ИЧӦТ ВАНЯ

Фронтсянь ылын, пыді тылын,
Ичӧт сиктын, мамыс дінын
Оліс Ваня, ичӧт морт. 
Батьыс врагкӧд венсис ылын, 
Мамыс асывсянь удж вылын, 
Ичӧт Ваня оліс горт.

Ӧтчыд воис сылӧн чожыс, 
Кодлы тӧдса став туй вожыс, 
Кык во чӧж нин пуис кось.
Воис сэсянь, батьыс кӧні, 
Киыс ранитчӧма ӧні, 
Бурдтӧдз лыйсьыны оз позь. 

Уна быдтор чожыс мойдіс. 
Мамлысь сьӧлӧм ёна дойдіс
Сылӧн мукӧд курыд висьт.
Сійӧ висьтавліс, кыдз пурӧ
Йӧзӧс немец, коді сюрӧ,
Вирысь муртса шор оз письт.

Мортӧс ловйӧн дзебӧ гуӧ.
Кыдзи скӧтӧс вӧтлӧ, нуӧ,
Мырддьӧ челядьяслысь мам.
Сиктъяс, каръяс кушӧдз сотӧ.
Кывзіг сьӧлӧм шогла потӧ.
Дурмӧм зверлӧн враглӧн сям.

Но тай сэки кывзӧ шаня,
Кывзӧ ломдзан синмӧн Ваня,
Мыйӧн сёрни пансьӧ мӧд,
Мыйӧн сы йылысь висьт пансяс,
Кыдзи ветлӧдлӧны танкъяс,
Косьлысь кыпӧдӧны ӧд.

Кыдзи гусеница отъяс
Чагйӧдз дзавъялӧны дзотъяс,
Враглысь няръялӧны ку. 
Пулемёт кыдз врагӧс ытшкӧ,
Кыдз пехота штыкӧн бытшкӧ,
Йиркӧ пушка, гызьӧ му.

Кавалерия тӧвнырӧн
Вӧрӧг кымӧр пытшкӧ пырӧ,
Сабля чардалӧ сё ног.
Уклад чардби врагӧс суӧ,
Кортӧм гӧсьтӧс гындӧ муӧ
Ярмӧм вӧвлӧн дорӧм кок.

Судзсьӧ кось и кымӧр сайӧ,
Кытчӧ сук тшын мусянь кайӧ,
Пуӧ вира кось и сэн:
Бордйӧ кырнышъясӧс варыш,
Бордйӧ сьӧлӧмсяньыс ярысь, –
Миян лётчик перйӧ вен.

Ванюк кывзӧ ставсӧ тайӧ,
Мӧвпнас лэбӧ вӧр-ва сайӧ,
Кӧні гымалӧ ён кось.
Важӧн пиӧс шог оз личӧд,– 
Мыйла арлыд сылӧн ичӧт,
Мунны кось вылӧ оз позь.

Но оз сетчы, нинӧм вӧйпны,
Кӧть мед мый, а врагӧс нӧйтны
Кӧсйӧ Ваня, ичӧт морт.
И збыль нӧйтӧ врагӧс сійӧ, 
Нӧйтӧ ёна, нӧйтӧ, виӧ,
Кӧть оз кольлы ылӧдз горт.

Ветлӧ сиктӧд лунысь лунӧ,
Мукӧд дырйи сёйӧм вунӧ,
Шобӧ мудӧд, карта дор,
Сійӧ чукӧртӧ сім кӧртъяс,
Чегӧм коса, розя пӧртъяс,
Ыргӧн, жӧч доз, свинечтор.

Ӧктас мый, – заводын сылӧ
И оружйӧӧн фронт  вылӧ
Мунӧ выльмӧм, ёнмӧм кӧрт.
Коса торъяс – бомба пытшкын,
Югйӧм жӧч – граната пытшкын,
Ыргӧн – свинеч шӧра, гӧрд.

Сімӧм, чегӧм, ковтӧм лӧптыс,
Кодӧс Ваня уна ӧктіс,
Нӧйтӧ врагӧс лун и вой.
Свинеч – морӧс сылысь бытшкӧ,
Коса – торпыригӧн ытшкӧ, 
Шырӧ вӧрӧгъяслысь строй.

Мыйӧн петас воддза дзоридз,
Ваня лунтыр, рытъя сёрӧдз
Мудзтӧг гежмалӧ быд бор.
Уна турунлысь ним тӧдӧ, 
Налысь аслас кудйӧ лӧдӧ
Кодлысь вужсӧ, кодлысь кор.

Арын вотӧс косьтӧ уна.
Ставыс госпитальӧ мунӧ, 
Сэні бурдӧдны мед дой,
Сетны выль вын доя киӧ,
Сылы, узьтӧм кодӧс виӧ,
Сетны ловзьӧдана вой.

Медым фронт вылӧ бӧр мунны,
Кось сэн Ваня пыдди нуны
Вермис раненӧй танкист.
Тшӧтш мед Ваня пыдди шырис
Врагӧс, вӧв кокъясӧн нырис
Бурдӧм, збой кавалерист.

Ваня кӧртысь вӧчӧм шерӧн,
Вӧрӧг юр вылӧ мед зэрӧ
Бурдӧм лётчик, бордъя ёрт.
Со тай кыдзи врагӧс нӧйтӧ,
Сотӧ биӧн,  ваӧ вӧйтӧ
Ылі сиктса ичӧт морт.

Ас му вӧсна венсьӧй быдӧн,
Кӧть мед олад фронтсянь пыдын,
Венсьӧй быд ног, быд ног шань.
Коді кӧсйӧ тӧдны, – талун
Кӧні мый Вань, содта налы:
Быдтӧ би кодь збой гӧрд чань.