ТӦВЛӦН ВЕРМАСЬӦМ
Лёкмӧма ёна пӧрысь пӧч — тӧв, кӧсйӧ став ловъя ловсӧ кынтыны. Медводзын судзӧдчӧ лэбачьяс дінӧ. Пель сьӧдмӧма тӧвлӧн найӧ чипсӧм да горзӧм шысьыс. Пӧльыштіс тӧв кӧдзыд ловнас пуяс вылӧ, — гылаліны коръяс, разаліны пасьтала, некытчӧ лои воштысьны коньӧръяслы лэбачьяслы. Чукӧртчисны ӧтлаӧ дай арталӧны: кытчӧ воштысьны? Сэсся ӧтув котырӧн-котырӧн мӧдісны шывгыны Саридзӧ — шоныдінӧ. Лои тӧвлы шеныштны лэбачьяс вылӧ: «Он жӧ пӧ ӧд вермы вӧтчыны на бӧрся-а». Кольччис сӧмын пышкай, дзебсясьӧ гумла дорын, пес видзанын. Тӧв уськӧдчис вӧрса пемӧсъяс вылӧ. Быдлаті тыртіс лымйӧн, пукталіс вӧрӧ толаяс, гыӧртіс пуяс... Лунысь лунӧ чорзьӧдчӧ кӧдзыд. Чеччалӧ козйысь козйӧ, школӧдчӧ, повзьӧдлӧ вӧрса пемӧсъясӧс. Зверъясыд оз зэв и повны сыысь. Пасьныс налӧн лёка шоныд, гуныс джуджыд. Со ур гыркса пуӧ дзебсьӧма да, килльӧ коль. Ош певсӧ нёнялӧ аслас гуын. Кӧчильӧй чеччалӧ, шонтысьӧ шоныд пасьнас.
Мӧсъяс, вӧвъяс, балюкъяс важӧн нин шоныд гидын, картаын дась лӧсьӧдӧм турун сёйӧны, шоныд юан юӧны. Ёнджыка скӧрмӧ кӧдзыд. «Колӧ жӧ пӧ кодӧскӧ кынтыны». Аддзӧ чериясӧс, кутчысьӧ на бердӧ. Кӧдзыдысь-кӧдзыд лунъяс ыстӧ. Котралӧны кӧдзыдлӧн пиян, котшкӧдчӧны мӧлӧтӧн, вӧчалӧны посъяс ю вомӧн, ты вомӧн. Кынтісны эськӧ юяс, тыяс, да сӧмын вылыссӧ. Чери пыдӧ-пыдӧ пышйис... Йи улын налы шоныдджык воддза дорысь. Чӧвлӧй жӧ, зверъяс да, пӧткаяс да, черияс кӧ оз сетчыны меным, кутчысьла ме мортъяс дінӧ. Ӧтарӧ кӧдздӧдӧ, ӧшиньяс мича серӧн серӧссьӧмаӧсь. Шлачкӧдӧ, катшкӧдӧ стенад, ӧдзӧсад, керъястӧ поткӧдлӧ. Мортъяслы веськодь кӧдзыдлӧн скӧралӧм: ломтӧмаӧсь пачьяс, шонтысьӧны да сералӧны кӧдзыдӧс. Ковмас кӧ песла-турунла мунны, пасьтасьӧны пасьӧн, кӧмасьӧны тюниӧн, кианыс кушенча кепысь сюясны. Сэсся босьтасны чер да пӧсявтӧдзыс ӧвтчасны, кӧдзыдыд весиг матыстчыныс оз лысьт на дінӧ.
Туй кузя люзьгӧны вӧла-доддяяс. Вӧвъясысь ру петӧ быдӧн. Ямщикъяс чеччалӧны, кепыся кинаныс воча школӧдчӧны, кӧдзыдӧс ошкӧны-сералӧны.
Медся ёна нин забеднӧ челядь вылӧ. Весиг ӧд найӧ оз повны! Ислалӧны, лымйысь акань вӧчалӧны, чой вӧчалӧны, киськалӧны. Кӧдзыдсӧ на ещӧ отсасьны чуксалӧны: чой волькмӧдны. Уськӧдчылас жӧ эськӧ кӧдзыдыд да, чепӧльтас кодӧс пельӧдыс, кодӧс нырӧдыс. Оз повны челядь: босьтасны лым да ниртӧны. Сӧмын гӧрдӧдасны би моз.
Аддзӧ тӧв ассьыс вермытӧмсӧ, сэсся лёкысла бӧрддзӧ синваӧн. Пес видзан доръясӧд ӧшйӧ синва. Буракӧ матысмӧ тулыс.
