ВЫЛЫС ЧОВСА ДНЕВНИКЫСЬ
«Увы! — утешится
печаль^Н. А. Некрасовлӧн кывбурысь строка-цитатаын жена кыв пыдди Тима Веньлӧн гижӧма печаль, тыдалӧ, шогсӧ тӧдчӧдӧм могысь./^,
И друга лучший друг забудет».
(Н. А. Некрасов).
«Ешё одно последнее сказанье...»
(А. С. Пушкин).
* * *
...Гаж бырӧма бумага-карандашысь, сьӧлӧм доймымӧн гаж петӧ гижны-пасъявны ас гӧгӧр, горт гӧгӧр олӧм йылысь, казьтывны дзолядырся олӧм йылысь; окота гижны ас сиктлысь история, кодӧс ме важӧн нин пондывлі чукӧртны, сы йылысь материал — ӧтитор, мӧдтор. И нӧшта на гаж петӧ гижны, кыдзи горӧдчывсьывлӧм кодыркӧ аслам: «Став сьӧлӧмӧн, быд сі йыв эбӧсӧн олӧмсӧ тіравны-кывны». И огӧ на шуӧй Пимен-летописец моз, мый тайӧ лоас медбӧръя сказанье-кыв... Колӧ овны, овны на, овны творческӧй удж кузя. Ок, этша на, этша керӧма лои, вӧлисьт на вӧлі опытыс чукӧрмӧма, но уджӧй ори...
В. Чисталёв.
* * *
30/ІІІ — воим В.-Човйӧ.
31/ІІІ — петім уджавны. Шондіа, гажа лун. Керъяс туплялім.
2/ІV — уджалім войын. Тӧла, кынми.
2, 3, 4, 5 — вӧр завод дорын клёпка тэчалім. Висьми.
6, 7, 8, 9 — виси, эг петавлы.
8/ІV — гортсалы сеті юӧр.
9/ІV — важ «Ыджыд лун». Казьтывлі. Твӧриті «Тувсовъя» гижӧдӧс. Гаж бырӧм.
10/ІV — воді больничаӧ.
12/ІV — волісны Ольга^Ольга — Тима Веньлӧн племянница./^ да Анна^Анна — Тима Веньлӧн чой./^, вайисны гӧснечьяс... Усьӧ лым, тӧла, кӧдзыд — нач тӧв.
15/ІV — улялӧ... Шонді оз мыччысьлы.
15–25 — чорыда висьӧдіс кынӧм.
25/ІV — пыр уль чизыр поводдя, став лысьӧм жугӧдӧ.
26/ІV — мӧдӧда письмӧ Муза ним вылӧ.
* * *
Март 30 лун, 1934 во.
Челядь менам, Муза да Авъя, узисны ме дінын, менам вольпасьын. (Мамысла дорысь талун вӧтлӧмаӧсь). Водз на, муртса шонді нырсӧ мыччӧ, водз тулыс — природа садьмӧдчан кад: чарӧма, топыд лым, вӧр пу йыв воссьӧма, кодсюрӧ кайяс локтӧмаӧсь нин, лун сьӧмӧс кадӧ сьывны босьтлӧны; асылын ылын кургывлӧ тар...
Ме садьми, Муза да Авъя ӧтмӧдар бокын менам узьӧны, эг чеччы, медым не садьмӧдны; но садьмӧдіс найӧс выль чужысь морт, рытыв вежӧс сайын кылӧ пондіс бӧрдны (Агния^Агния — Тима Веньлӧн племянница./^ меным водзджык нин висьталіс, коді чужӧма: — «детинка пӧ», — вашнитіс сійӧ).
— Коді нӧ кылӧ? — шензьӧны, юалӧны менсьым.
— Тіян вок, мися...
— Кутшӧм вок?!
— Вокан нима кага, видзны тіянлы, — вирс чеччисны Муза да Авъя, котӧртісны ӧдйӧджык видлыны выль чужӧм кагаӧс.
* * *
Улялӧ... Сыкалӧ-келӧ лым сӧнікӧд апрель. Лунъяс чусыдӧсь, гудырӧсь. Кодыр воссьыштлас енэж, кизьӧриник лолывлӧ сынӧд. Видзӧда ю сай вӧр вылас: коз сора пипуа, кыдз пуа рас; кӧнкӧ-кӧнкӧ ӧткымын пожӧм; юрӧн-джынйӧн вылынӧсь мукӧд вӧр пусьыс, дзуг увъя йылаӧсь сулалӧны зумыш.
И... на пӧвстын кольӧма дзик ӧтнас наысь на вылын ёсь йыла конда...
* * *
Апрель 28. Зэрӧ. Чов ю тузьӧ, ог тӧд, мукӧд юяс кыдзи, дерт жӧ, кӧнкӧ, водзӧ туӧны. Кыдзи менам Помӧс, Эжва? Менам чужан, мыссян-юан ва! Эжва йыв, дерт, важ моз воссис, воис рыӧн Помӧсдін весьтӧдз, а Помӧс ю воссис мельнича прудсянь аслас усянінӧдз.
Гортладор нюкыстъясті, сёнъясті визувтӧны-бузгӧны шоръяс, ыбъяс-муяc лымйысь кушмӧны...
«Яг вылын»^Яг выв — сиктын места./^ мыччысис луд, котралӧ челядь асывсянь рытӧдз; Вокан менам сэні жӧ тшӧтш... Югыд шондіӧй, пиӧй!..
Лыддяла Пушкинӧс. «Черновые наброски и критика». Лыддя тшӧтш Ст. Цвейгӧс.
«...всю долгую жизнь он стремился на эту родину, словно к небу своей души: детство Гельдерлина — это самое ясное, самое счастливое, лучезарное время...»
(Ст. Цвейг).
* * *
Апрель 30. Сьӧкыда висьӧдӧ, поводдя часысь-час вежласьӧ, тӧв бергалӧ, нёльнан боксянь пӧлялӧ — зэр-слӧт дугдывтӧг пожъялӧ.
* * *
Май нин. 1 Май праздник лунъяс. Бара сьӧкыда висьӧдӧ, тӧла, лымъя. Некод эз волы. 1937 восянь нин эг тӧдлы май праздник!
* * *
Май 2. Чов юыс нин вӧрзьӧма; кынталӧ войяснас, и менам лысьӧмъяс висьӧны зэв, югдышттӧдз ог вермы унмовсьыны; пель сьӧдмымӧн дзуртас пач сайын чирк.
* * *
5/V. Печать-гижӧд лун. 1921 воӧ петіс декрет Коми Автономия йылысь.
Колӧ судзӧдны лыддьыны газет. Абу бумага, мӧвпъяс некытчӧ пасйыштны. (Уна-ӧ тӧрас порошок обертка вылад).
Эз пондыны волыны карсянь Ольга ни Анна. Быдтор вылӧ номсӧдлӧ лягуша водянка висьӧмыд. Кутшӧм лекарство сетас талун Ал-ра Ив-на (врачыс, буракӧ — Ред.)? Ог вермы узьны, вой-вой тупляся.
* * *
«Весна... Выставляется первая рама,
и в комнату шум ворвался...
Мне в душу повеяло и жизнью, и волей...
И хочется в поле, в мирное поле, где...»
Тулыс. (Туӧ-содӧ тутуйыв, лыс). Ытва (ыльӧбтӧ ва) кырӧдӧ-бужӧдӧ кыр. Бадь пуяс юковтӧ, визулӧн сыналӧ; кывтӧ-суналӧ ю тырӧн лӧп: уялӧ-сынӧ чож пӧтка, коскӧдзныс келӧны оль вылын кыдз пуяс, козъяс. И — гӧгӧр ойим, кытчӧдз синмыд оз судз!
(Из детских воспоминаний моих).
Колӧ панны повесть «Дзолядырся».
(сюмӧд шег доз, краситӧм шегъяс; бумага тубрас — конвертъяс, батьлысь коралӧм — маркаа, печатя-штемпеля, истӧг дозъяс. Дзеблала вӧлі чой-вокысь посводз пос улӧ).
Дзолядырся! Кагадырся морт олӧмӧй, важ олӧмӧй-вылӧмӧй. Кытчӧ кольӧмыд, абу тай вунӧмыд, сувтан син водзӧ ловъя! Майбырӧй. Сё майбырӧй!
* * *
6/V. Волӧма Ольга, вайӧма гӧснечьяс. Асьсӧ эг аддзыв. Эз ло бара нинӧм сёрни. Эз и понды воны гортсасянь ни некутшӧм юӧр, ни письмӧ. Мый бара олӧны?
* * *
7/V. Рытъя шонді мичаа лэччис. Енэж пасьта зарни кыа разаліс-ӧзйис, пӧртмасьӧ быд сикас рӧмнас. Майбыр, тувсов югыд войяс пуксьӧны.
* * *
8/V. Воис гортсянь перевод кызь шайт вылӧ. Зэв нин важӧн мӧдӧдлӧмаӧсь — 31 марта. Вокан чужан лунӧ казьтыштӧмаӧсь, пиӧйсянь гӧснеч ыстӧны батьыслы. Мыйла нин мӧдӧдӧны — асьнысӧ тшыгйӧдӧны.
* * *
10/V. Вӧт — быттьӧкӧ зэв уна йӧз воліс ме ордӧ гортӧ, помся локтӧны и мунӧны, коланъяс и ковтӧмъяс. Примита, пелькӧдча, пач ломта-ломта — керка оз шонав.
Из Пушкина:
«Литература у нас существует, но критики еще нет, а нас журналисты бранят, как старушки бранят повес франкмассонами и вольтерианцев, не имея понятия...»
1830 г. «...Образованный француз или англичанин дорожит строкой старого летописца, где упомянуто имя его честного предка. Но дикость, подлость и невежество не уважают прошедшего, преклоняясь перед одним настоящим... Имена Минина и Ломоносова вдвоем перевесят, может быть, все наши старинные родословные, но неужто потомству их смешно было бы гордиться сими именами?.. У нас иной потомок Рюрика более дорожит звездой двоюродного дяденьки, чем историей своего отечества...»
* * *
Май 6.
Муса Ольга.
Татшӧм поводдянас — тӧла, кӧдзыд, лым-няйт туй кузя локтӧмыд тэ, коньӧрӧй, видлыны менӧ, пӧрысь Веня дядьтӧ...
Сӧмын тай тэнӧ ме эг аддзыв. Ас пыддиыд вайӧм гӧснечьясыд висьталӧны, мый сьӧлӧмнад тэ, абу мукӧд. Аттьӧ и ещӧ на аттьӧ бурлуныд вылӧ, тӧждысьӧмыд вылӧ. Сетісны мен: пачка чай, нёль пачка папирос, носӧвӧй чышъян, куим чипан кольк, вит лук, кык булки, трескатор, вит шайт деньга, квайт конверт да тайӧ блокнотсӧ (колӧ эськӧ вӧлі клеенка мышка, да ӧд эз сюр, кӧнкӧ). Ме нинӧм ог тӧд, кыдз-мый оланныд — тэ, гортын, мукӧд ловъяӧсь-ӧ, письмӧ эз на волы некодсянь, бара ог тӧд, кыдзи тэнад адресыд. Людмилаыд^Людмила — Ольга племянницаыслӧн кагаыс./^ кыдз, Ливерийыд^Ливерий — Тима Веньлӧн племянник./^ кӧн и мукӧдтор. Эг нин тшӧкты, но тэ бара на уна рӧскод весь вӧчӧмыд.
Издайттӧм гижӧдъяс:
ІV- ӧд томын «Торпыригъяс»: (мелкие стихотворения).
V- ӧд — » — пьесаяс.
VІ т. «Лирическӧй кывбуръяс».
* * *
11 /V — 39 г. Врачу В. Човской больницы ИТК.
ЗАЯВЛЕНИЕ
В течение десяти лет уже я страдаю воспалением спинного позвоночника и сопряженных с ним болезнями... С этой целью в 1934 году 1-й Московской поликлиникой был произведен рентгеновский снимок с заключениями доктора-профессора Ми-хайловского. Болезнь эта прогрессирует, и язва на позвоночнике д. в. расширяется дальше, мешает кровообращению, работе сердца и т. д. (первой причиной этого же, как сам догадываюсь, появление с середины прошлого года еще вдобавок одной болезни — водянки). Снимок этот в настоящее время находится при НКВД Коми АССР среди изъятых у меня в 1937 г. рукописей и архивных книг.
Моя просьба к вам обратиться в НКВД и просить о выдаче этого снимка на Ваше имя, чтобы облегчить найти снимок (т. к. у меня там много бумажного хлама), со своей стороны должен оказать помощь. Снимок размером 1/4 писчего листа завернут в простую без надписи бумагу, вложен был между листами книги «Литер. энциклопедия» (при снимке еще находится заключение с рецептом проф. Михайловского на небольшом клочке бумаги и заклеен к снимку).
Май 11, 1939 г. В.-Човский ИТК. В. Чисталев.
Лыдди «Жестокая учеба» Бибиклысь. Эмӧсь сэні буринъяс, кодъясӧс сулалӧ переведитны коми кыв вылӧ... Да кысь! — сытӧг уна эм оригинал темаыс.
* * *
Май 12. Волӧмаӧсь карсянь ли, Выльгортсянь ли, ог тӧд, коді — Ольга да Анна свестя.
Воис тшӧтш письмӧ гортсянь Ольга пыр. Ёна шогсьӧны, оз тӧдны бура ме йылысь да.
* * *
13/V. Асыв. Кӧдзыд тӧла. Пинькай триньгӧм шыӧ садьми. Вӧтаси — Катя Петыр пӧльӧс аддзывлі, коді нелямын во нин абу. Дзолядырйи сус коль сёйны вӧлі кайлывлам Выльгортӧ сы ордӧ. Ичӧтик, важиник керка, но кык судта, ошйысянтор Петырлӧн.
Гижи письмӧяс Ольгалы да Выльгортӧ тьӧщаяслы.
Лыддя Достоевскийӧс — «Дневник писателя за 1877 г.»
* * *
14/V
Колӧ гижны да пасйыны зэв уна, но некыдзи абу позянлуныс. Быдтор йылысь. Тайӧ воӧн-джынйӧннас уна лои мӧвпалӧма, уна и кывлыны лои.
«Англичана пленын» (ӧти военнӧй заложниклӧн висьталӧм).
«Петкӧдісны миянӧс буксирӧн мореӧ... Нинӧм ог тӧдӧй. «Вӧйтны» — кодсюрӧ шуӧны. Кын шемӧс виччысям, мый тан пондасны вӧчны. Коркӧ мыччысис морскӧй паракод. Буксир миян сувтіс грӧмӧз бердӧ. Катӧдісны пос кузя да трюм пыдӧсӧ дзумгисны. И мӧдім пом ни дор... берегтӧм мореӧд. Сэки вӧлисьт висьталісны миянлы, мый ми лоам заложникъяс».
Йитны татчӧ ассьым пасйӧдъяс «Муддюг ді», 1935 воын волім сійӧ ді вылас.
* * *
15/V.
Сетны Педӧрлы ӧтвет (суд вылын).
П... шуӧ — нинӧм пӧ оз гиж колхозъяс йылысь.
«А тэ лыддьывлін серьёзнӧя сылысь, шуам, «Вӧльдін» (очерк?) Кодлы нӧ сійӧ и кодъяс йылысь, мый йылысь гижӧма? А коді нӧ шуліс, эн-ӧ тэ ачыд тшӧтш: «...Тэ, Тима Вень, гиж ёнджыка важ йывсьыс, тэ бура сійӧс тӧдан; ӧнія лунъяс йывсьыд вермасны гижны мукӧд, а важся кадъяс йылысь, пӧжалуй, некод оз».
А «Ныв сетӧмӧс»^«Ныв сетӧм» — Тима Веньлӧн пьеса./^ нӧ коді тшӧктіс и коді тшӧтш ошкис? Эн-ӧ тэ тшӧтш?»
Май 15. Воис зэв ыджыд нимкодьтор — радӧсть — воис письмӧ дона гортсаяссянь. Гижӧны ставныс — гӧтырӧй и челядьӧй — Муза, Авъя, весигтӧ Вокан пасйысьӧм — «бать, Вокан» да рисуйтӧма пуяс, керка, дӧска да книга... Челядьӧй, менам муса ныв-пиӧй, сьӧлӧм чуктӧдъясӧй! — Бӧрдӧдінныд и шонтінныд сьӧлӧмӧс менсьым. Нимкодь, мый ловъяӧсь и дзоньвидзаӧсь, но гажтӧм-шог сьӧлӧмлы. Воӧн-джынйӧн эз усьыштлы-воссьыштлы юӧр. Уна нин и вежсьӧмъяс лоӧма тайӧ каднас ас гӧгӧраныс, овмӧсаныс. Керка пытшкӧсысь став шпалерыс йиркысь и стенысь усьӧма да баксьӧма керйыс. (Дерт, шлявгис-вияліс да тӧвбыд йизис-кынмис). Сарай пос бузгысьӧма-усьӧма; керка вылысь да амбар вылысь вевтсӧ кульӧма... Но медся донаыс-жальыс — керка гӧгӧрысь сад пуяс пӧрлӧдлӧма: пӧрӧма рытыв дорсьыс тополь пу, асыв дорысь пӧрӧма мекӧд тшӧтшъя муса ниа пуӧй, пӧрӧмаӧсь и чегъясьӧмаӧсь стын сайысь джуджыд мича пуяс... Ой-я, кутшӧм жальӧсь-дояӧсь, — став Помӧсдін сиктыслы мичлун сетысьяс (ылісянь тыдалӧны вӧлі керка юр вомӧн).
Пыр на семьяӧй важ киссьӧм пывсянын мыссьӧма, выльсӧ вайӧдлӧмаӧсь колян гожӧм, но керъясыс пӧ сідз муас туплясьӧны.
* * *
Прӧщай да видза ов,
Муса чужанін менам!
Прӧщай, Древньӧй Рим моз
Сизим мыльк йылын
сулалысь Помӧсдін сиктӧй.
Прӧщай, Помӧс бок,
Джуджыд мельнича гӧра,
кӧн менам мунігӧн
сулаліс важ вичко
копыртӧм юра...
Прӧщай, гажа «Яг выв»,
Но видза ов ме бӧрын сэтӧні олӧм.
(Оз нин сӧмын видза ов
ӧтнас ниа пу менам
ӧшинь ув йӧрын:
колян во лёк тӧлӧн
пӧрӧдӧма вужнас).
Прӧщай, ыб дор грезд
и «Ва дор выв», «Яг горув»...
Прӧщайтлӧй ӧні кеж ставныд,
став йӧзыс, быд мусаинъяс —
видзьяс, юяс, ыбъяс,
вӧръяс и ваяс.
Прӧщайтлӧй сэтчӧдз,
коркӧ ӧд нюмсидзлас жӧ
судьбаӧй менам
да бӧр на тіян дінӧ
менӧ лэбӧдас-ваяс.
Музалы гижны (Саняӧс^Саня — Александра Семеновна, Тима Веньлӧн гӧтырыс./^ оз нин су письмӧӧй), медым косінӧ идраласны фотонегативъяс.
* * *
17/V. Лун шӧр бӧр. Виччысьтӧг-тӧдтӧг воис гӧтырӧй. Нинӧм сёрнитны эг эштӧй. Кӧсйӧ олыштны мамысъяс дінын. Воканӧс абу вайӧдӧма (Кулӧмдінӧдз локтӧма подӧн). Вокан пӧ бӧрдан коли. Вайӧма на меным гӧстинеч, гортсянь пув.
19, 20. Зэв сьӧкыда висьӧдӧ, биаліс, кынӧм висьмис. Сьӧлӧмӧй доймӧмӧн доймӧ, мыйкӧ лоӧма, перебойӧн уджалӧ, тыдалӧ, лекарствоыс вывті лоӧма, йиджӧма — пагӧдӧ... Пыр восӧдны бергӧдліс, некутшӧм аппетит абу.
* * *
Май 22. Паметнӧ мен 1902 вося шоныд тулыс; мунӧм нин нелямын во, но абу на вунӧм: 1902 во — медыджыд ытваа тулыс менам нэмын. Вӧлі Микола лун, меным вурисны выль вышывайтӧм каленкор дӧрӧм (дзолядырйиыд кутшӧм нимкодь!)
Садьтӧг котӧрті ме «Яг горув», ва дорӧ; ва туӧма су потшӧс дорӧдз. Пыш тылӧн^Пыш ты — тылӧн ним./^ весиг потасыс оз тӧдчы кутшӧм! Зорӧд пиньяс ді вылас сӧмын чурвидзӧны, сэсся нинӧм. Эжва веськыда орӧдӧ-шкоргӧ, Помӧсӧс^Помӧс — Эжваӧ усьысь ю./^ пановтӧ да оль вомӧн веськыда Зина виддзӧдз.^Зина видз — видзлӧн ним./^ Краж чукӧръяс потшӧс дорын кыптӧмаӧсь (и миян тшӧтш, кодӧс ме кыскавлі тшӧтш тӧвнас улялігӧн); турун пуръяс да пес пуръяс пыртӧмаӧсь «Ключ сён» йылӧдз. Ыджыд пыжӧ сӧвтӧдіс миянӧс, челядь чукӧрӧс, Опока дядь да петкӧдіс гуляйтны ва вылӧ. Дыр новлӧдліс ойдӧм видзьяс вывті.
Гоголь «Мертвые душиын» (ІX гл.) казьтывлӧ тшӧтш важ Усть-Сысольскӧс и Сольвычегодскӧйӧс (асланыс нимӧн)...
23/V. Кодкӧ бара волӧма ме дінӧ, вайисны передача. Коді вайӧма? Коді воліс? Гӧтырӧй ли Ольга племянница? — нинӧм ог тӧд...
Ылын, кар туйӧд мунісны кодъяскӧ; тыдалӧ, но уна дінӧ волывлӧны, да коді пӧ, кыдзи тӧдан? Гӧтыр кӧ эз вӧв, сідзкӧ, сійӧ гортӧ нин катіс, гашкӧ, Эжва йылӧ катысь пароход шӧрӧ веськаліс да...
Войбыд ог узь. Сэзь, вой тӧла, югыд. Пель вундысь кодь лэчыд тӧлысь енэж шӧрӧ кыпӧдчис. Палаткаын ставыс шкоргӧ-узьӧ, кодікӧ ымзыштӧ, кодікӧ унйывсьыс сӧрӧ.
Ю сьӧрт вылысь, ӧшинь дорӧ пельӧс торгӧдӧмӧн, кывзыся-виччыся кӧклысь кӧкӧм, но оз кыв, абу на, тыдалӧ, воӧма кӧканӧй-чойӧй.
Воканлы батьсяньыс козин:
Воканлы батьсяньыс
вотчыны доз...
Тырыс вот оз,
Сэсся батьыслы ну,
ӧктышт тшак,
сёяс пӧ бать,
а арнас гӧрд пув.
* * *
24 — 25/V. Бара висьӧдӧ, кынӧм оръялӧ, пукавны оз лэдз. Кӧсйи гижны да эг вермы.
* * *
26/V. Ва ямны мӧдӧдчис бӧр. Талун сроклӧн шӧрыс. Ӧти джынсӧ лои олӧма, мӧд вылас пета.
28/V. Асыв, кымӧра, но шоныд и лӧнь; воздухыс нюдз — кыткӧ матіӧд зэрӧма, тыдалӧ. Медводдзаысь кыла кӧклысь сьылӧм шы: «Кук-ку! Кук-куу!» — ю сайын кылӧ.
— Кӧкӧй-чойӧй, кӧкӧй-чойӧй менам! Мый нӧ тэ туналан-висьталан меным?..
...Кӧк пӧ тайӧ кӧкӧ,
Рас вылын кӧкӧ,
Медмича кыдз йылас кӧкӧ...
Сё майбырӧй дай,
Кӧкӧй, кӧканӧй.
Кык во нин ме
Тэнӧ эг аддзыв ни кывлы!..
Апрельын нин мунісны юбилейяс — Тарас Шевченколӧн и Салтыков-Щедринлӧн. Нинӧм эз сюрлы лыддьыны налысь. Газетысь тӧда: вӧлӧма Киевын пленум сӧветскӧй писательяс союз правлениелӧн.
«Як умру, то поховайте
мене на могили
Середь степу широкого
на Украйне милой».
* * *
30/V. Бара вайӧмаӧсь передача. Коді воліс? Ог чайт, мый Ара. Но сетысьыс шуис, гӧтырыд пӧ... Неужели век на тані? Век на абу мунӧма гортӧ? Но булкиясыс Аралӧн пӧжалӧм. И небыдӧсь на, тӧрытъя ли талунъя.
Тані на кӧ, мый вермас вӧчны ме кузя?
«Одно из первых и всеми признаваемых условий счастья есть жизнь такая, при которой не нарушена связь человека с природой, т. е. жизнь под открытым небом, при свете солнца, при свежем воздухе, общение с землей, растениями, животными. Всегда все люди считали лишение этого большим несчастьем. Особенно чувствуют это лишение заключённые.
Второе несомненное условие счастья есть труд, любимый свободный труд (труд физический, дающий аппетит и крепкий успокаивающий сон).
Работа только тогда радостна, когда она несомненно нужна».
(Трактует Лев Толстой).
31/V. Вуграсьӧм. Ок, эськӧ ӧні вугыр шаддзӧн пукыштны кӧнікӧ ты дорын. Дзолядырйи Чудин (Вӧльдін) ты дорын ёна вуграсьлім Егор Вась зятькӧд; сизим арӧссянь сійӧ менӧ пондіс новлӧдлыны пыж нырын. Кельчи-ёкыш кӧ вугравны, Вӧльдін тыӧ пыравлам. Пыжнымӧс кыр вомӧн кыскам да кыйсям лун кык, куш вугыр кежысь пуд-мӧдӧдз... Коркӧ ӧтчыд, ёна зэригӧн, шедлі миянлы 6 пуд гӧгӧр. А лӧсьыд и вуграсьны сэні; ты гӧгӧрыс вӧлі быдмӧ зэв джуджыд коз да кыдз вӧр — весь пемыд (ӧні эрдмӧма нин: видзьяс вӧчӧмаӧсь), сійӧн и чериыс вӧлі ёнджыка олӧ.
* * *
Июнь 2. Пыр на ӧмӧй гӧтырӧй карын? Оз нин веритчысь, тадз кӧ, регыд вӧлі кӧсйӧ овны да. Но вайисны передача бара.
* * *
Июнь 1, 2, 3, 4, 5, 6. Зэв сьӧкыда висьӧдіс, сёйны нинӧм оз ков, пыр восӧдны бергӧдлӧ, сьӧлӧм зэв лёка уджалӧ (пола сы понда дзик торксьӧмысь), ӧдва-ӧдва йӧткыштӧ, вит-ӧ-квайтысь йӧткыштас да сувтовкерлас, ог тӧд мыйла.
* * *
3/VІ. Лым чӧлалӧ, кӧдзыд вой тӧла.
* * *
7-8/VІ.
Эзысь-югыд
Тувсов войясӧй!..
Мыйла нӧ менам
Войясыс оз узьсьыны!
* * *
8/VІ. Талун бара зэрӧ. Арся зэр моз сяльгӧ. Коркӧяся кылӧмъяс-олӧмъяс серти колӧ гижны стих.
Аръявыв
Ар... Зэрӧ...
Ме дӧра плащ
пельпом вылӧ шлап
да и вӧрӧ.
(А ыркыдджык кӧ —
ной кучик лаз).
Босьта киняулӧ чер
сотны лыс да лӧп.
Либӧ вотны тшак
сюмӧд чуман,
а ачыд чидлан:
ак!
Кутшӧм талун
лӧсьыд вӧрын лун...
* * *
9/VІ. Лыдди «Вӧр лэдзысь» газет. Пыр на радлӧ-ёкмунлӧ сьӧлӧм, мыйӧн аддзыла аслам лӧсас туйяс вылысь бур, нимкодьтор мыйкӧ. Менам Вӧльдінса племяӧй, «Вӧр фронт» колхозса колхозник-комсомолецъяс, отличайтчӧны, пыр на водзӧ и водзӧ мунӧны социалистическӧй удж вылын... Найӧ лоины первойя кандидатъясӧн Ставсоюзса выставка вылӧ. Налы, кодъяс нимавлісны важӧн «няньтӧм мужичӧйясӧн», ӧні медбур урожай воӧ став район пасьта.
Важдырся олӧм «Вӧр фронтлӧн»^«Вӧр фронт» — Кулӧмдін районын сэки петысь газет./^:
...Еджыд дӧра шабура нывбаба пыж бӧрын сувтсӧн зіля пелысӧн зібъясьӧ, ва паныд катӧ. Пыж шӧрын челядь нёль-ӧ-вит пукалӧ... Тайӧ Вӧльдінса синпӧла Миколай гӧтыр турун пуктыны Эжва йылӧ (Мича козъяӧ) кайӧ. Синпӧла Миколай кувлі водз, эз коль уджалысь, посни челядь кындзи. Миколай ачыс вӧлі из перйысь. Кебӧса вомынысь вӧлі перйӧ ыджыд пластъяса еджыд из, шыльӧдас да вӧчалӧ-сёртӧ из воръяс пывсянӧ, ключ ворга улӧ, пач трубаяс гырксӧн вӧчалӧ. (Пиыс дӧвалӧн ӧні Краснӧй Армияса адъютант).
13/VІ. Гижи гортсалы письмӧтор бурдӧдчӧм йылысь.
* * *
14/VІ. Поводдя пуксис жар. Шонді, тыдалӧ, бергӧдчӧма нин.
* * *
18/VІ. Талун выходнӧй лун карын и тан, талун жӧ выходнӧй лун сиктъясын, но некод эз волы видлыны менӧ... А ёна номсӧдлӧ нин вӧлі небыд нянь вылӧ.
Синваӧн лыдди Горькийлысь «Человек»... Гораа, сьӧлӧмсянь лыдди, морт-мӧдлысь тшӧтш сьӧлӧмсӧ вӧрзьӧді.
Июнь дас кӧкъямысӧд лун нин. Кутшӧм ӧдйӧ кольӧ кадыс! Некор нин сэсся оз волы, оз бергӧдчы тайӧ луныс мӧдысь. Некор... И сідз кольӧ нэмыд лунысь-лун, минутысь-минут...
Тӧла-тӧла талун. Ыджыд асыв-вой тӧв кыпӧдчӧма мыйкӧ. Мый вайӧдӧ сійӧ меным? Мый? Оз-ӧ гортӧ кор сійӧ менӧ, чужан муӧ? Ыджыд эбӧсӧн-этшӧн шыбласьӧ-пессьӧ. Шогсьӧ-ӧ, горзӧ-ӧ ме понда? Гашкӧ нӧ, горалӧ-радлӧ? Код тӧдас, мый корсьысьӧ сійӧ.
* * *
19 июнь, 1939 во.
Талун М. Горькийлӧн кувсян лун. Тайӧ лунас 1936 воын ме вӧлі вуграся «Яг ӧзын» слуда из вылын. Рытладор... Локтӧ Авъя, кыр йывсянь на кылӧ горзӧ: «Батьӧ! Мамӧ корис». — «Мыйла?» — «Кутшӧмкӧ телеграмма пӧ воӧма». — «Но, — шуа, — котӧрт, ме локта час, вуграсьышта да...» Муртса саяліс Авъя, тыдалӧ-локтӧ гӧтырӧй. Матыстчис да висьталӧ: «М. Горький кувсьӧма... Тэныд воис телеграмма, сэсся корӧны телефон дорӧ райком ли «Вӧр фронт» редакциякӧд сёрнитны...»
Войбыд эг узь, гижи-составиті речь (на смерть М. Горького) газетӧ да телеграфӧн асывнас передайті...
Пукалі да думайті ме, кыдз кык во сайын на сӧмын кылі сылысь небыд гӧлӧссӧ, и киын, кыдз ловъялысь, чувствуйта Алексей Максимовичлысь топыдкодь кикар шамырсӧ, кор прӧщальнӧй рыт вылын сентябрь 1-ӧд лунӧ чукӧртчывлім ставӧн Всемирнӧй революционнӧй писательяс съезд вылӧ волысьяс... Прӧщай, миянӧс велӧдысь, медыджыд гижысь Алексей Максимович.
* * *
20/VІ. Лунтыр тупляся, нинӧм ог пасйы ни гиж. Рытладор зэр. Шондіӧн зэрӧ — кулӧмаяслы пӧ зэрӧ, шуласны вӧлі. Ӧшкамӧшка мӧдарсянь.
Гажа эськӧ рыт, да сьӧлӧм вылын гажтӧм. Эк, кор нин гортӧ вола! Гижышті гортсалы письмӧтор.
* * *
21 /VІ. Кыа югӧрӧ лэччис нин шонді. Эз нин волы сійӧ тӧрытся-войдӧрлунся (вуджӧрнас) местаӧдзыс — бергӧдчӧма нин, бергӧдчӧма (бесповоротно) сійӧ. Лӧнис, баракъясӧ быдӧн пырисны; лӧнис и миян больнича палатаын. Номъяс сӧмын ызгӧны. Синмӧс куньыштла да думӧй лэбӧдлас ылӧ-ылӧ, важӧ-важӧ, Эжва йылӧ, Визув ёль дорӧ, Чер вомӧ, Вӧльдін ты^Визув ёль, Чер вом, Вӧльдін ты — места нимъяс./^ дорӧ, вон пытшкӧ.
* * *
22/VІ. Воис гортсянь кык письмӧ. Гижӧ гӧтырӧй менам. Босьтӧма меным защитникӧс. Ыстӧма сылы вӧлі 300 шайт.
Москва. Благовещенский, 5, Юрисконсультация, Багдосаровлы.
Колӧ эськӧ Ӧльӧк Ӧньӧӧс^Ӧльӧк Ӧньӧ — Андрей Алексеевич Попов, коми гижысь, учёнӧй./^ юӧртны да.
Колӧ панны «Историческая хроника моей родной деревни». Ниедздін сикт нимӧн. («Ыджыд висьтысь»^«Ыджыд висьт» — Тима Веньлӧн проза гижӧд.^ картинаяс да эпизодъяс босьтӧмӧн).
* * *
23.VІ. Бара дундіс кынӧм. Вит-квайт лун нин мучитчи: лекарство адонис абу, вигиталис абу жӧ. Стрихнин примиті, сэсся неуна кокньыдджык лои.
Лун вӧлі кымӧра, зэрис кӧдзыд зэрӧн. Рытлавыв варовитыштім Удораса морткӧд (Кырнышев, Вашка йылысь). «Овер да Юныв» йылысь предание юаси, кыдз найӧ, чоя-вока, пышйывлӧмаӧсь, воксӧ тывйӧн тывйыштӧмаӧсь, а чойыс (питшӧгас пӧсь нянь тырӧн) котӧртӧма Вашка йыв, Эжва йыв...
* * *
24, июнь. Сэтшӧм гажтӧм лов вылын, мый ог тӧд ни куж шуныыс. Гажтӧм и шог ӧтпырйӧн тшӧтш. Олі нин уна, но татшӧм кылӧм сьӧлӧм вылын эз на вӧвлы.
* * *
25. VІ. Тӧрыт выходнӧй лун вӧлі карын, талун — вӧскресенньӧ — выходнӧй лун районъясын; но... менӧ видлыны некод (карсянь ни Выльгортсянь) бара на эз волы. Кӧть эськӧ шаньга-мӧд да пара кольк Сергей^Сергей — Тима Веньлӧн племянник./^ мед котӧртӧдіс меным, талунъя пӧжалӧм небыд нянь; сёйны татысь нинӧм ог вермы, и оз позь висьӧм понда — быдтор сола. Ок, майбырӧй, пӧсь нянь сёйӧмӧй. Кысь нин эськӧ пӧсьсӧ да, небыд няньторйыс нин кӧть. Регыд тай, регыд дрӧчитісны: воӧн-джынйӧн куш нянь да ва.
* * *
26. VІ. Садьми водз. Арся йи зэрӧн моз лолалӧ ывла... Сэтшӧм кӧдзыд кажитчис улыс дӧра гач кежысь ломтывтӧм палатаын. И збыльысь, кӧдзыд йирмӧг не ӧти лун нин, нач 1926 вося гожӧм кодь. Тайӧ лун-войӧ (1926-ӧд воын) ме муні Азов моредорса (Бердянск) курортӧ, и мунігӧн вӧлі кӧдзыд, арся зэра кодь поводдя. Няньыс — муртса чунь кузя ӧзим, и гожӧмбыд вӧлӧма сідз, кӧдзыд зэра. Кык тӧлысь бӧрын локті гортӧ бӧр, да няньяс вежӧсь на, а турун, мый вӧчлӧмаӧсь, ставыс сісь, либӧ, шедӧма кӧ, сьӧд ляк пыш кодь... Дас куим во сылы кольӧма — Муза вӧлі кык арӧса на сӧмын (но вӧлі ӧшинь ув нин пелькӧдӧ-чышкӧ), а Авиа вӧлі тӧлысь-мӧдся на. Кык тӧлысь сэки ветлі Азов дорӧдз ӧтарӧ-мӧдарӧ, и сэтшӧм кузь да дыр кажитчис пӧраыс, челядьясысь гаж быри да. А ӧні мӧдӧд во тырта и пыр на коркӧ кӧсъя аддзӧдлыны донаясӧс, вунӧдлытӧмъясӧс.
* * *
27. VІ. Ысті гортсаяслы письмӧ. Гижи пывсян лэптӧм йылысь.
* * *
28.VІ. Садьми водз. Шонді небыда малыштіс чужӧмӧс, быттьӧкӧ окыштіс состӧм кага моз...
* * *
29. VІ. Лун-вой кольӧ. Он удит, он су нин некыдз кадсӧ, он бергӧд тайӧ лунсӧ, коді коли. Талун со 29-ое нин, ещӧ ӧти лун — и 1939-ӧд волӧн джынйыс абу нин. А пом тані олӧмлы век на оз тыдав. Оз быр и висьӧмӧй, пыр быттьӧ ӧткодь.
* * *
Юнь 30. Бара нин зэрӧ, кыз зэрӧн шливгӧ-сяргӧ... Бара нин талун выходнӧй лун, и бара на некод ме дінӧ эз волы, дзикӧдз эновтісны менӧ. Но ме ӧд ловъя на, ловъя и кӧсъя овны. Мый и лоины сэні? — гортын, карас, Выльгортас.
Быд лун шливгӧ-зэрӧ, кӧтӧдӧ весь мусӧ, а шонді омӧля петавлӧ, оз сет мулы шоныдсӧ, оз быдты няньяс... Зэрӧ и менам челядьлы, кӧнкӧ, керкаас; стенъяс оз косьмывны, сісь керка вевт вомӧн пожйысь моз виялӧ ваыс. Коньӧръясӧй... Сідз эг и вермы налы лӧсьӧдны бурджык юр сюянін (керка). Вӧчлі тай эськӧ ягӧ, бур гажаинӧ, керка, да олӧмыс сэн эз ло, мырсьылі-уджавлі, быд кер аслам киӧн пӧрӧді... Колӧ вӧлі важинас, косявны да, лэптыны, но эг удит (и унатор на эг удит вӧчны), рӧк суис...
Коли июнь тӧлысь, воис нин, пуксис юль. Мый тайӧ тӧлысьыс ваяс?
* * *
Юль 4 лун. Талун кыдзкӧ-мыйкӧ эз нин зэр, вӧлі шондіа лун, но ыркыд асыв тӧв пӧльтіс лунтыр.
Из «Пармы» М. Горького:
«...На высоком пьедестале — фигура Колумба, мечтателя, который мното пострадал за то, что верил и — победил, потому что верил. И теперь с высоты, простирая руку, как бы говорил толпе: «Побеждают верующие!»
Лыддяла Н. Лесковлысь гижӧдъяс. Рассуждениеяс сылӧн эмӧсь и зыряна йылысь. «На краю светаын»...
* * *
5, июль. Рыт вӧлі... Лэччис нин енэжа шонді. Рытыв-войвылын ворсіс кыа югӧр: улынджык кымӧр кост пӧртмасис мичаысь-мича мырд ӧмидз ваӧн, вылынджык — сыв югыд зарниӧн дӧлаліс кыаыс дон... Улын веж вӧр пу йыв сулаліс сьӧд щель... Шогӧн и радлунӧн тырӧма сьӧлӧм... Видзӧді больнича ӧшиньӧд дыр... Тӧдтӧмашӧр сетӧны меным письмӧ, абу ӧтик, а кыкӧс ӧтпырйӧн. Восьті, видзӧдлі: гижӧны Ара, Муза, да Вера чой... Эг вермы лыддьыны, дорсъясьӧм синъяс пыр эз тыдав, и пыр видзӧді, видзӧді зарни рытъя кыа вылӧ да норми... Мусаясӧй менам, гортсаясӧй, сьӧлӧмшӧръясӧй, челядьӧй да гӧтырӧй. Дугдывтӧг лунысь-лун виччысянныд менӧ... Дона чойӧй, Верукӧй! Медся бур чойӧй менам! Тэкӧд меным медся уна сюри нуны шогъяссӧ, уджъяссӧ став сьӧкыд дырся кадъясӧ: и гражданскӧй война, и бать кулӧм, и тшыг восӧ, и гражданскӧй война дырся сьӧкыд дыръяссӧ... Казьтывлӧ ӧні письмӧас ачыс, кыдзи сійӧс (Вераӧс), пушка вом дорӧ сувтӧдӧмӧн, белӧйяс тшӧктісны выдайтны менӧ! Он кӧ пӧ висьтав, кымӧрас регыд качӧдам... Сідз синва пыр казьтывлӧ ӧні сэкся сьӧкыд олӧм дыръяс.
* * *
6. VІІ. Ысті письмӧ гортсалы да Ӧльӧк Ӧньӧлы.
* * *
9.VІІ. Лун-вой кольӧ, ӧтарӧ пӧраыс мунӧ и мунӧ... Некор нин сэсся тайӧ лун, тӧрытъя лун оз волы менам олӧмын, аскиа лун нӧшта на виччысян, а мый кольӧма, сійӧ некор нин оз... Но, лоӧ олӧмсӧ-пӧрасӧ коллявны мырд, нинӧм он вӧч, кӧть сэсся сыысь нин мустӧм — нинӧм оз вӧрӧд, нинӧм оз босьтчӧд — дыш кутӧ-петӧ олӧмыс вылӧ... Но абу на ставыс бырӧма пытшкӧсысь, абу на дзикӧдз орӧма олӧмыскӧд, мирыскӧд йитӧдыс — природа да детство, кыдзи и важӧнъяс, ӧтмоза кыла. Вӧрӧдӧ-трогайтӧ сьӧлӧмӧс сӧстӧмлун, искренность, непосредственность... Со вӧр пуыс сулалӧ важ моз, пыр жӧ на ӧти рӧма-мича, сӧстӧм и веж, чӧскӧдӧ-весалӧ лолалан сынӧд...
Со чикышъяс лэбалӧны-чишъялӧны, ӧшиньӧд тыдалӧ, сэтшӧм долыда, кокньыда, воздухыс кодь сьӧктаыс ӧдва; дзоридзьяс быдмӧны: вижӧсь и гӧрдӧсь, — купальнича, бобӧнянь турун... Со ичӧтик, 2–3 арӧса кага-нывка, важиник лӧз платтьӧа, котралӧ йӧрті. Ӧтилы, мӧдлы ышмӧ да нерсьӧ гырысьяслы воча, найӧ повзьӧдлӧм вылӧ. Коркӧ сэсся и больнича ӧшинь вылӧ видзӧдліс. Аддзис менсьым чужӧмӧс сэсь, и кӧть ме нинӧм эг шу сылы и «чужӧм эг вӧчав» мукӧд моз, нӧ (по привычке) и меным тшӧтш вӧчліс чужӧмсӧ да кывсӧ нюжӧдліс (мисьтӧм, тыдалӧ, кажитчис сылы менам пӧрысь висян чужӧмӧй). Но нывка нинӧм месянь воча эз пӧлучит. Сувтовкерис, вит-ӧ-квайт воськов матыстчис да дзик мӧд пӧлӧс чужӧмӧн-гӧлӧсӧн зэв участливӧя юаліс: «Тэ, дяденька, висян?» А ме сылы ӧтвет пыдди ассьыс юалі: «Мый нӧ тэнад, дитя, нимыд?» — «Тамара», — вашнитігмоз лӧня шуис, кыдз аддзис...
Коли вежон мыда, гашкӧ и, дырджык нин. Лӧз дӧрӧма кага — Тамара, коді менсьым сы мында дум кыпӧдіс сьӧлӧмысь-юрысь, менӧ эз аддзыв кодкӧлунӧдз. Но кодкӧлун локта пывсянысь паськӧма да шляпаа. Нывка тӧдіс. «Дяденька! Дядя!» — ылісянь горзӧ меным. — «Мый нӧ, дитя?» — ме шуи сылы. Но меным нинӧм сійӧ эз вочавидз, а пондіс мыйкӧ зіля висьтавны ас коддьӧмъясыслы (челядь чукӧрлы) ме йылысь, кылӧ: «Со эсійӧ дяденькаыс... шляпааыс...»
О, дзолядырсяӧй! Сӧстӧм кага олӧмӧй!
* * *
12, юль. Гижи Вера чойлы письмӧ. Тшӧкті копыртчывны дзолядырся кылӧмъяс, муса местаяслы:
«Ветліг-мунігад сувтовкерлы Кузь ыб помӧ, кысянь тыдалӧ Кырмаль сиктыд и, Сордйылыд и, Яг слуда юр гӧраыд и, Помӧсдін лун морӧса ыб чуркйыд керкаяснас чужанінаным, да копыртчы ме пыдди муӧдз...»
* * *
13, юль. Зэв жар пуксисны лунъяс: кодкӧлун, тӧрыт и талун... Гижи гортӧ письмӧ. Врач (А. Д.) шуӧ, мый менам сьӧлӧм пыр ӧтарӧ жебмӧ. Зэв шог. Рытнас кокньӧдіс, гижи гортсалы долыд письмӧ... Тӧрыт, войдӧрлун и талун ёна гымаліс-зэрис.
* * *
14. VІІ. Аттьӧ бур аньяслы — кодъяскӧ кыкӧн вайӧмаӧсь передача. Кодъяс? Чойясыд пӧ, шуисны. — «Чойяс?!» Куимсё километр сайсянь эз вермыны волыны. Кодкӧ тьӧща ли, свестя ли кӧ-а. Да и абу гортса пӧжалӧм. Ог тӧд, ог тӧд, но пасибӧ сылы, коді вайис, ыджыдӧс.
* * *
15.VІІ. Бара зэв сьӧкыд: сьӧлӧм гӧгӧр доймӧмӧн висьӧ, ӧдва верми, садьми да, чеччыны койка вылысь. Асыв, эськӧ, ывлаыс зэв гажа: войнас зэрӧма, и гӧгӧр турунъяс йылын эзысь молльӧн ӧшалӧ, дзирдалӧ лысва. Кол-н^Кол-н — колӧ чайтны — колонияын — Ред./^ абу зыка. Лӧнь. Ылысь, ю сайысь, кылӧ кайяслӧн сьылӧм. На пӧвстын ёдіюрлӧн сьылӧмыс торъялӧ... Восьті ӧшиньӧс ме. Лои гажтӧм, зэв шог... уськӧдчи пидзӧсчань, гырддза выв ырзігтыр лэдзчи... Тӧд вылӧ уси мем аслам стихотворениеӧй... Кӧк оз нин кыв, кыкысь и кывлі ставсӧ сылысь кӧкӧм...
* * *
16.VІІ. Талун кокньыда кыла ачымӧс, ыджыд вой тӧла да сійӧн, кӧнкӧ, кокньыдджык: пыр сідзи важӧнсянь нин кыссьӧ менам, гортын сідз жӧ вӧлі: ыркыд дырйи зумыда кылан асьтӧ и пелька. Гаж петӧ уджавны-керны — юр садьӧн, ки-кокӧн, ветлыны-мунны, овны тыр сьӧлӧмӧн му вылын. И уна, унатор (челядьӧс бурӧдны, быдтыны-велӧдны, уджавны физически и умственнӧ, вӧчны налы оланін-керка)...
Сьӧлӧмӧй тӧдӧма — рытладор челядьсянь воис письмӧ, гижӧма Муза (3.VІІ). Олам пӧ, уджалам колхозын быд лун, 3 да 4 трудоденьӧн вӧчам. Ошка. Ошка и Воканӧс котралӧмсьыс, здоров пӧ да, батьсӧ пӧ казьтывлӧ частӧ: «Гашкӧ, талун локтас...» Воканӧй, югыд шондіӧй менам, пиӧй! Ог нин ӧні ме тэнӧ новлӧдлы моздорын, аддзысьлам кӧ коркӧ. Сеті челядьлы сӧвет (колӧ тшӧктыны Музаӧс, медым снимайтас керка дорысь кыдз пусӧ).
* * *
21.VІІ. Коймӧд лун нин кӧдзыд вой тӧв тӧлалӧ-бузгӧ. Висьӧдӧ-кынтӧдӧ, быд лыпом доймӧмӧн доймӧ, ревматизм да воспаление позвоночника сюрса лысянь визъялӧ-лыйлӧ. Войяссӧ зэв сьӧкыда узя...
* * *
22, юль. Лун коли, нинӧм выльторсӧ эз вай.
* * *
Июль 23 лун. 1923 воӧ, шонді лэччӧм бӧрын, куліс Иона вок менам... Крымысь локтігӧн дзикӧдз эбӧс вывсьыс уси да сувтіс Пӧддельнӧй санаторийӧ шойччыны. Но шойччӧг эз ло, эз вермы гортӧдз воны... Менӧ корис дінас, да ме куим лун олі сы дінын. Вӧлі зэра жар гожӧм: зэрыштас да шонді мыччысяс, да бара... Сійӧ лунӧ (23) сідз жӧ луннас зэрис, рытладор ещӧ кыза сукмис кымӧр. И... киссис зэрыс: бӧрдіс мекӧд тшӧтш природаыс вок кулан минутаясӧ...
Пушкин: «И хоть бесчувственному телу
Равно повсюду истлевать,
Но ближе к милому пределу
Мне всё б хотелось почивать...»
Вок бӧрся и меным шуны лоӧ тшӧтш. Но ме ловъя на, ола и понда воӧдчыны сійӧ муса пределас — чужан-быдман Помӧсдінӧ.
* * *
26.VІІ. Рыт. Кытчӧ пышйӧма шудӧй дай таланӧй менам?! Шудӧй дай олӧмӧй менам — чужан сиктын, рӧдимӧй муын. Помӧс ю пӧлӧн, ва дорті муныштны сідз куран-косаӧн да вугыр шадз да нидзув туисӧн рытгорув гортлань...
Шонді лэччӧ нин. Пывсянъяс ломтысялӧ Яг горув пӧлӧн, мукӧдсьыс ру пуркйӧ да чӧскыд пӧжсьӧм корӧсь дук ӧвтӧ... Сёрмӧм мӧсъяслӧн жынняныс гольгӧ, тэрмӧдлӧны мӧс корсьысьяс найӧс ӧдйӧджык картаӧ... Ӧтарсянь-мӧдарсянь быдӧн кыссьӧны гортлань...
Ме сідз жӧ ньӧжйӧник койтов-койтов воӧдча-кая, черитор челядьлы вая, а найӧ паныд петӧмаӧсь, чой йывсянь видзӧдӧны, Муза ли Авъя Воканкӧд горзӧны: «Ба-ать! Бать?!» — «Локта, локта».
Рытнас воис гортсянь письмӧ (26.VІІ). Зэв регыд воӧма (19), сизим лунӧн. Радла челядь кузя, ёна уджалӧны Муза да Авъя. И Вокан тшӧтш ветлӧ. Мамыс ёна ошкӧ. Зэв пӧ петас умнӧй детина миян. Рассуждайтӧ ыджыд моз.
* * *
27 юль. Гижи ӧтвет. Тшӧкті вузавны мыйсюрӧ кӧлуй рӧскодъяс вылӧ.
* * *
28.VІІ. Бара зэв гажа асыв. Чеччи сьӧкыда, юр вӧлі висьӧ, но шонді водзын пукалі да шоналі.
Ок, эськӧ, вӧр дорас, видз вылас! Чов ю сайын, вӧр бердас, ичӧтик видзтор. Тыдалӧ — сэтӧні чӧвтӧны зорӧдӧ турун. Куим-ӧ-нёль зорӧд нин сатшкисны, лӧсьӧдісны выль зорӧд места. Рудоввеж турун юръяс мичаа сярвидзӧны мольӧдӧм-ытшкӧм под вылын. Тӧдса картина. Сувті да видзӧді ды-ыр... Ок, сэтчӧ тай, сэтчӧ кыскӧ сьӧлӧм!
Рытладор зэр. Дзик сувтса зэрӧн зэрӧ. Унаӧс, кӧнкӧ, ылӧдіс, нинӧм кӧсйытӧг, грӧзиттӧг (гымавтӧг) лӧня зэрмис да.
Лыддяла Чеховлысь гижӧдъяс... Горький да Чехов, Чехов да Горький.
«Настоящий мужчина состоит из «мужа» и «чина» (из его записной книжки).
Антон Павлович! Я ведь у тебя научился подобные же вещички записывать было в своей карманной книжке.
Чеховлӧн ӧні муніс юбилей чужан-быдманінъясас (Таганрогын, Ростовын). 35 во кулӧмсяньыс. И ме помнита, кыдзи газетӧ пасйисны тэнсьыд кулӧмтӧ (велӧдча вӧлі второкласснӧй школаын), и муніс сэк русско-японскӧй война.
* * *
30.VІІ. Бара лун коли. Юль коллялі. Нинӧм выльтор, нинӧм буртор. Ёна висьӧдіс менӧ. Биаліс сюрса лысянь да кок пыдӧссянь. Температура 38,5 — частӧ кыптывлӧ сэтчӧдз. Меным сійӧ 35,5-сянь зэв ыджыд нагрузка. Сьӧлӧм бытшкӧмӧн доймӧ. Порошок юи да, кокньӧдыштіс. Сэсся чай стӧканӧн шоналышті, да ӧні немас.
Дусыд кымӧра, уль руа. Рытладор ӧшйис весь зэр ваыс воздухын. Арся зіля лун кодь. Водз на, водз на, природа-муӧй! Шонді на, шоныд на корӧ сьӧлӧм. Мортлы кӧдза-быдтас да скӧтлы турун на колӧ лӧсьӧдны.
«Олобей, олобей! Олобейяс-силюкъяс...» — шулывлас вӧлі менам Вокан пиӧй, тольӧдчигтыр. А кодыр оз на вӧлі тӧд, кыдзи найӧс нималӧны, менсьым частӧ юавлӧ: «Кыдзи нӧ, батьӧ, шуӧны?» — «Кодӧс, пиӧ?» — «Эсійӧ силюкъяссӧ». — «Воробей». «Олобей, олобей, олобейяс, силюкъяс», — пондас Вокан тольгыны паччӧр дорын мекӧд пукалігмоз.... Зарниӧй пиӧй. Аддзывла ог нин тэнӧ ме...
Коли нин июль тӧлысь, локтӧ август.
Август нин пуксис. Талун международнӧй мир лун. Тӧдса на ставыс мен 1914 во, кор ӧзйис империализм война, кыдз муніс миян морӧс вывті сьӧкыдлуныс сылӧн. Но ме сэки вӧлі ён на, вынеситі ставсӧ и петі на ловйӧн.
* * *
Август, 2. Бара некод эз волы передачаторйӧн — тӧрыт ни талун. Зэв сьӧкыда чувствуйта сьӧлӧм вылын. Талун жӧ и важ Илля лун — гожӧма-арлӧн грань. Поводдя ганёвтас арлань. Ок, кыдзи нин и вынеситны сёр арсӧ — октябрь-ноябрь тӧлысьяссӧ, медсьӧкыд во гӧгӧр кадын?
Вӧльдінын миян талун эськӧ бур черияс кыбалісны нин, кӧнкӧ, чими чериясӧн номсасьӧны, а меным тай кыв йылӧ кӧрыс оз волы... Ок-ок-о! Август тай, август нин воӧма — рыт-асыв воздухыс ыркыд, войясыс пемыд.
* * *
5.VІІІ. Воис РСФСР-са Верхсудысь определение Коми АССР Верхсуд приговор вынсьӧдӧм йылысь, выль пӧв (гижӧдъяслы экспертиза вӧчӧмӧн) видлалӧм вылӧ.
* * *
6.VІІІ. Бара висьӧдӧ, кынӧм дундӧдӧ, сьӧлӧм гӧгӧр пыр донӧдӧ.
* * *
8. VІІІ. Больничаысь выпишитісны. Петі ортсы корпусӧ. Эг вермы узьны, ойбырасигмоз лёка вӧтаси. Кокъяс бара нин пыктавны заводитӧмаӧсь, мат да и только.
* * *
9.VІІІ. Воим «Раска шор» участокӧ.
* * *
11. VІІІ. Воис Музаcянь да Вера чойсянь письмӧ. Вӧлі ёль дорас ньӧр кӧрым лӧсьӧдам. Енэжті лэбзьӧ аэроплан. Письмӧсӧ сетіс Г. К.^Г. К. — колонияса охранник Карманов Гавриил Николаевич (Бадьёльскысь)./^
* * *
12.VІІІ. Повзьывмӧн ёна висьмылі...
Ӧдва бӧр ловзи. Нинӧм ог сёй.
Бара вӧлі выходнӧй лун, и бара некод эз волы, быттьӧ нарошнӧ гӧгӧрбок менӧ кӧсйӧны вины, но ме ловъя на и ог сетчы кувны, кӧть нинӧм буртор кынӧмӧ оз волы, а век боритча висьӧмкӧд да удж керны кӧсъя. Лӧсьыд эськӧ уджавны шонді водзын, тӧв йылын. Воздух ыркйӧдлӧ, чӧскыд — вӧчам ньӧр кӧрым, заптам, мича кыдзьяс пӧрлӧдлан да корӧсьӧ вундалам-тэчам. Сэтӧр тусь, гӧрд намыр тусь вомад сюйыштлан, ӧтик оз тусь аддзи да синваӧй войтыштіс...
* * *
13, август. «Оз тусь — югыд вирӧй, намыр — небыд яйӧй...» — уси тӧд вылӧ бӧрдӧдчан кывйысь.
* * *
Авг., 17. Здравствуй, дорогая спутница жизни моей — Александра — «подруга дней моих суровых», как говорил бессмертный Пушкин! Ты первая и последняя... Тэ медбӧръя волысь и вӧлін (2.V), а ӧні, тыдалӧ, медводдза жӧ лоан. ...Виччыся сӧмын, тэнӧ нин сӧмын, сэсся некод вылӧ нин надея эз коль.
* * *
21, авг. Виччысьла тай, виччысьла кодӧскӧ, сёянтор вайысьӧс, но некод оз мыччысьлы. Висьми бара дзикӧдз гырк пытшкӧсӧн — ва чӧжсьӧ и чӧжсьӧ, кыпӧдӧ ӧтарӧ, кокъяс пыктісны. Коли нин ме ог тӧд кымын лун. И некод весиг, кӧть понлы моз нин, оз шыбитышт да шу: «На, жӧрит! Мед он прӧпадит!» Ог нин эськӧ лӧгась, кӧть и сідз шуасны. Сэтшӧм окота, сэтшӧм ёна гаж петӧ овны вӧльнӧй светын. «О, други! Не хочу я умирать!» — пыр горӧдчысьӧ тадз менам Пушкин кывъясӧн. Пыр гажаджык и гажаджык кажитчӧ природаыс, пыр мусаджык и мусаджык олӧмыс му вылас «на закате дней».
* * *
22 августа. Талун удж вылӧ эг вермы петны, водтӧдіс. Сестра сетіс тӧрыт рыт и талун асыв 8 капля строфан, и ӧні сьӧлӧмӧй уджалӧджык. Кӧть эськӧн судебнӧй экспертиза помасьтӧдзыс верми мед олыштны. Талун гижа, кора защитникӧс коллегияысь... Войбыд вӧтаси, быттьӧ томиник кыдз пуа рас керала да му вӧча: увъяссӧ, коръяссӧ разӧда да муӧн тыртала, пучерсӧ пес вылӧ оръяла; вужъяссӧ лэчыд коканӧн оръяла, мыръяссӧ перъяла, мичаджык пуяссӧ аллеяӧн бор пыдди коляла. Керас шӧрас быттьӧ лӧсьӧдча вӧчны ичӧтик керка пӧв...
* * *
23 августа. Муса челядьӧй менам, менам вир-яйӧй ті: Муза, Авъя, Вокан да тшӧтш тіянкӧд дона чойӧй Вераӧй! Оланныд-выланныд! Дзоньвидзаӧсь-ӧ, гӧгӧр-ӧ бур тіян? Ӧні ті ас кежаныд, мамаыд, кӧнкӧ, петіс нин туйӧ, ме дінӧ, но эз на волы, коркӧ ӧд воас жӧ. Музалысь да Вералысь письмӧястӧ пӧлучиті.
* * *
1934 вося август. Вит вося годовщина лунъяс мунӧны. Чукӧртчылім Москваӧ делегатъяс став Союз пасьтаысь сӧветскӧй писательяс, вӧліны унаӧн и мукӧд странаса революционнӧй гижысьяс. Алексей Максимович Горький гӧгӧр, ыштӧ мазі гӧгӧр, жуисны-зілисны рабочӧй мазіяс... Ме вои август 17 лунӧ. Буретш съезд воссян час кежас (съездлы колӧ вӧлі воссьыны август 15-ӧд лунӧ, но М. Горький висьӧм понда вӧлі отложитӧмаӧсь 17-ӧд лунӧдз)...
* * *
25 августа. Воис Ара... Ылісянь на казялі ме: ордым кузя нопъя локтӧ; ми вӧлі удж вывсянь локтам. Ми пос помынӧсь — сійӧ потшӧс сайын. Эз тӧд — ме шляпаӧн нин шенася-а...
