ӦКУЛИНА ЯНАЛІС

Ӧкулина вылӧ лӧгалісны сиктын став нывбабаясыс. Эн думайтӧй, мый найӧ вежӧктісны сыкӧд ассьыныс верӧсъяссӧ. Ӧкульлӧн тайӧ кадыс кольӧма нин. Сійӧс ёрисны мужикъясӧс самӧкурӧн юктӧдӧмысь. Гӧтыръяс быд ногыс повзьӧдлісны верӧсъяснысӧ: смилитас пӧ Ӧкульыд, шева сетас. Но нинӧм эз мӧрччы. Ӧкульлӧн вӧлі ыджыд кӧзыр — ассьыс тӧварсӧ сійӧ сеталіс уджӧн. Сы ордын позис пӧкмелитчыны лунын кӧть войын. Коркӧ мынтысясны: пӧкмелитчыныд пӧ ӧд мӧдысь на ковмылас.

Нывбабаяс норасьлісны и милицияӧ, но обыск дырйи нинӧм эз сюрлы, кӧть сиктын быдӧн тӧдісны — Ӧкульлӧн век «зарадитӧма» кык аппарат. Код тӧдас, коді сылы юӧртліс милиционер Сивергин локтӧм йывсьыс, гашкӧ, ачыс Сивергиныс водзвыв висьтавліс. Нимавліс тай: пыравлӧ пӧ корсюрӧ гусьӧникӧн.

Ӧтчыд Ӧкуль ордӧ пырис тӧдтӧм старука. Висьтасис — орчча сиктысь пӧ. Сійӧ пырӧмӧн тшӧтш кыскыштіс нырнас, чуймӧдіс кӧзяйкаӧс аслас нырисӧн:

— Самӧкур тай пуан! Эн пов, ог явит, ачым сы помысь ола. Сӧмын ме некодысь ньӧти ог пов — коньяк пуӧмысь накажитны законыс абу.

— Кутшӧм коньяк? — эз гӧгӧрво Ӧкуль.

— Бур йӧзыс ӧні самӧкурыд пыдди юӧны быд сикас чӧскыд винаяс — коньякъяс, ликёръяс. Вот ме и велӧдчи коньяк пуны. Ӧні сьыла да ола.

Ӧкульӧс завидьысла дрӧж босьтіс.

— Велӧд вай менӧ, — шуӧ гӧстялы, — водзӧстӧ мынта.

— Тані и велӧднысӧ нинӧм, — шуис гӧстя. — Колӧ сӧмын самӧкурыдлысь рӧмсӧ вежны: чай содтышт, лудік дук сет. А пуктан кӧ ещӧ таг либӧ гормӧг — горштӧ гӧрыштас.

Ӧкуль эз нюжӧдчы. Вӧчис, кыдзи велӧдісны, да кутіс кульны самӧкурысь важ серти кыкпӧвста дон. Да и сьӧлӧм вылас лои лӧсьыдджык — сюран кӧ, «коньяк» пуӧмысь штрапуйтны ни судитны оз кутны.

Эз чайтлы Ӧкуль, мый «коньяк» уськӧдас сійӧс, янӧдас сикт пасьта.

Делӧыс лои со кыдз. Ӧтчыд Ӧкуль ордӧ пырис клубса заведующӧй Маша Латкина да кутіс корны сійӧс пыравны рытнас. Став нывбабаясыс пӧ сиктысь чукӧртчасны.

Эз пыравлыв Ӧкуль клубад, но тайӧ раз муніс: окота нин вӧлі йӧз дінас петавны, петкӧдлыны выль шальсӧ, кодӧс неважӧн вайисны орчча сиктысь.

Клубын петкӧдлісны спектакль. Ӧкулина пуксис бӧрӧджык да мӧдіс дзоргыны-видзӧдны сюся. Но мый тайӧ? Сцена вылын петкӧдлісны асьсӧ... Ӧкулинаӧс. Да, да, дзик ачыс. И чужӧмыс и паськӧмыс. Мый сэні вӧчсис?

Сэсся сцена сайсянь Ӧкулина дорӧ петіс мудер синъяса, горшысла дзӧрысь кияса мӧд старука. Дзик сійӧ, коді велӧдліс Ӧкульӧс «коньяктӧ» пуны. Ӧкулиналӧн сьӧлӧмыс ыркмуні: овсис, тыдалӧ, сылӧн. Но кыдзи лысьтӧны тадзи тешитчыны сы вылын?

Ӧкуль чепӧсйыліс ӧдзӧслань, но орччӧн пукалысь нывъяс кутісны сойбордйӧдыс.

— Тані и висьтавнысӧ нинӧм, — кылӧ велӧдіс ӧти старукаыс мӧдсӧ сцена вылын. — Колӧ сӧмын самӧкурыдлысь рӧмсӧ вежны: лудікъясӧс сулеяад сюялыштны, сорлавны мыйӧнкӧ. Ме со турунтор тэныд сетышта...

Залын унаӧн вак-вакӧн серӧктісны, а кодсюрӧ и тупкисны ныръяссӧ: сцена вылысь кыліс клящӧй лудік дук, коді кӧрис ныртӧ.

Сулалӧ-ӧ висьтавны, мый та бӧрын Ӧкуль ордӧ некод нин эз пыравлыв, зывӧк лоис няйт ватӧ юны. Кутісны ещӧ висьтавны: Ӧкуль пӧ аскурсӧ весиг кунваӧн сорлалӧ. Лоис дугдыны «коньяк» пуӧмысь. Аслас верӧсыс эськӧ радейтӧ жӧ юыштны, но сы ради Ӧкульыд оз пыр рӧскодӧ: доходтӧм рӧскодтӧ пӧ мед кодкӧ мӧд морт вӧчӧ.