ШЕВА

Пӧрысь манак паськӧдіс, ӧшӧдіс морӧс вылас епитрахиль. Зэв уна нывбаба гӧгӧртісны сійӧс, мӧда-мӧд вежмӧсӧн кисӧ окалӧны — бласлӧвитчӧны. Найӧ ӧти шеваа бабаӧс киӧдыс кыскисны сы дінӧ. Мыйӧн аддзис шеваа бабаыд пӧрысь манактӧ, кутіс лёкысь чилзыны, сутшиктыны, тіравны. Пӧрысь манак зіля епитрахильнас юрсӧ вевттьӧмӧн лыддис молитва. Шеваа баба пырысь-пыр лӧнис, тшук ланьтіс дай.

Ме ичӧтдырйи вичкоясысь, манастыръясысь аддзывлі уна шеваа бабаясӧс. Найӧс вайлӧны вӧлі ӧбӧдняӧ. Быд ногыс сэні вӧлі чилзасны, горзасны, пон моз увтасны. Мыйӧн дари доз дорӧ вайӧдасны, пырысь-пыр горзӧмысь дугдӧны, чӧв ланьтасны. Кӧть регыдик кежлӧ-а ланьтласны. Ме ичӧтдырйи шензьыны вӧлі ог вермы сы вылӧ. Куті юасьны гырысьяслысь, велӧдысьяслысь, мый понда ланьтӧны дари доз дорас. Меным висьтавлісны: — найӧ пӧ ылӧдчӧны — дыш уджавныс да; позьӧ пӧ вӧтлыны налысь шеванысӧ повзьӧдӧмӧн, видӧмӧн.

Коркӧ дыр мысьт вӧлись меным висьталісны веськыда бур докторъяс. Абу пӧ некутшӧм ылӧдчӧм сэні нывбабаяслӧн, дай абу пӧ некутшӧм и шева. Сійӧ пӧ зэв страшнӧй висьӧм, нывбабаяслӧн висьӧм. Сӧмын пӧ сэтшӧм висьӧмнас висьӧны миянын, Роч муын да Коми муын нывбабаяс. Сэтшӧм висьӧмыс вывті сьӧкыда пемыда олӧмысь вермӧ сӧмын лоны. Сійӧ висьӧмыс петкӧдлӧ нывбабалысь сьӧкыда, шога олӧмсӧ. Гидъясын, картаясын, видзвывъясын коньӧръяс аньяс челядясясны (велӧдчӧм бабкаяс отсӧгтӧг), ӧтнаныс. Сэсся пырысь-пыр челядясьӧм бӧраныс кутчысьӧны сьӧкыд уджӧ. Асьнысӧ нэм кежланыс жугӧдӧны сійӧн. Сы кындзи содтӧд вежӧрттӧм верӧсъясныс нӧйтӧны найӧс. Шогыс коньӧръяслӧн чукӧрмӧ сэтшӧм олӧмсьыд пом ни пыдӧс. Ёнджык аньяс, дерт, быдсяматор терпитны вермӧны. Небыдджыкъяс, вынтӧмджыкъяс вывті и мунӧ сэтшӧм висьӧмыс — шеваыс. Дари доз дінын ланьтӧмын абу некутшӧм пӧръясьӧм. Уна йӧз мыжалӧны сэтшӧм висьысьяссӧ — дышла пӧ. Некутшӧм пӧръясьӧм некодлӧн эськӧ абу сэні да. Висьысьяслӧн дай мукӧдыслӧн сэтшӧм нин вера, ыджыд вера дари доз вылас, вичко служительяс вылас. Сьӧлӧмсяньныс веритӧны: матыстчылан кӧ пӧ, вежалунныс, сӧстӧмлунныс налӧн вӧтлас нин пежтӧ, шевасӧ. Виччысьӧны сьӧлӧмсяньныс чудеса. Сійӧн здук кежлӧ бурдлӧмыс лолӧ, дерт эськӧ, ӧти здук кежлӧ да. Дари доз помысь, вичко помысь дзикӧдз бурдӧм оз вермы лоны сэтшӧм висьӧмысь.

Велӧдчӧм да кокни, долыда олысь нывбабаяс тай оз тӧдны шева висьӧмтӧ. Найӧс тай некод оз тшыкӧд. Шеваа мужикъяс оз жӧ кывсьывлыны. Меным унаысь лолывлі коми аньяскӧд шева йылысь сёрнитлывлыны. «Менӧ тай кӧ, мися, эськӧ оз некод тшыкӧд». «Дерт пӧ, тэнӧ оз, молитваыд тырмӧ да». Сійӧ со и эм. Шеваа аньясыс медся юрбитысьӧсь да кевмысьӧсь енлы. Велӧдчӧм йӧзыд оз зэв енмыдлы кевмысьны да юрбитны. Долыда, кокньыда олысьыдлӧн буретша жӧ енмыд дум вылад усьлас. Гӧгӧр мӧвпыштӧ та йылысь. Кытчӧдз нывбаба оз веж ассьыс сьӧкыд, пемыд олӧмсӧ, морт туйӧ оз кут пуксьыны, оз кут велӧдчыны, сэтчӧдз татшӧм висьӧмъяс оз бырны миян аньяслӧн.