ВОЙСЯ БИ

Тувсов вой. Ме ог узь асылӧдз,
Колипкай сьылас мед югдытӧдз.
Ме ог узь ыбвывса тракторлӧн
Югыд би ломзьӧмысь дугдытӧдз.
«Тувсов вой! Шемӧс, вой! Сьӧлӧмшӧр!»
Ме ог узь татшӧм кыв шуигӧн.
Пета водз, муса ныв, паныд тэд
Зарни сю ыб вылӧ нуигӧн.
Ассьым мӧвп ог висьтав тэныд ме:
Со тай со енэжыс вӧлӧм лӧз...
Збыль кӧ тэ радейтан, тӧдан, дерт,
Бикиньӧй чиктылысь сьӧлӧмӧс.
Ыб вылӧй, ӧзимӧй вежӧдан,
Долыдлун сьӧлӧмӧдз сидзӧдан.
Тӧда ӧд, мусаӧй, тӧда ме — 
Радейтан синъясӧн видзӧдан.
Оз тай лок ма чӧскыд унманӧй.
Долыд вӧт вӧтала быттьӧкӧ...
Ыб вылын югъялысь биясыс
Менӧ со корӧны кытчӧкӧ...