ЯНСӦДЧӦМ

Вай висьтав меным, дона нылӧй,
Ӧд вӧвлі зон, код мусмис тэд?
И мунліс сійӧ туйӧ, ылӧ,
И сыкӧд янсавлінныд, дерт?

Эм янсавлӧмыд разнӧй вына,
Он ӧтмоз сьыв быд песня, он:
То мусук мунӧ велӧдчыны,
То армияӧ мунӧ зон.

Оз татшӧм янсалӧмсьыд куслы
Бур ёртлӧн сьӧлӧмпытшса би:
Ӧд шонді югӧр моз жӧ муслун
Зэв ӧдйӧ лэбзьӧ сынӧдті.

Но эм и сэтшӧм янсӧдчылӧм,
Кор орччаӧсь ті — зон и ныв,
Но зонмыс тэнсьыд сьӧлӧм кылӧм
Оз гӧгӧрво, оз тӧд, оз кыв.

Вот татшӧм янсӧдчӧмсьыс полӧй:
Ӧд сійӧ вайӧ сӧмын шог.
И татшӧм янсӧдчӧмлысь колӧ
Нэм кежлӧ чегъявны ки-кок.