ЛЫМ КУЗЯ КӦМТӦМ

Лым кузя кӧмтӧм,
Туй кузя пасьтӧм,
Котӧртіс да котӧртіс —
Анькытш вартӧм аддзис.
Сійӧ шуис: «Бог помеч!
Лун кежӧ пожйӧн,
Во кежӧ пудовняӧн».
Нӧйтісны да нӧйтісны,
Гортас мӧдӧдісны.
«Ой-ой, бабӧ, нӧйтісны
Ой-ой, бабӧ, виисны».
— «Мыйысь, пиӧ, виисны?
Мыйысь, пиӧ, нӧйтісны?» —
Анькытш вартӧны вӧлі да
Ме тай налы шуи:
Лун кежлӧ пожйӧн,
Во кежӧ пудовняӧн.
— Эз ӧд, пиӧ, сідзи ков,
Эз ӧд, пиӧ, тадзи ков.
Тэ ӧд мед шуин:
Лун кежӧ сёӧн,
Во кежӧ сюрсӧн.
— Ӧні, бабӧ, тӧда нин,
Аски, бабӧ, кужа нин.
Лым кузя кӧмтӧм,
Туй кузя пасьтӧм,
Котӧртіс да котӧртіс —
Гортъякӧд паныд лои:
«Лун кежӧ сёӧн,
Во кежӧ сюрсӧн».
Нӧйтісны да нӧйтісны,
Гортас мӧдӧдісны.
«Ой-ой, бабӧ, нӧйтісны,
Ой-ой, бабӧ, виисны»...
— Мыйысь, пиӧ, нӧйтісны?
Мыйысь, пиӧ, виисны?
— Гортъякӧд паныд лои
Ме тай налы шуи:
Лун кежӧ сёӧн,
Во кежӧ сюрсӧн.
— Эз ӧд, пиӧ, сідзи ков,
Эз ӧд, пиӧ, тадзи ков.
Тэ ӧд мед шуин:
Прӧсти бласлӧви,
Югыдін да шоныдін
Мӧдаръюгыдын!
— Ӧні, бабӧ, тӧда нин,
Аски, бабӧ, кужа нин.
Лым кузя кӧмтӧм,
Туй кузя пасьтӧм,
Котӧртіс да котӧртіс —
Свадьбакӧд паныд лои:
«Прӧсти бласлӧви,
Югыдін да шоныдін
Мӧдаръюгыдын!»
Нӧйтісны да нӧйтісны,
Гортас мӧдӧдісны.
«Ой-ой, бабӧ, нӧйтісны,
Ой-ой, бабӧ, виисны»...
— Мыйысь, пиӧ, виисны?
Мыйысь, пиӧ, нӧйтісны?
— Свадьба вӧлі локтӧ да
Ме шуи: прӧсти бласлӧви,
Югыдін да шоныдін
Мӧдаръюгыдын!
— Эз ӧд, пиӧ, сідзи ков,
Эз ӧд, пиӧ, тадзи ков,
Тэ ӧд мед шуин:
Ыдждыны да паськавны,
Ыдждыны да паськавны!
— Ӧні, бабӧ, тӧда нин,
Ӧні, бабӧ, кужа нин.
Лым кузя кӧмтӧм,
Туй кузя пасьтӧм,
Котӧртіс да котӧртіс —
Кодлӧнкӧ рынышыс сотчӧ:
«Ыдждыны да паськавны,
Ыдждыны да паськавны!»
Нӧйтісны да нӧйтісны,
Гортас мӧдӧдісны.
«Ой-ой, бабӧ, нӧйтісны.
Ой-ой, бабӧ, виисны»...
— «Мыйысь, пиӧ, виисны?
Мыйысь, пиӧ, нӧйтісны?
— Кодлӧнкӧ вӧлі
Рынышыс сотчӧ да ме шуи:
Ыдждыны да паськавны,
Ыдждыны да паськавны!
— Эз ӧд, пиӧ, сідзи ков,
Эз ӧд, пиӧ, тадзи ков.
Тэ ӧд мед шуин:
Чинны да бырны,
Чинны да бырны.
— Ӧні, бабӧ, тӧда нин,
Аски, бабӧ, кужа нин.
Лым кузя кӧмтӧм,
Туй кузя пасьтӧм,
Котӧртіс да котӧртіс —
Кага моздора паныд лои:
«Чинны да бырны,
Чинны да бырны!»
Нӧйтісны да нӧйтісны,
Гортас мӧдӧдісны.
«Ой-ой, бабӧ, нӧйтісны,
Ой-ой, бабӧ, виисны».
— «Мыйысь, пиӧ, виисны?
Мыйысь, пиӧ, нӧйтісны?
— Вӧлі муна да
Кага моздора паныд лои.
Ме тай сылы шуи:
Чинны да бырны,
Чинны да бырны.
— Эз ӧд, пиӧ, сідзи ков,
Эз ӧд, пиӧ, тадзи ков.
Тэ ӧд мед шуин:
Йывмыны да сӧвмыны,
Йывмыны да сӧвмыны!
— Мӧдысь, бабӧ, тӧда нин,
Мӧдысь, бабӧ, кужа нин.
Лым кузя кӧмтӧм,
Туй кузя пасьтӧм,
Котӧртіс да котӧртіс...