КОМИ ӦТЛААСЬӦМ ЙЫЛЫСЬ

Коми йӧз (матӧ куимсё сюрс морт) олӧ раз-пельын: эмӧсь комияс миян губерня улын, эмӧсь Яткаса, Кардорса, Перымса, Тобольскӧйса губерняяс улын. Став Коми муыс Франция дорысь ыджыдджык.

А прамӧя коми пиын некутшӧм удж оз мун.

Мый понда?

Ставыс кытчӧсюрӧ разалӧма, кӧнсюрӧ, рочьяс пытшкын, олӧны, и бур вылӧ велӧдны некодлы, сідз олӧны пемыда, нинӧм тӧдтӧг.

Ӧні Мӧскуаын, миян карын, мукӧд Коми инъясын мунӧ ыджыд зіль удж став коми йӧзлӧн ӧтласьӧм йылысь.

Январ 5ʼ лунӧ Сыктывкарын чукӧртчӧ “Съезд” Коми коммунистъяслӧн; сёрнияс сэні лоӧны Коми “обласьт” йылысь.

Водзын зэв на уна удж.

Колӧ став коми йӧзлы сьӧлӧмысь отсавны нуӧдны тайӧ уджсӧ.

Ӧтласьӧм бӧрын коми йӧз ёнджыка кутас тӧдны быдтор, сэки воссяс пемыд коми йӧзлӧн син, аддзас, кыдзи бурджыка колӧ овны, сэки ставыс пондас вӧчсьыны комиӧн, коми кывйӧн, коми ногӧн.

Сувтӧ, лӧсьӧдчӧ, отсасьӧ, коми войтыр! Ловзьӧ Коми му.