СТАЛИН ЙЫЛЫСЬ СЬЫЛАНКЫВ

Миян дона батьным Сталин йылысь
Паськыд бордйӧн лэбзьӧ сьыланкыв.
Кылӧ сійӧ ылі сэзь войвылысь,
Юргӧ сэн, кӧн муыс во чӧж сыв.

Кылӧ сэсь, кӧн асъя шонді чужӧ,
Рытыввылӧдз вуджӧ паськыд му.
Сё кыв вылын сьывны йӧзыс кужӧ
Сьыланкыв, — кыдз тувсов ытва ю.

Сталин йылысь, вермӧм йылысь кылӧ
Сьылӧм сэсянь, кӧні — вира кось,
Кӧні збой йӧз мунӧ вӧрӧг вылӧ,
Кӧні тувччӧм — зумыд, уклад — ёсь.

Сталин йылысь, бур удж йылысь кылӧ
Сьылӧм сэн, кӧн мортлӧн сьӧлӧм яр,
Кӧні йӧзыс ыджыд стройка вылын
Выльдӧ олӧм, выльдӧ сикт и кар.

Йӧзлӧн шойччанінын, гажа лунӧ
Кӧні киссьӧ кокниа кыввор,
Долыд сьыланкыв кӧн кылӧ уна, —
Сталин йылысь медъён сьылан гор.

Миян сьылӧм лэбзьӧ ас му сайӧ,
Ылі йӧзлы нуӧ юӧр бур.
Коді кылӧ кыпыд сьылӧм тайӧ,
Ломзьӧ сылӧн сьӧлӧм, кыптӧ юр.

Дзордзав, чужан муным, кывсьы ылын.
Ёнмы уджлӧн, сьыланкывлӧн борд,
Нэм чӧж кустӧг сӧдз лӧз енэж вылын
Дзирдав, миян кодзув — Сталин ёрт!