ПРӦСУЖ ПРИСТАВ
Приставыд вӧлі чуксасьӧ жӧ: оз петукӧн, а кырнышӧн. Гӧль мужик кӧ сы дінӧ локтас, чуксасьӧ тадз:
«Курк-курк-курк, кра-кра-кра.
Я слуга царя,
Ура, ура, ура!»
Сылӧн и молитва эм:
«Болван! Зырянская харя! Морда кирпича просит! Почему налог не платишь? Розгу хочешь?!»
Урадник-переводчик юалӧ дядьӧлысь: «Гӧгӧрвоин пӧ, мый шуис господин приставыд? Гӧгӧрвоа пӧ, кирпич корӧ менсьым, тыдалӧ, пач кӧсйӧ тэчны! Но менам абу кирпичыд. Сэсся розга корӧ — чужва пуны, буракӧ, кӧсйӧ. Розгатӧ ме кыа да вая, дон босьттӧг».
— Кирпич, кирпич! Розга, розга! — нерис урадник да скӧра равӧстіс: — Мыйла воттӧ он мынты?
Мужик зэв ёна жугыльтчис да шуӧ: — Менам керка помын пу грӧш абу, нинӧмӧн вотсӧ мынтыны. Вот тӧвнас ур кыя да мынта. Господин пристав тай шуис: таво ура лоӧ воыс. Сійӧ грамотнӧй, тӧдӧ: ура во али уртӧм во лоӧ? Сійӧ зэв гораа висьталіс: Ура! Ура! Ура! Медъя!
Приставлӧн мӧд пӧлӧс дивӧ на вӧлі: висерса дядьӧ сы ордӧ локтӧма кын чери вузавны, додь тыр, вонйӧн гартыштӧма. Висерса дядьӧлы приставӧс петкӧдлыны челядь гузь ӧкмисны. Дядьӧыд аслыспӧлӧс, пельтӧмов вӧлі, пасьтасьӧма омӧлика, руд дукӧса, нёль пельӧса шапкаа, кузь тошка.
Пристав юаліс переводчик пыр: тэ кытысь пӧ. Висерысь пӧ, господин пристав, Висерысь! Челядь гир-гир серӧктісны.
— Вый да яй он вузав? — бара юаліс пристав.
— Вый абу ни яй абу! Кын чери вузала — шуӧ дядьӧ. — Уна-ӧ сетан, господин пристав?
Пристав ку письыс нин петіс. Скӧрмӧмысла зымнитіс кокнас да горӧдіс: «Вон!»
Дядьӧ думайтіс: «Ставнас вонсӧ кӧсйӧ приставыд ньӧбны». Ӧдйӧджык котӧртіс додь дінас, кыскис нёль пудъя ноп пристав керкаӧ. А пристав терпенньӧсьыс петіс да тойыштіс дядьӧӧс. «Убирайся!» — шуис.
Урадник висьталіс чери вузалысь дядьӧлы: господин приставлы пӧ оз ков чериыд. Но тэ эн шогсьы. Тэ меным козьнав пуд джын чери, а ме тэнӧ нуӧда поп ордӧ, сійӧ ньӧбас став черитӧ, толькӧ донсӧ лэдз. Миян попыд зэв бур — кӧть кык дор вур. Да и неуна комиӧн кужӧ сёрнитны: пернапас да зібйыв спас, даръясьны да йӧз зептын паръясьны. Сӧмын тэ эн висьтась Висерысьӧн (челядьыс сылӧн бара кутасны ваксьыны), висьтась мукӧд сиктсаӧн.
Воисны поп ордӧ. Чери вузалысь дядьӧ и шуӧ, мыкталіг:
— Ме... абу, батюшко, Висерысь, а Сітбарысь. Кын чери вузала, зэв чӧскыд, — ӧд Сітвадйысь кыйи.
Поплӧн челядь бара сералӧны, вак-вакӧн.
Но поп ньӧбис джын донысь став черисӧ.
Гортас и висьталіс дядьӧ: приставыд пӧ квайт во нин приставалӧ Пальын, комияс пӧвстын, но сӧмын на кык коми кыв тӧдӧ: «вон» да «ура». Ыджыд гӧлӧсӧн кывъяссӧ шуалӧ. Сійӧ, дерт, бур — ура во пӧ лоӧ. Вон тыра черисӧ ме кыски пристав керкаӧдз, тӧкӧтьӧ гӧгйӧй эз вӧрзьы, но пристав эз ньӧб весиг ни ӧти кельчи.
