КОЛХОЗ МУ ДОРЫН

Дортӧм,
Помтӧм
Паськыд муяс!..
Синнад сывйыштны он судз;
Кыдз тай тувсов
Эжва туас, — 
Йитіс
Посни
Торъя муяс
Ӧтвыв уджлӧн
Ӧтвыв мудз!
Веж гы
Шепъяс вылын ветлӧ.
Ворсӧ,
Розйӧ воан сю.
Асъя шонді
Гажа петӧ,
Быдман сюлы
Вынйӧр сетӧ.
Вынмы,
Вынмы, колхоз му!
Водзын уджъяс
Эм на тырыс,
Сӧмын
Эм тшӧтш миян вын,
Шонді
Колхозӧ тшӧтш пырис;
Тыра сюӧс
Комбайн шырас,
Бырӧ
Сиктын рыныш тшын.