СИКТЪЯС САЙЫН

Сиктъяс сайын шувгис кыддза рас,
Рудзӧг вевттис шӧвкӧн нӧрыс йыв.
Борйын, ворсісны кӧн дзоридзьяс,
Окасис будёновецкӧд ныв.
Том боецлӧн сьӧд кудриа юр,
Устор тӧдчис, вирыс пуис яр.
Зонлы нимкодь — кок ув му оз кыв:
Первой на ӧд окаліс том ныв.

Пуксис вӧв вылӧ да муніс зон...
Рудзӧг... Енэж... Кыліс порок дук,
Петіс чорыд тышӧ эскадрон...
Сюяс пӧвстӧ зонмыд уси друг —
Враглӧн пуля сатшис сьӧлӧмас...
Шептӧн ворсӧ рудзӧг, шувгӧ рас.
Нывлӧн лэччӧ курыд синва шор.
Шогсьӧ дзоридзьясӧн тырӧм бор.

Тайӧ вӧлі коркӧ важӧн.
Ӧні мӧд нин олан гажыд.
Мӧвпышт, тӧдтӧм ёртӧй, татшӧмтор,
Тайӧ гижӧдсӧ тэ лыддян кор:
Гашкӧ, тэныд дас кӧкъямыс ар,
Ӧзйӧ том вир-яяд муслун жар,
Олан-кисьман нимкодясигтыр,
Гашкӧ, шуда радейтчӧмӧн тыр...
Шуда тэ и сьылан гора,
Гашкӧ, сы понда, мый сылӧн
Кості радейтӧмыс ори.
Мӧвпышт, ёртанӧй, та йылысь!