НЕВЕСТА

Шоныд тувсов рытӧ правлениеса членъяс пукалісны колхознӧй контораын. Вӧлі сёр нин, кодсюрӧ гусьӧникӧн очсалісны, видзӧдлывлісны ӧдзӧс вылӧ: кад пӧ нин помавны сёрнияссӧ, абу на медбӧръя заседание.

— Энлӧй, ёртъяс! — кыпӧдчис места вывсьыс председатель. — Колӧ решитны ещӧ ӧти вопрос. Фермаӧ доярка колӧ.

Бригадир Вася Белов пукаліс председателькӧд орччӧн. Сійӧ мый йылысь кӧ думайтіс да гусьӧникӧн лапйӧдліс синъяснас Тонялы, счётоводлы. Тонялы вӧлі некор: сійӧ гижис протокол да быттьӧ эз и казяв Васялысь читкырасьӧмсӧ.

Председатель друг бергӧдчис Васялань:

— Белов, мый тэ сэн бергалан? Бурджык эськӧ вӧлі, думайтін кӧ, кодӧс мӧдӧдны фермаӧ.

Вася веськӧдчис, кучкис сапӧг гӧленяс аслас бригадирскӧй сумка волыснас, дӧзмӧмпырысь шуис:

— Быттьӧ ме ӧтнам тані бригадирыс. Мыйла мукӧдъяс оз ыстыны ассьыныс йӧзсӧ?

— Тэ, тыдалӧ, вунӧдін, кӧні пукалан. Тані тэныд абу войпук. Коді эм тэнад бригадаын шогманаджыкыс?

Белов думайтыштіс да шуис:

— Позьӧ мӧдӧдны Балашоваӧс!

— Балашовъясыд миян сиктын дас кык семья. Кодӧс на пӧвстысь?

— Но, эсійӧс, Аннаӧс... Аннушка Балашоваӧс!

Шуис — и аслыс жар лои, пельясыс гӧрдӧдісны. Кажитчис, быттьӧ контораын став пукалысьяс кутісны нюмъявны.

— Анна Балашоваӧс, шуан? Мый нӧ, сійӧс кӧ и сійӧс. Аски тэ ачыд висьтав сылы, мед мунас фермаӧ.

— Ладнӧ, висьтала...

Заседание бӧрын Вася петіс колльӧдны счётоводӧс, но мыйлакӧ вӧлі зумыш, абу варов. Тоня казяліс тайӧс, нетшыштіс кисӧ Вася сойборд улысь, шпыньмунӧмӧн шуис:

— Мый шогсян? Жалитан, мый Аннушкаӧс фермаӧ индісны? Ачыд ӧд шуин, важыс дум вылад уси да! Кыдз нӧ мӧд ног...

Вася скӧрысь гаровтіс ки гӧгӧрыс сумка волыссӧ, чабыртіс кулакъяссӧ, читкыртчис:

— Тэ менӧ тайӧн эн дӧзмӧд, кылан! Эн сюйсьы, кытчӧ оз ков, а то...

Эз помав, скӧрысь бергӧдчис да прӧщайтчытӧг мӧдӧдчис гортланьыс. Воис асланыс керка дорӧ, пуксис амбар водзӧ кер вылӧ, шӧпкӧдіс аслыс: «Сирасисны эсійӧ... невестанас! Но, видзӧдлам!»

...Беловъяс олісны Балашовъяскӧд ӧти улича вылын. Керкаясыс налӧн сулалісны воча туй ӧтар-мӧдарас. Олісны зыктӧг-шумтӧг, частӧ гӧститісны ӧта-мӧд ордас да эз помнитны, медым коркӧ лӧгасьлісны мыйыськӧ. Беловъяслӧн котраліс нин ӧшинь улас пи, кор Никифор Балашовлӧн гӧтырыс вайис роддомысь нылӧс. Балашовъяс радысла корисны ас орданыс пӧшти деревня джынсӧ, и сэки Васялӧн мамыс став гӧстьяс дырйи шуис Балашов гӧтырлы, сыкӧд маа вина румкаӧн чокнитчигӧн:

— Орина, сетан ассьыд нывтӧ миян пилы невеста пыдди? Кӧсъян? Он и тӧдлы, кыдзи кадыс коляс, свадьба чукӧртам! Васенька, лок татчӧ!

Пессьысь Васяӧс вайӧдісны зыбка дорӧ, и сійӧ, юрсӧ увлань лэдзӧмӧн, букыша видзӧдліс рузум пытшкӧ гартӧм «невеста» вылӧ...

Сійӧ лунсяньыс Вася олӧмын эз ло тӧлк ни слӧй. Ывла вылын паныдасигӧн гырысьяс юасисны сылысь ӧттор-мӧдтор йылысь, а сэсся быттьӧ петшӧрӧн сотыштлісны: «А висьтав, Василей, ветлывлан тэ аслад невестаыд дорӧ? Регыд нин Аннушкаыдкӧд гӧтрасянныд?»

Вася бӧрдігтыр пышъяс град йӧрӧ да сэні ас кежас кутас думайтны, кыдзи эськӧ мынтыны водзӧс аслас «невестаыслы»... Аннушка эз и тӧдлы, мыйта шог вайис сійӧ Васька Беловлы. Вася лои нин верстьӧ зон, регыд армияӧ призывайтчыны, а рытйысигӧн сійӧс важ мозыс на дэльӧдісны: «Жӧник, йӧктышт инӧ ӧтчыд!»

Армияын Вася служитіс авиационнӧй частьын, гортас воӧм бӧрын дыр на эз резьӧд мундир вывсьыс сержантскӧй погонъяссӧ.

Ассьыс невестасӧ Вася аддзыліс воан лунас. Пукаліс пызан сайын, чӧсмасис гортса сёянӧн. И друг ӧшинь пыр аддзис: улича мӧдар бокӧд тэрыба мунӧ еджыд чышъяна, лӧз цветъясӧсь платьеа ныв. Казяліс Васяӧс, бергӧдіс чужӧмсӧ мӧдарлань.

— Мамӧ, коді нӧ тайӧ? Ме эг тӧд. Миян сиктса?

— Да ӧд тайӧ тэнад... — шуис мамыс да джӧмдіс. — Тайӧ Орина Балашовалӧн нылыс татшӧм ыджыда быдмӧма.

— А-а, со кыдз... — шуис Вася, ачыс шпыньмуніс: «Со тэ кутшӧм, «невестаӧй»! Он шогмы тэ меным...»

Вежон кымын шойччӧм бӧрын Вася муніс колхознӧй контораӧ, корис удж вылӧ индыны.

— Тайӧ бур, Василий Петрович! — председатель радысла шуис Васяӧс ним-вичнас. — Йӧзыд миянлы, тӧдан, кутшӧма колӧны! Бригадиравны кутан, буретш тэныд тайӧ уджыс!

Вася быд асывводз сеталіс колхозникъяслы удж. И Аннушкакӧд паныдасьлӧм бӧрын быдпӧрйӧ шогпырысь думайтіс: «Мед кӧть эськӧ муніс сійӧ кытчӧкӧ! Либӧ верӧс сайӧ петіс... Но коді ваяс татшӧмтӧ? Абу сетӧмаӧсь сылы мичлунсӧ, сідзи и эндас».

Правлениелӧн заседание вылын Вася эз прӧста шу индыны Аннаӧс фермаӧ. Думайтіс: кӧть нин син водзысь вешъяс.

* * *

Балашовъяс ӧшинь улӧ асывнас зэв водз локтіс бригадир. Анна котӧртіс ӧшинь дорӧ, руа стеклӧ пырыс казяліс Васялысь чужӧмсӧ. Ныв эз кыв бригадирлысь гӧлӧссӧ да восьтіс ӧшиньсӧ.

— Фермаӧ мунан. Петрушин лоӧ тэнад начальник! — шпыньмуніс Вася да выльысь шуис: — Он кыв али мый? Фермаӧ, дояркаӧн.

Бригадир бергӧдіс вӧвсӧ, скачӧн мӧдӧдчис мӧдлаӧ. Анна видзӧдыштіс сы бӧрся. «И мыйла сӧмын тайӧ Васяыс сэтшӧма ышнясьӧ, — думайтіс сійӧ, — оз кӧсйы весиг сёрнитыштны тӧлкӧн. Но и мед, меным ӧд веськодь... Шуӧны, гуляйтӧ пӧ контораса Тонякӧд. Мый нӧ, нылыс сійӧ мича, кажитчӧ зонъясыдлы...»

Анна тэрмасьӧмӧн сёйыштіс да мӧдӧдчис фермаӧ, коді сулаліс кыр горулын, ичӧтик ю сайын. Сепараторнӧй керка дорын вывлань пыдӧсӧн сувтӧдӧм бидон вылын пукаліс ачыс заведующӧйыс — Петрушин.

Аддзис Аннаӧс да дышпырысь бергӧдчис сылань.

— Воин инӧ?

— Вои тай...

— Но, ӧні пока шойччышт. Мӧсъяс ӧні пӧскӧтина вылынӧсь, а кыдзи вайӧдасны рытнас — локтан лысьтысьны. Ковмас нин уджавны...

Та вылын и помасис сёрниыс. Анна пырис сепараторнӧйӧ, кӧні пельӧсын ӧшалісны няйт халатъяс. Сэсся пыраліс мӧс картаӧ. Нырас кучкис важӧн нин весавлытӧм куйӧд дук...

Анна сувтовкерис, быттьӧкӧ кывзысис чӧв-лӧняс. Сэсся бӧр пырис сепараторнӧйӧ, чукӧртіс няйт халатъяс да песлаліс найӧс ю дорын. Рытъявылыс, мӧсъясӧс вайӧдтӧдз, фермаӧ воисны мукӧд дояркаясыс. Анна яндысьӧмпырысь шуис:

— Нывъяс, колӧ эськӧ и картатӧ весавны, а то тувччыны некытчӧ...

Оня Бармина, медся збой доярка, серӧктіс:

— Видзӧдлӧй-видзӧдлӧй! Эз на удит нырсӧ мыччыны, а йӧзӧс нин нарадитӧ. Со ӧд кутшӧм!

Анна нинӧм эз шу, босьтіс вила да мӧдӧдчис карталань. Дояркаяс шпыннялігтыр видзӧдісны сы бӧрся.

Анна унатор кывліс мукӧд колхозъясса бур дояркаяс йылысь. Сравнивайтіс налысь результатъяссӧ асланыс уджкӧд да пыр ёнджыка воис выводӧ, мый и Дубки сиктын сідзжӧ позьӧ лысьтыны йӧвсӧ унджык. Анна суткиясӧн эз волывлы фермаысь, мамыс ропкис: ӧтнад пӧ сідз старайтчан?

Но Анна эз нин вӧв ӧтнас. Ӧтчыд сійӧ ветліс орчча Березовка сиктӧ. Сэтчӧс колхозын мӧсъясыс гырысьӧсь, ӧдва кыскалӧны ведра тӧрмӧн вӧраяссӧ, став ферма пасьта кылӧ йӧв дук. Тӧдмасис тані том зонкӧд, зоотехниккӧд, сійӧ быдлаті новлӧдліс Аннаӧс, ставсӧ петкӧдліс, висьтавліс. Анна эз яндысь юасьны, а гортас воӧм бӧрын заводитіс уджавны Березовкаса дояркаяс моз. Зоотехник велӧдіс сійӧс солавны турун, и Анна кутіс новлыны складысь совсӧ быдса пудъясӧн. Кладовщик броткис: «Кытчӧ та мында добрасӧ воштан?» Анна ачыс велаліс лӧсьӧдны рационъяс.

Том ныв унаысь видліс бурджыка тӧдмасьны Оня Барминакӧд, но сійӧ ӧтдортчис Аннаысь да быдпӧрйӧ тшетшкис: «Со ӧд кутшӧм сійӧ велӧдчӧм морт!» Фермаса мукӧд нывъяс быдторйын кывзысисны Онялысь. Сійӧ унаысь шулывліс налы, мый Анна кӧсйӧ бурӧ пуксьыны.

Аннушкалӧн мӧсъясыс кутісны йӧвсӧ сетны унджык и унджык. Первойсӧ быттьӧ эз и тӧдчыны граммъясыд, а сэсся ставӧн аддзисны: пановтны кутіс Анна ассьыс ёртъяссӧ. Районнӧй газетаын печатайтісны сводка, Дубки сиктса дояркалӧн фамилияыс первойысь лои витӧд местаын.

Ӧтчыд та бӧрын фермаӧ локтіс Вася Белов. Локтіс быттьӧкӧ могӧн, а збыльысьсӧ — прӧстӧ гӧлчитыштны нывъяскӧд. Кыдзи век, сепараторнӧй керка дорын аслас привычнӧй местаын пукаліс Петрушин.

— Видза олан, Павел дядь! — чукӧстіс сійӧс Вася. — Пыр на гачтӧ зыртан?

— Видза олан, он кӧ шмонит, — дышпырысь шыасис заведующӧй.

Вася думсьыс ёрччыштіс Петрушин вылӧ да восьтіс сепараторнӧйӧ ӧдзӧс. Мый йылысь кӧ гораа сёрнитысь нывъяс аддзисны бригадирӧс да ланьтісны. Сӧмын Оня Бармина нарошнӧ гораа шыасис Вася дінӧ:

— А-а, Васенька, видза олан! Лок татчӧ, дона гӧсть! Ми вот тані ас костын буретш начальствоӧс казьтылім, и тэнӧ тшӧтш.

— А менӧ мыйысь? Критикуйтанныд син сайын?

— А вот и синмад шуам! — югнитіс пиньяснас Оня. — Тайӧ нӧ мый тіян... ӧтияс бурӧсь, а мӧдъяс лёкӧсь? Миянлы со книжкаӧ комын вит трудоденьӧн гижӧмаӧсь, а тэнад Анькаыдлы — ветымынӧс! Мыйысь? Ӧти делӧ вӧчам, ӧтмында и гижалӧй!..

— Энлы, эн увгы... — Вася кӧсйис гӧгӧрвоны, мый лоӧма. — Ог ме ӧтнам гижав. Правление трудоденьястӧ гижалӧ сы серти, коді уна-ӧ лысьтіс йӧвсӧ. Балашовалӧн мукӧдъясысь ёна унджык артмӧ...

— Ёна унджык!.. Ми тӧдам, кыдзи ті сетанныд сылы ёна унджык концентратъяс! Оз прӧста сійӧ шӧйт складъясӧд! И мӧсъяссӧ бӧрйинныд...

Первойсӧ Беловлы рад лои. «А-а, со мый! Став нывъяс дӧзмӧмаӧсь Анна вылӧ. Гӧгӧрвоана...» Но мӧсъясӧс бӧрйӧмсӧ Оня вӧтӧн аддзылӧма, и Вася эз вермы кутчысьны:

— Нинӧмабусӧ тэ больган, Оня! Мӧсъяссӧ сылы сетісны Маня Пронькиналысь. Найӧ нинӧмӧн абу бурджыкӧсь тіян мӧсъясысь. Шуасян тэ прӧстӧ, завидьыдла!

— Аддзӧмыд тай кодлы завидьтыны, — эз сетчы Оня да пинь пырыс содтіс: — Мый нин сэн сёрнитны — невеста серти и жӧник!

Вася скӧрысь ӧвтыштіс кинас, котӧрӧн петіс сепараторнӧйысь, мӧдӧдчис мӧс картаӧ корсьны сэтысь заведующӧйӧс. Восьтіс паськыд ӧдзӧс, пырис пытшкас. Картаын вӧлі лӧнь. Вася сулалыштіс здук-мӧд да кӧсйӧ нин вӧлі бӧр петны, но сэки коридор помын троньмуніс ведра да кодкӧ ньӧжйӧник мӧдіс сьывны. Гӧлӧсыс вӧлі тӧдса, неуна шогсянакодь. Вася кок чунь йылас матыстчис сьылысьлань.

Платье бӧждорсӧ бокъяссяньыс вӧнь улас сюялӧмӧн Анна мыськис пӧсь ваӧн ляснияс. Сійӧ нюжӧдчис ведрала да чермуніс:

— Ой! Коді нӧ сэні?

— Но мый, мортӧс эн аддзывлы? — юаліс Вася. — Кӧні нӧ тіян Петрушиныд?

Анна мыйлакӧ шпыньмуніс либӧ, гашкӧ, сӧмын прӧста кажитчис тадзи.

— Коді сійӧс тӧдӧ. Ӧтнам ме тані... Некод абу. Тэ тай со локтін...

Ичӧтик ӧшинь пыр сявкнитіс шонді югӧр, Анналӧн юрсиыс ӧзйис зарни биӧн, быттьӧ ставнас югдіс. Васялысь сьӧлӧмсӧ быттьӧ сотыштіс: сэтшӧм мича вӧлі Анна тайӧ здукас! Вася синсӧ лапнитлытӧг видзӧдіс сы вылӧ, но дум вылас уси важыс да бергӧдчис.

— Тэ нӧ мый тані... ӧтнад уджалан?

— А ме ӧд горш! — скӧрысь шуис Анна. — Сӧмын меным ӧтнамлы и пыр этша! Кывлін нин, кӧнкӧ, тайӧс? Быттьӧ меным ӧтнамлы колӧ йӧлыс! Кымынысь ме шулі налы, но гӧгӧрвоны оз кӧсйыны. Мунан, бригадир? Но, бур туй тэныд!

Районнӧй газета бара печатайтіс сводка — Аннаӧс вӧлі гижӧма нин мӧд мортӧн. Вӧлі печатайтӧма и сылысь фотография.

Сійӧ рытнас Вася виччысьтӧг лӧгасис счётовод Тонякӧд. Найӧ кыкӧн пукалісны контораын. Вася вӧлі зумыш, сёрнитіс дыша. Тоня пыр жӧ казяліс тайӧ вежсьӧмсӧ, сӧмын эз юась: бырас терпеньеыс, ачыс висьталас. Тоня босьтіс пызан вылысь газета да шуис:

— Аддзылін Аннушкасӧ? Ӧні и матыстчыныд сы дінӧ он лысьт. Важӧн-ӧ няйт пиын луасис, а ӧні сы йылысь газетаясын гижӧны!

Вася букыштчыліс сы вылӧ, серӧктіс:

— Тэнад ӧд киясыд абу няйтӧсь! Йӧзлысь уджтӧ щӧткинад артавны абу сьӧкыд...

Тоня пельӧдзыс гӧрдӧдіс, ӧбидитчӧмӧн видзӧдліс Вася вылӧ.

— Тыдалӧ, он вермы вунӧдны сійӧс? Он ӧд прӧста ветлывлы фермаас сы дінӧ! Бурасинныд? Кыдз нӧ, ӧні сійӧс ставыс аддзӧны, сыкӧд орччӧн и тэнӧ тшӧтш казяласны.

Василийӧс быттьӧ кырыштісны ставнас, — сэтшӧма сійӧ скӧрмис да камӧбтіс кулакнас пызанӧ.

— Кыйӧдчинныд?! Ме вӧсна нинӧмысь повны. Гӧгӧрвоин?

Звирк чеччис, петіс контораысь, ковгис ӧдзӧснас.

* * *

Арнас, Октябрьскӧй праздникъяс водзвылын, районнӧй Культура керкаӧ чукӧртчисны матігӧгӧрса сиктъясысь уна йӧз: первойысь пасйисны Животноводлысь лун. Вася Белов ӧдва писькӧдчис йӧзӧн тырӧм залӧ, аддзис аслыс места Петрушинкӧд орччӧн. Водзын пукалысь йӧзлӧн пельпомъяс вомӧн аддзис Аннаӧс. Сійӧ вӧлі президиумын, гӧрдӧн вевттьӧм пызан сайын, Березовкаса том зонкӧд, зоотехниккӧд да райкомса секретарь Четуновкӧд орччӧн. Анна пукаліс ылын, но Вася бура аддзис сылысь чужӧмсӧ, и бара, кыдзи и сэки, мӧс картаын аддзысьлігӧн, сійӧ кажитчис шензьӧдмӧн мичаӧн.

Выступлениеяс бӧрын сеталісны премияяс. Сергей Пермяков — тадзи шуисны Березовкаса зоотехникӧс — получитіс велосипед. Сэсся шуисны Анналысь овсӧ: «...премируйтсьӧ часіӧн!» Залын кутісны клопайтны.

— Аддзылін миянлысь Аннушкасӧ? — горзіс Петрушин сыкӧд орччӧн пукалысь пастуклы, коді вӧлі орчча колхозысь. — Сӧмын ӧтитор жаль: мунӧ сійӧ миян дорысь, эсійӧ Пермяков саяс верӧс сайӧ петӧ... Пыр котраліс сы дорӧ велӧдчыны, а вӧлӧмкӧ радейтӧ сійӧс. Мый нӧ вӧчан, ми ӧд коркӧ томӧсь жӧ вӧлім, ачыд тӧдан...

Йӧзыс кутісны разӧдчыны, а Вася сулаліс ӧдзӧс дорын, виччысис. Аддзис Аннаӧс да нюжӧдіс сылы кисӧ:

— Поздравляйта, Анна!

Анна лӧня вочавидзис:

— Аттьӧ, Вася.

Вася сулалыштіс, мыйкӧ кӧсйис шуны.

— Коркӧ миянӧс, Анна, жӧникӧн да невестаӧн шулісны. Гашкӧ, эн на вунӧд? Меным тайӧ эз вӧв любӧ, быдпӧрйӧ кӧсйи серамӧ пуктыны. И фермаӧ мӧдӧді тэнӧ. А, вӧлӧмкӧ, весьшӧрӧ вӧчи ме тайӧс...

Анна чуймӧмпырысь видзӧдліс сы вылӧ.

— А-а... Мыйсӧ оз шулыны йӧзыд. А фермасьыд аттьӧ! Эн дивит, тэрмася...

И муніс. Вася сӧмын ӧні гӧгӧрвоис, мый сы водзті вуджӧртіс сылӧн ыджыд шудыс, кодӧс сійӧ ачыс тойыштіс ас дорсьыс.