КВАЙТ ЗЭР ВОЙТ

Саридз дорын вӧлі быдмӧ пу. Кор вылас усьӧмаӧсь квайт зэр войт. Зэр войтъяс ӧтлаасисны дай юасьӧны мӧда-мӧдлысь: тэ пӧ коді? Кытысь?

— Ме пӧ, шуӧ ӧти войт: — коркӧ вӧлі лысва, дзоридз вылын. Ӧти асывводзӧ шонді шоныдысь ме кокнялі дай качи вылӧ-вылӧ, лэбачьясысь на вылӧ. Сэні ме аддзыси уна ме кодь войтъяскӧд, ӧтлааси накӧд дай пӧрим ставным кымӧрӧ.

— Ме пӧ, — шуис мӧд войт: — коркӧ вӧлі лым чир, олі ылын-ылын кӧдзыдінын. Ме вӧлі дзик кодзув кодь. Ми унаӧн вӧлім. Ми лэбалім бергалігтырйи бобувъяс моз. Челядь горзывлісны ёна: лым усьӧ, лым, лым! Аслыныс зэв нимкодь. Ӧти детина кисӧ лӧсьӧдіс. Ме уси дай ва войт лои. Сэсся руӧ пӧри. Тӧвныр менӧ янсӧдіс лым чиръяскӧд, нӧбӧдіс саридз дорӧ. Сэні ме ӧтлааси рукӧд. Сэсся качим вылӧ дай пӧрим кымӧрӧ.

— Ме, — шуис коймӧд войт: — ола вӧлі няйт гуранын. Сійӧ гуранын олісны лягушаяс да быдсяма гагъяс. Ме вӧлі няйт войт. Ӧтчыд шонді окыштӧмысь ме пӧри сӧстӧм руӧ. Сэк ме вылӧ качи дай ӧтлааси мича кымӧръяскӧд.

— Ме вӧлі коркӧ йӧв, — шуис нёльӧд войт. — Ичӧтик кагаӧс паньӧдісны йӧлӧн. Ми визувтім ортсӧ дай гылалім пызан вылӧ. Кага видзысь кузьчышъянӧн миянӧс чышкис. Кузьчышъянӧс ӧшӧдіс косьтыны пач дорӧ. Шоныдысь ми паськалім, торйӧдчим кузьчышъянысь дай лэбим восьса ӧшиньӧд. Сэні ми лэбалім, лэбалім да руӧн качим кымӧрӧ.

— Ме вӧлі важӧн вир войт, — шуис витӧд войт. — Ме, гӧрд кумач кодь, ӧшйи гулю бордйӧ. Кодкӧ лыйӧма коньӧрӧс да. Ме кывлі сьӧлӧм типкӧмсӧ шоныд морӧс увсьыс коньӧрлысь. Сэсся кӧдзалі морӧсыс, сьӧлӧмыс дугдіс типкӧмысь. Ме сэки уси турун вылӧ, туруныс быдӧн повзис меысь. Шонді шуис: «Мунам пӧ татысь», чургӧдіс меным ассьыс шоныд югӧрсӧ. Быри менам гӧрдлунӧй, кокнялі, кизьӧрми. Качи ме енэжлань, пӧри кымӧрӧ.

Квайтӧд войт шуис:

— Ме синва. Менӧ уськӧдіс мортлӧн шог. Некод менӧ эз аддзыв. Сӧмын аддзис шондіыд аслас бурлуннас. Мыйӧн уси ме морт синмысь му вылӧ, шонді качӧдігмозыс шуис: «Тэ вӧлін пӧсь, курыд, сола. Ме тэнӧ кӧдзӧда, курыдысь да солысь весала, сэсся лэпта кымӧрӧ».

Муртса удитіс висьтавны синва ас йывсьыс, кыськӧ тӧвныр петіс, нюкыльтіс пуӧс саридз дорысь. Кор вылысь квайтнан зэр войтыс тюрисны саридзӧ.

Лӧз гы саридзлӧн босьтігмоз меліа шуис: «Ӧні ме тіянӧс лайкйӧдлыны кута. Ті вунӧдӧ ассьыныд важ олӧмъяснытӧ — синваӧн, лысваӧн, лымйӧн, няйт войтӧн, йӧлӧн, вирӧн олӧмнытӧ! Ті ӧні ставныд лоанныд Саридз. Лӧз, помтӧм, пыдӧстӧм Саридз!»