МОРТА НИГА

Наста Ӧньӧкӧд мӧд во нин школаӧ котралӧны. Найӧ пыр орччӧн пукалӧны, мӧда-мӧдлы отсасьӧны. Школаӧ мунӧны и локтӧны тшӧтш. Рӧштво кежлӧ лэдзалігӧн велӧдысь сеталіс лыддян нигаяс. Некодлысь эз юав, кодлы кутшӧм нига колӧ, кутшӧм нига кипод улас веськалі, сэтшӧмӧс и сетіс. Настук Ӧнюккӧд видлавны кутісны мӧда-мӧдлысь дай Ӧнюклӧн вӧлӧма морта нигаыс, Настуклӧн морттӧм. Настукӧс зэв шогӧдіс, быдӧн синваыс доршасис. Кымыныськӧ сійӧ босьтліс киас Ӧнюклысь нигатӧ. Эз и уна вӧв мортъясыс эськӧ да. Настук эштіс жӧ кевмысьны корны вежсьыны нигаяснас да Ӧнюк эз небзьы, эз веж. Кампеттӧ, прениктӧ, кӧлачтӧ вӧзйис содтӧд сетны эськӧ да, эз тай немтор вылӧ ышты детинаыд. Буракӧ кыкнанныслы ӧткодь муса вӧлӧма морта нигаыд. Настук сэсся ассьыс эз весиг восьтлы нигасӧ рӧштво чӧж. Мый нӧ пӧ морттӧм нигасьыд. Дугдывтӧг вӧлі петӧ Ӧнюк ордӧ да видлалӧ нигасӧ. Дыр сійӧ эз вунӧд мортсӧ нигасьыс: ӧтилаын рисуйтӧма — челядьяс мунӧны школаӧ; мӧдлаын — лымйӧн тырӧм керкаяс, пуяс; коймӧдлаын — нопъя дядьӧяс мунӧны туйӧд. Лыддьыны эськӧ некоднанныс жӧ эз лыддьыны да. Ӧнюк шуӧ: «Мый нӧ пӧ лыддян, ог нинӧм гӧгӧрво да». Настук листалӧ нигасӧ да шога мӧвпалӧ: «Мед жӧ лыддян да гӧгӧрвоан, мыйла бара оз гижны гӧгӧрвоана нигасӧ-а?» Ӧтчыд Наста петіс Ӧнюкъясӧ. Налӧн сӧмын мамыс паччӧр вылас узьӧ. Настук ӧдйӧ уськӧдчис ен ув пельӧсас, сы весьтысь джаджсьыс шур-шарӧн лэдзис морта нигатӧ да котӧрӧн гортӧ. Аслас сьӧлӧмыс чеччӧ полӧмысла да колӧмысла. Нига дзебис, ачыс ӧдзӧсӧ и дзӧргӧ — дыр-ӧ оз пыр Ӧньӧ. Настуклы шуд ыстіс дзонь лун дай вой морта нигатӧ видзны. Ӧнюк мӧд луннас вӧлись казялӧма да локтіс бӧрдігтырйи нигала. Рӧштво чӧж Настук шогсис-мырсис морта нига вӧсна.