СЮСЬ ПОП ДА ЙӦЙ БӦБ

Овлӧма-вывлӧма поп,
Ныр сылӧн — ыджыд гӧрд гоб.
Ӧтчыд кутшӧмкӧ арӧ
Мунас босьтасьны карӧ.
Муртса на воас-а, топсьӧдӧ Бӧб —
Латшкӧскодь, зумыдик сьӧп:
«Кытчӧ нин шавксьӧдан, батьӧ?
Сё сюрс сё себенекатьӧ,
Зэв тай чеччӧмыд водз —
Йӧз зэв на ветлӧдлӧ шоч!»
Поп шуӧ: «Колӧ казак мем сэтшӧм,
Уджаліс мед ош этшӧн,
Быдтор кужис мед пӧжавны-пуны,
Медым эськӧ эз сёй вывті уна,
Му-видз дорын уджавны мед вермис,
Паськӧм вурны, кудель керны.
Медым вӧлі дзоля дон,
Дай мед ньӧтчыд сылӧн эз лок он».
Бӧб и шуӧ:
«Сідз кӧ, батюшко, менӧ тэ нуӧд,
Тэныд казакыд меысь бур
Некытысь сэсся оз сюр!
Дон некутшӧм ог босьт весиг,
Куим воысь куим печик...
Тэныд плешад, дерт,
А менӧ пӧжӧм сюӧн верд!»
Зумыштчис батюшко поп —
Нырыс лои гӧрд гобсьыс гӧрд гоб.
Гыжъялӧ юрсӧ да кашкӧ,
Арталӧ: артмӧдчам кыдзкӧ да гашкӧ.
«Ладнӧ инӧсь, лок,
Сӧмын тӧд ассьыд мог.
Вой и лун тэ уджав зіля,
Пӧжӧм сютӧ мыйтӧм колӧ вильӧд!»
Олӧ поп ордын Бӧб.
Кыскалӧ турун додь ыджда нӧб,
Пес вайӧ, гӧрӧ и кӧдзӧ,
Пач ломтӧ, пӧжасьӧ, быд уджсӧ вӧчӧ.
Попаддя зэв ёна ошкӧ:
«Казакным удж вылад ош кодь».
Поп пиыс код юрӧн, садьӧн
Казакӧс ыдждӧдлӧ «дядьӧн».
Поп нылыс казаклысь донсӧ оз тӧд,
Сы йылысь мӧвпалӧ вемӧс и вӧт.
Весигтӧ понйыс и каньыс
Казактӧ шуӧны шаньӧн.
Поплы сӧмын абу муса Бӧб,
Сійӧ ӧтнас казак вылӧ лӧг.
Мӧвпалӧ пыр печик йылысь,
Оз вунлы дум вылысь.
Оз ю ни оз сёй,
Узьтӧг коли уна вой.
Попаддялы попыд
Коркӧ сэсся шуӧ: «Со пӧ
Кутшӧм суис менӧ шог,
Кыдзкӧ таысь мынны верма ог?
Попаддяыс поплы шуӧ:
«Мый тэ юртӧ ӧшӧдӧмыд муӧ,
Ме тӧда, кыдзи мынны шогысь.
Тэ мынтысь сылы со кыдз:
Сэтшӧм уджӧ Бӧбтӧ мӧдӧд,
Мед сэтчӧ и прӧпадитас, пӧдӧ,
Дзоньӧн коляс тэнад плеш,
Лоас гаж и лоас теш!»
Поплы гажа лои сьӧлӧм вылас,
Ряса лэптіс — йӧктӧ, кылӧ,
«Зым да зым, да клюн да клён,
Плешӧй кольӧ важсьыс ён!»
Чукӧстіс казакӧс скӧра:
«Кывзы: воис нин пӧра
Вакульлысь перйыны вот,
Оз мынты нин коймӧд во.
Пырысь-пыр жӧ перйы мун,
Срок тэныд кык лун».
Саридз дорӧ лэччис Бӧб,
Пуксис сэтчӧ пӧрысь сьӧп.
Шенасьӧ-ӧвтчӧ сэн гезйӧн,
Мореса ваыс сідзи и резсьӧ.
Пульс петіс мореысь васа,
Казаклы шуыштіс басӧн:
«Мый нин тэ миянлы вӧзъян?» —
«Тэнӧ ме джагӧдны кӧсъя!» —
«Мыйысь нӧ сэтшӧм лӧг,
Йӧй Бӧб?» —
«Мыйысь?! Куим во нин поп
Тіянсянь виччысьӧ ноп.
Тэ вунӧдін кӧсйысьӧм воттӧ...
Сідзкӧ, сьыліад этійӧ гезйыс вот тэд!» —
«Бӧбукӧй, Бӧбукӧй, ен могысь, эн джагӧд,
Воттӧ сетам, талун жӧ на кӧть!
Виччысьышт неуна, ыста ме пиӧс,
Мынтас тэн налогтӧ сійӧ!»
Мыччысис мореысь Кульпи,
Ва пиысь тривкнитіс-пульскис:
«Здорово, Бӧб, олан-вылан!
Кутшӧмкӧ нӧ вот миян вылын?
Батьӧ висьталіс мем —
Ми эг на кывлӧй нэм.
Мед нӧ, сідзкӧ, ми сетам,
Сӧмын войдӧр панласьны ми петам:
Ӧдйӧджык саридз гӧгӧр пышъям кодным,
Сылы лоӧ вотным».
Вак-вакӧн серӧктіс Бӧб:
«Мем тайӧ саридзыд гӧп,
Тэкӧд — оз сулав лэптыны кокӧс,
Виччысьлы ичӧтджык вокӧс.
Ме локта пырысь-пыр...
Мекӧд панласьны кӧсъян, зырымӧсь ныр!»
Казак босьтіс мешӧк сьӧрас,
Муніс матіса вӧрӧ,
Кутіс кык кӧчӧс сэтысь,
Мешӧкӧ сюйис да Куль дінӧ петіс.
Кӧчӧс пельӧдыс босьтіс, шуӧ:
«Тайӧ Кульписӧ суӧд,
Тэ мекӧд панласьныд томджык на, Кульпиӧй!
Ноко, ордйы со тайӧс!»
Кырссьӧны Кульпи да кӧч —
Бӧрӧ кольӧны гуран и рӧч.
Кульпиыс саридз пӧлӧн
Шутёвтӧ вой тӧлӧн,
Сылӧн кӧч ёртыс
Котӧртіс аслас вӧрса гортас.
Со Кульыд море гӧгӧр пышйис,
Коксьыс чегъясьӧма гыжйыс.
Локтӧ казак дінӧ —
Былялӧма синмыс,
Кашкӧ, нюжӧдӧма кыв,
Пӧсялӧма юрси йыв.
Видзӧдӧ: кӧчыд Бӧб пидзӧс вылын,
Казак шыльӧдӧ, шуалӧ сылы:
«Шойччышт жӧ, шойччышт, вокӧй,
Мудзӧма, коньӧрлӧн, кокыд!»
Кульпиыд повзис,
Вот, шуас, олӧмӧй овсис.
«Ӧні тӧдам, мынтысьны кодлы,
Часлы, — шуӧ, — ветла ме вотла».
Саридзӧ суніс,
Ай дінӧ муніс:
«Айӧ, Бӧбыдлӧн дзоляджык вокыс ордйис —
Лэбзьӧ, быттьӧкӧ бордъя!»
Жугыльтчис Кульпилӧн айыс:
«Мый нин сэсся вӧчас казакыд тайӧ?»
Казакыд сэк кості лэптіс сэтшӧм зык —
Гызис саридзыд, лои веж быг.
Кульпи бӧр петіс, кык мешӧк зарни сьӧрас.
Кевмысьӧ: «Бӧбук, эн скӧрав!
Тані со вотным.
Сӧмын... вылӧджык качӧдам кодным
Тайӧ кӧрт паличсӧ вот —
Сылы и лоӧ вот».
Сетіс Бӧблы. Видзӧдӧ ачыс:
«Но, мый нӧ он качӧд?» —
«Виччыся кымӧрсӧ, сэтчӧ мед ӧшъяс —
Сэтшӧма качӧдны кӧсъя.
Но, паличӧй, кымӧрас сатш!..
Сы бӧрын петкӧдла кульяслы гаж!»
Казаклӧн сьӧлӧмыс пузис.
Кульпиыд повзьӧмла лясмуні-уси,
Сэсся бауӧн-сорӧн мореӧ суніс.
Кык зарни мешӧкыс сэтчӧ и вуні.
Казакыд нӧбаліс вылас,
Поп ордӧ локтӧ да сьылӧ.
Попыд казактӧ аддзис —
Тӧкӧтьӧ эз быр садьыс.
Паччӧрас котӧрӧн кайис,
Дзебсис матушка саяс.
Казак сійӧс кыскис, шуӧ: «Вот тэд
Вайи кульяссянь воттӧ!»
Сэсся Бӧбыд корӧ рӧштшӧт:
Видлам пӧ, юрыд абу-ӧ тӧщӧ.
Поплы, дерт, абу теш!..
Но лӧсьӧдіс плеш.
Бӧб печиктіс ӧтчыд — звиркӧн
Попыд чеччыштіс йиркӧдз.
Мӧдысь печиктіс казак —
Поплӧн тӧкӧтьӧ юрыс эз пазав.
Коймӧд печикыс вӧлі сыысь на ён —
Попыд муні дук вон.
Печлалысь шуалӧ, кылӧ:
«Эн горшась донтӧм казак вылӧ!»