ВИСЬТАВ, ЮГЫД ШОНДІӦЙ

Таво гожӧмыс кос вӧлі, да ми воклы, дачникъяслы, ёна ковмис киськасьны. Пуктӧма кӧ нин град вылад, ловъя быдмӧгъяссӧ он косьты, быть ӧд киськась. Миян дачаным нӧшта и вылыс местаын, ӧшмӧсысь ваыс дзикӧдз быри. Бур кӧть, кыр горулас шор визувтӧ. Эськӧ муртса жӧ лолалӧ, но ведра мында ватӧ век нин сӧдзӧдыштас.

Ӧти мича асылӧ водз чеччи да первой автобуснас и кайи дачаӧ. Мися, ёна жар пуксьытӧдзыс град-мӧд кӧть ванас визьйӧдлышта. Воӧмӧн тшӧтш и кватиті ведраяс да мӧді шорлань. Тыртӧгыд да чой горулыд майбыр лашиктынытӧ. А кыдзиджык шор дорас сибӧдчыны? Шор адзыс паськыдкодь, вутшкӧсь, дай кузь турунӧн на кыскӧма. Попробуйт келны...

А шор катыдас, видзӧда да, нывбаба вуджрасьӧ. Тшук вала жӧ воӧма. Сылань и веськӧдчи. Сэті шорыс быттьӧ нюгыль вӧчӧма да дачаясланьыс и сибӧдчӧма. Берегыс зумыд и. Со тай, мукӧд дачаяссяньыс пода трӧпкаяс шӧрланьыс жӧ лэччӧны, ёнакодь нин ветлӧмны сэтчӧс войтырыс.

Локті да вуджрасьысь нывбабатӧ эг и дзик пыр казяв. Ва тыра ведра да кӧрт зыр эновтӧма шор дорас, а ачыс абу кӧнкӧ. Бӧрти, гунь-гонькери да, аддзи жӧ: бертӧм вужля вылын пукалӧ, небыд креслӧӧ моз и меститчӧма. Чолӧмаси да юалі, мися, пуксьӧмыд тай нӧ, эз-ӧ топӧд кыткӧ?

— Эз... Прӧста шойчча... — збодер гӧлӧсӧн и шыасис сійӧ да пелькиника лыбӧдчис места вывсьыс, важ тӧдсалы моз бурпырысь нюмдіс:

— Косьмыны жӧ кутінныд? Ми тай дедӧкӧд косьмим, да талун со шорсӧ понны ковмис. Поні да сэсся видзӧда-любуйтча, кыдзи ваыс содӧ.

Пукалігас нывбабаыд пӧрысьӧн кажитчис, а чеччис, да ичмоньнад, дерт, он шу, но и пӧчӧн шуны абу жӧ лӧсьыд. Дженьыд соска ситеч платтьӧыс томмӧдыштӧ быттьӧ и. Вывлань лыбӧдӧм пушыд юрсиыс сӧмын дзор.

Пока ӧта-мӧдӧс гусьӧникӧн видзӧдалім да тӧдмалім, ми костын чӧв-лӧнь пуксьыштліс. А сэсся сёрнисӧ ловзьӧдысьнас сійӧ жӧ и лои. Варов ань вӧлӧма.

— Гожӧмбыд зэр тусь эз войтыштлы, да шорыс тай со, визув пӧдругаанӧй менам, раммис, косьмыны кутіс... Ме ӧд тані и гожъя, этайӧ медматыс керкаыс и эм менамыс... Тайӧ шор дорыс рӧдимӧй паччӧр кодь жӧ нин меным... Чечча и вода — сы дорӧ котӧртла... Мыссьыштны и, пальӧдчыштны и, чышъянтӧ песлыштны и... Ӧні на пукаланмоз сыкӧд варовитышті. Поні да прӧща кори и, — тёльӧдіс-висьтасис нывбабаыд.

— Тані и оланныд? Онӧ гажтӧмтчӧй? Лёк йӧзсьыс он полӧй ни? — чуймӧмӧн юалӧм артмис менам.

Сійӧ мелі видзӧдласӧн кытшов вӧчис гӧгӧрпӧв: чой паныд моз кайысь дачнӧй керкаяссӧ и шормӧдарса вӧрсӧ, да ыкнитӧмӧн кайтыштіс:

— Велалім, да ӧні ог нин. Ого жӧ гажтӧмтчӧй этатшӧм гажаинас! Сэсся вед ми абу ӧтнанымӧсь — кулак ыджда понпи эм, Витька. Ой-ёй чилӧк гӧлӧса! Кодкӧ кӧ матысмыны кутас, пыр и гӧлӧссӧ сетас...

Тайӧс висьталіг выль тӧдсаӧй кыпыда китшйӧ-сералӧ, весиг меным гажа лои. А сійӧ водзӧ на варовитӧ-висьталӧ:

— Сусед дачаысь том гозъя тшӧкыда жӧ узьлӧны тані и. Ог гажтӧмтчӧй! А лёк йӧзыд... Мый миянлысь, пӧрысьясыдлысь, найӧ босьтасны? Чвет гусявны волӧны корсюрӧ. Да мед, абу жаль. Менам сійӧ добраыд уна, ставлы тырмас. Лекарственнӧйяссӧ тай эз на вӧрӧдлыны-а... Татчӧ сійӧ быттьӧ друг кватитчис, шензян гӧлӧсӧн и горӧдіс:

— Тэнӧ тай нӧ ме ог тӧд! Матігӧгӧрсьыс став суседсӧ нин тӧда-а, понсӧ и, каньсӧ и. А тіянӧс — ог. Карсьыс быттьӧкӧ и аддзывлі, а татысь...

Ме висьтаси, мися, войдӧр ме сійӧс аддзывлі жӧ, весиг телевизор пыр, сьылысь-йӧктысь войтыркӧд. А дачаӧй, мися, менам эстӧн, мӧд улич вылас. Узьлӧмӧн тані ог ов, но быд лун жӧ видзӧдлыныыс вола, киськасьыштны да. Шор дорас тай татчӧ медводдзаысь петі-а, ӧшмӧсысь ваыс бырис да.

— Да-а, — сӧглас сетіс сійӧ. — Енмыс оз кӧсйы таво миянлы отсавны. Косьтӧ! То менам понасын гумовтмӧн нин ваыд лои, босьт. Новлынытӧ тасянь ылын лоӧ...

Та бӧрын ми сыкӧд шор дорад тшӧкыда пондім паныдасьлыны. Тӧдмасим матӧджык, кутім ӧта-мӧд дорӧ гӧститны ветлыны, пӧдругаасьны. Виръясным, буракӧ, лӧсялісны. Менӧ тай сы дорӧ кыскӧмӧн кыскыны кутіс-а. Сійӧ сідз жӧ кутіс шуны и. Шор дорӧ лэчча да, казялӧма кӧ менӧ, чуксалӧ нин. Да и чуксавтӧгыс ачым кежыштла Лизавета Макаровна дорӧ. Быдсяма рӧмнас дзоридзалысь йӧрсӧ кытшовта, нимкодясьышта, пелькиник керкаторъяс пырыштла выль «Дачнӧй» газетсӧ лыддьыштны. Телевизорсӧ на мукӧддырйи чуткыштлас кӧзяйкаыс, лӧсьыд передача кӧ мунӧ. Дерт жӧ, и теплицасӧ видзӧдлытӧг ог ов. Сэні налӧн збыль райскӧй сад, мыйсӧ сӧмын сэн эз быдтыны! Да ставыс пуритӧмӧн быдмӧ! Ёнджыкасӧ верӧсыс и ноксьӧ сэні, Александр Кузьмичыс. Кор кӧть тай он лок, сійӧ пыр сэні, лукйысьӧ муош моз. И мазіяслӧн да гут-гаглӧн гажаа дзизгӧмыс нин висьталӧ — эм мыйӧн дивуйтчыныыс. Стеклӧ пырыс со аддзан весьт кыка ӧшалысь ӧгуречтӧ и кага юр ыджда кабачоктӧ. Теплица мӧдар помас бара кулак гырся помидоръяс воӧны дай. Ӧткымынъяс гӧрдӧдыштӧмаӧсь нин, мукӧдыс муртса на гӧрддзасьӧмаӧсь. А орччӧн виноград гырся розъя помидорчикъяс.

— Да кыдзи нӧ тіянлы, Александр Кузьмичӧ, сямыд тырмӧ этатшӧм дивӧяссӧ быдтыны?!

Сійӧ сӧмын вашмунӧ да, жарысла доналӧм чужӧмбансӧ ньылӧмсьыс чышканмоз, кайтыштӧ:

— Лизонька юрнуӧдӧм улын да, дерт жӧ, научнӧй подув вылын. Этша ли мый быдсикас литературасӧ лыддям!

— Да, литературатӧ ті лыддянныд, и весиг зэв гежӧда паныдасьлысьясӧс: Фрейд, Блаватская... Кодныд нӧ философиянас интересуйтчанныд? Али кыкнанныд? — юася, ог сет сёрниыслы орны.

— Лизонька лыддьӧ, внукыс вайлывлӧ да, — сьӧд муӧн лякӧссьӧм кинас индӧ кытчӧкӧ Кузьмич, кӧсйӧ эськӧ судзӧдны весьт кузя ӧгуреч да мыччыны мем, но оз вермы, парализуйтӧм кокъясыс оз кывзысьны. «О-п-п!» горӧдӧмӧн бауасьӧ да судзӧдчӧмӧн индӧ быдтас вылас: — Выль сорт! Босьт, Лизонькакӧд чӧсмасьыштӧй...

Менам горш дінӧй гӧрддзасьӧ сы вылӧ видзӧдігӧн... Этатшӧм мужичӧй, а седун моз пидзӧсчаня. Теплицасьыс петанінын и сулалӧ сылӧн беддьыс, сивко-бурко моз виччысьӧ кӧзяинсӧ...

Ӧтчыд и смелмӧдчи да юалі Лизавета Макаровнаыслысь. Юалӧмыс лои нин, да понді виччысьны вочакыв. Сійӧ видзӧдліс ме вылӧ кыдзкӧ торъя нежнӧя да шуис: «Аттьӧ, мый правильнӧ сійӧс донъяланныд. Синмӧ шыбитчана рысак вӧв кодь вед и вӧлі эськӧ коркӧ, да Енмыс мыжгис ли мый ли...»

Тадз шуӧм бӧрын Макаровна ышловзис да здук бӧрти сӧмын шы сетіс сылы лӧсялана збодер гӧлӧснас:

— Тэныд ӧд эг на и петкӧдлы семейнӧй альбомнымӧс! Вай пуксьыв этатчӧ, гож водзас. Энлы, ме пырала да петкӧда татчӧ. Ӧти сайысь и салат вӧчам да чӧсмасьыштам, оценитам Сашколысь выль быдтассӧ.

Верӧссӧ ассьыс выль пӧдругаӧй менам оз мукӧд гӧтыръяс моз нимты. Сюра-тошка мужичӧйтӧ ӧд Шурикӧн да Толикӧн оз ыдждӧдлывны. А Лизавета Макаровна ассьыс верӧссӧ пырджык чукӧстӧ Сашаӧн. Но таӧдз ни та бӧрын некор эз паськӧдлы аслас верӧс йылысь сёрнисӧ. И кор да кыдзи коктӧмнас лоӧма... Сӧмын и тӧдмалі, ыштӧ пенсия вылас петтӧдз облсовпрофын уджавлӧма, бабаястӧ ёна радейтлӧма да и курыдтортӧ абу жӧ бӧрыньтлӧма. Мыйкӧ унджык тӧдмавны эз удайтчы. А ӧд ми вокӧс, нывбабаястӧ, няньӧн эн верд, а тӧдмӧд колӧнас и оз ковнас.

Быд аддзысьлігӧн выль тӧдсаяскӧд кутчысьлам и окасям, юасям и висьтасям, а збыльвылассӧ кодъяс найӧ — бура ог и тӧд. Пашкыр пулысь тай сяльӧдчысь веж коръяссӧ аддзан, а йыв-вожыс да торъя нин діныс да вужйыс — оз тыдавны. Сідз жӧ и менам выль тӧдсаяскӧд артмӧ быттьӧкӧнӧсь... Но шуласны тай: калькалыштіс кӧ пӧ ӧдзӧсыс, коркӧ пӧ быть воссяс. Калькалӧм ӧшинь-ӧдзӧсыс меным вылӧ воссис коркӧ сёр арнас нин, а дзик помӧдзыс и нӧшта на бӧрынджык. Арнас вед и пашкыр пуыдлӧн коръясыс гылалӧны, кушмӧ-тыдовтчӧ йыв и вож.

Сійӧ лунас медбӧръя град выв пуктас, морков нин, керимӧ Серёжакӧд, медічӧт внуккӧд. Пӧдругаӧй менам, Лизавета Макаровна, потшӧс сайсянь миянӧс аддзӧма, чукӧстчис. Сергейӧс и мӧдӧді сылы паныд, ачым мичаджык морковсӧ тэчи панера кӧрӧбӧ да гу дорӧ нуи.

Кыпыд ныр-вома, мича шалльӧн павгысьӧма, резинӧвӧй колоши кокнас шлёпайтігтыр, локтіс Макаровна менам ноксянінӧ, вашмунӧмӧн шыасис:

— Ой и мича да муса зонка талун менӧ стретитіс дзиръя дорад! Сергей пӧ тай нимӧй. Внук, инӧ? Менӧ тай юаліс, тэ пӧ коді? А ме, мися, Макар Васька — сиктса зонмыдлӧн чойыс и лоа! Тӧдан он Макар Васькасӧ? Драмтеатрас ветлывлан он? Зонкаыд эз гӧгӧрво менсьым шмонитӧмӧс да чуньнас зэв лӧсьыдика инмӧдчыштліс кӧсича дорас — выжыв пӧ, буракӧ... Со тай эстчӧ ылӧдчис, эз и лок миян дорӧ, — сярӧдіс-висьталіс Макаровнаыд. — Ме, тыдалӧ, збыль нин и выжывмыны куті. Сизимдас вед тырта. Чужан лун талун менам. Быдсяма морс-квассӧ и ырӧшсӧ вӧчи. Сэтӧрысь и, ӧмидзысь и, пелысьысь и. Быдсикас салатсӧ вӧчи и. Чӧсмӧдла, волан кӧ быттьӧ менӧ ыждӧдлынысӧ. Ӧні и мунам мекӧд. Гӧстяяс карсянь локтісны нин, мича аньяс-рочаканьяс. Ӧтиыс аслам моньӧ, мӧдыс сылӧн пӧдруга, сэсся менам карса суседкаӧй, Альбина. Пиӧй командировкаын да эз лок, а Женя внукӧй воис жӧ, ой муса нылӧс, невестапусӧ, вайӧма тшӧтш. Дача суседъяс локны кӧсйисны и. Магнитофоннас. Гажа лоӧ...

— Ме эськӧ радпырысь, да козинтӧгыс ӧд оз ветлыны именничатӧ ыждӧдлыны, — падъялӧмкодь и артмис менам воча кывйыд. Сійӧ вачкучкысис да весиг петитчыштіс:

— Эн сёрнит нинӧм абусӧ! Тэ ачыд козин! Кушманыд со эстӧн мӧс юр ыджда быдмӧма, сійӧс нетшышт дай, ёна кӧ козьнасьны окота. А быттьӧнӧсь книгатӧ кӧ ассьыд кырымпаснад козьналан, ме зэв рад лоа. Тӧда вед: гижан, лыддьыла мыйсюрӧ.

— Сійӧтӧ эськӧ верма и аски вайны да козьнавны, но менам вед сідз-тадз, олӧм веркӧссьыс босьтӧмторъяс гижӧдам. А тэныд мыйкӧ пыдісяньджык нин окота лыддьыны. Да вед? Мыйкӧ философскӧйӧс?

— Да, радейта сэтшӧмсӧ. Нӧшта радейта мифъяс! А комисӧ, ассьыным, лыддя жӧ. Тӧда матӧ став гижысьсӧ и... — сылӧн кыпыд чужӧмбаныс бара югдіс да воддза мозыс жӧ шмонь гӧлӧсӧн шуыштіс: — Давай, эновтлы уджтӧ, аски поводдяыс бур на лоӧ, удитан морковтӧ идравны. А талун тэтӧг всё равно ог мун!

Ыджыдалыштіс пӧдругаӧй, да меным сетчыны сӧмын и коли. Шутка ради нетшышті ӧти кушман да сёркни, и мӧді Макаровна бӧрся. Сергейлы висьтаси, мися, регыд локта, уджышт менамтӧг.

Лизавета Макаровнаяс керка дорӧ матысмигӧн и кылім кутшӧмкӧ лӧсьыд музыка шы. Мортыд нӧшта на ловзис, инмӧдчыліс меным сойӧ, ой пӧ, локтӧмаӧсь сусед гозъяыс, «Энигма»-сӧ вайӧмаӧсь со!

Ме эг и бура гӧгӧрво, мыйла сійӧ тадз ыззис. Но и мый, воисны кӧ? А, вӧлӧмкӧ, ыззьӧдӧма сійӧс музыкаыс.

— Тӧрыт на дорӧ петалі, кывзі да кывзі тайӧ музыкасӧ, да сідзи и пӧтны эг вермы. Кывзышта на талун! — чиктыліс мортыд да котӧрӧнмоз и мӧдӧдчис, менӧ сойбордйӧд кыскис и, лок пӧ но, тшӧтш радлам...

Праздничнӧй пызаныс юбилярыдлӧн кильчӧ помас дась нин. Еджыд пызандӧра павгӧма, вылас уна лыда дзоридз пӧвстын сёян-юан тыра кувшиныд и тасьтіыд дізьвидзӧ! Кутшӧмкӧ шань мыгӧра том ичмонь ыргӧн самӧварӧн ноксьӧ кильчӧ помас. Сэн жӧ ичӧтик нывка самӧвар ломтаснас, гырысь коз пу кольясӧн гӧглясьӧ-ворсӧ. Кильчӧ пос вылас эновтӧмаӧсь магнитофонсӧ, сысянь и гора музыкаыс киссьӧ.

Пӧдругаӧй менам уськӧдчис самӧвар дорын ноксьысь ань дорӧ, сывйыштліс сійӧс, сэсся нывкасӧ босьтліс киас, окаліс да сералігтыр кайтіс:

— Лӧсьыд музыкасӧ вайӧмаӧсь! Андел эня-ныла ті! А верӧсыд нӧ?.

— Найӧ эстчӧ, льӧм пу дорад, картіасьны мунісны, — кинас ӧвтоввӧчис том аньыд да нюмдіс. — Кажитчис, шуан, да козин пыдди вайи «Энигма» кассетасӧ тэныд, Макаровна. Ми Ленточкӧд йӧктан музыка вайимӧ дай! Лиза бабыслы Ленточ и йӧктыштас на!

— Но! Сідзкӧ, талун лоӧ тай гажыс! — именнича бергӧдчис ворсысь нывкалань. — Йӧктыштан инӧ...

Керкасьыс петісны кык ань, вылын бӧра туплиаӧсь, гӧрд вом дораӧсь, мургиг-сьылышталігтыр кутісны ноксьыны пызан дорас.

— Эн-ӧ нин миянтӧг наливкаяссӧ менсьым видлӧй, зэв гажаӧсь тай? — ас йӧзкӧд моз шмонитыштіс юбиляршаыд тайӧ аньясыскӧд, сэсся другысь кватитчис, меліа сывйыштіс менӧ да ставлы кывмӧн юӧртіс:

— Тӧдмасьӧй! Со... выль пӧдругаыд тайӧ и эм менам. Пуксьӧдӧй пызан саяс!

Пока тӧдмасим-керим да мый да, самӧварыд дзужгыны кутіс, ичмоньяс нӧшта на визулӧсь лоины: то самӧвар дорас матыстчылӧны, то керкасьыс содтӧд чашка-блюд петкӧдӧны. Ме мӧдӧдчи льӧм пу дорын картіасьысьяс дінӧ, мися, кӧзяиныскӧд кӧть чолӧмася да мукӧдыскӧд тӧдмася.

Кузьмич талун молодеч кодь. Шырсьӧма-бритчӧма, моднӧй курткаа, ичӧтик пызантор саяс ӧтнас сійӧ и пукалӧ, мукӧд кыкӧныс сувтсӧн картіасьӧны, том вир-яйясаыдлы, тыдалӧ, оз на и пукавсьы. Ӧтиыс сьӧд уска том мужичӧй, ӧтторъя, картісӧ шлоч пуктігӧн, шуыштӧ:

— А эт-то не видали!

Тайӧ и эм, буракӧ, верӧсыс эсійӧ том ичмоньыслӧн.

Мӧдыс зонка сяма на, устӧм-тоштӧм, юрнас довкйӧдлыштӧ, видзӧдлывлӧ Александр Кузьмич вылӧ да кайтыштлӧ жӧ:

— А-а, дедуня... ясно, дедуня...

Тайӧ, дерт жӧ, Женяыс, внукныс Кузьмич гозъялӧн. Нӧшта на дорын зонка сяма жӧ, шырӧм юра да джинсы гача нывка китшйӧ-сералӧ, том мужичӧйяскӧд ворсӧдчӧ.

Ме чолӧмаси Кузьмичкӧд, мукӧдыскӧд кыв-мӧдӧн варовитышті, и кутісны нин пызан дорсяньыс чуксасьны. Бӧр мӧдӧдчи нывбабаясыс дорӧ. Нывкаыс, Иринаӧн тай висьтасис-а, мӧдӧдчис мекӧд жӧ. А мужичӧйяс кӧсйысисны локны «здук мысти», сконсӧ пӧ помалам сӧмын.

Кутшӧм сёрни нуӧдісны менамтӧг пызан дорын ноксьысьяс, ог куж шуны, но на дорӧ матысмигӧн нин кылі кӧзяйкалысь шызьӧм гӧлӧссӧ:

— Ті вот, мича аньяс-рочаканьяс, кывза сёрнинытӧ да, ӧтторъя «чассьӧ» да «чассьӧ» гараланныд. А мый сійӧ сэтшӧм «чассьӧыс», тӧданныд-ӧ?

— Но-ӧ, энька-матушкаӧ, шуан жӧ, — пӧперегаліс Макаровнаӧс моньыс. — Ми вед абу нин дас квайт арӧса нывкаяс... Тӧдыштам нин...

— Ӧдвакӧ... — нюм пычкӧмӧн ышловзьыштіс энька-матушкаыс.

— А тэ быттьӧ и тӧдан?.. — джуджыд бӧра тупли вылас шурк бергӧдчӧмӧн юаліс моньыс. Сы гӧлӧсын тӧдчис эльтчана серам.

Лизавета Макаровна быттьӧ эз и казяв моньыслысь эльтыштӧмсӧ, зэв збыльысь шуис:

— Да коді нӧ тӧдӧ, мый сійӧ сэтшӧмыс! Буди, мый бӧрӧ нин кольӧма-вошӧма, сійӧ и эм шудыс-а. Чассьӧыс либӧ, тіян ногӧн кӧ...

Ми сувтовкерим. Иринаӧс ме кутышті ки пӧлӧдыс, энлы, мися, огӧ на вай торкӧй, мед ас костаныс энькаа-моня сёрнитыштасны.

Но Лизавета Макаровнаыд сэсся ланьтіс да вель дыр чӧв оліс. Ме чайті, мый оз нин, буракӧ, пансьы на костын выль сёрниыс. Но юбиляршаыд шпыньмуніс да збоякодь горӧдіс:

— Часлӧ, ме ӧтитор тіянлы висьтала! — Горӧдчис и бара ланьтыліс. Сэсся быттьӧ дивитыштіс асьсӧ:

— Сэтшӧм збоя кӧсйыси, а, вӧлӧмкӧ, абу и кокни колана кывъяссӧ аддзыны. Ме вот ӧні, сизимдас тыртігӧн, унаысь вачкучкысьла да аслым горӧдла: «Шуда жӧ нин ме морт! Эта дыра ола! Быдторсӧ аддзывны удиті!» Мукӧддырйиыс бара аслым тӧдлытӧг горӧдӧмыс артмас: «И мыйла ме татшӧм шудтӧм?» А кодыс эськӧ велдас, вескиӧн кӧ быттьӧ ӧшны? Чайта некодыс. Качайын гычасьӧм кодь артмӧ олӧмад. Качлан вывлань – лайкмунан увлань. И пыр сідзи, и пыр сідзи...

Лизавета Макаровна пуксис кильчӧ пос вылас, лӧньӧм магнитофон дорас, пӧрччис коксьыс колошсӧ да вештыштіс бокӧ. Тӧдчӧ, дӧзмӧма ас вылас:

— Сӧтанаыс, дзугси дзикӧдз! Мыйкӧ зэв тӧдчанаӧс кӧсйи тіянлы шуны да, но ладнӧ! Самӧй водзсяньыс, аслам челядьдырсянь заводита инӧ. Быдмим ми ай-мамлӧн куим чоя-вока, — заводитіс сійӧ ньӧжйӧник. — Ми ыджыдджык чоюккӧд тшӧтшъяяс быттьӧ. Ме кузь кока вӧлі, да тушаясным ӧткодьӧсь кымын. Вокӧ — медічӧт, арӧс на тыртӧ. А лелькуйтім да зачесьтасьлім жӧ ми сійӧн! Мырддьысям чойкӧд. Сійӧ кӧ вокӧс рокӧн паньӧдас, ме нин пач вом дорӧ котӧрта, пӧсь пӧжӧм йӧлӧн дзолюкӧс юктӧда. А кыдз сӧмын сійӧс эг ыждӧдлӧ, кутшӧм ним сӧмын эг пуктылӧ... Кыстур, кайпи, оз тусь, шӧвктуг, шобді кӧлач! А ӧтчыд нӧшта ӧти ним аддзи да зятниті-шуи: питиль тэ, мися, питиль! А миянын буретш гӧститіс Марья гӧгинь. Сійӧ и дивитыштіс менӧ. Ладинечсӧ пӧ мыйла тадзи шуан? Питильыс ӧд сійӧ карасин лампаын сотчӧ... Господи, гашкӧ, збыль не часӧ лои тайӧ шуӧмыс. Регыд и висьмис да куим лунӧн сотчис дитюкным миян. Сизим ар ме сэки тырті. Медводдза шог да синва... Но челядьдырыд сы вылӧ и эм — ӧдйӧ ставыс вунӧ. А сійӧ гожӧмыс и бара козьналіс меным шудсӧ. Да нӧшта кутшӧмӧс! Медводдза радейтчӧм! Настоящӧй радейтчӧм! Да, да, и сизим арӧсӧн овлӧ татшӧмыс! Кӧсъянныд кӧ, висьтышта.

Моньыс кыдзкӧ тешкодя серӧктыштіс, но «висьтав» ни «дугды» эз шу. Сылӧн тшап пӧдругаыс тай «кывзам, дерт» шуис-а. Ирина, том нылыд, ойӧстӧмӧн весиг кевмысис: ой пӧ, сэтшӧм интереснӧ! Дерт жӧ, кывзам! Медся ичӧт кывзысьыс, Ленточ нима нывкаыс, Лиза бабыслы водзас кавшасис да стрӧга тшӧктіс: «Висьтав!»

Ставӧн серӧктісны, а висьтасьысьыд малыштіс Ленточсӧ юрӧдыс, сывйыштіс нывкаӧс, да водзӧ нуӧдіс сёрнисӧ:

— Трӧича празник вӧлі. Ми, нывкаяс, краситӧм колькъясӧн котӧртім шордор видз вылӧ гӧглясьны. Вежӧдыс мыччысьӧма нин. Быгыльтан кольктӧ да вошӧ турун пӧвстас. Корсям-корсям, аддзан, да радыд! Качӧдлан вылӧ-ӧ! Бӧрти дышӧдіс жӧ, мӧді гортӧ. А миян сиктын сэтшӧм мода вӧвлі — Трӧича лунӧ сикт шӧрӧ сувтӧдны вӧрысь вайӧм кыдз пу. Сы улӧ пуксьӧдлісны балалайкаӧн либӧ гудӧкӧн ворсысьӧс. Луннас зонпосни да пӧчӧяс быдтасъясыскӧд, а рытнас том йӧз сэсся гажӧдчылісны сэні.

Ми локтім гӧглясянінсьыд, а кыддзыд сулалӧ нин, муртса гаръясыс потыштӧмаӧсь, вежӧдыштӧны. И гудӧкасьысь эм нин, мичаник том морт «Шондібан» няръялӧ. Кымынкӧ пӧчӧ да поснияс кекӧначасьӧны. Кодкӧ тай менӧ тойыштіс кытшад! А ме и заводиті жбыръявны! Кокӧньяс тотш-тотшвӧчыштӧны, кекӧньяс вач-вачкерыштӧны! А гудӧкыс «йӧкты-йӧкты» и шуӧ! «Но, Лиза, кӧза-йӧгӧза», — кылӧ, горӧдлӧны видзӧдысьясыс. Кватитчи, а тьӧтӧяс да дядьӧяс. Пажнайтны, буракӧ, воӧмаӧсь, тшӧтш кытшад сувталӧны. А ме ышми, водзӧ лэбала. Друг гудӧкыс ланьтіс, гудӧкалысьыс чышкыштіс чужӧм вывсьыс пӧсьсӧ дай шуӧ: «Этайӧ нывка радиыс сьӧлӧм бурмытӧдз няръялі-ворсі. Оль-оль-оль», — индӧ ме вылӧ да инмӧдчыштлӧ кинас.

Сійӧ здукас, веританныд он, качлі кытчӧкӧ эстчаньӧ, гашкӧ, шонді дорӧдзыс. Буракӧ, нӧшта на гажӧдчисны бабаяс, но ме эг нин вӧв на пӧвстын. Лэбалі, ог помнит кӧні. Рытнас локті гортӧ, да мамӧ вачкучкысис. Кӧні нӧ пӧ лунтырыс котралан? Оз мӧй кынӧмыд пӧ сюмав? «Йӧктіс кыдз дорын! — шуӧ чоюкӧ. — Сійӧ и сёянтӧгыс пӧт...» «Гуляйтысьлы пай абу, узьысьлы — эм. А йӧктысьлы?» — шпыннялӧ мамӧ да ваялӧ пызан вылӧ сёян. Кӧтӧдлі эг паньӧс, ог помнит. Унмовссьӧма веськыда пызан саяс. Батьӧ моздорас и нуӧма вольпасьӧ.

Аскинас петі грездӧ да лавка дорысь и аддзи ассьым любовӧс. Менам мича зонмыд сэн сулалӧ! Вомӧй шешкысис пельӧдз. Кутшӧмкӧ дядьӧ петіс лавкасьыс, здоровайтчис зонмыдкӧд: «Но, Паша, кинотӧ вайисны эз?» — «Эм, эм. Рытнас волӧй», — воча шуӧ зонмыд. Киномеханик вӧлӧма мусукӧй. Ме сылань жӧ воськов бӧрся воськов вӧча, дзик нин сибӧдчи, а сійӧ менӧ оз и казяв. «Да тайӧ жӧ ме, тэнад оль-оль-ольыд! — кевмыся. — Мыйла нӧ он нюмдышт кӧть?» Петіс лавкасьыд миян пельшӧричаным, лӧсьыдик ныв, шыасис менам мусук дорӧ: «Пошли, Паша!» — да лясіс став тушанас сы дорӧ. Сідзи сывъясьӧмӧн и мӧдісны. А мекӧд мый лои! Дурми вежӧгтӧмӧйла. Кок улысь няйт лыасӧ и галькисӧ чапъя-шыбайта на бӧрысь да нимтала пельшӧричатӧ: «Кыз льӧб! Чорпа пинь! Пӧла кок!..» Кыла Марья гӧгиньлысь гӧлӧссӧ: «Мыйкӧ тай нӧ, кӧза-йӧгӧза, талун ӧтнад ворсан?» Дӧра мешочикысь сійӧ кыскӧ сакар тор, мыччӧ меным: «На, вомад сюй да эн нин вильшась. Лавкаӧ сакар вайӧмаӧсь, мун мамыдлы висьтал». Но ме воськов вӧчны ог вермы, синваӧй киссьӧ и киссьӧ: «Сійӧ оз менӧ, эсійӧ лӧсавтӧм гырсӧ радейтӧ!» А Марья гӧгинь кайтӧ ассьыс: «Со и синтӧ пыркысьтӧмыд. Сідз мӧй ворслӧны?..»

— А ворслӧны тай... — дзик нин мӧд гӧлӧсӧн, кывкӧрталӧ быттьӧ, шуӧ миян висьтасьысьным, да аслас ичӧтдырся йӧйталӧмсӧ казьтыштӧмысь чужӧмбаныс ӧзйӧ, синмыс кӧтасьыштӧма: — А олӧмыс, тыдалӧ, ставнас ворсӧм и эм...

Буракӧ, казьтылӧмъясыс сылы ӧта-мӧд вежмӧныс воӧны юрас, ас тӧдлытӧгыс и вуджӧ мӧд лоӧмтор вылӧ нин.

— ...Сійӧ арнас ме муні школаӧ, — водзӧ висьталӧ Макаровнаным. — Кӧкъямысыс эськӧ эз на тыр, да учительница босьтіс, лыддьысьныс кужи нин да. Пуксьӧдіс менӧ медводдза парта саяс зэв мусаник зонкакӧд, Чукилев Андрюшакӧд. Чёлкаторйӧн шырӧм юра, визув сьӧд синма, оз дур мукӧд моз и ёна велалӧ. Меным быд лун гӧснеч вайӧ — кӧнтусь кабыр либӧ анькытш. А меным любӧыс! «Ӧнюк, кысь тэ тӧдан, мый ме кӧнтусьсӧ радейта?» — «Сёй. Аски бара вая. Миян уна, пыш вылӧ кӧдзлім да», — меліа шуӧ сійӧ. Ме окышта сылысь сойсӧ пуджӧм дӧра дӧрӧм сос увтіыс: — «А ме тэныд аски нӧкъя тупӧсь вая, миян мамӧ зэв чӧскыда пӧжалӧ».

Тӧвся каникулӧдз сідзи и олім-вылім ми, первоклассникъяс. Нывка пукалӧ зонкакӧд. Кодъяскӧ лӧсялӧныджык, кодъяскӧ озджык. А ми Ӧнюккӧд — гулю пара.

Каникул дырйи ёлка вылын ми орччӧн на пукалімӧ, хоровод йӧктім и. Миянлы кыкнаннымлы клеткаа тетрадь козин вылӧ сетісны бура велӧдчӧмысь. А каникул бӧрын локті школаӧ, да парта сайын ме ӧтнам. Ӧти лун пукала, мӧдӧс. «Мыйла абу Ӧньӧ, кӧні сійӧ?» — майшася.

Коймӧд луннас ме дорӧ учительница пуксьӧдіс Шешуков Боряӧс, коді медбӧръя парта саяс пукаліс ӧтнас. «Миян Андрюшакӧд лоӧма зэв ыджыд шог. Оз лок сэсся сійӧ миян дорӧ. Мамыс Андрейлӧн кулӧма, да батьыс сійӧс мӧдӧдӧ детдомӧ», — висьталіс учительница Боряӧс ме дорӧ пуксьӧдӧм бӧрын.

«Сӧрӧ! Сӧрӧ! Локтас Ӧнюкӧй бӧр!» — горзӧ лолӧй, а гырддзаӧн да кокӧн сӧмын и чужйышта да тувкӧда выль ёртӧс.

Боряыс ӧд раминик, мусаник зонка жӧ вӧлі, но ме пытшкӧ пырӧма кутшӧмкӧ змей, синмӧн ог аддзы сійӧс дай сӧмын.

Учительницаыд тайӧс аддзывтӧг эз ов. Коймӧд луннас юӧртӧ: «Аски выходнӧй. Талун вӧчам классын уборка, чышкам-мыськам, сэсся верманныд пуксявны, коді кодкӧд кӧсйӧ... Сӧмын мед вӧлі нывка зонкакӧд-а...»

Класстӧ шыльӧдӧм-мольӧдӧм бӧрын ставныс пуксялісны партаяс саяс, унджыкыс накӧд, кодкӧд и пукалісны. Кодкӧ тай зонкаяс пӧвстысь шыасьліс жӧ, ме пӧ Колегова Ленакӧд кӧсъя. Но Лена, кылӧ, чилӧктіс: «Ог, мися!»

Ме сулала парта бокын, дебелита платтьӧ бӧждорӧс да син бӧжӧн дзоркнитла Шешуков Боря вылӧ. Видзӧда да, Боряӧс ки пӧлӧдыс кыскӧ ас парта дорас Катя Чередова. «Ме пыр кӧсйи Боряыскӧд пукавны, да Толикӧс ме дорӧ кӧвъялісны», — броткӧ Катя, сійӧ ставнас чокышсьӧма, вӧтлӧ дінсьыс Толикӧс. Мӧдыс петитчӧ, сэсся някыртӧ юрсисӧ Катялысь да мунӧ бӧръя партаяслань.

Со и ставӧн меститчисны-ладмӧдчисны, а ме век сулала. Учительница сэсся шыасьӧ жӧ: «Лизук, тэд эз кажитчы первой парта саяс пукавны? Со нӧ, Толик дорас инӧ мун, сійӧ ӧтнас на...» «А Боряыс нӧ, мыйла оз кӧсйы тані пукавны? Ме вед сійӧс ог кут сэсся некор чужъявны», — бӧрддзи горӧн да лӧньны ог вермы. Учительница кутыштліс менӧ морӧс бердас, такӧдыштіс: «Ладнӧ, Лизук, эн бӧрд. Пуксьы инӧ татчӧ...»

Бӧрынджык Шешуков Борисыс пединститут помавліс да миян роноын дыркодь заваліс. Лӧсьыд туша-рожаа мужичӧй лоис, шань морт и. Эз ыджыдӧ пуксьыв. Роноад вӧлі локта, да ме дорӧ шуткаӧн моз и шыасяс: «Лизукӧ-кӧзукӧ, Елизавета Макаровнаӧ, висьтась, кутшӧм делӧясыд тіян школаын? Таво кымын пионерӧс дасьтан комсомолад?» «Да-а... Барабан кытчӧкӧ леталісны да... Походӧ мунігӧн гажтӧм», — сералігтыр норасьышта ме...

Татчӧ висьтасьысьным миян сувтовкерис да шыбӧль вӧчис дзик мӧд сёрниӧ:

— Видзӧдлӧ! — горӧдіс сійӧ. — Ышми тай! Кӧзяйка шуся, гӧсьтъясӧс чукӧсті! Варовита, басниӧн поттшуйта донаясӧс! Самӧварным кӧдзалас. Чукӧстӧй мужичӧйяссӧ, чайӧвайтны кутам...

— Огӧ на найӧс пока вӧрӧдӧй. Мед ворсасны, — шыасьӧ Лизаветалӧн моньыс. — Водзӧ на висьтав. Некор тайӧс эн гарыштлы да...

— Мый тан висьтавнысӧ... Мый тӧд вылӧ усьӧ, больӧда тай-а, — кайтыштіс висьтасьысьным.

Моньыс, а сыкӧд и мукӧд кык аньыс, пондісны шуны, водзӧ на пӧ больӧд, интереснӧ тай кывзынысӧ. Мыйла мужичӧйяссӧ вӧрӧднысӧ, самӧй азартас воӧмаӧсь да.

— Но, сідзкӧ-инӧсь... мед найӧ сэні кульмасны, а ми тані, — сетчис юбиляршаыд. И водзӧ киссьӧ сылӧн варов висьтыс. — ...Вежӧртінныд, дерт, нин. Пионервожатӧялі ме сэки асланым школаын. Нэм джын челядькӧд и маитчи да чиктывлі-йӧкті-сьылі, сэсся походӧ ветлі, бипур дорын узьлі, кай позтӧ мастеритлі накӧд, олимпиада кежлад дасьтысьлі. А веськалі на дорӧ ас тӧдлытӧг. Олӧмыс ёна топӧдіс да. Седьмой на и помалі, кор войнаыд заводитчис. Восьмойӧ вуджи. Чойӧ мӧд во нин карын акушеркаӧ велӧдчис. Батьӧсянь усян юӧрыд воис, да мамукӧ лябмис дзикӧдз, висьмис. «Кыдзи и мӧдам овны, ог кӧ кут дзикӧдз вермыны? Ойя дай ойя! — лӧвтӧ мамӧ да жалитӧ менӧ: — Тэ вед, Лизук, зэв на нэриник, школатӧ кӧ эновтан, сортовӧйӧ мӧдӧдасны, сгинитан сэн...»

Миян семьялысь дзикӧдз топалӧмсӧ казялӧма школа директорным, Алексей Петрович. Ӧтчыд локтіс миянӧ да шуӧ мамӧлы: «Лизаыд тіян справитчас, сюсь нывка. Пионервожатӧй школалы колӧ. Тэ эськӧ мый шуан, Анна Ивановна?» Мамӧ бӧрддзис: «А ачыс, Лизукыс, мый шуӧ?» Падъявтӧг, пулемётысь моз и таркниті: «Ме посниясыскӧд сямма нин. Быд урок бӧрын октябрёнокъясыскӧд кольччылам...» «Но вот, — паськӧдлӧ кияссӧ директор. — Ог ӧтнассӧ эновтӧй, отсалам. Заочнӧ велӧдчыны педучилищеӧ пырас и...» Сідзи менам олан да уджалан туйӧй и заводитчис, том нывкалӧн. И кажитчыліс ёна пионеръяскӧд ноксьӧмыс. Старайтчылі: спектак либӧ концерт дасьтам — войсӧ ог узь. А олимпиадаяс кежлад кыдзи дасьтысьлімӧ! Зілим быдлаӧ сюйсьыны. Москваӧдз на ветлім дай. Концертӧн. Школа директор зэв рад ме вӧсна, и роноын ошкӧны. Мый нӧшта и колӧ меным?

Но мамӧ ӧтчыд кутіс шуны, нэм чӧжыд пӧ и кутан челядькӧд чеччавны? Верӧс сайӧ вед мунан кад. Эндӧм ныв пӧ лоан. Быд ловъя лов пӧ аслыс пӧл корсьӧ, семья лӧсьӧдӧ. Кӧк, буди, сӧмын... «Жӧникыс абу да!» — серала ме, а аслам вир-яйӧй вед ызбыльтмӧн жӧ нин ворсӧдчӧ. Сиктса зонъяскӧд кодсюрӧкӧд ёна нин окасьлі, но медым верӧс сайӧ — эз некод вежӧс петкӧдлы.

А ӧтчыд... Серамыд петас и синваыд... Чӧвлӧ, висьтала... Ёна жӧ нин ми сэки гӧля олімӧ да нинӧм эг тӧдӧ, кӧть и диплом нин вӧлі педучилище помалӧм йылысь. Господи!.. Вирӧй, буракӧ, ёна ворсіс сійӧ рытас. Шоныд август вед. Войыс пемыд нин, а вылісянь гӧгрӧс тӧлысь дзоргӧ-видзӧдчӧ ӧшиньӧ да чуксалӧ: «Мича нылӧй, петав, петав! Зарни нылӧй, петав!» Со и сьылӧктышті Нёбдінса Витторыдлысь сьыланкывсӧ! Вӧччи, сё лешакӧ! Чой гожӧмнас воліс отпускӧ Усасьыс, козьналіс джуджыд бӧра тупли: кокни, мича. И вылӧ паськӧмтӧ аддзи, кутшӧмӧс киноын петкӧдлӧны. Американскӧй козинтӧ миянлы, батьтӧм челядьлы, война кадас сетавлісны. Чиг выль, чим сьӧд, векни лямка волысыс, сойыс куш. И сідз лясӧма телӧ бердад, морӧстӧ и вӧсни костӧ мыгйыс тӧдчӧдӧ бура. Пасьталі да тайкӧ садьӧс ог вошты радысла! Лолита Торрес дай сӧмын! «Серенада солнечнӧй долиныысь»! Кӧсаӧс рази, юрсиӧс вылӧ лэпті, швыркниті лентаӧн. Мӧдӧдчи клубӧ зонъясӧс ылӧдлыны. Вӧв бӧж моз тоньялысь юрси пратьяс сӧмын и швачӧдӧны пельпомӧ, сэтшӧм нин збодера да тшапа тотшсьӧда-муна грезд кузя. А клубын чукӧрмӧмаӧсь нин том йӧзыс... Менӧ аддзисны, да эновтісны весиг йӧктӧмтӧ, акайтӧны. Ӧти кодкӧ тӧдтӧм, военнӧй паськӧма, лейтенант, буди, пыр и эновтіс йӧктысь пӧвсӧ, географичкаӧс, да уськӧдчис ме дорӧ, чечётка кокъясыс тутш-тотшкерисны: «О, фроллейн! Битте твою ручку, фокстрот йӧктам!»

Немеч и роч, и коми кывъяс гудралӧмӧн шыасьӧ ме дорӧ да виччысьӧ, кор ме ляскыся сы бердӧ. «А этатшӧм мусаыдкӧд мый огыс!» — роч чибӧ моз и копыртыштлі юрӧс да чургӧді киясӧс. Кватитіс сійӧ менӧ и давай бергӧдлыны! Но, лешак, кокниа да лӧсьыда новлӧдлӧ! Абу миян пентюк зонъяс кодь!

Ми садь воштымӧн бергалам. Мукӧд йӧктысьясыс эновтісны нин кытшсӧ, саймовтчалӧны стен бердланьыс. «Вот тайӧ пара!» — тшӧлкайтӧны кывнаныс зонъяс. А пӧдругаяс бара-й вешкыртӧмаӧсь ныр-вомнысӧ: «Аминь тай, аддзысисны танцовщикъяс!» А ми шуркъям сӧмын. Краковяк, тустеп, фокстрот... Меным тшаква видзӧдысьясыд, мед сӧмын сьӧлӧм бурмытӧдз йӧктыны.

Друг гудӧкыс ланьтіс. Географичка, Павла Васильевна, кевмысьӧ гудӧкасьысьлы, эн нин пӧ ворс. Кӧжмаліс пӧ Ивансӧ Лизонька, да мортыс садьсӧ воштіс. Аски пӧ сылы служба вылас нин мунны, да гортас кӧть мед мамыслы петкӧдчылас. А ми менам йӧктысь ёртыдкӧд век сулалам джодж шӧрас, виччысям, кор бара няжмунас гудӧкыс. Но Павла Васильевна гырысь восьласӧн локтӧ ми дорӧ, йӧткалӧ менсьым ёртӧс ӧдзӧсланьыс: «Тырмас, Иван, тырмас! Мамыд, пӧди, виччысьӧ. Пет вай...»

Кавалерыд менам эз шай-паймун, но раммыштіс быттьӧкӧ. «Сёр ли мый нин? Мамӧлы висьталі: вой шӧр гӧгӧр локта», — петитчыштіс Иваныс Павла Васильевнаысь.

Но сійӧ кыскис нин Ивантӧ ӧдзӧсланьыс: «Вой шӧр бӧр нин, йӧюкӧ!»

Иван медбӧръяысь кутыштліс менсьым киӧс, копыртчыштліс гудӧкасьысьлы и стен бердӧ жмитчысь том йӧзлы дай мӧдіс Павла Васильевна бӧрся.

Ме серӧкті, мися, Золушка моз кавалерӧй тэрмасьӧмӧн эновтіс менӧ татчӧ ӧтнамӧс. «Мый нӧ, Лизук, любитчин ли мый Иван вылас? Век тай нӧ сылань дзорган-видзӧдан?» — мышсянь пельпом вылӧ шлапкис кисӧ ӧти тӧдса зон, Васька, кодкӧд корсюрӧ ми колльӧдчывлімӧ. Сідз, радейтчытӧг. Ме чӧв олі, а мустӧмыд эз эновтчы, мый вермис, бергӧдіс менӧ асланьыс да кайтіс: «Муніс нин, муніс! Кӧсъян кӧ, мекӧд йӧктыштам. Смотри, девонька, татшӧмъясыскӧд эн ылав». «Но, сэтчӧ нин сэсся и ылала! И йӧктыштны оз позь! — дӧзми ме да окота лои Васькатӧ вильшалыштны: «Коралас кӧ быттьӧ татшӧмыд — кыв шутӧг муна». «Виччысь, коралас... Гӧтыра нин! Санӧ Марпа тьӧткалӧн вед Иваныс тайӧ. Унаысь письмӧсӧ лыддьыны чукӧстлӧ менӧ Марпа тьӧт», — сералӧ Васька.

Ме шеновті киӧн, горӧді: «Тэ быдтор жӧ тӧдан! Сӧтанаыслысь кулан лунсӧ и то тӧдан». Дай уськӧдчи пышйыны клубсьыд.

Аскинас школаын географичка мыччӧ меным записка, сӧдзӧдӧмӧн шуыштӧ: «Увдор дӧрӧм-комбинашка кежсьыд петӧмыд клубад да, дерт, став зонмыс лясас тэ дорӧ...»

Скӧрми тай ме да кыдзи крапки: «Тэ дорӧ, коньӧранӧй дорӧ, бара-й некод оз ляс, кӧть шӧвк платтьӧась, кӧть пасьтӧгыд пӧрччысь!» Крапки дай нарошнӧ гораа понді лыддьыны запискатӧ. Но сэні вӧлі сӧмын испанскӧй песнялӧн ӧти куплет да кырымпас: «Старшӧй лейтенант. Санӧ Марпа пи — Иван». Географичкаӧс вильшалӧм могысь и сьылышті песнясӧ:

Ты скажи мне, солнце красное, где с тобою встретимся?

А надеждой сердце светится, светится, светится...

Окышті запискасӧ да сэсся комиӧдӧмӧн на выль пӧв горӧді:

Висьтав, менам югыд шондіӧй, кӧні тэкӧд аддзысьлам?

А сьӧлӧмӧй эскӧ: аддзысьлам, аддзысьлам, аддзысьлам!

Сьылышті дай юала: «Гӧгӧрвоин эн, рочӧн и комиӧн лыдди да? Мун, колӧкӧ, ставыслы сэсся и сукляв!»

Сійӧ уськӧдчис ӧдзӧсӧ, но нырсӧ, буракӧ, сюйлӧма на кытчӧ оз колыс. Грездын кутісны сёрнитны, Лиза пӧ Иван вӧсна мусукыслы «Шеть!» шуӧма. Гӧтыра Ивансяньыс корасьӧм ли мый ли пӧ виччысьӧ. Пӧрысь нылӧ кутіс пӧрны-а.

«И виччыся! И, коралас кӧ, чеччышта! И некодлысь ог юав! И мед сёрнитасны! И некодысь абу яндзим, комбинашка кежысь кӧ петалі!» — доли ачым аслым, дузъялі и ас вылӧ, и мустӧм Васька вылӧ, и географичка вылӧ, и став сёрнитысьяс вылас.

А сэсся регыд и Иваныд кыдзкӧ вуні, збыль чеччышті верӧс сайӧ да. Ас тӧдлытӧг и артмис быттьӧ петӧмыс. Мамӧ эськӧ и шуліс: эн пӧ корсь пӧвтӧ сьылан-йӧктанінысь. А ме гажӧдчигӧн и тӧдмаси жӧникӧйкӧд. Олимпиада вылӧ карӧ челядькӧд лэччылімӧ, роноса завыс, Борис Михайлович, менам медводдза «антипатияӧй», тшӧтш сэн вӧлі. Енмыс, тыдалӧ, шулӧма миянлы сыкӧд кадысь кадӧ йитчыштлыны. Не кӧ сійӧ, ми, гашкӧ, верӧскӧд некор эг и паныдасьлӧй. Олимпиада бӧрас вечер ресторанын вӧлі. Ми Борисыскӧд и пукалім орччӧн. Гӧститӧдӧ сійӧ менӧ да сералӧ, пола пӧ тэкӧд и орччӧныс пукавны, бара пӧ чужъявны кутан. Сійӧс, мися, век ли мый помнитан? А кыдзи нӧ пӧ ог помнит, век гарала да ачымӧс пиняла, мыйла да и, мися, сэки пасуйті? Гашкӧнӧсь, гӧтрасян кад кежлӧ эськӧ верми матӧджык сибӧдчывны-а. «А код тэныд мешайтӧ?» — шмонита ме. «Ӧти ныв, тэнад кодь жӧ кӧза-йӧгӧза. Сійӧ капканӧ сэсся веськалі дай...»

Сэки и локтіс миян пызан дорӧ ой-ёй лӧсьыд статя да збой видзӧдласа том морт. Чолӧмасис кисӧ чургӧдлӧмӧн кыкнаннымкӧд. Син видзӧдлассӧ сувтӧдліс ме вылӧ да нюммуніс. А Борис Михайлович и шуӧ: «Елизавета Макаровна, тӧдмась, тайӧ менам шурин. Саша, Александр Кузьмич. Между прочим, гӧтыртӧм на, бур жӧник да и перспективнӧй, так сказать, товарищ. Москваын высшей партийнӧй курсъяс помаліс. Локтіс да дзик пыр и отдел сетісны облсовпрофысь. Так что, Лизонька...» Менам ас тӧдлытӧг и артмис: но, мися, татшӧм перспективнӧйтӧ тай крукыштны колӧ!..

Елизавета Макаровна татчӧ серӧктіс, чӧвтліс небзьӧм синсӧ ми вылӧ, кывзысьяс вылӧ, а сэсся ышловзис:

— А сійӧ менӧ крукыштіс, али ме сійӧс, мед ачыс Кузьмичӧ висьталас. Со тай, локтӧны. Умӧмаӧсь жӧ картіасьнытӧ...

Мужичӧйяс мыччысисны теплица сайсяньыс, ыззьӧмаӧсь, шешвидзысь вомаӧсь. Водзас кӧзяиныс, аслас сивко-бурко бедь вылас ёна мыджсьӧмӧн. Бӧрсяньыс Женя внукыс да уска суседыс.

Ичӧтик Ленточ аддзис папсӧ да тювӧдіс налы паныд. Воысьяслань чепӧсйис и Ирина, ляскысис жӧник бердас, коді ылысянь на и норасис Лиза бабыслы:

— Лиза баб, а дедыд миян сэтшӧм плут вӧлӧма! Ворсігчӧжыс пыр муклюйтіс.

Дедыс эз чӧв ов, дорйысис, кыдзи кужис:

— Муклюйттӧгыс нӧ кутшӧм картіасьӧм!

— Талун праздник ради прӧститам!.. — сераліс Лиза бабыс. Дорйыштісны муклюйтӧмысь Кузьмичӧс и мукӧд нывбабаяс, и Женялы ковмис миритчыны дедыскӧд дай орччӧн на пуксьыны праздничнӧй пызан саяс. Пуксьӧм бӧрас внукыс заводитліс на шмонитны дедыскӧд, вай пӧ тӧдмаламӧ, кутшӧм выйӧн, английскӧйӧн, немецкӧйӧн ли бельгийскӧйӧн вӧчӧма бабук этайӧ салатсӧ, но дедыс аддзис петан туйсӧ:

— Пыдӧсӧдзыс сёям дай тӧдмалам. Менам кынӧм ёна нин сюмалӧ. Вайӧ, ёртъяс, дона юбиляршаӧс чолӧмавны сетам кодлыкӧ кыв. Позьӧ и меным...

Тайӧ здукас кыліс пывсян дорсяньыс понйыслӧн тявзӧмыс, сэсся и мыччысис ачыс Витька понйыс, еджыд тупыль моз гӧгыльтчӧ пызан дорланьӧ. Ставӧн серӧктісны, то пӧ коді медводз чолӧмалӧ кӧзяйкасӧ.

— Витька, донаӧй! — Лизавета Макаровна дась вӧлі чеччыны пызан сайсьыс да меліавны понсӧ. — Тэнӧ жӧ ме пывсян кӧджӧ игнавлі, мед, мися, он гартчы тані. А петӧмыд! Тшук нывторным лэдзис...

Зэв на и ладу артмис понйыдлӧн мыччысьӧмыс. Шутка да серам лыбис. А мый нӧшта колӧ праздник дырйиыд.

Пока быдӧн ассяньыс чолӧмалісны дона юбиляршатӧ, тост вӧзйисны да кылӧдыштісны уна лыда сёянсӧ, шондіыс мӧдіс нёрны. Ывлаыс ыркалыштны кутіс и. Ме ыстыси, ыштӧ зонкаӧс ӧтнассӧ коли дачаӧ морков керны, понді лӧсьӧдчыны мунны. Тӧді эськӧ: самӧй гажыс водзын на, дай Макаровна, выль пӧдругаӧй, ӧбидитчискодь. Но мӧдӧма кӧ, падъявныыд абу и лӧсьыд. Калиткаӧдыс петігӧн тай паныдасис нывбаба, юбиляршатӧ чолӧмавны жӧ, гашкӧ, локтӧ. Ме тэрмаси аслам дачалань.

Зонкаыд менам, Серёженька, морковтӧ нетшкӧма да сарайӧ пыртлӧма, ыджыд чукӧр артмӧма. Разӧдышт, мися, да вай ме тэнӧ, дитюкӧ, пӧсь чайӧн юктӧда, дай лэччам гортӧ. Аски сэсся волам керныыс.

Автобуслань мунігӧн нин кылі — юбилярша дачасянь юргӧ «Дон кузя гуляйтӧ» сьыланкыв: «Поверь, дорогая, лишь мне одному...» Гашкӧ, и войбыд на гажӧдчисны...

Аскинас асывсяньыс больнишнӧй городокӧ кайлі, дедӧ сэні куйлӧ, да сійӧс видлыны. Пока сэтчӧ да татчӧ. Дедӧкӧд пукалышті да, лун шӧр гӧгӧрын нин дачаад кайӧмыс лои. Морковсӧ керышта, мися, дай кӧсйыси юбилярша-пӧдругаыдлы ас кырымпаса книгатӧ, да сійӧс катӧда быть.

Морковнад ноксьытӧдз и мӧді Лизавета Макаровна ордӧ.

Пыри нин дзиръяӧдыс, а некод шы оз сет. Витькасӧ бара, буракӧ, игналӧмаӧсь, думышті. Но чукӧстчи жӧ. Вочакывсӧ кылі сарайсяньыс. Александр Кузьмичыс шыасис: «Танӧсь!»

Кузьмич седун моз пукаліс сарай джоджас да кыис кӧрзина веж бадь ньӧрйысь.

— Уджтӧгыд он жӧ ов! — ошкышті сійӧс чолӧмасьӧм пыдди.

— Киыд кӧ эм, вӧчанторйыд тай сюрӧ, — вочавидзис Кузьмич да, керкаланьыс индӧмӧн, содтіс: — Эз на петав талун пӧдругаыд. Ыззьӧма, «Шамбала» поэма гижӧ.

— Поэма? Но-о-о, зэв бур, — чуймышті ме. — Чайті ӧд, тӧрытъя ноксьӧмсьыс мудзӧма да шойччӧ.

— Шойччас сійӧ, пытшъяс кӧ пырӧмаӧсь! Мун керкаас, ме тайӧс помала да чай юны пырала жӧ.

Керканыс шоныд, пачыс ломтысьӧ, плита вылас кӧрт чайник чушӧдчӧ. Кӧзяйкаыс дӧрӧм мыг кежсьыс куйлӧ крӧватяс, вомас карандаш пом, ас гӧгӧрыс, вольпась вылас, кабала листъяс.

Менӧ аддзис Макаровна да чеччыштіс вольпась вывсьыс — ме пӧ вед талун и пасьтӧм на. Сывйыштчылім да окасим, да чай пондіс лӧсьӧдны кӧзяйкаыд пызан вылас. Ноксигмозыс и варовитіс:

— Веритан он, войбыд унмовсьны ог вермы, кывбур гижа. Эн серав, эг на выжывмы. Помнитан, во кык водзті вайлісны миянӧ Рерихыдлысь уджъяссӧ, гӧраяс тай серпасалӧма. «Гималаи» шусьӧны вӧлі. Сэтшӧма сэки найӧ менсьым лолӧс и вежӧрӧс вӧрзьӧдісны. Ӧні век казьтыла. Господи!.. Куш изъяс да лым и эм, а видзӧдӧмсьыс он пӧт. Мукӧд картинаяс вылас син оз сувтлы, рудӧсь быттьӧ, енъюгыдыс сэні оз тырмы. А музыкаыс, козьналісны тай тӧрыт кассетасӧ сусед гозъяыс, «Энигма»-ыс, бара на сійӧ гӧраяссӧ тӧд вылӧ уськӧдіс. Быттьӧ сійӧ гӧраяссяньыс и юргӧ. Дивӧ!.. Ме эсійӧ американскӧй боевикъяссӧ, лыйсьӧны да тышкасьӧны тай сӧмын, синмӧн ог аддзы. А музыкаыс пӧ американскӧй жӧ. Сэсся и юк кыдзкӧ искусствотӧ национальносьт сертиыд... Меным эськӧ, старукаыдлы, мый нин быттьӧ сэтчӧ нырӧс сюйны, а войбыд лов пытшкын пессьӧны мӧвпъяс. А асывнас карандаш да бумага лист босьті дай заводиті мырсьыны. Дедӧ юалӧ: «Мый нӧ гижан?» Мися, «Шамбала» поэма! Сійӧ сералыштіс ме вылын дай петіс кытчӧкӧ. А ме... Вай видзӧдлы. Мыйкӧ шу! Ёна вед песси. Кывъясыс, другӧ, некыдз эз сюрны.

Пӧдругаӧй менам бӧрйис гижалӧм кабала пӧвстсьыс ӧтиӧс, мыччис:

— Каракульяссӧ гӧгӧрвоан кӧ...

Ме босьті. Збыль, он шу мичаӧн почерксӧ, но абу жӧ дзик каракульяс, тӧдчӧ — зільӧма шыльыдджыка на гижны. Колӧкӧ, кымынысь и выль пӧлыс заводитліс-а. Со тай кымын гижӧда кабалаыс киас.

«Кастильскӧй ва кӧ ӧні эськӧ меным», — лыдди первой строчкасӧ да гӧгӧрвои: абу пӧрысь выжывлӧн йӧйталӧм, а збыль сьӧлӧм пессьӧмыс.

...Ог кӧш тыр кор, кӧть сӧмын ӧти войт,

Но борда чибӧ мыччысьліс и бердіс,

Эз коль, эз коль ни ӧти мойд.

А пельын сутки чӧж нин юргӧ

Ставпӧлӧс шемӧсмӧдан шы,

И синъяс водзӧ бара сувтӧ

Дзор гӧраяслӧн кынмӧм гы.

Сэн, гӧраясас...

Ме лыддя и ошка думысь тайӧ олӧма нывбабасӧ. Тӧд вылӧ пыр и усьӧны сылӧн тӧнлунъя кывъясыс: «Мортыд вед он тӧд, кор кулан-ловзян. Мырдӧн он вермы нюжӧдны нэмтӧ ни. А вот тыртны бур тӧдӧмлунъясӧн да кольны йӧзыслы бур казьтылӧм — верман...»

Лыддьӧм бӧрас дыр нинӧм шуны ог вермы. Ме ни кодкӧ мӧд абу сылы суддяяс. Мортыслӧн кывъясыс петӧмаӧсь пӧсь сьӧлӧм шӧрсьыс. Но сійӧ лӧньӧма, видзӧдӧ ме вылӧ, виччысьӧ кыв. Мыйкӧ быть колӧ шуны. И ме шуа:

— Помӧдзыс, буракӧ, ас пытшсьыд абу на ставсӧ койыштӧмыд. Ме чайта, кӧні гижӧма «Оз тэрмӧдлыны олӧм ӧдсӧ» да «Лӧньӧсь сэні пемыд войяс», позьӧ на паськӧдчыштны. А помыс мем зэв ёна кажитчис: «Оз прӧста шуны: ачыс Енмыс дзор гӧраясас тшӧкыд гӧсьт».

Лизавета Макаровна яндысьӧмпырысь нюмдыштӧ да «пасибӧ» шуӧ, сэсся кутыштлӧ менӧ, пуксьӧдӧ пызан саяс, мыччӧ чай чашка да вазочкаын ас пӧжас:

— Ю чайсӧ...

Макаровна быттьӧ вугыртлӧ, чӧв-лӧнь жыръяс пуксьылӧ...

— Ме и ачым тӧда: эз на артмы. Вед енма-муа костас олысь войтырыслысь мечтасӧ кӧсъя гижны! — сійӧ серӧктӧ да ас вылас тешитчӧмӧнмоз содтӧ: — Со вед мый вылӧ замахнитчи! Кувтӧдз нин мем тырмас мусӧлитны-гижны сэтшӧм ыджыдторсӧ. Наградасӧ пӧ тай сетӧны оз зіля заводитӧмысь, а помӧдзыс вайӧдӧмысь. Челядькӧд уджалігӧн век вӧлі тайӧс доля налы. Сідзкӧ, и аслым нин вир-яйӧдз пырис тайӧ дольӧмыс.

Ме чурска чай, бара пӧдругалы нинӧм сэтшӧмсӧ шуны ог сяммы, думайта сӧмын: ставныс кӧ, мися, челядь дорад уджалысьясыс та моз жӧ дольлісны, гашкӧ, и ӧні пӧрысьлунным миян мӧдджык эськӧ вӧлі, кыпыдджык серпаса. Но ӧд тайӧс он шу, дай веськыдасӧ ошкыны пола. Аддза: абу тайӧ нывбабаыс сэтшӧм пиысь, коді кыв песӧм-ошкӧмсӧ радейтӧ. Шуи жӧ тай тыртӧм чашкаӧс бокӧ вештыштанмоз:

— Пасибӧ. Печенньӧыд зэв чӧскыд! Да и ачыд... Макар Васька — сиктса зонлӧн чой тэ! Он ышнясь. Серамвыв ставсӧ лэптан дай.

Сылӧн ызбыльтӧмӧн петіс серамыс, ӧтпырйӧ синваыс петіс и. А сэсся, быттьӧ ёна нин дӧзмӧма воддза сёрнисьыс, кайтыштіс:

— Нинӧм абуас вед со лоті талун лунсӧ. Кӧсйи ветлыны эстчӧ вӧрас сёйла да. Лӧз сёй аддзи нюраинсьыс.

— Сёйла? Пачтӧ выльмӧдыштны кӧсъян? — юала ме.

— И сэтчӧ згӧдник лоӧ, вая кӧ, — вочавидзӧ Лизавета да ышловзьӧмӧн содтӧ. — Ёнджыкасӧ Сашаӧс лечитӧм вылӧ. Лӧз сёйсӧ тай шуӧны бурӧн. Ме вед сійӧс мыйӧн нин сӧмын эг лечит! Компрессъястӧ туруннад вӧча, массажтӧ кияс рудзалтӧдз! Пӧсь и кӧдзыд ванад киськала! Ӧні кокниджык нин сылы лои. А вӧлі ӧд... Не дай Бог некодлы!.. Ачым, гашкӧ, и мыжаыс, да ачым и лечита. Ме вед некодлы на эг висьтавлы, пилы весиг. А колӧ, буракӧ. Йӧзыс тай вичкоӧ ветлӧны пӧкаитчыны. Ме вед ачым кори Енмыслысь, мед коктӧммас. Мый кори — сійӧс и пӧлучиті. А колӧ на ещӧ юавны: сійӧ ли ме ёнджыка ӧні мучитчам?

Макаровналӧн чужӧмыс жугыль, синъясыс тупйысьӧны, ышлолалӧ пыдісянь-пыдісянь, а ме, мый шуны, бара ог тӧд.

— Ачыд эськӧ эн жӧ, пӧдикӧ, да? — шыася медбӧрын, медым мыйкӧ шуны да пансьӧм сёрнисӧ водзӧ нуӧдны.

— Ачым, ачым! — горӧдӧмкодь и артмис сылӧн да здук бӧрти тӧдчӧдыштіс: — Ёна кутіс ышмывлыны да... Йӧрсьыс петіс да. Вунӧдіс ставсӧ да... Дозла сӧмын ӧтторъя котӧртӧ... Ӧтчыд ме ёна скӧрми да и шуи: «Оз жӧ кӧ и кокыс талӧн косьмы!» Гашкӧ, и кывйӧй менам имитіс. Парализуйтіс тай-а. Ӧні важ ӧбидаяссӧ тӧд вылӧ уськӧдла, да мукӧддырйи шула, мися, зэв бур. Оз кӧть котӧрт виналаыс! Шыньгам-олам! Вӧлись чассьӧыд валитчис ме вылӧ! А збыль-ӧ сідз, сӧмын сьӧлӧм тӧдӧ, вирӧн ойдӧ. Видзӧдныыс быд лунсӧ меным каково? Вот и песся силкиын моз, бурдӧдча!

— Бобӧ-ӧ, Макаровна! Ыджыд сьӧлӧма мортӧ тэ, — эг вермы кутчысьны да жалитышті сійӧс.

— Мортыдлы тай быдсяма ногыс лоӧ овны, — менам жалитӧм вылӧ ымӧстыштіс сійӧ, но эз жӧ бӧрддзы. Зілис бӧр гажмӧдчыны да пондіс висьтавны, кыдзи найӧ Кузьмичыскӧд лӧсьыда да гажаа олісны томдырйиныс.

— ...Гӧтрасимӧ да, карса олысьнад лои да, тувчча весиг вӧлі йӧктігтырйи... Мамӧ сӧмын ӧтнас гортӧ коли, да жаль вӧлі. А сідзсӧ — гӧгӧр бур! Верӧскӧд ӧта-мӧдӧс радейтам... Уджӧй бара жӧ челядькӧд, пионер керкаӧ места дзик пыр аддзысис. Регыд и патера выль кирпич керкаысь сетісны. Кутшӧмкӧ да, вед чин верӧслӧн. Ме нимкодьысла сӧмын нин чиктыла.

Во дас-дас вит сідзи и олімӧ. Питор чужис, быдтам. Быд гожӧм шоныдінӧ курортӧ ветлам. Ме кӧ ог вермы накӧд мунны, ая-пиа ӧтнанныс мунӧны. Сідзсӧ тшӧкыда артмывліс. Менӧ пионерлагер котыртны ли мый ли индасны, ог вермы мунны. Первойсӧ быттьӧ сідзи и коліс, а сэсся куті гӧгӧрвоны: эз кажитчы верӧслы тайӧ. «Эновт тайӧ уджтӧ», — кутіс шуны Саша. «Кыдзи? Да ме ӧд тайӧ уджтӧгыс кула», — серала ме. «Мӧдӧс аддзам». «Саша, тайӧ абу сёрни». «Сідзкӧ — ме мӧдӧс аддза!» — сералӧ сійӧ. А ме бара на ассьым: «Пӧжалуйста!»

А уджыс сылӧн — ӧтторъя командировка. То ӧтиласянь локтӧ норасьӧм, то мӧдласянь. Кӧнкӧ уджалан законъяс торкалӧны, кӧнкӧ удждон дзугӧны. Колӧ ветлыны да места вылас разьны гӧрӧдсӧ.

Быд татшӧм ветлӧм бӧрын командировочнӧйыд менам частӧджык и частӧджык ылавны кутіс, овліс — локтас садьтӧм код да аскинас удж вылас явитчыныс оз вермы. Сылы звӧнитӧны, юасьӧны, а сійӧ меным тшӧктӧ вочавидзны: «Эз на лок» либӧ «Локтіс да висьмӧма». Йӧзасис сэсся коркӧ. Меным юр усьтӧдз яндзим. А сійӧ: «Ёна тай... Мӧд удж корся, спокойнӧйӧс, командировкатӧмӧс».

Но и мӧдлаас аддзысьлісны сылы сэтшӧм жӧ ёртъяс, кодъяскӧд позис кутитны да исковтны пыр увлань и увлань.

Сідз куимысь кымын уджсӧ вежліс. Сӧтана, йӧз дорад сибыд, да аддзӧ пыр выль и выль удж. А тӧлкыс сыысь, тшыкӧм мортсьыд. Пиӧй быдмис, позис гортын университетын велӧдчыны, да Ленинградӧ пышйис, яндзим пӧ батьысь. Ме нин нервничайтӧмысла помӧ куті воны, шуйга сой пондіс немӧймыны. Ковмис йӧктан-сьыланінсьыд меным мӧд удж вылӧ вуджны. Сёян-юан лӧсьӧдан кружокӧ, кулинарнӧй искусствоӧ челядьӧс велӧдны.

Бӧрти Сашалӧн чойыс нин, верӧсыс сылӧн и менам дона Борис Михайловичӧ, найӧ ӧд карӧ жӧ овнысӧ районсьыс вуджлісны, кутісны шуны, эновт пӧ сійӧс, дуракӧс, мед ӧтнас дурас да олас. Лок пӧ миянын олышты, челядь ас олӧмӧн овмӧдчисны, ас патераӧ вуджисны жӧ-а. Тӧрам пӧ куимӧныд.

Бурӧннад кӧ, тӧрам ог сӧмын куимӧн — дас куимлы абу дзескыд. А миянлы Сашакӧд кыкӧныслы дзескыд лои. Вот сэки ме и думышті ачымӧс изведитныд. Мися, пиӧй абу нин ичӧт, оз прӧпадит, да и гӧгӧрвоас менӧ да прӧститас. А татшӧм олӧмыд мем оз кол.

Сэки тай дачаыс тайӧ вӧлі нин-а. Юи кызь кымын кизь узьтӧдан лекарствотӧ дай пукси автобусӧ, дачаӧ кайи. Мед, мися, сэні унмовся дай кынма. А вӧлі Выль во водзын. Кӧдзыдыс шутьляліс.

Автобуссьыд петӧм бӧрын соби жӧ лымсӧ, пока дача дорӧдзным визги. Пӧсь киссьӧ, а соба. Локті коркӧ; томаныс кынмӧма, ключыс некыдз эз бергӧдчы. Вийси-вийси, сэсся и сьӧвзи: абу ӧмӧй, мися, ӧткодь, кӧні унмовсьнысӧ да кынмынысӧ. Кильчӧ помас лым пиас нюжгыся дай. А, бобӧанӧй, он на тай! Дона на юрыд вӧлӧма! Кыдзи чилӧсті! Кокъясӧй асьныс бӧр петкӧдісны туй вылас. Эг и унмовсь. Войбыд подӧн шлёпикті гортӧ сэсся.

Абу шуӧма кувны, сідзкӧ, — колӧ овны. Но кыдзи? Бара тадзи, быд лун полӧмӧн, шогсьӧмӧн, яндысьӧмӧн? Ог, муна! Меным, ӧтка юрыдлы, сюрас жӧ кыськӧ юр сюянін. Борис Михайлович гозъя дорӧ, гашкӧ? Но мый вежсяс? Тӧдсаяс кутасны индыны чуньнас да висьтавны: «Сашатӧ аддзылім, усьӧма...»

Чойӧ Ухтаын олӧ нылыскӧд, верӧсыс кувлі нин. И мамӧ сы дорын жӧ бӧръя вояссӧ оліс, сэні куліс и. Сэтчӧ кӧ ме тшӧтш муна?

Куим лунӧн пенсия оформиті, прӧщайтчи ёртъяскӧд дай тӧвзи чой дорӧ. Ӧдйӧджык, ылӧджык татысь!..

А муртса тӧлысь и олі сэні. Воис телеграмма Борис Михайлович гозъясянь: «Лок ӧдйӧджык. Саша кулӧ». «Меным сійӧ кулі нин. Ог мун!» — шуа аслым. А чоюкӧ: «Ветлы. Кӧсъян кӧ, ме тшӧтш тэкӧд ветла...»

Локтім. Саша больничаын. Коньӧр кодь. А менам сьӧлӧм потӧ, синва киссьӧ: «Мыйла нӧ ме, да и ӧкаяннӧй, тэнӧ эновті?! Да мый нӧ тэкӧд лоӧма, мусукӧ? Да ог коль ме тэнӧ татчӧ больничаас. Кулан кӧ, мед гортын. Ловъя колян — бурдӧдны кута, чередитны...» И со, кымын во нин... Лӧз сёйнас нӧшта пробуйтла... — пӧдругаӧй ланьтӧ, сӧмын ышловзьылӧ. Ме тшӧтш чӧв ола.

Сылӧн небзьӧм, чукырӧсь чужӧмыс пач дорсянь лювгысь шоныдсьыс ли лов пессьӧмсьыс банйыштӧма, льӧбйыс век быттьӧ мыйкӧ висьтавны кӧсйӧ, вӧрӧшитчӧ.

Тӧрыт гӧстяяс водзын сёрнитігас кӧ пӧдругаӧй вӧлі то сьылыштӧ, то серӧктӧ, то кияснас вачкучкысяс, талун висьтасигчӧжыс чужӧмыс эз вежсьыв, да и гӧлӧснас эз сідзи ворсӧдчы. Вывті нин мисьтӧмсӧ да сьӧкыдсӧ казьтылігӧн тай нюкыртчӧ сьӧлӧмыд и лолыд, кӧть кодлӧн.

Ме тайӧс зэв бура гӧгӧрвои, но кыдзи да мыйӧн такӧдыштны, эг тӧд. Друг тӧд вылӧ уси, кыдзи асывнас больнишнӧй городокад кайигӧн паныдасьліс кутшӧмкӧ том морт. Висьтасис, ме пӧ Петербургысь студент. Россияса быд регионӧ пӧ ми ветлам да чукӧртам вочакыв со татшӧм юалӧм вылӧ: «Ӧнія Мирыс кутас оз водзӧ овны?» Ме сэки быдӧн повзи да весиг петитчышті том морт дорсьыд. Ме бара-й, мися, ог тӧд и ог куж шуны вочакывсӧ. А сійӧ: ме пӧ тэнӧ ог и тэрмӧдлы вочакывнад. Но думыштлы пӧ, да окота кӧ лоӧ, гиж миянлы Санкт-Петербургӧ со татшӧм адрес кузя... И мыччӧ меным неыджыд буклет сямаӧс, кытчӧ мыйкӧ гижӧма зэв посни шрифтӧн да мичаа серпасалӧма. Посни гижӧдтӧ, дерт, ӧчкитӧгыд лыддьытӧм лои, а серпасыс кажитчис. Том мужичӧй кутӧ моздорас зарни шепта нянь кольта, а бокынджык зонпосни ворсӧны.

Тайӧс и понді Макаровналы висьтавны. Сійӧ ӧд выльтортӧ тӧдмавны аминь горш. Дзик пыр тай и вежсис сылӧн чужӧмыс, но эз на шыась. Ас кежас мыйкӧ думайтӧм бӧрын вӧлись кайтыштіс:

— Оз кус олӧмыд некор. Кутас водзӧ кыссьыны...

— Ме сідз жӧ чайта, — шуа. Мортыс ловзьыштліс, да менам лов быдӧн личалыштіс. — Ӧнтай эг куж шунысӧ, а ӧні шуа: тэнад кодь зіль да шань сьӧлӧма ӧти нывбаба кӧ кольӧ свет вылас, и то оз кус!

Горакодь лои шуӧмыс, театрын моз, да Лизавета Макаровна зэв гылыда серӧктіс:

— Менӧ тешитӧм ради вед тадзсӧ шняпкин-шуин! Да мед! А ӧд збыль сідзи. Нывбаба пельпом вылын сулалӧ муыс!..

Кильчӧ помас кыліс гольснитӧм шы, тшук верӧсыс чайтӧ юны пырӧ. Ме мунны мӧдӧдчытӧдз сумкаысь кыски ассьым книгаӧс, мыччи Макаровналы. Мися, тӧрыт кӧсйыси да вайи со.

Кымыныськӧ и шуис жӧ пасибӧтӧ пӧдругаӧй да малаліс книга коркасӧ. А чужӧмыс бара гажтӧммис, небыдика нюркнитіс:

— Со вед, локылін да кутшӧма гажӧдін. Пӧкаитчӧма тэныд лои и. Эн дивит... Сэсся, кӧдздӧдас да, огӧ кутӧй аддзысьлыны. Тэ он кут татчӧ волыны, а ми карса патераад вуджам сӧмын коркӧ октябр помас. А, гашкӧ, и седьмой ноябрӧдзыс тан олам...

— Локтанныд, да сэки и пондам ӧта-мӧд дорӧ гӧститны ветлыны, — кӧсйыси ме.

А куш ӧтчыд и лои ветлӧмыс на ордӧ. Ӧтчыд жӧ пырыштліс и сійӧ. Кыкнан аддзысьлігас ёна варовитіс, юасис-висьтасис: «Ме вед некытчӧ карад ог вевъяв петавныыс, да радио пыр сӧмын и кывза выльторъястӧ. Книга дорӧ пышйывла-дзебсьывла тай олӧм тӧждъяссьыс. Водзті театрӧ ветлі-а. Тэ нӧ театрас ветлывлан он?» Ветла, мися, коми спектак вылӧ, Темноева зэв лӧсьыда ворсіс... Газет-журналла петыштла Печать керкаӧ. Куратовскӧй музейӧ «Ордпу» котыр чукӧртчылӧ, мися, да сэтчӧ ӧтикысь ветлі и...

— Майбыр! Тэнад ки-кокыд абу на менам моз кӧрталӧма да... — бурпырысь завидьтіс сійӧ. — А ме книга дорӧджык и инасьла. Виктория Токаревалысь висьтъяссӧ лыдди, зэв кокниа да лӧсьыда гижӧ аньыс. Сэсся научнӧйсӧ — Биоэнергетика да Биоритмология — Сашакӧд муштруйтам! Женя, бабӧй шуысьыд, быд лӧсьыдсӧ вайӧ. Сійӧджык миянӧс и видлывлӧ. Моньным ӧтчыд воліс да уфкайтіс, дук пӧ тіян керкаысь петӧ. А кыдзи нӧ дуктӧгыс, быд лун кӧлдуйтам да, Сашалы здоровйӧ век перъям да. Оз сійӧс гӧгӧрво моньыс, эськӧ и абу нин том да. Ладнӧ, муна, коркӧ бара на аддзысьлам. Волывлы...

Волывлы пӧ. А ме эг и вермыв сэсся ветлынысӧ. Седьмой ноябр бӧрас путёвка дедӧлы Сереговӧ сетісны, да кыкнанным мунім. А локтім сэсь, да петі улич вылас гуляйтыштны. Гажӧй бырӧма карсьыс... Кар шӧрас и мӧдӧдчи. Видзӧда да, паныд локтӧ... Господи, синлы ог эскы! Александр Кузьмич. Бедь вылӧ жӧ эськӧ мыджсьӧ, но лючки восьласӧн моз нин...

Уськӧдчи паныд, радла!

— Алекса-а-андр Кузьми-и-ич! Тэ-э? Ас кокнад! Кытчӧ нӧ мӧдін? Ӧтнад тай нӧ? Лизавета Макаровнаыд нӧ?..

Сійӧ лэптыштлӧ кисӧ чужӧм бердас, кепысьнас чышкыштӧ синсӧ, нурбыльтӧ:

— Пи дорӧ мӧді. А Лизукыд... Абу сэсся, колис менӧ...

— Мыйла колис? — юала, ог гӧгӧрво да, а юрын визнитӧ йӧй мӧвп: «Гашкӧ, коркӧя моз пышйис бара да?»

— А код тӧдас мыйла. Кулі дай... — бара чышкыштӧ синсӧ Кузьмич.

«Куліс?» — шатовмуні тайӧ юӧрсьыс. Пельясын жыннян шы, ӧтиас и мӧдас бовгӧ: тинь-тон-тон, тинь-тон-тон! Гашкӧ, анделъясыс звӧнитӧны? Син водзын тай гажа нюмнас Лизавета Макаровналӧн чужӧмыс-а. Шуӧ быттьӧ: «Эн эскы. Ме эг кув!» А кӧнкӧ вежӧрын сылӧн кывъясыс: «Мортыд он тӧд, кор ловзян-кулан. Нэмтӧ нюжӧдны он вермы ни...»

Бӧръя кадас Макаровна кыдз вермис пессис, чӧжис и кӧвтіс тӧдӧмлунъяс сӧмын ӧти могӧн — кок йылас сувтӧдны верӧссӧ. И со Сашаыс сылӧн ас кокнас визгӧ магазинлань... Извинит пӧ, ме пырала, доз босьтла...

Господи, эн судит менӧ дивитӧмсьыс! Сет югыд вежӧр тайӧ мортыслы! А гӧтырыслы — югыдін да шоныдін!

* * *

Рытнас звӧнитлісны Борис Михайлович гозъя. Ми пӧ Шешуковъяс, кывлінныд, гашкӧ. Тіянлысь пӧ телефонтӧ висигас нин сетліс Елизавета Макаровна, да юӧртам...

Телефон пырыд нӧ кутшӧм сёрни. Ме котӧрті на ордӧ. Ӧдзӧссӧ восьтіс сьӧкыд вӧраса, тшӧгӧм ань. Людмила Кузьминична пӧ, висьтасис, Александр Кузьмичлӧн чойыс лоа. Мыгӧр сертиыс кӧ, сылы ар сизимдас гӧгӧр жӧ нин, но чередитӧ, тыдалӧ, аньыд асьсӧ, чужӧмыс шыльыд. Верӧсыс креслӧын телевизор водзас пукалӧ, газет кутӧ киас. Здоровайтчим да мый да, менӧ пуксьӧдісны диван вылас. А мыйкӧ шуны-висьтасьны кӧзяйкаыс эз и сетлы прамӧя ни меным, ни верӧсыслы...

— Абу сэсся миян Елизавета Макаровнаным. Гриппӧн висьмис дай кыдзья ӧдйӧ и куліс, — кузя ышловзис сійӧ. Чӧв олыштіс, бара ышловзис да вӧлись сёрнисӧ водзӧ нуӧдіс: — Сашаӧс, дона вокӧс, ӧтнасӧс колис. Коньӧрӧ Сашаӧ... Нарошнӧ быттьӧ... Муртса бурдны кутіс да... Сійӧ эськӧ, Лизаыд, некор Сашаӧс эз любитлы да. Любитліс кӧ, мортыс эз юсьы...

Верӧсыс, Борис Михайлович, газетсӧ кисьыс шура-шаракылӧмӧн лэдзис пидзӧс вылас, паныдаліс:

— Людочка, грек сідзтӧ шуны невестка йывсьыд. Макаровнаыс нэмсӧ вокыдкӧд вийсис да. Выль пӧв кок йылас сувтӧдіс и...

— Но радейтныс эз радейтлы, — гӧлӧссӧ кыпӧдыштліс весиг Людочкаыс, эз кӧсйы кыв ньылыд сетчыны верӧсыслы. — Радейтліс кӧ вед, кулігас эськӧ помвыв эз гарав кутшӧмкӧ Иванӧс... Песнясӧ пӧ сылысь комиӧді да пыр сьылі. Эн ӧмӧй аслад пельӧн кывлы сьылӧмсӧ. Висьтав пӧ, югыд шондіӧй, кӧн тэкӧд аддзысьлам... Кулігас гаралӧ!..

Верӧсыс дӧзмыштіс, шлапнитіс кинас:

— Но сійӧ жӧ кулан выйын вӧлі нин, Людочка! Важсӧ казьтыштіс... Мало ли кодкӧд томдырйиыд он радейтчыв. Вай, дорогая, та йылысь ӧні ог кутӧй. Гӧстя дырйиыс абу и лӧсьыд!

Людочкаыс лыбзис на, но верӧсыс лӧньӧдыштіс гӧтырсӧ да лабутнӧя шыасис ме дорӧ:

— Кулі дона мортным, мый сэсся керан? Некод абу кык нэма. А дзебим-идралім бура. Зэв сибыд вӧлі Макаровна йӧз дорас, да пӧдругаясыс прӧщайтчыныс зэв унаӧн волісны. Сьылӧдны вичкоӧ нулісны. Нелямын лун кежлас бара сёрнитчим чукӧртчывны. Колӧкӧ и, гу вылас на ветлам, оз кӧ ёна кӧдзыд ло.

Верӧс сёрни костас гӧтырыс сюйсис, быттьӧ сылысь юалісны:

— Нелямын луныс двадцать второеӧ лоӧ, сэки, кӧсъянныд кӧ, звӧнитлӧй...

«Кӧсъянныд кӧ». Ме гӧгӧрвои: эг ас кадӧ лок. Колӧ мунны. Мый колӧсӧ тай тӧдмалі-а. Петігӧн нин шуи:

— Вола, вола. Сэки быть вола! А ӧні извенитӧй, грекӧвӧйті да.

Воськовті ӧдзӧсланьыс. Борис Михайлович кӧсйис пасьтасьны, ме пӧ тэнӧ колльӧдышта, рытнас нывбабаыдлы ветлыны ӧпаснӧ. Но ме зэв пӧся ӧткажитчыны куті, да кольччис жӧ тай. А колі, буракӧ, нуӧдлыны...