***

Kиeв. 26 Апреля 1916 г.

............................

Ме ӧні пыр письмӧяс комиӧн гижала, тэныд кындзи, но и тэныд ӧнісянь кута гижны комиӧн жӧ. Быдӧн ас кывйӧн ас костаныс сёрнитӧны миян кындзи, коми кындзи.

Сэки тай толькӧ вӧлӧм муса и дона лоӧ ас сёрниыд, кор он кыв сійӧ, ылісянь видзӧдлӧмӧн, янсалӧм бӧрын. И гортладорыд, чужан муыд сідз жӧ.

Гажыд бырӧ и кыскӧ сэтчӧ. Мед ылын кӧ, мед кӧдзыд кӧ, мед гажтӧм миян войвыв, но мен гортладорын кодь долыд и гажа некӧн абу и оз ло. Мед жӧ Ен сетлас на волыны сэтчӧ, аддзӧдлыны Коми мусӧ, олыштны-вылыштны...

Но, прӧщай. Бур мывкыд, долыд олӧм, кузь нэм — ме тэныд желайта! Вениамин

Талун праздник миян Выльгортын — Степан лун. Ёна жӧ нин гаж быри гортладорысь и быдӧнысь. Эськӧ колӧкӧ Выльгортӧ талун кайлім не кӧ ме Киевын, а тэ Нэмдінын. Кыдзи нин мый олӧ Ан. В.?

Иона в Костроме был, но теперь уже, наверно, его нет там. Где твой брат Иван? — Жив ли?

Киев. 14 Мая 1917 г.

Олан-вылан, дорогая Аренька! Тэ кӧнкӧ ӧні гортад нин. Тэ гижлін бӧръя письмӧад (24 апреля), регыд тэ гортӧ лэччан. Сыысь водзынджык гижлӧмыд (14 апр.) вӧлі и он нин тшӧкты вӧлі гижны Нэмдінӧ, но ме ещӧ на ӧтикӧс сэтчӧ мӧдӧдлі, ог тӧд толькӧ, пӧлучитлін эн. Деньга тэнсьыд сизим шайт пӧлучитлі — аттьӧ. Зэв лӧсялі. Ме снимитчи. Талун тэныд мӧдӧда ассьым чужӧм-вуджӧрӧс. Эн шензьы, мый паськыд чужӧмӧй! — Пӧсялӧма вӧлі и сійӧн сэтшӧм лосьӧма.

Татчӧ меным тэ эн нин гиж, письмӧ оз нин су. Майын миян помасяс занятиеяс, а июньын петам нин татысь. Офицерӧн ме ог ло навернӧ, сы йылысь ме гижлі нин.

Сійӧ ме сайын вӧлі, но ог желайт. Разве против желания вӧчасны нёль тӧлысь мысти, а ӧні пета унтер-офицерӧн или рядӧвӧйӧн.

Гижны кӧ дыр тырмас, но тэ, ме надейтча, понимайтан менӧ, ме прӧстӧ сідзи эг вӧч...

Гортӧ волыны регыдӧн ме ӧні ог вермы, кӧть и пӧлучита татысь петігӧн неуна деньга. Полксянь, гашкӧ, недыр овмысьт лэдзласны. Иона вок бара ветлас гортӧ ме пыдди.

Ме пыр виччыся пом войналысь, но пом век на оз тыдав. Кор нин и помасьлас?!

Пыр зэв шог и деливӧ. Гажтӧм сьӧлӧм вылын. Жаль, пӧра кольӧ, бур том пӧра весь вошӧ...

Талун зэв лӧсьыд луныс, сэтшӧм гажа, что бӧрдны окота...

Но, прӧщай сэсся ӧні кежлӧ.

Тэнад Варыш, кыдз тэ шулін важӧн. (Веня)

16 мая. Вӧлисьт мӧдӧда. Эг слӧймы, талун воис тэнад письмӧыд, кодӧс гижӧмыд 30 апреля. Гижны ог эшты. Зэв вывті шог и деливӧ сьӧлӧм вылын. Пӧраыс сэтшӧм ӧні тані, война вылын дорсьыс страшнӧ овнысӧ. Тӧрыт уна лои переживайтны...

Прӧщай.

21 Мая 1917 г., г. Киев

Олан да вылан, Аренька — шань нылӧй! Бара нин ме тэнсьыд пӧлучиті письмӧ, кодӧс гижлӧмыд 30 апреля Нэмдінсянь на. Аттьӧ жӧ тэныд, мый он вунӧд — пыр казьтывлан.

Прӧстит, мый ме гежӧда гижа. Колян вежонӧ ме мӧдӧді тэныд ассьым карточкаӧс — воис эз бара-а, — зэв вӧлі некор и ачым эг эшты сдайтны пошта вылас да, йӧз ки пыр мӧдӧді заказнӧйӧн, но квитанциясӧ эг пӧлучит — ог тӧд, сдайтліс эз служительыс, кодкӧд мӧдӧді. Сыысь водзын дзик мӧдӧді ыджыд письмӧ жӧ и Нэмдінӧ на адресуйтлі, но тэ кӧнкӧ эн нин сэн вӧв. Ӧні, дерт нин, важӧн гортад. Кыдз нин мый олан? Талун Троица лун — гажа лун. Уна юрын дум, уна эм сьӧлӧм вылын, важ олӧм дум вылӧ уси... ог нин лучшӧ гиж татчӧ, всё равно ог во гортӧ, кокни оз ло... Вот эськӧ кӧ друг тайӧ гижигӧн вои сэтчӧ тіян олан дінӧ?!

Мый нин талун и гижан тэныд? Век ӧтитор лоӧ — шог да гажтӧм, быд письмӧын ӧтитор йылысь лоӧ. Лучшӧ ог нин казьтыв.

Мый нӧ сэсся гижан? — нинӧм сьӧлӧм вылын абу мукӧдтор, толькӧ кольӧма шог да синва важ олӧм йылысь. А водзӧ нинӧм оз радуйт! Кӧн нӧ помыс тайӧ олӧмыслӧн — оз помыс некӧн тыдав. И кыдз жӧ ме верма водзӧ йылысь думайтны.

Коркӧ эськӧ кӧ мынла тайӧ олӧмсьыс, сэки бара на ловзьыла, бара на сьӧлӧм воссьылас олӧм вылӧ, вир вӧрзьылас и юр кыпавлӧ.

А ӧні аддзан — нинӧм на абу, ог лысьт надейтчыны счастье вылӧ, вывті нин дыр кыссьӧ тайӧ сьӧкыд пемыд олӧмыс, что ставсӧ нин виис мый вӧлі сьӧлӧмад. Толькӧ пӧра вылын воссьылас ставыс син водзад и сьӧкыд, — сьӧкыд сэки овны...

Тэ юалан гортӧ волӧм йылысь. Нинӧм ӧд ог тӧд, лоӧ оз волӧм.

Рад что тэ желайтан менӧ аддзӧдлыны, меным сэтшӧм жӧ окота тэнӧ аддзӧдлыны. Но нинӧм на ӧні ог тӧд, лоӧ оз волӧм гортӧ — не аслад вӧля, небось он мун, кутшӧмкӧ эськӧ окота жӧ да, ок, эськӧ борда пӧткалысь кӧ бордсӧ имеитны — лэблі жӧ ме сэтчӧ войвыв стӧрӧнаас...

Сэсся дугда талун гижны, тырмас. Прӧстит. Лучше ланьтны, чем шогӧдны мӧдӧс.

Прӧщай. Тэнад Веня.

Прӧстит, мый этша гижа. Уна эм сьӧлӧм вылын, но юрӧй оз уджав ёна думайтӧмысла.

Поклон гортсаныдлы месянь!

14 июня 1917 г.

Олан-вылан, Аренька! Дыр нин менсьым эн пӧлучитлы тэ письмӧ, кӧнкӧ проч нин дӧзмин, — куим вежон дорысь нин дыр ме эг гижлы, и он нин чайт кӧнкӧ менӧ татысь. Но ме век на важ местаын — Киевын, военнӧй училищӧын.

Ме вӧлі думайта — мися ӧд, кӧнкӧ регыд мӧдӧдасны мыйӧн занятие кончитчас, но коймӧд вежон нин вот помасис велӧдчӧм, тӧварышъяс важӧн нин муналісны, а ме век на тан. — Ола прӧстӧ, нинӧм ог кер; но не шойччӧм меным тайӧ олӧмыс... ёнджыка страдайта, чем водзын вӧлі.

Водзын (занимайтчигӧн) кӧть омӧльджыка нин вӧлі сьӧлӧмӧй висьӧ, сэки вӧлі сэтшӧма мудзан, что онджык сэтшӧма чувствуйт шогсӧ, вывті ёна мудзӧмыс вӧлі вевттьӧ. А ӧні тайӧ виччысьӧмнас проч лигышті; думайтсьӧ, кытчӧ бара веськала-а, мый менӧ ожидайтӧ водзын. Меным век жӧ кыдзкӧ неудача. Вот мукӧдлаысь лэдзисны учительясӧс гортъясӧ (миян Иона кӧнкӧ важӧн нин гортын), а ме веськалі сэтшӧм местаӧ, кытысь оз лэдзны. Быдлаын лэдзӧмаӧсь, а Киевскӧй военнӧй округысь оз. Кутшӧм ӧбиднӧ.

Учительяс требуйтӧны тані, мед эськӧ и татысь лэдзисны. Кодкӧ лун ме ветлі салдатскӧй—учительскӧй собрание вылӧ. Ходатайствуйтам, но кор на мый кӧть и лэдзасны да, сэтчӧдз ме верма на позиция вылӧ веськавны. А ӧні сэтчӧ йӧз уна колӧ. Заводитӧны наступайтны миян. Чукӧртӧны желающӧйясӧс «батальон смерти»-ӧ поступитны...

Кор нин и помасьлас тайӧ проклятӧй войнаыс. Кызвын салдатыс (пӧшти быдӧн) ӧтказывайтчӧны наступайтны водзӧ, но офицерство и капиталистъяс ыззьӧдӧны, — ог тӧд толькӧ, налы удайтчас оз-а. Сійӧ толькӧ горзӧ «война да война», «до победы война», коді в безопасности чувствуйтӧ асьсӧ, сэтшӧмыс жӧ и старайтчӧны кыдзкӧ-мыйкӧ лӧнинынджык овны. Шуныыд ӧд кокни, — не кувны...

Ме ог тӧд, мый нин и лоӧ, кор нин помыс волас. Гожӧм бара нин воис, и дерт нин коля. Проклятие! И некыдз оз вермыны помавны война тайӧ. Миян эз сӧгласитчыны сепаратнӧй мир вылӧ Германиякӧд — сэк эськӧ и помыс вӧлі, да вот эмӧсь на врагъяс Россия пытшкас. Пропадитас, рӧзӧритчас Россия... — и уна жӧ тор ӧні быдлаын, толькӧ сійӧ и кылан.

Сэтшӧма нин надоедитіс быдтор, что ог тӧд. Зэв нервнӧй лои, прамо таки ачымӧс ог тӧд. Да и ревматизмӧй ёна мучитӧ. Думайта татысь петмысьтӧн комиссия вылӧ проситчыны, колӧкӧ и мына, — ӧні выль расписание болезней петіс и сійӧ серти ме та ногӧн мына, а именнӧ ревматизм и неврастения освобождайтчӧ воен. службаысь.

А и дыр жӧ нин тані куті овны. Мӧдӧдісны эськӧ колӧкӧ регыд после 1 июня бӧрти, да вот кодсюрӧыс ме коддьӧмыс отпускӧ мунісны кык вежон кежлӧ. Тайӧ лунъяс воасны нин и, дерт, лун-мӧд мысьт петам. Меным тожӧ вӧлі вӧзйӧны, но ӧткажитчи — кытчӧ нӧ ме кык вежоныд кежӧ муна — весиг ӧд туй вылас оз тырмы кык вежоныд.

Меным татысь сетсьӧ 135 рубль деньга, но сё шайт дорысь унджык мунас обмундирование вылӧ, так что менам кольӧ шайт комын толькӧ, но сійӧ комын шайтыд ӧні куим шайт кодь. Сёйны нинӧм оз сюр нинӧм вылӧ, ог тӧд, кыдзи кӧсъясны еще воюйтны.

Ок, ок, ок, Аренька! Частӧ тай ышловзьысьӧ, мыйӧн водзӧ век кыдзкӧ шогджык. Оз нин нюмӧй петлы некор, оз серӧктышт.

Письмӧяс важӧн нин оз воны и дыр на ещӧ лоӧ виччысьны.

Тэнсьыд бӧръя письмӧястӧ от 8 мая и от 21-го мая пӧлучитлі. Кӧть эськӧ он нин гиж гортысь олӧмсӧ, — ещӧ нин сьӧкыд; тӧдны окота, зэв окота, но и сьӧкыд сьӧлӧмлы, что кӧнкӧ эм оланін, лӧсьыд вӧльнӧй олӧм...

Прӧщай жӧ! Тэнад Веня.

Тӧрыт вӧтӧн тэнӧ аддзыштлі, колян вежонас тожӧ. А ог ӧд аддзыв зэв... Поздравляйта тэнӧ Купальнича лунӧн и Петыр лунӧн... регыд нин воас...

10 сентября 1917 г. Помӧсдін.

Олан-вылан, Аренька! Вот ме и гортын; вои ме рытын — Пожӧгын задержитісны. Гижны уна ог эшты — эн дивит, пукала собрание вылын — первой Волостнӧй земскӧй собрание миян.

Менӧ бӧрйисны председательӧ Земскӧй Управаас и кӧсйӧны хлопочитны сӧвсем кольӧдны гортӧ. Ог тӧд, мый лоӧ сэсся.

Вои и ог вермы некыдзи успокоитчыны — сэтшӧм уна выльтор меным тані...

Гиж ачыд сэсся. Тэсянь вотӧдз ме ог куж сэсся, кытчӧ тэн гижны. Прӧщай.

Тэнад Веня.

21 сентября 1917 г.

Ок, ок, ок! Мый бара тэ думайтан ме йылысь, Аренькаӧй-а! Быд ногыс кӧнкӧ видан и ёран менӧ. А дыр жӧ нин эг гиж письмӧтӧ. Прӧстит жӧ, верман кӧ.

Мыйсӧ нин кӧнкӧ эн думайт ме йылысь! Коньӧрӧй, этша кӧнкӧ мучитчин думнад. Тэныд, воддза письмӧ сертиыд, кодӧс гижлӧмыд лэччигад, Джеджимын зэв сьӧкыда гижӧма. Ме талун ог вермы сійӧ письмӧ вылӧ ӧтветитны. Прӧстит! Ог эшты. Пищальӧн лыйсьыны мӧдӧдча — зэв окота лои ветлыны.

Ола омӧлика. Быд лун ӧтилаӧ да мӧдлаӧ гӧститны корӧны — сурӧн юктасьӧны. Сэсся талунсянь тырмас! Абу лӧсьыд кыдзкӧ сьӧлӧм вылын — зэв шог и деливӧ, весиг винаыс оз гажӧд: водзын вӧлі юлывла да, сьывны да йӧктыны пыр заводита, а ӧні ме ог тӧд, мый мекӧд. Овлі рыт-мӧд и нывъяс дінын. Эн ревнуйт! Веськодьӧсь ставныс. — Толькӧ окота овлывлӧ дурыштны дзоляника. Сэсся нинӧм. Ок, тэ кӧ вӧлін, кутшӧма ревнуйтін. Тані нывъясыс мӧда-мӧд выланыс лӧгалӧны ме понда. (Ме сійӧ заметиті). Ӧтикӧд кӧ заводитан дурны, пыр кутасны вежӧктыны. Теш. Не толькӧ нывъяс, но и верӧсаяс тшӧтш, быттьӧ ме налӧн ли мый ли. Аски бара локтасны миянӧ, Ионалӧн нимлун. Сэсся ог нин татшӧма ю. Талун вот тӧрытсясьыс киӧй дрӧжжитӧ.

Тырмас!

Ӧтвет телеграмма вылӧ эз на во. — Ог тӧд мый воас — кольӧдасны оз. Надея абу. Лэччыны кӧть и самӧй Пӧкрӧв лунъясӧдз-а, ог лэччы. Гиж, кӧні тэнад лоӧ патераыд. Прӧщай.

Тэнад Вень.

21 Сентябр 1917 г.

Помӧсдін.

Миян тані тӧв нин, лымъя коймӧд лун.

Уткаяс лэбӧны, колӧ лэччывны кыйны.

28 сентября 1917. Помӧсдін

Олан да вылан, Аренька.

Ме пыр на гортын, ог тӧд кодарӧ лоӧ. Кольӧм йылысь нинӧм на ог тӧд — эз во — ӧтиӧс сетлім да ӧні мӧдӧс нин (телеграмма).

Ӧні Управаын нинӧм на прамӧя ог кер. Шойчча-тшӧгӧдча, быд лун гӧстита, чери-яй сёя. И ачым тожӧ кыя. Тӧндзи уткаясӧс лыйла, а тӧрыт вӧрӧ петавлі да кык кӧч да кык ур кыйи.

Гортын ен сыкӧд миян олӧны на. Нянь бур и уна воӧма, турун сыысь бур — сур пуӧны да олӧны. Тан жӧ эськӧ тай и овныыс да. Зэв не окота мунны.

А тэ нӧ кутшӧма олан? Кыдзи-мый карын овмӧдчин? Он жӧ тай гиж. Час, гашкӧ, талун воас жӧ нин сэсся.

Гижны сэсся торъя нинӧм йылысь.

Прӧщай, эн дивит.

Тэнад ВенЧи...

12 октября 1917 г.

Аренька! Ме бара этша гижа — прӧстит! Тэнсьыд письмӧтӧ от 6 октября пӧлучиті. Гижны торъя нинӧм. Пыр на вися — мӧдӧд вежон нин некытчӧ ог петав. Аски нимлун — некодӧс ог кор, сідз гашкӧ кодкӧ пыравлас-а, ачым тожӧ ӧні некытчӧ эг ветлыв — ёна эськӧ корлісны да. Кор нин и бурдла? Зэв делӧ — абу висьӧмысла, а прӧстӧ сідз мыйкӧ. Лэччыны карӧ ог на кӧсйы — виччысьла нин Питерсяньыс — мый воас. Ӧти телеграмма воліс да, толькӧ гижӧны, что ходатайство возбудитӧма. Министр внутр. дел-лы.

Воддза письмӧясыд тэнад воліс жӧ. Тэ юалан, гижлі эг ме Кинешмаад. — Гижлі важӧн нин, ог тӧд толькӧ, тӧварышӧй сэн нин абу. Ан(?). Вас. эг аддзыв, ӧні тшӧктӧмыд вӧлі висьтавны да. Сунис абу тані. Кор Ан. Вас.-ыдлысь. Гашкӧ сылӧн аслас эм. Регыд тэ ордӧ гӧсть локтас, Иона — собрание вылӧ кутас лэччыны.

Сэсся прӧщай! Тэнад ВенЧик

12 октября 1917 г. 10 ч. веч.

с. Помӧсдін