ГАЖА ЛУНЪЯС

Югъялӧ, дзирдалӧ шонді, кисьтӧ ассьыс югӧръяссӧ му вылӧ, вӧтлӧ-сывдӧ еджыд лымсӧ, тыртӧ ваӧн джуджыд сёнъяссӧ.

Помасис кӧдзыд тӧвлӧн нэмыс. Локтіс сы пыдди шоныд тулыс, вайис йӧзлы гажа лунъяс.

Видзӧдліс уджалысь морт шонді вылӧ, кывзыштіс кыдзи шоръяс жургӧны, кыдзи лэбачьяс пуяс вылын сьылӧны, сэсся пырис керкаӧ дай шуис:

— Тырмас, челядь, миянлы ӧшинь дорын пукавны да ытва вылӧ видзӧдны! Ковмас, буракӧ, лун куим мысти му вылӧ гӧрйӧн петны, тувсов удж уджавны!

Ловзис сьӧлӧм уджалысь мортлӧн, долыд лои челядьыслы. Некодӧс эз повзьӧд тувсов уджыд. Татшӧм гажа лунъясӧ майбырӧй позьӧ нин уджавнытӧ.

Кыскис уджалысь морт сайникысь гӧр да пиня, гӧгӧр видлаліс, жугавлӧм инсӧ вӧчыштіс. Сэсся кӧйдыс лӧсьӧдіс, вӧлӧс бурджыка вердіс дай ӧти асывводзӧ му вылӧ гӧрйӧн петіс.

Ветлӧдлӧ му вывті гӧрысь, югдӧдӧ ассьыс гӧрсӧ, му пластъяссӧ лэптӧ, кӧйдыслы небыд узянін вӧчӧ. Бӧрсяньыс джуджыд бӧрӧзда кольӧ. Гӧрысь бӧрся детинаыс вӧтлысьӧ, бӧрӧздаӧ куранӧн куйӧд лэдзӧ, мед муыд вынаджык лоӧ, мед няньыс бурджыка быдмас.

— Но, Карко, но-о! Бӧрӧзда! — горӧдлас вӧв вылӧ гӧрысь, сэсся бара водзӧ мунӧ, оз эштыв весиг пӧсьсӧ чужӧм вылысь чышкыны.

Помасис гӧрысьлӧн гӧрӧм, шойччыштіс сійӧ му дорын, сёйыштіс, куритчыштіс, гажа лунъяссӧ ошкыштіс, сэсся кӧдзны заводитіс.

Лэбзьӧ, киссьӧ зарни ид гӧрӧм му вылӧ, усьӧны тусьяс кытчӧ кӧдзысьлы колӧ, лӧсьыд налы лоӧ небыд вольпасьын куйлыны...

Детинаыс пинёвтіс мусӧ.

— Тан эськӧ, буракӧ, эштіс, — шуис уджалыс морт. Ӧні ковмас мӧд му вылӧ мунны тайӧ жӧ уджавны. Оз позь ӧні гӧрысьлы жуйявны.

Муніс уджалысь морт мӧд му вылӧ, бара гӧрны кутіс. Видзӧдӧ сы вылӧ югыд шонді, пӧльтӧ чужӧмас шоныд тӧв. Гӧгӧрыс сьылӧны мича лэбачьяс, быдлаын ызгӧны тэрыб шоръяс. Лӧсьыд гӧрысьлы гажа лунъясӧ уджавны. Лӧсьыд сылы коркӧ лоӧ выль воӧм няньсӧ сёйны.