ШОЧА ОВЛӦ

Уна во нин коли. Ме вӧлі сэк сӧмын на 10 арӧса. Ӧні на син водзын, быттьӧ тӧрыт вӧлі. Гожӧм. Рытнас воисны гортӧ ай-мам. Айӧ шуӧ: «Аттӧ, Волга матушкаыд кутшӧма дурмӧма. Мед эськӧ пыжнымӧс оз жӧ кылӧд». Ужын бӧрын ставным водалім узьны. Вой шӧр гӧгӧр кымын друг жугавлӧм, чегъясьӧм шы кутіс кывны. Котӧрӧн ставным уськӧдчим ывлаӧ. Некод нинӧм огӧ гӧгӧрвоӧ. Быдлаті киссьӧ, жугавлӧ, чегъясьӧ. Кок уланым муыс вӧрӧ, исковтӧ кытчӧкӧ, шлювдӧ — он вермы весиг сулавны. Аньяс, челядьяс бӧрдӧны, горзӧны. Пӧрысьяс кевмӧны. Усьӧны, чеччӧны — пышйӧны ставныс, кытчӧ кокыс нуӧ. Керкаяс киссьӧны.

Грездным быттьӧ ловзьӧма — исковтӧ увлань. Му вӧрӧ гыа ва моз; лыблас, лэччылас. Вывті ёна повзим. Ӧти пӧрысь ань повзьӧмысла кулі. Чайтім, му вежандыр воис. Куим лун чӧж муыс вӧрис, 70 керка жугаліс. Мукӧдыслӧн сӧмын керъясыс колины. Дзоньӧн сулалысь керкаыс этшаник коли жӧ. Му вылын, йӧрын, ставыс вежнясьӧма. Дзонь град ни пу эз нин коль. Нюръяс пыдди вывтас местаяс лоӧмаӧсь, гӧраяс пыдди — гуранъяс. Тӧдтӧм лои асланым оланін.

Дыр йӧз костын та йылысь сёрни муніс, унаысь полігтырйи гаравлывлісны му тірзьӧм йылысь. Пӧрысь йӧз ӧнӧдз на абу вунӧдӧмаӧсь сійӧ кадсӧ. Став шогсӧ вӧчысьыс вӧлӧмкӧ Волга ю, мупытшса шоръяснас. Ва жугліс, кылӧдіс берегсӧ. Мупытшса шоръяс нуисны миян грезд улысь мусӧ. Сэсся грезднаным и ставнаным исковтім ю дорӧ.

Сура ю пӧ, шуӧны, быд во нуӧ мусӧ ӧтар берегсьыс 3 сыв пасьта. Олысьясыс пӧ быд во керкаяссӧ пыдӧджык юсяньыс сувтӧдӧны.

Саратов дінын пӧ сідз жӧ муыс исковтӧма. Важӧн Саратов кар сулавлӧма ю бердас матын, ӧні берегыс исковтӧма веськыдладорас, Волга ю кольӧма шуйгавыв.