РОЧ ЁРТЪЯСЛЫЭн на вунӧдӧй ӧд, кӧнкӧ, ёртъяс, менӧ ті? Менам другъяс пӧвстын, кодъясӧс царь виис, Катаргаын мучитчис тшӧтш мукӧд мулӧн пи! Налы сьӧлӧмсянь ме ассьым кывбур сиа. Кӧнӧсь нӧ ті? Со Рылеев кусі — сӧстӧм морт, Царь джаггӧрӧд сылы зэвтіс голя гӧгӧр, Мелі сьылісӧ ме коркӧ кутлі кыдзи ёрт. Ыджыд ёрӧм палачьяслы шуам лӧга! Перӧ, сабля Бестужевлӧн оз кут ӧні ки, Кодӧс сійӧ чургӧдліс неӧтчыд меным. Сылысь кисӧ чептӧн дорӧмаӧсь — тӧдам ми, Тачка поляккӧд ӧд кыскалӧны сэні. Гашкӧ кодъяслыськӧ зарни либӧ ыджыд чин, Либӧ наян царлӧн мудер меліасьӧм Тупкис сьӧд кымӧрӧн йӧймӧм-бӧбмӧм син — Пӧртіс медся омӧль зывӧк мортӧ асьсӧ. Либӧ пеж деспотӧс-царӧс ошкигтырйи чеп Чӧвтіс сьылі вылас аслас важся друглы, Польшаысь грабитӧмторйӧн тыртіс ассьыс зеп, Чужан мусӧ вирӧн пӧдтіс, ставсӧ жугліс. Медым менам тайӧ юрган сьыланкывлӧн гор Тасянь мунас ылі кӧдзыд войвыв муӧ — Сідз жӧ, кыдзи бузгӧ чептысь мынӧм тувсов шор — Мездлун йылысь югыд юӧр сэтчӧ нуас. Менсьым гӧлӧс тӧданныд и кылад, ёртъяс, сэк: Тиран бердӧ чептӧн дорӧм веглясьлывлі, Менам сьӧлӧмын сир курыд дой ӧд ёнтіс век, Но ӧд менам лира тіянкӧд ӧтвылысь сьывліс. Ӧні кӧсъя койыштны важ дойӧс ставсӧ дзик Ортсӧ курыд дозйысь му пасьтаыс вылӧ, Чужан муӧйвывса синваӧн мед менам стих Тӧв ныр моза, бушков этшӧн лэбзяс ылӧ — Медым жулляс гымӧн-чардӧн тіянлысь кӧрт чеп! Гашкӧ кодкӧ таысь менӧ видӧ-дурӧ — Мывкыд сылӧн понлӧн кодь жӧ ичӧт, жеб, Коді чепсьыс мездысьыслысь кисӧ пурӧ.
