ЫДЖЫД БӦРДӦМ— Мича райӧй, шондібанӧй, Муса Украинаӧй! Мый нӧ тэкӧд, сё коньӧрӧй, Вӧчӧ “пан Скоропадскӧй”? Кӧн нӧ тэнад вӧльнӧй олӧм — Кытчӧ сійӧ пышйӧма? Шуда луныд, чӧскыд узьӧм — Кытчӧ тэысь дзебсьӧма? Мыйла нӧ тэ ассьыд йӧзтӧ Сьӧлӧм дінсьыд йӧткыштін? Кодлы сетан пиянъястӧ, Мыйла найӧс быдтӧдін? — Оз нин волы, муса йӧзӧй, Кокньыд олӧм миянлы, Оз нин лолы, бур вокъясӧй, Долыд пӧра некодлы. Дзескыд-сьӧкыд олӧм лои — Некытчӧ и пышйыны!.. Войсянь кӧ эськӧ тӧлыс лоӧ — Позьӧ на надейтчыны: Бур йӧз, гашкӧ, кыдзкӧ-мыйкӧ, Вермасны на мездыны, — Он кӧ дорйӧ — Скоропадскӧй Ловйӧн пондас ньылавны... Тадзи став йӧз Украина-н Гырысь синва-н бӧрдӧны, Скоропадскӧй румка вина-н Кӧсйӧ найӧс гажӧдны... Гажа оз ло коньӧръяслы — Водзвыв позьӧ висьтавны: Тайӧ вина юысьяслы Шогӧн лоӧ палявны; Сы понда, дерт, “Ыджыд Гетман” Кабакъяс бӧр восьталӧ, Мед став йӧзыс ылалӧмӧн Сулеяяс босьталӧ, А сэк костті аслыс вылӧ Власьтсӧ ёна крепитас, Мед йӧзыслӧн оз ло выныс Кутны “революция-с”, Медым найӧ оз кыпӧдлӧ “Гетман” вылӧ юръяссӧ... Гашкӧ-й, мӧдтор (коді тӧдӧ?) Сылы мыйкӧ думайтсьӧ, — Чиг прӧста жӧ, дерт, эз пукты Кабак вылӧ деньга ён: Закон вӧчис — кырым пуктіс — “Сё нелямын вит миллён”.
