КОМИ ПЫВСЯН

Коми йӧзлы ёна муса асланыс ичӧтик сьӧд пывсяныс. Вӧчӧны сійӧс шлега керйысь. Ӧти пельӧсӧ изъясысь тэчӧны гор (пач), гор бокас лӧсьӧдӧны вылыс джодж. Неылын гор дінсянь ва вор. Васӧ шонтӧны пӧсь изъясӧн. Тшынлы петны стенӧ вӧчӧма неыджыд розь. Лункосмӧсӧн пывсянсӧ ломтӧны бур йӧз. Удж бӧрад, мудзӧм бӧрад лыястӧ небзьӧдӧ, сьӧлӧмтӧ бурмӧдӧ шондібан пывсяныд.

Сьӧд тшын лэччӧ сиктӧ: уна пывсян ломтысьӧ. Недыр мысти аньяс ворйӧ ва шонтасны, стенысь тшын розь тупкасны. Муртса чадыс бырыштас — мужикъяс киняулӧ корӧсь топӧдӧмаӧсь, мунӧны пывсьыны. Паськӧм кӧджӧ колясны. Чуманӧн гор вылӧ ва койыштасны. Корӧсь небзьӧдасны ва руӧн. Вылӧ каясны да швачкӧдчыны мӧдасны. Оз бурмы сьӧлӧм, содтӧны жар, чуманӧн унджык койӧны гор вылӧ ва. Ёна и гажа: сёрниыд, увгӧмыд, бӧрдӧмыд, серамыд — ылӧдз ӧд кылӧ. Ёна и лӧсьыд! Ёна и жар! Посниыд тэрыба лэччасны уліӧ дай сэні на жар, лоӧ на тетюртчыны^Копыртчыны, лажыньтчыны/^ налы. Гырысьлы зэв лӧсьыд, найӧс оз сот, кучкасьӧны корӧсьӧн — мӧд морт дінаныс он сувт: корӧсьӧн ӧвтчӧмысь быттьӧ би тӧв пӧлялӧ. Пывсясны, кӧдзыд ваӧн киськыштчасны, — кизьтӧмӧсь, вӧньтӧмӧсь гортӧ локтӧны.

На бӧрти мунасны нывбабаяс кагаясӧн. Коми аньяс оз ӧтнаныс пывсьыны. Сикткодьӧс чуксаласны пывсьыныд. Ӧти лун ӧти ордын пывсьӧны, мӧд лун мӧд ордын. Ёна пывсьӧны, кагаяслысь ки-кок мурталӧны, ӧдзӧс сайӧ кымльӧскивыв сьӧласьӧны, налысь вомидз вӧтлӧны. Кагаяс гора горзӧны, мамъяс найӧс бурӧдӧны, мукӧд зіля пывсьӧны. Пывсьыссяс да петасны, тӧлысьлань бергӧдчасны да юрбитны мӧдасны: «Чистӧя баня пӧлин да пӧжалін». Юрбитігтырйи гортӧ мунасны. Ва юрси веськӧдласны. Кӧдзыд сур юасны, мужикъясыд курыдтӧ на видлыштасны и. Кокни овны пывсян бӧрын: лыясыд небзьӧмаӧсь, мудзӧм оз кыв. Чӧскыда, чорыда узьсяс войыд.