СЬӦКЫД ВОЙНА КАДӦ БОРДЪЯСИС КОМИ СЬЫЛАНКЫВ

Великӧй Победалы сизимдас во пасъян пӧраӧ окота пыдіджык видзӧдлыны война каддырся олӧм вылас. Туялысьӧс тан кыскӧ сійӧ кадся коми национальнӧй искусство — сійӧ, мый ӧнӧдз омӧля на видлалӧма. Литература да первоисточникъясӧн тӧдмасьӧм бӧрын юрӧ воӧ шензьӧдана мӧвп: война кадӧ коми искусство мӧдіс сӧвмыны! Мыччысьӧны выль жанръяс, выль нимъяс, вӧвлытӧм тшупӧдӧдз кыпӧдчӧ национальнӧй хорлӧн кужан-сямыс. Ставыс тайӧ шедіс искусствоын уджалысьяслӧн талантӧн да асьнысӧ жалиттӧг уджалӧмӧн. Та йылысь и окота висьтыштны.

Уна сё творческӧй уджалысь — збыльысь, коми культуралӧн аскиа луныс! — тышкасисны Великӧй Отечественнӧй война фронтъяс вылын да пӧгибнитісны. Сценавывса мастеръяс да ворсны сӧмын заводитысьяс; нималана журналистъяс да гижны босьтчысьяс; нэм кежлӧ том поэтъясӧн кольысьяс, и найӧ, кодъяс удитісны нин шуны ассьыс кыв; художниклысь, музыкантлысь, гижысьлысь нималӧм шедӧдны кӧсйысьысь енбиа том йӧз.

Рӧдвуж кындзиыс, коді ӧні тӧдӧ налысь нимсӧ да судьбасӧ?! Шуам, 1942 вося тулыснас сьылан да йӧктан ансамбль ветліс гастрольясӧн Котлас — Воркута кӧрт туй пӧлӧн. Сыктывкарысь воис юӧр: 1942 вося март 3 лунӧ Волховскӧй фронт вылын пӧгибнитіс Коми АССР-са медводдза заслуженнӧй артист Василий Павлович Выборов. Тайӧ юӧрнас и восьтісны Ухтаса шӧр культура керкаын концертсӧ. Ведущӧй висьталіс: «Верӧссӧ казьтыліг Надежда Викторовна Выборова сьылас «Вася-Василёк» сьылан». Сійӧ сьыліс тайӧ шмоньлив сьыланкывсӧ и бӧрдіс. Бӧрдіс сыкӧд и ставнас залыс.

Война вылысь доймалӧмӧн воӧм фронтӧвикъяс — культураын уджалысьяс — вӧчисны зэв уна коми литература да искусство кыпӧдӧм-сӧвмӧдӧмӧ. Ен сыкӧд, ми тӧдам налысь нимъяссӧ, и уджсӧ налысь донъялӧма колана ногӧн.

Великӧй Отечественнӧй война пансьытӧдз шӧр могыс вӧлі кыдз позьӧ ӧдйӧджык бырӧдны музыкаын кольччӧмсӧ. Быдлаын — сиктъясын, вӧр посёлокъясын, велӧдчанінъясын — котырталӧны народнӧй инструментъяса оркестръяс. Кулӧмдінса районнӧй культура керкаын татшӧм оркестрнас веськӧдліс том скрипач, детдомын быдмӧм Александр Осипов. А баянӧн сыкӧд ворсіс школьник Василий Рассыхаев^Рассыхаев Василий Николаевич, коми актёр да гижысь, Коми АССР-са заслуженнӧй артист (1960 во), Коми АССР-са народнӧй артист (1971 во)./^. Кыкнанныслы налы ар дас вит–дас квайт, ӧтиыс бӧрынджык лоӧ композиторӧн, мӧдыс — артистӧн. 1939 воын найӧ мунасны велӧдчыны, ӧтиыс — Вӧлӧгдаӧ, музыкантӧ, мӧдыс — Москваӧ, театральнӧй институтӧ.

Коми культура ӧддзӧдан кадӧ пансис война. Енбиа том йӧзысь джынйыс усис. На пӧвстысь мукӧдыс сӧмын гоз-мӧд кывбурӧн и удитісны йӧзӧдны, либӧ шедӧдны серпасалысь бур ним да неуна уджыштны. Мукӧдыс велӧдчысьяслӧн смотр-олимпиада дырйи петкӧдлісны асьсӧ сьылысь-йӧктысь либӧ музыка ворсысьяс пӧвстын медбуръяс лыдын. Унаӧс на пиысь виччысис водзӧ велӧдчӧм, коми культураын уджалӧм.

1940 воын Осипов бӧр нин локтӧ Сыктывкарӧ. Гӧля олӧм понда Вӧлӧгдаса музыкальнӧй училищеын велӧдчӧмсӧ лоӧ эновтны. Сійӧс босьтӧны сьылан да йӧктан ансамбль штатӧ, а во джын мысти петӧ КЭБ-са^КЭБ — Концертно-эстраднӧй бюро (ӧні филармония)./^ директорлӧн тшӧктӧм: «Назначить А. Осипова руководителем щипковой группы». «Вӧрлэдзысь» газетын 1941 вося апрель 15 лунӧ гижӧны:

«Заслуживайтӧ бур боксянь тӧдчӧдӧм домрово-балалаечнӧй оркестр (руководительыс том музыкант Осипов). Кӧть лыд боксянь сійӧ и ичӧт, звучитіс стройнӧя, ворсӧмыс слаженнӧй, тырвыйӧ передайтӧ народнӧй песняяслысь содержаниесӧ. Сэк жӧ бледнӧй вӧлі баянистъяслӧн трио. Брамслысь 5-ӧд номера венгерскӧй танец абу омӧльтор, но быд концертнӧй рытӧ сійӧс кывзыны абу интереснӧ. Коллектив составын эмӧсь том талантливӧй артистъяс, музыкантъяс, сьылысьяс, танцоръяс. Колӧ быдтыны да велӧдны найӧс».

Война водзвылын «Коми комсомолец» газет 1941 вося июнь 21-ӧд лунся номерын юӧртӧ: «Сьылӧм да йӧктӧм кузя ансамбль приглашайтӧ ансамбльын уджалӧм вылӧ сьылысьясӧс да йӧктысьясӧс, удждоныс 150-сянь 600 шайтӧдз». А регыд гижысьясӧс и артистъясӧс босьтӧны армияӧ, творческӧй котыръясысь чинтӧны штатсӧ. Осиповӧс ыстӧны Абъячойса театрӧ, кӧні первойя мобилизация бӧрын сюрис удж. Призывнӧй пунктъясын котыртӧны концертъяс, лӧсьӧдӧны военнӧй репертуар, удж вылӧ босьталӧны мукӧдлаысь эвакуируйтӧм искусствоын уджалысьясӧс; тупкысьӧны Изьваса театр, коми журнал, том войтырлы газет...

1941 вося сентябрын, Москва бердын кык тӧлысся обороннӧй уджъяс бӧрын, коми студия, кӧні велӧдчис В. Рассыхаев, вуджӧдӧны Сыктывкарӧ. Студентъяс босьтасны артистъяслысь дипломъяс во джын мысти, кор А. Осипов лоӧ нин фронт вылын. Ранитчылӧм да госпитальясын во джын бурдӧдчӧм бӧрын сійӧс демобилизуйтӧны. 1943 во заводитчигӧн ёртъяс бара паныдасясны, а март тӧлысьын босьтчӧны пуктыны ӧтлаын «Зарни кыв» спектакль.

Ставныслы тайӧ лои медводдза уджӧн: А. Г. Осипов первойысь на гижис театрлы музыка да ачыс дирижируйтіс; бур актёр С. П. Бутиков^Бутиков Серафим Пантелеймонович, Коми АССР-са заслуженнӧй артист (1943 во)./^ таӧдз эз режиссёравлы; прозаик В. В. Юхнин эз на видлы вынсӧ драматургияын; 1942 воын В. Н. Рассыхаев ворсліс ГИТИС-са коми студияын велӧдчысьяслӧн дипломнӧй спектакльясын. А ӧні налы воссис профессиональнӧй сцена вылын туй, и Рассыхаевлӧн вӧлі «багатыр Ӧльӧксанлӧн» шӧр роль.

Спектакляс ыджыд тӧдчанлун музыкалӧн: ворсӧмыс пансьӧ и помассьӧ хоръясӧн. Заводитчигас хор сьылӧ вӧр-ва садьмӧм йылысь, помас ыдждӧдлӧны войтырӧс вӧрӧгӧс вермӧмысь. Медым ёнмӧдны спектакляс лирическӧй нырвизь, композитор гижис шӧр геройяслы некымын сольнӧй номер. Со кыдзи донъяліс тайӧс Я. М. Рочев^Рочев Яков Митрофанович, коми гижысь. Фронт вылӧ эз босьтлыны, уджалӧма издательствоын, 1951 воын помалӧма «Кык друг» роман./^:

«Музыкальнӧй оформление ставнас бур, но том композитор да постановка дырйи музыкаӧн руководитель А. Г. Осиповлы колӧ индыны, мый торъя местаясын музыка шысӧ абу лишнӧй чинтыны, торйӧн нин Еленалӧн, Ӧлександрлӧн да Дед Морозлӧн арияяс сьылігӧн, медым бурджыка дойдитіс текстыс. Тарабукина бура ворсіс Еленаӧс, но эз вермы передайтны зрительлы содержаниесӧ сійӧ сочнӧй лирическӧй песнялысь, кодӧс сьылӧ Ӧлександрӧс туйӧ колльӧдігӧн». («Вӧрлэдзысь», 10 апреля 1943 г.)

В. Н. Рассыхаевлысь сьылӧмсӧ рецензент эз донъяв, и со мыйла. Кыдзи висьталӧ Анна Фёдоровна, верӧсыс сӧмын восьталӧма вомсӧ, а сьыліс сы пыдди Ленинградса консерватория помалӧм бӧрын гортас неважӧн локтӧм нималана коми баритон Пантелеймон Осипов^Осипов Пантелеймон Александрович, медводдза коми профессиональнӧй сьылысь./^ (1906–1953).

«Зарни кыв» пуктӧм лоис тшӧтш и драмтеатр сцена вылын национальнӧй мойд первойысь ворсӧмӧн. Ӧд войнаӧдзса национальнӧй репертуар кызвыннас вӧлі драмаясысь: «Джуджыд запань», «Кырнышъяс», «Мужество», «Усть-Куломское восстание», «Домна Каликова» (авторъясыс С. И. Ермолин да Н. М. Дьяконов).

А. Г. Осиповкӧд да В. Н. Рассыхаевкӧд сцена вылын ворсӧмын да музыкаын медводдза воськовъяс вӧчисны и бӧрыннас нималана йӧзӧн лоысь тшӧтшъяясыс. 1936 восянь Сыктывкарын челядьлы художественнӧй студияӧ ветлісны В. В. Есева да Т. С. Клочкова (хор), Т. Д. Батиева (йӧктӧм). 1939 воын челядьлы музыкальнӧй школа восьтӧмсянь сэні велӧдчисны операын сьылысь да режиссёр И. П. Бобракова, скрипач Н. Н. Маегов ^Маегов Николай Николаевич, Сыктывкарса музыкальнӧй училищеӧн веськӧдлысь, скрипкаӧн ворсны велӧдысь. Коми Республикаса культураын заслуженнӧй уджалысь (1987 во)./^, баянӧн ворсысь да композитор Я. С. Перепелица. Бӧрынджык найӧ велӧдчисны Сыктывкарса музыкальнӧй училищеын, а сэсся и консерваторияясын.

Дас вит арӧса зон Яша Перепелица пельпом вылӧ война ӧшйис сьӧкыд нопйӧн: мукӧддырйи сійӧ кольліс сьылан да йӧктан ансамбльын дзик ӧти баянистӧн. А школасӧ эновтӧм Маегов Коля 1942 воын пырис велӧдчыны ремесленнӧй училищеӧ и практика дырйиыс куим навигация ветліс кочегарӧн да судомеханикӧн Сыктыв да Эжва кузя. 1944 воын сійӧ виччысьтӧг паныдасис войнаӧдзса концертъяс кузя тӧдса А. Осиповкӧд. Сійӧ, вӧлӧм, ветлӧ концертнӧй бригадаӧн Сыктыв пӧлӧнса сиктъясӧд. Тайӧ и ловзьӧдіс бӧр скрипкаӧн ворсны кӧсйӧмсӧ.

Дзик томӧн, веськыда самодеятельносьтысь, воськовтіс музыкаӧ композитор П. И. Чисталёв. Войнаӧдзыс на сійӧ петкӧдліс асьсӧ уна концертын, смотрын да радиопередачаын. Первойсӧ кыдзи пионер-затейник, сэсся кыдзи и Нювчимса клубын оркестрант да аккомпаниатор, школаса мероприятиеяс дырйи скрипкаӧн да баянӧн ворсысь. И бӧрыннас, Коми пединститутын велӧдчигас нин, выступайтігас сійӧ ворслывліс коми мелодияяс.

Война вит во вылӧ орӧдіс П. И. Чисталёвӧс музыкальнӧй олӧмысь. Демобилизуйтчӧм бӧрас сійӧ велӧдіс школаын математика и музыкантлӧн аскиа лун йылысь эз мӧвпав. Бӧрыннас, Наукаяс академиялӧн Коми филиалын уджалігӧн нин, диссертация гижигас, сійӧ письмӧын юаліс А. В. Каторгинлысь Комиын война кадся музыка йылысь. Мӧдыс вочавидзис, мый медбура та йылысь тӧдӧ Осипов Саша.

И збыль, война кадся сьӧкыдлунъяс вылӧ видзӧдтӧг, Коми АССР-са музыкальнӧй искусство кыптіс. Отсалісны талы Москваысь корӧм композитор, профессор А. А. Воронцов^Воронцов Александр Александрович, Москваса консерваторияысь профессор. Коми правительстволӧн корӧм серти воис Сыктывкарӧ юрнуӧдны сьылан да йӧктан ансамбльӧн. Тані и кувсьыліс 1943 воын./^ да Россияын медбур хормейстеръяс пиысь ӧти, Удмуртияса искусствоясын заслуженнӧй деятель А. В. Каторгин.

1939 воын котыртӧм Коми АССР-са сьылан да йӧктан ансамбльӧн корисны веськӧдлыны Аполлон Васильевич Каторгинӧс. Кыдзи и войнаӧдзса кадӧ, медся ыджыд тӧдчанлуныс вӧлі веськӧдлысьлӧн авторитет да уджас вӧйтчӧм сайын. А. В. Каторгин вайӧдіс сэтчӧдз, мый нывбабаяс велалісны сьывны «а капелла» мужичӧйястӧг. Тайӧ ыджыд сямыс шедіс сьӧкыд уджӧн: уна репетируйтісны, опыта сьылысьяс велӧдісны том войтырӧс колана ногӧн лолавны, пуктыны дикция, бӧрйыны репертуар. Весиг кор эз лоны мужичӧйяс, хор сьыліс колана ногӧн. 1943 воын штатӧ бӧр пондісны босьтны мужичӧйясӧс, сэки и мыччысис сэн А. Осипов: гӧлӧсыс сылӧн эз вӧв ён, но сьӧлӧмыс кыскис уджавны Каторгинкӧд. А вакансияяс воссисны сӧмын хорын на.

А. Г. Осипов «О коми музыке и музыкантах» книгаас шуис сылысь репетицияяссӧ «настоящая школа для молодых певцов и хормейстеров». На лыдӧ Александр Георгиевич пыртіс и асьсӧ. 1947 воын А. В. Каторгин муніс Комиысь и хор кутіс сьывны лёкджыка, но кор 1950 — 1952 воясӧ хоркӧд пондіс уджавны А. Г. Осипов, уджыс бӧр ладмис.

А. В. Каторгин гӧгӧрвоис национальнӧй репертуар вӧсна кывкутӧмсӧ. Та понда и сьӧлӧмсяньыс зільӧмӧн велӧдіс коми кыв да йӧзкостса сьыланъяс, дасьтыліс найӧс хорлы. И. Куратовлӧн, М. Лебедевлӧн да Н. Фроловлӧн кывбуръяс серти вӧчӧм «Коми кыв», «Кутшӧм шоныд да лӧнь», «Вычегда вылын» произведениеяс лоины национальнӧй хорӧвӧй музыкаын югыд кодзувъясӧн.

1941–1942 воясӧ А. А. Воронцов коми йӧзкостса шылад чукӧртысь да бура тӧдысь П. А. Анисимов отсӧгӧн гижӧ ыджыд музыкально-драматическӧй произведение — «Усть-Куломскӧй восстание» опера. Медшӧр инсӧ сэні кутӧ музыка. Кывбуръяса либретто гижисны С. И. Ермолин да Н. М. Дьяконов, хормейстернас вӧлі А. В. Каторгин, симфоническӧй оркестрнас дирижируйтіс А. А. Воронцов, серпасаліс В. А. Баусов. Шӧр рольяс ворсісны Н. И. Ярапов, И. М. Терентьев да А. С. Морозова. Премьерасӧ ворсісны 1942 март помын драмтеатр сцена вылын (стӧч лунсӧ шуны ог вермӧй).

Медым гӧгӧрвоны йӧзкостса сьыланкыв ловсӧ, кӧрсӧ, русӧ, Александр Александрович ветліс коми сиктъясӧд. Колӧ вӧлі кывзыны, кыдзи сійӧ олӧ йӧз пӧвстас. Сиктса сьылысьяс дорӧ ветлытӧг, кӧні войтырыс воссьӧ быд боксянь, национальнӧй музыка он лӧсьӧд.

Официальнӧй изданиеясын «Усть-Куломскӧй восстание» шуӧны музыкальнӧй драмаӧн. Музыка йылысь медводдза статьяас («Войвыв кодзув», 1951-ӧд вося 5 номер) А. Г. Осипов нимтӧ сійӧс операӧн. «О коми музыке и музыкантах» небӧгын (1969 во), а водзынджык и аслас диссертацияын (1965 во), А. Осипов видлалӧ А. А. Воронцовлысь музыкасӧ да вӧчӧ кывкӧртӧд: «В сочинении этом есть всё, что характеризует сложное синтетическое произведение, — оперу: арии, ансамбли, хоры, песни, речитативы».

«Усть-Куломскӧй восстание» опера дыр кад кежлӧ лои национальнӧй музыкаын медвылыс тшупӧдӧн. Кар пасьталаысь чукӧртӧм прӧстӧй йӧзысь да профессионалъясысь оркестр, ансамбльса хор да йӧктан юкӧн, кызвыннас ГИТИС-са студияын велӧдчысь театрса актёръяс — найӧ ӧтвылысь вермисны пӧртны сцена вылын А. А. Воронцовлысь да авторскӧй группалысь мӧвпсӧ. Театрын музыкально-драматическӧй произведениеяс пуктігӧн творческӧй кужанлун паськӧдӧмын медся тӧдчана пай вӧлі ансамбльса ыджыд профессионализма хорлӧн.

А медводдза коми музыкальнӧй драмаӧн, кодлы музыкасӧ гижис Москваысь профессиональнӧй композитор Б. М. Терентьев, вӧлі «Шыпича» спектакль (1941 вося март). Не кӧ война, «Шыпича» да «Усть-Куломскӧй восстание» эськӧ дыр кежлӧ пырисны репертуарӧ, да, дерт, сетісны национальнӧй театральнӧй искусстволы нырвизьсӧ, либӧ кӧть нин кутшӧмакӧ тӧдчисны сы вылӧ. Со кыдз гижис «Шыпича» йылысь актёр да режиссёр В. Г. Григорьев:

«Спектакль «Шыпича» — начало того пути, по которому театр должен идти в дальнейшем. Это путь создания музыкальной драмы на материале народных легенд, сказаний и песен. Это путь объединения в театре всех элементов народного творчества. На этом пути театр ждёт действенной помощи от всех, кто знает, любит и изучает творчество коми народа.

От всех фольклористов, сказителей, поэтов, писателей, хоровиков, певцов и танцоров. Такая помощь даст театру возможность и в дальнейшем создавать подлинно народные произведения» («За новый Север» газет, 1941 вося апрель 5 лун).

«Зарни кыв» бӧрын вӧлі нӧшта кык спектакль, кӧні юргис национальнӧй музыка: «Война лунъясӧ» да «Домна Каликова» (авторъясыс С. Ермолин да Н. Дьяконов). Куимнан спектакляс корлісны сьылан да йӧктан ансамбльлысь хор, кӧні 1944-ӧд вося октябрсянь 1945-ӧд воын велӧдчыны мунтӧдзыс хормейстераліс А. Осипов. Оз прӧста 1943–1945 воясӧ драмтеатрбердса студияын велӧдчылӧм морт, Л. А. Лыткин, шу, мый сійӧ кадас А. Осиповӧс позьӧ вӧлі тшӧкыда аддзывны театрысь. Кыскисны сійӧс ас дінас и студияса том войтыр.

1943 да 1945 воясын Коми республикаса творческӧй вынъяс видзӧдан смотръяс кежлӧ спектакльяссӧ дасьтісны торъя кыпыдлунӧн да сюся видзӧдӧмӧн, ӧд налы коліс петкӧдлыны национальнӧй искусстволысь вермӧмъяссӧ.

1945 вося мартын смотрас петкӧдчисны РСФСР-са дас кык национальнӧй театр и миян босьтіс мӧд премия. Комиссия торйӧн пасйис енбиа драматург да режиссёр Н. М. Дьяконовӧс, коді пуктіс смотрын петкӧдлӧм куимнан спектакльсӧ (коймӧднас вӧлі «Слуга двух господ»). Чайтам, комиссия пасйис тшӧтш и сы вӧсна, мый постановкаясын вӧлі уна музыкаыс.

Национальнӧй драматургияын «Война лунъясӧ» пьеса лои медводдза лирическӧй комедияӧн. Бӧрынджык А. К. Микушев сы йылысь гижис тадзи: «Обретение творческой самостоятельности у Н. М. Дьяконова началось несколько позднее, в середине 1940-х годов, с пьесы «В дни войны» — этого первого подступа к «Свадьбе с приданым». Именно в этой пьесе военной поры приоткрылся истинный дар автора — дар, получивший полное раскрытие в лирической комедии «Свадьба с приданым». (А. К. Микушев. «На таёжных просторах». Москва, 1986).

Война помланьыс лои гӧгӧрвоана, мый национальнӧй драма театрсӧ колӧ вӧчны коми музыкально-драматическӧй театрӧн. Сэки музыкальнӧй школаысь ӧтдор Сыктывкарын вӧлі музыкальнӧй училище. 1947 воын сійӧ медводдзаысь лэдзис специалистъясӧс. Комиын сэки татшӧмсяма театръяс вӧліны сутуга сайын: Абезь посёлокын — музыкально-драматическӧй театр Ухтаын — музыкальнӧй комедия, опера да драма театр. Абезьса сэки шусис сьылан да йӧктан ансамбльӧн.

Уна во мысти С. М. Попова гижис: «Чайтсьӧ, эз кӧ вӧв война, код вӧсна спектакльса уна ворсысьяслы лоис мӧдӧдчыны фронт вылӧ, миян республикаын эськӧ сэки нин чужис музыкальнӧй театр. И тайӧ театрыс вӧлі эськӧ национальнӧйӧн: ӧд спектакльсӧ вӧлі сувтӧдӧма коми кыв вылын.» («Юргы, коми сьыланкыв!», «Войвыв кодзув» журнал, 1972 вося 12 номер, 57 л.б.).

Медводдзаысь Н. Дьяконовлысь да С. Ермолинлысь «Домна Каликовасӧ» пуктісны 1942 вося мартын ГИТИС бердса коми студия помалысьяс дипломнӧй уджӧн. Но регыд унаӧн на пиысь, кыдзи и мукӧд коми актёрыс, мунісны фронт вылӧ. 1945 вося мартын выльысь пуктігкежлӧ пьесасӧ выльмӧдісны, Коми АССР-са сьылан да йӧктан ансамбльса артистъяс да хор сьылісны спектакляс коми йӧзкостса да революционнӧй сьыланъяс.

Коми музыка сӧвмӧм вӧсна ёна тӧждысьысь морт, математик Н. А. Фролов^Фролов Николай Адрианович (Сук Парма) — коми поэт. 1936 воын на «Шыпича» легенда серти йӧзӧдлӧма опернӧй либретто. Дас во мысти мӧд пӧв босьтчыліс гижны-выльмӧдны, медым вайӧдны операсӧ сценаӧдз. Но музыка лӧсьӧдысьыс ӧнӧдз абу./^ 1945-ӧд вося мартын воліс Сыктывкарӧ командировка могӧн. Со мый сійӧ гижис «Домна Каликова» спектакль йылысь: «...постановщики ведут в нескольких местах в форме оперы, хоть это и вредит реалистическому плану спектакля». («О коми национальной музыкальной культуре», «За новый Север» газет, 1945 вося март 24 лун).

Домна Каликовалы сиӧм телефильм вылӧ (петкӧдлӧма 1981 воын) рецензияын В. А. Латышева гижӧ фильмын музыка йылысь: «Сыктывкарса телевидениелы тайӧ жанрыс выль пӧлӧс. Ми аддзам сцена вылысь драма... и документ, кодӧс сетӧма экран пасьта... и оратория кодь сьылӧмлӧн юргӧм... Режиссёр сетӧ Домналы позянлун петны туйӧ верзьӧмӧн... петкӧдлыны сійӧс сьылігӧн...»

«Спектакльлӧн меднор здукъясӧ кылӧны Нёбдінса Витторлӧн «Югыд кодзув» сьыланкыв шыяс... Эпиграф пыдди и эпилог пыдди мандолиналӧн оръясян вӧсни шыяс быттьӧ бӧрдӧны коми нывлӧн юр весьтын. (Рытпукалысьяс сьылісны «Югыд кодзув» нора, том кадсӧ казьтыліг. Сергей сьыліс сійӧс гудӧкасигӧн. Домна вежӧрын Сергей бара ворсӧ сійӧс вӧрын...) Нёбдінса Виттор быттьӧ тӧдіс коми йӧзлысь югыд, сӧстӧм олӧмлань сетчӧмсӧ. Тайӧ сьыланкывйыс быттьӧ Домна йывсьыс и эм». («Войвыв кодзув» журнал, 1981 вося 12 номер).

Тайӧ кык постановкасӧ позьӧ ӧткодявны сы вӧсна, мый телефильмсӧ пуктысь режиссёр Василий Асекритович Худяев радейтіс музыка, велӧдчис сьывны Сыктывкарса музучилищеын. Сійӧ эз сӧмын аддзыв 1945 вося постановкасӧ, но вермис и ачыс ворсны сцена вылын, ӧд буретш сэки велӧдчис коми драмтеатрбердса студияын.

Вермас лоны, сійӧ спектакляс тшӧтш юргис «Югыд кодзув» сьыланкыв. П. А. Осиповлӧн 1945-ӧд вося репертуарыс эз на вӧв ыджыд, и тайӧ сьыланкывйыс вӧлі медся лӧсяланаӧн. А мӧд сэтшӧм сьылысь Сыктывкарын сэки эз вӧв. Мыйлакӧ ӧд режиссёрыс вӧчис «Югыд кодзувсӧ» Домна образлы музыкальнӧй темаӧн. «О коми музыке и музыкантах» небӧгын авторыс висьталӧ: тайӧ сьыланкывйыс пӧ вӧлі артистлӧн радейтанаяс лыдын и сійӧ сьыліс «без унылой грусти, как поётся обычно, в хорошем, жизнеутверждающем настроении и темпе». Гашкӧ, Глафира Сидороваӧн сцена вылын лӧсьӧдӧм Домналӧн образыс и чуйдіс тадзисӧ сьывны?

«Если учесть, что, кроме композиторских и исполнительских сил, имеющихся сегодня, мы можем рассчитывать и на музыкальное училище, силами которого в тот же день был дан хороший концерт по радио, а также на помощь со стороны композиторов Москвы и Ленинграда, то можно смело сказать, что уже наступило время создания таких крупных музыкальных произведений, как оперетта и опера. Надо только энергично вести работу по вербовке в Ансамбль песни и пляски новых артистов, а также готовить из числа лучших артистов хора солистов и создать симфонический оркестр». («За новый Север» газет, 1945 вося март 24 лун).

Ставӧн гӧгӧрвоӧны, мый музыкаын колӧ дасьтыны национальнӧй кадръяс, ыджыд национальнӧй произведениеяс (операяс, симфонияяс), да выльмӧдны репертуар. 1947-ӧд вося ноябр 15 лунӧ Сыктывкарын творческӧй интеллигенциялӧн чукӧртчигӧн тайӧ и лои шӧр кывкӧртӧднас.

1950-ӧд воясӧ сьылан да йӧктан ансамбль и КЭБ вынъясӧн петкӧдчис И. Дзержинскийлӧн «Тихий Дон» операын бӧръя хор, М. Глинкалӧн «Руслан и Людмила» да «Иван Сусанин» операясысь хоръясыс. Сэки жӧ пуктылісны А. Бородинлӧн «Князь Игорь» операысь «Половецкӧй пляскаяс».

1953 воын Коми АССР-са заслуженнӧй артист А. А. Осипов куліс, и коми кывъя опернӧй сьылысь эз ло. Комиӧн босьтчис сьывны Б. С. Дейнека. Сы репертуарын вӧліны кыдзи комиӧн гижӧм, сідз и роч классикаысь вуджӧдӧм произведениеяс: М. Глинкалӧн «Сомнение» да «Иван Сусанин» операысь Сусанинлӧн ария (комиӧдіс С. Попов); «Усть-Куломское восстание» операысь Корысьлӧн ария.

Кывкӧртӧд

Великӧй Отечественнӧй война заводитчис Коми АССР-са сьылан да йӧктан ансамбльлӧн тшук медводдза концертнӧй сезон помасян кадӧ. Ыджыд профессионализма коллективӧдз сійӧ быдмис война воясӧ. Ансамбльлӧн сӧвмисны традицияяс да аслас творческӧй «чужӧмбан». Ставыс тайӧ лоис А. В. Каторгинлӧн веськӧдлӧм улын. Хорлӧн сьылан национальнӧй репертуар содіс А. В. Каторгин обработкаа «Василиса справитчис», «Тувсов вой», «Доли-шели» и мукӧд коми сьыланкывъясӧн. Таысь ӧтдор репертуарӧ пырисны и «Усть-Куломскӧй восстание» операысь «Ызгы валйӧн», «Тырмас, шань», «Сувтӧй, вокъяс», кӧлыся «Ирина да Марина»; композитор А. Г. Осиповлӧн воддза сьыланкывъясыс.

Война кадӧ агитбригадаясӧн республика пасьта ветлігӧн ёнмисны драмтеатрса да сьылан-йӧктан ансамбльса артистъяс костын творческӧй йитӧдъяс. Ӧтув вынӧн пуктісны куим музыкально-драматическӧй спектакль да 1941 вося тулысын «Шыпича». Позьӧ шуны, ӧнія Коми шылада-драмаа театрлӧн (1992–2008 воясӧ — фольклор театр) предысторияыс озыр.

1943–1945 воясӧ драмтеатрлӧн национальнӧй репертуарын мыччысисны выль жанръяс: пьеса-сказка да лирическӧй комедия. А. Г. Осипов лои театрлы национальнӧй музыка гижысь асланым медводдза композиторӧн.

Война кадӧ профессиональнӧй коми артист котырысь — ГИТИС помалысьяс пиысь мӧд кӧленасьыс — бура асьнысӧ петкӧдлісны Г. П. Сидорова да Ю. И. Трошева; режиссёрлысь профессия босьтіс том артист-самородок С. П. Бутиков, пондісны сетны концертъяс нималана коми сьылысьяс П. А. Осипов да В. В. Есева, зэв ыджыд пай енбиа том коми войтырӧс велӧдӧмын музучилищеса завуч К. В. Козлов сайын.

Татшӧмӧн ми аддзам война кадся коми музыкальнӧй да драматическӧй искусстволысь историясӧ. Чукӧрмис сійӧ коми музыкант-фронтӧвикъяслӧн биографияысь ӧтлаӧдӧм фактъясысь да рӧдвуж-ёртъяс казьтылӧмъясысь.