И СӦДЗ ВА ГУДЫРТЧЫЛӦ
Зинаида пӧ гуляйтӧ. Арся ру моз пондіс разавны сикт пасьта лёк сёрни. Йӧз вомтӧ он тупйы. Ляпнитнысӧ колӧ, а сэсся сійӧ, лёк славаыд, лыбас нин. Пожъяланторйыс кӧ нӧшта том лӧсьыдик нывбаба да дорвидзӧгыс кӧ сылӧн абу.
— Тшук збыль, бабаяс, тшук збыль! И кодкӧд ті чайтанныд? Спиридоновичкӧд!
— Чӧлӧ, нинӧм абусӧ суклявны. Кутас квайтымынӧ воысь мужик том бабакӧд ноксьыны!
— Мый озыс, примитӧны кӧ. Ньӧти мужичӧй на абу ӧткажитчылӧма томсьыд.
— Абу тай йӧй Зинаидаыс, директорӧс крукыштӧма, абу кутшӧмкӧ вина гагйӧс.
— Вина гагйыдлысь уна он босьт. Директорыд жӧ почёт пӧв вылад ляскас да орден-медальтӧ сетас-а. Ха-ха-ха!
— Но эськӧ ті песанныд жӧ кывнытӧ. Директорыдкӧд узьлытӧг Зинаидаыд нажӧвитіс орденсӧ да медальяссӧ. Град йӧрысь да теплицаысь оз и петав. А быттьӧ, збыль кӧ грек налӧн, мед, ме ог дивит. Том баба куим во нин мужиктӧг олӧ, быдӧн ловъя лов.
— Тэнсьыд тай абу и юалӧмаӧсь, ойя да... Акушерка дорӧ нин пӧ ветлӧма Зинаидаыс.
— И быдторсӧ ті кывланныд да аддзыланныд.
— И ачыд аддзан, нырӧдзыс рушку лыбас да.
— Перъяс. Акушеркаяс дінті кӧ ветлӧ...
— А абу кӧ выгӧднӧ перйынысӧ?
— Тьфу жӧ нин тайӧ олӧм пуксис! Кысь, мися, Спиридоновичыс ӧтторъя карӧ да районӧ, да сӧвещанньӧ вылӧ лэччӧ! Зинаидаыс сэні курсъяс вылад вӧлі да сійӧн тюръялӧ пӧрысь лешак! Тьфу!..
* * *
Зинаидаӧн сиктын ставӧн шуисны совхозса агрономшаӧс. Кыдзкӧ артмис сідз, мый медводдза лунсяньыс жӧ пондісны шыасьны выль агрономша дінӧ эз Зиночкаӧн, кӧть и акань кодь томиник да мичаник вӧлі, ни эз Зинаида Васильевнаӧн, чин сертиыс кӧть коліс овнас ыдждӧдлыны, а буретш Зинаидаӧн. Тайӧн кӧсйисны быттьӧ тӧдчӧдны агрономшалысь томлунсӧ да ӧттшӧтш пыдди пуктӧмсӧ.
Локтіс Зинаида тайӧ сиктас во дас сайын нин сельхозтехникум помалӧм бӧрын. Быттьӧ школьница кутшӧмкӧ ногӧн веськалӧма совхоз кантораӧ. Лӧз лентаӧн шыркнитӧм юрсиыс сявмунӧма пельпом вылас еджыд кудель моз, платтьӧыс — пидзӧсъясыс тыдалӧны. Котраланінысь и быттьӧ пырис директор дінӧ да юӧртіс: ме пӧ агроном, ыстісны татчӧ уджавны.
Директорыс, Степан Спиридонович, круткодь мужик, уна оз больгы. Синкым увсяньыс видзӧдлас да думыштас, восьтны абу вомсӧ. Но тайӧ нывка вылас эз зумышт чужӧмсӧ, а тешкодя серӧктіс:
— Абу детсад миян тані, аканьӧн ворсысьяс оз ковны. Мун бӧр мамук дорад.
Зинаидалы сэтшӧм ӧбиднӧ лои, кӧть бӧрддзы, но сэтшӧм нин сылӧн вӧлі ӧбичаыс, зілис скӧрмӧдны асьсӧ, медым не увтыртны.
— Мамукыс менам абу, кӧсъянныд кӧ тӧдны, а диплом эм! И
«О, кутшӧм повтӧм пышкай!» — директор чӧвтліс видзӧдлассӧ нывка вылӧ, сэсся босьтіс дипломсӧ да дыр видзӧдіс-бергӧдліс, медбӧрын чуньнас мӧдіс тотшкӧдны пызан пӧвъяс.
— Но, сё морӧ, ставыс «пять»! Збыль ӧмӧй нӧ тӧдан, мый быдмӧгъясыс куйӧд радейтӧны?
— Тӧда! И унатор на тӧда! И эн лысьт тэ... Тэд пенсия вылӧ колӧ! — крапкис, эз и дыр думайт нывкаыд. Ныр бордъясыс чашкавлісны.
Камгыны эськӧ ыджыд кулакнас пызан пӧвъяс, да кага вылас мый скӧралан. Шпыньмуніс Степан Спиридонович, горӧдіс:
— Со, кыдз тэ менӧ, едритвой! Давай, давай, критикуйт! Меным и збыль, гашкӧ, пенсия вылӧ кад! Вот сӧмын тэ сямман-ӧ менӧ вежнысӧ, нылукӧ?
— Ковмас кӧ, вежа, па-паша!
«Папашасӧ» шуӧмыс быттьӧ кывберитӧмкодь артмис, да тшӧкмуніс нывка, а сэсся пыльк серӧктіс, ас тӧдлытӧг артмис ли, челядь сямыс на велдіс ли.
Директор тшӧтш тайкӧ оз тшӧкмун. Менӧ пӧ, сюра-тошка мужикӧс, нималана совхозӧн веськӧдлысьӧс, лысьтӧ тадзи! Но мӧд мӧвп сэк жӧ югнитлӧ вежӧрас: «Колӧкӧ, и збыль таысь мыйкӧ артмас? Абу тай небыд нямӧд?» — синъяссӧ чискыльтӧмӧн видзӧдліс нывка вылӧ, кайтыштіс:
— Но вот... Менӧ вежысь аддзысис. Кольччы, уджав. Но помнит: стрӧга кута юасьны. Эн виччысь некутшӧм личӧдӧм, томлун вылад ог видзӧд...
Директорлӧн секретаршаыс, олӧма нин лабутнӧй нывбаба, шензьыштіс, кор нюмъялысь вома нывка тюркнитіс директор кабинетысь да мӧдіс
— Аттӧ! Видзӧдтӧ, примитӧма!
Выль агрономша ӧдйӧ пондіс нимавны зільлуннас да тӧдӧмлуннас. Терень пӧль гозъялы, кытчӧ овмӧдчис выль агрономша, унаӧн нин шулісны:
— Патеранткаыд тіян абу шыбитана нывка. Шуанныд тай, ай-мамтӧм пӧ, гижӧдӧй сы вылӧ овмӧстӧ дай кувтӧдзныд видзас.
— Ойя дай, ойя! Верӧс сайӧ ӧд босьтасны! Ми эськӧ дедӧкӧд та йылысь мӧвпыштлім нин да, — лапкучкысьліс Тереника пӧч да юксьыліс аслас тӧждлунӧн. — Юрко Геня суседӧй дугдывтӧг кильчӧ пос шыльӧдӧ. Ме нин пиняся, мися, крӧватьтӧ вай ӧшинь улӧ. А висьтала ме тэныд, абу кыв нуысь-вайысь тэ да: оз радейт Зинукыс Генясӧ. Нускун кодь, абу варов, а гусьӧн пурыштӧ. Мамыс ӧд сылӧн сэтшӧм жӧ, тӧда: суседъяс. Кӧть сизим кусыньӧн кусыньтчӧмӧн угӧдит... А мальӧдасны томиниктӧ, зэв мудерӧсь да.
Абу и весьшӧрӧ туналӧма пӧчыд, корасьысьяс быттьӧ сэні и вӧлӧмаӧсь. Юрко гӧтырыс Катьӧ чойыскӧд да ачыс Геняыс.
— Чӧс туй миянӧс татчӧ вайӧдіс. Тані пӧ тай пӧтка олӧ-вылӧ, — копрасьны да лывкйӧдлыны пондісны кык чой. Катьӧыс нин сійӧ дзольган гӧлӧснас чегӧм лытӧ йитас, каттьӧ и каттьӧ ӧти мелі кыв дорӧ мӧдӧс. Жӧник миян, Генюш, со, ачыс тан, ладнӧй и складнӧй, велӧдчӧм морт, специалист,
«
—
Жӧник Генялӧн Катьӧ вежаньыс нэмсӧ сиктса больничаын сиделкааліс да чышкис-мыськис, кутшӧм кӧть и служащӧй, асьсӧ зэв образованнӧйӧн лыддис, и друг, со, тадзи сійӧс серамвыв лэптіс этайӧ чикулайкаыс. «Сылӧн приданнӧйӧн эськӧ колӧ юрбитны татшӧм жӧник вылас. Быттьӧ вожа пуыс сэсся оз сюр вӧрсьыс... Мӧдӧс аддзам!»
Дӧзмыны нин дась вӧлі вежаньыс, да Геня нырсӧ и вомсӧ чукрӧдлыны мӧдіс, меліджыка пӧ, вежаньӧ, муса мем тайӧ нылыс. А мамыд мам и эм. Гӧгӧрвоис Юрко гӧтыр пиыслысь чукрасьӧмсӧ, ачыс кыв босьтіс, гӧлӧсыс выя бордйӧн мавтӧ. Ошкис и Терень гозъяӧс, и налысь патеранткасӧ да эскӧдіс, мый лӧсьӧдчасны да бур суседъясӧн лоасны и бур рӧдняясӧн. Сӧмын Зинаида эз жӧ тэрмась «муна» кывтӧ шуны. Думнас мӧд зонсянь виччысис татшӧм коралӧмсӧ.
Неважӧн кык выль зон, механизаторъяс, гаражӧ локтісны. Ӧтиыс, Карманов Анатолий, сьӧлӧм вылас воис Зинаидалы, аддзас да синсӧ сы вылысь вештыны оз вермы. Лабутнӧй сёрниа да лӧсьыд статя. Анатолийыс кӧ эськӧ коралас...
Мунісны корасьысьяс ыджыд ӧбидаӧн, каитчыны на пӧ кутас йӧй нылыс миянӧс брезгуйтӧмысь да сёр лоӧ.
Сиктыд сикт и эм, кӧсъян на вашкӧмӧн шуны, а ставыс нин кылӧмаӧсь, тӧдӧ быдӧн. Нывъяс Геняӧс дэльӧдан частушка нин лӧсьӧдӧмаӧсь, войпукигӧн сьывлісны:
Тірибатка, тірибатка, вайлӧй Юрко Генясӧ,
Кодӧс сійӧ кыйӧдӧ дай Тереньыслысь Зинасӧ.
А медым стӧчмӧдны коньӧр Генялысь рыныш сотчӧмсӧ, сьывлісны и частушкалысь мӧд юкӧнсӧ:
Тірибатка, тірибатка, вайлӧй Терень Зинасӧ,
Кодӧс сійӧ радейтӧ дай гаражса молодечсӧ,
Гаражса молодечсӧ дай Анатоль Сергеичсӧ.
Мый нӧ томдырйиыд, радейтӧны кӧ, сэні и свадьбаыд. Во гӧгӧр радейтчисны-милуйтчисны дай сэсся свадьба ворсісны Зинаида да Анатолий. Луна-воя пируйтісны сиктса столӧвӧйын, «горько!» горзісны да любов-сӧвет томъяслы сиисны. Ачыс совхозса директор йӧктіс томъяс свадьба вылын.
Терень ордӧ и овмӧдчисны том гозъя. Кор Зинаида рушкуасис да нывка вайис, Терень пӧль индіс налы гожъян керкасӧ ставнас. Асьным пӧ ми тӧвъянас олам. Но кык семьялӧн ёна торъялӧмыс эз и ло, ӧтгудырджык артмис. Том гозъя луннас удж вылынӧсь, кагаыс Терень гозъя ордын, рытнас чай пуктасны — бара жӧ ӧтлаын юӧны-сёйӧны. Мед пӧ ті миянлы мам-бать пыдди и лоанныд — унаысь нин шуліс Анатолийыс пӧрысь гозъялы.
— А зэв прамӧй верӧс Зинуклы сюрис, — ошйысьліс Тереника баб аслас кодь жӧ пӧчьяслы. — Вежавидзысь да киподтуя зонмыс. Пыр мӧлӧтӧн тотшӧдчӧ, кор гортын. Зіль вӧвлы, шуласны, и плеть оз ков.
Регыд и суседыслӧн пиыс, Геня, гӧтрасис. Зэв ушлӧй бабаӧс вайис, сельпоысь вузасьысь Галяӧс. Мам-батьыс Галиналӧн хохолъяс, кутшӧмкӧ ыстылӧм войтыр али вербуйтӧмаяс, неылын лесопунктын олісны. Зэв озырӧсь. Пырысь-пыр и том гозъялы «Жигули» козьналісны. Геняӧс ёна сюсьӧн он шу, зато Галинаыс би кыв кодь, ставнас бергӧдліс. Торйӧдіс верӧссӧ мам-бать дорсьыс, аслыныс керка зымгисны Юрко да Терень керкаяс костӧ, вагонкаӧн эжисны, мичмӧдісны да баситісны. Орччӧн гараж да пывсян тёпкисны. Гожӧм-мӧд жынгис-кыліс гӧлӧсыс хохлячкалӧн, Геня тьӧщалӧн:
—
Том кӧзяйкалӧн, Галиналӧн, долыдысла синъясыс кодзлалӧны, вомыс этшвидзӧ, верӧссӧ ӧтторъя чуткыштӧ, ворсӧдчыны окота, госыс гилялӧ. Зинаида гозъя дорӧ тшӧкыда шыасьліс:
—
Зинаидалӧн эз ёна сьӧлӧмыс лэпты ёртасьны Геня гозъякӧд, да ӧд выльысьыд овмӧдчигӧн быдторйыд колӧ, кага крӧватьыд и джодждӧраыд. Корсюрӧ шыасьліс вузасьысь дорад. Кольлы пӧ рытӧдзыс, меным дзик некор луннас лавкатіыс ветлыны. Сэсся сідзи и кыдзкӧ матысмисны. А кыдзи нӧ сиктад суседыдкӧд лӧсявтӧг? Пурсьыныс быттьӧкӧ нинӧмысь жӧ вӧлі дай. Толикыс совхозас кор трактор вылын, кор машина вылын. Корасны кӧ, налы пестӧ вайӧ, стрӧитчан материалъястӧ. Галина ковёр ли таз кольӧдӧ Зинаидалы рытӧдзыс. Раз-мӧдысь нин Зинаидаӧс каганас жургылісны-нулісны «Жигулиӧн» райцентрӧ, больничаӧ. Мый нӧ нӧшта колӧ? Дӧвӧленӧсь суседъяс ӧта-мӧднас. Дӧвӧлен Зинаида олӧмнас. Верӧсыс авъя, нажӧтка вайӧ, нывкаыс визув, быдмӧ, пӧль-пӧчыс рӧдимӧй кодьӧсь, уджыс град выв пуктасъяс дорын сьӧлӧмсӧ бурмӧдӧ. Теплицаяс корис лӧсьӧдны, ӧгурцы да помидор пӧ пондам вӧдитны. Сиктад выльтор на вӧлі теплицаыд, полісны, но ӧтиӧс лӧсьӧдісны. Бӧрынджык нин радпырысь тепличнӧй кӧзяйствотӧ пондісны паськӧдны, кор Зинаида делӧ вылын петкӧдліс выгӧдасӧ. Ладнӧ быд боксянь вӧлі, да ускӧттьӧыд юасьтӧг да виччысьтӧг и суӧдӧ. Ӧтчыд сёр арнас, лымъякодь нин тай вӧлі, Толикыс лэччыліс карӧ запчасьтъясла, ӧти сайысь и куканьясӧс лэччӧдіс яй вылӧ сдайтны. Локтіс сёр войнас, машинасӧ ӧшинь улас и сувтӧдіс. Аскинас участкӧвӧй Семён Карпович да кос соя Митиперлӧн ыджыд пиыс вольпассьыс Анатолийӧс лэптісны. Мортӧс пӧ талялӧмыд, эталысь батьсӧ, Митиперӧс.
Толик серӧктіс: — Мунӧ сэтысь! Изнытӧ... Эг код вӧв ни эг узь...
— Узин эн, ог тӧд, а тэысь кындзи, ветлысь-мунысь машинаяс сэсся эз вӧвны.
— Да ті серьёзнӧ?
— А тэ кыдз чайтан? Доказательство миян эм.
— Мыйысь? Шуа жӧ, эг код вӧв ни эг узь!
— Пет, кӧлесатӧ видзӧдлы. Гырдыс оз пӧръяв. Ме, брат, нинӧм абусьыс шум ог лэпты. Локтасны, анализ босьтасны. Петкӧдлас, мыжа ли абу...
Суд вылас Анатолий пукаліс пемыд вой кодь зумыш, видзӧдіс муас, поліс гӧтыр синкӧд паныдасьны. Сизим во сетісны. Судьяясыдкӧд он на, майбыр, чужъясь. Закон пӧ сэтшӧм. Бур йӧзыс эськӧ ёна дорйисны да. Митиперыс пӧ эз и косьмыв, ачыс, колӧкӧ, юрсӧ сюйис да. Школаын котельнӧй ломтіс да школасӧ вежон нин абу ломтылӧма-а...
Мый лоны — лоӧма. Бӧрдіс-шогсис Зинаида, да ӧд синванад нинӧм он вӧч. Ӧти спасенньӧ — уджыс. Тулыс, гожӧм, ар, теплицаяс, капуста да морков муяс. И сьӧд войыс. Ӧти радлун — гортас нывкаяс да вонас ӧтчыд Толикыскӧд свидание. Тадзи куим во. Нёльӧд во вылӧ мӧдӧдчис, карӧ тӧлысся курсъяс вылӧ ыстісны. Локтіс карсьыс, а сиктын зык-шум. Сельмагысь завыс, юысь Лара, растрата вӧчӧма. Вузасьысь Галина да Лара кості сьӧд кань котӧртас. Мый вермӧны, пинялӧны ӧта-мӧдсӧ, няйтӧн резӧны.
— Да, Лара улас кудзавтӧдз юис, а ме растрата мынты? Пигушки! — горзіс Галина, чашйис ассьыс юрсисӧ. Лариса бара юыштӧма нин, рака кодь кравскан гӧлӧсӧн жынгис:
— Тэ, пеж тэ, кужан гусясьныд! Ставсӧ гусявлін да менӧ кӧсъян тюрмаӧ пуксьӧдны! Жулик гозъя! Гашкӧ, ог тӧд, мыйысь пукалӧ коньӧр Кармановыс? Ті кужанныд пуксьӧдавнытӧ...
Коді на костын мыжа, коді абу, мед ачыс сӧтанаыс разяс гӧрӧдсӧ, ӧзйӧм пӧжартӧ ватӧг он кусӧд. Но Ларалысь кывъяссӧ унджыкыс эз пыдди пуктыны. А Зинаидалы татшӧм шуасьӧмъясыд морӧспань улас сатшӧмӧн сатшисны. Быть окота лои сёрнитыштны Ларисакӧд. Раз-мӧдысь нин ветліс гортас Лараясӧ, да этша на сёрнитан, пыр кӧ лёзъялӧ код. А сэсся ачыс, виччысьтӧм гӧстя, воис Зинаида дорӧ. Уджтӧмала пӧ, вӧтлісны магазинысь, растрата вожӧдісны, босьт пӧ, криста ради, удж вылӧ ас бригадаад, ог кут юны.
— Ог тӧд, босьтны абу тэнӧ, тӧлк вывсьыс вошӧмыд да, — кӧдзыдакодь и примитіс кортӧм гӧстятӧ Зинаида, но думсьыс вӧлі рад, ӧні пӧ тшук нин сёрнитла Анатолий йывсьыс.
— Он инӧ босьт? — жугыльмис Лара да здук бӧрти зэв скӧрысь горӧдіс: — Мый нӧ, инӧ, ме шыбитӧм шыблас нин? Дзик эштӧм морт?!
— Ог шу. Абу на дзик эштӧм, удж на, со, корсян да. Вот кывйыд... Нинӧм абусӧ лӧсьӧдлан и.
— Ме? Нинӧм абусӧ? Мый нӧ ме лӧсьӧдлі?
— Менам Анатолий йылысь тай. Ачым ӧд кывлі, горзін: коньӧр Карманов пӧ весьшӧрӧ пукалӧ.
— Горзі, но и мый? Тӧда и эм да! Машина кӧлесасӧ мыськавны войнас петалісны и эм да!
— Войнас кыйӧдчин ли мый?
— Да, Господи! Узи ме на ордын, узи! Он ӧмӧй гӧгӧрво? Рытнас Галяыс менӧ корис, лок пӧ пукалыштам. Геня пӧ батьӧяслы пывсян вӧчны лесопунктӧ кайис, оз ло. Ачыд тӧдан, сэтшӧминад ме кокниа лыба. Муні. Пукалыштім, кык доз Галялӧн вӧлі, кыкнансӧ сысъялім. Пызан саяс и менам унмовссьӧма. Садьми, ӧдзӧсас кодкӧ игӧдчӧ. Галя менӧ шулки-пелки кыскис вежӧс саяс, вод пӧ джоджас да эн рыпайтчы. Менӧ вӧрзьӧдісны да шогӧдны кутіс, увкъя сӧмын, а помӧй ведра дорас петны ог лысьт. Геняыс код пырис, сука пӧ, мый сы дора он восьты, менам пӧ че-пе! И матькыны заводитіс. А Галя тупйӧ сылысь вомсӧ да вашкӧдӧ мый-я. Но Геннадийыд нӧшта гора, эсійӧ пышмувыв полокалӧыс ли мый пӧ миянын? Мед весасяс! Эз жӧ тай сэсся вӧтлыны. А менам кынӧмӧй пежсьыс прӧстмис да бара унмовссьӧма.
Выль пӧв садьми кутшӧмкӧ ноксьӧмысь. Орчча жыръяс кыліс то вашкӧдчӧм, то ведраӧн гользьӧм, дай кажитчис: Галя быттьӧ ымзӧ. Сэсся дзуртыштіс ӧдзӧсыс дай петісны, кылӧ, ӧдзӧс мӧдарас.
«Порсьпиыс ли мый нӧ висьмӧма, войнас дзурсъялӧны?» — думышті ме да чеччи, бовзьӧді ыджыд жыръяс, мися, кӧть ветьӧк корсьла да чышкышта восӧс. Ӧшинь саяс дзуртыштіс лымйыс, и ме видзӧдлі занавес костаыс. Вуджӧръяс моз гозъя пырисны гаражас, кианыс ведра да ветьӧкъяс. Сё ей-бог, лӧж ог байт. Джодж мыськан ветьӧксӧ ме корси, корси да сідзи и эг аддзы, найӧ, буракӧ, ставсӧ сьӧрсьыс петкӧдӧмаӧсь. Увдор юбка пӧрччи, сійӧн и сэсся чышки эсійӧс. Мый жалитны юбкасӧ, сідз нин тыпонет кодь ва вӧлі да... Ме, юышта кӧ, мыйла-я бӧждорӧс пыр кӧтӧда. Но ӧні, ен могысь тэд шуа, ог кут сэсся юны, босьт сӧмын дінад. Ме ӧд сӧмын сэні, эсійӧ пежыскӧд уджаліг, юыштавлі...
Зинаида торкис Ларалысь висьтсӧ, сійӧс оз интересуйт став татшӧмторйыд. Инмӧдчыліс Лариса дорӧ, веськӧдіс висьтасьӧмсӧ бӧр колана вожас:
— Но и мый, Лариса? Петісны гаражас. Мало ли мыйла эз петны.
Лара вачкучкысис: — Кутшӧм тэ тӧлктӧм, грамотнӧй ещӧ шусян! Думыштлы ачыд: Кармановыд шуӧ, эг пӧ таляв, а кӧлесаас лымйыс вирӧсь! Галина гозъяыд вед, ой-ой... Вермасны быдтор!
Татчӧ Лара ланьтіс да пондіс малавны да видзӧдны ассьыс кияссӧ. Недыр мысьти лэптіс юрсӧ, шуыштіс: — Ме сэсся нинӧм ог тӧд. И сідз нин зэв уна висьталі. Босьтан кӧ, воа аски удж вылад, а он кӧ, и петляыс эм.
Лариса пырысь-пыр мӧдіс ӧдзӧсланьыс, порог саяс воськовттӧдз сӧмын сувтовкерис, медым кывны Зинаидасянь воча кывсӧ: «босьтасӧ» ли «огсӧ» ли.
Зинаида удитіс пӧперегавны сійӧс. Эн на пӧ тэрмась, Лариса. Кутшӧм пӧ петля гаралан? Босьта, дерт, матайтчӧм мортӧс, абу ме нинӧм гӧгӧрвотӧм. Но тэ мунтӧдзыд вай гиж меным ставсӧ, мый висьталін.
— Ме бара-й ог! Мыйла?
— Мыйла, юалан? А збыль кӧ Толикыс нинӧмысь пукалӧ? Ен грекысь он пов? Сэки суд вылас мыйла чӧв олін?
— Сэки? Ок тэ кутшӧм! Галинаыдлы сюрлы! Шӧри орӧдас!
— А ӧні, ӧні он нин сыкӧд лавкаад уджав.
— Ӧні... Босьтан кӧ удж вылад... Да тэ ӧд менӧ он жӧ вузав?
— Ог вузав, ог, Лариса. Мед тэа-меа костӧ и кольӧ пока. Тэ некодлы эн висьтав, ни ме кыв ни джын. Толиккӧд меным колӧ сӧветуйтчыны. Сы дінӧ ветла свиданньӧ вылӧ да вӧлись йӧзӧдам ли ог ли. Тэ сӧглас мекӧд?
Лариса ӧвтыштіс кинас:
— А, мый лоны, ло! Нэм кӧсйи чӧв овны, да кутшӧм лӧсьыда пычкин! Но, ме муна. Кыдзи договоритчим, либӧсь... Аски удж вылад воигӧн ме тэд и вая гижӧдӧс. Кӧсйыси кӧ, эн пов, ог пӧръяв.
Лариса петіс, а Зинаида выль пӧв, кымынӧдысь нин и босьтіс да пондіс лыддьыны Толиксяньыс воӧм письмӧсӧ.
«Свиданка вылӧ корӧ. Вӧзйысьла вежон кымын кежлӧ. Ларалысь гижӧдсӧ буретш нуа и...»
* * *
Зинаидалы сійӧ вежоныс, гашкӧ, медся шуда кад и лои бӧръя жугыль воясас. Мед решётка сайын, мустӧм тюрмаын аддзысисны гозъя, а кылӧмӧн кылӧ Зинаида ас лов пытшсьыс кутшӧмкӧ гажа сьылӧм дай став. А помкаыс, дерт жӧ, Толикыс, коді ловзьӧма ловнас да кутӧ надея срок джын прӧйдитӧм бӧрын петны гортас. Бура уджалӧмысь пӧ кӧсйӧны лэдзны. Сійӧ ӧтик. А мӧд-кӧ, ёнакодь лои сёрнитӧма и Лара гижӧд кузя. Анатолийыс веськыда и шуис: Лараыс пӧ, буракӧ, и прав, но сійӧ гижӧдӧн пӧ ме ог понды начальство дорті ветлыны да туйзысьны. Регыд пӧ менӧ и сідз лэдзасны.
— Толик! Прӧститан, инӧ?
— Прӧстита ли ог ли, но мед Енмыс судитас найӧс. Ме ог кӧсйы. Лёкыс век нин лёк чужтӧ. Ме норася на вылӧ, найӧ бара мыйкӧ выльтор думыштасны, медым водзӧс босьтны. Ог кӧсйы, Зинук, люкасьысь мӧскӧн лоны. Кӧсъя прӧстӧ уджалысь мортӧн лоны, тэнӧ да нывтор дитюкӧс радейтны. Да нӧшта кӧсъя, пи мед тэ меным вайин...
Пи. Куим луна-воя и гозъя ӧтлаын вӧлісны, муртса ляскысьлісны, а тшук гӧрддзасьӧма Зинаида кынӧмын выль олӧм. Кык вежон бӧрти и ас йывсьыс юӧртіс мамыслы. Пыр и гудыртчас Зинаидалӧн сьӧлӧмыс, сёян дук кӧ кылас. Нывкасӧ новлӧдліг некор эз вӧвлы тадзсӧ, тайӧ, гашкӧ, пи артмис? Толиклы юксьыны полӧ на Зинаида, весиг Тереника бабыслы, мед нин пӧ оз вомдзась да лоӧ сідз, кыдзи Зинаида кӧсйӧ. Тэрмасьӧмнад кӧч моз чепӧсъян да ачыд жӧ и пуӧ люкасян.
А, вӧлӧмкӧ, и чепӧсйыны оз ков. Дасьтӧмаӧсь нин сылы туй вылас ёсь йыла да чорыд увъяса пу.
Зинаида ӧд важӧнкодь нин гӧгӧрволіс бабаяслысь шушӧдчӧмсӧ да чайтіс: дивитӧны сійӧс тюрмасьыс рушку вайӧмысь. А вӧлӧмкӧ... Гуляйтӧм слава лэптӧмаӧсь! Кодлы и юрас кучкӧма татшӧмторсӧ лӧсьӧдны? Ачыс тай Зинаида кывліс да пельясыслы эз эскы-а. Сэтшӧм лӧсявтӧмторсӧ нӧ кывлан да кыдзи эскан? Теплицаас кодкӧ лунӧ буретш ӧгуреч рӧсада разӧдісны. Копырвидзӧмысла ёна шогӧдны пондіс Зинаидаӧс, да петіс ывлаас. Здук-мӧд бӧрти и пырис бӧр, а Лара кортсасьӧм гӧлӧснас, кылӧ, карскӧ:
— Спиридоновичлӧн Лушаыс эськӧ рӧдпом меным лоӧ, да таковскӧй! Мед вежӧгтыштас да сьӧлӧмсӧ дойдалыштас. Йӧзыдлысь шог-печальтӧ оз тӧд. Ме шыасьлі сы дорӧ растрата дырйи да менӧ тайкӧ оз чужъяв... Ме эськӧ Зинаида йывсьыд ог сідз чайт да...
Аддзис Зинаидаӧс, дзик пыр ланьтіс.
— Тэ нӧ мый, Лара, абу-ӧ код талун бара? — шыасис Зинаида.
— Ме код? Пернапас чӧвта — дзик веськыд! Тані, тіян дорын, и винатӧгыс гажа. Шуи тай сӧмын...
— Но, абу кӧ код... Зэв гора гӧлӧсыд да чайті... — кайтыштіс Зинаида, а ачыс думыштіс. — Код йылысь нӧ сёрнитіс Лараыс? Менсьым тай нӧ нимсӧ гарыштіс?
Сӧмын рытнас, кор локтіс гортас да Тереника баб сёрни паніс, вӧлись гӧгӧрвоис: сы йылысь и эм. Со, и бабыс та йылысь жӧ гарыштіс: «Зинукӧй, гулюӧй, висьтала мыйкӧ да он дӧзмы? Тай нӧ сёрнитӧны... быттьӧ пӧ тэнад кынӧмпӧтыд директорсянь. Збыль ли лӧж, висьтав вай, дитяӧ».
— Бабук, да мый тэ? Эн бара-й некодлы эскы. Нӧбася да вед аслам законнӧй мужиксянь. Тӧвнас тай нӧ Толик дорӧ ветлі, сэки шедӧма. Господи, бабӧ, коді лӧсьӧдӧма да Спиридоновичсӧ сэтчӧ мыйла каттьӧма? Спиридоновичыс вед меным бать пыдди туйӧ дай батьӧс моз и пыдди пукта. Кодлы да мыйла татшӧмторсӧ коліс лӧсьӧдлыны? Толиккӧд кӧ торйӧдны кӧсйӧны, ми сідзи нин мыйдыра торъяӧсь. Совхоз начальствокӧд, гашкӧ, лӧгӧдӧны? Но мыйла?
Зинаида эз вермы кутчысьнысӧ да сывйыштіс бабсӧ, бӧрддзис.
— Но, но, дитя, лӧнь вай, эн бӧрд. Сёрнитасны и дугдасны, — такӧдыштіс сійӧс бабыс, луп-лапкерис мышкуас.
Зинаида лимӧстіс:
— Ӧбиднӧ ӧд. Спиридоновичсьыс яндзим и.
— Сыысь тэ эн яндысь, мед яндысясны найӧ, тыртӧм мельничаа бабаяс. Спиридоновичыс — шань морт, гӧгӧрвоас, а вот Толяыдлы мед оз суклявны, сійӧ ӧзйысь зэв, кокниа пузьӧ. Мед оз жӧ сэтшӧмторсӧ нинӧм вӧч.
— Толиксьыд ог пов, тӧдӧ сійӧ менӧ, оз эскы нинӧм абуыслы.
Бабӧ дзик пыр и вештыштіс Зинаидаӧс дінсьыс тайӧ кывъяс бӧрас:
— Мый нӧ инӧ бӧрдан да шогсян, мед эсыйӧяс бӧрдасны да шогсясны... А тэ... Тэн колӧ Анатолей воигкежлӧ питор вайны. Сійӧс и видз, кагаыд ӧд сійӧ, мед кӧть и кынӧмад на, шогсьӧ жӧ, мамыслы кӧ шог.
— Ог кут, инӧ, — ичӧтик нывка моз вирснитыштіс нырнас Зинаида да лӧнис.
Но, шуис кӧть «ог куттӧ», бӧрдысь сьӧлӧмыс дыр на эз вермы инас ӧшйыны. Водіс нин да вольпасяс сьӧкыда висьысь моз вой джынсӧ на пластайтчис-вийсис. Кыа петігас тай унмовссьӧма жӧ.
* * *
Эз лючки узь сійӧ войсӧ сиктын и мӧд нывбаба, Лукерья Ивановна, Степан Спиридоновичлӧн гӧтырыс. Луннас ветліс больничаӧ, юрӧй пӧ мыйкӧ висьӧ, колӧкӧ, давление, муна пӧ прӧверита. Роза Андреевнаӧс, важ пӧдругасӧ, сэсь жӧ аддзис.
— Луша! Мыйдыра нин эг аддзысьлӧй! — радлыштіс пӧдругаыс да корис дінас пуксьыны.
— Ог тай аддзысьлӧй, пенсия вылӧ петім дай торъялім.
— Кага ме карын нывлысь видза. Локті, со, татчӧ гӧститны дай дзик пыр ньӧмді. Тэ нӧ висьӧдчан жӧ? Омӧльтчӧмыд тай. А кыдзи, шу, он омӧльтчы, Спиридонович йывсьыд омӧльтор жӧ сёрнитӧны да. Гуляйтӧ пӧ тай нӧ. Йӧймӧма ли мый сійӧ?
— Ог тӧд... — Лукерья Ивановна падмискодь. — Сэтшӧмторсӧ эг на тай быттьӧ гӧгӧрволы-а.
— Нӧбасьӧ пӧ Зинаидаыс да.
— Кутшӧм Зинаида?
— Быттьӧ он тӧд агрономшатӧ.
— Сійӧс тӧда, но эг на кывлы.
— Став сиктыд сёрнитӧ да.
— Мед нинӧм абусӧ сёрнитасны. Ме бара-й ог верит!
— Ме сідз жӧ шуа, мися, сӧрӧны...
Сяммис кӧть Луша дзебны пӧдругасьыс падмӧмсӧ да вежӧгтӧмсӧ, петіс больничасьыс да первой делӧ теплицаяс дінӧ окота лои уськӧдчыны да пазӧдны сэтысь ставсӧ. Но гӧгӧрвоис, мый джуджыд бӧра кӧмнад сэтчӧ он во, лымйыс, со, пӧшти сылӧма нин да зыбуч няйт лоӧма туйыс, и эновтчис тайӧ мӧвпсьыс. Кантораас, верӧс дорас бара жӧ нинӧмла, районӧ водз асывнас мунісны Юрко Геня зоотехниккӧд. Чашсьӧдіс гортас, локтіс да первойӧн пазьсетіс стенас ӧшалысь портретнас, кӧні найӧ гозъя. Снимайтчылісны коркӧ томдырйиыс. Сэсся бӧрдыштіс скӧр синваӧн дай лӧнис, медым бӧрти верӧс воӧм бӧрас бара пузьыны. Лунколяссӧ сэсся тракйысис-пелькӧдчис сідз нин сӧстӧм керка пытшкас да ропкис:
— Том баба ковмӧма пӧрысь межлы! Ме тэныд петкӧдла, му вурдысьлы! Дзугсяс авторитетыд!.. А эсійӧ, Роза Андреевнаыс... Пӧдруга шусьӧ... Сымында радлун яндысьтӧм синмас вӧлі, веськыда ызбыльтӧ радлуныс, менӧ дойдны кӧсйис, увтыртны. Ачыс нэмсӧ верӧстӧг оліс, кысъясис кодкӧд сюрӧ да... Сёрнитӧны пӧ сикт пасьта... Коді нин сылы сёрнитӧма? Ачыс, колӧкӧ, Зинаидаыс, уселон гӧтырыс... Каитчыны на кутан, Зиночка, менам верӧс вылӧ заритчӧмысь! Оз на кокниа эновт менӧ Спиридоновичыд! Тэд на ковмас сійӧс эновтны...
Сёр рытнас воис Спиридонович районсьыс. Гӧтырыс пыр и ӧгырӧн резны мӧдіс.
— Луша, мый тэкӧд? Кутшӧм лӧдз курччис? Видзӧдлы портфельысь, кутшӧм козин тэд вайи.
— Вайин кӧ, и ну пӧдругаыдлы! Виччысьӧ, пӧдикӧ, тюремщик гӧтырыд.
— Но, баба, мый тэ сёрнитан?
— Ог ме, а йӧзыс. Став сикт нин ызгӧ.
— Сикт ызгӧ? Мый йылысь нӧ?
— Ачыд тӧдан.
— Мый йылысь, мися, сёрнитӧны?! — гӧлӧсыс верӧсыслӧн гораммис.
— Пӧдруга пӧ видзан, да кага сійӧ кӧсйӧ тэд козьнавны. Зиночкаыд...
— Лукерья! — ырӧстіс верӧсыс, зымгис кокнас.
— Эн зымӧд, эн... — Луша кӧсйис на кратайтчыштны, да ас кадӧ гӧгӧрвоис: «Лукерьяӧн» кӧ шуӧ гӧтырсӧ верӧсыс, сідзкӧ, скӧрмӧма ёна, вермас и кулакнас вартыштны, и пызантӧ путкыльтны. Ӧдйӧджык нин ланьтіс Луша да пырис кывтас, шкап сайӧ саймовтчыштны.
Спиридонович эз понды кулакнас шенасьны ни пызан путкылявны, но гӧлӧсас скӧрыс пуис на:
— И тэ меным тайӧс висьталан? Менам гӧтыр, кодкӧд комын саяс во ӧтлаын олӧма. Тэнад эм юр вемыд кутшӧмкӧ? Мед эз вӧв татшӧм сёрнисӧ некор сэсся панӧма!
— Йӧзыс сёрнитӧны, — шыасис шкап сайсяньыс гӧтырыс.
— Йӧзыс? А тэ кывзан! Учительница, педагог шусян. И эн лысьт Зинаидасӧ тюремщик гӧтырнас шуны. Почётнӧй гражданка сійӧ миян. Сы пельпом вылын совхоз джынйыс кутчысьӧ.
— Со, со. И дорйыны мӧдін пӧдругатӧ, — тювкнитліс-мыччысьліс Луша шкап сайсяньыс да бӧр ырс дзебсис, лӧз пӧнартӧ синмас пӧлучитны эз жӧ вӧв окотаыс. Верӧсыс уськӧдчыліс сылань, да эз жӧ тай вачкы, шеныштчис сӧмын да сэсся зэв мудз морт моз рудзмуніс места вылас, ышловзис:
— Мед пӧ сэсся миян челядь оз лоны невежаясӧн... Этатшӧм велӧдысьяс дінад... Ме мудзи, вай нурйӧдышт да узьны вода.
Ужнайтігӧн ӧтиыс ни мӧдыс кыв пас эз сетлыны, ва быттьӧ вомас босьтӧмаӧсь. Сідз жӧ нем шыавтӧг и вольпасяс разӧдчисны. Спиридонович дзик пыр и саргыны кутіс, а Лушалӧн эз узьсьы. Везъялісны мӧвпъяс ӧти мисьтӧмджык мӧдысь.
«Збыль ли мый нӧ Стёпаыс сылӧн дурмис? Томдырйиыс тай эз некор том бабаяс вылад видзӧд-а. Пӧрысьӧ-нэмӧ мӧй ышмис? Шуласны тай: мужичӧйлӧн пӧ юрыс дзормӧ, а гыркас мути чужӧ... Сӧтана жӧ эськӧ да, думайт вот быдторсӧ ӧні. Колӧкӧ, и нинӧм абусӧ сӧрис Розаыс. И Зинаида немысь абу мыжа. Код тӧдас... Тереника пӧч, гашкӧ... А, сё лешакӧ, мыйла нӧ та дыра тӧд вылӧ эз усьлыны Тереника гозъяыс? Найӧ тшук тӧдӧны ставсӧ Зинаида йывсьыд! На ордӧ и колӧ ветлыны. Аски жӧ...»
Тайӧ мӧвпнас сэсся и унмовсис да аскинас лун шӧр кадӧ кымын мӧдіс Тереньясӧ. Ӧні пӧ тшук ӧтнас бабыс, позяс сыкӧд и секретничайтыштны.
Мый секретничайтісны, Тереникаысь кындзи, некод оз тӧд, а вот мый юрас гӧрддзаліс Лукерья, эз тӧд весиг Тереника баб. Лушаыд сійӧ — лукав баба, оз на быдӧнлы пелькнит-восьты ассьыс лов пытшсӧ. Но мый Тереньясӧ ветлӧма Луша, сиктын ӧдйӧ кывсис. Синма и пеля сиктыд, йӧзасьӧ и вой шӧр кадын вӧчӧмтор, а лун шӧрсяыд, дерт нин, йӧзасяс. Бабаяслы выль сёрнитантор лои.
— А кывлінныд, Лукерья пӧ Тереньясӧ ветлӧма да Зинаидасӧ муртса абу юрсиӧдыс кыскалӧма.
— А мый, вермас сійӧ, атаманша.
— Абу, абу сідзи! Грӧзитчӧма пӧ, мед пӧ Зинаидаыс ушымгайтчас, кытчӧ гажыс.
— Ок, ок, оз на вермы выжывитны Зинаидатӧ. Сы йылысь бур славаыс паськыда жӧ кывсьӧ.
— А ме бара кывлі: грӧзитчӧ пӧ Анатолейыслы гижны.
— Ёна инӧ повзьӧма верӧссӧ мырддьӧмысь, учительница морт кӧ суклясян письмӧясӧн кӧсйӧ занимайтчыны...
Быдӧн кывлӧма мыйкӧ да быдӧн и ассяньыс содтыштӧмӧн юӧртӧ мӧдлы. Татшӧм нин бабаясыдлӧн модаыс. Мукӧдсӧ няньӧн эн верд, сет сӧмын котралыштны сикт кузя, пыркӧдны бӧжторсӧ.
Волісны эз директор пельӧдз татшӧм шушӧдчӧмъясыс, а Зинаида дорӧдз писькӧдчылісны. Ачыс жӧ и Тереника баб локтіс лавкаысь да висьталіс, сёысь лапкучкысис: «Яй кывйыд тай бабаяслӧн нюглясьӧ. Сэтшӧмтор сёрнитӧны, а ме, ей-богу, эг кывлы Лукерья Ивановнасянь ни ӧти грӧзитчан кыв. Юаліс сӧмын, збыль-ӧ нӧбасян. Ме бурӧн и ставсӧ висьталі. Бур сёрнисьыс нӧ кутшӧм грек? Торйӧдчим бурӧн и. Петігас на сёысь шуис, извенит пӧ, Матвеевна, да Зинаидалы эн и висьтав волӧмӧс. Он тай висьтав... Ме чӧв ола, кодкӧ мӧд сё пӧв содталӧмӧн висьталас. Дивӧ! Луннас воліс, рытнас быдӧн нин тӧдӧ. Грек ли абу, а ме думайта да, этайӧ миян бур суседкаыд лэдзӧ сёрнисӧ. Сійӧ аддзыліс Лушаыслысь миянӧ волӧмсӧ, сэсся некод эз».
— Меным, бабӧ, веськодь нин, коді кӧть мый сёрнитӧ, — ӧвтыштіс кинас Зинаида да содтіс: — Ӧти пельӧд пырӧ, мӧдӧд петӧ.
Зинаидалы збыль веськодь лоины йӧз шушӧдчӧмъясыс. Первойсӧ ёна дойдіс, а сэсся и кывзыныс некор лои. Тулысыс, со, талялӧ, юр выв тыр удж лои, некор песны ӧбидасӧ. Ӧні весиг Степан Спиридоновичкӧд паныдасьны абу яндзим.
Кодкӧ лунӧ тай теплицаяс видлыны воліс да панліс Зинаидакӧд сёрни. Но пӧ, агрономӧ, кутшӧм делӧясыд?
— Кутшӧм? — чорыдакодь и артмис Зинаидалӧн. — Пыр да ачыд видзӧдлы дай. Мый юасян?
— Ме ог сійӧс юав. Гортад кыдзи, ме юавны кӧсйи.
— Гортын кыдз кӧть, тэд делӧыс ичӧт, — крапкис Зинаида да лӧдсыштіс на нӧшта, — бабаяслысь юав, висьталасны.
— М-да, найӧ висьталасны... — Степан Спиридонович вештыштіс юрсьыс кепкасӧ, гыжйыштіс юрсӧ да мыжа морт моз и шуыштіс. — Но ладнӧ, ог понды манитны тэнӧ. Уджалӧй, ог мешайтчы, муна.
Спиридонович мунӧм бӧрын эськӧ пиняліс жӧ асьсӧ Зинаида да: сӧтанникыс нӧ пӧ ме мыйла сыкӧд тадзи кратайтчи? Морт ногӧнджыкыс нӧ эз позь? Но сэсся крапкис: «Кыдзи артмис — и мед! Главнӧйыс — паныдасьлісны. А водзӧ мый лоны — ло!»
А лоис сэтшӧмтор, мый ни вӧтнас, ни вемӧснас Зинаида эз думыштлы. Тулыс помнас босьтіс да швач локтіс Толикыс, телеграмма кучкытӧг ни юӧр сеттӧг. Висьталӧны тай, абу пӧ автобусӧн воӧма — ӧтруб кыскалан машинаӧн. И чеччӧма абу сикт шӧрӧ, а скӧтнӧй двор туй вылӧ. Сэсянь и гортас сэсся клевер му вомӧн веськыда шавксьӧдӧма. Сідзсӧ, дерт, матынджык гортӧдзыс, да ӧд бур йӧзыс, ӧти-кӧ, автобусӧн ветлӧны; а мӧд-кӧ, некод оз муяс вомӧн гортас ветлы, ставныс улич кузя сикт шӧрӧд. Вузасьысь Галина пӧ тай аддзӧма звӧз вывсяньыс му вомӧн шавксьӧдысь Кармановтӧ да сы ни садь уськӧдчӧма участкӧвӧй дорӧ-а. Ой пӧ, Карпович, ӧдйӧ котӧрт, спасит Зинаидасӧ. Тшук виас! Бурӧн пӧ эз лок сроксьыс водзтӧ, тшук пышйис!..
Участкӧвӧй Симен Карпович, сиктса ног кӧ, прӧстӧ Карп Симӧ, ӧшинь улас буретш градсӧ гуддьӧма. Сэтшӧм юӧрнад кӧ воасны, кутшӧм нин град! Форменнӧй фуражкасӧ да пистолетсӧ тай кватитӧма жӧ да котӧрӧн Тереньясӧ. Арлыдыс эськӧ абу нин котралысьлӧн, да быть котӧрт. Колӧкӧ, Кармановыс и решитны нин удитіс гӧтырсӧ?
Терень потшӧс дорӧ матысмиг и кыліс Карпович лёкгоршӧн чилзӧм шы.
«Ставыс яснӧ, мӧмляйтны ӧні оз позь!» Весиг потшӧс поскӧдзыс эз лок, звиркнитіс потшӧс вомӧныс да потшӧс прасла вылас и сӧліс паськалӧм вомӧн. Чилзӧ, вӧлӧмкӧ, порсьпи. Тереника пӧч порсьписӧ гидсьыс ки вылас петкӧдіс, йӧрас лэдзис. Да со, и ачыс Зинаида кильчӧ вылас явитчис. Аддзис потшӧс вывсьыд милиционертӧ, сувтовкерис, кыз кынӧм вывсьыс платтьӧсӧ лӧсьӧдыштіс:
— Но, зэв гежӧд гӧсьт тай миянӧ локтӧ! Пыр вай, Симен Карпович, керкаас. Миян зэв ыджыд гӧсьт. Толик локтіс. Ме лавкаӧ котӧртла. Виччысьтӧгыс воис да миян нинӧм гӧститанторйыд абу. Пыр, эн повзьы.
Нюмъялігтыр и петіс Зинаида потшӧс саяс. А участкӧвӧй ышловзис, зэлавлӧм лолыс личмуніс, но эз ставыс. Кутшӧмкӧ пружина личавтӧм на коли. Лэччис потшӧс вывсьыс, веськӧдчис кильчӧланьыс. «Видзӧдлам, кутшӧм гӧсьт локтӧма». Смела кайис кильчӧ поссӧ, пырис керкаас.
Кӧзяиныс, Анатолий, майка кежысь, дженьыдик юрсиыс ёжлӧн моз чушвидзӧ. Пукалӧ пызан дорас лабичас, пидзӧс вылас восьса чемодантор. Орччӧн кутшвидзӧ Терень пӧль дзор тошнас, шыннялӧ-любуйтчӧ тшӧтш джодж шӧрын радлысь-чилкъялысь нывканас. Нывка вылын бобув кодь мича выль платтьӧ, бӧждорас этикеткаыс на тоньялӧ.
— Пап, а пап! Нӧшта мый меным вайин? — дзользьӧ ышмыштӧм нывка.
— Добра здоровйӧ! — шыасис участкӧвӧй пыригмозыс, лэптыштліс юрсьыс форменнӧй фуражкасӧ.
— А, Карпович! Лок, лок! Аддзан, миян кутшӧм ыджыд гаж! — первойӧн шыасис гӧсьтыдлы Терень дед, джодж шӧрын йӧктысь нывкалань индігтыр.
Участкӧвӧй нюмдіс, шуис:
— А, тшапунька кодь! — да воча киасис Терень пӧлькӧд.
Анатолий эз тэрмась воча ки чургӧдны гӧсьтыслы, но чолӧм кывйӧн шыасис жӧ:
— А, пӧрадок видзысь! Чолӧм! Зинаида дорӧ кӧ, сійӧ петіс лавкаӧ, регыд воас. А ме дорӧ кӧ, пӧжалуйста... Вои со, лэдзисны. Муртса на и пыри. Документъяссӧ колӧ петкӧдлыны?
Анатолий вештіс чемодансӧ пидзӧс вывсьыс, кӧсйис чеччыны, но Карпович ӧлӧдыштіс кинас:
— Ӧні оз ков. Мӧдысь коркӧ волан сельсӧветӧ.
Та бӧрын вӧлись артмис на костын воча киасьӧмыс.
Симен Карпович олӧма морт нин, тані чужліс-быдмыліс и нэмсӧ оліс. Ӧні сійӧ дзик пыр вежӧртіс, мый не ас кадӧ веськаліс татчӧ да мешайтӧ найӧ радлунлы. Сылы лои яндзим, думсьыс пиняліс вузасьысь Галинаӧс, бӧбйӧдліс пӧ менӧ. Но, мӧдарсянь кӧ, сэтшӧм сылӧн уджыс, быд чукӧстӧминӧ должен воны дзик пыр. Ӧні сылы пырысь-пыр мунны абу лӧсьыд и кольччыны нинӧмла жӧ. Колӧ чожа думыштны помка, мыйла татчӧ веськаліс да мед и кӧзяевасӧ не ӧбӧдитны. Первой, мый веськаліс сійӧ должносьт серти скоднӧйыс, сійӧс и шуис:
— Ме пӧжарникъяс наказ серти эськӧ ветла да. Гожӧм локтӧ... Пачьясыд мед справнӧйӧсь вӧліны. Терень пӧль и тэ, Анатолий, этайӧтӧ... видзӧдлӧй. Меным Юркоясӧ нӧшта колӧ петавны, извенитӧй, муна, ог кут мешайтны.
Ӧдзӧсӧд петігӧн сылы паныдасис Зинаида, локтӧ лавкаысь. Моздор тырыс тэчӧма кулёкъяс.
— Мунан нин, Симен Карпович?
— Тэрмася.
