ЧОЖИНЬЛЫБара тай кӧнкӧ, кылӧ,воӧма Ай вужӧй, ыджыд вужӧй, Муса уніньӧй (чожиньӧй)! Ме дор, гашкӧ, тэӧй воин Ӧти бур кыв горӧдчыны? Мед эськӧ тэ, майбырӧй, Йӧз мортысь уна войдӧр воин, Вердысь-удысь айлысь, вердысь-удысь эньлысь Дженьыд мывкыднысӧ нюжӧдін: Тэнсьыд гашкӧ шытӧ кывлісны, Тайӧ уджсӧ эз уджавны. Уна тай меӧй тіянлысь Ӧдзӧс дзирнытӧ бырӧді; Уна тай меӧй тіянлысь Чӧскыд пуӧм-пӧжалӧмтӧ сёйи-юи, Водзӧс пуктытӧгыс; Уна тай меӧй тэнсьыд Эзысь кытшъя пельтӧ сьӧдмӧді Повтӧг, яндысьтӧгыс. Асъя тай ме вӧлі тіянӧ воа — Мысьтӧм бана волысь; Лун шӧръя тай ме вӧлі воа — Пызан шӧр волысь; Рытъя тай ме вӧлі воа — Кӧмтӧм кок волысь; Вой шӧръя тай ме вӧлі воа — Вольпась шӧр волысь. Лун шӧр кӧ, вой шӧр кӧ вӧлі воа: Эн тай тэӧй кужлывлы Лёкпырсьыд горӧднысӧ; Эн тай тэӧй кужлывлы Чорыдджыка шунысӧ. Муса уніньӧй (чожиньӧй), Вунӧдтӧм бурӧй! Кыдзи нӧ меӧй кута Тэ ордын вылӧм вунӧдныс? Уна тай менӧ, коньӧрӧс, Бур вылас велӧдін; Уна тай менӧ, коньӧрӧс, Аньтуй вылас пуксьӧдін. Эн бара менӧ, коньӧрӧс, Майбырӧй, вунӧдлы; Эн бара менӧ, коньӧрӧс, Эновтлы, кедзовтлы; Водза этшӧн нӧ, майбырӧй, Бур пыдди пуктывлы; Водза этшӧн нӧ менӧ, коньӧрӧс, Шань пыдди лыддьывлы. Муса уніньӧй (чожиньӧй)! Кок улӧдзым тай меӧй юрбита Бур пыдди пуктӧмыд вылӧ, Шань пыдди лыддьӧмыд вылӧ. Быдӧн дінысь тай меӧй куті Кӧдзавны-янсавны, Кӧдзалӧма кӧрт этшӧн, Янсалӧма ыж этшӧн.
