бӧрынджык, Совет кадӧ тшӧтш. А миян кебрасаяс — Мулицынъяс, Куратовъяс, Кичигинъяс — войнаӧдзыс волӧмаӧсь Ленинградас да овмӧдчылӧмаӧсь, война кадсӧ сэні коллявлӧмаӧсь и.

Мулицынъяс семьянас уджалісны Кировскӧй заводын. Патераыс налӧн дзик завод бердас и вӧліс. Меным на ордӧ эз мойви пыравнысӧ. Некор вӧлі. Сыӧдз-ӧ! Гӧститчӧмӧдз-ӧ?! Кор карыс ставнас пуӧ, пасйӧ ассьыс 250 вося юбилейсӧ. Но асьныс, Мулицынъяс, эз и орӧдлыны мекӧд йитӧдсӧ. Аддзысьлім Дворцӧвӧй площадь вылын, кӧні ёнджыкасӧ и чукӧртчылісны карса войтырыс, да теплоходӧн Финскӧй залив кузя кывтлім-ветлім накӧд Кронштадтӧдз. Эз ӧтдортчыны и шойнаӧ ветлӧмысь, менам чоюк гу вылын тшӧтш вӧліны. А олі ме, патеруйті Жора дядь ордын. Шань да лӧнь мужичӧй вӧліс. Зілис Ленинградса военнӧй гарнизонын вурсьысь-шӧрасьысьӧн. Зато Настя гӧтырыс, миян кебраса жӧ, ой варов да сибыд, сюсь вежӧра. Уджаліс сійӧ паськыда нималана «Астория» ресторанын официанткаӧн. Вердіс-юктӧдіс суйӧр сайысь воӧм гӧсьт-гӧстяӧс. Сійӧ ылӧсас, дерт, тӧдіс уна иностраннӧй кыв, кужис сёрнитны да ӧти кывйӧ воны и гажӧдыштны «миссис-мистеръясӧс». Ресторан залас кӧ сійӧ мыччысьӧма, тшук нин кодлыськӧ серамсӧ петкӧдлас. Ме сы дорӧ кык вежон чӧжыд быд лун пӧшти пырыштлі сёйны-нуръясьны да ставсӧ аддзывлі. Серамӧй ӧні на петӧ, кута казьтывны да. Менӧ вӧлі велӧдӧ: сёрнит пӧ сӧмын ас кывйӧн, комиӧн, мед пӧ ставыс чайтасны тэнӧ иностранкаӧн. Мед пӧ пыранінас дежуритысь лакейыс оз крукась тэ дорӧ. А пыран кӧ пӧ, ме тэнӧ гӧститӧда нин быд чӧскыднас!

— Гӧль ведь на выдумки хитра, — серӧктыштас да шуыштас. — Ӧмӧй ме, тётя Настяыс, тэнӧ, землячкаӧс да рӧдпомӧс, лэдза кодлыкӧ мӧдлы вердны-юктавны? Меным быть верд да юктав, менам гӧстя да! Менам патерантша да, — горалӧ гӧлӧснас, а вомыс паськыда шешвидзӧ.

Патераыс налӧн Мойка берегын, Пушкин керкакӧд орчча. Мӧд судтаас ӧти ичӧтик жырйын олісны найӧ витӧн. Асьныс гозъя, Витя пиыс Тамара гӧтырыскӧд, да дасӧд классын велӧдчысь нылыс, Тамара жӧ.

— Миян кык царица Тамара! Тамара первая да Тамара вторая! — серамсорӧн ошйысьліс Настя тьӧт. — Озыра олам!..

Царица Тамара вторая виччысис кага да эз уджав, сыкӧдджык ме лунсӧ и колльӧдлі. Мукӧдыс, коді школаӧ да коді удж вылӧ, асывсяньыс мунасны, а Тамара вторая кольччӧ мекӧд. Бӧръя вежонъяс кӧть нӧбасис, оз вӧлі гортас пукав, бара и нуӧдас менӧ карас. Шуас: тэд пӧ колӧ унджык аддзывны да тӧдмавны, ветлам талун Зимньӧй дворецӧ, Эрмитажӧ пыралам. Нуӧдлас и Роч музейӧ. Исаакий пӧ видзӧдлыны колӧ, да и Казанскӧй собор. Петергофӧ эськӧ ветлыны, да ог пӧ нин лысьт сэтчӧ кыпӧдчынысӧ. Васильевскӧй ділысь стрелкасӧ видзӧдлыны пӧ позьӧ ветлыны и... Пасибӧ, царица Тамара вторая уналаӧ менӧ новлӧдліс, быдтор петкӧдліс. Воам рытъявылыс лёшмӧмаӧсь. Сійӧ водӧ шойччыны, а царица Тамара первая воӧма нин школасьыс, менӧ нуӧдӧ мамыс дорӧ ресторанӧ. Восьлалам царица Тамара перваякӧд, сійӧ кутӧ менӧ киӧд, варовитӧ:

— Тэ гӧгӧрвоан, «Асторияӧ» мунам ми... сёйны... Тешкодь... Мариинкаӧ эськӧ тшӧтш ветлыны. Мамӧ ӧд вермӧ билетсӧ сэтчӧ судзӧдны, да оз кӧсйы, пинялӧ менӧ. Сэтчӧ пӧ ӧд ветлӧны сӧмын иностранечьяс да тшӧкӧлдывайтысьяс. Ичӧт на пӧ тэ шышка, быдмышт, велӧдчы да вӧлись. А ме быдми нин, то нин мый ыджда!

Сійӧ шевгӧдлӧ кияссӧ, сувтлӧ кок чунь йылас, быттьӧ кузь кока тури кӧсйӧ шылкнитны-лэбзьыны вывлань. Лӧсьыд! Мича-а нывка! Юала, дас класстӧ, мися, помалан да кытчӧ кӧсъян пырны велӧдчынытӧ? Сійӧ ышловзьӧ:

— Консерваторияӧ окота, но пианинотӧгыд... Аддзан, миян патераным кутшӧм, пианиносӧ кытчӧ пуктан? Муна, навернӧ, ме кутюрьеӧ велӧдчыны, моднӧй паськӧм кӧні вӧчӧны. Ме сямма, этайӧ платтьӧсӧ ачым шӧралі да вури!

Платтьӧыс сы вылын и збыль зэв лӧсьыд.

— Ачыд кӧ татшӧм лӧсьыдасӧ вурин-вӧчин, тэысь и збыль бур модельер артмас, — эскӧда ме сійӧс, а сійӧ радысла бара на шевкнитлӧ кинас, быттьӧ балерина. Кӧні сійӧ ӧні, збыльмыліс-ӧ кӧсйӧмыс? Тӧда сӧмын: мунлӧма верӧс сайӧ Прибалтикаӧ, а сэсянь, буракӧ, и Америкаӧ сетчӧма. Мам-бать кулӧм бӧрас воштім йитӧдсӧ и челядьыскӧд. Олӧмыс сэтшӧм ӧдйӧ вежласьӧ, да он и удит сы бӧрся вӧтчынысӧ. Сэки миян Тамараыдкӧд «Астория» ресторанад эз и удайтчы ужнайтнытӧ. Кильчӧ помас паныдасис мамыс, Настя тьӧт, миянӧс аддзис, лапкучкысис:

— А сё сӧтанаяс! Эта дыра он локтӧ... Гортын ужнайтанныд...

Гортас ужнайтыштӧм-чайӧвайтыштӧм бӧрын, Витя гозъяысь кындзи, ставӧн петім карас гуляйтны. Дворцӧвӧй площадь вылӧджык тайӧ лунъясас войтырыс чукӧртчӧ, да ми тшӧтш сэтчӧ. Сэні и концерттӧ петкӧдлӧны, и гудӧк шы улӧ частушка сьывны ӧтувтчӧны. И Нева берегті гуляйтӧны, югыд войнас нимкодясьӧны. Сэні и ми тшӧтш Мулицынъяскӧд аддзысям да Настя тьӧт Ольга чойыскӧд. Найӧ — кык чой — пӧттӧдзыс ливкйӧдласны ассьыныс томдырся сьыланкывъяссӧ: «Ылын-ылын роч Кавказын уна-уна киссис вир» и «Аржак был парень бравый», и дерт жӧ, «Катюша» да Ладога йылысь, «Дорога жизни» йылысь. Тайӧс сьылігӧн кык чой менӧ дасысь малыштасны да окыштасны. Тэнад пӧ вед батьыд Ленинград вӧсна тышкасис, Ладога вылас матросӧн служитлӧма, миянӧс тшыг кулӧмысь спаситлӧма.

Батьӧ збыль миянлы моряк паськӧма карточка ыстыліс. Гожӧмнас военнӧй караб вылын Ладога ты видзӧма фашистъясысь, тӧвнас сэн жӧ, йи вылас, связнӧй. Пӧгибнитліс нелямын нёльӧд вося гожӧмнас. Чеччыны кутасны караб вывсьыс морякъясыд, а берегас найӧс вӧрӧгыд виччысьӧма нин. Визинса ӧти дядьӧ вӧлі ловйӧн кольӧма, висьтавліс та йылысь.

Час-мӧд гуляйтыштӧм бӧрын, ыззьӧмаӧсь, кыпыдӧсь, бӧр локтам гортӧ, асланым дзескыд жырйӧ. Колӧ водны, шойччыштны, аскинас бара удж вылӧ колӧ мунны. И аслыныс некӧн ёна паськыда вольсасьӧмнас узьны, а сэні нӧшта ме.

— Тӧрӧдчам! — жервидзӧ вомыс Настя тьӧтлӧн. — Миян патераыд резинаысь! И не тэнад кодь гӧсьт-гӧстяӧс примитлім-узьтӧдлім! Энька мамыдлӧн Ася чойыс лётчик-ас верӧсыскӧд эз ӧтчыдысь узьлыны миянын. Ветласны Украинаас пӧрысь мам-батьсӧ видлыны, сэсся бӧр военнӧй частяс мунӧны. Коми землякъяс и... Патератӧ сьӧрсьыд он новлӧдлы, а Ленинградыд абу сикт, шойччыныд он пӧрӧдчы кильчӧ вылад ни амбар бокад...

Кык вежон узьлі-олі на ордын, да некор эг кывлы, медым кодкӧ дӧзмӧма да ыждалӧ. Пыр ставныс мӧда-мӧдыскӧд и мекӧд бур кывйӧн, пыр вомныс нюмвидзӧ. Ме ӧтчыд и гарышті Настя тьӧтлы тайӧс. А сійӧ:

— Эн вунӧд: ми — ленинградсаяс! Войнаыс велӧдіс терпитны да мӧда-мӧдӧс гӧгӧрвоны. Ленинград-питерса — аслыссяма йӧз!

Вольсалас вӧлі лӧсьыдика джоджас меным да Тамара нылыслы, шуас, водӧй пӧ, спокойнӧй ночь!

И сэк жӧ асьныс Жора дядькӧд кытчӧкӧ быттьӧ сыласны. Оз кывны ни тыдавны. Аскинас водз асывнас кылан тьӧтлысь гӧлӧссӧ:

— Подъём!

Ми Тамаракӧд садьмам. Тамара нюжмасьӧ, ун пырыс шыасьӧ:

— Бара милицияын узинныд?

— А кӧн нӧ? — паськыда серӧктӧ мамыс — Милиция меня бережёт! Ми сэтчӧ гостиницаӧ моз нин велалім! Чеччӧ вайӧ! Ті кык Тамара царицаяс батьтӧ да Витюшӧс нурйӧдыштӧй мыйӧнкӧ, мед мунасны, уджаласны. Ме котӧрта. Талун ме первой сменаын уджала. А колӧкӧ, и мӧд вылас тшӧтш кольчча, уджыс уна. А ті, бобӧяс, эн вунӧдӧй ме дорӧ волынытӧ, морт ног кӧть сёйыштанныд. — Тайӧс меным вылӧджык нин шуӧ. Сэсся сійӧ тэрмасьӧмӧн эновтӧ миянӧс. Царица Тамара первая чеччӧ, тэрмасьтӧг, дӧзмытӧг идралӧ вольпасьсӧ да шыасьӧ ме дорӧ:

— Талун миян школаын бал, йӧктыны кутам. Пӧжалуйста, сетлы меным рыт кежлас Кармен платтьӧтӧ. Йӧктігад солнце-клёшыс парашют моз кутас паськавны. А бӧждорас розаясыс... Окота став зонсӧ йӧймытӧдзыс ылӧдлыны!

— Да кыдзи нӧ ог сет, кажитчӧ кӧ, — шуа ме. — Колӧкӧ, пыр кежлӧ босьт, менам гортын мӧд на эм, сӧмын сэні абу розаяс, а еджыд лилияяс.

— Ой! — чилӧстӧ Тамара да менӧ тайкӧ оз пӧдты аслас сывйын. — А кытысь тэныд татшӧм платтьӧыс? Интаад вузалӧны? Интаыд ыджыд кар?

— Ичӧтик шахтёрскӧй кар сійӧ, зэв на том, дас арӧса на сӧмын, — шуа ме. — Сэні гӧгӧр тундра. А ми тундра шӧрас буретш 15-ӧд шахта-миллионерша заводитім стрӧитны. И олам ми ичӧтик сборно-щитӧвӧй керкаын. Жыръясас шоныд и вӧля, абу тіян кодь дзескыд.

— И театр тіян сэні абу? Ме тэнӧ быть нуӧдла Мариинкаӧ!

— Но, тэ размечталась, — ыджыд кынӧмсӧ малалігтыр пырис общӧй кухняысь царица Тамара вторая, ичӧтик креслӧӧ пуксигмоз, миянлы юӧртіс: — Витя батькӧд кухняын кофеӧн чӧсмасьӧны. Петӧй, завтракайтыштӧй. Нянь и булочки эм. Холодильникас студень эм и. Батьыд тай пыр шуӧ: студеньсӧ ёна сёйӧй, лысьӧмыд некор оз кут висьны, дай донтӧм и быдлаын вузалӧны.

«А миян Интаын сӧмын макарон да треска чери», — мӧвпала ме, но гораа ог висьтав, мед оз чайтны: норася да кулита ассьым Интаӧс. Ме кӧть Интаын неважӧн на, велалі нин, кажитчӧ сэні. Гажа, сы мында том йӧз воӧмаӧсь выль шахтатӧ стрӧитны. Рытъяснас сарай кодь клубын и кино петкӧдлӧны, и йӧктыны позьӧ усьтӧдзыд. Гажӧй нин бырны кутіс Интаысь и ас семьяысь. Ленинградад лӧсьыд-лӧсьыд, да гортад бурджык на.

Ӧти рытӧ Жора дядь вайис меным бур юӧр. Шылькнитіс юрсиӧд да шуӧ:

— Но, мый, ичмоньӧ? Гажтӧмтчин Колясьыд? Эн шогсьы. Ме сёрнитчи нин. Нуасны тэнӧ Вӧлӧгдаӧдз военнӧй эшелонӧн. А сысянь мунан нин кыдзкӧ. Войвылад мунысьыд ӧні этша, лунвывланьджык гожӧмнад катовтӧны. А военнӧйяссьыд эн пов, тэнӧ оз ӧбӧдитны. Поездас тан пуксьӧдам-колльӧдам-а...

Кутшӧм шогсьӧм? Радла тайӧ бур юӧрыслы. Но Ленинградкӧд торйӧдчытӧдз нӧшта на ме ӧтитор тӧдмалі да аддзылі. Сійӧс казьтылігӧн серамӧй петӧ жӧ, а сэки сьӧлӧмӧй ёна жӧ пыдзыртчыліс.

Настя тьӧт кутіс шуны, мунан пӧ сэсся аски, а Ольгалысь выль патерасӧ эн и аддзыв. Ветлам пӧ, а то сійӧ забедуйтны кутас.

— Ветлам инӧ, — сӧглас сеті ме, Жора дядь оз жӧ пыксьы.

Трамвай ни поезд сійӧ выль районад эз на ветлы. Автобус нуис, сэсся подӧн выль стрӧйбаяс пӧвсттіыс дыркодь мунім. Ольга, Настя чойыс кодь жӧ, визула примитіс миянӧс выль патераад. Быд жыр и чулан петкӧдліс, быд чӧскыд винанас номсӧдліс. А дыр пукавны миянлы некор, ёна сёрмытӧдзыс бӧр колӧ мунны. Ольга шуӧ:

— Узьӧй миянын.

Ми шуам:

— Ог, кыдзи узям! — Сёркодь нин вӧлі, бара автобусӧ пуксим да мӧдім гортӧ. Чеччим автобуссьыс, а Мойкаӧдз ылынкодь на подӧнтӧ мунны.

— Мунам, — горалӧ Настя тьӧт. — Подӧннад и не та мында на ветлывлім.

Быттьӧкӧ тай Ольга дорын видзчысьӧмӧн винасӧ юисны, а коддзӧмаӧсь, буракӧ. Настя тьӧт сьывны горӧдіс: «Питер кузя кӧ ме муна кузяла и пасьтала-а...»

Жора дядь сылы:

— Эн дур, Настасья, — мӧдыс оз ӧвсьы, горалӧ: — Ме нӧ мый лёксӧ вӧча? Радӧйла ме сьыла. Аслам карті муна, некодысь повтӧг! Сьылӧмыс нӧ лёк?

И бара горӧдӧ: «Выпьем за тех, кто командовал ротами, кто воевал на снегу...»

Йӧзыс ывлаас абу лунся мында, но кар оз узь, сэні и тані кылӧ музыка шы, ветлӧны параяс, чукӧрӧн-чукӧрӧн том йӧз. А том милиционер быттьӧ сэні и вӧлӧма. Еджыд формаа, праздник кежлад и найӧс мичаа вӧччӧдӧмаӧсь, чесьт миянлы сетӧ:

— Товарищи граждане, вы нарушаете правила социалистического общежития.

— Да тӧдам, пиукӧ, — шеновтӧ ки пӧвнас тётя Настя. — Но, понимаешь ли, олам ми ылын, транспорт сэтчӧ оз ветлы... Горалігас гажаджык, вот и сьылышті... Абу ми кулиганъяс...

— А вот сэні и висьталанныд, кодъяс ті, — томиник милиционерыд зырны кутіс миянӧс водзлань. Топайтӧй пӧ.

— Тэ, пиукӧ, кытчӧ миянӧс нуӧдан? Он-ӧ милицияӧ? — юалӧ Настя тьӧт.

— А тэ кытчӧ кӧсъян? «Асторияӧ»? — серӧктыштӧ милиционерыд. Кутшӧма жӧ шай-паймуніс миян стражыд, кор тётя Настя ыджыд гӧлӧснас немецкӧй кыв вылын шыасис:

— Гут, гут, зэр гут! Иш либен «Астория»!

Милиционерыд букыштчылӧ Настя тьӧт вылӧ да тэрмӧдлӧ миянӧс:

— Ноко, чожаджыка восьлалӧй!

Настя тьӧт вашкӧдӧ миянлы:

— Чайтӧ миянӧс шпионъясӧн.

Жора дядь дӧзмӧма сы вылӧ, вашкӧдӧ жӧ:

— Йӧй баба, чӧв ов!

Менам серамӧй сэтшӧма петӧ, но ог лысьт серавнысӧ. Серам пыдди артмӧ кутшӧмкӧ кашкӧм, но, мися, и сюри, пуксьӧдасны ӧні тюрмаӧ дай. Яндзимыд! Эг и казявлы, ылӧдз-ӧ мунім стражыдкӧд. Кватитчи да, кутшӧмкӧ ыджыд ӧдзӧс сайынӧсь нин. Кузькодь пемыд коридор. Ылынкодь би югвидзӧ. Шуйгавылас пызан сайын пукалӧ дядьӧ, милиция паськӧма, веськыдвылас кӧрт решётка сайын морт, ляскӧма чужӧмсӧ сетка бердас, кӧин моз сюся видзӧдӧ миян вылӧ. «Ой, сьӧлӧм поті! Йӧртасны эсы дінӧ дай», — вирдалӧ юрын мӧвп, сьӧлӧм кӧсйӧ чеччыштны вом пыр.

— Вот, нарушительясӧс вайӧді — сюся висьталӧ миян томиник стражыд. — Разберитчӧй. Абу, буракӧ, миян карсаяс.

Сійӧ эновтӧ миянӧс, шурк бергӧдчӧмӧн мунӧ коридор кузя петанінланьыс. А пызансайса милиционер дядьыд миянӧс быттьӧ оз и аддзы, лапӧдӧ чуньнас пызан кузяыс. Жора дядь вӧчис воськов водзлань, мыйкӧ кӧсйис шуны, но Настя тьӧт ордйӧдіс сійӧс, сувтіс водзас, шыасис:

— Ми абу ленинградсаяс?! Ми абу... Ме, гашкӧ, сёӧс эсійӧ бомбаяссӧ вевт вылысь ас киӧн кватитлі! Али тшыг кулӧмаясӧс эг аддзыв?..

— Ладнӧ, — шуӧ милиционерыд да юалӧ: — Документныд эм?

— Кутшӧм документ... Ывлаӧ петіг век ӧд он босьт, — заводитлӧ дорйысьны Жора дядь.

Сэки шыаси ме. Мися, менам сьӧрысь.

— Да, да, Нинук, петкӧдлы, петкӧдлы! — радлыштӧны тьӧт и дядь. Ме вылӧ индігмоз тьӧт висьталӧ милиционерыдлы:

— Батьыс талӧн Ленинград дорйигӧн пӧгибнитіс. То нарошнӧ Сыктывкарсянь воӧма мортыс...

Тайӧ каднас кысянькӧ мӧд жырсяньыс, кокъяснас клопакылігтыр, мыччысис мӧд милиционер, киас зёльӧдчӧны ключьяс. Миян дорӧ матыстчис, серамсорӧн юаліс:

— А тіян пӧ сэні Сыктывкарад уличтіыс ошъяс гуляйтӧны?

Ме шай-паймуні, нурбыльтышті:

— Ме ог тӧд. Ме некор эг аддзыв.

Но Настя тьӧт, варов аньыд кыв-ворсӧ эз вошты, паськыда нюмъёвтӧмӧн жӧ вочавидзӧ:

— Да, висьталӧны и эм вӧлі, ӧти ош пӧ ветлӧма и эм... война каднас... Нывбаба паныдасьӧма сыкӧд да садьсӧ воштӧма. А ошкыд исыштас сійӧс да кыдз тай пышйыны! Ӧдйӧ ӧд бӧр пырас аслас клеткаӧ! Ленинградса ош ӧд вӧлӧма, интеллигентнӧй! Миянлысь зоопаркнымӧс сэтчӧ, Сыктывкарас, вуджӧдлӧмаӧсь война каднас.

Нюмдыштӧ и менсьым паспортӧс киас босьтысь милиционерыд. Син пырыс нуӧдыштіс, листалыштіс да бӧр мыччис меным, шуис:

— Ме абу ош, ог повзьӧдлы гӧсьтъясӧс. Но век жӧ, кӧсъя тӧдны, мыйысь тіянӧс татчӧ вайӧдісны?

— Сьылӧмысь. Гора гӧлӧсысь, — шуӧ Настя тьӧт да заводитӧ висьтавны и тарытъя кад коллялӧмсӧ, и став семейнӧй секретсӧ, дзескыд олӧм-вылӧмсӧ, а сэсся кевмысьӧмӧнмоз и шуӧ:

— Тӧварыш милиционер, бобӧнянь, лэдз тэ, пӧжалуйста, этайӧ кык пӧрадошнӧй гражданасӧ гортӧ, менӧ, мыжасӧ, верман и кольны вой кежлас, узя кӧть морт ногӧн крӧвать вылын.

Милиционер сылы воча:

— За неимением причины... Мунӧй гортад, шойччӧй, сёр нин... Нӧрӧвитлӧй, миян дежурнӧй машина эм...

— Лэдзанныд? Машинаӧн колльӧданныд? А миян милицияысь прамӧйджык йӧзыс кодкӧ эм абу-а. Пасибӧ жӧ... — горалӧ Настя тьӧт пемыд коридорті ывлаӧ петігмозыс...

Да... тайӧс гарыштан да сёысь думыштлан быдторсӧ, шуам, кор видзӧдан ӧні «Бандитский Петербург» кинофильмсӧ. Кадыс мунӧ и дугдывтӧг вежсьӧ.

А колльӧдісны аскинас менӧ куим мужичӧй: Жора дядь, Ольга тьӧтлӧн пиыс (нимыс вунӧма нин) да сылӧн ёртыс. Найӧ кыкнанныс чотіктӧны, беддяӧсь, госпитальсянь вӧзйысьӧмаӧсь землячкатӧ колльӧдны. Решёткаа вагон ӧшиньяс пырыс видзӧдчисны салдатъяс да шмонитісны ме вылын, тэ пӧ госпитальысь жӧ али мый петін? Кавалеръясыд тай беддяӧсь. А вагон ӧдзӧс дорас сулаліс том офицер гӧтырыскӧд да ичӧтик нывкакӧд. Найӧ шенасисны кинас, корисны-чуксалісны менӧ ас дінас.

— Накӧд и мунан, — шуис мем Жора дядь да йӧткыштіскодь мышсянь.