МЕДВОДДЗА УДЖДОН

Кантораысь петӧм бӧрын Сашалы окота лои ещӧ видзӧдлыны аслас нажӧтка вылӧ. Топыда чабыртӧм сьӧм тыра кулаксӧ сійӧ кыскис зепсьыс да, кильчӧ помысь бокӧ вешйыштӧмӧн, заводитіс выль пӧв листавны-лыддьыны гажаа шуракылысь шыльыд кабалаторъяссӧ.

Ӧкмысдас кык шайт! Та мындаыд некор на сылӧн эз вӧвлы. Дас да кызь ураяс вӧвліны, гашкӧ, медунаыс ӧти шайт, но ӧкмысдас кык... Та мындасӧ Саша ачыс нажӧвитіс.

Кассиршаыс — олӧма, лабутнӧй нывбаба — ведомосьтсӧ мыччигӧн сюся видзӧдліс Саша вылӧ да мыйлакӧ нюмдіс, а сэсся сылы нарошнӧ выль сьӧм пачка косяліс да пондіс лыддьыны дзик жӧч лист кодь витаяс. Первой пӧлучкатӧ пӧ со этатшӧмъясӧн сета.

Тшӧтш и кассиршакӧд орчча пызан сайын пукалысь томиник ныв-бухгалтерша дзиркнитліс Саша вылӧ, сотыштіс быттьӧ синнас да сэсся тильк серӧктіс.

«Мый катша моз китшсян?» — думсьыс шыасис зонка тӧдтӧм ныв дорӧ да сійӧс нерыштӧм ради читкыртліс нырсӧ. А бӧрас ачыс жӧ шензьыштіс збоялӧмсьыс: первойысь аддзысис нывкӧд, а чикрӧдлӧ нин нырсӧ.

Мукӧддырйи кӧ, збыль эськӧ Саша эз лысьт тадзтӧ, гӧрдӧдіс эськӧ, а ӧні... дивӧ! Сашалы весиг дум вылас усьлі — нуӧдны тайӧ дзирыд нывсӧ кино вылӧ, но ас кадӧ, тыдалӧ, кватитчис. Ӧд кино вылас Саша ветліс нылыдкӧд сӧмын на кыкысь, и то эз ачыс, а нывъясыс корлісны.

А сэсся, бара жӧ некор талун. Саша ылысас тӧрытсянь нин артыштіс, кыдзиджык коллявны первой пӧлучка рытсӧ. Медводз колӧ мунны гортас, ӧдйӧджык мыссьыны да вежны паськӧмсӧ, сэсся котӧртны универмагӧ. Позьӧ эськӧ и тасянь сэтчӧ ветлыны, но абу лӧсьыд уджалан паськӧмнад, лякӧсьтас ещӧ кодӧскӧ. Со, сылӧн курткаыс да гачыс цементнад вӧдитчӧмысь рудӧсь. Ньӧбанторйыс ӧд абу донтӧминик ситеч платтьӧ ли мый ли. Нейлоновӧй халат. Нелямын шайта.

Мамыслы козин пыдди нейлоновӧй халат ньӧбӧм йылысь мӧвп Сашалы воис юрас тӧрыт, кор пыраліс на дорӧ суседкаыс, тётя Маша. Ошйысьны пӧ локті. Сідзи и шуис да джодж шӧрас петӧмӧн кыкысь шурк бергӧдчис: видзӧдлӧй пӧ, мунӧ оз меным, ньӧби универмагысь.

— Мыйла нӧ оз мун? Майбырушкоанӧй, — суседка вылысь выль халатсӧ видзӧдӧм-малалӧм бӧрын шыасис мамыс. — Новлы на здоровйӧ, ньӧбин кӧ. Ми воклы татшӧмыд оз жӧ нин шедлы-а.

— Мыйӧн тэ, мамӧ, лёкджык Маша тётяысь? — шыасис пиыс, коді буретш локтіс удж вывсьыс да кулис кӧм-паськӧмсӧ коридорын. — Ньӧбам тшӧтш!

— Чӧл, пиук, татшӧм донаторйыд абу на миянлы, — ышловзьыштіс мамыс.

— Нелямын шайт, — кайтыштіс Маша тётяыс.

Мый тайӧн сійӧ кӧсйис шуны? Збыль зэв на донатор налы татшӧм халатыс али мӧдарӧ, ӧд тэнад пӧ уджалысь пи нин эм. Буретш, кӧнкӧ, тайӧс и кӧсйис шуны суседкаыс. Ӧд Саша и збыль абу омӧльяс лыдын. Со сылысь уджсӧ кыдзи донъялісны. Кызь лунӧн ӧкмысдас кык шайт! А ӧд сійӧ сӧмын на ученик. Тадзи и шуисны бригадаын. Оформитам пӧ первой ученикӧн плӧтник-бетонщикӧ. Во кымын бӧрти пӧ прамӧй рабочӧйнас лоан.

Сэк Саша эз на пыдӧсӧдзыс гӧгӧрво тайӧ кывъяссӧ, а ӧні друг тӧд вылас уськӧдіс и нырбордъясыс паськавлісны. Сійӧс шымыртіс гордость. Збыль сійӧ, Саша Канев, неважӧнся на школьник, ичӧтик, гашкӧ, бус чир ыджда, но рабочӧй классыслӧн юкӧн, сы вӧсна мый ачыс нин сійӧ, ачыс нажӧвитіс со мыйта сьӧм.

Лӧсьыд асьтӧ лыддьыны уджалысь мортӧн, эсійӧ рабочӧй классыслӧн юкӧнӧн, коді вӧчис Октябрьскӧй революция, коді стрӧитіс социализм. А коммунизмтӧ стрӧитны Саша и ачыс тшӧтш кутас. Да, да, со этайӧ аслас киясӧн.

Тадз мӧвпалігтыр зон восьлаліс гортланьыс. Восьлаліс и кыліс мыш вывсьыс бордъяс. Кокъясыс пружинитӧны, зумыда тувччалӧны зарни паськӧмӧн вӧччӧм карса улича кузя. Тешкодь, мыйта ветлӧма, со, тайӧ улича кузяыс, а ӧнӧдз эз гӧгӧрволы, мый уличыс зэв мича, уна йӧза, и став паныдасьысьыс видзӧдӧ Саша вылӧ бур видзӧдласӧн. Бур морт пӧ восьлалӧ.

Магазин дорті прӧйдитігӧн зонкалы син улас уси олӧма нывбаба, коді петіс магазинсьыс. Сылӧн польтчӧм хозяйственнӧй сумка вевдорын тоньвидзис ещӧ ыджыд кӧлач кӧлышка. Сашалы мамыс частӧ жӧ кӧлач ньӧблывліс. Сійӧ гыньыктіс дульвасӧ — кынӧмыс рыт кежлад сюммӧма ёнакодь.

«А мый, — друг думыштіс сійӧ — ме кӧ пыра да тшӧтш ньӧба кӧлачсӧ? А мыйла кӧлач? Позьӧ и торт. Дерт жӧ, торт!»

Тайӧ мӧвпыс зонкаӧс ёна чуйдіс. Рытнас кутасны тортнас юны чай. Мамыс выль халата. Гашкӧ, и суседкасӧ, Маша тётяӧс, чукӧстас чай дорас. Нимӧдчас, дерт, халатнас. Сэсся содтас: «Торт вайи и. Чай юыштам вай, пуксьӧй». Оз, дерт, ошйысьны кут суседка водзас, модаыс мамыслӧн абу сэтшӧм. Сідз прӧста юӧртас. Тӧдӧ Саша мамсӧ. Помнитӧ Саша, кор первой луннас удж вывсьыс локтіс, мамыс эз тӧд, мыйӧнджык вердны сійӧс. Пызан вылӧ сёян ваялігтыр меліа видзӧдлывліс пиыс вылӧ да варова кайтіс:

— Мудзин пӧдикӧ, сёй ёна, пиук, мед аски кежлӧ выль эбӧс шедас.

Быд мамлы зачесь пиыдлӧн первой нажӧткаысь, а Саша мамлы кык пӧв, сы вӧсна мый быдтіс сійӧ писӧ ӧтнас, дас кык арӧссянь батьтӧг.

Ичӧтдырйиыс Саша думайтліс, мый пондас ачыс нажӧвитны да уна и кампет да мороженӧй ньӧбас. А ӧні, со, юмовтор ньӧбӧм йылысь тӧд вылас уськӧдіс сӧмын этайӧ кӧлача нывбабасӧ аддзӧм бӧрын, и эз ас вӧснаыс, а мамсӧ радлӧдлӧм ради сӧмын.

«Мед сӧмын тортыс эм-а», — думыштіс магазинӧ пыригӧн.

Тортъяс вӧліны. Мича розаясӧн баситӧм тортъяс. Вот татшӧмыс и колӧ! Саша котӧртіс касса дорӧ, мыччис чек и эз на удит тортсӧ босьтны, лапкис кодкӧ кисӧ сылы пельпом вылас. Сьӧкыд мужичӧй чабыр.

Валера Морохин тай! Саша первойсӧ падмыштіскодь весиг. Некор сійӧ эз лысьтлы думыштны, мый Морохин та мында йӧз дырйи матысса ёрт дінӧ моз шыасяс. То пӧ тэ кӧні, другӧй, вӧлӧмыд, а ме пӧ чайті, мамыд дорӧ нёнясьны нин котӧртін.

Абу, дерт, ёна кажитчан кывъяс, но шыасис друг дорӧ моз!

Збыльысь кӧ талун Сашалӧн шуда лун-а?

Удж вылас асывсяньыс лючки-ладнӧ ставыс артмис. Степан дядь, код дорӧ индӧма Сашаӧс ученик пыдди, весиг ошкыштіс талун, вежӧра детинка пӧ тэ. Тулыс кежлас пӧ, армияад мунігкежлӧ, тадз кӧ кутан зільны, бур специалистӧн бетон кузяыд лоан. Саша ворсігмоз и бергӧдліс зырнас. Ошкигад тай пыр окотапырысь уджавсьӧ.

И кантораас эсійӧ бухгалтерша нылыс. Видзӧдліс кыдзи. Гашкӧ, Саша кажитчис сылы да? А мыйла эськӧ и эз? Школаас ӧд нывъяс пыр шулісны, мича пӧ. Содтыштлісны, дерт, рам кукань кодь пӧ сӧмын. Но тайӧ жӧ оз тӧд, мый кукань кодь ме. Гашкӧ, быд зон вылӧ сійӧ койӧ сэтшӧм видзӧдлассӧ? Но век жӧ сійӧ казяліс Сашаӧс. Сідзкӧ, сійӧ кутшӧмкӧ да зон нин, нывъяс кӧ тадз козьналӧны мича серамӧн. Мед, шуам, абу Валера Морохин кодь, сы кодьыс, гашкӧ, свет вылас шоч. Сэтшӧмнас Саша оз и вермы лоны, дай оз и кӧсйы. Гашкӧ, сӧмын сы ног окота сьывны да гитараӧн ворсны. И ещӧ босьтны варовлунсӧ кӧ сылысь, йӧзыскӧд сёрнитны кужӧмсӧ. Эз эськӧ сэки нывъяс рам куканьнад шуны, дай Валера эз эськӧ лысьт сыкӧд тадз сёрнитны.

Школаас велӧдчигӧн Сашалӧн пыр медводз математикаысь да физикаысь задачаыс вӧлі решитӧма, химияысь формулатӧ медводз восьтӧма. А сёрнитны Саша эз сяммыв. Быттьӧкӧ пыр поліс, мый сылысь мӧвпсӧ оз сідз гӧгӧрвоны, кыдз думайтӧ, либӧ сыкӧд сёрнитысьсӧ поліс кутшӧмкӧ ковтӧм кывйӧн кедзовтны. Гижӧмӧн кӧ — пӧжалуйста. Сочиненньӧыс, шуам, артмыліс, а устнӧ дырйи мыкталӧ мыйя. Сэтшӧм нин, тыдалӧ, модаыс сылӧн.

Со и ӧні, мый эськӧ не чорыдджыка вочавидзны Валераыслы, кутшӧм пӧ ме тэныд мам дорын нёнясьысь, ме пӧ тэ кодь жӧ удж-рӧбӧта керысь. Но эз шу. Нюмдыштіс сӧмын. Ладнӧ пӧ, кыдз кӧсъян, ме пӧ таысь ог бурджык ни омӧльджык ло. А мый пӧ шыасин ме дорӧ, мем зэв любӧ, соссьыны ог кӧсйы.

Сэтшӧмӧсь нин, тыдалӧ, дас квайт — дас сизим арӧсаясыд, кыскӧ найӧс ассьыс ыджыдджык дорӧ. Таысь найӧ асьнысӧ тшӧтш ыджыдджыкӧн да удалджыкӧн кылӧны. Валера Морохин буретш и вӧлі Сашалы сійӧ магнитнас, код дорӧ кыскис дугдывтӧг. Но мыйлакӧ Валера-магнит эз сибӧдлы ас бердас зонкаӧс.

Валера — найӧ бригадаын жӧ уджалысь. Бригадаас воис Сашакӧд пӧшти ӧти пӧраӧ. Но некод эз вермы эськӧ шуны, мый выль морт сійӧ коллективын. Вывті ӧдйӧ кыдзкӧ сорласис бригадасаяскӧд. Кӧть кутшӧм удж — вӧчис сійӧ кокниа. Дерт, ёна сьӧкыдінӧ да няйтінӧ, шуам, цемент ректанінӧ, кӧні бусыс оз сӧмын нырад да вомад пырӧ, но весиг и ты-мус пытшкад, сійӧ эз уськӧдчывлы. Та вылӧ эмӧсь Саша кодь томджыкъяс либӧ Степан дядь кодь кывзысьысьяс. Но дышӧн да удж вылысь пышъялысьӧн Валераӧс он жӧ шу. Нырщикӧн на мукӧддырйи асьсӧ петкӧдлас. Сетан кӧ быттьӧ вӧля, и бригадир пыдди на командуйтыштас.

Туша тэчасӧн да ныр-вом мичӧн, пӧжалуй, Морохин ставсӧ жӧ бригадаысь вевтыртас. Ён, мича, синмӧ шыбитчана зонмыс. Арлыд сертиыс Сашаысь ыджыд, армияысь петӧма нин. Ас тшӧтшъяяскӧд да олӧмаджыкъяскӧд сійӧ пырджык сёрнитӧ шутка-серамӧн. А томиник Сашаӧс эзджык казявлы. Шыасьліс кӧ, «салага» нимӧн сӧмын чукӧстліс. Зонка эз дӧзмыв таысь, лыддис, сідзи и колӧ. Сӧмын завидьтыштіс неуна. «Овлӧны жӧ татшӧмъясыд, — неӧтчыдысь думайтліс сійӧ. — И туша, и ныр-вом, и кыв-вор — ставыс эм сылӧн. И паськӧм сы вылын пукалӧ дзим-дзурк, мый кӧть оз пасьтав». Со и тані, магазинас, нывъяс сы вылӧ и сӧмын дзоргӧны. Дерт ӧд, синъясас сылӧн пыр кутшӧмкӧ аслыссяма дзирд ворсӧдчӧ, а вом доръясыс сідзи и дасьтысьӧмны нюмъёвтны либӧ сьылыштны мыйкӧ «Очи чёрные» сямаӧс. А гӧлӧс Валералӧн мыла. И гитараӧн ворсӧ артист моз. Воис ӧтчыд гитараӧн удж вылӧ. Дыр кывзыны Прокопьевич эз лэдз, энӧ пӧ ӧд гажӧдчыны локтӧй — уджавны. Рытнас пӧ, пӧжалуйста, клубӧ, тшӧтш и ме кывзыныс локта, а ӧні пӧ мед дукыс бренчалкаыдлӧн эз вӧв.

Сійӧ лун бӧрас Сашалы Валера моз жӧ окота лои сьывны да ворсыштны.

А вот бригадаын мыйлакӧ Морохинӧс эз ёна радейтны. Тайӧс Саша некымынысь нин гӧгӧрволіс. «Завидьнысла», — кыдзкӧ ӧтчыд шуис Морохин. Гашкӧ, и завидьнысла. А сэсся явнӧ серам ради пондісны ыдждӧдлыны Валерьян зятьӧн.

Саша зэв бура помнитӧ сійӧ лунсӧ. Сэки бригада уджаліс выль птицефабрика дорын. Кымынкӧ морт, на лыдын Валера Морохин да Саша Канев, сиралісны вевтсӧ кутшӧмкӧ сарай сяма лажмыдик стрӧйбалысь. Пажын бӧрын муртса удитісны вевт вылӧ кайны, увдорсяньыс кутшӧмкӧ нывбаба гӧлӧс пондіс чуксасьны:

— Валерьян зять! Валерьян зять!

Некод эз и думыштлы, мый налысь Морохинсӧ тадз чуксалӧны. Но Валера ёрччыштіс и ёртъясыслы мигнитыштӧм бӧрын пелька ушумгайтчис вевт вылысь. Тювис муас дай дзебсис.

Весьшӧрӧ мича чышъяна тьӧтӧ горзіс:

— Валерьян зять! Зинаыд больничаын! Пи вайӧма!

Чужис Валера бӧр вевт вылын сӧмын сэк, кор нывбаба саяліс птицефабрика ыджыд корпус мышкӧ.

— Но, Валерьян зятюшко, кытчӧ нӧ лотасьлін? Тьӧщаыд воліс, — кытшалісны сійӧс ёртъясыс.

— Кутшӧм ме зять тіянлы лои? — дӧзмис мортыд, ырыштчыліс.

— Но, абу кӧ зять, бать инӧ! Кывлін, пи пӧ!

— Пи, да кодлӧнкӧ, абу менам. Ми Зинакӧд во нин огӧ олӧй.

— Но тэ, зонмӧй... — шыасис татчӧ бокынкодь сулалысь Степан дядь, кодӧс бригадир ыстіс вевт вылӧ том йӧзлы лад пуктысь пыдди.

— Мед оз ло пӧръясьӧм, а тулыснас тэнӧ ме, зонмӧ, аддзывлі на ордысь. Сусед ме...

— О, тэ сусед?! Сідзкӧ, тэнад и пиыс! — орӧдіс Степан дядьӧс Валера да гӧрӧктӧмӧн серӧктіс. Серӧктісны и мукӧд, быттьӧ ставныс лоины дӧвӧльнӧйӧсь, мый Валера татшӧм кокниа чӧвтіс сы вылӧ кышалӧм мыжсӧ.

Сэк Саша уджаліс первойя вежон на да эз тӧд, серавны ставныскӧд али Степан дядь мозыс сьӧвзьыны. Веськыда кӧ шуны, эз кажитчы Валералӧн шуткаыс, но ӧд ставныс гыгзьӧны, мый тшӧтш не серӧктыны. А мӧдар боксянь, Степан дядьыс жаль.

Унатор на оз тӧд Саша. Пример вылӧ, ӧнӧдз на эз тӧдлы, мый первӧй пӧлучка колӧ пасйыны коллективын. А Морохин со шуӧ: колӧ пӧ. И дерт пӧ, мыйкӧ крепыдджыктор ковмас ньӧбны, шуам, эсійӧ югыд дозъя «экстрасӧ». Тортыд сійӧ челядьлы сӧмын...

— Ме мамӧлы кӧсйи... — заводитліс дорйысьны Саша.

— А-а, тэ мамыдлы... Ме сідзи и чайті... Коллективыд, значит, тэныд — тьфу! А ещӧ пӧди комсомолец. Абу миян ног тайӧ, ми — рабочӧй класс...

Саша и ас вылас не рад, мый мамсӧ гарыштіс. Дзикӧдз яналіс Валера водзын. Сійӧ ӧмӧй «ог» шуис. Колӧ кӧ, Саша оз торйӧдчы бригадасьыс. И сьӧмсӧ оз жалит, мый колӧ, сійӧс и ньӧбас.

— Вот, важӧн мед тадзи! Уважайта! — тайӧ Валера тадзсӧ шуӧ и кыскӧ зонкаӧс вина вузаланінӧ да сюйыштӧ кык мужичӧй костӧ ӧчередьӧ.

Югыд дозйысь кындзи, Саша ньӧбис ещӧ зор пом кодь калбас да моздор тыр ньӧбасӧн веськӧдчис ӧдзӧс дорын виччысьысь Валера дорӧ.

— Со, ньӧбаси. Кӧнӧсь мукӧдъясыс?

— Разӧдчисны нин, дитяӧй, коді кытчӧ, — Валера веськыда дзоргӧ Сашалы синмас.

Саша тӧкӧтьӧ эз уськӧд ньӧбассӧ кисьыс. Сэки Валера босьтӧ сы киысь «экстра» дозсӧ да сюйӧ аслыс гач зептас калбас ёкмыльыс да тортыс кольӧны Саша ордӧ, и ичӧт кагалы моз шуӧ:

— Эн шогсьы! Мый чӧрт вылӧ миянлы бригадаыс? Бригадир — мӧд делӧ. Мунам ми тэкӧд тӧдан кытчӧ? Прокопьевич ордӧ мунам! Тэа-меа — выль йӧз. Вот и пӧлагайтчӧ гӧститӧдны миянлысь старикнымӧс, поскольку сійӧ миянлы удждонтӧ гижӧ. Вот, брат, какие пироги-то! Ме доз ньӧби жӧ! Топайтам!

И Саша топайтӧ-мунӧ Валеракӧд орччӧн. Но мустӧм мӧвпъяс век жӧ жуӧны юрас, торкалӧны кывзыны Валералысь ошйысяна кыпыд сёрнисӧ.

«Мыйла первой Валера бригада йылысь гарыштіс, а сэсся чоморуаліс найӧс и бригадир сӧмын колис? Дерт, шуам, Прокопьевич абу лёк дядьыс, радпырысь сійӧс Саша гӧститӧдас. Но ӧд Валера шуӧм серти кӧ, артмӧ, медым бригадир водзӧ эз удзӧд мыйӧнкӧ найӧс». — Нинӧм оз гӧгӧрво Саша.

Быттьӧ зонка юалӧмъяс вылӧ вочакыв, Валера висьтасис:

— Бригадиръясыд найӧ ставныс вельмӧмаӧсь. Водзті ме ПМК-ын уджалі. Но и вӧлі миян сэн ӧти! Веськыда синмад и шуас:

— А шо я буду иметь з отого? Жулик, гад. Пышйи сэтысь. Надюшкӧд тӧдмаси, сійӧ татчӧ, миян бригадаӧ, инӧдіс, клёвӧй пӧ делӧ. А веськыда кӧ сёрнитны, старикным миян абу жӧ святӧй вӧлӧма, ошкӧны кӧть-а. Кывлін кодкӧ лунӧ? Нарядъяс пӧ тупки. А мый миянлы эськӧ сы йылысь и висьтавнысӧ? Яснӧ, намёк! Тэд тай чӧлӧй лекция лыддис. Дарӧвӧй вылад быдӧн горш. Да ладнӧ, ӧтчыд-мӧдысьыд юктӧдам! Да вед, Сашко?

Валера пӧшти сывйыштӧ вӧсньыдик сьылісӧ Сашалысь. Саша нюгыльтчыштӧ, но попугай моз тшӧтш шуӧ: — Юктӧдам!

А ӧд эз казяв Саша, медым бригадирыс кутшӧмкӧ мисьтӧм сёрни панліс. Прокопьевич сӧмын шуис, бура пӧ тайӧ тӧлысьсӧ лои муркӧдӧма. И Саша дорӧ шыасьліс: тэныд пӧ, том морт, гижи жӧ, первой удждон регыд босьтан. Сэсся висьталіс, мый мамсӧ Сашалысь бура тӧдӧ, сетіс сӧвет: ньӧбны мамыслы бурджык козин.

Нинӧм сэтшӧмторсӧ эз гӧгӧрво Саша бригадир сёрниысь, но Валера, со, казялӧма...

— Со, тані и старикным олӧ, — Валералӧн гӧлӧсыс торкис Сашалысь думъяссӧ.

Найӧ матыстчисны кык судта неыджыд пу керка кильчӧ помӧ.

— Пырам, сідзкӧ? — эскытӧма юалӧ зонка.

— Тані сулавны ли мый?

— Кыдзкӧ абу лӧсьыд...

— Мыйла нӧ абу? Асланым гӧснечӧн зэв на и лӧсьыд! А мый эг ресторанӧ, шуам, пригласитӧ, нинӧм дивӧыс абу, эг на нажӧвитӧй... Чышкышт коктӧ.

Валера тэрыба воськовтӧ порог вомӧн. Квартира ӧдзӧсӧ эз ковмы дыр звӧнитны, дзик пыр пелькиник олӧма нывбаба восьтіс ӧдзӧссӧ.

— Том йӧз тай. Людюк дорӧ, гашкӧ, да? — шыасис сійӧ.

— Прокопьевичыд дорӧ ми. Гортад?

— Ок, пиукъяс, энӧ суӧй, муртса пырыштліс и бӧр муніс.

— Н-но, кытчӧ нӧ эськӧ? А эз висьтав, кор локтас?

— Эз тай ёна дыр кӧсйы ветлыны-а. Код тӧдас...

Кӧзяйкакӧд сёрнисӧ ставнас нуӧдӧ Валера, Саша чӧв олӧ, зумышвидзӧ. Ӧдзӧс пӧдлышсьӧм бӧрын сійӧ, быттьӧ лэчкысь мынӧм, ышловзьыштӧ:

— Абу кӧ и, мунам гортӧ дай.

— Но, локтім-локтім да огӧ жӧ бӧр сідзи мунӧй, — шуӧ Валера да вӧзйӧ кайлыны вевдор судтаас, кӧні олӧ сылӧн тӧдса ныв. — Пукалыштам Надюш ордын, а сэні, видзӧдан дай, и Прокопьевичыд воас.

— Кутшӧм ещӧ Надюш? — зонка гӧлӧсын кыліс дӧзмӧм.

— Пыран да аддзан, — серӧктӧ Валера да босьтӧ Сашаӧс сойбордйӧдыс и веськӧдчӧ вевдор судталань. — Эк тэ, салага, ныв дорад и то мырдӧн колӧ кыскыны.

Найӧ звӧнок вылӧ ӧдзӧс сайсянь кыліс чунов ныв гӧлӧс: — Коді?

— Ми, — збоя вочавидзӧ Валера и синмыштӧ Сашалы.

Ӧдзӧс дзик пыр воссис. Саша муртса оз горӧд: порог сайын сулаліс, синъяснас дзирыда ворсӧдчигтыр, эсійӧ нылыс, канторасьыс. Но ныв Саша вылӧ шыбитліс сӧмын видзӧдлассӧ, нылӧс интересуйтіс сӧмын Валера. А сійӧ, буракӧ, важӧн нин тӧдса, пырӧ ас гортас моз.

— Извенит, Надюш, ми уджалан паськӧмаӧсь, — заводитіс сьывны Валера. — Удждоннымӧс пӧлучитім и, эскы кӧть эн, эг вермӧй не локны тэ дорӧ — тэ удж вылас татчӧ индін. Да и первой пӧлучка... и со, ёртыслӧн тшӧтш. Гӧснеч миян, правда...

Валера кватитіс Саша киысь торт кӧрӧбкасӧ, лӧсьыдика копыртчыштӧмӧн, мыччис нывлы, сэсся перйис зепсьыс «экстра» дозсӧ, муніс да пуктіс пызан вылас.

— Ой, мыйла нӧ? — шензьыштіс нылыд дозтӧ аддзӧм бӧрын.

— Кыдзи мыйла? Гашкӧ, ми корасьны воим да, — шмонитыштіс Валера да керка пытшсӧ гунь-гонькерӧм бӧрын юаліс:

— Кӧні нӧ эськӧ тесьт-тьӧщаыс, оз тай нӧ тыдавны?

Нывлӧн ыпнитісны яр биӧн синъясыс, явнӧ тшапитчӧмӧн вочавидзис:

— Он на и тӧд, вежон нин кыдз курортӧ мунлісны. Менӧ, коньӧрушкоӧс, видлыныс он и пырав. Пӧдругаяс сӧмын и пырыштлӧны, — Надя индіс вежӧс сайланьыс, кысянь и збыль кыліс музыка шы да ныв серам.

Валера, тшӧктӧм виччысьтӧг, пӧрччысис да, сук юрсисӧ чуньяснас шыльӧдігтыр, чепӧсйис вежӧс сайлань. А Саша тапикасис места вылас, эз тӧд, мый вӧчны, тшӧктытӧг пӧрччысьны сійӧ эз лысьт, а кӧзяйка уськӧдчис тшӧтш Валера бӧрся, быттьӧ поліс сыысь торъявны.

Вежӧс сайын лыбис сэтшӧм шум. Тайӧ Валера, гулю позйӧ веськалӧм варыш моз, лэптіс шумсӧ.

«Ме дзик лишнӧй тані, некодлы ковтӧм», — жугыля думыштіс Саша да дась нин вӧлі уйкнитны ӧдзӧс мӧдарӧ, но, вӧлӧмкӧ, кӧзяйкаыд абу жӧ дзик вунӧдӧма сы йылысь. Дзользьысь лэбач моз сійӧ жбыр лэбыштіс Саша дорӧ, лапкучкысис: — Век на абу пӧрччысьӧма! Но и но! Тэ нӧ сэтшӧм полысь ли мый?

Ныв ӧдйӧ шурк пӧрччӧдіс Сашаӧс:

— Ме тіян бригадаысь став зонсӧ тӧда. Тэнӧ кыдзи, Сашаӧн али Шурикӧн шуӧны? Ме — Надя. Помнитан, ми тэкӧд талун аддзысьлім нин?

Сашалы и любӧ, и яндзимкодь, ставнас лышкыд шонді моз нюмвидзӧ: — Сашаӧн.

— Ах, Саша! Ме сідзи и тӧді! Шурикнас ичӧтикъясӧс сӧмын шуӧны. Вот и тӧдмасимӧ! Лок нывъяс дорас.

Гажаа сералігтыр Надя пыртӧ Сашаӧс вежӧс сайӧ, стрӧгакодь шыасьӧ Валера дорӧ: — Тэ мыйла тӧварыштӧ ӧтнассӧ колин?

Надялӧн гӧстяясыс вӧліны кык ныв, накӧд тӧдмӧдігӧн ӧтисӧ Надя шуис Людаӧн, мӧдсӧ — Ираӧн.

Ирина Поповаӧс Саша пыригкостіыс тӧдіс. Кӧкъямысӧд классӧдз ӧтлаын велӧдчисны. Ира, нывкаяс висьталӧм серти, парикмахерскӧйӧ пӧ пырӧма уджавны. Ныв ёна шаньмӧма да мичаммӧма, краситӧм гыжъяса да вылын причёскаа. Ирина шензьӧмӧн паськӧдліс синсӧ, а сэсся, ворсӧдчыштны ли мый ли лои окота, мынтӧдчис Валера дорысь да тіркнитіс-локтіс Саша водзӧ, вомсӧ юмбыртлӧмӧн шуис:

— Шурик! Чур, мекӧд тарыт рытывбыд танцуйтны! — и син бӧжнас дзоркнитліс Валера вылӧ, мый пӧ тэ та вылӧ шуан.

Сылысь синвидзӧдлассӧ кыйис, тыдалӧ, и Надя да, Сашаӧс ас дорас кыскыштӧмӧн, ярскӧба шуис: — Саша мекӧд нин кӧсйысис.

Саша гӧгӧрвоис, нывъяс костын мунӧ гуся тыш оз сы вӧсна, а Валера вӧсна. Саша шпыньмунӧмӧн вочавидзис:

— Кутшӧм ме танцуйтысь! Воськов вӧчны ог куж. Ме, бурджык, пластинка бергӧдлыны кута, а ті, со, Валеракӧд йӧктӧй, ӧчередясьӧмӧн.

— Подождите, — шыасис татчӧ Валера. — Йӧктынысӧ водзджык на. Надюш, дасьтышт пызан вылад мыйкӧ. Тшак, капуста... — Надяӧс ыстӧм бӧрын вашкӧбтіс Сашалы пеляс:

— Бӧлбан, мун Надюшыслы отсышт!

Ачыс кватитіс Иринаӧс коскӧдыс да пондіс бергавны джодж кузяыс. — Людочка, андел, бергӧдлышт пластинкасӧ! — тшӧктіс коймӧд нылыслы.

Саша, дерт жӧ, эз вӧтчы Надя бӧрся, кӧть и другыс ёна ышӧдіс. Абу на жӧ ӧд сэтшӧм йӧй.

— Ме ог куж отсасьныд, — шуис сійӧ, муніс да пуктіс радиола вылӧ пластинка, чукӧстіс сэсся йӧктыны раминик нывкаӧс, кодӧс шуисны Людаӧн.

Но кузя танцуйтны налы эз удайтчы, Надя чукӧстіс пызан сайӧ.

— Фи, ме чайті шампанскӧй! — вежыньтліс краситӧм вом дорсӧ Ирина. Сы бӧрын пуксялісны пызан сайӧ Валера да Саша. Люда ыстысис, мый батьыс локтіс нин, да муніс.

Ирина да Надя пыр и дивитыштісны сійӧс, манашка кодь пӧ.

— Менӧ бара-й гортын некод оз пиняв, кӧть войбыд ветла. Ачым нажӧвита, ачым, сідзкӧ, и кӧзяиныс ас вылын, — гӧрдитчыштӧмӧн висьтасис Ирина.

— А ӧні ачым ме кӧзяин и кӧзяйка, — юӧртӧ Надя.

Варовмӧм нывъяслы окота лои тӧдны и зонъяс йылысь. Первойӧн заводитісны пӧдтыны юасьӧмнас раминик Сашаӧс. Кытчӧкӧ петавлан он да, эм абу ныв да, эм кӧ, мича абу да — быдтор.

— Петавла. Мыйла ог петавлы? — дорйысис Саша. — Кино вылӧ ветла, ДОСААФ-ӧ...

Нывъяс серӧктісны. Нывъяскӧд гуляйтӧмтӧ пӧ висьтась.

— Некутшӧм ныв абу, — веськыда шуис зонка.

— Да абу кӧ, и мед! — шпыннялӧны нывъяс. — Босьтам дай ми и забронируйтам. Вот видзам тарыт вой шӧр бӧрӧдз!

— Вой шӧр бӧрӧдзыд ог, — шуӧ Саша да видзӧдлӧ другыс вылӧ. — Ми здук кежлӧ сӧмын ті ордӧ. Прокопьевич ордӧ миянлы колӧ. Да ӧд, Валера?

Валера дыр оз вочавидз, сійӧ нывъяс моз жӧ шмыньвидзӧ. Медбӧрын шыасис жӧ:

— Эн тӧждысь.

Прокопьевичӧс казьтыштӧм ӧбӧдитіс кӧзяйкасӧ.

— А-а, ті, сідзкӧ, эн ме дорӧ — бригадир дорад воинныд? Тэрмасянныд кӧ быттьӧ, ог кут. Велӧдыштӧй сылысь законодательствосӧ. Кодкӧлун, ой, кыз книга тай ньӧбӧма...

Надя парсӧ чушкӧдыштӧма, и эз позь гӧгӧрвоны, шмонитӧ сійӧ али збыль скӧралӧ. Валера бурӧдыштіс:

— Но, но, Надюш! Ӧмидз кустсьыс оз регыдӧн петлыны. Дай Прокопьевичыс абу гортас. Ресторанын, гашкӧ, коньяк бучкӧ. Шуан, законодательствоӧн интересуйтчӧ.

— Прокопьевичыс? — Надя гажаа серӧктӧ. — Сійӧ миян настӧящӧй прокурор нин. Народнӧй заседательӧ ӧтторъя сійӧс бӧрйӧны. Быдлаӧ нырсӧ сюйӧ. Тӧрыт меным шуӧ, мамыдъяс пӧ мунісны, да быд рыт ті ордын «хи-хи-хи» да «ха-ха-ха». Ог, мися, гажтӧмтчы, вочавидзи. А мый нӧ?

Висьтасьысь бара серӧктіс, но кор гӧгӧрвоис, мый Валера, кӧть и ачыс юаліс, оз прамӧя кывзы, пуша-пашакылӧ Иринакӧд, дугдіс.

— Этайӧ сьӧдіникыс... муніс тай... Прокопьевичлӧн ныв инӧ? — юаліс Саша, кутшӧмкӧ бес кыскыштіс кывйӧдыс.

— Ныв, — пырысь-пыр ӧзйис Надя. — А мый, кажитчис сійӧ тэныд?

— Прӧста сідз юалі, — нурбыльтіс Саша.

— Прӧста сідз ті нинӧм он вӧчӧй, тӧда тіянӧс, тӧда! — гӧлӧссӧ лаймӧдӧмӧн грӧзитчыштіс чуньнас Надя.

«Вежӧгтӧ ли мый нӧ менӧ?» — думыштіс Саша да падмискодь, вочакывсӧ сетны эз тӧд кыдзи. Зато Валера Иринакӧд вашкӧдчӧмсӧ эновтіс да суитчис на костӧ:

— Надюш... Кӧсъян кӧ тӧдны, восьта ӧти секрет. Сашалы кажитчӧ ӧти ныв. Локтіс татчӧ сы вӧсна, медым сійӧ нывсӧ аски рыт танцплощадка вылӧ нуӧдлыны. Гӧгӧрвоин? А ӧні ноко вайӧ видлам кӧрсӧ со этайӧ макуттяыслысь, — Валера кокниа чургӧдіс кисӧ «экстра» дозлань.

Саша сьӧлӧмнас уси, другыс, кыдз шуласны, ас кӧсйытӧгыс гӧтраліс. Сійӧ букыша, лӧгпырысь видзӧдліс Валера вылӧ, но мӧдыд сӧмын ӧлӧдыштіс сійӧс кинас, лӧня пӧ ов, шутка пӧ.

Надя жӧ збыльысь радліс али явнӧ сераліс Саша вылын, кулакас пыльснитӧм бӧрын горӧдіс:

— Абу-ӧ нин ме сійӧ нылыс? Менӧ кӧ, ме радпырысь. Ай да Саша, молодеч!

— Но вот, договоритчимӧ, — шуис Валера, румкаясӧ кисьталігмоз, сэсся вӧзйис тост: — Надюш, кӧзяйка, тэ вӧсна юам первойя румкасӧ!

Лыбис шум, точкысисны. Тшӧтш и Саша быдӧнкӧд воча румканас инмӧдчыштліс да Валера другыс моз пӧрӧдіс курыдторсӧ вомас. Но велавтӧгыд тшӧкмуніс да бурпӧт семдӧмӧн кызіс.

— Ме вӧсна тай тэ он кӧсйы юны, — серамсорӧн кӧритыштіс сійӧс Надя да вачӧдыштіс мышкуас.

— Ничево, первойысьыд пыр тадзи! — збодера шыасис Валера да кисьтіс мӧд румка. Мӧдысьыд пӧ гылыдджыка нин прӧйдитас. — Давай, Сашко, ло мужичӧйӧн, — шуӧ сійӧ да точнитӧ Саша румкаӧ.

Сэтшӧмтор лоӧм бӧрад Саша кӧть му пырыс мунас. Эстшӧма яналіс! Кезйӧдлӧ Сашаӧс мӧд румкасӧ босьтны, но мый керан, быть, кӧсъян кӧ мужичӧйӧн лоны. И Саша босьтӧ румкасӧ, кутшӧмкӧ скӧрлунӧн шыасьӧ думсьыс нывъяс дорӧ, кодъяс веськыда сералӧны сы вылын. «Мый, ті чайтанныд, ме сэтшӧм нин зырымбедь?! Ог, всё равно ог, ог джӧмды ӧні, юа тіянлы назлӧ!»

Эз, эз джӧмды ни эз виньды! Ура! Нывъяс, тіянлы некод вылын серавнытӧ!

Саша чиктылӧ, Сашалы нимкодь. Сералӧ, дугдывтӧг вашъялӧ.

— Молодец, Сашко! — ошкӧ сійӧс Валера да вештыштӧ сылань матӧджык сёян тыра тарелка. — Видлы. Коддзан.

— Да сійӧ код нин, — индӧны Сашалӧн вашвидзысь вом вылӧ Ирина да Надя.

Саша заводитліс нин панясьны, но татшӧмтортӧ кывлӧм бӧрын шыбитіс паньсӧ: — Ме код? Да ме... Да кӧсъянныд кӧ тӧдны...

— ...Абу на, абу, сӧрӧны нывъяс, — лӧньӧдӧ сійӧс Валера да вӧзйӧ ещӧ румка...

Сашаӧс кодкӧ тракйис. Садьмис сьӧкыдпырысь. Кор вежӧртіс, мый куйлӧ лысваа му вылын и куйлӧ, буракӧ, дыркодь нин, шуйга сойыс позялӧма, со, лэптіс юрсӧ.

— Тэ нӧ мый, том морт, горттӧм-позтӧм али мый, тан куйлан? Прӧстудитчан да нэмыд кежлӧ верман калекаӧн кольны, — кыліс сэсся ас дорас шыасьӧм. Кыліс и дрӧгмуніс, пырысь-пыр паляліс. Татшӧм гӧлӧсыс сӧмын ӧти мортлӧн — бригадирыслӧн.

«Кӧні нӧ ме? И мыйла Прокопьевич тшӧтш тані?» — сьӧлӧмсяньыс шензьыштіс Саша и пондіс чеччыны. Бригадир отсӧгӧн сувтіс сійӧ кок йылас, но мыйӧн сувтіс, сразу гудыртчис сьӧлӧмыс, пондіс восӧдны.

— Но, зонмӧ, — ропкӧдчыштіс Прокопьевичыс, но ас кабырсьыс эз лэдз Сашаӧс.

— Ы-ы, — мурзіс да лӧвтіс Саша.

Медбӧрын дугдіс жӧ сійӧс восӧдныс, сос помнас ныр-вомсӧ чышкалігтыр, шыасис:

— Ме тайӧ, Прокопьевич... Извенит...

— Аддза, тэ, — шуис мӧдыс спокойнӧя да содтіс: — Сӧмын ог гӧгӧрво, мыйла тэ код и кыдзи татчӧ, миян кильчӧ помӧ, веськалін? Кыдзи?

Саша ачыс дасысь нин ассьыс юаліс тайӧторсӧ. Вочакывйыс эз вӧв ёна муса: эновтісны сійӧс татчӧ, а, гашкӧ и, тойыштісны на. Помнитӧ тай, йӧктісны нывъяскӧд, сэсся кодкӧ вӧзйис, вайӧ пӧ ветлам гуляйтыштам. И найӧ петісны. Сод кузяыс лэччӧмсӧ Саша помнитӧ на, а сэсся... Уси пӧдикӧ татчӧ кильчӧ помас дай. Найӧ мунісны-а. Кыдз сэсся, тадзи, буракӧ, и вӧлі.

Яндзим тайӧс бригадирыдлы висьтавны, но ӧд юалӧны да вочакывсӧ колӧ сетны. Мыйкӧ сӧрны Саша оз куж-а. Мый вӧлі, сійӧс и висьталіс:

— Ті ордӧ волім Морохинкӧд, сэсся, ті энӧ гортад вӧлӧй да, вевдор судтаас Валера нуӧдіс. Надя дорын пӧ пукалыштам. Но, пукалыштім, кыкнаннымлӧн доз вӧлі... Пӧлучка лун ӧд талун вӧлі...

— Но, но, яснӧ ставыс, — зонкаӧс кывзӧм бӧрын шыасис Прокопьевич: — Ассьыд медводдза удждонтӧ инӧ пасйин.

Прокопьевич неуна довкйӧдлыштіс юрнас, а сэсся водзӧ нуӧдіс сёрнисӧ: — Дерт, медводдза нажӧтка босьтӧмыд зэв ыджыд, позьӧ шуны, событие морт олӧмад. И окота сійӧс кыдзкӧ пасйыны. Ме вот, пример вылӧ, медводдза нажӧтка бӧрын муні базарӧ да ньӧби гамаши ичӧтик воклы. Ещӧ чӧлӧй кило ляскысьӧм пӧдушечка кампет. Вайи гортӧ — чой-воклӧн радыс! Медъёна, дерт, ичӧт вокӧй радліс. А кор локтіс мамӧ да тӧдмаліс, мый кампетсӧ ставнас сёйимӧ, а гамашиыс дзескыдкодь, сапӧг юрӧн пондіс менӧ нӧшавны. А бӧрас ымзӧмӧн бӧрддзис да корис менсьым прӧща. Со кыдз овлӧ... Да мый нӧ ми тані ывла вылас сулалам? Пырам, миянын сёрнитыштам, — друг орӧдіс сёрнисӧ Прокопьевичыс да вӧзйис гортас пырны. Саша нетшыштчис:

— Тіянӧ ог нин, гортын эг на вӧв талун, мамӧ пӧди виччысьӧ.

Прокопьевич бӧр кыскыштіс асланьыс зонкаӧс:

— Дерт нин, ме тэнӧ татшӧмтӧ гортад лэдза! Бара усян кытчӧкӧ.

Сійӧ, Сашаӧс сойбордйӧдыс кыскигтыр, веськӧдчис кильчӧланьыс, кӧні чусыда ломаліс, муртса югдӧдыштіс кильчӧ помсӧ ичӧтик лампочка. Саша ёрччыштіс:

— Ё-олки! Шуӧны, гортӧ колӧ! Мамӧ войбыд оз кут узьны.

— Водзджык колі думайтны мам йывсьыд! — орӧдіс скӧра бригадирыс. — Тэ чайтан, рад лоас сійӧ, тэнӧ этатшӧмсӧ аддзас да?! Быдтіс пиӧс, ыджыд надея. А сійӧ, видзӧдтӧ, первой нажӧткасьыс и юӧма чӧрт тӧдӧ кӧні да кодкӧд и турбыльтчӧма куст улӧ! Эх, ме эг чайт, мый тэ татшӧм, грамотнӧй, мися, тӧлка зон...

Татчӧ Прокопьевич кузя ышловзис да недыр чӧв олӧм бӧрын мӧд пӧлӧс гӧлӧсӧн нин шуис:

— Пыр, пыр, давай, нуӧдӧны кӧ! Морохинкӧд, значит, ме ордӧ кӧсйинныд пырны, а ачым нуӧда да — он? Пырам, сёрнитыштам.

Бригадир гӧлӧсын кыліс ӧттшӧтш и корӧм, и чорыдлун, и небыдик серам. Саша бура вежӧртіс бригадирыслысь тайӧ гӧлӧс серсӧ, и сійӧ код юр садьын кыптіс лӧг петӧм и вензьыны кӧсйӧм.

«Сёрнитны кӧсъян? Сёрнитам, мый огыс! Быдтор йылысь сёрнитам! — думсьыс шыасис зонка бригадир дорӧ. — Кыдзи дась вылас горшасянныд и кыдзи удждонтӧ гижанныд рӧбӧтникъясыдлы, и кыдзи ылӧдланныд ми вок томиник зонкаяссӧ. Школаын, значит, миянӧс ӧтитор вылӧ велӧдӧны — честнӧя овны. А ті, верстьӧяс, мудеритны тшӧктанныд. Колӧ ӧтиӧс мавтыштны, мӧд водзын увтыртчыны... Дружинничайтӧмӧн тай ышнясин. А, гашкӧ и, эн дружинничайт, гашкӧ, ресторанын на и пукалін, кыдз Валера шуис? А нуӧдінныд кӧ быттьӧ дружинничайтныс, и ме эськӧ муні...»

Кӧть зэв лӧня, ньӧжйӧник пырисны, гӧтырыс Прокопьевичлӧн пырысь-пыр чужис на дорӧ, абу на, тыдалӧ, и водлӧма.

— Эн тай нӧ дыр кӧсйы ветлыны! — лапкучкысис сійӧ кинас.

— Эн сёрнит, Ивановна, — мыжа морт моз нюмсер сетіс верӧсыс да заводитіс пӧрччӧдны гӧсьтсӧ. — Дружинничайтім!

Ивановна петіс кухняӧ.

Гӧсьт эз нин вермы виччысьны ужин шонтӧмсӧ. Шоныдінад веськаліс да сразу и зульскысис-унмовсис. Кухня пызан саяс и пӧрис.

— Тайӧс нӧ кодӧс ещӧ татшӧмсӧ пыртін? — явӧ нин дӧзмӧмӧн юаліс гӧтырыс. — Томиник, а код...

— Сійӧ вот и эм, мый код. Эз кӧ код вӧв, эг и пырт, — юрнас довкйӧдлышталіг, шуис верӧсыс. — Аддзи ӧшинь улысь, турбыльвидзӧ. Вай кыдзкӧ крӧватяд нуам, водтӧдамӧ. Пи тайӧ тэнад пӧдругалӧн.

— Кутшӧм ещӧ пӧдругалӧн? — гӧтырыслӧн дӧзмӧмыс век эз прӧйдит.

— Каневатӧ он ли мый нин помнит, тіянкӧд тай уджавліс.

— Ой, Любалӧн инӧ?! — вачкучкысис гӧтырыс. — Любонька, шудтӧм лов, верӧсыс тӧлктӧм вӧлі, пыр юис, ковмис мунны сы дорысь, писӧ ӧтнас кыпӧдіс, дай быдтасыс инӧ сэтшӧм жӧ кӧсйӧ лоны! Ой-я!

— Но, но, заводитін! — ӧлӧдіс сійӧс верӧсыс. — Ылаліс тарыт детинкаыс дак оз на позь шуны: тӧлктӧм, юысь лоӧ. Гашкӧ, ми коддьӧмыс на и сыысь мыжаыс. Да мый ӧні та йылысь... — Прокопьевич дӧзмӧмӧн орӧдіс сёрнисӧ да гӧсьтсӧ диван вылас меститӧм бӧрын шыасис:

— Ветлыны ӧд ковмас мамыс дорӧ. Висьтавны. Виччысьӧ, пӧдикӧ.

И тэрыба пасьтасьыштӧм бӧрын петіс.

Локтіс регыд.

— Ветлі, — юӧртіс гӧтырыслы.

— Но и мый?

— А мый сэсся. Тэ моз абу на жӧ водлӧма. Виччысьӧ. Ковмис грек ас лов вылӧ босьтны, пӧръялі, мися, срочнӧй войся удж вылӧ кольӧді питӧ, эн шогсьы. Сійӧ рад лоис менам юӧр вылӧ. Ме пӧ эськӧ думыштлі жӧ сы йылысь да. Юалі, мися, ылалӧмъяссьыс он пов, том морт ӧд? А сійӧ — ог пӧ тай чайт-а. Саша пӧ зонкаыс абу ышмалысь. А сэсся аттьӧавны пондіс: тіян бригадаӧ пӧ веськаліс, да спокойнӧй ме сы вӧсна. Вот ӧд мый, Ивановна! Эскӧ мамыс и пиыслы, и миянлы, бригадалы.

Водӧм бӧрас дыркодь на бергаліс вольпасяс Прокопьевич, эз вермы унмовсьны. Думсьыс сёрнитіс диван вылас узьысь гӧсьтыскӧд, сылӧн мамкӧд, Валера Морохинкӧд и ещӧ кодкӧдкӧ да, дерт жӧ, аслас бригадакӧд.

Вӧталіс-ӧ мыйкӧ Саша? А Сашалӧн унмыс эз вӧв лӧнь. Ӧтарӧ мурзіс сійӧ, герчкис пиньяснас. Гашкӧ, скӧраліс ас вылас, мый артмис сылӧн тадз, и войсӧ коллялӧ йӧзын.

Бур кӧть ещӧ, мый бур йӧз ордын.