ЛӦСЬӦДЧЫ ТЫШӦ!

Витвося план — 
Витысь кучкӧм мусяр мышкӧ,
Мусяр мышкӧ
Ыджыд, дон чер тышкӧн.

Витвосясӧ
Нёльӧн кӧ ми вӧчам,
Кутшӧм гласӧн
Кутас сьывны
Важ мувывса
Кыз рушкуа пӧчӧ?

Ті чайтанныд
Видзӧднысӧ
Налы долыд,
Налы, кодъяс
Важ муас пыдӧ сюйӧмаӧсь гыж,
Миян вылӧ,
Кӧн сыркакылӧ муыс,
Чужӧ кӧн выль олӧм,
Кӧн грымгӧ
Важ мусӧ пазӧдана тыш?

Кор колхоз вӧсна
Лэптам баррикада,
Кор косьӧн корсям
Бурджык олан туй,
Кыдз ті чайтад — 
Сійӧ кадас
Важ муыслы ог-ӧ
Туналӧй ми шуй?

Кор ми шуам:
«Выль олӧм тэчны
Зэлӧдламӧй сой вын!»
Найӧ мӧвпалӧны:
Кыдзи эськӧ... торкны тунсӧ...
Кыдз ті чайтад — 
Миян Днепростройным
Оз-ӧ гарав налысь
Медся бӧръя лунсӧ?

Насянь чолӧм
Миянлы оз во.
Пинь йирӧм, полӧм
Налӧн содӧ
Воысь-во…

Налысь олӧм
Кор кризисыс оз конъяв?
Тырмас.
Капиталлы воӧ пом.
Джагалігас кӧсйӧ
Уськӧдчыны дурмӧм понйӧн — 
Вирӧсь кинас
Миянлысь тупкыны вом.

Тӧдам, кутшӧм тіян гыжныд.
Сатшкан — регыдӧн оз шед!
Миян сабля
Шойччигӧн эз ныжмы — 
Уджалысьлысь
Косьӧн перйӧм права
Гаддя ки некор оз сет.

Ми петам косьӧ
(Миян эм на важ косясян сямыс!),
Кӧинӧн вувзьӧдчад
Сӧвет вылӧ кор.
Важ муыскӧд
Медбӧръяысь артасямӧй...
Мувывса уджыс
Миян дор.

Вылын кутам дзирыд плагсӧ,
Мувыв пасьта
Дзирдалас мед дон.
Чекист лязӧдас кок улас
Гусьӧн торкысь гагсӧ — 
Поплы-й места пон!

Збоя
Коммуналӧн пиян!
Выль олӧм тэчны,
Дорйысьны важ муысь
Збоя, октябр пи!
Мед витвося планным миян
Лоас
Ставмувывса
Октябрыслӧн би!