ӦШИНЬ УЛЫНӦшинь улын потшӧс дорын Небыд пӧльыштлывлӧ тӧв... Тӧдтӧм зонлысь варов сёрни Кывзӧ пӧрысь войтыр чӧв. Тӧдтӧм зонмыс — комсомолец, Сиктӧ ыстӧм сійӧс кар. Аслыссяма тешкодь вӧлӧн Локтіс пурысьӧд зур-зар. Потшӧс бердын нӧрыс йылын, Кӧні бунтын куйлӧ кер, Зонлӧн лэчыд гӧлӧс кылӧ — Пуӧ агитатор нэр. Сёрни киссьӧ бузган шорӧн, Сьӧлӧмъясӧ ӧзтӧ би. Кывзӧ томыс, кывзӧ дзорыс. Кывзӧ тшӧтш и дзоля пи. Висьталӧ висьт комсомолец: “Бара пӧ нин зырсьӧ враг, Мӧлӧтысь пӧ юрыс шоляс, Кок улын лязалас гаг. Капитал да буржуй чукӧр Кӧсйӧ аджны мунымӧс. Йитӧд чорыдӧс зэв тшупам Заводсакӧд сиктса йӧз! Оз кӧсйыны враглы сетны Сӧвет мулысь ӧти сыв, Ставӧн враглы паныд петны Сетӧ заводса йӧз кыв...” Ӧшинь улын кер бунт гӧгӧр Таляссьӧма турун шӧвк. Енэж шӧрті кывтӧ ӧгыр, Малыштлывлӧ небыд тӧв. Висьталӧмыс эз мун кузя — Жургис-юргис тувсов шор. Комсомолкаяслӧн пузис Сьӧлӧм пытшкас би кинь тор. Буржуй вылӧ скӧрмис, ӧзйис Нывпосни и ичӧт пи, Пузис сьӧлӧм тошка йӧзлӧн, Кабыртчаліс гаддя ки. Том морт висьтсьыд йӧзлӧн гызис Ставыс — сьӧлӧм и юр садь. Том морт ланьтіс... Войтыр шызис. Босьтіс сёрни Ӧсип дядь. Гур-гар телегаӧ кайис: “Ёртъяс! — киргӧ гӧлӧс кыз. — Сідзкӧ кыдз нӧ? Мый нӧ тайӧ? Кодыр кыптас войнаыс? Прӧщайт, гӧтыр! Прӧщайт, нылӧй! Буржуйкӧд кор лыбас зык, Медводз муна война вылӧ... Сутшка кыз рушкуас штык!” Йӧзыс гызис. Киссьӧ сёрни. Юргӧ-мургӧ вӧлӧсьт шӧр... Шонді лэччис. Вӧлі сёр нин... Муніс агитатор бӧр. Еджыд лыа кузя шывгис Кык гӧгыля уклад вӧв. Синнас колльӧдісны нывъяс — Сутшис сьӧлӧманыс ньӧв.
