КОМИ МУ

Коми му кузя ме муна,
Гӧгӧр сулалӧ сьӧд вӧр.
Вӧрыс вывті, вывті уна,
Сыысь унаыс оз тӧр.
Аддза: сэні шыльыд пожӧм
Лэптӧ вылӧ ассьыс юр.
Сылы ӧткодь тӧв кӧть гожӧм
Сэтшӧм пуыс тайӧ бур.
Сэні быттьӧ пӧрысь пӧчӧ
Дзормӧм кыпӧдчӧма коз.
Сійӧ увъяс костын вӧчӧ
Вӧрса пӧтка шоныд поз.
Сэні вашкӧдчӧны гора
Пипу чойкӧд еджыд кыдз.
Мыйкӧ сёрнитӧны нора,
Корйӧн лапкӧдӧны сідз.
Сэні сус пу гӧгрӧс бока,
Сэні пелысь, сэні льӧм,
Тані бадьяс вӧсни кока.
Зэв на дженьыд налӧн нэм...
Вӧрыс помтӧм. Туйыс кӧні?
Зонмӧй, яг пиын эн вош!
Аддза сэні, аддза тані
Ыджыд тапикасьӧ ош.
Ветлӧ кӧин; пиньсӧ йирӧ,
Корсьӧ аслыс кынӧмпӧт.
Наян ручыд гуӧ пырӧ,
Бурӧн некодлы оз шед.
Кӧчыс дзебсьӧ лапъяс сайӧ,
Видзӧ ассьыс дона юр.
Ӧдйӧ-ӧдйӧ пуӧ кайӧ
Паськыд бӧжа ичӧт ур.
Дозмӧр пувсӧ зіля сёйӧ,
Гӧгӧр гыӧ сьӧла, тар...
Тури кокнас нюрсӧ лойӧ;
Абу муса сылы ар.
Аддза: пищальясӧн мунӧ
Сьӧла кыйны коми морт.
Гортса олӧм сылӧн вунӧ.
Ылӧ кольӧма нин горт.
Туйтӧг ӧтнас ветлӧ сійӧ,
Вӧрын нинӧмысь оз пов.
Уна вӧрса пӧтка кыйӧ,
Уна зверлысь босьтӧ лов.
Коми мортӧс ошкыд тӧдӧ,
Тӧдӧ кӧин, тӧдӧ руч.
Сьӧла, уръяс сылы шедӧ,
Сійӧ кыйсьыны оз мудз.
Муна водзӧ. Муна ылӧ,
Оз и помась пемыд вӧр.
Кӧнкӧ гора сёрни кылӧ,
Кӧнкӧ ёна клёнгӧ чер;
Аддза: сортовкаяс лэдзӧ
Том и пӧрысь коми йӧз.
Керъяс берег дорӧ тэчӧ,
Заптӧ вузӧс вылӧ пес.
Уджыс пуӧ найӧ киын:
Керлӧн, песлӧн содӧ лыд.
Быд морт мырсьӧ тола пиын
Кытчӧдз оз во пемыд рыт.
Уна пӧсьыс сэні киссьӧ,
Уна мортлӧн тырӧ лов.
Коді сортовкаӧ гижсьӧ,
Сійӧ кокньыда оз ов.
Паськыд туй вылӧ ме пета.
Аддза: мунӧ нопъя морт.
Коймӧд, нёльӧд... Тӧда, тӧда,
Мыйла эновтінныд горт.
Эз ло гортад тіян нинӧм,
Тшыгйӧн овны абу шань.
Быд лун сёйны корӧ кынӧм.
Корсьны мӧдӧдчинныд нянь.
«Сідзи, сідзи», ӧтик шуис:
«Мӧдім заводъясӧ ми.
Кӧть и сьӧкыд сэтчӧ туйыс,
Тшыгйӧн семьятӧ он ви».
Муна водзӧ... Тулыс воис.
Лымйыс сылӧ. Киссьӧ зэр.
Кӧдзыд йисӧ шоныд сёйӧ,
Ойдӧ уналаті вӧр.
Ваын сулалӧны пуяс.
Ваыс видзӧдчан кодь лӧнь.
Эжва, Сыктыв, коми юяс
Быттьӧ паськыд эзысь вӧнь.
Аддза: воссьӧ берег пӧлӧн
Уна керка, уна горт.
Керка сайын ветлӧ вӧлӧн,
Муяс гӧрӧ коми морт.
Ещӧ муна водзӧ... ылӧ...
Воис гожӧм, ытшкандыр.
Коса бриньгӧм рытӧдз кылӧ.
Тайӧ бриньгӧм дыр оз быр.
Кӧні помыс Коми мулӧн?
Эг ме аддзы пом ни дор.
Коді лыдсӧ тӧдӧ пулысь?
Коді тӧдӧ сійӧ тор?
Коми му кузя ме муна —
Гӧгӧр сулалӧ сьӧд вӧр.
Вӧрыс вывті, вывті уна,
Сыысь унаыс оз тӧр.