ЕНСЯНЬ ТАЙ МЕӦЙ ПУКСИ

Енсянь тай меӧй пукси
Медсӧстӧминас.
Бур йӧзсянь тай меӧй пукси
Медгажаинас.
Лёк йӧзсянь тай меӧй пукси
Вежаланінас.
Юрвыв тай меӧй пукси
Юрвыв вевтаинас.
Кокув тай меӧй пукси
Кокув поска инас.
Лӧсалӧма тай меӧй пукси
Лӧсалӧма улӧс вылас.
Зарни тай меӧй пукси
Зарни нитша керка бердӧ.
Коми пи тай меӧй пукси
Коми пиӧн керӧм ӧшинь дорас.
Ыджыд из тай меӧй пукси
Вӧрзьыштӧмапырысь.
Сир мыр тай меӧй пукси
Чуктытӧмапырысь.
Коз пу мыр тай меӧй пукси
Сардмӧмапырысь.
Кыдз пу мыр тай меӧй пукси
Кельдӧдӧмапырысь.
Пипу мыр тай меӧй пукси
Вижӧдӧмапырысь.
Бадь пу мыр тай меӧй пукси
Вужъясьӧмапырысь.
Лопу мыр тай меӧй пукси
Гӧрдӧдӧмапырысь.
Тыла мыр тай меӧй пукси
Сьӧдӧдӧмапырысь.
Роч сунис тай меӧй пукси
Орана выйын.
Лыа дор тай меӧй пукси
Буждана выйын.
Кыркӧтш дор тай меӧй пукси
Кырана выйын.
Вабергач тай меӧй пукси
Бергӧдчана выйын.
Ва выв тув тай меӧй пукси
Дзирсмунана выйын.
Ва визлач тай меӧй пукси
Визувтана выйын.
Лӧнь куръя тай меӧй пукси
Сыктылӧ петкӧдана выйын.
Сыктыв дор тай меӧй пукси
Эжваӧ петкӧдана выйын.
Эжва дор тай меӧй пукси
Двинаӧ петкӧдана выйын.
Двина дор тай меӧй пукси
Вой саридзӧ петана выйын.
Саридз визулӧ кӧ тай меӧй пета,
Шудӧй кӧ менам оз ло.
Морт нэм тай меным, коньӧрлы
Шӧрӧд лоас кывтлыны,
Помсӧ, дорсӧ абу аддзывны,
Пыжтӧг, пелыстӧг кывтлыны,
Гыысь гыӧ ветлыны.
Ӧтар вадорсьыс тай мына,
Мӧдар вадорас тай ог во.