АЛЬБИНА ВЕТЛІС КУРОРТӦ
Куртысьяслӧн кузь лунтыр ӧти и сійӧ жӧ сёрни вӧлі — Альбина йылысь.
— А, бабӧньяс, кыланныд, Санько Петыр Альбинаыд пӧ ӧд воӧма нин!
— Воӧма, воӧма. Тӧрыт, асъя автобуснас. Висьталӧны, кок под йылӧдзыс юбкаа пӧ. Попаддя быттьӧ.
— Юбкаыд тӧ сійӧ мый! Ванечкаыслӧн пӧ ӧд рынышыс сотчӧ. Чеччӧма пӧ Альбинаыс автобуссьыс да пыр и кутчысьӧмӧн мӧдӧдчӧмаӧсь кутшӧмкӧ тӧдтӧм сьӧд зонкӧд.
— Абу тӧдтӧм... Рафик. Стройотрядысь. Туй вӧчанінын тай уджалӧны ташкентса студентъясыд, сэтысь. Чемодансӧ нуны Рафикыс отсаліс. Ме аддзылі...
— Но, тэ пӧдругатӧ доръян жӧ! Отсаліс-ӧ сэсся. «Хи-хи» да «ха-ха» пӧ тай мунӧмаӧсь гортӧдзыс-а.
— Чӧлӧ, весьшӧрӧсӧ вензянныд. Тӧлысь кежлӧ ветліс да эз на жӧ Ванюксӧ вунӧд. Весьшӧрӧ Альбин йывсьыс сідз сёрнитанныд, шань сьӧлӧма нылыс. Ме тай аддзылі, асывнас водз кайис дворас-а. Ньӧти абу кузь юбкаа ни.
Тадз сёрнитісны-больӧдчисны бабаяс, быд лытор пожъялісны курортничаыдлысь да сійӧ «жӧниклысь».
Ачыс Альбина тайӧ каднас вӧлі дворын, пӧсь петтӧдзыс идраліс скӧт картасӧ. Лунвыв шонді водзад сьӧдасьтӧдз гожъялӧм сойясыс сылӧн сӧмын нин и лэбалісны, быд пельӧсӧ сибавлісны. Пелькӧдчис да броткис-пинясис.
— Лешак жӧ эськӧ йӧз вылад надейтчӧмыд да! «Мун, мун, сетӧны кӧ путёвкасӧ, видзӧдлы бур йӧзсӧ. Аддзам тэ пыдди морттӧ...», — нерыштіс Аля думсьыс управляющӧйсӧ. — И ме сэтшӧм жӧ, муна-кысъя кытчӧкӧ курортӧ...
Пиняліс асьсӧ Аля, дивитіс шойччан керкаясті ветлӧмысь, но мӧд думӧн эз жӧ ёна каитчы. Зільны пӧ кута, да бӧр пӧрадок лоӧ. Эг кӧ пӧ ветлы, кытысь ловъя моресӧ да гӧраяссӧ аддзылі? Сиктысь петавтӧгыд ӧд лёк жӧ лоӧ, нинӧм он кут тӧдны. Альбина сӧмын кыкысь на и асланыс Сыктывкарӧдз ветліс. Сэсся некытчӧ на эз.
Первойысьсӧ экскурсияӧн карас нулісны, кор кӧкъямысӧд классын на велӧдчис. А мӧдысьсӧ университетӧ велӧдчыны пыраліс. Мамыс висьмис да, ковмис эновтны. Мамыс пыдди совхозас мӧсъясӧс лысьтыны пырис. Позис, дерт, бӧр на карад велӧдчыныс мунны. Но велаліс тайтӧяс дорас да, жаль лои найӧс кольны. Со и уджалӧ фермаын. Передӧвӧй лыддьыссьӧ. Бура уджалӧмсьыс и путёвкасӧ сетлісны шойччан керкаас.
Первойсӧ Аля полыштіс курортад. Рытнас петас клубӧ, оз лысьт йӧктыны ни нинӧм. А сэсся ӧтчыд баянистыс сэтшӧм лӧсьыда пондіс няръявны мыйкӧ «Шондібанӧй» кодьӧс. Алялӧн сідзи и гилявны кутісны кок пыдӧсъясыс. Эз вермы терпитныс да петіс джодж шӧрас, пӧттӧдзыс йӧктіс. Ёна и ставӧн «бис» горзісны. Та бӧрын варов да йӧз дорад сибалысь нылыд эз кут ӧтдортчыны некутшӧм гажӧдчан рытъясысь. Культмассовикыс, пельк да мича вӧраса мужичӧй, Аляӧс аддзӧм бӧрын пырысь-пыр и сы дорӧ шыасьліс:
— Но, плясунья, кыдзи талун йӧзсӧ гажӧдны кутам?
Альбиналы вӧлі любӧ, мый тайӧ мича мужичӧйыс сідз прӧста сыкӧд сёрнитӧ да ещӧ сӧветуйтчӧ на. Ме пӧ, со, выль ворсӧм сюйи тарытъя программаӧ. Кыдз пӧ тэ чайтан, кажитчас оз йӧзыслы? Оз эськӧ, гашкӧ, сылы ков Алялӧн сӧветыд да. Ачыс сійӧ кужӧ и тӧдӧ, кыдзи йӧзсӧ гажӧдны. Шойччысьяс сійӧс ёна радейтісны. Миян Гвасалияӧн и шулісны.
Гвасалия — культмассовиклӧн овыс. Абхазец пӧ. Но сійӧ сёрни серти он и шу, мый абу роч. Альбина сёрнинас оз жӧ зептад пырав, тёльгӧ шор моз. Рочнад бура кужӧ и. Мыйла эськӧ татшӧм нывсӧ и не кыскыны йӧз гажӧдан удж вылас? Нинӧм лёкыс тані абу. Аля тайӧс тӧдіс да став сьӧлӧмсяньыс сибӧдчис: татчӧ пӧ ӧд шойччыны да гажӧдчыны и воим.
Алялы унаысь нин дум вылас воліс мӧвп, вот пӧ эськӧ Гвасалия кодьӧс миян сиктса клубӧ. Кыдзкӧ ӧти сёрниын и висьталіс сылы Аля ассьыс мӧвпсӧ.
— Тіян клубӧ? — серӧктыштіс мӧдыс. — Кӧні нӧ, эськӧ, сійӧ тіяныс?
— Комиысь ме, Коми республикаысь. А сиктӧй миян шусьӧ Гажаягӧн. Коркӧ зэв мича да гажа яг сы местаын вӧвлӧма. А пожӧма ягыс ті тӧданныд кутшӧм? Сылысь мичлунсӧ нинӧмӧн ӧткодявныс он вермы! Весиг тіян Кавказкӧд.
— Коми... Коми... А-а, тӧда! Войвылын! Вӧркута, да?
— Да, да! — Алялы любӧ лои, мый тӧдӧны сылысь Коми мусӧ, да пондіс лыддьӧдлыны и мукӧд коми каръяссӧ: — Ухта, Инта, Печора...
— Тіян сэні полярнӧй лун да вой, и кар кузяыд еджыд ошъяс ветлӧны.
— Мый ті? — шлопкис кинас Аля, ӧбиднӧ лоис татшӧм шуасьӧмъяссьыд, дӧзмӧмӧн дӧжныштіс: — Кӧсъянныд кӧ тӧдны, еджыд ошсӧ ме аддзылі дзик ӧтчыд, кор вӧлі Ростовскӧй зоопарк миян карын. Кӧръяс миян эмӧсь, ыджыд стадаӧн тундраті ветлӧны, мӧсъяс фермаын видзам, а еджыд ошъяс... Сьӧд ошкыс нин, гашкӧ, эз коль миян пармаӧ да. Водзті эськӧ уна вӧлӧма.
— Но, тэ, Алечка, сэсся и ме вылӧ скӧрмин. Извинит. Стӧча кӧ сёрнитны, ме нинӧм ог тӧд тіян Коми му йылысь. Вӧркутасӧ тай кывлі-а.
Аля серӧктіс, миритчӧмӧнджык нин шуис:
— Тіянлы колӧ яндысьны «ог тӧдтӧ» шуны. Татчӧ локтӧны шойччыны миян страналӧн быд пельӧсысь. И Комисьыс, дерт, абу ме первой. Позис ӧд и водзджык нин кодъяскӧдкӧ сёрнитлыны.
— Ах, со тэ кутшӧм, коми ныв! Тэкӧд и сёрнитла, тэнсьыд и юасьла...
Аля казяліс, мый и мукӧдлы лои сійӧ интереснӧй мортӧн. Олӧмаджыкъяс меліа «нылукӧн» шулісны да частӧ юасьлісны чужан сикт да ай-мам йывсьыс. Шмонитны радейтысьяс бара шыасьлісны шпыннялігтыр: но пӧ, визув нывка, эн на сюркняв миян шойччан керкаысь став зонсӧ?
Аляӧс и збыль дӧзмӧдны пондіс зонъяслӧн сы дорын гартчӧмыс. Шойччан керкаад эськӧ и зонмыс абу уна, но орччӧн эм спортивнӧй лагерь, кытысь быд рыт том йӧзыс шӧтӧны клуб тырыс. Йӧктынытӧ ӧта-мӧд вежмӧныс Аляӧс корӧны. Аля танцуйтліс быд пӧрйӧ разнӧйкӧд. Но кор мӧдӧдчыліс гортас, ас комнатаас, сы гӧгӧр гартчылісны куим-нёль зон. Быдӧн кӧсйис колльӧдны сійӧс. Мукӧд нывъясыс завидьтісны ли, мый ли, прысь серӧктывлісны. Торъя ёна юмбыралісны вомнысӧ да легнитлісны пельпомнаныс лёзь юрсиа кык ныв, ков кодь бледӧсь да вӧсниӧсь, джинсы гачаӧсь. Вот нин сэки, тайӧ мустӧм нывъясыслы лёк вылӧ, Альбина кватитліс кыкнан кинас кык зонмӧс да мӧдӧдчыліс гажаа сералігтыр. Зонъяс раднысла лӧньӧмаӧсь, гусьӧникӧн малалӧны Алялысь сойсӧ, килутшсӧ да восьлалӧны нывкӧд орччӧн. Но регыд налӧн радлуныс помасьӧ. Аля локтӧ асланыс корпус кильчӧ дорӧ да гораа шыасьӧ:
— Аддзысьлытӧдз, зонъяс! Аттьӧ колльӧдӧмсьыд. — И тюрк пырӧ ӧдзӧсас.
Ас жыръяс Аляӧс виччысьӧны нин. Тётя Тося да Тома.
—
Олӧны найӧ ӧти жырйын нёльӧн: Аля ачыс, сылӧн Тома пӧдругаыс, ар кызь сизима ныв, Антонина Павловна, либӧ тётя Тося, да Лидия.
Первойсӧ найӧ кино да ворсӧмъяс бӧрын волывлісны ас жыръяс ӧтлаын. Пырасны, вежсьыштасны да сэсся дыр на больгасны-сёрнитасны мыйсюрӧ. Но сэсся татшӧм пӧрадокыс налӧн дзугсис. Сы вӧсна, мый найӧ ставныс разнӧй арлыдаӧсь да разнӧй этшаӧсь. Кӧсъян кӧть он — быть сідз артмӧ. Вот, шуам, Тома. Пӧрысьмысь ныв, мисьтӧм чужӧма, оз радейт ёна ветлынытӧ. Кино бӧрын сразу пырӧ жыръяс да босьтӧ книга. Лидия — том нывбаба, лӧсьыдик, мичаник, быттьӧ сӧмын на душ улысь петӧма, ставнас сӧстӧм, югыд. Рытнас сійӧ пыравліс век медбӧрын. Шудаа нюмъялігтыр порог дорсянь и вашнитас:
— Бара колльӧдіс.
Лидия висьтасис, мый верӧсыскӧд торйӧдчӧмаӧсь. Юис пӧ да, пышйи. Кык челядьӧс быдтӧ. Чеччиг и водіг том мам гаравліс ассьыс челядьсӧ: «Кыдзи нӧ ті, дитюкъяс, сэні метӧг оланныд? Меным тані райын кодь лӧсьыд-а. Чой ордӧ эськӧ коли, оз ӧбӧдит».
Шойччан керкаӧ локтігӧн на Лидия тӧдмасьӧма ӧти мужичӧйкӧд, коді, вӧлӧм, локтӧ татчӧ жӧ. Олӧма нин, зэв интеллигентнӧй морт. Быд асыв зэв вежавидзӧмӧн чолӧмасьӧ Лидиякӧд и сійӧ пӧдругаяскӧд. «Бур асыв!» шуас да копыртыштлас дзормыны заводитӧм юрсӧ.
«Кутшӧм интереснӧй», — думайтӧ сы йылысь Альбина да мыйлакӧ радлӧ Лидия вӧсна. Лидия эз некодысь дзеб тайӧ дядьыскӧд ветлӧм-гуляйтӧмсӧ.
— Коді нӧ кӧть сійӧ тэнад кавалерыд? Гӧтыртӧм, гашкӧ? Тэнӧ верӧс сайӧ босьтас? — юавліс тётя Тося.
Мӧдыс вочавидзліс:
— Ой, Антонина Павловна, мыйла нӧ тадзсӧ сёрнитан? Верӧс сайӧ мунны ӧд мортсӧ оз курортысь корсьны! — Сэсся ышловзьыштліс да содтыліс: — Гашкӧ, чайтанныд: локті ме татчӧ верӧс корсьны? Пальӧдчыштны, нервъясӧс личӧдыштны колӧ. Верӧсӧй юис, тышкасис, полі век: челядьӧс немӧ вӧчас. Эн думайтӧй, мый мортыскӧд лёкысь ветлам. Прӧстӧ мем сыкӧд интереснӧ. Коллегаяс ӧд пӧшти. Сійӧ хирург, ме хирургическӧй сестра.
— Ой, йӧй, йӧй! — дзӧрӧдыштас кудриа юрнас тётя Тося. — Томлуннад он кужӧй пӧльзуйтчыны! Ме томдырйиыд!..
Водзӧ оз висьтав тётя Тося, мый сійӧ томдырйиыс, но ошйысьӧмӧн горӧдӧм сертиыс позис гӧгӧрвоны: томдырйиыд пӧ ме чеччӧдлывлі том йӧзтӧ да мужичӧйястӧ.
Тётя Тося и ӧні на ёна томмӧдчӧ. Зеркалӧ водзысь оз вешйыв. То синкымъяссӧ краситӧ, то вом дорсӧ, то чужӧмас массаж вӧчӧ, то льӧбзьӧм сьыліас. Сы дорысь пыр ӧвтӧ дуки да сигарет дукӧн. Тётя Тося куритчӧ частӧ да вӧчӧ тайӧс вывті тшапа. И пасьтасьӧ тшапа. Опереттаса артистка быттьӧ, яръюгыд паськӧма, морӧсас — сикӧтш либӧ ыджыд брошка. Ме пӧ некор ог вунӧдлы, мый нывбаба ме. Меным пӧ ещӧ окота на кодлыкӧ кажитчыны, кутшӧмкӧ старичоклы. И китш серӧктас куритчӧмсьыс чирӧм гӧлӧснас.
— А верма висьтавны тіянлы: эг радейтлы ассьым верӧсӧс. Эз вӧв сійӧ меным пара. Ме со, аддзанныд, кутшӧм бой-баба, а сійӧ — ичӧтик, ӧчкиа... Но профессор-математик, тайӧс оз ков вунӧдны...
Тётя Тося йылысь Алялӧн вӧлі кык пӧлӧс дум. Ӧти боксянь сійӧ быттьӧкӧ дивитыштіс пӧрысь нывбабаӧс, но пӧ и профессорша-юла. Мӧдар боксянь профессорша кыскӧмӧн кыскис ас дінас мыйӧнкӧ. Колӧкӧ сійӧн, мый уна тӧдіс, кыдзи позьӧ лоны мичаӧн да радейтанаӧн. Та кузя кокниа сетавліс уна сӧвет. Торъя нин блед чужӧма, мисьтӧм Томалы.
— Томочка, тэ сямман пасьтасьнытӧ, но тэ он кӧсйы гӧгӧрвоны коланлунсӧ ӧткымын детальлысь. Шуам, сикӧтш али
— Мыйла краситчынысӧ? — воча шыасьліс Тома.
— Да мед верӧс сайӧ босьтасны, кыдз тэ он гӧгӧрво! — шензьӧмысла лапкерӧ кинас аслыс бокас да вежӧ сёрнисӧ Аля вылӧ:
— Вот Аля — мӧд делӧ! Сы бӧрся и кавалеръяс стройӧн вӧтлысьӧны. Сӧмын Алялы колӧ карын овны, мед стружитыштны сылысь деревенскӧйсӧ. Аля, кылан? Авторитетнӧя сӧветуйта...
Тётя Тосялӧн татшӧм бызгӧмыс ёнакодь дӧзмӧдіс Альбинаӧс: но пӧ тэ и авторитет! Ставныс кӧ ыджыд карын кутасны овны, коді кутас няньсӧ быдтыны да йӧвсӧ лысьтыны?
Аля, дерт, горӧныс тайӧс эз шу, но сюсь синма тётя Тося пыр и гӧгӧрвоис нывлысь чушмунӧмсӧ. Мудера ворсыштіс синъяснас, шуис:
— А-а, тэнад ӧд любовыд сэні, сиктас! Босьт тшӧтш сьӧрсьыд и сійӧс, ассьыд Ивантӧ!
Татчӧ нин Аля эз вермы скӧравнысӧ, серӧктіс гажаа:
— Кыдзи нӧ сійӧс сьӧрсьыд босьтан, абу ӧд ловъя мортыд чемодан либӧ приёмник?
— Радейтӧ кӧ, ачыс вӧтчас, аддзӧмыд шогсянтор, — серӧктіс жӧ тётя Тосяыс.
«Тешкодь тайӧ нывбабаыс, кокни руа, а дӧзмыны сы вылӧ он вермы. Радейтӧ кӧ пӧ. Радейтӧ, дерт. Тэ, гашкӧ, сэтшӧм радейтӧмсӧ эн и аддзыв! Радейтӧ менӧ Иван, вежӧгтӧмӧн радейтӧ! Йӧюкыд, гижӧма письмӧ, локтан пӧ да, нӧйта, кутшӧмкӧ мӧд зонкӧд кӧ сэні гуляйтны кутан».
Аля пырысь-пыр жӧ тайӧ письмӧ вылас вочакыв гижис, шмонитанаӧс. «Ак тэ, частнӧй собственник, эг на гӧтрасьӧй, а тэ ме вылын кӧзяйничайтан нин! Вот мый, мусукӧй, пока менӧ эн на пуксьӧд дом йылӧ кычиӧс моз, ме тані тэтӧг гуляйтышта нин! Зонъяс тані уна, и ме налы, быттьӧкӧ, кажитча...»
Шмонитӧмпырысь гижис, да Иваныс, тыдалӧ, абу сійӧс бура гӧгӧрвоӧма, ӧбӧдитчӧма, ещӧ на вежӧгтанаджык письмӧ ыстӧма.
— Ой, Алька, Алька, кутшӧмкӧ Отелло тэнад Иваныд, — сералӧны пӧдругаясыс Альбина вылын. — Петкӧдлы кӧть фотосӧ, мича абу, видзӧдлам.
— Радейтӧ — сійӧн и вежӧгтӧ, — нюмъяліг сетӧ пӧдругаясыслы воча кыв Альбина да перйӧ тумбочкасьыс неыджыд фотоальбом, мыччӧ тётя Тосялы.
— Со тай, медводдза лист бокас сӧмын ачым, сэсся ставыс сійӧ, Иванушка менам. Видзӧдӧй, колӧкӧ, а ме Отеллолы кута сочиняйтны зэв мелі письмӧ.
— Нӧрӧвитлы гижнытӧ, — альбомсӧ восьтӧм бӧрын шыасьӧ тётя Тося. — Тайӧ нӧ тэ сцена вылын ли мый?
— Сэні ме буретш Есенинӧс лыддя. Эг и тӧдлы, кыдзи менӧ Иван точнитӧма. Кольӧм ар сылы совхозыс премия — фотоаппарат — сетіс, вот сьӧрсьыс быдлаӧ и новлӧдлӧ. Ті Иванӧс кӧсйинныд видзӧдны, сійӧс и видзӧдӧй, мый менӧ... Энӧ мешайтӧй гижнысӧ.
— Тэ нывкаыс фотогеничнӧй, — чмокнитыштіс вом дорнас тётя Тося, бергӧдіс альбом листсӧ да дзик пыр жӧ горӧдіс: — О-о! Тэнад вом доръясыд, Алечка, абу йӧйӧсь! Авторитетнӧя шуа: симпатичнӧй Отеллоыд!
— Ме нӧ сосся ли мый? — серӧктіс Альбина. — Дерт жӧ, симпатичнӧй! Торъя нин со этайӧ фотокарточка вылас! — Альбина водзӧ листыштіс альбомсӧ да ещӧ гажаа серӧктіс. Тані Иваныс и збыль серам петкӧдмӧн тешкодя снимайтчӧма. Орччӧн тракторыс, ачыс — няйт чужӧма да разьӧм кизьяса — пукалӧ муас. Но медся тешкодьыс — сылӧн видзӧдласыс: букыштчӧма ӧбӧдитчӧм кага моз.
— Тайӧ менам шедевр. Ачым ме тайӧс снимайті! — ошйысьыштіс Альбина, чмок окыштіс Ивансӧ фото вывсьыс.
А письмӧас гижис: «...Сё зӧлӧта тэ менам, сьӧлӧм косьтысь! Ёна жӧ нин гажӧй бырис тэысь! Регыд локта. Билетсӧ самолёт вылӧ ньӧби июль сизимӧд лун кежлӧ. Мӧд луннас асъя автобусӧн воа. Встречайт...»
Гижис, а ачыс думайтіс, кыдз эськӧ мусуксӧ велӧдыштны нинӧм абусӧ думайтӧмысь.
А нинӧм ёнасӧ думайтны эз и ковмы...
Гортас локтігӧн райцентрын автобусӧ пуксигӧн кӧвъясис Альбина дорӧ кутшӧмкӧ сьӧд зон.
— Ті,
Альбина скӧр видзӧдласӧн козьныштіс зонтӧ:
— Ті асьныд энӧ вошӧй, а ме вӧсна нинӧм тӧждысьны.
Та бӧрын сьӧд зонмыд эз нин ныв дорысь эновтчыв.
Сыкӧд орччӧн меститчис да туй чӧжыс мыйсюрӧ дугдывтӧг варовитіс.
— А,
— Коді нӧ эськӧ ті татшӧм варов честнӧй комсомолецыс, ме тай Гажаягысь эг на аддзыв-а? — серӧктіс Альбина.
— Ме? — жеркнитіс еджыд пиньяссӧ зонмыд. — Да ми жӧ тіянлы туй вӧчам. Студенческӧй стройотряд. Кӧсъянныд, асфальтируйтам сикттӧ ставнас. И ферма гӧгӧртӧ асфальтӧн тупкам, медым ті верминныд сэтчӧ ветлыны самӧй моднӧй туплинад. Кутшӧм юӧръяс ещӧ тіянлы колӧны? Да, ме эг висьтась, Рафик Султанбеков, Ташкентысь студент, ӧні отрядса комиссар. Волі комсомол райкомӧ отрядса делӧясӧн.
Здук кежлӧ ланьтыштлӧм бӧрын комиссарыд бара пондіс варовитны. Туй чӧжыс висьтасис Ташкент йылысь, кутшӧм сэні шоныд да гажа, мыйта сэн фруктыыд быдмӧ. Альбина кывзіс, шпынняліс, гмыкайтіс, но сёрниӧ эз сюйсьыв.
Сиктӧ воигӧн автобус ӧшинь пырыс аддзис Ивансӧ. Тӧвзьӧ трактор вылас автобусыскӧд пӧшти орччӧн, оз кӧсйы, буракӧ, автобуссьыс кольччыны. Веж турун тыра прицепыс сідзи и чеччаліс быд гуран-гӧптын. «Менӧ встречайтны тэрмасьӧ», — гӧгӧрвоис Альбина да сьӧлӧм вылас лоис торъя долыд. Но тойлӧны тай мутиясыд, кор оз ков. Автобуссьыс петігӧн друг шуис сьӧд зонмыслы:
— Ті верманныд меным отсыштны чемодан нуны горт дорӧдз? Сьӧкыд...
— Дерт жӧ! Радпырысь! — вочавидзӧ зонмыд да кӧсйӧ нин босьтны ныв киысь чемодансӧ. Но Альбина сетӧ чемодансӧ сӧмын автобусысь петӧм бӧрын, нарошнӧ манитыштіс, мед Иваныс аддзылас сетӧмсӧ. Ок, Альбина, нывбаба мудеритӧмыд тай эм жӧ.
А Иваныс, Иваныс! Дзик йӧй! Аддзис Альбинатӧ да бӧбмис. Синтӧ ёрысь кутшӧмкӧ кузь юбкаа, да содтӧд ещӧ юбкаыс потӧм бӧждора. И сэні жӧ кутшӧмкӧ зон! Сулалӧ Иван, вомсӧ паськӧдӧмӧн, дзоргӧ, места вывсьыс вӧрзьыны оз сяммы.
«Страдайтышт», — дэльӧдчӧмӧнмоз думыштіс Альбина. Чайтіс, воас жӧ ас садяс да мырддяс студентыдлысь чемодансӧ, сэсся Аляӧс ас бердас топӧдас, вашкас: «Воин медбӧрын...»
А нинӧм сідзисӧ эз и ло. Бӧбвидзис, бӧбвидзис Иваныс дай уськӧдчис трактор вылас, гӧнитіс кытчӧкӧ. Шуӧны, лунтыр пӧ сэсся абу и волӧма силос гу дорас, совхоз кантораын дзайгӧма-вӧзйысьӧма, мед пӧ велӧдчыны кытчӧкӧ мӧдӧдасны. Рытнас тай клубӧ кыськӧ усис жӧ. Аля буретш сійӧ Рафикыскӧд и сувтіс йӧктынысӧ. Пырис Иваныс, недыр сулаліс порог дорас, сэсся матыстчис йӧктысь пара дорад, кӧть ачыс, тӧдчӧ, тіралӧ скӧрысла, небыдика шуис:
— Лэдзи эськӧ, другӧ, ныр-вомсьыд пув ватӧ, да ог нин киӧс лякӧсьт. Ӧти-кӧ, гӧсьт тэ миян, а мӧд-кӧ, этайӧ чикыля бӧжыс оз сулав, медым сы вӧсна тышкасьны.
Ой-ой, Аля скӧрмис татчӧ Иваныс вылӧ, но мӧдыс шуис сӧмын, тэкӧд пӧ торъя сёрни лоӧ, и тэрыба петіс клубсьыс. Кор Аля кутіс локны гортас, аддзис асланыс кильчӧ вылысь Ивансӧ. Пукалӧ, куритчӧ.
— Тэнӧ виччыся, — чигаркасӧ ылӧ шыбитігмоз, шыасис Иваныс.
— Ок, менӧ! Вунӧдлі нин, тэ ӧд мекӧд кӧсйин сёрнитыштны! — серӧктіс Аля. — Вай сёрнитышт.
— Ёна миянлы сёрнитныс нинӧм, — нурбыльтіс Иваныс. — Сӧмын кӧсйи юӧртны: гӧтрася.
— Ой, код вылӧ нӧ, абу кӧ секрет?
— Мыйла секрет? Устя вылӧ...
— Ой-я дай ой-я! Эн серамӧс петкӧдлы! Сійӧ жӧ комын арӧса нин дай пӧла кока!
— Мед пӧла кӧ! Вурас тэ кодь жӧ кузь юбка, дай оз кут тыдавны!
Бӧръя кывъяссӧ Иваныс горӧдіс зэв лёкысь да петкӧдліс, кутшӧм юбка вурас, улӧдз копыртчыліс, медым кок чуньяссӧ судзӧдны.
Тайӧс горӧдӧм бӧрын сійӧ лайкаліс да лӧньджыка нин содтіс:
— Вот и став миян сёрни. Прӧщевайтлы. — И муніс, эз и бергӧдчыв.
Альбина сулаліс вашвидзан вома, видзӧдіс зонлӧн еджыд дӧрӧм мышкас, горӧдіс: — Свадьба вылад кӧть эн вунӧд менӧ чукӧстны, жӧник!
«Мыйла Иваныс кузь юбка вылас татшӧма скӧрмӧма? Коньӧрӧй, юбкаӧй, ньӧби ме тэнӧ шуткаӧн-сорӧн, сы мында сьӧм шыбиті, а вӧчи сӧмын аслым лёк. Иванӧс дӧзмӧді», — думыштіс Аля.
Ӧшаліс юбкаыс Сочиын магазинас медся тыдаланаинас. Мича яр гӧрд рӧм вылын — гырысь дзоридзьяс. Юбка ставнас ӧшкамӧшкаасис, сёйис синъяссӧ нывбабаяслысь.
— Ой, импортнӧй! Ме татшӧмсӧ Ленинградын ӧти дама вылысь аддзылі нин. Потӧм бӧждорыс кутшӧма мичмӧдӧ фасонсӧ! И мый та дыра мамочкаӧй сьӧмсӧ оз ысты...
Тайӧ маитчисны-сёрнитісны прилавок дорас Аляяс шойччан керкаысь кык пӧдруга-моднича, Альбиналӧн свӧячкаясыс. Тшапитчӧмысла найӧ кыкнанныс эз некодкӧд сёрнитлыны, шушӧдчисны сӧмын ас костаныс да серавлісны йӧз вылас. А Альбинаӧс вежӧгтылісны Гвасалия, культмассовик дорӧ. «И мый аддзӧма Гвасалияыс этайӧ порсь видзысьыслысь?»
И, со, найӧ буретш ӧтлаӧ веськалісны магазин прилавок дорад. Аля Томакӧд сэк кыкӧнӧсь вӧліны. Аля вашнитіс пӧдругаыслы:
— Вай ньӧбамӧ!
— Тэд кажитчӧ? — шензьыштіс Тома.
— Эсійӧясӧс, джинсӧвӧйяссӧ, дӧзмӧдыштам. Мед тӧдӧны, мый сиктса порсь видзысьясыс оз виччысьны мамсяньыс сьӧмсӧ.
И ньӧбисны. Аля нарошнӧ моднӧй медальон на ньӧбис дай.
Рытнас комнатаса пӧдругаясыс ышӧдны кутісны Аляӧс: вӧччыв пӧ, Алечка, петалам, парскам эсійӧ модничаяссӧ! Тётя Тося лӧсьӧдіс Алялы юрсисӧ, Тома да Лидия бӧрйисны юбка дорад лӧсялана ковта. И со нёльнанныс найӧ, тшапӧсь, вӧччӧмаӧсь, восьлалӧны нин аллея кузя. Шойччысьяс буретш ставныс петӧмаӧсь нин жыръяссьыс, чукӧртчӧмаӧсь столӧвӧй дорӧ. И эсійӧяс сэнӧсь жӧ, гусьӧник хикнитлӧны-серӧктӧны. Аддзисны Аляӧс пӧдругаясыскӧд, тшӧкмуніны. Аля эз жӧ падмы дай. Друг сылы окота лои ёнджыка вильшалыштны тайӧ тшапунькаяссӧ. Горӧн, мед кывласны тайӧ нывъясыс, Аля шыасис тётя Тося дорӧ:
— Но, дона Антонина Павловна, и ті, Тома да Лида, ужнайтӧй тарыт метӧг. Эновта тіянӧс. Гвасалия важӧн нин нуӧдчӧ ресторанӧ. Ветлам, «Магнолияын» пукалыштам.
Некутшӧм ресторанӧ эськӧ эз и мунны. Ставсӧ тайӧс Аля думыштіс сідз. И отсаліс моднӧй юбкаыд. А ӧні... Йӧйтавлан тай. Курортысь гортас мунігӧн пасьталіс тайӧ юбкасӧ, курортсянь пӧ ӧд, мед моднӧй кӧ. А артмис, со, мый. Ивансӧ наперво дӧзмӧдіс. Тадзтӧ кӧ, и дзикӧдз на вермасны кӧдзавны, кыкнанныс найӧ Иваныскӧд гордӧйӧсь. «Ок, йӧй ме...»
Войбыд Альбина унмовсьныс эз вермы, думъясыс эз сетны унмовсьныс. Пиняліс асьсӧ и Ивансӧ. Сідз унмовсьлытӧг и чеччис да муніс дворас. Сэн кӧть пӧ тайтӧяс дорын вунӧдчывны мустӧм думъяссьыс. Сэн некор мустӧм думъястӧ песны. Колӧ лысьтысьны, йӧв сдайтны, а сэні — картаыд куйӧдӧн тыр. Дерт жӧ, автопоилка да кормораздатчик, куйӧд йӧткалан конвейер йылысь и казьтывны нинӧм.
Спира Наста тай, Альбиналӧн лысьтысьысь пӧдругаыс, паськыд вомнас Альбина картаӧ пыр и воліс-а. Быттьӧ Альбина ставсьыс мыжа.
— Но, — шуӧ, — депутаткаыд воис да чайті, талун огӧ нин пондӧй куйӧдтӧ тачкаӧн кыскавны. А сійӧ ачыс, видзӧдлӧй, кекӧньяснас жӧ куйӧдсӧ сӧвтӧ! Матере, тайӧ скӧт дорад ноксьӧмыд и быдӧн! Андри Марья колян во карӧ пышйис да ӧні локтӧма шӧлк платтьӧа да лак туплиа. Ми коркӧ удитлам ог лак туплисӧ кӧмавны? «Лысьты, лысьты! План тырт!» — сӧмын и дольӧны, а сэсся нинӧм оз кӧсйыны тӧдны. Тэ кылан менӧ, депутатка? Али курортсьыд пельтӧм нин локтін?
Альбина дзикӧдз дӧзмыліс кыдзкӧ торъя мисьтӧма «депутатка» кыв шуӧмсьыс, брунгис-шыбитіс куйӧд тыра виласӧ да кӧсйис нин шуны-крапнитны чорыд вочакыв. Да ас кадӧ кватитчис: прав Настаыс. Кодлы нӧ норасяс, орччӧн депутат да?
Веськӧдыштіс коссӧ, сӧмын и шуис:
— Ок, Настасья! Марьялы завидьтан? Тэ, передӧвӧй доярка? Сылӧн киподтуйыс эз тырмы тані овнысӧ да, дерт, пышйис. Карас пальто сеталанінын пӧ тай уджалӧ. «Тётя Маш, дай пальто! Дай пальто! — Счас, счас, пиук, сета, сета!» — тайӧ ли мый тэд кажитчӧ? А лакированнӧй туплитӧ ми ещӧ тэкӧд новлыштам на! Райкомӧ пыралі воигӧн, да висьталісны: асфальтируйтны миян сиктысь туйсӧ кӧсйӧны. Колӧкӧ, и ферма гӧгӧр асфальт лоас. А тэ...
— Мун сэтысь! — ӧвтыштіс кинас Наста. — Куим во нин кӧсйӧны! Вай эн грекӧвӧйт! Муна, уджыс уна...
Муртса удитіс Наста петны, Альбина уськӧдчис карта ӧдзӧс дорас: быттьӧкӧ трактор шы кыліс. Абу-ӧ Иваныслӧн?
Вунӧдчыны кӧсйис нылыд мӧсъяс дорас мусук йывсьыс мӧвпъясысь, а, вӧлӧмкӧ, мый кӧть оз вӧч, сы йылысь сӧмын и думайтӧ. Кымынысь нин и уськӧдчыліс ӧдзӧс дорас, кылас трактор шы да. Тайӧ, тшук нин, Иваныс силос траншея дорӧ веж кӧрым додь вайис. Но быд пӧрйӧ ӧшыбитчыліс. Абу Иваныс! И кӧн сійӧ талун? Мукӧдыс мӧдысь нин вайисны силосуйтчанінӧ веж масса, а Иваныс абу! Колӧкӧ, бара талун эз пет удж вылас? Гашкӧ, юысь мужикъяс дорӧ нин ылаліс? А колӧкӧ, и збыль нин гӧтрасьӧ? Вермас ӧд сійӧ лёк вылас...
Быдторсӧ нин думайтӧма. Сьӧлӧмыс пондіс йӧктыны нин Альбиналӧн. А кадыс кольӧ. Став уджсӧ нин картасьыс эштӧдӧма, колӧ гортас здук кежлӧ кӧть ветлыны, нуръясьыштны. Чукӧртіс Альбина няйт халатъяссӧ да кӧсынкаяссӧ, гортӧ пӧ босьтла, пуӧдӧмӧн песлала, мӧдӧдчис ӧдзӧсланьыс. И аддзис Ивансӧ. Гӧнитӧ тракторнас. Силос траншея дорӧ эз сувт, мӧс карталань веськӧдчис.
Полошуйтчис Альбина, карта ӧдзӧс саяс дзебсис. А Иваныс, со нин, дзик Аля карта ӧдзӧс дорӧ воис, веж кӧрым тыра прицепсӧ лӧсьӧдіс ӧдзӧс весьтас дай сувтіс. Чеччыштіс кабинасьыс. Алялы нинӧмла сэсся вӧлі дзебсясьнысӧ, паныд петіс:
—
— Нинӧмысь пасибӧыс... Эг тэныд вай — тайтӧясыдлы. Мед найӧ и пасибӧсӧ шуасны, — кӧдзыдакодь шыасис Иваныс.
— Тайтӧясыд шуасны, вердан кӧ найӧс да чередитан, — вочавидзис Альбина. Сылы забеднӧкодь лоис Иванлӧн кӧдзыд кывъяссьыс.
— Ог тӧд, шуасны оз... Колян тӧлысь тай лысьтӧмны... Мун гӧрд пельӧссьыд видзӧдлы сводкасӧ. Йӧз серам...
— Тэтӧг тӧда, — скӧра шуис Альбина и друг тшӧкмуніс: гӧгӧрвоис, мый тӧждысьӧ Иваныс сы вӧсна, сійӧ мӧсъяс вӧсна. Альбина ставнас тырис радлунӧн, Иван дорас мелілунӧн. Уськӧдчыны эськӧ да окавны, но проклятӧй характерыс сылӧн. Сӧмын и вермис гордӧя дзӧрӧдыштны юрнас да воча шуны: — Мыйта кӧсйысьлі, сымда и лысьта! И ичӧт тэд сэтчӧ делӧыс! Вот!
— Мем ичӧт делӧыс? А ыджыд кӧ? Босьта кӧ да корасьысьясӧс тэ дорӧ ыста! Талун жӧ кӧ... Ичӧт делӧыс лоӧ?
Альбина серӧктіс:
— Корасьысьясӧс? Ме дорӧ? Тэ эн ӧмӧй Устяӧс кӧсйы вайны?
Иваныс скӧрысь орӧдіс:
— Серав, серав! Шуӧма — ыста! Тырмас тэныд шырӧн-каньӧн мекӧд ворсны! Мун ӧдйӧджык вай вилатӧ, ректыны колӧ! Некор мем тан тэкӧд...
«Корасьысьясӧс ыста...»
Альбина лов пытшкын ӧзйис кутшӧмкӧ би, пуӧмӧн пуис висьтавны позьтӧм вын, коді ышӧдіс то сьывны, то оллявны-бӧрдны, то кытчӧкӧ котӧртны, мыйкӧ вӧчны.
Кутшӧм гортӧ мунӧм, кутшӧм ӧбедайтӧм, кор сылӧн фермаас и збыль пӧдны вермасны и скӧтыс, и асьныс. Чукӧстас Наста пӧдругасӧ да мунасны управляющӧйсӧ корсьны, а, колӧкӧ, и совхозса директор дорӧдз на воласны.
Сӧмын рытнас, лысьтысьӧм бӧрын, Альбина воис гортас. «Корасьысьясӧс ыста...». Ӧдйӧ Альбина лэбыштіс-кайис кильчӧ поссӧ, тӧв ныр моз пырис керкаас, ӧзтіс став лампочкасӧ. Мед ӧзйӧны! Та бӧрын сійӧ ышловзис да пуксис пызан дорас лабичас. Киясыс и кокъясыс дзик пыр рудзмунісны. Мудзӧма. Кутшӧм ӧд лун вӧлі!
Альбиналысь думъяссӧ торкис мамыслӧн пырӧмыс.
— Альбина! Ывлаыс югыд да, мыйла нӧ став бисӧ тадз ӧзтін? — ӧдзӧсӧд пыригкості шыасис мамыс.
— Мед ломалӧны. Кӧні батьыд?
— Сарайын кӧ ноксьӧ куран-косаӧн-а.
Тайӧ здукас и воссис ӧдзӧсыс, да пырисны кык нывбаба. Иваныслӧн бабыс да мамыс. Бабыс зэв збоя пыр и веськӧдчис пызан дорас да варова шыасис: — Пызан кӧ вӧрзяс — и невеста небзяс! — И трак кыскыштіс пызансӧ местасьыс.
Мамыс Иванлӧн, мича чышъяна, вӧччӧма, сулаліс порог дорас да, нинӧм шыавтӧг, нюмвидзис.
— Корасьны локтім, — пызансӧ места вывсьыс вештӧм бӧрын юӧртіс бабыд. — Ульӧн сёйны кутіс жӧникыс, ветлӧй пӧ и ставыс. Воим, со. Моньӧ, тэ мый сэтчӧ порог дорас сувтін? Абу ӧд корысь корасьысьяс! Лок татчӧ.
Бабыд лӧсьыдика тапнитыштіс кокнас да перйис кыськӧ сарапан паськыд складкаяс пӧвстсьыс «шампанскӧй» да клоп пуктіс пызан шӧрас. Та бӧрын и мамыс Иванлӧн матыстчис пызан дорад да тшӧтш чышъян увсьыс перйис «экстра» доз, лабутнӧя пуксис лабичас.
— Вот ӧні позяс и сёрнитыштны, — бара варова шыасис бабӧ-корасьысьыд, весиг вачкыштіс ки на ки. Сэсся вашнитіс пеляс Альбиналы, коді пукаліс век места вылас да шензис ас кежас: «Тадзи и корасьӧны?»
Бабӧ вашнитӧмысь Альбина быттьӧкӧ паляліс, лыйыштіс вежӧс саяс да пондіс гардеробсьыс корсьны-бӧрйыны вӧччансӧ. «Иван пӧ кильчӧ помын менӧ виччысьӧ! Колӧ мичаджыка пасьтасьны».
Иваныс эз вӧв ӧтнас. Кильчӧ лабич вылын пукалісны-тшынасисны Альбиналӧн да Иваныслӧн батьясыс. Улын, потшӧс дорын, сулалісны куим зон, костюмаӧсь, галстукаӧсь, ӧтилӧн киас баян.
— Бур рыт, — шыасис Альбина кильчӧ вылӧ петӧм бӧрын.
— Бур рыт, бур рыт, — вочавидзис батьыс да чигарка помсӧ кокнас тальччӧм бӧрын чеччис лабичсьыс, шыасис йӧз дорас:
— Но мый, локтінныд кӧ, пырӧй керкаас. Милости просим.
Гӧсьтъяс вӧрзисны, Аля бокті прӧйдитісны посводзас. Иваныс жӧ кыскыштіс нылӧс ас дінас, вашкис: — Мед пырасны. Пукалыштам... Алюк...
Альбиналӧн дурмыштіс юрыс, чайтіс: вот-вот усяс, оз кӧ ӧні жӧ кутчысь мусукыс дорӧ да ляскы юрсӧ сылы морӧс вылас.
«Гашкӧ, тайӧ и эм эсійӧ нывбаба шудыс, код йылысь висьталӧ вӧлі тётя Тося?» — думыштіс Альбина да сылы мыйлакӧ друг окота лои бӧрдны. Бӧрдны лӧнь, шуда синваӧн.
