ОЛЫШТАН ДА, МУСА ЛОӦ
Найӧ пукалісны ӧта-мӧдыслы паныд. Жара ломтысис ичӧт пач, сылӧн кельдӧдӧм плитасянь шоныдыс лыньгис-разаліс ичӧтик пелькиник жыр пасьта да весиг вӧрӧдыштіс ӧшиньяссьыс кокньыдик тюль занавесъяссӧ.
Кӧзяйкаыс, Анастасия Васильевна, пенсионерка, дженьыдик соска ситеч халата, пукаліс улӧс вылын пач бокас, видзӧдіс виччысьтӧм гӧсьтыс вылӧ, а тӧкӧтьӧ дрӧжжитысь вом доръясыс дасьӧсь нин вӧлі койыштны гӧсьтыслы скӧр кывъяс. Но сэтшӧм шӧйӧвошӧм вӧлі гӧсьтыс, сэтшӧм жугыльӧсь да кевмысянаӧсь сылӧн синъясыс, мый олӧма нывбаба эз тэрмась дӧзмӧмсӧ висьтавны веськыда.
Виччысьтӧм гӧсьтыс, ӧнӧдз некор пыравтӧм гӧсьтыс, вӧлі краж кодь ён мужик Педь Вась Степан, матысса сусед. Ас гындӧм выль гын сапӧга, сьӧд ыж ку пася, пукаліс сійӧ пызанбокса лабичас да, тешкодя став ловнас турыштчӧмӧн, виччысис нывбабасянь воча кыв. Сылӧн чуньясыс дугдывтӧг дебелитісны пидзӧс вывсьыс сьӧд кролик шапка кӧвсӧ, кыз синкым улас посни синъясыс пӧшти эз лапмунлыны.
Кӧзяйка казяліс Степанкӧд орччӧн лабич вылысь серӧн кыӧм вурун кепысьяссӧ да гӧгӧрвоис, мый сы дорӧ корасьны локтігас жӧникыд пасьталӧма медбур кӧлуйсӧ. Лэптӧм пась воротниксьыс голяыс жӧниклӧн ньӧти эз тыдав, быттьӧ ыджыд юрыс веськыда паськыд морӧссяньыс быдмӧма, муошлӧн моз. Анастасия Васильевналы пыр и уси тӧд вылас Андерсенлӧн Дюймовочка да сылӧн вурдысь жӧник йылысь мойдыс, окота лои серӧктыны, серамыс кӧнкӧ пытшкас пыльснитіс нин. Но ӧд Степан — сиктын зэв пыдди пуктана морт. Кыдзи нӧ позьӧ? Кутчысис нывбаба. Кызӧктыштіс, чеччис местасьыс, лажыньтчис пач вом дорас, лӧсьӧдыштіс пес помъяссӧ.
«Ак, Степан, Степан...» — улӧс вылӧ бӧр пуксянмоз, ышловзис нывбаба.
Томдырйиыс Степан нималіс сиктын медбур трактористӧн. Да и ӧні стрӧитчысь бригадаын век черӧн-пилаӧн пессьӧ-мырсьӧ, весь оз ов. Трактор кодьыс жӧ ён да уджач пыр вӧвлі. И киподтуя. Сійӧ керка-карта вылӧ, майбыр, и видзӧдныд любӧ. Мӧс-порсь и ыж-кукань век видзӧ и, кӧть Степанида гӧтырыс таво ар дыр висьӧм бӧрын кувсьыліс. Он тай кабырнад кут, исковтӧ кӧ олӧмыс. Сылы мӧй колі кувны этатшӧм бур мужик дінсьыс, да эз тай сьмертыс юав, босьтіс.
И со, Степан корасьны петӧма. Татшӧм мужикыд, дерт, оз кут ӧтнас овны сы ыджда овмӧснас.
Мый нӧ сылы воча кывсӧ шуны? Виччысьӧ ӧд со, ставнас турышсьӧма. Ӧбӧдитны, веськыда «ог» шуны — грек, да и ылӧдлыны абу жӧ лӧсьыд. Анастасия Васильевнаӧс кынтыны быттьӧ кутіс, дрӧгмунлісны пельпомъясыс. Чеччис ньӧжйӧник, нюмдыштіс, видзӧдліс гӧсьтыслы веськыда синмас, вӧлись шыасис:
— Тэ, бур мортӧ, Степан Спиридоновичӧ, эн дӧзмы ме вылӧ, а со мый ме тэныд шуа, — нывбаба воськов вӧчис водзлань, копыртчыштіс: — Пассибӧ менӧ морт туйӧ пуктӧмсьыд, но эн бара-й некодлы висьтав ме дорӧ волӧмтӧ, серавны кутасны бур йӧзыс. Кутшӧм ме невеста, квайтымын ар тырта да? Тэ, со, кутшӧм на добрӧй молодеч! Сюрас на тэныд и томджыкыс, и визувджыкыс. Дӧва нывбабаыд ӧд ӧні уна. Ме нӧ мый тэнад ыджыд овмӧсын керны кута? Мӧстӧ лысьтыны весиг ог сяммы...
Степан чӧв оліс, сылы кажитчис, мый путкыльтчӧ керкаыс али тӧв шӧрын ывла вылас йиркнитіс чардӧн гым. Дыр эз вермы нинӧм шуны. Сэсся коркӧ-некоркӧ вӧрзьыштіс жӧ места вывсьыс, кабырнас лӧсьӧдыштіс-шыльӧдыштіс плеш водзсьыс дзормыны кутӧм зу кодь сук юрсисӧ, нурбыльтіс:
— Но-о, он инӧ... Ӧткажитан инӧ... Пыралі да, эн дӧзмы инӧ...
Ньӧжйӧ чеччис, шапкаасис, босьтіс кепысьсӧ. Порог дорас воӧм бӧрын сувтовкерис:
— Ме вӧд чайті... Тэ, со, ӧтнад жӧ... Меным эськӧ сӧмын тӧварыш, уджтӧ ме ставсӧ ачым вӧча, мӧс лысьта и ва вая... Тэнад лов шыыд кӧ мӧд жырсянь кыліс и... Вуджӧртчылін кӧ пач водзті и... Ой, гажтӧмӧсь тӧвся рытъясыс... Эн дӧзмы... Меным ӧд му пырыс и ва пырыс мунны кокниджык вӧлі...
Ассьыс бӧръя кывъяссӧ помӧ вайӧдтӧдз и петіс сэсся. Дзурс воссьыліс да бӧр пӧдлыштчис ӧдзӧсыс, сьӧд пася мышкуыс саяліс ӧдзӧс саяс. Посводзысь увкнитан кӧдзыд тӧвруыс и коли сы местаӧ.
Ыркыдлысь джодж кузя руӧн исковтӧмсӧ видзӧдіг, Анастасия Васильевна шога ымӧстіс. Код тӧдас, мужичӧйыс жаль лои али ачыс.
«Корасьны воліс... Коралісны... Ой, кутшӧма коралӧмыс сёрмис! Быдса нелямын воӧн сёрмис. А нывбабаыдлы ас кадӧ колӧ петны верӧс саяд. Кор вир-яйыд на ворсӧ».
Быттьӧ друг сё арӧса старука лои Анастасия Васильевна, пасьвидзис-сулаліс джодж шӧрас, коньӧр кодь, шӧйӧвошӧма. А синваыс, ен тӧдӧ мыйысь, тюрис и тюрис, визгис бандзибъястіыс, нырбордъяс пӧлӧныс да пӧсь войтъясӧн тёпӧдіс сьыліас.
Лӧньны ни чышкыны синвасӧ эз вӧв окота. Мед лэччӧ, мед. Нэмыс эз бӧрдлы. Морӧс пытшсӧ унаысь сотліс, а медым со тадзи — эз вӧв некор, весиг мам кулігас. Кӧнкӧ морӧс кудъяс лёк чирей-мыль моз ёнтіс, а письтыныс эз вермы. Суседкаясыс быдӧн дивитісны, синва тусь пӧ тай нӧ эз и петав нылыслӧн. Но эз кӧ вӧв синваыс! Ӧні, со, и ковтӧгыс тюрӧ. Ме-ед...
— ... Настук, тэ менӧ радейтан? Ме тэнӧ — ёна, ёна! Тэ... Тэ менам — оз тусь! Тэ менам — югыд шонді! Сӧстӧм сынӧд!
— И ме тэнӧ, Вадя! И ме тэнӧ тшӧтш! Ме тэтӧг овны ог вермы. Ме, буракӧ, тэтӧг кула...
Эз кув Настук. Кыскис том олӧмыслӧн выныс.
Мортыд пӧ радейтігас бордъяссьӧ. Бордъя кодзув кодь и лои нывка, кор гӧгӧрвоис дасӧд классын велӧдчысь Носков Вадиклысь сы вылӧ пӧсь видзӧдласъяссӧ. Радейтчӧмыс козьналіс налы сы мында шуд да радлун. Рытъяснас аддзысьлісны да торйӧдчынысӧ эз вермыны. Пӧся вашкылісны ӧта-мӧдыслы мелі кывъяс, кӧсйысисны радейтны нэмсӧ. Радейтчӧмыс эз мешайт Настуклы ни велӧдчыны, ни мамыслы отсасьны. Школаын бур велӧдчысь, посни октябряталӧн медрадейтана вожатӧй, самодеятельносьтын медактивнӧй йӧктысь-сьылысь... А лесопункт кантораас, кӧні мамыс уборщицааліс, непӧштӧ пытшкыс да кильчӧ помыс, но и ӧшинь улыс век вӧлі чышкӧма-идралӧма.
Олісны найӧ вӧр посёлокын, лесопунктын. Вадиклӧн батьыс вӧлі лесопунктса начальникнас. Школа помалӧм бӧрын, арнас, Вадик Носков муніс карӧ велӧдчыны. Лестехникумӧ пӧ пыра. Настук колис гортас дас класс помавны. Шогсис, ёна гажтӧмтчис Вадиксьыс, но ӧд ӧти вотӧ терпитас кыдзкӧ. Вадикыс каникулъяс вылӧ на пондас волыны и. А мӧд вонас и ачыс Настук сы дорӧ жӧ карӧ мунас. Письмӧасьӧны тай. Нёль лун кӧ письмӧ абу, витӧднас быть нин воас...
Выль во водзын нем виччысьтӧг дугдісны воны письмӧясыс. «Регыд каникулъяс, сійӧн и оз гиж», — думайтіс Настук. Но мамыс Настуклӧн выльтор висьталіс: Носковӧс пӧ миянлысь мӧдлаӧ вуджӧдӧны.
— Мыйла вуджӧдӧны? Кытчӧ? — чуймис Настук.
— Ме тӧда? Меным, уборщицаыдлы, оз докладывайтны.
Мунісны Носковъяс. Выль веськӧдлысь лесопунктӧ воис. Семьятӧм пӧ, сёрнитісны йӧзыс. А Настуклы кутшӧм делӧ.
Тӧвся каникулъяс воисны, а Вадикыс абу. Ай-мам дорас, дерт, мӧд лесопунктӧ муніс. Но мыйла юӧр кӧть оз мӧдӧд? Сісьмас сьӧлӧмыд виччысьӧмысла. Узьӧ и вӧтасьӧ Вадиксӧ, воӧма быттьӧ, а садьмас — вӧт вӧлӧма. Петас ывлаӧ, синъясыс сідзи и котралӧны-корсьӧны, оз-ӧ мыччысь кысянькӧ Вадикыс? Оз-ӧ кыв сылӧн гӧлӧсыс барак дорас, кӧні водзті овлісны Носковъяс? Весьшӧрӧ ставыс.
Школьнӧй пӧдругаыс, Лена Подорова, ветліс мамыскӧд сиктӧ, дедыс кулӧма да дзебны. Локтіс, пондіс висьтавны: Носков Вадикӧс пӧ сэтысь аддзылі, каникул вылын шусьӧ, дед-баб дорас гӧститӧ. Тӧдтӧмӧсь пӧ йӧзыс выль лесопунктас да вӧзйыси пӧ мамӧлысь. Ок и тшап да лӧсьыд лоӧма... Йӧктім сыкӧд клубас...
Лена дугдывтӧг больӧдчис, быттьӧ нарошнӧ дэльӧдіс Настукӧс. Настук кывзіс, а сьӧлӧмыс тайкӧ оз пот. Медбӧрын, кыдз позьӧ веськодьджыка, юаліс:
— Татчӧ оз кӧсйы волыны? Позьӧ ӧд турун кыскалысьяскӧд.
— Нем эз висьтав. Ӧдвакӧ.
— Мыйла ӧдвакӧ?
— Быттьӧ он тӧд... Нарошнӧ мӧд лесопунктӧ Носковъясыс вӧзйысьӧмаӧсь да. Мед Вадикыскӧд он аддзысьлӧй...
Настук тыри Лена вылӧ лӧгӧн. Эз Вадик вылас да сылӧн бать-мам вылӧ, а Лена вылӧ. Но Настук эз петкӧдлы пӧдругаыслы лӧгалӧмсӧ. Дай кӧсйис кӧть — эз вермы. Мыйкӧ сыкӧд лои, быттьӧ тӧлӧн пӧльыштісны пытшсьыс став ловъясӧ.
Рытнас мамыс локтіс суседъяссьыс — Настук паччӧр вылас куйлӧ.
— Но-о, паччӧрын? Некор он кайлы да?
Нылыс нинӧм эз вочавидз. Мамыс сы дорӧ:
— Ой-ой, он-ӧ нин биав? Гашкӧ, прӧстудитчин, чышъянтӧгыд ывлатіыс лэбалан да?
— Эг. Прӧйдитас.
Но аскинас ни аскомысьнас эз и вермы школаас мунны.
— Першалӧс корла, — шемӧсмӧм мамыс коймӧд луннас котӧртіс посёлокса ичӧтик медпунктӧ.
Фельдшерицаыс, томиник на ань, видлаліс нывкаӧс сідзи и тадз, лэптыштліс пельпомъяссӧ:
— Горшыс тай лючки-а. Абу кӧ воспаление лёгких, лун-мӧд бӧрти чеччас.
Сетіс кутшӧмкӧ порошок, муніс.
Кык лун мысти мамыс бара котӧртіс фельдшерица дорӧ:
— Ой, эз сувт аканьӧ менам, низгырвидзӧ вольпасьын, ой-я, ой-я! Сёльӧдчысь галя изтор кодь вӧлі да мый сыкӧд лои!
— Воспаление лёгких и эм, буракӧ, — шай-паймуніс фельдшерица да сійӧ жӧ луннас турун кыскалысьяскӧд мӧдӧдіс сиктӧ больничаӧ. Мамыс колльӧдіс.
— Тыясыс сӧстӧмӧсь, — шуисны сэні да такӧдісны повзьӧм мамӧс: — Эн бӧрд, лечитам.
Лечитісны эськӧ, но Настуклӧн лунысь-лун косьмӧ вир-яйыс, лыыс да куыс сӧмын коли.
Сэсся коркӧ ас садяс воис жӧ, бурдӧмлань быттьӧкӧ мӧдӧдчис, сёйыштны кутіс и. Война бӧрас медводдза во вӧлі, зэв гӧля олісны. И вердны висьысьтӧ нинӧмӧн. Бур ещӧ, мамыслӧн пув вотӧсыд эм, ачыс на и Настукыс сарпйыліс-вотліс. Больничаса врачьясыд чери выйсӧ эз жӧ жалитны, юктӧдісны. Кок йылас сувтыштны кутіс нылыд — радыс ставлӧн! Сӧмын мича сук юрсиыс Настуклӧн усьны пондіс. Гылалӧ и гылалӧ, шыльӧдны он лысьт.
— Ой, буракӧ, ми диагнозсӧ неправильнӧ пуктылім! Тиф, буракӧ, талӧн вӧлӧма: усьӧ, со, юрсиыс. Кытысь и курыштіс татшӧм висьӧмсӧ, некод быттьӧкӧ тифнас оз вись да? Гашкӧ, выль воысьяс вайисны? Збыль кӧ — вот бедаыд лоӧ! — маитчисны да вашкӧдчисны ас костаныс больничаын уджалысьяс. А Настук тӧдіс: эз вӧв сылӧн тиф ни грипп. Радейтчӧмыс сотчис татшӧм лёк биӧн. Со, весиг юрсисӧ сотӧма. Ставыс кӧ киссяс и. Вот бубуляыд лоан...
Больничасьыс гортас локтӧм бӧрын Настук нетшыштіс альбомсьыс Вадиклысь фотосӧ, кодӧс Вадик арнас на ыстыліс карсяньыс. Ясыд видзӧдласа, лӧсьыд вом доръясыс муртса шпыньмуныштӧмаӧсь.
Окыштны-ӧ? Сьӧвзьыны-ӧ?
— Нюмвидзӧ ӧд ещӧ! На тэныд! — чаж косяліс фотосӧ шӧрипельӧ, но здук мысти дась нин вӧлі бӧрддзыны, каитчис вӧчӧмторсьыс. Клеитіс карточкасӧ пуӧм картупельӧн альбом медбӧръя лист вылас, карандашӧн рама вӧчис. Сьӧд рама пытшкын и лои Вадиклӧн фотоыс. Тадзсӧ кулӧмаяслы вӧчлӧны. Гӧгӧрвоис тайӧс Настук, паськавлісны синъясыс, а сэсся петыштіс вильыш нюм да думнас сьылыштіс частушка, кутшӧмӧс сьывлӧны посёлокса нывъяс:
Изменил — так наплевать,
Без тебя найдётся пять.
Неужели из пяти
Такого дурня не найти?
Паськыдджыка нин Настуклӧн нюмыс петіс. Мамыс аддзыліс нылыслысь нюмсӧ, ас кежас пернапас чӧвтіс, слабог пӧ тай, нылыс бӧр ловзьыны кутіс.
Том вир-яйыд тай ассьыс босьтӧ. Бандзибъясыс нывкалӧн бӧр гӧгрӧсмыны пондісны дай вир пас нин сэн тӧдчыштӧ. А гылалысь юрси местаас чукыля-мукыля выль юрси кольчаасьны кутіс. Тулыс кежлас, экзаменъяс сдайтігкежлӧ, бура лӧсьыд шапкатор нин быдмис. И экзаменъяссӧ пӧдругаяс да велӧдысьяс отсӧгӧн сдайтіс бура.
Школа лои помалӧма. Учительницаӧ велӧдчыны нинӧм ӧні оз мешайт. Воан арнас жӧ и карса пединститутӧ пырис. Сӧмын тай карас поліс петнысӧ, ӧд Носковыс карас жӧ. Паныдасясны кӧ? Та вӧсна векджык общежитиеас и пукаліс, книга лыддис.
— Манашка ли мый нӧ тіян кудриа юрсиа нылыд? — Настук комнатаса нывъяслысь юавлісны студент зонъяс. А кытысь нывъясыс тӧдасны, мыйла пӧдруганыс некытчӧ оз петав.
Но ловъя морттӧ тай век нин ывлаыд кыскӧ. Вӧр посёлокад быдмӧм нывкатӧ карад быдтор на и интересуйтӧ. Полан кӧть он, а быть ыштан, кор пӧдругаясыд вӧччӧны да музейӧ мӧдӧны. Музейӧ кӧ, ветлас и сійӧ. Мӧдісны. Ёна вӧччанъяс сэк эз вӧвны, но Настук унаысь казявліс, кыдзи воча локтысь мужичӧйяс сатшкылӧны сы вылӧ видзӧдласнысӧ. Кольчаӧн гартчысь юрсиа, туг кодь мыгӧра, сійӧ и збыль торъяліс пӧдругаяссьыс. А музейӧ пыралӧм да карса паркті гуляйтыштӧм бӧрын, дзикӧдз визувмис, алӧйгӧрдӧсь лоины бандзибъясыс. Пӧдругаясыскӧд варовитіг эз и казяв другӧн Вадиксӧ. Водзджык кӧ быттьӧ аддзис, позис на кежӧдны пӧдругаяссӧ парк пытшкӧ, но ӧні найӧ паркысь петанінын нин вӧліны. А паныд налы паркӧ пыран воротасянь мыччысисны кыкӧн, Носков Вадикыс нывкӧд. Настук быттьӧ весьӧпӧрлі, но кутшӧмкӧ йӧй надея век жӧ сотыштіс сійӧс: уськӧдчас сы дорӧ Вадикыс. Эз. Сідзи и паныдасьлісны да вежӧнасисны. Настук нывъяскӧд пос кузяыс вывлань кайисны, а Носков, пос тшупӧдъяссӧ печатайтігтыр, нылыскӧд лэччисны увлань.
А век жӧ тайӧ дженьыдик кадколастнас удитіс Настук аслас вежӧрын пасйыны Вадиклысь видзӧдлассӧ да сылысь нывсӧ донъявны. Лӧз лентаӧн кыӧм кӧсаяса, беринӧськодь муса чужӧма, дзоридзӧсь платтьӧа, сӧстӧминик. И шуда, шуда.
«Мый бара-й Вадикыс думыштіс-а, кор сатшкысьліс синнас Настукӧ? Казяліс-ӧ Настуклысь падмылӧмсӧ? Эз, буракӧ...»
Паркысь петӧм бӧрын Настуклӧн ӧти пӧдруга, Аня Шаманова, шыасис:
— Эсійӧ тшап зонмыс абу тэнад тӧдса? Вӧркань моз тай дзоркнитліс тэ вылӧ-а?
Настук збодера кӧть восьлаліс, век на, буракӧ, топалӧм изтор кодь вӧлі, эз сяммы кыв шуны, сӧмын вом дорыс вежыньмунліс. Тайӧс и Аня лыддис воча кыв пыддиыс да дивитыштіс зонсӧ:
— Вомсӧ рака моз паськӧдлӧ йӧз нывъяс вылӧ, аслас дінас нин да.
Татчӧ Дуся Прокушева тшӧтш суитчис, тапкис Настуклы мышкуас, завидьпырысь дзоркнитліс синъяснас:
— Этатшӧм кудриа бӧрсяыд бара-й вӧтчас! Бандзибъясыс, со, ломзьӧны... Ме кӧ тэ местаын, крукышті, мырдди эсійӧ баляыслысь!
Ставӧн серӧктісны. А Настук думыштіс: «Абу бара-й баля. Носковыд балятӧ радейтны оз кут...»
А мыйла оз кут? Эз и вермы тайӧ мӧвпсӧ помӧдз вайӧдны. Сӧмын гӧгӧрвоис: век на радейтӧ Вадиксӧ и некыдз сійӧс лёкӧдны оз вермы.
А век жӧ, тайӧ паныдасьлӧмыс лои дзуг гӧрӧд разьӧм кодь. Личмуніс лов пытшкыс, быттьӧ налькйысь мыні. Сэсся кӧть сёысь паныдасьласны, оз пӧсяв ни кӧдзав Настук. Дерт, сьӧлӧмыс чеччыштлас на, но оз нин дзерӧд ни дойд.
Сы бӧрын куимысь и аддзыліс Анастасия Васильевна томдырся радейтанторсӧ. Карса театрысь — ӧтчыд, мам дорсьыс, вӧр посёлокысь — мӧдысь. Сэки сійӧ ыджыд чина нин вӧлі, лесопункт кантора дорас сьӧд «Волгаысь» петіс. Сёрнитӧны тай вӧлі, обкомын пӧ Носковлӧн пиыс уджалӧ. Со, кыдзи лыбӧма! «Но и мед красуйтчӧ олӧмнас. Веськодь...» Медбӧръяысьсӧ карсьыс аддзыліс, базар дорын автобус виччысисны кутшӧмкӧ нывбабакӧд, колӧкӧ, гӧтырыскӧд. Брезент курткаа да нопъя, киас кӧрт зыр. Абу и тшап Носков кодь. Лябмыштӧма збодер мыгӧрыс, чужӧмыс вижоват дай пыкӧса быттьӧ. Колӧкӧ, и абу здоров. Анастасия Васильевнаӧс тайӧ аддзылӧмыс дзикӧдз нин эз вӧрзьӧд.
Но мыйлакӧ тайӧ рытӧ, Педь Вась Степан волӧм бӧрын, Анастасия Васильевналы окота лои видзӧдлыны томдырся радейтанторсӧ. Сӧмын видзӧдлыны. Видзис ӧд сылысь карточкасӧ, кодӧс коркӧ шӧрипельӧ косявліс да альбомас клеитліс. Ӧні жӧ и судзӧдас нывдырся альбомсӧ дай видзӧдлас.
Тайӧ мӧвпыс сылы воис сьӧлӧм вылас. Лӧнис весиг бӧрдӧмсьыс. Кимӧдзнас чышкаліс синсӧ, чужӧмсӧ дай мӧдіс книга шкапланьыс. Сэні, шкап йӧртӧдас, ӧчкиыс и альбомыс кӧнкӧ журналъяс костас.
Альбом медбӧръя лист бок вылӧ видзӧдлыны дыр эз ышты. Пондіс видзӧдны карточкаяссӧ заводитчанінсяньыс. Со ачыс. Нывка. Нюмвидзӧ. Юрсисӧ мышвыв шыльӧдӧма да балябӧжас лентаӧн шыркнитӧма. Сэк мамыскӧд нарошнӧ райцентрӧдз снимайтчыны лэччылісны. Квайтӧд классын Настук велӧдчис. Мӧдар лист бокас — мамыскӧд ӧтлаын снимайтчӧм карточкаыс. Мамыс косіник, муас кодь видзӧдӧ. А водзӧ лист бок вылын мамыс да батьыс ӧтлаынӧсь, батьсӧ война вылас нуигӧн снимайтчылӧмаӧсь. Жугыльӧсь кыкнанныс... Но томӧсь. Настукӧс бать нылӧн тӧдсаясыс шулісны. Бать ныв пӧ, шуда лоӧ. А кӧн нӧ шудыс? Али тайӧ и шудыс, мый, со, шоныд керкаын, ас керкаын пукалӧ да альбом листалӧ. Эм тай мый видзӧднысӧ да казьтывнысӧ, быд карточкалӧн аслас история. Со, этайӧ нёль мича нылыс, сувтса синмаӧсь, кын чужӧмаӧсь. Институтас медводдза вежон на велӧдчисны, фотограф дінас ветлісны. Вӧччӧмыс да дасьтысьӧмыс вӧлі! А петӧмаӧсь, шондібан... Эз на кужны снимайтчыныс, полісны. Мукӧд карточкаяс вылас тай дзик нин мӧд пӧлӧсӧсь, карса краляяс дай сӧмын. Мый-мый, а снимайтчыныд найӧ радейтлісны! Томлун...
А вот карса школаын уджалӧм йылысь казьтыланторйыс ӧти карточка и эм. Со этайӧ. Сулалӧны вадор берегын, коді фуфайкаа, коді пальтоа. Ветлісны субӧтничайтны Сыктыв дорӧ, васьыс керъяс куталісны, пилиталісны. Школаса физик Павел Анисимович снимайтліс. Ачыс, со, и абу карточка вылас...
Анастасия Васильевна кузя ышловзис. Ӧти карточка, а казьтывны кӧ, мыйта чукӧрмас!
Институт помалӧм бӧрын сійӧс, том велӧдысь-математикӧс, кольӧдісны карса школаӧ. Сетісны 6–7 классъяс. Сьӧкыд, дерт, первойсӧ вӧлі. Торъя нин физикаысь. Опытъяс петкӧдлыны кутас да падмӧ: оз артмы ставыс сідз, кыдз кӧсъян. Некымынысь ковмыліс шыасьлыны отсӧгла опытнӧйджык ёртыс Павел Анисимович дорӧ. Сійӧ ставсӧ кокниа да гӧгӧрвоана висьталас и петкӧдлас. Но казяліс регыд том учительница: синсӧ оз вештыв сы вылысь учитель ёртыс. А ӧтчыд босьтіс киӧдыс да меліа шуис:
— Дыр-ӧ ми тэкӧд тадзи шырысь-каньысь ворсны кутам? Он мӧй аддзы, мый мекӧд керсьӧ? И тӧда: тэ менӧ тшӧтш радейтан.
Му пырыс кӧ мунны позис, муніс эськӧ Настук яндзимысла. Ыпмуніс ставнас, тракнитчис. Но мӧдыс эз лэдз сылысь кисӧ, вашкӧдіс:
— Сідз мусмин тэ меным, Настенька... Да, ме гӧтыра нин, но мустӧм кӧ сійӧ мем лои, синмӧн кӧ эг кут аддзыны... Тэнӧ кӧ сӧмын аддза...
Кутшӧма пыдди пуктыліс водзті ыджыдджык ёртсӧ том учительница! И со... Здук кежлӧ ловгоршыс тасасьліс, а сэсся дӧзмӧмыс, скӧрмӧмыс ылькнитіс морӧс пытшсьыс да пробкаӧс моз тойыштіс ловгоршсьыс тассӧ.
— Йӧрӧ пырысь вӧв кодь тай тэ вӧлӧмыд, ӧтилаысь турун талялін, мӧд потшӧс сайӧ веськӧдчин, — скӧр серамӧн кайтыштіс том ныв да мӧдӧдчыліс нин петны учительскӧйсьыс, но тайӧ здукас воссис ӧдзӧсыс да пырис географичка Изида Борисовна. Мудер кань моз куньтыртліс синсӧ, небыдик гӧлӧсӧн нюжӧдіс:
— Извинитӧй, тіян, буракӧ, сердечнӧй сёрнияс, но мем политическӧй карта колӧ.
— Пӧжалуйста, — ньӧти падмытӧг вӧзйис Анастасия Васильевна. Тӧдіс: сылӧн мыжыс тані абу. Но географичка, шпыннялігтыр, видзӧдліс кыкнан вылас, дзӧрӧдыштіс кудриа юрнас, рочалыштіс-сьылыштіс:
— Ай да Настенька,
Настенькаыс, позис кӧ, тайӧ здукас кыкнанныслы эськӧ сьӧвзис ныр-вомас. Но ӧд школа — школа и эм, оз позь. Нинӧм шутӧг петіс ӧдзӧс мӧдарас да быдса час чӧж сэсся — сылӧн эз вӧв урокыс — шӧйтіс коридортіыс. А аскинас нуис гороноӧ мӧд школаӧ вуджӧдӧм йылысь шыасьӧм.
— Но мыйла? — шензис гороно завыс. — Велӧдчан во шӧрын!.. Вай бӧр босьт заявлениетӧ, а то ачым косявла.
Во помӧдзыс сідзи и сэсся ковмис овны географичкалӧн шпыннялана видзӧдлас улын. Павел Анисимович эз сэсся дӧзмӧдлы аслас йӧй сёрниӧн, но горш видзӧдласъяснас унаысь на козьнавліс.
Мӧд вонас Анастасия Васильевналысь корӧмсӧ могмӧдісны, вуджӧдісны сиктса школаӧ. Но пышйис кӧть, эз на дзикӧдз мын Павел Анисимович вӧтлысьӧмысь. Кыкысь на воліс сы дорӧ сиктас.
Первой волігас Анастасия Васильевна ёна и дӧзмыліс кортӧм гӧсьт вылас, пинясьӧмӧн и вӧтліс:
— Весась татысь, мед сэсся синмӧн ог аддзыв.
— Муна, муна. Ме сӧмын тэнӧ син пыр нуӧдны и волі, — ньӧти дӧзмытӧг сӧгласитчис гӧсьтыс, но водзӧ вылӧ надеяӧн на: — Но ме вола на, вола!
Тайӧн и муніс. Но мӧд вонас, тувсов каникул дырйи, бара на мыччысис. Вачкучкысис сӧмын Анастасия Васильевна, кор аддзис сійӧс ас патера кильчӧ помсьыс.
— Кыдзи аддзан, бара вои, со, — ырс чеччис кильчӧ пос вывсьыс, уськӧдчис Настенькалы паныд. — Ог вермы тэтӧг... Кӧжмалін тэ менӧ...
«Кыдзи вежсьӧма Павел Анисимовичыс! Гӧгрӧс чужӧмыс ропкысьӧма, синмас мича дзирдыс оз ворс...» Сьӧкыд сёрни сэк на костын артмис.
— Тэнад семья — гӧтыр дай пи, — шуис сэк Настенька. — Ме ог кӧсйы, медым менӧ нэм чӧж ёрисны, медым тэнад пиыд быдмис батьтӧг. Ме тӧда, мый сійӧ батьтӧг быдмӧмыс.
— А босьта кӧ сійӧс сьӧрысь, тэ примитан кыкнаннымӧс?
— Колӧкӧ, и примиті. Но гӧгӧрво тэ менӧ: ог тэнӧ радейт. А сэсся, кутшӧм мам ассьыс кагасӧ мӧдлы сетас? Ок тэ, педагог... Чайта, абу нин сэтшӧм лёк гӧтырыд — ачыд бӧрйылін. Миритчы судьбаыдкӧд. Коркӧ «аттьӧ» на кутан шуны, эз пӧ семьяӧс менсьым торк.
— Аттьӧ?! — юаліс Павел Анисимовичыс, а синмас дзулькнитліс яр би. Скӧр вильышӧнмоз копыртчыштліс, нӧшта содтіс:
— Аттьӧ кӧ колӧ, ӧні шуа бур сӧвет сетӧмсьыд. Сё пасибӧ! Да прӧщайтлы, кын сьӧлӧма нылӧй. Гашкӧ, коркӧ и аддзысьлам на.
Мӧдысь вӧчис копыр, сэсся шурк бергӧдчис мышнас да тэрыба пондіс восьлавны потшӧс петанінланьыс. Васӧд тувсов лымйыс вальсъяліс кок улас, резіс пальто мышкусӧ, гач коксӧ. Настенькалы кажитчис али збыль сыркмунлӧ Павел Анисимовичлӧн мышкыс.
— Павел Анисимович! — чукӧстіс Настенька. — Кӧсъян, ме тэнӧ колльӧдышта?
— Оз ков! — скӧрысь горӧдіс мӧдыс. И Настенькалы бара кажитчис: сыркъялӧ мортыс.
Ышловзис Настук, но ышлолыс эз кокньӧд сійӧс, а мӧдарӧ — чужтіс на тӧжд.
Кӧзяйкаыс, Устинь баб, пыр и быйк петіс кильчӧ вылас.
— Но-о, муніс тай нӧ жӧникыд? Ме самӧвар пукті-а. Чукӧст вай, чай стӧкан кӧть мед юас да мунас. Кытчӧ нӧ ырссьӧдіс сы коста?
Патеранткаыс эз нинӧм вочавидз, век видзӧдіс мунысь вылӧ. Устинь баб шӧйӧвошӧмӧн шуис:
— Лӧгасинныд ли мый? Бӧр бурасянныд, дитяяс. Пыр вай гортӧ. Али... Котӧрт бӧрсьыс, чукӧст...
Кӧзяйкаыскӧд, варов да бур сьӧлӧма пӧрысь анькӧд, найӧ первой лунсянь ладӧн олісны, эня-ныла и эм быттьӧ. Юксьылісны ас шогнас да могнас. Торъя нин бабӧ.
— Ой-ой-ой-ой-ой! — вит пӧв ойӧстіс, маитчыштіс бабыс рытнас вольпасьӧ водігӧн. — Тай нӧ эз и лок? Мися, лӧгасис кӧть, бӧр на бергӧдчас-а. Няньшом и быдӧн кӧті. Бӧр ли мый нӧ карас лыйыштіс?
— Карас, бабӧ, карас. Узь... — лӧньӧдыштіс бабсӧ патеранткаыс.
Сы бӧрын воысь уна, гашкӧ, коли. Чайтіс Настук: вунӧдіс нин бабыс карса жӧник йывсьыд, а сійӧ друг сёрни паніс:
— Настук, эн дӧзмы ме вылӧ, пӧрысь вылӧ, суитча да. Эз тай нӧ кут волыны жӧникыд?
— Кутшӧм жӧник? — эз пыр гӧгӧрво патеранткаыс.
— Карсаыд нӧ, варов Павелыд.
— Ах, сійӧ! Сійӧ ӧд гӧтыра нин вӧлі, кагаа и... Абу некутшӧм жӧник.
— Абу жӧник!? — чуймис бабыс. — Ак, сё лешак, жӧникӧн сэк шусис да. Мунігас на тшӧктіс: видз пӧ, бабук, менсьым невестасӧ, мед сиктса зонъясыс оз ылӧдны. Сё лешак и эм! Вежапи менам — Нестор Ӧльӧксантӧ вед ачыд тӧдан — шуӧ коркӧ меным, гӧтрасьны пӧ, вежань, кӧсъя. Мунас оз эськӧ ме сайӧ тэнад патерантка Настенькаыд? Кажитчӧ пӧ зэв. А ме, йӧйыд, ог тӧд, мися, жӧник нин ӧд сылӧн эм. Ок-ма дай ок-ма! Ылӧді тай ме тэнӧ чассьӧсьыс. Ӧльӧксаныд, кӧть абу ыджыд чина, пастукалӧ совхозын, а сы кодь садя да зіль мужиксӧ корсьны на колӧ. Детсадсьыд нывкатӧ вайис да из стен сайын моз красуйтчас-олас Зинукыс! Со, кутшӧм керка нин удитісны пуктыны...
Патеранткаыс серӧктіс:
— Детсад Зинаыслы ӧд шудыс колӧ жӧ. Мекӧд тэныд лёк ли мый, вӧтлыны кӧсъян?
— Меным эськӧ лӧсьыд, да ӧд тадзтӧ тэ эндан, — маитчыштіс бабыс, быттьӧ и збыль водзӧ вылӧ туналіс.
Колины вояс, исковтісны ӧта-мӧд бӧрсяыс. Выль велӧдчан во вежсьыліс каникулӧн, тӧлыс — гожӧмӧн. Настук и збыль эндыны кутіс, но та йылысь и думайтнысӧ быттьӧ некор. Школа, челядь, урокъяс, факультатив, внекласснӧй удж, сиктса клубын самодеятельносьт, сиктса агитатор да пропагандисталӧм. Кулігас нин кӧзяйкаыс кутіс шуны:
— А пӧвтӧ тай, нылук, сідзи и эн корсь. Чурка кӧть лӧсьӧд. Сы мында книга ньӧбан да кодлы лоӧ?..
Кулі кӧзяйкаыс, керкаыс патеранткаыслы и коли. Рӧдвужыслы мыетшкӧ мынтыштліс жӧ Анастасия Васильевна. Лӧсьӧдыштіс-ремонтируйтыштіс да ас керкаын ӧні олӧ. Ур поз кодь, со, шоныдӧсь, югыдӧсь жыръясыс. Кык жыр. Ӧшинь улас йӧртор эм. Гожӧмнас картупельтӧ, ӧгурцы-помидортӧ да дзоридзьяс на быдтӧ и. Школасьыс челядьыс и вайӧны рӧсадасӧ да пуктӧны. Со тай кымын фотокарточка налӧн. Этані помидор рӧсада сатшӧдӧны, этані картупель босьтӧны, эстӧн турун куртӧны. Анастасия Васильевна на пӧвстын и. Совхозыслы тшӧтш ёна отсасьлісны. Ӧні на челядьыскӧд ачыс петавлӧ и.
Анастасия Васильевналысь уна вося класснӧй руководствосӧ петкӧдлӧны уна лыда гырысь карточкаяс. Школа помалігӧн быд во снимайтчылісны класскодьнас. Нывкаяс да зонкаяс, сӧдз синмаӧсь, со, видзӧдӧны ӧні учительница вылас карточкасяньыс. Со, нывка, чатӧртыштӧм юра да нюмвидзысь вома. Тайӧ Яборова Таня. Велӧдчис зэв бура, а кольччис сиктӧ, ӧні кукъясӧс видзӧ. Зэв пыдди пуктана ань, депутат сиктсӧветас. Анастасия Васильевна дорӧ тшӧкыда пыравлӧ, видлыны пӧ пыри, кыдзи оланныд.
А орччӧн сыкӧд — Расов Ваня. Педь Вась Степанлӧн ӧтка пиыс. Сы кодь пӧслукман да небыд сьӧлӧма некод эз вӧв классын, но бӧбсьыс бӧб вӧвлі математикасьыд. Оз гӧгӧрво. Тырпӧт вийсьыліс сыкӧд Анастасия Васильевна: урокъяс бӧрад кольлас, гортас ветлас. Мед кӧть пӧ ловъя «тройка» вылӧ кутас тӧдны математикасӧ, будущӧй салдат ӧд. Гортас батьыс кывзас-кывзас налысь маитчӧм-велӧдчӧмсӧ да кайтыштас сӧмын:
— Василлёвна, весьыс эн мырсьы, попӧ оз пет, тракториставны кӧ ас дорын велалас и...
— Ме тракторнад кужа нин ветлыны, — нурбыльтас Ваня да кузя видзӧдыштас учительница вылас, быттьӧ кевмысьӧ, збыль пӧ эновт менӧ, оз пӧ юрӧ пырны квадратнӧй кореньясыд и став.
А ужынӧн гӧститӧдтӧг некор эз лэдзлыны учительницасӧ. Медъёна ачыс Ваня и гӧститӧдліс. «Миян свежӧй рысь эм. Мамӧ, ме петкӧда гӧбӧчсьыд? Мамӧ, кыскам пачсьыд шыдтӧ?..»
Яндзим быдӧн лоліс Анастасия Васильевналы. И окота вӧлі малыштны Ванюшлысь юрсӧ. Кӧні ӧні Ваняыс? Кыдзи олӧ? Со, тарыт батьыслысь эг и слӧймы юавнысӧ тайӧ шӧйӧвошӧмнас. Водзті чери кыян траулерӧн вой мореясті и лун мореясті ветліс, армия бӧрас сэтчӧ кольччыліс да. Гортас сӧмын вежон-мӧд кежлӧ и воліс гӧститны. Колӧкӧ, ӧні гӧтрасис да берегӧ овмӧдчис. Мамсӧ дзебны тай воліс да сэтшӧмкодь думыс вӧлі-а. Гортас батьыс дорӧ ӧдвакӧ жӧ локтас...
«Ок, Степан, Степан... Ӧтнадлы кольны колӧ, а гажтӧмыд йирас нин. Мед кӧть пӧ тай кодкӧ вуджрасис... Но прӧста вуджрасьысьыд ӧд регыд жӧ дӧзмӧдас татшӧм ён мужиктӧ. И мыйла ме вылӧ пудйыд уси, Степанӧ? Волін, со, дойдін менӧ и асьтӧ. Важсӧ, мый вунӧдӧмасӧ нин вӧрзьӧдін менсьым тарыт. Ӧні, вояс пыр видзӧдӧмӧн, позьӧ, колӧкӧ, и шуны: эз прӧста сэки волывлы карсяньыс Павел Анисимовичыс. Гашкӧ, сылӧн кыкысь волӧмыс буретш и корасьӧмнас вӧлі, гашкӧ, радейтліс пӧсь, ыджыд радейтӧмӧн. Да эз казяв Настуклӧн сотчӧм сьӧлӧмыс. Ӧні эськӧ сёр нин та йылысь думайтнысӧ да гадайтнысӧ. Сӧмын тай курыд мӧвп йирлӧ на морӧссӧ. А ме кӧ мыжа, мый Павел Анисимовичыс морттуйсьыс воши?»
Кывсьыліс: семьяыскӧд оз ов, школасӧ эновтӧма. А колӧкӧ, и вӧтлісны. Ӧтчыд и Анастасия Васильевна аддзыліс, да век син водзас. Карын тӧлысся переподготовка вылын вӧлі. Пырис кыдзкӧ универмагӧ. Парфюмерия отдел дорын — господи, господи! — Павел Анисимович садьтӧм код! Киас одеколон доз, да зептас сюйнысӧ некыдз оз вермы.
Медым не ымӧстны универмаг тырӧныс, котӧртіс ывлаас да чеччалысь сьӧлӧмӧн кар джынсӧ кытшовтіс, общежитиеас поліс пырнысӧ: пӧдругаясыс казяласны сьӧлӧм ыззьӧмсӧ да юасьны пондасны.
Сы бӧрын и кутіс мучитны Анастасия Васильевнаӧс мустӧм вӧт. Быттьӧ кутшӧмкӧ паськыд улич кузя пышйӧ-пышйӧ кодыськӧ, зэв страшнӧйысь, а кокъясыс оз нуны.
«Тешкодь тай олӧмас артмӧ: кодӧс тэ радейтан, сійӧ тэнӧ — оз. И мӧдарӧ, тэнӧ сійӧ радейтӧ, а тэныд веськодь. Дзугсьылӧ ставыс. Со и Степан. Зэв прамӧй морт, сы дорын ӧтка нывбабаыдлы пӧрысьлунсӧ коллявны кокниджык, дерт, лоӧ. Но оз кӧ кыскы сьӧлӧмыд?»
Медбӧрын, бергӧдіс Анастасия Васильевна альбомлысь медбӧръя листсӧ. Сьӧд рамапытшса фото вывсянь сы вылӧ дзоргис ясыд синма, серамбана, мусаник том морт — Настуклӧн судьбаыс...
— Тэ менӧ радейтан, Настук? Ме тэнӧ ёна-ёна! Тэ — менам шонді!
— И ме тэнӧ, Вадя! Ме тэтӧг овны ог вермы, тэтӧг ме, буракӧ, кула...
Эз кув. Оліс. Олӧмӧн кӧ позьӧ шуны ӧтка олӧмсӧ. Дерт, эз жӧ дзик некодлы ковтӧмӧн вӧв. Но медыджыд могсӧ нывбабалысь, Енмӧн лӧсьӧдлӧмторсӧ, сідзи и вӧчтӧм лои. Эз быдтысь. Пу уна садитліс, дзоридзьяс. Керка эз жӧ лэптыв, дасьсӧ дзоньтавліс. Кыдз сэсся сылысь олӧмсӧ шуны — тыртӧмӧн али абу?
Помасис альбомыс. Идраліс бӧр шкапас сійӧс Анастасия Васильевна, часі вылас видзӧдліс: сизим час на. И мыйла та кузя тайӧ рытыс? И мыйла татшӧм шуштӧм?
Медым ылӧдны асьсӧ дзуг да курыд мӧвпъяссьыс, чуткис телевизорсӧ, но регыд и бӧр скӧрысь нетшыштіс шнурсӧ розеткасьыс. Футбол петкӧдлісны. А футболыд Анастасия Васильевналы — тшаква, ни ловлы, ни сьӧлӧмлы, ни вежӧрлы. Мукӧдыс тай эськӧ кутшӧма на и видзӧдӧны да. Кодлы ӧд мый.
Шӧйтыштіс-ветлыштіс стенысь стенӧ. Эз ӧшйы инас. «Буракӧ, тарыт йӧйма». Да ӧд и Иринья баб, суседкаыс, тарыт мыйкӧ оз лок, быд рыт телевизор видзӧдны волывлӧ да. Футболтӧ видзӧдны, шу, мыйла локтас? Телепрограммаыс ӧд эм сылӧн. Киас кутӧмӧн и ваяс Анастасия дорӧ. «Васильевна, видзӧдан он, кӧкъямысын лоӧ вит серияа кино. Лӧсьыд, пӧдикӧ! Чуткам вай!»
Чуткасны телевизор да пуксьӧны видзӧдны.
— Аминь, аминь! Со, ӧд, со, ӧд! — медводдза серпасъяссяньыс и пондас горӧдлыны бабӧ, а сэсся мыйкӧдыра мысти кылӧ нин сылӧн нырнас чискӧм шы. Унмовсьӧма.
— Узян мӧй, кино видзӧдысь? — чукӧстас сійӧс Васильевна.
— А-а? Мый? — палялас бабӧ. — Ог жӧ узь, видзӧда!
И быд пӧрйӧ тадз. Гортын пӧ гажтӧмысла унмовсьныс ог вермы, тэ дорын кӧть пӧ узьышта, — пӧкаитчыліс мукӧддырйи Иринья баб. А Анастасия Васильевналы, кӧть и бабыс узьӧ, гажаджык рытсӧ коллявны — орччӧн ловъя лов пошкӧ.
Мышводзсӧ бергӧдлыштіс на Анастасия Васильевна ваймӧм ичӧт пач водзас, сэсся эз вермы терпитныс гажтӧмсӧ, пасьтасьны кутіс. Эз лок суседка бабыс, ачыс сы дорӧ петалас. Орччӧн тай керкаыс. Эз и кӧртав чышъянсӧ, павгыштіс сӧмын. И петіс.
«А Степаныс век жӧ прамӧй морт. Гашкӧ, Иринья баб, ыджыд олӧма дошлӧй морт, Степанлы гӧтырпу аддзас...»
Иринья баб тарыт абу ӧтнас. Пызан саяс, юра улӧс вылын, пукаліс кызкодь, тыр вир-яя том ань. Кӧзяйкаыс ноксис пач водзас самӧвар дінын. Анастасия пыртӧдз, буракӧ, найӧ варовитісны. Пырис да друг лӧнисны.
— Но-о, гӧстя тай тэнад, Иринья Сидоровна! Мый, мися, тарыт пукавнысӧ эз лок? Бур рыт, тіянлы! — порог воськовтӧм бӧрас шыасис Анастасия Васильевна.
— Бур рыт, бур рыт! — уськӧдчис паныд кӧзяйкаыс. — Гӧстя менам, гӧстя! Карысь локтіс, со, муртса пырис. Племеннича тайӧ менам, Аннук, вежаньӧн шуысь. Пӧрччысь вай, Васильевна, чай кутам юны.
— Тарыт сиктыс быттьӧ кулӧма. Войтӧвтӧма да, сійӧ ли мый ли, челядь весиг оз кывны исласянінас. Сӧмын Педь Вась Степан лэбувсянь пес поткӧдлӧм шы кылӧ. — Пӧрччысянмозыс и паніс сёрни Анастасия Васильевна.
— Степаныс? — пыр и чошкӧдіс пельсӧ Иринья. Саймовтчис пач водзас да, кылӧ, сэсянь нин гораліс: — А миян, со, муртса на Степан йывсьыс сёрни вӧлі. Этайӧс, Аннаӧс, верӧс сайӧ ыста. Пет жӧ, мися, вежаныв, Степан саяс. Из стен сайын лоан, красуйтчыны кутан тужа-нужа тӧдтӧг.
— Да, пета тай тэнад Степан сайӧ. Сійӧ меным бать вылӧ туйӧ, — серӧктыштіс пызан саяс гӧстяыс.
— Эн шу, эн шу, — пыр и потшыштіс Иринья баба сійӧс. — Тэныд сійӧ ещӧ дитятор на вӧчас. Кага ни баля, со, олан, нелямынӧ воны кутін да.
— Вайныс тай эг и лысьтлы. Пыр ачым йӧзын узьлі да... — негораа, быттьӧ аслыс, шуыштіс том аньыд, сэсся видзӧдліс Анастасия Васильевна вылӧ, гӧрдӧдіс, лэдзыштіс юрсӧ. Яндзим, буракӧ, лои. Но дыр эз яндысь, дарӧм кыз яя, кокниа быйс чеччис улӧс вывсьыс, мӧдіс кывтланьыс.
— Пузис кӧ самӧварыс, мый сэсся виччысям? Вай юам чайтӧ.
Сійӧ вайис самӧварсӧ, пуктіс пызан шӧрас. Сэні кутшӧмсюрӧ сёян да сакар-кампет водзвыв нин вӧлі дасьтӧма.
— Ме тай, со, и шуа, — эз лэччысь заводитӧм сёрнисьыс Иринья баб. — Кутшӧм тэнад карад олӧм, бур патера ни мужик. Сиктса уджсӧ кӧ эн тӧд, мӧд делӧ. Лок дай ов. Да ӧд, Васильевна? Степаныслы ӧд тайӧ лӧсялас?
Шыасисны татшӧмторнад да бура дыр нускис Анастасия Васильевна. Мый нӧ татчӧ шуан? Степаныс ӧд абу пемӧс. Бӧрти шыасис жӧ:
— Степан Васильевичӧс ме лёкӧдны ог вермы, быд боксянь авъя мужик. Аннушкакӧд кӧ ӧта-мӧдсӧ радейтны кутасны...
— Ак, радейтны?! — пыр и крукыштчис бабыс. —
Пӧрысь нывбаба сідз ыззис, шуаліс да шуаліс быдсяматорсӧ — ассьыс дӧваӧн кольӧмсӧ, пес-ва вайӧмсӧ, потшӧс-майӧг сатшӧдӧмсӧ, тӧвся рытъяс коллялӧмсӧ, мужика нывбабаяслысь вежӧгтӧмсӧ, код юра мужичӧйяслысь вом тяпкӧдӧмсӧ — ӧтка нывбабалысь став курыдсӧ лыддьӧдліс.
Ириньялӧн вежанылыс шай-паймуныштіс быттьӧ, лӧз синнас лапйӧдлігтыр, век сулаліс пызан водзас, эз сяммы пуксьынысӧ. Дзоридзӧсь платтьӧа вуджӧрыс сылӧн зеркалӧын моз тӧдчис югыд самӧвар гӧгрӧс бекас тешкодя куим пельӧ юкӧмӧн — канфоркаас, гӧгрӧс рушкуас, фигурнӧй кокас.
Медым лӧньӧдны ыззьӧм старукаӧс, Аннушка нерыштіс ассьыс вуджӧрсӧ самӧварсьыс, люг-лег керсьыліс да гораа серӧктіс:
— Ой, со, ме кутшӧм урӧдина! Видзӧдлас-ӧ, оз-ӧ ме вылӧ тіян Степаныд?! Гашкӧ, тарыт инӧ и чай юны чукӧстлам да?
Сійӧ явнӧ шмонитіс, но вежаньыс, буракӧ, пыдди пуктіс да пырысь-пыр и сӧгласитчис:
— А мый? И корам, шу, Васильевна! — радпырысь горӧдіс баб да весиг топнитыштіс кокнас.
Анастасия Васильевна бара нинӧм эз вочавидз. А вежанылыс гажаа серӧктіс да пуксис пызан саяс. Сы улын улӧсыс нораа дзуртыштіс. Сэсся друг гӧстяыс жугыльмыштіс.
— Ой, вежаньӧ, — ышловзьыштіс сійӧ, — шмонита ме, да эн кӧть збыль чайт. Мудзи ме. Чай стӧкан юа дай бай-бай вода.
Анастасия Васильевна вешйыштіс жӧ пызанланьыс да, медым чӧв не овны, тшӧтш шыасис:
— Да, гӧстяыдлӧн ӧд чӧлӧй вӧлӧк вуджӧма. Ужнайтӧй да шойччӧй инӧ. Ме чай чашка юа, карса гӧснечнад ускӧс гыжйышта да пета жӧ гортӧ.
А ачыс думыштіс: «Мед ас кежаныс сёрнитасны вежаня-вежаныла. Ме, гашкӧ и, третьей лишнӧйыс тарыт тані да? Мед, колӧкӧ, агитируйтас вежанывсӧ Иринья баб. Гашкӧ и, збыль колӧ».
Пӧсь чай бӧрад, пӧсялӧма, петіс Анастасия Васильевна ывла вылӧ. Чепӧльтліс бан боксӧ ёсь вой тӧв, няжкнитӧмӧн дзуртіс лымйыс кок улас. Вылын пемыд енэжас видзӧдчис тӧлысь джын, быттьӧ сьӧд ваын чери кыйысьлӧн ыргӧн таб. Суныштлас кизьӧриник кымӧръяс сайӧ да бӧр мыччысьӧ.
Иринья баблӧн гӧлӧсыс, сылӧн кывъясыс быттьӧ вӧтчисны сы бӧрся: «
Восьлаліс Анастасия ас керкаланьыс. Сиктыс чӧв оліс. Сӧмын Степан лэбувсянь век кыліс пес поткӧдлӧм шы. Быд ковкнитӧм-потӧм чурка шыысь югдыштліс быттьӧ енэж куыс, торксьыліс чӧв-лӧньыс.
