РУЧ КӦИНКӦД
1.
Руч тшыгмис, туй вывті пышйӧ, ӧтарӧ-мӧдарӧ видзӧдӧ: сёянӧн оз-ӧ позь дасьтысьны. Аддзӧ сійӧ — додь вылын морт нуӧ кын чери. «Чери видлыштны абу эськӧ омӧль», руч арталіс. Водзӧ котӧртіс, туй вылӧ водіс, бӧжсӧ нюжӧдіс, кокъяссӧ веськӧдіс... Шой кодя сійӧ лоис! Морт матыстчис, руч вылӧ видзӧдліс, шуис: «Гӧтырлы пась вылас сьылі кытшов шань лоас». Босьтіс ручӧс бӧжӧдыс, додь вылӧ сійӧс чӧвтіс, бонйӧн вевттис, ачыс нӧ муніс вӧв бердын. Руч эз куйлы дыр, доддьын розь писькӧдіс, сы пыр пондіс шыблавны чери... Чери бӧрсянь чериӧс, быдсӧн шыблаліс, сы бӧрті ачыс ньӧжйӧникӧн петіс додь вывсянь. Морт гортас воис, видзӧдліс — чери абу, сьылі кытшов бара абу!
2.
Руч аслас гуӧ чери кыскаліс; сэк гу дорас пуксьӧ, чери сёйӧ. Сійӧ аддзӧ — кӧин котӧртӧ. Тшыгсянь сылӧн кынӧмыс висьӧ. «Дзоньвидза, ручанӧй, мый тэ сёян?» — «Чери, кӧинӧй». — «Сет меным ӧтиӧс». — «Кыдз нӧ! Вомтӧ паськӧд! Аддзан, кутшӧм тэ сюсь: ме кыйи, тэ нӧ пондан сёйны». — «Сет юрсӧ сӧмын, ручӧй!» — «Бӧжсӧ ог сет, кӧинӧй! Ачыд кый, дзоньвидза сёй». — «Кыдз нӧ тэ кыйин? Велӧд». — «Шань! Шорын корсь юкмӧс, сэтчань бӧжтӧ сюйышт, пукав, шуав: «Шедӧдчы, чери ыджыд, ичӧт — сэк сійӧ шедӧдчас.
Кӧин аддзис юкмӧс, вайӧ бӧжсӧ сюйыштіс, пукалӧ-вурзӧ: «Шедӧдчы чери ыджыд, быдсӧн ыджыд». Руч воис, гӧгӧр котралӧ, шуалӧ: «Кынмы, кынмы, кӧин бӧж!» — «Ручӧй, мый тэ шуалан?» — кӧин юалӧ. «Сійӧ мый тэ, кӧинӧй: шедӧдчы чери ыджыд, ичӧт». Кӧин бара пукалӧ, важ кывъяссӧ шуалӧ, руч нӧ асласъяссӧ.
«Ручӧй, кыскыны абу-ӧ кад?» — кӧин юалӧ. — «Абу на, ме висьтала, кор кад лоас», — руч шуӧ. Кӧин бара пукалӧ, важ кывъяссӧ шуавлӧ, руч асласъяссӧ. Руч аддзӧ, мый юкмӧс шаня кынмӧма, шуӧ: «Ӧні, кӧинӧй, кыскы». — Кӧин пондіс кыскыны — кыскыны эз вермы!
«Аддзан, тэнад горшыд кутшӧм паськыд!» — кӧинлы руч шуӧ: «Пыр тэ шуалін: шедӧдчы чери ыджыд, бара на ыджыд; ӧні кыскыны он нин вермы! Виччысь, ме чукӧста тэныд отсӧд вылӧ!» Руч котӧртіс сиктӧ, пондіс ӧшинь улын горзыны: «Шор вылӧ мунӧй кӧинӧс вины; йи дінӧ кынмис». Мортъяс котӧртӧны шор вылӧ, код черӧн, код вожӧн. Кӧин аддзӧ локтан шогсӧ: вын пырсьыс орӧдчис, бӧжсӧ орӧдіс; бӧжыстӧг лэччис пышйыны, кытчӧ синмыс видзӧдӧ, руч нӧ сылы бӧрсянь горзӧ: «Бергӧдчы, кӧинӧй, чери вунӧдін!»
