***

Олас-вылас ӧксы гозъя. Налӧн вӧлі куим пи, ӧти ныв. Найӧ пондісны вӧзйысьны ыркӧдчыны.

Кор лэдзисны найӧс, найӧ мунісны-мунісны; эзысь кыдз воис. Медыджыд вокыс пондіс вӧзйысьны: «Муса вокъяс, муса чойӧй! Лэдзӧй — ме кая эзысь кыдз вылӧ, эзысьсӧ лэдзышта». Вокъяс чойыскӧд шуӧны: «Эн кай, эн кай, муса вокнымӧй (вокӧйным)! Сэтчань сибдан». Сійӧ шуӧ: «Ог сибды». Кайис-кайис, сибдіс. Вокъясыс чойыскӧд колисны сійӧс.

Мунісны-мунісны, зарни кыдз воис. Шӧркост вокыс пондіс вӧзйысьны: «Муса вокӧй, муса чойӧй! Ме кая зарнисӧ лэдзны». — «Эн кай, эн кай; сэтчань тэ сибдан». — «Ог сибды». Кайис. Зарнисӧ лэдзис-лэдзис; кор нӧ лэччыны пондіс, сибдіс. Чоя-вока бӧрдісны-бӧрдісны, сэсся сійӧс колисны.

Мунісны-мунісны; жемчуг кыдз воис. Сэк ичӧт вокыс пондіс вӧзйысьны: «Муса чойӧй! Ме кая кыдз вылас, жемчугсӧ лэдзышта». — «Эн кай, эн кай, муса вокӧй! Сэтчань тэ сибдан: мый сэк понда керны?» — «Ог сибды». Кайис. Жемчугсӧ лэдзис-лэдзис; кор нӧ лэччыны пондіс, сійӧ сибдіс. Коньӧранӧй-нылӧй дыр бӧрдіс, сӧмын лоис нӧ сылы кольны воксӧ.

Нылыс ӧтнас нин мунӧ. Муніс-муніс, керкаяс тыдавны пондісны: сэтӧн ӧксылӧн оланін вӧлі. Ӧксылӧн керкаыс вӧлі ыджыд, шань. Посводз улас вӧлі кымыньтӧма сур пуан тшан. Ныв пырис тшан улас, пондіс сьывны:

Кук-ку, ӧксы пиянъяс!

Менам куим вок вӧлі,

Ӧні ӧти вок эз ло:

Ӧтик вок менам

Эзысь кыдз йылын,

Мӧд вок менам

Зарни кыдз йылын,

Коймӧд вок менам

Жемчуг кыдз йылын:

Дзолльӧн дзоллясьӧны,

Мачӧн мачасьӧны.

Ӧксы пиянъяс кылісны, мый кутшӧмкӧ ныв мичаа сьылӧ; найӧ корсьны лӧсьӧдчисны: «Код воклы пӧ сюрӧ, сылы гӧтыр вылӧ лоас». Сэк ыджыд вок петіс, корсис-корсис, сӧмын эз аддзын. Пырис. Ныв бара пондіс сьывны:

Кук-ку, ӧксы пиянъяс!

Менам куим вок вӧлі,

Ӧні ӧти вок эз ло:

Ӧтик вок менам

Эзысь кыдз йылын,

Мӧд вок менам

Зарни кыдз йылын,

Коймӧд вок менам

Жемчуг кыдз йылын:

Дзолльӧн дзоллясьӧны,

Мачӧн мачасьӧны.

Сэк шӧркост вок петіс, пондіс корсьны. Корсис, корсис, эз аддзы. Кор керкаӧ пырис, сэк ныв бара пондіс сьывны.

Кук-ку, ӧксы пиянъяс!

Менам куим вок вӧлі,

Ӧні ӧти вок эз ло:

Ӧтик вок менам

Эзысь кыдз йылын,

Мӧд вок менам

Зарни кыдз йылын,

Коймӧд вок менам

Жемчуг кыдз йылын:

Дзолльӧн дзоллясьӧны,

Мачӧн мачасьӧны.

Сэк медічӧт вокыс петіс; корсис-корсис, медбӧрын аддзис. Сы сайӧ ныв петіс верӧс сайӧ. Ӧнӧдз найӧ олӧны-вылӧны.