ПЕТАВ, МУСА НЫЛӦЙ

Петав, муса нылӧй, кильчӧ дорӧ,
Петав, петав, петав, зарни ныв.
Кылан, сьӧлӧм менам тэнӧ корӧ,
Кыдзи корӧ менам сьыланкыв.

Петав, дона, петав, зарни шонді,
Петав, менам эзысь кодзув ёр,
Сьӧд синлыс пыр видзӧдлӧмӧн шонты.
Кылан, сьӧлӧм менам тэтӧг нор.

Тувсов рыт мем пемыд арся войысь,
Абу орччӧн ме дінын кӧ тэ.
Мезды менсьым морӧс сьӧлӧм дойысь, —
Петав, важӧн виччыся тан ме.

Лэбзьӧ менам сьылӧм, лэбзьӧ ылӧ,
Кывзӧ сійӧс паськыд йӧрын сю.
Сьылӧм менсьым пуксьысь шонді кылӧ,
Кылӧ джуджыд лӧньӧм Эжва ю.

Сӧмын тэ тай ӧтнад он кыв менӧ,
Сӧмын ӧтнад он кыв, мича ныв.
Тэнсьыд сьӧлӧм тшаплун тэнад венӧ,
Сьыланкылысь кӧдзыд йи оз сыв.

Эн кӧ шыась ме дінӧ, тшап сьӧлӧм,
Мӧдысь некор ог кут сьывны тан.
Нывлӧн сьӧлӧм абу йи кодь вӧлӧм, —
Воссис кильчӧ, ломзис чужӧмбан.