ЙӦЙ ПЕДӦР
Йӧй Педӧр да прӧсуж пристав ӧткодькодьӧсь: кыкнанныслӧн эм кык ки, кык кок, кык син; кыкнанныс ветлӧдлӧны му вывті, овлісны Пальын. Йӧй Педӧр лапотьшой новліс, юрас чуман сюйліс. Чуманас гижӧма кодкӧ шомӧн: «Ме сарлӧн зять». Пристав вӧлі югыд кизя паськӧма, картузас сарскӧй герб. Йӧй Педӧр мый сетасны, сійӧ и сёйӧ, весигтӧ ловъя лягуша вуз-вазкерас. Приставыд зэв писка: мыйсюрӧтӧ оз сёй. Сылӧн кынӧмыс висьӧ: катар желудка пӧ, карса врачьяс шуӧны. Паляд медся бура медицинатӧ тӧдліс Парӧ нима гӧгинь, чужысь кагаяслысь гӧг кӧрталысь бабӧ. Сылысь юалӧны йӧзыс, кутшӧм висьӧм пӧ сійӧ «катар желудкаыс». Гӧгинь шуӧ: ичӧтик татарин пӧ пырӧма рушкуас, визъялӧ пӧ сэні.
Йӧзыд и шуӧны: вот йӧй Педӧрыдлы пӧ татарин кӧть пырас рушкуас, ставыс пусяс Педӧр кынӧмын.
Сьӧд йӧзыд гӧгиньлы веритӧны.
Йӧй Педӧр мый тшӧктан, сійӧс и шуалӧ — комиӧн, дерт, но кывъяссӧ унджыксӧ он гӧгӧрво. Сійӧ кужӧ петукӧн чуксасьны: кияснас боксӧ чапалӧ (петук моз лэбзьыны кӧсйӧ), сэсся зэв гораа чукӧстчас:
«Кикуруллю-у!
Середа кӧть выллю-ун,
Меным быд лун уллю-ун!»
Сійӧс молитва лыддьыны велӧдӧмаӧсь:
«Ме орангутанг,
Ис пистана.
Йӧй сӧтана,
Паляс медыджыдыс тан,
Губернатор — менам бать,
А ме ачым сарлӧн зять...
Кикуруллю-у-у!»
Некод оз тӧд, коді татшӧм молитвасӧ велӧдӧма лыддьывнысӧ. Дерт, том войтыр, на пиын ветлӧдлісны тшӧтш и ссыльнӧйяс.
Педӧр бӧрся уна том йӧз ветлӧдліс, кывзісны сылысь сёрнисӧ, сералісны и жалитісны.
Сы бӧрся ветлӧдліс тшӧтш ӧти урадник, коді кесъясис приставлы. Пристав вӧлі ыджыд начальник, сы ки улын вӧлі вит урадник; найӧ видзӧдісны, оз-ӧ кодкӧ сарлы да начальстволы паныд мун.
Педӧрӧс босьтіс урадник соскӧдыс да кыскис пристав дорӧ. Сувтіс Педӧр приставлы паныд да петукӧн чукӧстчис:
«Кикуруллю-у!
Середа кӧть выллю-ун,
Меным быд лун уллю-ун!»
Пристав чуймис, юалӧ: код али садь пӧ тайӧ? Урадник гӧгӧрвоӧдіс приставӧс: тайӧ пӧ абу садь ни абу код, а круглӧй идиот. Сэсся Педӧр лыддис молитвасӧ. Урадник вуджӧдіс роч вылӧ. Пристав скӧрмис да уль кулаксӧ вайӧдіс Педӧр ныр дінӧ.
А Педӧр и шуӧ:
«Бур господин пристав,
Ас закодад дристав!»
(Ссыльнӧйяс велӧдісны татшӧм кывъяссӧ шуны, кутас кӧ приставыс кулакнас шенасьны).
Пристав и юасьӧ урадниклысь, мый сійӧ лоӧ «ас закодад дриставыс»? А урадник, мед не лӧгӧдны приставсӧ, тадзи переведитіс: «Тэ пӧ, пристав, зэв бур морт, тэнӧ пӧ ме ошка».
Пристав бурасис и сьывны Педӧрлы тшӧктіс молитвасӧ Паль кузьта и Паль пасьта: Даньдор пыдӧссянь вичко дорӧдз ошкы пӧ менӧ. Но асьтӧ пӧ сар зятьӧн эн лыддьы.
Пристав ӧшинь улӧ йӧз нин чукӧрмис, виччысьӧны Педӧрлысь петӧм.
Педӧр петіс. Сылысь юалӧны: «Мый шуис приставыд?» Педӧр шуӧ: «Сар зятьӧн пӧ оз позь меным висьтасьны».
Ковмис вежыштны Педӧрлы молитвасӧ:
Ме орангутанг,
Ис пистана
Йӧй сӧтана,
Паляс медыджыдыс тан,
Губернатор — менам бать,
Ачым абу сарлӧн зять.
Сар нывкӧд ме юкси,
Ачым сарӧ пукси...
Тэ, господин пристав,
Ас закодад дристав.
Ветлӧ Педӧр да лыддьӧ ассьыс молитвасӧ. Урадник мыйкӧ дыра вӧтлысис сы бӧрся, сэсся дӧзмис да сьӧвзис, муніс гортас: мый сэсся, кӧть дасысь кыскав пристав дорад, дӧзмӧдан сӧмын начальствотӧ.
