ВАРЫШ ЙЫЛЫСЬ СЬЫЛАНКЫВ
І
Змей гӧраясті зэв вылӧдз кыссис, кык гӧра костӧ чӧв гартчис-водіс да дзоргис сэсянь, кыдз гызис саридз.
Жар шонді ворсіс лӧз енэж шӧрын, да сэтчӧ койис пӧсь ловсӧ гӧра, да улын гыыс из кыркӧтш нӧйтіс.
А гӧра костӧд, сап пемыдінті, пыр изъяс вомӧн, ю лэччис сылань, кӧн мургис саридз.
Быг пытшкын сійӧ, дзор еджыд, вына, из гӧра вундіс да саридз вакӧд скӧр шыӧн йитчис.
Лӧз енэжсяньыс нем чайттӧг уси Змей дінӧ Варыш, борд сылӧн вирӧсь, дой — морӧс пасьта.
Чуть горӧдӧмӧн уси да вынтӧм скӧрысь из вылын нӧйтіс вир доя морӧс...
Змей повзис сыысь, зэв сюся вешйис, но регыд аддзис, мый лэбач олӧ медбӧръя здукъяс.
Бӧр лэбач дінӧ зэв матӧдз кыссис да синмас сылы пинь пырыс шуис:
— Мый, кувны кутін?
— Сідз, кувны куті! — ышловзис пыдысь да шуис Варыш. — Ме бура олі!.. Ме тӧда шудсӧ!.. Кось нулі збоя!.. Ме енэж тӧда... Тэ матысь сійӧ он аддзыв некор... Ок, коньӧр тэ.
— Но, мый нӧ енэж? — Куш, тыртӧминъяс... Кыдз ме сэн кысся? Мем тані долыд... Тан шоныд, васӧд!
Тадз лэбач кывлы Змей вочавидзис да сераліс тшӧтш сы вылын мӧвпнас йӧй сёрни вӧсна.
Да шуис аслыс: «Кӧть лэбав вылын, кӧть муті кыскась, пом воас ӧткодь: му пытшкын сісьмам...»
Но повтӧм Варыш став вынсьыс вӧрзис, юр лэптіс муртса да синнас кытшов ас гӧгӧр вӧчис.
Руд изъяс костӧд ва рудзтіс гӧгӧр, сісь дукӧн вӧлі тыр пемыд гуран, эз ветлы лолыд.
Сэк Варыш шогла да сьӧлӧм дойла став вынсьыс горзіс:
— Ок, эськӧ вывлань кӧть ӧтчыд качны!.. дой бердӧ эськӧ ме врагӧс жмиті да... пӧдті сійӧс ме аслам вирӧн!.. о, косьлӧн шудыс!
Змей аслыс шуис: «А, гашкӧ, сэні збыль долыд овны, кор енэж вӧсна тадз ымзӧ Варыш!»
Да лэбачлы сэк тадз сійӧ вӧзйис: «А вешйышт дорлань да шыбитчы сэсь кыркӧтш йывсянь. Бӧр, гашкӧ, качлан тэ бордъяс вылад да муртса бара ас ног олан».
Сэк вӧрзис Варыш, шы муртса лэдзис да нильӧг из выв, кӧн гыж пыр вильдіс, кыр дорлань мӧдіс.
Кор воис дорӧдз, сэк бордъяс восьтіс, став морӧс тырыс сӧдз сынӧд босьтіс да ломзян синмӧн... сэсь увлань тювис.
Кыдз из, тшӧтш ачыс, борд жуглігтырйи, зэв ӧдйӧ уси.
Гы юлӧн сійӧс ас пытшкас босьтіс, вир вывсьыс мыськис, быг пытшкӧ тӧбис да саридз ваӧ тшӧтш сьӧрсьыс нуис.
А саридз гыыс шог горзӧм шыӧн из кыркӧтш нӧйтіс... да саридз вылын эз тыдав лэбач, шой сылӧн воши...
ІІ
Змей важ моз куйліс да мӧвпас кутіс кыдз лэбач кулі, пыр вывлань зілис.
Сэк видзӧдліс Змей сылань, кӧні эз тыдав помыс, пыр коді чужтӧ шуд йылысь мӧвпъяс. «Мый аддзис Варыш сэсь — пом ни пыдӧс, кӧн сӧмын кушин? Мый сэтшӧм олысь йӧз сьӧлӧм торкӧ тшӧтш кулан здукас, пыр лэбны зілиг? Мый, кутшӧм югыд сэн налы тӧдчӧ? А ме ӧд ачым дзик ставсӧ тайӧ тшӧтш тӧдны верма, кор эськӧ вывлань здук кежлӧ качла».
Тадз шуис — вӧчис. Кытш гартіс ассьыс да педздіс вывлань, сэн нюжгӧдчыліс веж чукля кӧвйӧн.
Оз вермы лэбны, код чужи сӧмын пыр кыссьӧм вылӧ! Змей тайӧ кывъяс эз кут тӧд вылас да уси муӧ бӧр изъяс вылӧ, эз доймы сійӧ да шуис сӧмын сэк серамсорӧн: «Со мыйын гажыс, кор енэжланьӧ му вылысь лэбан! Став гажыс — усьӧм! Йӧй лэбач чукӧр! Оз тӧдны мусӧ, шог налы сэні, пыр енэжланьӧ лов налӧн кыскӧ бур олӧм корсьны. Сэн сӧмын тыртӧм. Сэн уна югыд, но абу сёян да асьтӧ кутны сэн абу подув. Мый вылӧ гордость? Ас колӧмъяслысь мед дзебны йӧйлун да олӧм тыртны сійӧн? Йӧй лэбач чукӧр! Кыв налӧн сэсся оз нин ылӧд! Ме ӧні ачым дзик ставсӧ тӧда! Ме тӧда енэж. Ме сэтчӧ качлі, сы джуджда видлі, сэсь усьӧм тӧдлі, но ме эг жугав, а сӧмын водзӧ важ дорысь ёна ме аслым эска. Му радейтны оз вермы коді, мед ылалӧмӧн нэм сійӧ олӧ. Ме тӧда збыльсӧ. На чуксасьӧмӧ ог некор эскы. Му чужтіс менӧ, — ме муӧн ола».
Кыдз тупыль сійӧ из вылын гартчис да нимкодясис ас мывкыдлуннас.
А улын ворсіс пом тӧдтӧм саридз да гыыс лёкысь из кыркӧтш нӧйтіс.
Сы горзӧм шыын пыр сьылӧм йиркис збой лэбач йылысь, из кыркӧтш вӧрис сы кучкӧм вынысь, лӧз енэж вӧрис, скӧр сьылӧм кыліс:
«Немповтӧм збойлы ме ошкӧм сьыла!»
«Немповтӧм збойлун — со олан мудрость!»
«О, повтӧм Варыш! Кось врагкӧд нуиг тэ вирӧн ойдін... Но воас кадыс — сьӧд олӧм пытшкын, кыдз би кинь, ӧзъяс пӧсь вирлӧн тэнад быд усьӧм войтысь, да вӧля колӧм сэк ӧзтас уна немповтӧм сьӧлӧм!»
«Мед кулін тэ! Но сьыланкылын тэ водзӧ вылӧ нэм кежлӧ колян, мед шуд да вӧля пыр збоя корсьны!»
«Немповтӧм збойлы ме сьылӧм сиа!»
