ЯНСӦДЧӦМ

Муртса югдіс — рыт нин бара воӧ,
Муртса локті — бӧр нин мунны лоӧ.
Муртса окышті ме, аньӧй, тэнӧ,
«Видза колян!» ковмас шуны меным.
Эн шогсьы тэ, эн шогсьы, эн!
Мед видзас тэнӧ ен!

Лира пыдди сабля босьті киам;
Ме поэт, но пета тышкӧ — биас.
Зарни кодзув пыдди аддза сэтысь,
Кыдзи чард кодь сабля косьӧ петӧ.
Эн шогсьы тэ, эн шогсьы, эн!
Мед видзас тэнӧ ен!

Оз ӧд кыскы нималӧмлӧн горыс,
Оз ӧд ков мем ньӧти татшӧмторыс,
Лаврысь вӧчӧм юркытш ог зіль босьтны,
Татшӧмторйыд сьӧлӧмӧс оз косьты.
Эн шогсьы тэ, эн шогсьы, эн!
Мед видзас тэнӧ ен!

Ог ме косьӧ усьлась слава понда,
Тіпкӧ сьӧлӧм, косьӧ ыстӧ, ёнтӧ:
Ог ӧд мун ме ыджыд гажа пирӧ,
Чужан му понда ме кисьта вирӧс.
Эн шогсьы тэ, эн шогсьы, эн!
Мед видзас тэнӧ ен!

Мӧвпав ме йылысь тэ, муса другӧй!
Миян мыла муслунным оз жугав.
Тӧдан, менам пӧсь сьӧлӧмӧй ёнтӧ
Аслам дона чужан муӧй понда!
Эн шогсьы тэ, эн шогсьы, эн!
Мед видзас тэнӧ ен!

Гашкӧ китӧм-коктӧм воа гортӧ,
Лоан век тэ меным муса ёртӧн,
Муса ёртӧн нэмыс-нэмыс лоан,
Кодыр аслам гортӧ бӧр ме воа.
Эн шогсьы тэ, эн шогсьы, эн!
Мед видзас тэнӧ ен!