КАБЫР ТЫР ШОНДІ
Ывла вылын войбыд пессис тӧв да шарӧдчис зэр, а асылыс пуксьӧма вывті нин лӧнь да яр шондіа.
Анна Степановна восьлаліс карса уличаяс кузя гортланьыс да небыдика нюмъяліс. Нюмыс сылӧн сідзи и ызбыльтіс-петіс кысянькӧ лов пытшсяньыс, и кутны сійӧс некыдз эз позь.
Тулысыс, шондібан, быттьӧ нарошнӧ зіль ичмонь моз войбыд шолькйысис-пожъясис зэрӧн, медым сылы удж вывсяньыс муніг кежлӧ татшӧм асывсӧ козьнавны. Гашкӧ, и пышкай чукӧр куш пу вожъяс костын сылы жӧ нарошнӧ тадз гажаа дзользьӧны.
Вӧлі ӧкмысӧд час, буретш удж вылӧ муналан кад. Йӧз унджыкыс зумыш чужӧмаӧсь, веськодя прӧйдитӧны сы бокті, а сійӧ, чӧртыс тӧдӧ мыйла, нюмъялӧ быд паныдасьысьлы, ставыслы дась горӧдны: «Бур асыв!»
А думыштны кӧ быттьӧ, пӧра да кад ӧмӧй эськӧ вӧлі сідзсӧ радлыны? Эз ӧд гуляйтанінсянь лок — удж вывсянь, войся дежурство бӧрын. Мудзӧм и ун локтӧм тырмӧ, майбырӧй. Налӧн травматологическӧяд медсестраыдлы оз ёна сюрлы лӧнь здукыд. То лекарство разӧдан, то укол вӧчан, то перевязка вылӧ висьысьясӧс новлӧдлан. Да мый и сёрнитнысӧ, сутки джын кок йылад жӧдзан, пуксьывны он удитлы. Сьӧд войнас, буди, сӧмын.
А со, мый тэ эськӧ шуан: восьлалӧ Анна Степановна удж бӧрас да гажаа вашъялӧ.
Овлӧ тай сідз: друг тэнӧ шымыртас радлун, а мыйысь, и помкасӧ бура он тӧд. Да, веськыда кӧ шуны, уна-ӧ мортыдлы колӧ радлӧм вылад. Мукӧддырйи ӧти кыв либӧ весиг ӧти бур синвидзӧдлас и тырмӧ.
Но, кор тэныд козьналӧны дзоридз, мед сійӧ весиг прӧстӧй виж турун, тэнсьыд сьӧлӧмтӧ тыртӧ радлун, ӧд сетісны сійӧс пӧсь сьӧлӧмсяньыс, кыдз ыджыд награда тэнад уджлы, шуны кӧ нин стӧчджыка.
Дерт, этайӧ дзоридз кабырыс, кодӧс Анна Степановна кутіс век киас кабыр тыр шондіӧс моз, и вӧлі помканас сійӧ радлунлы.
«Колі жӧ, дзик больнича порог дорас ӧд, петігас нин мыччисны! Аттьӧ Лидочкалы. Юксьыштіс аслас радлунӧн, и ме, со, дзик борда кодь лои, вуніс мудз и ун локтӧм. Пасибӧ, кӧть эмӧсь сэтшӧм йӧзыс, кодъяс кужӧны радлуннас юксьыны. Кутшӧм эськӧ олӧмыс вӧлі гажтӧм, эз кӧ вӧвны Лидочка кодьясыс».
Лидочка. Тадзи налӧн травматологическӧяс шуисны еджыд кудель юрсиа, андел кодь мича чужӧма нылӧс. Куйліс сійӧ отделениеын бура дыр нин, и быдӧн — висьысьяс кӧть, сэні уджалысьяс — сійӧс лыддисны ас мортӧн.
Лидочка пельӧ пырысь кодь визув да быдӧн дорӧ сибалысь. Эз бара сылӧн луннад кольлы пыравтӧм палатаыд, быдӧнкӧд удитас варовитыштны, юасьны и висьтасьны, а ӧттшӧтш кодлыкӧ и сой пӧвнас (сойыс вӧлі доймӧма да заводитліс косьмыны) пӧдушка-шебрастӧ лӧсьӧдыштас либӧ ва стӧкан мыччас.
Томлун да мичлун радиыс, дерт, и писькӧс радиыс тшӧтш, быдӧн радейтіс тайӧ нывсӧ. Быдӧн, дерт, ас ногыс, но сійӧс мустӧмтысьяс эз вӧвны.
А томджык мужичӧйяс сы бӧрся и синъяснас котралісны. Татшӧмъясыдлы, веськыда шуны, Лидочка эз ёна пӧвада сетлы. Шуас мыйкӧ, да мӧдыд сӧмын гӧрдӧдӧм ныр-вомсӧ малавны кутас.
Лидочка кутшӧмкӧ вывті ёсь кывъя. Главнӧйыс, мый думайтӧ, сійӧс крапкӧ-шуӧ веськыда синмад. Кодсюрӧӧс унаысь пикӧ воштыліс аслас бритва сяма кывнас. Дӧнзьывліс мукӧддырйи и врачьяслы. Но сы вылӧ мыйлакӧ некод эз вермы скӧравны. Гашкӧ, сы вӧсна, мый пырджык шуліс правдасӧ, а сэсся колана здукӧ сійӧ эз жӧ скупитчыв бур кыв вылад да аддзывліс самӧй лӧсялана, сьӧлӧмӧ йиджтысян кывъяс.
Лидочкалӧн уна пӧдруга. Бригада кодьнас мукӧддырйи воасны сійӧс видлыны. Эм и жӧник. Валя нимыс, Валентин. Зэв лӧсьыдик да прамӧй сёрниа зонмыс, Эжваын стрӧительство вылын шофёр. Лидочка шуткаӧн моз шофёрӧн и нимтӧ сійӧс. Ми пӧ, менам шофёркӧд, таво тулыс, май тӧлысьӧ гижсьыны нин кӧсйим, да, со пӧ, ме кос соя лои. Эновтас пӧ сэсся менӧ менам шофёрыд. Сідз шуӧ, а аслас синъясыс дзирдалӧны. Тӧдӧ: оз эновт. Радейтӧ Лидочкаӧс. Быд приёмнӧй лунӧ волӧ Лидочкаӧс видлыны, дыр пукаласны-кургасны гулю пара моз.
А ӧти лунӧ мыйыськӧ Лидочка дӧзмӧма жӧник вылад да-й вӧтлӧма дінсьыс. А бӧрас сэсся рытывбыд бӧрдӧма-сыркъялӧма.
Сы бӧрын вежисны быттьӧ нывтӧ. Куйлӧ лун-лун да чӧв олӧ, кабырсӧ вомас сюйӧма, йирӧ.
А жӧник ӧбӧдитчис ли, дӧзмис ли — дугдіс волыны. Лун дас нин оз локыв. Мый лоис зонмыдкӧд? Лидочка виччысьӧ сійӧс, кабырсӧ йирӧ, а мый керны, некод больничаын оз тӧд.
А, со, тайӧ бӧръя вояс локтіс Анна Степановна дорӧ Лидочка палатаысь ӧти нывбаба да шуӧ: — Бурӧд, Степановна, кыдзкӧ, верман кӧ, Лидочкаӧс, вынъяс абу водзӧ кывзынысӧ, войбыд бӧрдӧ-ымзӧ.
«Письтӧма жӧ, коньӧрлӧн, вежон чӧж чӧв оліс да», — думыштіс Анна Степановна найӧ палатаӧ мунігмоз. Пырис. Куимнан суседкаыс Лидочкалӧн кевмысьӧмӧн видзӧдлісны медсестра вылӧ. А сійӧ, веськыда шуны, эз ёна мелі вӧв нылыдкӧд. Первойсӧ, дерт, старайтчис бур кывйӧн бурӧдны. «Радейтӧ, — шуас, — Валентиныд, воас, эн бӧрд нинӧм абусьыс». Но Лидочка зэв скӧрысь горӧдіс:
— Тіян Валентинӧн и быдӧн! Мед кӧть некор оз волы!
— Ок, нывка, оз сьӧлӧмыд сёрнит — скӧрлуныд, — шуӧ Анна Степановна. А мӧдыд бара:
— А тіянлы кутшӧм делӧ, коді кӧть сёрнитӧ?! Быдӧнлы ме дорӧ делӧ!
Вот сэки и скӧрмис Анна Степановнаыд:
— Абу кӧ делӧ, оз и ков войнас шумсӧ лэптыны! Некодлы узьныс он сет, — ыджыдкодь гӧлӧсӧн, стрӧга артмис сылӧн.
Лидочка эз виччысь татшӧм скӧр горӧдӧмтӧ. Збыль ӧд Анна Степановна некор гӧлӧссӧ эз лэптыв, висьысьяс дорад ӧд абу вӧвъяс дорын, мый горзынысӧ. А вот эз вермы кутчысьнысӧ ӧні, скӧрмис.
Гораа вирснитіс нырнас нылыд и дзик пыр ланьтіс. Пуктіс кисӧ юр улас, кунис синсӧ.
— Ог кут сэсся, верманныд мунны, — куньса синнас нин шуис ныв да гораа сыркмуні.
Анна Степановна недыр сулалыштіс сы бокын, видзӧдіс, кыдзи дзӧрисны сылӧн мырдӧн куньӧмсьыс син лысъясыс да мисьтӧминика пласьтвидзис гипсӧн дорӧм киыс, кодӧс вӧлі пуктӧма эшкын вылас. Сэсся, некодлы кыв шутӧг, петіс палатасьыс. Гашкӧ, яндзим лои аслас горӧдӧмысь да сы вӧсна, а, гашкӧ, неокота нин вӧлі весиг кывсӧ шуны. Мудзис зэв ёна. Сьӧкыд дежурство сылы тарыт веськаліс. Кык доймӧм мортӧс отделениеӧ сразу вайисны, кыкнанныс сьӧкыдӧсь. Ӧтиыс эськӧ регыд лӧнис, а мӧднас ковмис вийсьыштны. Машина улӧ веськавлӧма, кок лапаыс ставнас варалӧм, ачыс садьтӧм код, матькӧ да пинясьӧ лёкгоршӧн, дзикӧдз грекӧвӧйтчис.
Муртса сійӧс лӧньӧдны удайтчис, со, Лидочка дорӧ чукӧстісны. Эз жӧ тай и вермы асьсӧ кутны, горӧдіс Лидочка вылӧ. Йӧз серам, эз на тадзтӧ сылӧн некор вӧвлы.
«Гашкӧ, и вӧталӧ менӧ лёкногӧн да?» — думайтіс Анна Степановна бӧрынджык, дежуритан пызан дорын лӧня пукалігӧн. Сылысь мыйлакӧ друг пондіс йирны сьӧлӧмсӧ. Лидочка пондіс кажитчыны ичӧтик кага кодьӧн, кодӧс шлёпӧдӧмаӧсь мыж вӧчтӧг. И сійӧ шлёпӧдысьыс — ачыс Анна Степановна, медсестра. Кыдзи нӧ лысьтіс нывкӧд сідз сёрнитны? Гашкӧ, мортыслы окота вӧлі омлявны кӧин моз, а сійӧ «Ланьт!» горӧдіс.
Вой коляссӧ ставнас, эз и дугдыв, пыр думайтіс ныв йылысь, эз вермы не думайтны, ӧд сылӧн Лидочка кодь арлыда жӧ пи эм. Кутшӧм сійӧ йӧз дорас? Мый сы йылысь йӧзыс думайтӧны? Унаысь тай кывлан: ӧнія том йӧзыд пӧ некытчӧ туйтӧмӧсь. Том йӧзыс ӧд налӧн челядьыс и эм: Мишаыс Анна Степановналӧн, Лидочка, со...
Анна Степановна ӧтнас писӧ быдтіс, мунліс верӧс дорсьыс, кор Мишукыслы кык ар на вӧлі. Сьӧкыд детинкатӧ батьтӧгыд быдтыны. Пыр поліс Анна Степановна: лоас кӧ батьыс сяма жӧ, уна ковмас мамыдлы стыд да яндзим примитны. А слава богу, ӧнӧдзыс пыр на лючки. Ӧтчыд школасьыс локыліс лӧз син доръяса да косясьӧм дӧрӧма. Тышкасьӧмаӧсь суседскӧй зонкакӧд, Калиновский Олегкӧд. Школаас нарошнӧ ветліс сэк Анна Степановна юасьны, да висьталісны, Олегыс пӧ учительницасӧ нерӧма дай лёк кывъясӧн нимтӧма. Сыысь и Мишаыс сійӧс лӧсыштӧма ныр-вомас. А Олегыд багатыр кодь ён, аслыс жӧ и Мишаыдлы бӧрас сюрӧма. Учительницаыс тай шуис: «На костын коркӧ быть должен вӧлі лоны татшӧм тышыс, дружитны да ӧти парта сайын пукавны всё равно эз дыр вермыны эськӧ. Вывті найӧ разнӧй йӧз».
Локтіс сэк Анна Степановна гортас да пиыслы шуӧ: «Бур, мый учительницатӧ дорйин, сӧмын эз ков киыдлы вӧлясӧ сетны». А пиыс вочавидзис: «Гадъясыскӧд тадзи и колӧ!» — и сэтшӧм скӧра йирыштіс вом доръяссӧ. Мамыдлы быть лои ланьтны.
Сійӧ случай бӧрас Анна Степановналы лои ӧтпыр нимкодь и шог. Радліс сы вӧсна, мый дугдіс пиыс Калиновский Олегкӧд дружитны — налӧн семьяыс некор эз кажитчыв Анна Степановналы, а шогсис — кокни киа кӧсйӧ лоны пиыс.
Сы бӧрын уна кад нин коли, эз на кывлы Анна Степановна пи йывсьыс нинӧм лёксӧ. Таво арнас локтіс армияысь да пыр жӧ шоперавны босьтчис. Понда пӧ уджавны и заочнӧ велӧдчыны институтын. Код тӧдас, артмас оз мыйкӧ институтнас: рытъяснас эськӧ пырджык книгаясӧн ноксьӧ, оз гуляйтӧмъяс думайт.
Быттьӧкӧ ӧнӧдзыс лючки на вӧлі, оз позь шуны лёк том мортӧн.
И Лидочка, со, абу жӧ шыбитана нылыс. Детдомын быдмылӧма, мамыдлысь мелілунтӧ эз аддзыв, а сэтшӧм бур сьӧлӧма да йӧз дорӧ сибалысь. Грек татшӧм нывтӧ ӧбижайтныд. Оз эськӧ сет Лидочка асьсӧ ӧбижайтныд некодлы да. Анна Степановна виччысис асывсӧ да думайтіс: «Кыдзи Лидочка видзӧдлас ме вылӧ, кутшӧм синмӧн? Регыд на и шуас: тэ пӧ, сестра, он лечит, а калечитан. А шуас кӧ, сідз сылы и колӧ. Кызь вит во уджаліс Степановна медсестранад да забеднӧ жӧ эськӧ лоӧ, тадз кӧ шуас, а мый вӧчан, ачыс мыжаыс.
А асылыс, со, нин. Дзуртыштавны пондісны палатаясын, кызӧктыштавны. Кад лекарство разӧдны да градусник пуктавны. Быд асыв Лидочка палатасянь заводитліс Анна Степановна, а талун асыв коридор мӧдар помсяньыс заводитіс ветлыны. Поліс думнас Лидочка синкӧд паныдасьны.
Нюжӧд, кӧть эн кадсӧ, а воис ӧчередь и сійӧ палатаӧ пырны. Восьтіс ӧдзӧссӧ. Некод нин оз куйлы, ставныс пукалӧны койкаяс вылас да лӧньӧмӧн видзӧдӧны Лидочка вылӧ. Сійӧ, кӧмтӧм кока, халаттӧм, пукалӧ ӧшинь водзын да гораа лыддьӧ письмӧ. Письмӧ, дерт, со, и конвертыс пидзӧс вылас да. Джодж шӧрас, ветьӧкӧн киас, сулалӧ да тшӧтш кывзӧ письмӧтӧ тётя Катя, налӧн санитарка.
«Кутшӧм нӧ письмӧ лыддьӧны?» — думыштіс порог воськовтіг, да эз удит воськов-мӧд вӧчны, паныд уськӧдчис Лидочка:
— Командировкаын! — горӧдіс сійӧ да чуп окыштіс Анна Степановнаӧс бандзибас. — Со, письмӧ... Прилузскӧй районын пӧ, кыскасям. Туй усьтӧдзыс абу кӧсйӧма локны. Тётя Катя вайис...
— Ме, ме... — дзик пыр жӧ шыасис джодж шӧрын сулалысь санитарка. — Пӧрысь йӧйӧс нӧшавны менӧ колӧ, вунӧма, лун кык водзті нин ӧд увдорас сетлісны, катӧд пӧ травматологическӧяд. Сюйи халат зептӧ и... мый кӧть мекӧд кер...
Тётя Катя лапкучкысис да вӧлись, тыдалӧ, кватитчис, мый пырис палатасӧ ветьӧкавны да ылаліс тайӧ письмӧнад. Копыртчис, ӧдйӧ пондіс шаркйыны джоджсӧ.
Анна Степановналы сэтшӧм рад лои — и ас вӧснаыс, мый Лидочка эз казьтышт тӧрытъятӧ, и ёнджыкасӧ Лидочка вӧсна: бӧр ӧні ловзяс, морт кодь лоӧ, горӧдіс: — Ме тай шуи тӧрыт!..
— Тавой войбыд зэрис, туйыд сэсся оз нин туй кыскасьнытӧ, воас талун-аски, — нӧшта эскӧдыштіс шуда нылӧс Анна Степановна.
И збыль, туналӧма. Эз удит и час прӧйдитны, котӧрӧн петіс палатасьыс Лидочка, уськӧдчис Анна Степановна дорӧ:
— Воӧма, воӧма! Ӧшинь улас нин тан! Лэдзлӧй, Анна Степановна, мед Валя пыралас татчӧ, либӧ ме лэччыла приёмнӧй покойӧ!
— Мый нӧ сэтшӧм водз? Оз ӧмӧй вермы виччысьыштнысӧ? — шуӧ Анна Степановна сідз, пӧрадок ради, да дзик пыр жӧ содтӧ: — Ладнӧ, лэччыв, сӧмын эн дыр...
— Ой, пасибӧ, пасибӧ! — Лидочка водзӧ эз и кывзы сестралысь наказсӧ, уськӧдчис коридор кузя улыс судтаӧ нуӧдысь содлань.
«Со ӧд, радейтчӧмыд, шондібан...» — Анна Степановна довкнитыштіс сӧмын юрнас.
Регыд сійӧ сдайтіс дежурствосӧ, пасьтасис, мӧдӧдчис гортас. Приёмнӧй дорті прӧйдитігӧн аддзис ныла-зонмаӧс. Валентин сулаліс нинӧм шыавтӧг и нюмъяліс Лидочкалы, мӧдыс вӧрӧдіс чуньнас сылысь халат кизьсӧ да тшӧтш нюмвидзис. Ассьыс сестрасӧ казялӧм бӧрын Лидочка йӧткыштіс дінсьыс зонсӧ: — Мун сэсся, бӧрти ещӧ волан.
Анна Степановналӧн нюмыс петіс том пара вылӧ.
— Аддзысинныд? — шуис сійӧ да мӧдӧдчис нин ӧдзӧслань, друг Лидочка чукӧстіс сійӧс да чургӧдіс ки тырыс дзоридз: — Со, Валя вайӧма! Мичаӧсь ӧд? Дзик быттьӧ ичӧтик шонді чукӧр!
Ныв и ачыс ставнас вашвидзӧ шудысла, шонді кодь. Сійӧ юкис кабырсьыс дзоридзьяссӧ шӧри да ӧти джынсӧ мыччис Анна Степановналы:
— Тайӧ тіянлы...
Быттьӧ асьсӧ тулыссӧ, быттьӧ югыд шондісӧ козьналісны нывбабалы, петіс больничаысь морӧс тыр шудӧн, нюмвидзан вомӧн и горт дорӧдзыс сідзи локтіс, керка кильчӧ помӧдзыс.
Мый эськӧ не воны водзджык либӧ сёрджык здук-мӧдӧн. Муртса кутчысис ӧдзӧс вугъяс, паныдӧн сылы петӧны суседъясыс — Калиновский гозъя. Водзвылас гӧтырыс, би кыв быттьӧ мыччысис аслас руч ку шапканас, бӧрсьыс катовтіс верӧсыс.
Шуласны тай, вир пӧ оз лӧсяв. Гашкӧ, и эм сэтшӧмторйыс. Быд пӧрйӧ тай, кор паныдасьлісны Анна Степановналы, нывбаба падмыліс, эз тӧд, чолӧмасьны али не. Ӧти гӧлӧс быттьӧкӧ кайтӧ: «Кыдзи нӧ он? Суседъяс ӧд, колӧ мыйкӧ шуны». А мӧд гӧлӧс паныдалӧ: «Колӧ кӧ, шу, но всё равно он сьӧлӧмсяньыд. Тэ ӧмӧй кык бана шаньга?» Мыйӧнкӧ эз кажитчыны тайӧ гозъяыс и — став.
А тайӧ асылӧ кыпыд ловнад гораа «Бур асыв!» шуис да ещӧ и нюмдыштӧмӧн на. Верӧсыс эськӧ шуыштіс воча мыйкӧ, а гӧтырыс прӧйдитіс кыв шутӧг. Воськов вит-ӧ-квайт вӧчӧм бӧрын сійӧ сувтовкерис, верӧссӧ виччысигмоз, да шыасис верӧсыс дорӧ, нарошнӧ гораа, медым Анна Степановна кылас:
— Кывлін, муса пиыс эталӧн мый керӧма?
— Мыйкӧ тай Олег висьталӧ вӧлі-а, — нурбыльтыштіс мӧдыс.
— Сроктор сетасны миленькӧйлы...
Тадзи сёрнитігтыр найӧ мунісны-саялісны керка сайӧ, а Анна Степановна век сулаліс ӧдзӧс вугйӧ кутчысьӧмӧн да видзӧдіс мунысьяс бӧрся.
— Мый найӧ сёрнитісны? Мый сёрнитісны?! — первой думыс нывбабалӧн вӧлі вӧтчыны на бӧрся да юавны, мый сылӧн пиыс вӧчӧма. Но мыйлакӧ друг лётмунісны киыс и кокыс, быттьӧ друг нетшыштісны гырк пытшсьыс ты-муссӧ, и эз вермы вӧрзьыны места вывсьыс. Да и вермис кӧть, эз эськӧ на бӧрся вӧтчы. Оз жӧ налысь кут юасьны аслас пи йылысь. Налысь, кодъяс оз тӧдны, кӧні унджык войсӧ коллялӧ-гуляйтӧ асланыс пиныс.
«Сӧранныд, эз вермы менам пиӧй нинӧм сэтшӧмторсӧ вӧчны!» — думыштіс Анна Степановна. Лӧглун пыр жӧ сетіс вын, и сійӧ вӧрзис места вывсьыс. Слабмӧм кокъяснас асланыс коймӧд судтаӧдз кайигӧн сёысь юаліс ачыс ассьыс: «Мый пиыс вермис вӧчны? Гашкӧ, тӧрыт Олегыскӧд ветлісны гуляйтны да тышкасисны кодкӧдкӧ, гашкӧ, кодӧскӧ ӧбӧдитіс?
Анна Степановна надейтчис, мый пырас гортас да ставыс лоӧ гӧгӧрвоана. Восьтіс томансӧ, пырис.
Коридорчикын пыр и синмас шыбитчис: уджалан паськӧмыс пиыслӧн оз ӧшав. «Сідзкӧ, удж вылас», — бурмыштіс мамлӧн сьӧлӧмыс. Но кухняӧ пырӧм бӧрын повзис: пиыс абу гортас узьӧма. Быд асыв локтас Анна Степановна гортас да юӧ пӧсь чай, оз весиг шонты. А талун кӧдзыд чайникыс. Ыркмуніс нывбабалӧн морӧс пытшкыс: гашкӧ, пиыскӧд мыйкӧ лёктор лои? Сійӧ котӧрӧн петіс суседъяс ордӧ удж вылас пиыслы звӧнитны. Да коді нӧ ӧні, ӧкмыс час нин да, гортас олас? Иганаӧсь. Калиновскийяслӧн тай кальк восьса ӧдзӧсыс. Олегыс, кылӧ, бриньӧдчӧ гитаранас. «Пыра, юала сылысь», — решитчис нывбаба да торкӧдчыштіс ӧдзӧсас.
— Мам-бать удж вылӧ нин мунісны, — дӧзмӧмӧн шыасис Олег ӧдзӧссӧ восьтігмоз.
— Ме, пиук, тэ дорӧ, — шуис Анна Степановна. — Ме юавны кӧсйи... Мишаыс менам...
— А-а, — пыр жӧ варовмис зон, дугдіс гитаранас бриньгыны. — Милицияысь тӧрыт аддзылі... Мортӧс талялӧма. Ме, чӧртыд, шедлі жӧ...
«Мортӧс? Талялӧма... Кыдзи нӧ мам морт та йылысь эг думыштлы, шопер жӧ сійӧ...»
Нывбаба син водзын вель дыр дӧввидзис Олеглӧн нюмдӧм чужӧмыс, сэсся керкаыс ставнас пондіс бергавны. Помнитӧ тай, петіс жӧ Калиновскийясысь. А сэсся кватитчис — котӧртӧ.
«Кытчӧ нӧ ме? — тӧд вылас кӧсйӧ уськӧдны нывбаба. — Дерт жӧ, писӧ, писӧ спаситны!» Ӧд тӧрыт травматологическӧяс вайисны машинаӧн талялӧм мортсӧ, эсійӧ код мужиксӧ. Сійӧс пиыс талялӧма тшук. Сійӧс! Лун и вой Анна Степановна оз вешйыв сы дорысь, дӧзьӧритас, бурдӧдас и сійӧн спаситас писӧ тюрмаысь.
«А, гашкӧ, тайӧ абу сійӧ? Гашкӧ, сійӧ — кулӧма, моргын? Абу, абу! Оз вермы лоны! Оз! Муна больничаӧ и ставсӧ тӧдмала, а ӧні ӧдйӧджык сэтчӧ!»
Больничаын Анна Степановнаӧс вежысь медсестраыс, сылӧн пӧдругаыс, шензьыштіс:
— Тэ нӧ мый, мыйкӧ вунӧдін?
— Миша талялӧма мортӧс, — шуис Анна Степановна и сьӧкыда лэччысис улӧс вылас.
Пӧдругаыс шлопкерис кинас: — Мый нӧ тайӧ ӧтторъя мортӧс талялӧны! Со, и Лидочкалӧн кавалерыс тшӧтш! Миянлысь эсійӧ тавойсятӧ пӧ сійӧ. Тэрмаси пӧ ёна, пемыдас и талявсьӧма. Гӧгӧрвои пӧ эськӧ, мыйкӧ кӧльӧса улӧ ловъя веськаліс, да повзи и шырзьыны-пышйыны мӧді. А кор пӧ кватитчи да бӧр бергӧдчи талялӧм дорас, сійӧ сэн эз нин вӧв. Муні пӧ милицияӧ, а сэн шуисны, воліс нин пӧ ӧти том морт, висьталіс тэ йылысь. Трус пӧ кутшӧмкӧ талялӧма дай эновтӧма мортсӧ. Больничаӧ пӧ ковмис нуны. Ӧні тані Валентиныс, врач дорын буретш... Лидочкаыс зэв ёна бӧрдӧ...
Анна Степановна, дерт, пӧдругаыслысь висьталӧмсӧ бура кывзыны эз вермы, сылӧн юрас сатшис сӧмын ӧти мӧвп: «Тайӧс кӧ — Валентин, сідзкӧ, пиыслӧн — моргын». Мам вежӧрын вӧлі сӧмын пиыс, кутшӧм ыджыд шог суис Лидочкаӧс, сійӧ весиг эз на и бура вежӧрт.
— А кӧні нӧ Мишаыд тэнад? — Анна Степановнаӧс вайӧдіс ас вежӧрас пӧдругаыслӧн юалӧмыс.
— Миша? Ог тӧд. Мем суседъяс висьталісны, мортӧс пӧ талялӧма, а сэсся нинӧм ог тӧд.
— Ак тэ, — пӧдругаыс бара шлопкерис кинас да босьтіс телефон трубка. — Энлы, милицияӧ звӧнитлам.
Эз на удит сійӧ и номерсӧ ӧктыны, кыдзи горӧдіс: — Да, со, Мишаыд да!
Збыль, кокни тэрыб восьласӧн восьлаліс Миша коридор кузя налань да гажаа нюмвидзис, еджыд халат дӧввидзис сы вылын, бӧждоръясыс сідзи и лэбалісны.
— Миша! — мамыс кӧсйис уськӧдчыны сылы паныд да эз вермы ли мый ли, чеччыліс да бӧр пуксис.
— Тэ мый, мамӧ, повзин? Локті ме старикӧс видлыны. Тӧрыт вайи татчӧ, машина улӧ веськавлӧма... Ок и матькис! Ловъя кӧть сійӧ? — Мишалӧн век жервидзис вомыс.
— Ой-я дай ой-я! — горзіс медсестра да, гашкӧ, сёысь лапкучкысис, а Анна Степановна видзӧдіс пи вылас, видзӧдіс да сӧмын юаліс: — Эн инӧ тэ мортсӧ таляв?
— Ме, кутшӧм мортӧс? Мый тэ, мамӧ, сӧран? — Миша зумышмис.
— Олег, Олег висьталіс! Милицияысь пӧ аддзылі, мортӧс талялӧма.. Господи, сьӧлӧм чуть эз пот...
— Кодлысь тэ кывзан?.. Вӧлі ме тӧрыт милицияас, явитны талялӧм морт йывсьыс пыралі, но... Ок, и сюрлас сійӧ меным! Но, кӧні, мый менам старикыс? Позьӧ сійӧс видлыны?
— Оз, ӧні оз.
— Ме гортӧ — ог! — Анна Степановна чеччис улӧс вылысь. — Ме кольчча Миша старик дорӧ, эсійӧ мустӧма матькысь дорас, кута детелитны сійӧс, мед ӧдйӧджык бурдас... Ой-ой-ой, Валентиныс!.. Сы ыджда Лидочкалы шог... Кӧні нӧ кӧть сійӧ?
— Сійӧ, пӧдикӧ, тэнад матькысь дорын жӧ нин, — вочавидзис медсестра да юӧртіс: — Лидочка шуӧ, кытчӧдз пӧ оз бурд дядьыслӧн кокыс, мед пӧ Валентинлӧн дукыс тані эз вӧв. А бурдас, да пӧ видзӧдла, прӧститны ли абу сійӧс. Тшук ӧні сійӧ коймӧд палатаад, дядьыс дорын. Сійӧс вӧтлыны сэсь он вермы, а тэ, Степановна, мун, мун гортад, шойччы. Лок, Миша, ӧдйӧджык, пока обходыс абу, пыр видзӧдлы ассьыд стариктӧ дай мунӧ. Аслад сменаӧ, Степановна, локтан дай ёна ухаживайт, а ӧні — менам сменаыс. Мун, мун...
Прав, дерт, пӧдругаыс. Анна Степановна гӧгӧрвоӧ сійӧс, но сылӧн син водзас сувтӧ ӧнтая больнича ӧдзӧсдорса серпасыс: небыдика, а гашкӧ, и жугыля нюмвидзысь зонмыс, радысла ставнас дзирдалысь Лидочка и кабыр тыр виж дзоридзыс.
И сійӧ веськӧдчӧ шкаплань, кӧні ӧшалӧ сылӧн медицинскӧй халатыс.
